Read Akha 2 Saˬmeuˬlaˆ 15 Bible Online

2 Saˬmeuˬlaˆ 15 - Akha bible

2 Saˬmeuˬlaˆ 15

¹Kʼoeˇ naˇ, Aˬbaˇsaˬloˬ-aˬ, aˬ yawꞈ zmˬ-eu gʼaˇ duˬ mahˬ laˆ lawˬ tiˬ laˇ hawˇ-eu mahˬ deuˬ lehˬ hmˬ-awˇ, aˬ yawꞈ-euˬ mehˬ shi cah-awˇ aˬ yawꞈ-ahˇ bi loꞈ piˇ-eu tsawˇ haˬ ngaˬ tseˇ gʼaˬ lehˬ hmˬ taˬ-euˬ meh.

²Aˬ yawꞈ uˬ shawˬ paw yaw naꞈ-ehˇ tuˇ-awˇ, meuˬ-euˬ lahˇ kʼehˬ dawˬ peh jaˆ-eu gaˇ ma-ahˇ yawꞈ-awˇ jawˇ-eu meh. Dawˬ ja laˆ doˆ-awˇ, sahˬ paˬ neh yaˇ kʼaˬ bi daˇ nehˬ-eu lehˇ kʼaˇ laˇ-euˬ tsawˇ haˬ deuˬ-ahˇ Aˬbaˇsaˬloˬ kuˇ naˬ-awˇ, Aˬ geu gaˇ jawˇ te lehˇ naˇ haˬ-euˬ meh. Aˬ geu gaˇ neh laˇ-awˇ aˬ jeˬ tsawˇ jeuˬ pyeuꞈ-eu gaˇ kawˆ, aˬ cawˬ aˬ yawꞈ-ahˇ ehˇ kʼoꞈ nehˬ-euˬ meh.

³Kʼoeˇ ngeh, Aˬbaˇsaˬloˬ heu loꞈ-ehˇ ehˇ-eu meh. “Nawˇ ehˇ-eu loꞈ-ehˇ ngeuˇ naˇ, nawˬ-euˬ paw tsaˬ dzehˬ miˇ-a. Ehˇ kʼawꞈ, nawˇ ehˇ gaˇ naˇ haˬ-awˇ yaw tsaˬ yaw dawˇ dawˇ-ehˇ yaˇ kʼaˬ daˇ nehˬ-eu gʼaˇ duˬ, sahˬpa neh kʼehˇ taˬ-euˬ yaˇ kʼaˬ daˇ-eu tsawˇ haˬ maˬ jawˇ-a.”

⁴Kʼoeˇ uˬ taꞈ aˬ yawꞈ paˇ ehˇ-eu, “Ngaˇ yaˇ kʼaˬ daˇ-eu gʼaˬ ya geuꞈ law nmˇ-aˬ, dawˬ ja laˆ doˆ-awˇ ngaˇ jawˇ gaˇ kʼaˇ laˇ-eu tsawˇ haˬ deuˬ-ahˇ, yaw tsaˬ yaw dawˇ dawˇ-ehˇ yaˇ kʼaˬ daˇ nehˬ ma.”

⁵Aˬ cawˬ Aˬbaˇsaˬloˬ-euˬ dawˬ peh jiˆ laˇ-awˇ, aˬ yawꞈ-euˬ mehˬ shi miˇ tsa awˆ byaˆ-awˇ yaw zeu baw nehˬ ngeh, aˬ yawꞈ-euˬ aˬ laꞈ cawˬ ja-awˇ, aˬ cawˬ-ahˇ byaˇ tehˬ-awˇ mehˬ cuˇ cuˇ nehˬ-eu meh.

⁶Sahˬ paˬ neh yaˇ kʼaˬ bi daˇ-eu lehˇ kʼaˇ laˇ-euˬ Iˇsaˬleˬlaˆ tsawˇ haˬ deuˬ-ahˇ, aˬ yawꞈ kʼoeˇ loꞈ-ehˇ jahˇ nehˬ-eu laꞈ kʼoeˇ, aˬ cawˬ aˬ yawꞈ jawˇ paw pyawˇ laˇ ni jahˇ-euˬ meh.

⁷Oeˬ kʼoꞈ keuˆ laˇ ngeh, sahˬ paˬ Daˬbiˇ-ahˇ Aˬbaˇsaˬloˬ heu loꞈ-ehˇ ehˇ nehˬ-euˬ meh. “Sahˬ paˬ-oˇ, Sahˬpaˬ Miˬyehˇ-ahˇ ngaˬ neh saˇ jaˇ dzaˬ taˬ-euˬ loꞈ-ehˇ, ngaˇ mˇ byah leˇ-eu gʼaˇ duˬ, Heˬbyoˬ meuˬ-ahˇ bi le nehˬ laꞈ-awˬ.

⁸Suˇliˆ miˇ kʼahˬ Geˬshuˇlaˆ meuˬ-ahˇ ngaˇ jawˇ luꞈ ngeh, Sahˬpaˬ Miˬyehˇ ngaˬ-ahˇ Yeˬluˇsaˬlehˬ meuˬ-ahˇ sheuˬ kʼoꞈ gʼeh nehˬ laꞈ naˇ, Heˬbyoˬ meuˬ-ahˇ le-awˇ aˬ yawꞈ-ahˇ uˬ duˬ tahˬ leˇ ma lehˇ, ngaˬ neh saˇ jaˇ dzaˬ taˬ-euˬ jaˆ-eu ma.”

⁹Kʼoeˇ ngeh, “Nui ma coꞈ ngehˇ ni taˬ-awˇ le-awˬ” lehˇ, Aˬbaˇsaˬloˬ-ahˇ sahˬ paˬ ehˇ nehˬ-euˬ meh.

¹⁰Ehˇ kʼawꞈ, Iˇsaˬleˬlaˆ tsawˇ jeuˬ dawˬ tawˆ luꞈ jawˇ gaˇ Aˬbaˇsaˬloˬ tsawˇ haˬ pyehˬ gʼeh-awˇ, “Daˇ heh baw-eu teˇ saˇ-ahˇ naw maꞈ ya gaˬ ngeh, Heˬbyoˬ meuˬ-ahˇ Aˬbaˇsaˬloˬ sahˬ paˬ pyeuꞈ laˇ gʼaˬ-euˬ meh lehˇ guˇ-awˬ” lehˇ bi tsaꞈ gaˬ doe-iˇ-euˬ meh.

¹¹Yeˬluˇsaˬlehˬ meuˬ-ahˇ jawˇ-eu tsawˇ haˬ nyiˬ yaˇ gʼaˬ Aˬbaˇsaˬloˬ-euˬ mehˬ nah caw teh leˇ-euˬ meh. Aˬ yawꞈ maꞈ-ahˇ Aˬbaˇsaˬloˬ kuˇ-eu miˇ neh, aˬ yawꞈ maꞈ ya caw teh leˇ-euˬ kʼawꞈ, Aˬbaˇsaˬloˬ mˇ-eu lehˇ gʼeh-eu jeˬ-ahˇ aˬ yawꞈ maꞈ tiˬ pawꞈ-iˬ maˬ siˬ nya-a.

¹²Aˬbaˇsaˬloˬ lawˇ-eu shehˇ-eu jeˬ mˇ luꞈ ngeh, Giˇlo meuˬ-ahˇ kʼawꞈ, aˬ yawꞈ tsawˇ haˬ pyehˬ gʼeh-awˇ, sahˬ paˬ Daˬbiˇ-ahˇ nui noeˬ nui duˇ biꞈ-eu gʼaˬ pyeuꞈ-eu Aˬhiˇtawˇpeˬlaˇ-ahˇ bi sheuˬ laˬ-iˇ-euˬ meh. Sahˬ paˬ Daˬbiˇ-ahˇ puiˬ-eu lehˇ gʼeh luꞈ-eu paw gʼaˬ kʼaˆ laˇ tehˇ tehˬ-awˇ, Aˬbaˇsaˬloˬ-euˬ mehˬ nah caw teh-eu tsawˇ haˬ myaˬ laˇ tehˇ tehˬ luꞈ-eu meh.

¹³Tsawˇ haˬ tiˬ gʼaˬ Daˬbiˇ jawˇ gaˇ oe-awˇ, “Iˇsaˬleˬlaˆ tsawˇ haˬ deuˬ Aˬbaˇsaˬloˬ jawˇ paw nui ma gm leˇ luꞈ meh” lehˇ ehˇ le-euˬ meh.

¹⁴Kʼoeˇ ngeh, Daˬbiˇ-aˬ, aˬ yawꞈ nehˬ-ehˇ Yeˬluˇsaˬlehˬ meuˬ-ahˇ jawˇ luꞈ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ heu loꞈ-ehˇ ehˇ nehˬ-euˬ meh. “Aˬbaˇsaˬloˬ-euˬ aˬ laꞈ laꞈ kʼoeˇ neh aˬ dui ya buˬ ya law-iˇ ni, yaw kawˇ ma-ehˇ ya cehˆ meh. Yaw kawˇ-ehˇ lehˬ hmˬ tehˇ tehˬ-awˬ. Nymˬ-mˇ aˬ yawꞈ oe keuˆ-awˇ, aˬ dui-ahˇ guiˇ deuˆ gʼaˬ shaw naˇ, yawˬ gʼaˬ na luꞈ ya bi sehꞈ jiˇ gaˇ keuˆ tehꞈ-a.”

¹⁵Aˬ yawꞈ maꞈ ehˇ-eu, “Sahˬ paˬ-oˇ, nawˬ neh kʼaˇ ehˇ-euˬ loꞈ-ehˇ nga maꞈ mˇ ma.”

¹⁶Sahˬ paˬ Daˬbiˇ-aˬ, aˬ yawꞈ-euˬ miˬ sawˇ zaˬ dawˬ tawˆ luꞈ hawˇ-eu, aˬ yawꞈ-euˬ gaˇ mˇ-eu yaw huiˬ yaw mahˇ deuˬ sheuˬ-awˇ doˆ-iˇ-euˬ meh. Ehˇ kʼawꞈ, aˬ yawꞈ-euˬ ma nyiˇ tseˇ gʼaˬ taˬ yaꞈ-awˇ, sahˬ paˬ-euˬ hawˇ nymˇ-ahˇ bi haw piˇ-euˬ meh.

¹⁷Sahˬ paˬ hawˇ-eu aˬ yawꞈ-euˬ tsawˇ haˬ dawˬ tawˆ luꞈ, meuˬ kʼoeˇ meuˬ-ahˇ byehˇ dzeh yaꞈ-awˇ doˆ-iˇ ngeh, meuˬ dzeˇ dzeˇ saˬ jaˆ-eu nymˇ-ahˇ tiˬ kʼehˬ yawꞈ naˬ-euˬ meh.

¹⁸Aˬ yawꞈ-ahˇ loꞈ piˇ-eu guiˇ maꞈ aˬ yawꞈ-euˬ mehˬ shi iˇ dzeuˇ gʼeh luꞈ ngeh, aˬ yawꞈ-euˬ gaˇ mˇ-eu yaw huiˬ yaw mahˇ dawˬ tawˆ luꞈ aˬ yawꞈ-euˬ dawˬ peh yawꞈ luꞈ-eu meh. Gaˬdaˇ meuˬ-ahˇ neh aˬ yawꞈ-euˬ mehˬ nah caw teh laꞈ-euˬ yehˇ koꞈ yaˇ gʼaˬ kʼawꞈ, iˇ dzeuˇ luꞈ-eu meh.

¹⁹Kʼoeˇ ngeh, yehˇ kʼoeˇ deuˬ kʼoeˇ taˆ aˬ yuiꞈ geuꞈ luꞈ-eu gʼaˬ pyeuꞈ-eu Iˇtehˇ-ahˇ sahˬ paˬ ehˇ nehˬ-eu, “Aˬ jeˬ miˇ neh nga maꞈ-euˬ jeˬ nah nawˇ caw teh le te. Gʼoꞈ-iˇ-awˇ sahˬ paˬ yaw shuiꞈ kʼoeˇ gʼaˬ nehˬ-ehˇ jawˇ yaꞈ-awˬ. Nawˇ-aˬ, nawˬ-euˬ miˇ kʼahˬ-ahˇ neh heu gaˇ cehˆ jawˇ le-euˬ boeˇ miˬ siˬ kʼaˬ tiˬ gʼaˬ meh.

²⁰Nawˇ heu gaˇ cehˆ jawˇ le-euˬ maˬ myahˇ laˇ-euˬ miˇ neh, nawˬ-ahˇ ngaˇ doe doe-ehˇ sheuˬ-awˇ cah paˬ-ehˇ maˬ gʼeh-a. Kʼoeˇ uˬ taꞈ, ngaˇ aˬ geu paw ya iˇ-eu gaˇ kawˆ kʼawꞈ maˬ ehˇ duˬ nya-a siˬ. Kʼoeˇ miˇ neh, nawˬ-euˬ tsawˇ haˬ deuˬ-ahˇ sheuˬ-awˇ gʼoꞈ-iˇ-awˬ. Sahˬpaˬ Miˬyehˇ nawˬ-ahˇ saˇ jaˇ ziꞈ-awˇ, gʼawˬ shaˬ gaˬ nehˬ laꞈ luꞈ-uˇ.”

²¹Ehˇ kʼawꞈ, Iˇtehˇ ehˇ-eu, “Sahˬ paˬ-oˇ, nawˇ kʼaˇ iˇ gaˇ nawˬ-euˬ mehˬ nah ngaˇ aˬ myah luꞈ caw teh ma lehˇ, Sahˬpaˬ Miˬyehˇ-euˬ tsawˇ myahˇ uˬ moˆ ngaˇ saˇ jaˇ dzaˬ-eu ma. Shiˇ-eu jeˬ keuˆ le kʼawꞈ ehˬ ngeuˇ luꞈ-uˇ.”

²²Daˬbiˇ ehˇ-eu, “Toˆ-ehˇ ngeuˇ naˇ, mehˬ hu paw iˇ gʼeh-awˬ” lehˇ, Iˇtehˇ-ahˇ Daˬbiˇ ehˇ nehˬ-euˬ meh. Kʼoeˇ ngeh, Iˇtehˇ hawˇ-eu aˬ yawꞈ-euˬ tsawˇ haˬ dawˬ tawˆ luꞈ, aˬ yawꞈ maꞈ-euˬ miˬ sawˇ zaˬ deuˬ sheuˬ-awˇ, mehˬ hu paw iˇ gʼeh-euˬ meh.

²³Daˬbiˇ-euˬ mehˬ nah caw teh-eu tsawˇ haˬ deuˬ doˆ-iˇ ngeh, miˇ kʼahˬ zaˬ deuˬ guˇ guˇ-ehˇ ngoeˇ-eu meh. Kʼoeˇ naˇ, sahˬ paˬ Daˬbiˇ Giˇdaˬloˬ lawˇ gawˆ tsehˆ doˆ-euˬ meh. Aˬ yawꞈ-euˬ tsawˇ haˬ deuˬ kʼawꞈ lawˇ gawˆ kʼoeˇ gawˆ tsehˆ doˆ-awˇ, sahˬ paˬ nehˬ-ehˇ tiˬ kawˆ loꞈ-ehˇ bawˇ tsahˬ bawˇ dahˇ paw le daˆ-euˬ meh.

²⁴Piˇ ma Zaˬdoˆ kʼawꞈ, kʼoeˇ gaˇ ahˇ-awˇ, aˬ yawꞈ nehˬ-ehˇ cah-eu Leˬbiˇ tsawˇ haˬ deuˬ Dawˬ ma saˇ jaˇ Bahˬ keuˆ baꞈ luꞈ-eu meh. Aˬ yawꞈ maꞈ Dawˬ ma saˇ jaˇ Bahˬ keuˆ kʼoeˇ baꞈ naˬ taˬ-awˇ, tsawˇ haˬ kʼoeˇ deuˬ meuˬ laꞈ kʼoeˇ neh maˬ doˆ-iˇ jiˇ kʼoeˇ keuˆ ni, maˬ baꞈ ni bi jaˆ-euˬ meh. Piˇ ma Aˬbyaˬdaˬ gʼaˬ kʼawꞈ kʼoeˇ gaˇ ahˇ-eu meh.

²⁵Zaˬdoˆ-ahˇ sahˬ paˬ ehˇ nehˬ-eu, “Dawˬ ma saˇ jaˇ Bahˬ keuˆ-ahˇ meuˬ-ahˇ baꞈ kʼoꞈ gʼeh-awˬ. Sahˬpaˬ Miˬyehˇ ngaˬ-ahˇ nui ma tsaˬ lawˬ naˇ, aˬ kaˇ tiˬ nah aˬ yawꞈ ngaˬ-ahˇ paˇ bi gʼoꞈ laˇ laꞈ-awˇ, Bahˬ keuˆ heu hawˇ-eu Bahˬ keuˆ jaˆ-eu jawˇ duˬ-ahˇ paˇ bi mawˇ laꞈ tehꞈ-a.

²⁶Ehˇ kʼawꞈ, aˬ yawꞈ ngaˬ-ahˇ nui ma maˬ tsaˬ naˇ, aˬ yawꞈ kʼaˇ jahˇ mawꞈ-eu jeˬ jahˇ nehˬ laꞈ luꞈ-uˇ.”

²⁷Zaˬdoˆ-ahˇ aˬ yawꞈ tiˬ poˆ paˇ ehˇ nehˬ-eu, “Heu gaˇ haw sheˇ. Nawˬ li Aˬhiˇmaˆ hawˇ-eu Aˬbyaˬdaˬ-euˬ aˬ li Yawˇnaˆshaˬ-ahˇ sheuˬ-awˇ, nui ma saˇ lehˆ ni taˬ-eu laꞈ kʼoeˇ meuˬ-ahˇ gʼoꞈ jawˇ-iˇ-awˬ.

²⁸Heu yaw kaˬ-ahˇ, nawˇ ngaˬ-ahˇ tiˬ jeˬ paˬ maˬ bi ehˇ gaˬ le kʼoeˇ keuˆ ni, bawˇ tsahˬ bawˇ dahˇ laꞈ kʼoeˇ jaˆ-eu lawˇ duˬ-ahˇ ngaˇ loꞈ tawˬ ma.”

²⁹Kʼoeˇ ngeh, Zaˬdoˆ hawˇ-eu Aˬbyaˬdaˬ aˬ nyaꞈ Yeˬluˇsaˬlehˬ meuˬ-ahˇ Dawˬ ma saˇ jaˇ Bahˬ keuˆ baꞈ kʼoꞈ gʼeh-awˇ, kʼoeˇ gaˇ jawˇ yaꞈ-euˬ meh.

³⁰Daˬbiˇ ngoeˇ ngoeˇ-ehˇ, Saˬloˬ gawˬ jawˬ-ahˇ daˆ leˇ leꞈ-euˬ meh. Aˬ yawꞈ noeˬ shaˬ dui dui-eu miˇ neh, sehˬ nawˆ maˬ nawˆ-eu uˬ taꞈ, uˬ duˬ dehˬ kaˬ taˬ-awˇ cah-euˬ meh. Aˬ yawꞈ-euˬ mehˬ nah cah-eu tsawˇ haˬ dawˬ tawˆ luꞈ kʼawꞈ, uˬ duˬ dehˬ kaˬ-awˇ ngoeˇ luꞈ-eu meh.

³¹Aˬhiˇtawˇpeˬlaˆ gʼaˬ kʼawꞈ, aˬ yawꞈ-ahˇ puiˬ-awˇ Aˬbaˇsaˬloˬ nehˬ-ehˇ gm leˇ-euˬ gaˇ kawˆ Daˬbiˇ-ahˇ aˬ cawˬ ehˇ nehˬ ngeh, “Sahˬpaˬ Miˬyehˇ-oˇ, Aˬhiˇtawˇpeˬlaˆ neh biꞈ-euˬ nui noeˬ nui duˇ deuˬ gaˇ dahˇ maˬ bi tsoeˬ ni, yawꞈ ngehꞈ-ehˇ bi pyeuꞈ-iˇ jiˇ-awˬ” lehˇ, aˬ yawꞈ guiˬ lahˬ shaˇ-euˬ meh.

³²Uˬ duˬ tahˬ duˬ jaˆ-eu gawˬ duˇ uˬ du Daˬbiˇ le keuˆ ngeh, aˬ yawꞈ jah dui dui-eu cawˬ tiˬ gʼaˬ pyeuꞈ-eu Aˬciˇ tsawˇ jeuˬ Huˇshaiˇ-aˬ, mehˬ tsoeˬ cehˬ pyaˬ-awˇ uˬ duˬ-ahˇ miˇ tsaˬ jehˆ daˆ taˬ-euˬ laꞈ kʼoeˇ, Daˬbiˇ-ahˇ tahˬ puˬ laˇ-euˬ meh.

³³Huˇshaiˇ-ahˇ Daˬbiˇ ehˇ nehˬ-eu, “Nawˇ ngaˬ-euˬ mehˬ nah caw teh laˇ-awˇ ngaˬ-ahˇ tiˬ jeˬ-iˬ maˬ caw ba nehˬ laꞈ nya-aˇ.

³⁴Ehˇ kʼawꞈ, nawˇ heu loꞈ-ehˇ jahˇ naˇ, ngaˬ-ahˇ caw ba nehˬ laꞈ nya tehꞈ-a. Meuˬ-ahˇ gʼoꞈ-iˇ-awˇ, nawˬ da-euˬ gaˇ-ahˇ ngaˇ saˇ jaˇ ziꞈ-awˇ mˇ dzeuˇ yaꞈ-euˬ loꞈ-ehˇ, nawˬ-euˬ gaˇ-ahˇ kʼawꞈ ngaˇ saˇ jaˇ ziꞈ-awˇ mˇ ma lehˇ, Aˬbaˇsaˬloˬ-ahˇ ehˇ nehˬ-iˇ-awˬ. Kʼoeˇ naˇ, Aˬhiˇtawˇpeˬlaˆ neh nui noeˬ nui duˇ biꞈ-euˬ loꞈ-ehˇ maˬ bi mˇ pyeuꞈ nya-eu gʼaˇ duˬ, nawˇ kʼaˇ gʼeh nya-eu loꞈ-ehˇ laˆ tsoeˬ-awˬ.

³⁵Piˇ ma Zaˬdoˆ hawˇ-eu piˇ ma Aˬbyaˬdaˬ aˬ yawꞈ nyaꞈ kʼawꞈ kʼoeˇ gaˇ jawˇ tehꞈ-a. Sahˬ paˬ-euˬ hawˇ nymˇ laꞈ kʼoeˇ pyeuꞈ laˇ luꞈ-eu gaˇ kawˆ-ahˇ, nawˬ neh kʼaˇ ya gaˬ-euˬ loꞈ-ehˇ aˬ yawꞈ nyaꞈ-ahˇ ehˇ nehˬ-awˬ.

³⁶Aˬ yawꞈ nyaꞈ nehˬ-ehˇ, aˬ yawꞈ nyaꞈ-euˬ aˬ li Aˬhiˇmaˆ hawˇ-eu Yawˇnaˆshaˬ kʼawꞈ jawˇ-eu meh. Aˬ yawꞈ nyaꞈ-ahˇ pyehˬ gʼeh leꞈ-awˇ, nawˬ neh kʼaˇ ya gaˬ-euˬ gaˇ kawˆ deuˬ ngaˬ-ahˇ bi tsaꞈ gaˬ laˇ-awˬ.”

³⁷Aˬbaˇsaˬloˬ Yeˬluˇsaˬlehˬ meuˬ-ahˇ laˇ uˇ-eu nehˬ-ehˇ, Daˬbiˇ-euˬ cawˬ Huˇshaiˇ gʼaˬ kʼawꞈ, Yeˬluˇsaˬlehˬ meuˬ-ahˇ gʼoꞈ keuˆ leˇ-euˬ meh.