Read Akha 2 Saˬmeuˬlaˆ 10 Bible Online

2 Saˬmeuˬlaˆ 10 - Akha bible

2 Saˬmeuˬlaˆ 10

¹Aˇ yamˬ ui cuiˆ myahˇ laˇ ngeh jawˇ, Aˬmoˬ sahˬ paˬ Naˬhaˇ shiˇ-awˇ, aˬ yawꞈ-euˬ aˬ li Haˬnuˬ gʼaˬ sahˬ paˬ pyeuꞈ laˇ-euˬ meh.

²Kʼoeˇ ngeh, “Aˬ yawꞈ-euˬ aˬ da Naˬhaˇ ngaˬ-ahˇ saˇ jaˇ ziꞈ-euˬ loꞈ-ehˇ, ngaˇ kʼawꞈ Haˬnuˬ-ahˇ saˇ jaˇ ziꞈ-eu laꞈ kʼoeˇ cawˬ cawˬ taꞈ ma” lehˇ sahˬ paˬ Daˬbiˇ ehˇ-eu meh. Kʼoeˇ naˇ, sahˬ paˬ Naˬhaˇ shiˇ-euˬ miˇ neh aˬ yawꞈ kʼawꞈ, nui ma maˬ saˇ-eu gaˇ kawˆ bi tsaꞈ gaˬ-iˇ-eu gʼaˇ duˬ, Daˬbiˇ tsawˇ haˬ pyehˬ gʼeh-euˬ meh. Ehˇ kʼawꞈ, aˬ yawꞈ-euˬ tsawˇ haˬ kʼoeˇ deuˬ Aˬmoˬ miˇ kʼahˬ-ahˇ iˇ keuˆ ngeh,

³Aˬmoˬ tsawˇ haˬ aˬ yuiꞈ aˬ tsu deuˬ aˬ yawꞈ maꞈ-euˬ sahˬ paˬ-ahˇ heu loꞈ-ehˇ ehˇ nehˬ-euˬ meh. “Nawˬ da shiˇ-euˬ miˇ neh aˬ yawꞈ nui ma maˬ saˇ-eu gaˇ kawˆ bi tsaꞈ gaˬ le-eu gʼaˇ duˬ, tsawˇ haˬ heu deuˬ-ahˇ Daˬbiˇ neh pyehˬ gʼeh leꞈ-euˬ nga lehˇ nawˇ noeˬ te loˇ. Kʼoeˇ loꞈ-ehˇ maˬ ngeuˇ-a. Aˬ yawꞈ aˬ dui-ahˇ guiˇ deuˆ gʼaˬ nya ni, tsawˇ haˬ pyehˬ leꞈ-awˇ meuˬ heu meuˬ-ahˇ bi kʼoeˬ sho haw le-euˬ meh.”

⁴Daˬbiˇ neh pyehˬ gʼeh leꞈ-euˬ tsawˇ haˬ kʼoeˇ deuˬ-ahˇ Haˬnuˬ nyehꞈ-awˇ, mehˬ mahˬ tiˬ paw paˆ jehˆ dzeh nehˬ-euˬ uˬ taꞈ, aˬ yawꞈ maꞈ-euˬ pehˇ kʼahˬ daˇ tsuiꞈ-ahˇ keuˆ ni pyehˆ tsehˆ nehˬ-awˇ, pyehˬ kʼoꞈ gʼeh-euˬ meh.

⁵Tsawˇ haˬ kʼoeˇ deuˬ shaꞈ dawˇ dui dui-eu miˇ neh, iˇ kahˇ-ahˇ maˬ gʼoꞈ keuˆ leˇ peuꞈ-a. Kʼoeˇ loꞈ-ehˇ pyeuꞈ laˇ-euˬ gaˇ kawˆ-ahˇ Daˬbiˇ ya gaˬ ngeh, aˬ yawꞈ maꞈ-euˬ mehˬ mahˬ maˬ mahˇ le kʼoeˇ keuˆ ni, iˇ kahˇ-ahˇ maˬ gʼoꞈ laˇ-ehˇ Yeˬliˇkoˇ meuˬ-ahˇ jawˇ naˬ tawˬ-eu gʼaˇ duˬ bi tsaꞈ gaˬ-iˇ-euˬ meh.

⁶Aˬ yawꞈ maꞈ neh kʼoeˇ loꞈ-ehˇ jahˇ nehˬ-euˬ miˇ neh, Daˬbiˇ aˬ yawꞈ maꞈ-ahˇ muiˇ-eu gaˇ kawˆ Aˬmoˬ tsawˇ haˬ deuˬ noeˬ siˬ ngeh, tsawˇ haˬ pyehˬ gʼeh-awˇ, Behˬleˬhawˇbaˆ meuˬ hawˇ-eu Zoˇbaˬ meuˬ-ahˇ jawˇ-eu Suˇliˆ yehˇ nyiˬ muiˇ gʼaˬ, Tawˇbaˬ meuˬ-ahˇ jawˇ-eu tsawˇ haˬ tiˬ muiˇ nyiˬ heˇ gʼaˬ hawˇ-eu, Mawˇkah sahˬ paˬ hawˇ-eu aˬ yawꞈ-euˬ tsawˇ haˬ tiˬ heˇ gʼaˬ-ahˇ ngaˬ laˬ-iˇ-euˬ meh.

⁷Gaˇ kawˆ kʼoeˇ Daˬbiˇ ya gaˬ ngeh, Yoˇbaˬ-ahˇ guiˇ guiˇ maꞈ maꞈ lah ni bi sheuˬ gʼeh-awˇ, aˬ yawꞈ maꞈ-ahˇ guiˇ bi deuˆ-iˇ-euˬ meh.

⁸Aˬmoˬ tsawˇ haˬ deuˬ doˆ le-awˇ, aˬ yawꞈ maꞈ jawˇ-eu Laˬbah meuˬ-euˬ lahˇ kʼehˬ-ahˇ guiˇ daˬ daˬ-awˇ loꞈ luꞈ-eu meh. Suˇliˆ tsawˇ haˬ deuˬ, Tawˇbaˬ meuˬ-ahˇ jawˇ-eu tsawˇ haˬ deuˬ hawˇ-eu, Mawˇkah meuˬ-ahˇ jawˇ-eu tsawˇ haˬ deuˬ-aˬ, deh ga-ahˇ guiˇ daˬ daˬ-awˇ loꞈ luꞈ-eu meh.

⁹Mehˬ shi paw neh maˬ ehˇ, naˇ kʼah paw neh maˬ ehˇ, aˬ cawˬ aˬ yawꞈ-ahˇ guiˇ deuˆ-eu lehˇ lehˬ hmˬ dah taˬ-euˬ gaˇ Yoˇbaˬ ya mawˇ ngeh, nya dui dui-eu Iˇsaˬleˬlaˆ yehˇ deuˬ-ahˇ aˬ yawꞈ tseˇ doˆ-awˇ, Suˇliˆ tsawˇ haˬ deuˬ-ahˇ deuˆ-eu gʼaˇ duˬ bi lehˬ hmˬ-euˬ meh.

¹⁰Dzeˇ-eu yehˇ deuˬ-ahˇ, aˬ yawꞈ-euˬ aˬ nyiˇ Aˬbiˇshaiˇ aˬ yuiꞈ biˬ geuꞈ-awˇ, Aˬmoˬ tsawˇ haˬ deuˬ-ahˇ deuˆ ceh ceh-eu gʼaˇ duˬ bi lehˬ hmˬ-euˬ meh.

¹¹Aˬbiˇshaiˇ-ahˇ Yoˇbaˬ ehˇ nehˬ-eu, “Suˇliˆ tsawˇ haˬ deuˬ ngaˬ-ahˇ deuˆ gʼaˬ luꞈ-eu ya mawˇ naˇ, nawˇ caw ba le lawˬ. Aˬmoˬ tsawˇ haˬ deuˬ nawˬ-ahˇ deuˆ gʼaˬ luꞈ-eu ya mawˇ naˇ, ngaˇ caw ba le ma.

¹²Gʼaˬ byehˆ maˬ byehˆ ni nui ma kʼaˬ duˬ ni taˬ-awˬ. Aˬ dui-euˬ tsawˇ jeuˬ hawˇ-eu, aˬ dui Miˬyehˇ-euˬ meuˬ deuˬ gʼaˇ duˬ, yaw kʼaˆ kʼaˆ-ehˇ guiˇ deuˆ kaˇ-euˇ. Sahˬpaˬ Miˬyehˇ nui ma tsaˬ-eu jeˬ keuˆ le luꞈ-uˇ.”

¹³Yoˇbaˬ hawˇ-eu aˬ yawꞈ-euˬ tsawˇ haˬ deuˬ guiˇ deuˆ-eu lehˇ, guiˇ daˬ daˬ-awˇ mehˬ hu paw jiˆ peh leˇ ngeh, Suˇliˆ tsawˇ haˬ deuˬ cehˆ byaˆ-euˬ meh.

¹⁴Suˇliˆ tsawˇ haˬ deuˬ cehˆ byaˆ gaˇ Aˬmoˬ tsawˇ haˬ deuˬ ya mawˇ ngeh, Aˬbiˇshaiˇ-ahˇ deuˆ ceh maˬ ceh ni, meuˬ laꞈ kʼoeˇ cehˆ gʼoꞈ uˇ leˇ jiˇ-euˬ meh. Kʼoeˇ naˇ, Yoˇbaˬ-aˬ, Aˬmoˬ tsawˇ haˬ deuˬ-ahˇ guiˇ maˬ deuˆ ni, Yeˬluˇsaˬlehˬ meuˬ-ahˇ gʼoꞈ leˇ-euˬ meh.

¹⁵Iˇsaˬleˬlaˆ tsawˇ haˬ deuˬ neh aˬ yawꞈ maꞈ-euˬ tsawˇ haˬ deuˬ-ahˇ deuˆ gʼaˬ-euˬ gaˇ kawˆ Suˇliˆ tsawˇ haˬ deuˬ ya siˬ ngeh, aˬ yawꞈ maꞈ-euˬ guiˇ maꞈ dawˬ tawˆ luꞈ-ahˇ kuˇ uiˬ-euˬ meh.

¹⁶Sahˬ paˬ Haˬdaˬdeˬzaˬ neh tsawˇ haˬ pyehˬ gʼeh-awˇ, Uˇpaˬlaˇ lawˇ baˬ nahˇ ma doˆ kʼehˬ paw jawˇ-eu Suˇliˆ tsawˇ haˬ deuˬ-ahˇ bi kuˇ laˬ leˇ ngeh, Heˬlamˬ meuˬ-ahˇ aˬ yawꞈ maꞈ oe-awˇ, Zoˇbaˬ meuˬ-ahˇ jawˇ-eu sahˬ paˬ Haˬdaˬdeˬzaˬ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Shoˇbaˆ aˬ yuiꞈ geuꞈ-eu uˬ moˆ, aˬ yawꞈ-euˬ guiˇ maꞈ nehˬ-ehˇ gawꞈ leˇ-euˬ meh.

¹⁷Gaˇ kawˆ kʼoeˇ Daˬbiˇ ya gaˬ ngeh, Iˇsaˬleˬlaˆ guiˇ maꞈ deuˬ-ahˇ aˬ yawꞈ kuˇ uiˬ-awˇ, Yawˇdaˬ lawˇ baˬ tsehˆ doˆ-awˇ, Suˇliˆ tsawˇ haˬ deuˬ aˬ yawꞈ-ahˇ guiˇ deuˆ-eu lehˬ hmˬ-awˇ jawˇ luꞈ-eu Heˬlamˬ meuˬ-ahˇ le-awˇ, deuˆ ceh ceh-euˬ meh.

¹⁸Iˇsaˬleˬlaˆ tsawˇ haˬ deuˬ neh Suˇliˆ guiˇ maꞈ-ahˇ mehˬ nah paw teh kʼoꞈ gʼeh-awˇ, guiˇ deuˆ-eu mahˬ laˆ lawˬ teh-eu Suˇliˆ yehˇ shiꞈ yaˇ gʼaˬ hawˇ-eu mahˬ dziˬ-eu yehˇ oeˬ muiˇ gʼaˬ-ahˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ neh sehꞈ-euˬ meh. Muiˇ-eu deuˬ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Shoˇbaˆ-ahˇ kʼawꞈ aˬ yawꞈ maꞈ deuˆ naˇ nehˬ-awˇ, deuˆ ceh ceh luꞈ ngeh shiˇ-euˬ meh.

¹⁹Haˬdaˬdeˬzaˬ uˆ lahˇ-eu uˬ moˆ jawˇ luꞈ-eu sahˬ paˬ deuˬ, Iˇsaˬleˬlaˆ tsawˇ haˬ deuˬ neh aˬ yawꞈ maꞈ-ahˇ guiˇ deuˆ gʼaˬ-euˬ gaˇ ya mawˇ ngeh, Iˇsaˬleˬlaˆ tsawˇ haˬ deuˬ nehˬ-ehˇ ja tsaˬ geuꞈ-awˇ, Iˇsaˬleˬlaˆ tsawˇ jeuˬ uˆ lahˇ-eu uˬ moˆ jawˇ-euˬ meh. Kʼoeˇ ngeh neh naˇ, Suˇliˆ tsawˇ haˬ deuˬ Aˬmoˬ tsawˇ haˬ deuˬ-ahˇ maˬ paˇ caw ba nehˬ peuˬ ni pyeuꞈ-iˇ-euˬ meh.