Read Akha 2 Saˬmeuˬlaˆ 19 Bible Online

2 Saˬmeuˬlaˆ 19 - Akha bible

2 Saˬmeuˬlaˆ 19

¹Sahˬ paˬ Daˬbiˇ Aˬbaˇsaˬloˬ gʼaˇ duˬ tsawˇ ngoeˇ ngoeˇ luꞈ-eu gaˇ kawˆ, Yoˇbaˬ-ahˇ aˬ cawˬ ehˇ nehˬ-euˬ meh.

²Sahˬ paˬ Daˬbiˇ-euˬ guiˇ maꞈ deuˬ-aˬ, guiˇ deuˆ gʼaˬ-euˬ miˇ neh laˬ kʼaˬ cehˇ dui dui paˬ-ehˇ gʼeh kʼawꞈ, laˬ kʼaˬ maˬ cehˇ ni noeˬ shaˬ-euˬ meh. Aˬ jeˬ miˇ neh ehˇ naˇ, Aˬbaˇsaˬloˬ gʼaˇ duˬ sahˬ paˬ Daˬbiˇ tsawˇ ngoeˇ ngoeˇ luꞈ-eu gaˇ kawˆ aˬ yawꞈ maꞈ ya gaˬ-euˬ miˇ neh meh.

³Aˬ yawꞈ maꞈ-aˬ, guiˇ maˬ deuˆ gʼaˬ nya-ehˇ cehˆ-awˇ, shaꞈ dawˇ-eu tsawˇ haˬ deuˬ loꞈ-ehˇ, meuˬ laꞈ kʼoeˇ ciˬ cuˇ ni gʼoꞈ uˇ leˇ jiˇ-euˬ meh.

⁴Sahˬ paˬ-aˬ, aˬ yawꞈ-euˬ myaˆ pyawˬ-ahˇ dehˬ kaˬ-awˇ, “Ngaˬ li-oˇ. Ngaˬ li Aˬbaˇsaˬloˬ-oˇ. Ngaˬ li Aˬbaˇsaˬloˬ-oˇ” lehˇ guˇ guˇ-ehˇ ngoeˇ-eu meh.

⁵Kʼoeˇ ngeh, sahˬ paˬ-euˬ nymˇ-ahˇ Yoˇbaˬ le-awˇ, sahˬ paˬ-ahˇ heu loꞈ-ehˇ ehˇ nehˬ-euˬ meh. “Nawˬ-ahˇ maˬ ehˇ, nawˬ buˇ nawˬ li deuˬ-ahˇ maˬ ehˇ, nawˬ-euˬ ma nyiˇ deuˬ-ahˇ maˬ ehˇ, ka kʼoꞈ nehˬ-euˬ nawˬ-euˬ tsawˇ haˬ deuˬ ya shaꞈ dawˇ ni iˬ nah nawˇ mˇ-euˬ meh.

⁶Nawˬ-ahˇ gaˬ-eu tsawˇ haˬ deuˬ-ahˇ nawˇ bye-awˇ, nawˬ-ahˇ bye-eu tsawˇ haˬ deuˬ-ahˇ nawˇ gaˬ-eu meh. Nawˬ-euˬ gaˇ mˇ-eu yaw huiˬ yaw mahˇ deuˬ hawˇ-eu nawˬ-euˬ tsawˇ haˬ deuˬ-aˬ, nawˬ-euˬ gʼaˇ duˬ tiˬ jeˬ-iˬ gaˇ dahˇ maˬ tsoeˬ-a lehˇ nawˇ noeˬ luꞈ-eu gaˇ kawˆ, iˬ nah bya cehˆ ni doˆ laˇ taˬ-euˬ meh. Iˬ nah nga maꞈ shiˇ jiˇ-awˇ, Aˬbaˇsaˬloˬ maˬ shiˇ-ehˇ dehꞈ law nmˇ-aˬ, nawˇ laˬ kʼaˬ cehˇ dui dui law hawˇ ngaˇ lehˇ ngaˇ haw siˬ-euˬ ma.

⁷Nymˬ-mˇ iˇ-awˇ, nawˬ-euˬ tsawˇ haˬ deuˬ-ahˇ dawˬ yaw muiˬ paˬ-ehˇ ngehˬ cawˬ nehˬ-iˇ-awˬ. Nawˇ kʼoeˇ loꞈ-ehˇ maˬ jahˇ naˇ, nyi shawˬ uˬ bya bya laˇ ngeh, aˬ yawꞈ maꞈ nawˬ nehˬ-ehˇ tiˬ gʼaˬ-iˬ maˬ jawˇ ni doˆ-iˇ jiˇ tehꞈ-a lehˇ, sahˬ paˬ Miˬyehˇ-euˬ tsawˇ myahˇ uˬ moˆ ngaˇ ehˇ tsehˆ peuˬ ma. Kʼoeˇ-aˬ, nawˬ-euˬ tiˬ ziˇ kʼaˇ ya tahˬ puˬ-euˬ shaˬ zahˬ dawˬ tawˆ luꞈ kʼoeˇ taˆ, doeˇ dui dui-eu jeˬ pyeuꞈ tehꞈ-a.”

⁸Kʼoeˇ ngeh, sahˬ paˬ tuˇ laˇ-awˇ, meuˬ lahˇ kʼehˬ dawˬ peh iˇ-awˇ nuiˇ-euˬ meh. Aˬ yawꞈ kʼoeˇ gaˇ nuiˇ luꞈ-eu gaˇ kawˆ aˬ yawꞈ-euˬ tsawˇ haˬ deuˬ ya gaˬ-awˇ, dawˬ tawˆ luꞈ aˬ yawꞈ-euˬ dawˬ peh uiˬ laˇ jiˇ-euˬ meh. Kʼoeˇ ngeh deuˆ-ahˇ, Iˇsaˬleˬlaˆ tsawˇ haˬ dawˬ tawˆ luꞈ, yawˬ ha-euˬ nymˇ-ahˇ yawˬ ha cehˆ gʼoꞈ jiˇ-euˬ meh.

⁹Iˇsaˬleˬlaˆ miˇ kʼahˬ kʼahˬ lah ni, tiˬ gʼaˬ tiˇ gʼaˬ ceh ceh-ehˇ ehˇ-eu, “Sahˬ paˬ Daˬbiˇ-aˬ, muiˇ-eu deuˬ-euˬ aˬ laꞈ laꞈ kʼoeˇ neh aˬ dui-ahˇ ka kʼoꞈ nehˬ laꞈ-euˬ meh. Piˇliˇtiˆ tsawˇ haˬ deuˬ-euˬ aˬ laꞈ laꞈ kʼoeˇ, aˬ dui-ahˇ aˬ yawꞈ ka kʼoꞈ nehˬ laꞈ-euˬ meh. Ehˇ kʼawꞈ, nymˬ-mˇ Aˬbaˇsaˬloˬ-ahˇ aˬ yawꞈ yahˇ pawˇ-awˇ, miˇ kʼahˬ heu kʼahˬ-ahˇ aˬ yawꞈ byehˇ dzeh yaꞈ-euˬ meh.

¹⁰Kʼoeˇ naˇ, Aˬbaˇsaˬloˬ-ahˇ aˬ dui tsiˇ shehˆ daˆ nehˬ-awˇ, sahˬ paˬ ka nehˬ-euˬ ma. Ehˇ kʼawꞈ, guiˇ deuˆ-eu laꞈ kʼoeˇ aˬ yawꞈ shiˇ dzeuˇ-euˬ-aˬ, nymˬ-mˇ poˆ jawˇ tiˬ gʼaˬ na iˇ-awˇ, aˬ jeˬ miˇ neh sahˬ paˬ Daˬbiˇ-ahˇ maˬ sheuˬ kʼoꞈ laˬ-iˇ ni jawˇ ta.”

¹¹Iˇsaˬleˬlaˆ tsawˇ haˬ deuˬ kʼoeˇ loꞈ-ehˇ ehˇ luꞈ-eu gaˇ kawˆ, sahˬ paˬ Daˬbiˇ-ahˇ gaˬ leˇ-euˬ meh. Kʼoeˇ ngeh, piˇ ma Zaˬdoˆ hawˇ-eu piˇ ma Aˬbyaˬdaˬ aˬ nyaꞈ-ahˇ, Yuˇdaˆ tsawˇ haˬ aˬ yuiꞈ aˬ tsu deuˬ jawˇ gaˇ heu loꞈ-ehˇ bi ehˇ gaˬ-iˇ-euˬ meh. “Sahˬpaˬ-ahˇ sheuˬ kʼoꞈ laˬ laˇ-eu gʼaˇ duˬ naw maꞈ aˬ jeˬ miˇ neh aˬ cawˬ jeˬ nahˬ ga te. Iˇsaˬleˬlaˆ tsawˇ haˬ deuˬ-euˬ dawˬ sahˬ paˬ jawˇ gaˇ gaˬ keuˆ le gʼaˬ-euˬ meh.

¹²Naw maꞈ ngaˬ-euˬ aˬ yuiꞈ aˬ nyiˇ, ngaˬ-euˬ shiˬ shaˬ pyeuꞈ-eu maˬ ngeuˇ te loˇ. sahˬ paˬ-ahˇ sheuˬ kʼoꞈ laˬ le-eu gʼaˇ duˬ, aˬ jeˬ miˇ neh naw maꞈ aˬ cawˬ jeˬ nah ga ga-ehˇ jawˇ te.”

¹³Aˬmaˬsaˬ-ahˇ kʼawꞈ heu loꞈ-ehˇ bi ehˇ gaˬ-iˇ-eu gʼaˇ duˬ, aˬ yawꞈ nyaꞈ-ahˇ Daˬbiˇ ehˇ nehˬ-euˬ meh. “Nawˇ-aˬ, ngaˬ-euˬ aˬ yuiꞈ aˬ nyiˇ ma. Iˬ nah neh dahˬ beh-awˇ, Yoˇbaˬ-euˬ dah zaˇ, ngaˬ-euˬ guiˇ maꞈ kʼoeˇ taˆ uˆ lahˇ-eu gʼaˬ nawˬ-ahˇ ngaˇ bi geuꞈ ma. Ngaˬ neh ehˇ taˬ-euˬ loꞈ-ehˇ ngaˇ maˬ jahˇ naˇ, Miˬyehˇ ngaˬ-ahˇ sehꞈ luꞈ-uˇ lehˇ ehˇ nehˬ-awˬ.”

¹⁴Daˬbiˇ neh ehˇ-euˬ dawˬ kʼoeˇ dawˬ baˬ da neh, Yuˇdaˆ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ Daˬbiˇ-ahˇ nui ma taꞈ laˇ-awˇ, “Sahˬpaˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ dawˬ tawˆ luꞈ gʼoꞈ laˇ-awˬ” lehˇ tsaꞈ gʼeh-euˬ meh.

¹⁵Sahˬ paˬ gʼoꞈ leˇ ngeh, aˬ yawꞈ-ahˇ lawˇ baˬ sheuˬ tsehˆ nehˬ-eu lehˇ oe-euˬ Yuˇdaˆ tsawˇ haˬ deuˬ-ahˇ, Yawˇdaˬ lawˇ baˬ-ahˇ ya tahˬ puˬ-euˬ meh.

¹⁶Kʼoeˇ ngeh, Baˬhuˇleˬ meuˬ-ahˇ jawˇ-eu Beˬyaˬmiˬ tsawˇ jeuˬ Geˬlaˬ-euˬ aˬ li Shiˇmiˇ gʼaˬ kʼawꞈ, sahˬ paˬ Daˬbiˇ-ahˇ tahˬ puˬ le-eu lehˇ, Yawˇdaˬ lawˇ baˬ-ahˇ yaw kawˇ-ehˇ oe-euˬ meh.

¹⁷Beˬyaˬmiˬ tsawˇ jeuˬ tiˬ heˇ gʼaˬ-ahˇ aˬ yawꞈ sheuˬ laꞈ-euˬ meh. Sawˇluˆ pehˬ-euˬ zaˬ kʼaˆ pyeuꞈ-eu Ziˇbaˬ gʼaˬ kʼawꞈ, aˬ yawꞈ-euˬ aˬ li tseˇ ngaˬ gʼaˬ hawˇ-eu aˬ yawꞈ-euˬ zaˬ kʼaˆ nyiˬ tseˇ gʼaˬ sheuˬ-awˇ, sahˬ paˬ-euˬ mehˬ hu Yawˇdaˬ lawˇ baˬ-ahˇ oe keuˆ taˬ-euˬ meh.

¹⁸Sahˬ paˬ-euˬ aˇ muˇ-ahˇ loꞈ piˇ-eu gʼaˇ duˬ maˬ ehˇ, sahˬ paˬ kʼaˇ loˬ-eu jeˬ mˇ nehˬ-eu gʼaˇ duˬ maˬ ehˇ, aˬ yawꞈ maꞈ Yawˇdaˬ lawˇ baˬ tsehˆ doˆ-euˬ meh. Lawˇ baˬ tsehˆ-eu lehˇ sahˬ paˬ lehˬ hmˬ ngeh, Shiˇmiˇ gʼaˬ aˬ yawꞈ-euˬ mehˬ shi miˇ tsa awˆ byaˆ-awˇ ehˇ-eu,

¹⁹“Sahˬ paˬ-oˇ, Yeˬluˇsaˬlehˬ meuˬ-ahˇ neh nawˇ doˆ-iˇ ngeh nah, ngaˬ neh nawˬ-ahˇ mˇ lehˬ-eu iˬ baˇ pyehˬ nehˬ laꞈ-awˬ. Iˬ baˇ kʼoeˇ ngaˬ-euˬ kʼoeˇ taˆ maˬ bi jaˆ ni byehˇ nehˬ laꞈ-awˬ.

²⁰Yawˬ ha-euˬ iˬ baˇ ahˇ ngaˇ siˬ nya-eu miˇ neh, laꞈ taˆ paw pyawˬ-ahˇ jawˇ luꞈ-eu tsawˇ jeuˬ deuˬ laꞈ kʼoeˇ, aˬ cawˬ mehˬ hu ngaˇ doˆ le-awˇ, iˬ nah nawˬ-ahˇ tahˬ puˬ le-euˬ ma.”

²¹Zeˬluˇyaˆ-euˬ aˬ li Aˬbiˇshaiˇ ehˇ-eu, “Shiˇmiˇ-ahˇ sehꞈ-eu tsaˬ meh. Aˬ jeˬ miˇ neh ehˇ naˇ, sahˬ paˬ bi geuꞈ-eu gʼaˇ duˬ sahˬ paˬ Miˬyehˇ neh tseˇ doˆ taˬ-euˬ gʼaˬ-ahˇ aˬ yawꞈ yaˬ kʼehˇ yaˬ-euˬ meh.”

²²Ehˇ kʼawꞈ, Aˬbiˇshaiˇ hawˇ-eu aˬ yawꞈ-euˬ aˇ doˆ Yoˇbaˬ-ahˇ Daˬbiˇ ehˇ nehˬ-eu, “Naw nyaꞈ-ahˇ aˬ jeˬ taꞈ ta. Iˬ nah naw nyaꞈ ngaˬ-ahˇ laˆ bahˬ-eu gʼeh te loˇ. Nymˬ-mˇ ngaˇ Iˇsaˬleˬlaˆ miˇ kʼahˬ-euˬ sahˬ paˬ pyeuꞈ-eu ma. Iˇsaˬleˬlaˆ tsawˇ haˬ tiˬ gʼaˬ-iˬ maˬ ya bi sehꞈ-a.”

²³Kʼoeˇ naˇ, “Nawˇ maˬ ya shiˇ-aˇ” lehˇ, Shiˇmiˇ-ahˇ sahˬ paˬ ehˇ nehˬ-euˬ meh.

²⁴Kʼoeˇ naˇ, Sawˇluˆ-euˬ oeˬ paˬ Meˬpiˇbawˇshehˆ gʼaˬ, Daˬbiˇ-ahˇ tahˬ puˬ le-eu lehˇ oe-euˬ meh. sahˬ paˬ doˆ-iˇ ngeh tiˬ nah neh, laˬ kʼaˬ tiˬ cehˇ paˇ gʼoꞈ keuˆ laˇ ngeh tiˬ nah keuˆ ni, aˬ yawꞈ aˬ kuiˇ maˬ dzuiꞈ, mehˬ mahˬ maˬ jehˆ-ehˇ, mehˬ tsoeˬ kʼawꞈ maˬ lehˬ tsiˬ dm ni jawˇ-euˬ meh.

²⁵Sahˬ paˬ-ahˇ tahˬ puˬ le-eu lehˇ, Yeˬluˇsaˬlehˬ meuˬ-ahˇ neh Meˬpiˇbawˇshehˆ oe keuˆ ngeh, “Meˬpiˇbawˇshehˆ-oˇ, aˬ jeˬ miˇ neh ngaˬ-euˬ mehˬ nah nawˇ maˬ caw teh le teˬ” lehˇ, aˬ yawꞈ-ahˇ sahˬ paˬ naˇ haˬ-euˬ meh.

²⁶Aˬ yawꞈ ehˇ-eu, “Sahˬ paˬ-oˇ, nawˇ siˬ nya-eu loꞈ-ehˇ, ngaˇ kuiˇ kuˆ kuˆ-eu tsawˇ haˬ tiˬ gʼaˬ ma. Nawˬ nehˬ-ehˇ ngaˇ oe-eu gʼaˇ duˬ, mahˬ tahˬ laˆ dziˬ gʼa laˆ dawˆ-awˬ lehˇ, ngaˬ-euˬ zaˬ kʼaˆ-ahˇ ngaˇ ehˇ nehˬ-euˬ kʼawꞈ, aˬ yawꞈ ngaˬ-ahˇ byehˇ dzeh nehˬ laꞈ-euˬ meh.

²⁷Kʼoeˇ naˇ, ngaˬ-euˬ gaˇ kawˆ aˬ yawꞈ nawˬ-ahˇ jaˬ myawꞈ myawꞈ nehˬ laˇ-euˬ meh. Ehˇ kʼawꞈ nawˇ-aˬ Miˬyehˇ-euˬ mˬ taˆ gʼaˬ kʼehˇ-ahˇ duˇ-eu miˇ neh, nawˬ neh tsaˬ meh lehˇ kʼaˇ noeˬ-euˬ loꞈ-ehˇ mˇ-awˬ.

²⁸Ngaˬ da-euˬ nymˇ kʼahˬ zaˬ dawˬ tawˆ luꞈ nawˬ-euˬ mehˬ shi ya shiˇ jiˇ paˬ-ehˇ tsaˬ laˇ ngeh, nawˬ-euˬ hawˬ jeh-ahˇ nawˬ nehˬ-ehˇ ya dzaˬ ya dawˇ taꞈ-eu guiˬ lahˬ, nawˇ ngaˬ-ahˇ biꞈ laꞈ-euˬ meh. Kʼoeˇ uˬ taꞈ, nawˬ-ahˇ ngaˇ aˬ geu jeˬ paˇ shaˇ kʼmˬ nmˇ.”

²⁹Sahˬ paˬ ehˇ-eu, “Nawˇ tiˬ jeˬ-iˬ ehˇ-eu maˬ paˇ loˬ meh. Sawˇluˆ-euˬ mˇ myawˬ deuˬ-ahˇ, Ziˇbaˬ naw nyaꞈ ya biˇ geuꞈ meh lehˇ ngaˇ noeˬ tsehˆ gʼaˬ-euˬ ma.”

³⁰Meˬpiˇbawˇshehˆ ehˇ-eu, “Ziˇbaˬ tehꞈ-ehˇ dawˬ tawˆ luꞈ bi geuꞈ jiˇ-awˬ. Nawˬ-euˬ gʼawˇ mawˇ iˇ kahˇ-ahˇ laˬ kʼaˬ tiˬ cehˇ ya gʼoꞈ keuˆ laˇ-euˬ tehꞈ-ehˇ kʼawꞈ, ngaˬ-euˬ gʼaˇ duˬ gʼaˬ miˇ-a.”

³¹Giˇlaˆ miˇ kʼahˬ-ahˇ jawˇ-eu Baˬziˇlehˇ kʼawꞈ, sahˬ paˬ Yawˇdaˬ lawˇ baˬ gʼoꞈ tsehˆ laˇ gaˇ loꞈ piˇ nehˬ-eu lehˇ, Yawˇgeˬlmˬ meuˬ-ahˇ neh oe ka-euˬ meh.

³²Baˬziˇlehˇ-aˬ, tsawˇ mawˬ mawˬ dui dui laˇ-awˇ, yehꞈ tseˇ kʼoꞈ kʼawˆ laˇ-euˬ meh. Aˬ yawꞈ-aˬ, smˇ muiˬ muiˬ dui dui-eu tsawˇ haˬ tiˬ gʼaˬ pyeuꞈ-awˇ, Maˬhaˬneˬ meuˬ-ahˇ sahˬ paˬ jawˇ luꞈ ngeh, dzaˬ dzaˬ dawˇ dawˇ sha nehˬ-euˬ meh.

³³Sahˬ paˬ aˬ yawꞈ-ahˇ ehˇ nehˬ-eu, “Ngaˬ nehˬ-ehˇ Yeˬluˇsaˬlehˬ meuˬ-ahˇ laˇ-awˬ. Ngaˇ nawˬ-ahˇ ngehˬ gʼeh nehˬ ma.”

³⁴Ehˇ kʼawꞈ, Baˬziˇlehˇ ehˇ-eu, “Ngaˇ-aˬ, gʼawˬ myahˇ ni ya dehꞈ-eu tsawˇ haˬ maˬ paˇ ngeuˇ ma. Nawˬ nehˬ-ehˇ Yeˬluˇsaˬlehˬ meuˬ-ahˇ ngaˇ aˬ jeˬ paˇ gʼeh leˇ nmˇ.

³⁵Ngaˬ-euˬ aˇ kʼoꞈ yehꞈ tseˇ byah laˇ gʼaˬ-awˇ, tiˬ jeˬ-ahˇ-iˬ byawˬ gʼa mawꞈ-eu nui ma maˬ paˇ ahˇ miˇ-a. Dzaˬ-eu dawˇ-eu jeˬ kʼawꞈ, dzaˇ kuiˇ dzaˇ myehˇ maˬ paˇ siˬ laˇ miˇ-a. Aˬ cawˬ caˇ dawˬ caˇ-eu teˇ saˇ kʼawꞈ, maˬ paˇ gaˬ duˬ laˇ miˇ-a. Kʼoeˇ miˇ neh, nawˬ nehˬ-ehˇ le-eu ehˇ-eu-aˬ, maˇ maˇ ni nawˬ-ahˇ laˆ bahˬ leˇ gaˇ duˇ-eu tehꞈ miˇ-a.

³⁶Teu naˆ naˆ-ehˇ gʼeh-eu laꞈ sawˬ-ahˇ ngaˇ za-eu maˬ geuˇ nya. Yawˇdaˬ lawˇ baˬ ui cuiˆ le dzeuˇ gʼeh gaˇ keuˆ ni tehꞈ-ehˇ, nawˬ-euˬ mehˬ nah ngaˇ caw teh laˇ ma.

³⁷Kʼoeˇ naˇ, ngaˬ-ahˇ bi gʼoꞈ le laꞈ-awˇ, ngaˬ ma ngaˬ da-euˬ lmˬ bymˇ dawˬ peh ziˇ bi dehꞈ jiˇ laꞈ-awˬ. Ehˇ kʼawꞈ, ngaˬ li Ciˇmaˬhaˬ gʼaˬ heu gaˇ jawˇ ma. Nawˬ nehˬ-ehˇ sheuˬ gʼeh-awˇ, nawˇ kʼaˇ bi geuꞈ mawꞈ-eu jeˬ bi geuꞈ-awˬ.”

³⁸Sahˬ paˬ ehˇ-eu, “Aˬ yawꞈ-ahˇ ngaˇ sheuˬ gʼeh-awˇ, nawˬ neh kʼaˇ bi geuꞈ mawꞈ-eu jeˬ bi geuꞈ ma. Kʼoeˇ uˬ taꞈ, nawˇ kʼaˇ shaˇ-eu jeˬ kʼawꞈ, nawˬ-ahˇ ngaˇ biꞈ ma.”

³⁹Kʼoeˇ naˇ, Daˬbiˇ hawˇ-eu aˬ yawꞈ-euˬ tsawˇ haˬ dawˬ tawˆ luꞈ Yawˇdaˬ lawˇ baˬ tsehˆ doˆ-euˬ meh. Baˬziˇlehˇ-ahˇ aˬ yawꞈ mehˬ cuˇ cuˇ nehˬ-awˇ, dawˬ ngehˬ gʼeh nehˬ yaꞈ-euˬ meh. Kʼoeˇ naˇ, Baˬziˇlehˇ gʼoꞈ leˇ-euˬ meh.

⁴⁰Sahˬ paˬ Daˬbiˇ lawˇ baˬ tsehˆ doˆ-awˇ, Giˇlaˇgaˬlaˇ meuˬ-ahˇ le-euˬ meh. Ciˇmaˬhaˬ gʼaˬ kʼawꞈ aˬ yawꞈ nehˬ-ehˇ le luꞈ-eu meh. Yuˇdaˆ tsawˇ haˬ dawˬ tawˆ luꞈ aˬ yawꞈ-ahˇ loꞈ piˇ luꞈ-awˇ, Iˇsaˬleˬlaˆ tsawˇ haˬ tiˬ paˆ paˆ tehꞈ-ehˇ aˬ yawꞈ-ahˇ loꞈ piˇ luꞈ-eu meh.

⁴¹Kʼoeˇ ngeh, Iˇsaˬleˬlaˆ tsawˇ haˬ dawˬ tawˆ luꞈ sahˬ paˬ jawˇ gaˇ le-awˇ ehˇ-eu, “Sahˬ paˬ-oˇ, nawˬ-ahˇ maˬ ehˇ, nawˬ-euˬ miˬ sawˇ zaˬ deuˬ-ahˇ maˬ ehˇ, nawˬ-euˬ tsawˇ haˬ deuˬ-ahˇ maˬ ehˇ, lawˇ baˬ tsehˆ ngeh loꞈ piˇ nehˬ-awˇ, mehˬ hu paw sheuˬ gʼeh-eu a kawˬ-aˬ jaˆ ma lehˇ, aˬ jeˬ miˇ neh nga maꞈ-euˬ aˬ yuiꞈ aˬ nyiˇ Yuˇdaˆ tsawˇ haˬ deuˬ noeˬ-eu nga.”

⁴²Yuˇdaˆ tsawˇ haˬ deuˬ ehˇ-eu, “Sahˬ paˬ heu gʼaˬ nga maꞈ-euˬ tsawˇ haˬ pyeuꞈ-eu miˇ neh, nga maꞈ heu loꞈ-ehˇ jahˇ-euˬ ma. Aˬ jeˬ miˇ neh nga maꞈ heu loꞈ-ehˇ jahˇ gaˇ naw maꞈ nui ma pehˇ te. Sahˬ paˬ neh nga maꞈ-ahˇ bi dzaˬ bi dawˇ laꞈ-euˬ jaˆ-awˇ, laꞈ sawˬ biꞈ taˬ-eu jaˆ ta loˇ.”

⁴³Iˇsaˬleˬlaˆ tsawˇ haˬ deuˬ ehˇ-eu, “Sahˬ paˬ Daˬbiˇ-aˬ, naw maꞈ-euˬ tsawˇ haˬ pyeuꞈ kʼawꞈ, aˬ yawꞈ-euˬ gaˇ kawˆ-ahˇ taꞈ leˇ-awˇ, naw maꞈ naˆ maˬ tseˇ nga maꞈ tseˇ bymˇ ehˇ kʼaˇ za ma. Aˬ jeˬ miˇ neh naw maꞈ nga maꞈ-ahˇ haw teˬ nehˬ laꞈ te. Sahˬ paˬ-ahˇ sheuˬ kʼoꞈ laˬ-iˇ ma lehˇ, naw maꞈ-euˬ jeˬ hu nga maꞈ ehˇ-euˬ maˬ ngeuˇ-a loˇ.” Ehˇ kʼawꞈ, Yuˇdaˆ tsawˇ haˬ deuˬ-aˬ, Iˇsaˬleˬlaˆ tsawˇ haˬ deuˬ naˆ maˬ tseˇ tsawˇ pyehˇ kʼaˆ-euˬ meh.