Read Akha 2 Saˬmeuˬlaˆ 17 Bible Online

2 Saˬmeuˬlaˆ 17 - Akha bible

2 Saˬmeuˬlaˆ 17

¹Gʼawˬ myahˇ maˬ gʼeh-ehˇ, Aˬbaˇsaˬloˬ-ahˇ Aˬhiˇtawˇpeˬlaˆ heu loꞈ-ehˇ ehˇ nehˬ-euˬ meh. “Ngaˬ-ahˇ tsawˇ haˬ tiˬ muiˇ nyiˬ heˇ gʼaˬ bi tseˇ doˆ nehˬ laꞈ-awˬ.

²Nymˇ ciꞈ Daˬbiˇ-euˬ mehˬ nah ngaˇ caw teh-iˇ ma. Aˬ yawꞈ gʼaˬ doeˇ doeˇ-awˇ nui ma cawˆ dui dui luꞈ ngeh, ngaˇ aˬ yawꞈ-ahˇ guiˇ deuˆ ma. Aˬ yawꞈ tsawˬ guˆ-iˇ-awˇ, aˬ yawꞈ-euˬ tsawˇ haˬ deuˬ cehˆ byoˆ jiˇ tehꞈ-a. Sahˬ paˬ-ahˇ tehꞈ-ehˇ ngaˇ sehꞈ ma.

³Kʼoeˇ naˇ, zaˬ miˬ zaˬ-ahˇ yawˬ ha-euˬ kʼaˬ dzeˇ zaˬ jawˇ gaˇ sheuˬ kʼoꞈ laꞈ-eu loꞈ-ehˇ, aˬ yawꞈ-euˬ tsawˇ haˬ kʼoeˇ deuˬ dawˬ tawˆ luꞈ-ahˇ, nawˇ jawˇ gaˇ ngaˇ sheuˬ kʼoꞈ laꞈ ma. Tsawˇ haˬ tiˬ gʼaˬ-ahˇ tehꞈ-ehˇ nawˇ sehꞈ mawꞈ-eu nui ma jaˆ-eu loꞈ-ehˇ, nui deuˬ-ahˇ tiˬ jeˬ-iˬ maˬ bi ca laˇ.”

⁴Heu-aˬ, muiˬ-eu nui noeˬ nui duˇ meh lehˇ, Aˬbaˇsaˬloˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ noeˬ-euˬ meh.

⁵Aˬbaˇsaˬloˬ ehˇ-eu, “Nymˬ-mˇ poˆ jawˇ, Aˬciˇ tsawˇ jeuˬ Huˇshaiˇ gʼaˬ-ahˇ kuˇ laˬ-iˇ haw-awˬ. Aˬ yawꞈ aˬ joˆ-ehˇ ehˇ nga lehˇ haw kaˇ-euˇ.”

⁶Huˇshaiˇ laˇ keuˆ ngeh, Aˬbaˇsaˬloˬ ehˇ-eu, “Aˬhiˇtawˇpeˬlaˆ neh heu loꞈ-ehˇ nui noeˬ nui duˇ biꞈ taˬ-euˬ meh. Aˬ dui caw teh-eu tsaˬ nga loˇ. Maˬ tsaˬ naˇ, aˬ joˆ-ehˇ jahˇ paˬ nga lehˇ nawˇ ehˇ haw sheˇ.”

⁷Aˬbaˇsaˬloˬ-ahˇ Huˇshaiˇ ehˇ nehˬ-eu, “Heu poˆ jawˇ Aˬhiˇtawˇpeˬlaˆ neh nawˬ-ahˇ biꞈ-euˬ nui noeˬ nui duˇ heu maˬ muiˬ nga.

⁸Nawˬ da Daˬbiˇ hawˇ-eu aˬ yawꞈ-euˬ tsawˇ haˬ deuˬ-aˬ, guiˇ deuˆ-eu kʼaˆ dui dui-awˇ, kʼaˬ hmˇ zaˬ bi nyehꞈ geuꞈ-euˬ kʼaˬ hmˇ aˬ ma tiˬ mawˇ loꞈ-ehˇ, guˆ dui dui laˇ paˬ-ehˇ gʼeh-eu tsawˇ haˬ deuˬ pyeuꞈ-eu gaˇ kawˆ nawˇ siˬ nya meh. Nawˬ da-aˬ, guiˇ mˇ myahˇ laꞈ-euˬ tsawˇ haˬ tiˬ gʼaˬ pyeuꞈ-awˇ, uˬ ciꞈ paw aˬ yawꞈ-euˬ tsawˇ haˬ deuˬ nehˬ-ehˇ aˬ yawꞈ maˬ yuꞈ-a.

⁹Nymˬ-mˇ, aˬ yawꞈ lo kʼahˬ-ahˇ loˇ lehˇ, tiˬ gaˇ paw dzuˇ zaꞈ-awˇ maˬ jawˇ-aˇ lehˇ aˬ suˇ gʼaˬ ehˇ tsehˆ nya nmˇ. Nawˬ-euˬ tsawˇ haˬ deuˬ-ahˇ aˬ yawꞈ neh jeˬ huˬ huˬ-awˇ bi deuˆ shaw naˇ, gaˇ kawˆ kʼoeˇ kʼaˇ ya gaˬ-euˬ tsawˇ haˬ dawˬ tawˆ luꞈ, Aˬbaˇsaˬloˬ-euˬ tsawˇ haˬ deuˬ gʼawˬ mya ni bi deuˆ sehꞈ ngaˬ jeˇ lehˇ ehˇ tehꞈ-a.

¹⁰Kʼoeˇ ngeh, aˇ laˬ jaˬ shiˇ loꞈ-ehˇ kʼaˬ-eu tsawˇ haˬ deuˬ kʼawꞈ, guˆ-eu nui ma ahˇ laˇ tehꞈ-a. Aˬ jeˬ miˇ neh ehˇ naˇ, nawˬ da-aˬ, guiˇ deuˆ-eu nya dui dui-awˇ, aˬ yawꞈ-euˬ tsawˇ haˬ deuˬ kʼawꞈ kʼaˆ dui dui-eu meh.

¹¹Ngaˇ heu loꞈ-ehˇ nui noeˬ nui duˇ biꞈ mawꞈ-eu ma. Iˇsaˬleˬlaˆ miˇ kʼahˬ heu dzeˇ kʼoeˇ dzeˇ doˆ ni kʼaˇ jawˇ-eu tsawˇ haˬ deuˬ-ahˇ, iˬ ma laˆ shaˆ lawˇ deh-ahˇ ga-eu kʼaˇ shuiꞈ myaˆ ni kuˇ uiˬ taˬ-awˇ, nawˬ-euˬ gʼawˇ mawˇ aˬ yawꞈ maꞈ kʼoeˇ taˆ aˬ yuiꞈ geuꞈ-awˇ guiˇ deuˆ-eu tsaˬ tehꞈ-a.

¹²Daˬbiˇ aˬ geu tsahˇ-ahˇ jawˇ kʼawꞈ aˬ dui mawˇ nya-awˇ, aˬ yawꞈ-ahˇ tiˬ jeˬ-iˬ maˬ siˬ leˇ mi naˆ-ehˇ, aˬ dui aˬ yawꞈ-ahˇ guiˇ deuˆ nya tehꞈ-a. Aˬ yawꞈ maˬ ehˇ, aˬ yawꞈ-euˬ tsawˇ haˬ deuˬ maˬ ehˇ, tiˬ gʼaˬ-iˬ maˬ dzeuˇ-iˇ ni ya shiˇ jiˇ tehꞈ-a.

¹³Meuˬ tiˬ meuˬ na laꞈ kʼoeˇ aˬ yawꞈ cehˆ zaꞈ naˇ, aˬ dui-euˬ tsawˇ haˬ dawˬ tawˆ luꞈ aˇ caˆ yuˇ uiˬ laꞈ-awˇ, meuˬ meuˬ lah-ehˇ gʼaˬ lawˬ-ahˇ gʼeu poˆ ahˇ yaꞈ-awˇ, gawˬ duˇ uˬ du kʼaˬ lo tsaˬ byaˆ tiˬ siˬ-iˬ maˬ bi ga yaꞈ ni, yaˆ pyawˇ yaˆ-eu loꞈ-ehˇ juˇ tsui ni jahˇ nehˬ tehꞈ-a.”

¹⁴Aˬbaˇsaˬloˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Aˬhiˇtawˇpeˬlaˆ-euˬ nui noeˬ naˆ maˬ tseˇ, Huˇshaiˇ-euˬ nui noeˬ muiˬ dzehˬ meh lehˇ ehˇ-eu meh. Aˬhiˇtawˇpeˬlaˆ neh biꞈ-euˬ muiˬ-eu nui noeˬ nui duˇ-ahˇ aˬ yawꞈ maꞈ maˬ caw teh-ehˇ, Aˬbaˇsaˬloˬ kʼoeˇ taˆ luˬ-iˇ seˇ-iˇ-eu jeˬ bi keuˆ le-eu gʼaˇ duˬ, Sahˬpaˬ Miˬyehˇ neh kʼoeˇ loꞈ-ehˇ jahˇ nehˬ-euˬ meh.

¹⁵Huˇshaiˇ-aˬ, Aˬbaˇsaˬloˬ hawˇ-eu Iˇsaˬleˬlaˆ tsawˇ haˬ deuˬ-ahˇ aˬ yawꞈ neh nui noeˬ nui duˇ biꞈ-euˬ gaˇ kawˆ maˬ ehˇ, Aˬhiˇtawˇpeˬlaˆ neh nui noeˬ nui duˇ biꞈ-euˬ gaˇ kawˆ maˬ ehˇ, piˇ ma Zaˬdoˆ hawˇ-eu piˇ ma Aˬbyaˬdaˬ aˬ nyaꞈ-ahˇ dzawˇ nehˬ-euˬ meh.

¹⁶Huˇshaiˇ ehˇ-eu, “Daˬbiˇ jawˇ gaˇ tsawˇ haˬ yaw kawˇ-ehˇ pyehˬ gʼeh-awˇ, aˬ yawꞈ hawˇ-eu aˬ yawꞈ-euˬ tsawˇ haˬ dawˬ tawˆ luꞈ bi nyehꞈ-awˇ bi sehꞈ jiˇ gaˇ ma bi keuˆ-eu gʼaˇ duˬ, bawˇ tsahˬ bawˇ dahˇ-ahˇ jaˆ-eu lawˇ baˬ tsehˆ daˬ kʼoeˇ tsahˇ-ahˇ nymˇ ciꞈ yaꞈ yaꞈ-ehˇ maˬ jawˇ ni, tiˬ poˆ tehꞈ-ehˇ Yawˇdaˬ lawˇ baˬ tsehˆ doˆ-awˬ lehˇ bi tsaꞈ gaˬ-iˇ-awˬ.”

¹⁷Aˬbyaˬdaˬ-euˬ aˬ li Yawˇnaˆshaˬ hawˇ-eu Zaˬdoˆ-euˬ aˬ li Aˬhiˇmaˆ aˬ nyaꞈ-aˬ, Yeˬluˇsaˬlehˬ-euˬ meuˬ meuˬ taw Eˬloˇgeˬ iˇ cuꞈ iˇ byoe dawˬ peh loꞈ luꞈ-eu meh. Aˬ cawˬ mawˇ gaˇ guˆ-eu miˇ neh, meuˬ laꞈ kʼoeˇ aˬ yawꞈ nyaꞈ maˬ uˇ leˇ peuˬ-a. Zaˬ miˬ zaˬ zaˬ kʼaˆ tiˬ gʼaˬ, kʼaˇ pyeuꞈ laˇ-euˬ gaˇ kawˆ deuˬ aˬ yawꞈ nyaꞈ-ahˇ dzawˇ nehˬ le-awˇ, gaˇ kawˆ kʼoeˇ aˬ yawꞈ nyaꞈ sahˬ paˬ Daˬbiˇ-ahˇ paˇ tsaꞈ gaˬ-iˇ-euˬ meh.

¹⁸Ehˇ kʼawꞈ, tiˬ nah keuˆ laˇ ngeh, aˬ li tiˬ li aˬ yawꞈ nyaꞈ-ahˇ mawˇ-awˇ, Aˬbaˇsaˬloˬ-ahˇ tsaꞈ gaˬ-iˇ-euˬ meh. Kʼoeˇ miˇ neh, aˬ yawꞈ nyaꞈ yaw kawˇ-ehˇ cehˆ-awˇ, Baˬhuˇleˬ meuˬ laꞈ kʼoeˇ, aˬ cawˬ-euˬ nymˇ-ahˇ cehˆ zaꞈ-iˇ-euˬ meh. Nymˇ kʼoeˇ nymˇ dawˬ peh lah duˬ tiˬ duˬ jaˆ-awˇ, lah duˬ kʼoeˇ duˬ-ahˇ aˬ yawꞈ nyaꞈ uˇ-iˇ-awˇ jawˇ-euˬ meh.

¹⁹Nymˇ sahˇ gʼaˬ-euˬ miˬ zaˬ neh lah duˬ kʼoeˇ duˬ-ahˇ kʼmˬ pymˬ pymˬ tehˬ-awˇ, kʼoeˇ-euˬ kʼoeˇ taˆ cehˇ lawꞈ lawꞈ daˆ gʼeh-awˇ, aˬ cawˬ maˬ bi haw siˬ ni jahˇ taˬ-euˬ meh.

²⁰Aˬbaˇsaˬloˬ-euˬ gaˇ mˇ-eu yaw huiˬ yaw mahˇ deuˬ nymˇ kʼoeˇ nymˇ-ahˇ oe-awˇ, “Aˬhiˇmaˆ hawˇ-eu Yawˇnaˆshaˬ aˬ nyaꞈ aˬ gaˇ iˇ taˬ” lehˇ, zaˬ miˬ zaˬ kʼoeˇ gʼaˬ-ahˇ naˇ haˬ le-euˬ meh. Zaˬ miˬ zaˬ kʼoeˇ gʼaˬ gʼeh, “Aˬ yawꞈ nyaꞈ lawˇ baˬ tsehˆ doˆ dzeuˇ-euˬ meh” lehˇ, zaˬ miˬ zaˬ kʼoeˇ gʼaˬ paˇ ehˇ kʼoꞈ nehˬ-euˬ meh. Tsawˇ haˬ kʼoeˇ deuˬ aˬ yawꞈ nyaꞈ-ahˇ poˆ haw kʼawꞈ maˬ poˆ mawˇ nya-ehˇ, Yeˬluˇsaˬlehˬ meuˬ-ahˇ gʼoꞈ leˇ-euˬ meh.

²¹Aˬ yawꞈ maꞈ gʼoꞈ leˇ dzeuˇ ngeh, Yawˇnaˆshaˬ hawˇ-eu Aˬhiˇmaˆ aˬ nyaꞈ lah duˬ-ahˇ neh doˆ laˆ-awˇ, sahˬ paˬ Daˬbiˇ-ahˇ dawˬ tsaꞈ tsaꞈ nehˬ-iˇ-euˬ meh. Aˬhiˇtawˇpeˬlaˆ neh lehˬ hmˬ taˬ-euˬ gaˇ kawˆ deuˬ, sahˬ paˬ Daˬbiˇ-ahˇ aˬ yawꞈ nyaꞈ dzawˇ nehˬ-awˇ, “Yawˇdaˬ lawˇ baˬ yaw kawˇ-ehˇ tsehˆ doˆ-awˬ” lehˇ ehˇ nehˬ-euˬ meh.

²²Kʼoeˇ ngeh, Daˬbiˇ hawˇ-eu aˬ yawꞈ-euˬ tsawˇ haˬ deuˬ Yawˇdaˬ lawˇ baˬ tsehˆ-awˇ, uˬ bya bya laˇ ngeh yawˬ gʼaˬ na luꞈ tsehˆ dzeuˇ jiˇ-euˬ meh.

²³Aˬhiˇtawˇpeˬlaˆ-aˬ, aˬ yawꞈ neh nui noeˬ nui duˇ biꞈ-euˬ loꞈ-ehˇ aˬ cawˬ maˬ mˇ gaˇ ya mawˇ ngeh, mahˬ tahˬ laˆ dziˬ gʼa laˆ dawˆ-awˇ, aˬ yawꞈ jawˇ-eu meuˬ-ahˇ gʼoꞈ-iˇ-euˬ meh. Kʼoeˇ naˇ, kʼaˇ mˇ luiˆ paˬ-ehˇ jaˆ-eu jeˬ mˇ luiˆ jiˇ-awˇ, aˬ yawˇ yawꞈ paꞈ gʼeu sehꞈ-euˬ meh. Aˬ yawꞈ aˬ da-euˬ lmˬ bymˇ-ahˇ, aˬ yawꞈ-ahˇ baꞈ pahˬ nehˬ-euˬ meh.

²⁴Aˬbaˇsaˬloˬ hawˇ-eu Iˇsaˬleˬlaˆ tsawˇ haˬ deuˬ Yawˇdaˬ lawˇ ba tsehˆ doˆ ngeh, Daˬbiˇ Maˬhaˬneˬ meuˬ-ahˇ le keuˆ-euˬ meh.

²⁵Aˬbaˇsaˬloˬ-aˬ, Aˬmaˬsaˬ-ahˇ Yoˇbaˬ-euˬ dah zaˇ guiˇ guiˇ maꞈ dawˬ tawˆ luꞈ kʼoeˇ taˆ uˆ lahˇ-eu gʼaˬ bi geuꞈ-euˬ meh. Aˬmaˬsaˬ-aˬ, Iˇshaˬmeˬlaˇ tsawˇ jeuˬ Yeˬdeuˬ-euˬ aˬ li pyeuꞈ-eu meh. Aˬ yawꞈ-euˬ aˬ ma Aˬbiˇgeˬlaˆ hawˇ-eu Yoˇbaˬ-euˬ aˬ ma Zeˬluˇyaˆ aˬ nyaꞈ nmˇ-aˬ, Naˬhaˇ-euˬ aˬ buˇ pyeuꞈ-eu meh.

²⁶Aˬbaˇsaˬloˬ hawˇ-eu aˬ yawꞈ-euˬ tsawˇ haˬ deuˬ-aˬ, Giˇlaˆ miˇ kʼahˬ-ahˇ naˬ leˇ-awˇ jawˇ-euˬ meh.

²⁷Maˬhaˬneˬ meuˬ-ahˇ Daˬbiˇ le keuˆ ngeh, Aˬmoˬ miˇ kʼahˬ Laˬbah meuˬ-ahˇ jawˇ-eu Naˬhaˇ-euˬ aˬ li Shoˇbiˬ maˬ ehˇ, Lawˇdeˬbaˬ meuˬ-ahˇ jawˇ-eu Aˬmeˬlaˆ-euˬ aˬ li Maˬkiˬlaˇ maˬ ehˇ, Yawˇgeˬlmˬ meuˬ-ahˇ jawˇ-eu Baˬziˇlehˇ maˬ ehˇ, aˬ yawꞈ jawˇ gaˇ laˇ-euˬ meh.

²⁸Aˬ yawꞈ maꞈ-aˬ, yuꞈ zaˇ bui bahˬ, kʼmˬ maˬ oeˬ tsaꞈ, miˇ tsaˬ oeˬ lahˬ, cehˇ, lawˬ loeˇ, aˇ shaˇ, aˇ behˆ, nuiˆ gahˬ, heu deuˬ hawˇ-eu, laˆ jaꞈ taˬ-euˬ dzaˬ dzaˬ dawˇ dawˇ deuˬ,

²⁹byaˬ byaˬ uiˇ deuˬ, mawˇ neˇ aˬ coeˇ neh jahˇ-euˬ kaˬ muˇ deuˬ yuˇ laꞈ-awˇ, yawˇ tiˬ deuˬ teh leꞈ nehˬ-euˬ meh. Daˬbiˇ hawˇ-eu aˬ yawꞈ-euˬ tsawˇ haˬ deuˬ, bawˇ tsahˬ bawˇ dahˇ laꞈ kʼoeˇ mehꞈ-eu shuꞈ-eu jeˬ hawˇ-eu gʼaˬ doeˇ doeˇ dui dui-eu jeˬ-ahˇ ya daˬ-euˬ meh lehˇ aˬ yawꞈ maꞈ noeˬ siˬ-eu laꞈ kʼoeˇ, kʼoeˇ loꞈ-ehˇ yuˇ laꞈ nehˬ-euˬ meh.