Read Akha 2 Saˬmeuˬlaˆ 16 Bible Online

2 Saˬmeuˬlaˆ 16 - Akha bible

2 Saˬmeuˬlaˆ 16

¹Daˬbiˇ gawˬ duˇ pu lu ui cuiˆ iˇ kʼaˇ gʼeh ngeh, Meˬpiˇbawˇshehˆ-euˬ zaˬ kʼaˆ pyeuꞈ-eu Ziˇbaˬ gʼaˬ, mahˬ tahˬ laˆ tiˬ mawˇ nyiˬ mawˇ teh-awˇ, kaˬ muˇ nyiˬ yaˇ siˬ, lawꞈ koˆ taˬ-euˬ aˬ gaꞈ aˇ siˬ tiˬ yaˇ dzahˬ, aˇ siˬ aˇ lu tiˬ yaˇ dzahˬ hawˇ-eu, aˬ gaꞈ dzaˇ uiˇ tiˬ byah ni dahˬ-eu shaˬ kʼoˆ pehˇ zeuˇ tiˬ zeuˇ tawˬ-awˇ laˇ luꞈ gaˇ, ja pyuˬ ni ya mawˇ-euˬ meh.

²“Nawˇ teu tawˬ-awˇ aˬ jeˬ gʼeh laˇ teˬ” lehˇ sahˬ paˬ naˇ haˬ ngeh, Ziˇbaˬ ehˇ-eu, “Mahˬ tahˬ laˆ heu deuˬ-aˬ, nawˬ-euˬ miˬ sawˇ zaˬ deuˬ bi dziˬ-eu gʼaˇ duˬ ma. Kaˬ muˇ hawˇ-eu aˇ siˬ aˇ lu heu deuˬ-aˬ, nawˬ-euˬ tsawˇ haˬ deuˬ bi dzaˬ-eu gʼaˇ duˬ pyeuꞈ-awˇ, aˬ gaꞈ dzaˇ uiˇ heu-aˬ, bawˇ tsahˬ bawˇ dahˇ laꞈ kʼoeˇ gaˇ ma cah doeˇ-euˬ tsawˇ haˬ deuˬ bi dawˇ-eu gʼaˇ duˬ ma.”

³Aˬ yawꞈ-ahˇ sahˬpaˬ Daˬbiˇ naˇ haˬ-eu, “Nawˬ-euˬ sahˬ paˬ Sawˇluˆ-euˬ oeˬ paˬ pyeuꞈ-eu Meˬpiˇbawˇshehˆ kʼoeˇ gʼaˬ aˬ lehˬ.” Ziˇbaˬ ehˇ-eu, “Aˬ yawꞈ Yeˬluˇsaˬlehˬ meuˬ-ahˇ jawˇ yaꞈ-euˬ meh. Aˬ jeˬ miˇ neh ehˇ naˇ, aˬ yawꞈ aˬ bawˇ-euˬ miˇ kʼahˬ aˬ yawꞈ paˇ za kʼoꞈ ni, Iˇsaˬleˬlaˆ tsawˇ haˬ deuˬ jahˇ tehꞈ-a lehˇ aˬ yawꞈ noeˬ tmˬ taˬ-euˬ meh.”

⁴Kʼoeˇ ngeh, sahˬ paˬ ehˇ-eu, “Meˬpiˇbawˇshehˆ kʼaˇ jaˆ-eu jeˬ dawˬ tawˆ luꞈ, nawˬ-euˬ pyeuꞈ-eu meh.” Ziˇbaˬ ehˇ-eu, “Sahˬ paˬ-oˇ, ngaˇ-aˬ nawˬ-euˬ zaˬ kʼaˆ pyeuꞈ-eu ma. Ngaˇ nawˬ-euˬ mehˬ shi aˬ myah luꞈ myaˆ pyawˬ naˇ mehˇ jaˆ luꞈ-uˇ.”

⁵Baˬhuˇleˬ meuˬ-ahˇ sahˬ paˬ Daˬbiˇ le keuˆ ngeh, Sawˇluˆ-euˬ aˬ yuiꞈ aˬ nyiˇ Geˬlaˬ-euˬ aˬ li Shiˇmiˇ gʼaˬ, aˬ yawꞈ-ahˇ yaˬ kʼehˇ yaˬ yaˬ-ehˇ, aˬ yawꞈ jawˇ gaˇ oe-euˬ meh.

⁶Daˬbiˇ-ahˇ loꞈ piˇ-eu guiˇ maꞈ neh Daˬbiˇ-ahˇ loꞈ jawˬ taˬ-euˬ kʼawꞈ, Daˬbiˇ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ, Shiˇmiˇ kʼaˬ lo biˬ-euˬ meh.

⁷Daˬbiˇ-ahˇ Shiˇmiˇ yaˬ kʼehˇ yaˬ-awˇ ehˇ-eu, “Doˆ-iˇ-awˬ. Doˆ-iˇ-awˬ. Aˬ cawˬ-ahˇ sehꞈ-euˬ aˬ dzawˬ aˇ gah nawˇ doˆ-iˇ-awˬ.

⁸Sawˇluˆ-euˬ miˇ kʼahˬ nawˬ neh yuˇ geuꞈ-euˬ meh. Nymˬ-mˇ poˆ jawˇ-aˬ, Sawˇluˆ-euˬ aˇ jeuˬ aˇ ca deuˬ-ahˇ nawˬ neh sehꞈ-euˬ aˇ poeˬ, Sahˬpaˬ Miˬyehˇ nawˬ-ahˇ paˇ kʼehˬ poˆ luꞈ-eu meh. Sahˬpaˬ Miˬyehˇ neh nawˬ-euˬ miˇ kʼahˬ nawˬ li Aˬbaˇsaˬloˬ-ahˇ biꞈ-euˬ meh. Nawˇ-aˬ, aˬ cawˬ-ahˇ sehꞈ-euˬ tsawˇ haˬ pyeuꞈ-eu miˇ neh, ya luˬ ya seˇ-iˇ-eu keuˆ le-euˬ maˬ ngeuˇ nya loˇ.”

⁹Zeˬluˇyaˆ-euˬ aˬ li Aˬbiˇshaiˇ ehˇ-eu, “Sahˬ paˬ-oˇ, aˬ jeˬ miˇ neh aˬ kuiˬ kuiˬ uˬ teu mawˇ nawˬ-ahˇ yaˬ kʼehˇ yaˬ yaˬ-ehˇ bi jawˇ te. Ngaˬ-ahˇ a kawˬ-aˬ biꞈ laꞈ-awˬ. Ngaˇ le-awˇ aˬ yawꞈ-euˬ uˬ duˬ coeˇ tsehˆ nehˬ leˇ la.”

¹⁰Aˬbiˇshaiˇ hawˇ-eu aˬ yawꞈ-euˬ aˇ doˆ Yoˇbaˬ aˬ nyaꞈ-ahˇ sahˬ paˬ ehˇ nehˬ-eu, “Heu-aˬ, naw nyaꞈ-ahˇ taꞈ-euˬ gaˇ maˬ ngeuˇ-a. Sahˬpaˬ Miˬyehˇ neh aˬ yawꞈ-ahˇ kʼehˇ-awˇ, ngaˬ-ahˇ yaˬ kʼehˇ bi yaˬ le-euˬ jeˬ pyeuꞈ lawˬ naˇ, aˬ dui aˬ jeˬ ehˇ kʼaˇ paˇ za ta.”

¹¹Aˬbiˇshaiˇ hawˇ-eu yaw huiˬ yaw mahˇ kʼoeˇ deuˬ-ahˇ Daˬbiˇ ehˇ nehˬ-eu, “Ngaˬ li maˇ maˇ ni gʼeh-eu gʼaˬ kʼawꞈ, ngaˬ-ahˇ sehꞈ-eu lehˇ leh jeh luꞈ-eu maˬ ngeuˇ-a loˇ. Aˬ jeˬ miˇ neh Beˬyaˬmiˬ tsawˇ jeuˬ heu gʼaˬ-ahˇ naw maꞈ zahˬ leˇ-eu nya. Sahˬpaˬ Miˬyehˇ neh aˬ yawꞈ-ahˇ kʼoeˇ loꞈ-ehˇ yaˬ kʼehˇ bi yaˬ-euˬ meh. Aˬ yawˇ yawꞈ kʼaˇ ehˇ mawꞈ-eu jeˬ ehˇ ehˇ-ehˇ jawˇ luꞈ-uˇ.

¹²Ngaˇ ya daˬ luꞈ-eu jeˬ-ahˇ Sahˬpaˬ Miˬyehˇ haw mawˇ-awˇ, iˬ nah ngaˬ-euˬ kʼoeˇ taˆ heu loꞈ-ehˇ yaˬ kʼehˇ yaˬ nehˬ laꞈ-euˬ aˇ poeˬ, guiˬ lahˬ biꞈ laꞈ-eu aˇ nah baw tehꞈ-a.”

¹³Kʼoeˇ naˇ, Daˬbiˇ hawˇ-eu aˬ yawꞈ-euˬ tsawˇ haˬ deuˬ gaˇ ma caw caw-ehˇ le gʼeh leꞈ-euˬ meh. Shiˇmiˇ gʼaˬ kʼawꞈ, gawˬ duˇ baˬ gʼaˬ caw caw-ehˇ aˬ yawꞈ maꞈ-euˬ mehˬ nah kʼaˇ miˇ maˬ miˇ cah-awˇ, yaˬ kʼehˇ yaˬ-eu laꞈ kʼoeˇ kʼaˬ lo biˬ-awˇ miˇ tsaˬ byaˆ byaˆ ehˇ caw teh-euˬ meh.

¹⁴Sahˬ paˬ hawˇ-eu aˬ yawꞈ-euˬ tsawˇ haˬ dawˬ tawˆ luꞈ Yawˇdaˬ lawˇ baˬ-ahˇ iˇ keuˆ ngeh, gʼaˬ doeˇ doeˇ-eu miˇ neh gʼaˬ naˬ naˬ-euˬ meh.

¹⁵Aˬbaˇsaˬloˬ hawˇ-eu aˬ yawꞈ nehˬ-ehˇ jawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Yeˬluˇsaˬlehˬ meuˬ-ahˇ uˇ leˇ-awˇ, Aˬhiˇtawˇpeˬlaˆ kʼawꞈ aˬ yawꞈ maꞈ nehˬ-ehˇ jawˇ luꞈ-eu meh.

¹⁶Daˬbiˇ jah dui dui-eu cawˬ pyeuꞈ-eu Huˇshaiˇ gʼaˬ Aˬbaˇsaˬloˬ-ahˇ ya mawˇ ngeh, “Sahˬ paˬ ziˇ baw luꞈ-uˇ. Sahˬ paˬ ziˇ baw luꞈ-uˇ” lehˇ guˇ-euˬ meh.

¹⁷Huˇshaiˇ-ahˇ Aˬbaˇsaˬloˬ ehˇ nehˬ-eu, “Nawˬ-euˬ cawˬ Daˬbiˇ-ahˇ nawˇ saˇ jaˇ ziꞈ-eu jeˬ aˬ jeˬ pyeuꞈ shaw taˬ. Aˬ jeˬ miˇ neh aˬ yawꞈ-euˬ mehˬ nah nawˇ maˬ caw teh gʼeh teˬ.”

¹⁸Huˇshaiˇ ehˇ-eu, “Aˬ yawꞈ-euˬ mehˬ nah ngaˇ diˇ daˬ-ehˇ maˬ caw teh-iˇ ni jawˇ yaꞈ-euˬ ma. Aˬ jeˬ baˬ da neh nga lehˇ ya ehˇ naˇ, Sahˬpaˬ Miˬyehˇ neh maˬ ehˇ, heu gaˇ jawˇ-eu deuˬ neh maˬ ehˇ, Iˇsaˬleˬlaˆ tsawˇ haˬ dawˬ tawˆ luꞈ neh maˬ ehˇ, kʼaˇ tseˇ doˆ-euˬ gʼaˬ jawˇ paw ngaˇ pyawˬ-awˇ, aˬ yawꞈ nehˬ-ehˇ ngaˇ jawˇ ma.

¹⁹Ngaˬ-euˬ sahˬ paˬ-euˬ aˬ li-euˬ gaˇ ngaˇ maˬ mˇ-ehˇ, aˬ suˇ gʼaˬ-euˬ gaˇ paˇ mˇ nmˇ. Nawˬ da-euˬ gaˇ ngaˇ mˇ dzeuˇ laꞈ-euˬ loꞈ-ehˇ, nymˬ-mˇ poˆ jawˇ nawˬ-euˬ gaˇ ngaˇ mˇ ma.”

²⁰Kʼoeˇ naˇ, Aˬhiˇtawˇpeˬlaˆ-ahˇ Aˬbaˇsaˬloˬ ehˇ nehˬ-eu, “Nymˬ-mˇ poˆ jawˇ nga maꞈ heu gaˇ oe keuˆ gʼaˬ-euˬ-aˬ, aˬ jeˬ ya mˇ nmˇ lehˇ nui noeˬ nui duˇ biꞈ nehˬ laꞈ-awˬ.”

²¹Aˬhiˇtawˇpeˬlaˆ ehˇ-eu, “Sahˬ paˬ-euˬ hawˇ nymˇ-ahˇ bi loꞈ piˇ-eu lehˇ nawˬ da neh taˬ yaꞈ-euˬ nawˬ da-euˬ ma nyiˇ kʼoeˇ deuˬ nehˬ-ehˇ yuꞈ leˇ-awˬ. Kʼoeˇ ngeh, nawˬ da-ahˇ nawˬ neh yehˬ bawˬ sehˇ lu-ehˇ gʼeh nehˬ-euˬ gaˇ kawˆ, Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ ya siˬ-awˇ, nawˬ-euˬ mehˬ nah caw teh-eu tsawˇ haˬ deuˬ gʼaˬ ahˇ dui dui laˇ tehꞈ-a.”

²²Kʼoeˇ naˇ, sahˬ paˬ-euˬ hawˇ nymˇ-euˬ nymˇ mˬ kʼoeˇ taˆ , Aˬbaˇsaˬloˬ gʼaˇ duˬ aˬ yawꞈ maꞈ sehˬ gʼawˆ gʼawˆ-awˇ, tsawˇ haˬ dawˬ tawˆ luꞈ haw mawˇ gaˇ, aˬ yawꞈ aˬ da-euˬ ma nyiˇ kʼoeˇ deuˬ nehˬ-ehˇ Aˬbaˇsaˬloˬ yuꞈ taꞈ-euˬ meh.

²³Aˇ nah aˇ yamˬ kʼoeˇ yamˬ-aˬ, Aˬhiˇtawˇpeˬlaˆ neh nui noeˬ nui duˇ kʼaˇ biꞈ-euˬ jeˬ-ahˇ, Miˬyehˇ-euˬ dawˬ loꞈ-ehˇ naˇ haˬ geuꞈ luꞈ-eu aˇ yamˬ meh. Daˬbiˇ hawˇ-eu Aˬbaˇsaˬloˬ aˬ ha nyaꞈ nyiˬ da zaˬ luꞈ, Aˬhiˇtawˇpeˬlaˆ-euˬ dawˬ-ahˇ maˬ leuˇ ni caw teh-euˬ meh.