Read Akha 2 Saˬmeuˬlaˆ 12 Bible Online

2 Saˬmeuˬlaˆ 12 - Akha bible

2 Saˬmeuˬlaˆ 12

¹Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ-ahˇ, Sahˬpaˬ Miˬyehˇ neh Daˬbiˇ jawˇ gaˇ pyehˬ gʼeh-euˬ meh. Daˬbiˇ jawˇ gaˇ Naˬdaˬ iˇ-awˇ ehˇ-eu, “Meuˬ tiˬ meuˬ laꞈ kʼoeˇ tsawˇ haˬ nyiˬ gʼaˬ jawˇ-eu meh. Tiˬ gʼaˬ-aˬ, smˇ muiˬ smˇ baw pyeuꞈ-awˇ, yawˬ gʼaˬ yawˬ-aˬ, iˇ shaˬ iˇ taw pyeuꞈ-eu meh.

²Smˇ muiˬ smˇ baw gʼaˬ mawˇ neˇ hawˇ-eu yawˇ gʼawˬ mya ni jawˇ-eu meh.

³Ehˇ kʼawꞈ, iˇ shaˬ iˇ taw gʼaˬ-aˬ, yawˇ zaˬ tiˬ mawˇ tehꞈ-ehˇ zeuˇ-awˇ cu luꞈ-eu meh. Yawˇ kʼoeˇ mawˇ-ahˇ aˬ yawꞈ yaw muiˬ paˬ-ehˇ bo saˆ-awˇ, aˬ yawꞈ-euˬ nymˇ laꞈ kʼoeˇ, aˬ yawꞈ-euˬ zaˬ deuˬ nehˬ-ehˇ tiˬ kawˆ loꞈ-ehˇ jawˇ jawˇ-ehˇ huiˬ laˇ luꞈ-eu meh. Yawˇ kʼoeˇ mawˇ-ahˇ aˬ yawꞈ dzaˬ-eu dzaˇ bi dzaˬ-eu uˬ taꞈ, aˬ yawꞈ dawˇ-eu iˇ cuꞈ naˬ bo-ahˇ iˇ cuꞈ bi dawˇ-awˇ, aˬ yawꞈ-euˬ bawˇ kʼahˇ-ahˇ ciˬ ahˇ-awˇ bo saˆ-euˬ meh. Yawˇ kʼoeˇ mawˇ-aˬ, aˬ yawꞈ gʼaˇ duˬ aˬ buˇ tiˬ buˇ-ahˇ duˇ-eu meh.

⁴Tiˬ nah keuˆ laˇ ngeh, smˇ muiˬ smˇ baw gʼaˬ-euˬ nymˇ-ahˇ, daˬ yah tiˬ gʼaˬ daˆ laˇ-euˬ meh. Smˇ muiˬ smˇ baw kʼoeˇ gʼaˬ daˬ yah-ahˇ bi dzaˬ bi dawˇ-eu gʼaˇ duˬ aˬ yawꞈ-euˬ yawˇ maˬ sehꞈ mawꞈ-eu miˇ neh, iˇ shaˬ iˇ taw kʼoeˇ gʼaˬ-euˬ yawˇ kʼoeˇ mawˇ sehꞈ-awˇ, daˬ yah-ahˇ hawˬ byawˇ lawˇ nehˬ-euˬ meh.”

⁵Kʼoeˇ ngeh, smˇ muiˬ smˇ baw kʼoeˇ gʼaˬ-ahˇ Daˬbiˇ nui ma pehˇ dui dui laˇ-awˇ ehˇ-eu, “Kʼoeˇ naˆ naˆ-ehˇ doeˇ-eu jeˬ mˇ-eu tsawˇ haˬ kʼoeˇ gʼaˬ shiˇ-eu tsaˬ meh lehˇ, dehꞈ luꞈ-eu Sahˬpaˬ Miˬyehˇ mehˬ shi ngaˇ kamˬ-eu ma.

⁶Aˬ cawˬ-ahˇ gʼawˬ shaˬ gaˬ-eu maˬ siˬ nya ni kʼoeˇ naˆ naˆ-ehˇ jahˇ doeˇ nehˬ-euˬ miˇ neh, aˬ yawꞈ neh yuˇ-euˬ naˆ maˬ tseˇ oeˬ bymˇ bi tsoeˬ kʼoꞈ-eu tsaˬ tehꞈ-a.”

⁷Daˬbiˇ-ahˇ Naˬdaˬ ehˇ nehˬ-eu, “Tsawˇ haˬ kʼoeˇ gʼaˬ nawˇ meh. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Iˇsaˬleˬlaˆ tsawˇ jeuˬ kʼoeˇ taˆ ngaˇ nawˬ-ahˇ sahˬ paˬ ka nehˬ-awˇ, Sawˇluˆ-euˬ aˬ laꞈ laꞈ kʼoeˇ nawˬ-ahˇ ka kʼoꞈ taˬ-euˬ ma.

⁸Aˬ yawꞈ-euˬ miˇ kʼahˬ hawˇ-eu aˬ yawꞈ-euˬ miˬ zaˬ deuˬ nawˬ-ahˇ ngaˇ biꞈ-euˬ ma. Ngaˇ nawˬ-ahˇ Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ-euˬ sahˬ paˬ bi geuꞈ-euˬ ma. Heu naˆ ni tehꞈ-ehˇ nui kʼahˇ maˬ shiˇ coeˇ naˇ kʼawꞈ, heu naˆ maˬ tseˇ nyiˬ bymˇ ngaˇ biꞈ dzehˬ ma.

⁹Ngaˇ nawˬ-ahˇ teu naˆ ni mˇ nehˬ taˬ-euˬ kʼawꞈ, aˬ jeˬ miˇ neh ngaˬ-euˬ zahˇ dawˬ kʼoꞈ dawˬ-ahˇ nawˇ maˬ naˇ haˬ geuꞈ te. Aˬ jeˬ miˇ neh teu loꞈ-ehˇ gʼeh-eu yaw haiˬ jeˬ nawˇ mˇ te. Uˇliˇyaˆ guiˇ deuˆ gaˇ bi deuˆ sehꞈ ni nawˬ neh toˆ-awˇ, Aˬmoˬ tsawˇ haˬ neh aˬ yawꞈ-ahˇ bi sehꞈ-awˇ, aˬ yawꞈ-euˬ miˬ zaˬ-ahˇ nawˇ sheuˬ geuꞈ-euˬ meh.

¹⁰Ngaˬ-euˬ ehˇ dawˬ-ahˇ nawˇ maˬ naˇ haˬ-ehˇ, Uˇliˇyaˆ-euˬ miˬ zaˬ-ahˇ sheuˬ geuꞈ-euˬ miˇ neh, mi cehˇ laꞈ-ahˇ ya shiˇ-eu jeˬ, nawˬ-eu nymˇ jiˇ kʼoeˇ taˆ tiˬ ziˇ saˇ-iˬ tiˬ ziˇ maˬ tsehˆ leˇ ni keuˆ le tehꞈ-a.

¹¹Nawˬ-euˬ nymˇ kʼahˬ zaˬ tiˬ gʼaˬ na baˬ da neh, nawˬ-euˬ nymˇ jiˇ kʼoeˇ taˆ shaˬ-eu zahˬ-eu jeˬ bi keuˆ le ma lehˇ ngaˇ kamˬ-eu ma. Nawˬ-euˬ miˬ zaˬ deuˬ-ahˇ ngaˇ yuˇ-awˇ, yawˬ gʼaˬ yawˬ-ahˇ biꞈ nehˬ ngeh, ngaˬ neh ehˇ-euˬ loꞈ-ehˇ ngaˇ aˬ diˇ mˇ luꞈ-eu ngaˇ lehˇ siˬ nya-awˬ. Nah gʼahˇ nah gaˆ-ahˇ, nawˬ-euˬ miˬ zaˬ deuˬ nehˬ-ehˇ aˬ yawꞈ yuꞈ taꞈ jawˇ taꞈ tehꞈ-a.

¹²Nawˇ ciˬ cuˇ ni iˬ baˇ mˇ kʼoeˬ-euˬ kʼawꞈ, Iˇsaˬleˬlaˆ tsawˇ haˬ dawˬ tawˆ luꞈ ya mawˇ ni, nah gʼahˇ nah gaˆ-ahˇ ngaˇ kʼoeˇ loꞈ-ehˇ bi pyeuꞈ laˇ ma’ lehˇ ehˇ-eu meh.”

¹³Kʼoeˇ ngeh, “Sahˬpaˬ Miˬyehˇ-ahˇ ngaˇ mˇ bahˬ gʼaˬ-euˬ miˇ-a” lehˇ Daˬbiˇ ehˇ-euˬ meh. Naˬdaˬ ehˇ-eu, “Sahˬpaˬ Miˬyehˇ nawˬ-ahˇ iˬ baˇ pyehˬ-eu meh. Nawˇ ya shiˇ gaˇ maˬ keuˆ-aˇ.

¹⁴Ehˇ kʼawꞈ, kʼoeˇ loꞈ-ehˇ mˇ-eu laꞈ kʼoeˇ Sahˬpaˬ Miˬyehˇ-ahˇ nawˇ yaw zeu maˬ baw-euˬ miˇ neh, nawˬ-euˬ aˬ li ya shiˇ tehꞈ-a.”

¹⁵Kʼoeˇ naˇ, Naˬdaˬ gʼoꞈ leˇ-euˬ meh. Uˇliˇyaˆ-euˬ miˬ zaˬ neh ciˬ-euˬ Daˬbiˇ-euˬ aˬ li kʼoeˇ li-ahˇ, Sahˬpaˬ Miˬyehˇ neh yaw kʼaˆ-ehˇ bi naˇ laˇ-euˬ meh.

¹⁶Aˬ li kʼoeˇ li gʼaˇ duˬ, Daˬbiˇ Miˬyehˇ-ahˇ guiˬ lahˬ shaˇ-euˬ meh. Aˬ yawꞈ tiˬ jeˬ-iˬ maˬ dzaˬ maˬ dawˇ ni jawˇ-awˇ, yawˬ miˇ na luꞈ aˬ yawꞈ-euˬ kuˆ lawˆ-ahˇ uˇ-iˇ-awˇ, miˇ tsa ga bya-euˬ meh.

¹⁷Aˬ yawꞈ-euˬ saˇ naˇ-ahˇ gaˇ mˇ-eu yaw huiˬ yaw mahˇ deuˬ, aˬ yawꞈ tuˇ laˇ ni leh jeh-euˬ meh. Ehˇ kʼawꞈ, aˬ yawꞈ maˬ tuˇ laˇ ehˇ, tiˬ jeˬ-iˬ maˬ dzaˬ maˬ dawˇ ni tehꞈ-ehˇ jawˇ-euˬ meh.

¹⁸Tiˬ jaw byah laˇ ngeh, aˬ li kʼoeˇ li shiˇ-awˇ aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-ahˇ maˬ ehˇ nehˬ peuˬ ni jawˇ-euˬ meh. Aˬ yawꞈ maꞈ ehˇ-eu, “Aˬ li heu li maˬ shiˇ mi naˆ-ehˇ kʼawꞈ, aˬ dui aˬ yawꞈ-ahˇ dawˬ ngehˬ cawˬ nehˬ ngeh, aˬ yawꞈ dawˬ maˬ ngehˬ cawˬ laˇ-a. Nymˬ-mˇ poˆ jawˇ aˬ li heu li shiˇ-euˬ-aˬ, aˬ yawꞈ-ahˇ aˬ dui aˬ joˆ-ehˇ dawˬ ngehˬ cawˬ leˇ nmˇ. Aˬ yawˇ yawꞈ laˆ tahˬ laˆ naˇ-eu jeˬ mˇ doˆ laꞈ gaˇ guˆ nya.”

¹⁹Aˬ yawꞈ maꞈ tiˬ gʼaˬ tiˇ gʼaˬ dawˬ saˆ saˆ kʼoeˬ luꞈ gaˇ Daˬbiˇ haw siˬ-awˇ, aˬ li kʼoeˇ li shiˇ-euˬ nga lehˇ siˬ leˇ-euˬ meh. “Aˬ li shiˇ mehˬ loˇ” lehˇ, aˬ yawꞈ maꞈ-ahˇ aˬ yawꞈ naˇ haˬ ngeh, “Aˬ li shiˇ-euˬ meh” lehˇ aˬ yawꞈ maꞈ ehˇ kʼoꞈ nehˬ-euˬ meh.

²⁰Kʼoeˇ ngeh, Daˬbiˇ miˇ tsa yuꞈ luꞈ-eu tuˇ laˇ-awˇ, iˇ cuꞈ dzuiꞈ-awˇ, uˬ duˬ kaˆ juˇ-awˇ, mehˬ tsoeˬ dm paˇ-euˬ meh. Kʼoeˇ naˇ, Sahˬpaˬ Miˬyehˇ-euˬ nymˇ-ahˇ le-awˇ, uˬ duˬ tahˬ leˇ-euˬ meh. Sahˬ paˬ jawˇ-eu hawˇ nymˇ-ahˇ aˬ yawꞈ gʼoꞈ keuˆ leˇ ngeh, dzaˬ dzaˬ dawˇ dawˇ bi laˆ dawˆ-awˇ, tiˬ poˆ tehꞈ-ehˇ dzaˬ-euˬ meh.

²¹Aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-ahˇ ehˇ-eu, “Nawˇ teu loꞈ-ehˇ jahˇ-eu teu nga maꞈ maˬ gʼoˆ shaw nya nya. Aˬ li naˇ luꞈ ngeh, nawˇ aˬ yawꞈ gʼaˇ duˬ noeˬ shaˬ-awˇ ngoeˇ ngoeˇ-ehˇ, tiˬ jeˬ-iˬ maˬ dzaˬ maˬ dawˇ ni jawˇ-euˬ meh. Ehˇ kʼawꞈ, aˬ yawꞈ shiˇ-euˬ nehˬ-ehˇ nawˇ tsawˬ tuˇ laˇ-awˇ, dzaˬ ahˇ dawˇ ahˇ nya gaˇ zahˬ leˇ nya.”

²²Daˬbiˇ ehˇ-eu, “Ngeuˇ ma. Aˬ yawꞈ dehꞈ luꞈ ngeh ngaˇ aˬ yawꞈ gʼaˇ duˬ noeˬ shaˬ-eu laꞈ kʼoeˇ ngoeˇ-awˇ, tiˬ jeˬ-iˬ maˬ dzaˬ maˬ dawˇ ni jawˇ-euˬ ma. Sahˬpaˬ Miˬyehˇ ngaˬ-ahˇ gʼawˬ shaˬ haw gaˬ-awˇ, aˬ li-ahˇ maˬ bi shiˇ ni bi dzeuˇ-iˇ-eu baw le lehˇ ngaˇ noeˬ tmˬ-euˬ ma.

²³Ehˇ kʼawꞈ, nymˬ-mˇ aˬ yawꞈ shiˇ dzeuˇ shaw-euˬ-aˬ, aˬ jeˬ miˇ neh ngaˇ maˬ dzaˬ maˬ dawˇ ni paˇ lah-eu. Aˬ li paˇ gʼoꞈ dehꞈ laˇ ni ngaˇ jahˇ nya ta loˇ. Tiˬ nah keuˆ laˇ naˇ, aˬ yawꞈ jawˇ gaˇ ngaˇ ya le meh.”

²⁴Kʼoeˇ naˇ, aˬ yawꞈ-euˬ miˬ zaˬ Baˬsheˬba-ahˇ Daˬbiˇ gʼaˬ biꞈ nehˬ-euˬ meh. Aˬ yawꞈ nyaꞈ paˇ yuꞈ paˇ jawˇ taꞈ-awˇ, aˬ li tiˬ li paˇ jawˇ le-euˬ meh. Aˬ li kʼoeˇ li-ahˇ Daˬbiˇ neh Sawˇlaˬmoˬ lehˇ myahˇ nehˬ-awˇ, Sahˬpaˬ Miˬyehˇ gaˬ-eu aˬ li tiˬ li pyeuꞈ-eu meh.

²⁵Aˬ li heu li-ahˇ Yeˬdiˇdiˬ[4] lehˇ myahˇ nehˬ-awˬ lehˇ, Miˬyehˇ gʼaˇ duˬ ngehˬ dah-eu Naˬdaˬ-ahˇ Sahˬpaˬ Miˬyehˇ dawˬ biꞈ-euˬ meh. Aˬ jeˬ miˇ neh ehˇ naˇ, aˬ yawꞈ-ahˇ Sahˬpaˬ Miˬyehˇ gaˬ-eu meh.

²⁶Aˇ yamˬ kʼoeˇ yamˬ-ahˇ, Aˬmoˬ tsawˇ jeuˬ-euˬ meuˬ meuˬ ma pyeuꞈ-eu Laˬbah meuˬ-ahˇ Yoˇbaˬ guiˇ deuˆ luꞈ-awˇ, deuˆ gʼaˬ-eu dawˬ peh peh laˇ-euˬ meh.

²⁷Aˬ yawꞈ tsawˇ haˬ pyehˬ kʼoꞈ gʼeh-awˇ, Daˬbiˇ-ahˇ heu loꞈ-ehˇ bi tsaꞈ gaˬ leˇ-euˬ meh. “Laˬbah meuˬ-ahˇ ngaˇ guiˇ deuˆ luꞈ-awˇ, meuˬ-ahˇ iˇ cuꞈ caˬ ahˇ-euˬ pehˇ tsahˇ deuˆ za gʼaˬ-euˬ ma.

²⁸Nymˬ-mˇ poˆ jawˇ-aˬ, nawˬ-euˬ guiˇ maꞈ kʼaˇ dzeˇ-eu deuˬ kuˇ uiˬ leꞈ-awˇ, nawˬ-euˬ mawˇ do meuˬ heu meuˬ-ahˇ deuˆ gʼaˬ le-awˬ. Meuˬ heu meuˬ-ahˇ deuˆ gʼaˬ-euˬ meh lehˇ ehˇ-eu tsawˇ myahˇ ngaˇ maˬ pi mawꞈ nya.”

²⁹Kʼoeˇ ngeh, Daˬbiˇ aˬ yawꞈ-euˬ guiˇ maꞈ deuˬ kuˇ uiˬ-awˇ, Laˬbah meuˬ-ahˇ iˇ-awˇ deuˆ gʼaˬ-euˬ meh.

³⁰Aˬmoˬ tsawˇ jeuˬ-euˬ miˬ yehˇ pyeuꞈ-eu Miˇlaˬkoˬ tahˬ pahˬ aˬ ma mawˇ kawˇ-euˬ uˬ duˬ-ahˇ kʼoˆ luꞈ-eu, aˇ poeˬ kʼaˆ-eu kʼaˬ lo sehˇ tiˬ siˬ tsoꞈ-eu shuiˇ uˬ kʼoˆ-ahˇ Daˬbiˇ lehˆ doˆ-awˇ, kʼaꞈ lo sehˇ kʼoeˇ siˬ aˬ yawꞈ-euˬ shuiˇ uˬ kʼoˆ-ahˇ dawˆ tsoꞈ-euˬ meh. Shuiˇ uˬ kʼoˆ kʼoeˇ siˬ nyiˬ tseˇ jawꞈ-i byah-eu meh. Meuˬ kʼoeˇ meuˬ laꞈ kʼoeˇ, aˬ yawꞈ pyuˇ shuiˇ myawˬ gahˬ gʼawˬ mya ni deuˆ za geuꞈ-euˬ meh.

³¹Kʼoeˇ gaˇ jawˇ-eu tsawˇ haˬ deuˬ-ahˇ aˬ yawꞈ nyehꞈ doˆ laꞈ-awˇ, yehˬ ma, tsehˬ ma, deuˆ haˬ, heu deuˬ baꞈ-awˇ gaˇ bi mˇ-awˇ, tsaˬ byaˆ tehˆ-eu gaˇ kʼawꞈ bi mˇ-euˬ meh. Aˬmoˬ tsawˇ jeuˬ-euˬ meuˬ nui deuˬ laꞈ kʼoeˇ kʼaˇ jawˇ-eu tsawˇ haˬ deuˬ-ahˇ kʼawꞈ, aˬ yawꞈ kʼoeˇ loꞈ-ehˇ kʼehˇ dzaˬ-euˬ meh. Kʼoeˇ naˇ, aˬ yawꞈ hawˇ-eu aˬ yawꞈ-euˬ tsawˇ haˬ deuˬ Yeˬluˇsaˬlehˬ meuˬ-ahˇ gʼoꞈ laˇ-euˬ meh.