Read Akha 2 Saˬmeuˬlaˆ 2 Bible Online

2 Saˬmeuˬlaˆ 2 - Akha bible

2 Saˬmeuˬlaˆ 2

¹Kʼoeˇ naˇ, “Ngaˇ le-awˇ Yuˇdaˆ miˇ kʼahˬ laꞈ kʼoeˇ jaˆ-eu meuˬ tiˬ meuˬ na-ahˇ uˆ lahˇ leˇ-awˬ loˇ” lehˇ, Sahˬpaˬ Miˬyehˇ-ahˇ Daˬbiˇ naˇ haˬ ngeh, “Uˆ lahˇ leˇ-awˬ” lehˇ ehˇ-eu meh. “Aˬ geu meuˬ-ahˇ uˆ lahˇ leˇ-eu” lehˇ Daˬbiˇ paˇ naˇ haˬ ngeh, “Heˬbyoˬ meuˬ-ahˇ uˆ lahˇ leˇ-awˬ” lehˇ, Sahˬpaˬ Miˬyehˇ ehˇ-eu meh.

²Daˬbiˇ-aˬ, aˬ yawꞈ-euˬ miˬ zaˬ deuˬ pyeuꞈ-eu Yeˬzaˬleˬlaˇ meuˬ-ahˇ jawˇ-eu Aˬhiˇnoˬ hawˇ-eu Gaˬlaˬmeˬlaˇ meuˬ-ahˇ jawˇ-eu Naˬbaˬlaˇ-euˬ miˬ coeˬ Aˬbiˇgeˬlaˆ aˬ nyaꞈ-ahˇ sheuˬ-awˇ, Heˬbyoˬ meuˬ-ahˇ le-euˬ meh.

³Aˬ yawꞈ-euˬ tsawˇ haˬ deuˬ hawˇ-eu aˬ yawꞈ maꞈ-euˬ miˬ sawˇ zaˬ deuˬ-ahˇ kʼawꞈ aˬ yawꞈ sheuˬ gʼeh-awˇ, Heˬbyoˬ meuˬ jawˬ jawˬ-ehˇ jaˆ-eu meuˬ deuˬ-ahˇ aˬ yawꞈ maꞈ jawˇ-euˬ meh.

⁴Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ Heˬbyoˬ meuˬ-ahˇ laˇ-awˇ, Daˬbiˇ-ahˇ tsiˇ shehˆ daˆ nehˬ-awˇ, Yuˇdaˆ miˇ kʼahˬ-euˬ sahˬ paˬ ka nehˬ-euˬ meh. Giˇlaˆ miˇ kʼahˬ Jaˬbehˆ meuˬ-ahˇ jawˇ-eu tsawˇ haˬ deuˬ neh Sawˇluˆ-ahˇ baꞈ pahˬ nehˬ-euˬ gaˇ kawˆ Daˬbiˇ ya gaˬ ngeh,

⁵tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ-iˇ-euˬ meh. “Naw maꞈ-euˬ sahˬ paˬ-ahˇ baꞈ pahˬ nehˬ-euˬ laꞈ kʼoeˇ, naw maꞈ saˇ jaˇ ziꞈ-eu gaˇ kawˆ bi siˬ bi mawˇ-euˬ miˇ neh, Sahˬpaˬ Miˬyehˇ naw maꞈ-ahˇ guiˬ lahˬ biꞈ luꞈ-uˇ.

⁶Nymˬ-mˇ poˆ jawˇ-aˬ, Sahˬpaˬ Miˬyehˇ naw maꞈ-ahˇ gʼawˬ shaˬ gaˬ-awˇ, saˇ jaˇ ziꞈ luꞈ-uˇ. Naw maꞈ kʼoeˇ loꞈ-ehˇ mˇ-euˬ baˬ da neh, ngaˇ kʼawꞈ, naw maꞈ-ahˇ yaw muiˬ paˬ-ehˇ cawˬ ba nehˬ ma.

⁷Naw maꞈ gʼaˬ byehˆ maˬ byehˆ ni, nui ma kʼaˬ duˬ ni taˬ-awˬ. Naw maꞈ-euˬ sahˬ paˬ shiˇ dzeuˇ-euˬ miˇ neh, Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ ngaˬ-ahˇ tsiˇ shehˆ daˆ-awˇ sahˬ paˬ ka nehˬ laꞈ-euˬ meh.”

⁸Sawˇluˆ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Neˬlaˇ-euˬ aˬli Aˬbaˬnaˬ-aˬ, Sawˇluˆ-euˬ aˬ li Iˇshaˬbawˇshehˆ nehˬ-ehˇ Yawˇdaˬ lawˇ baˬ cehˆ tsehˆ-awˇ, Maˬhaˬneˬ meuˬ-ahˇ cehˆ leˇ-euˬ meh.

⁹Kʼoeˇ gaˇ, Aˬbaˬnaˬ neh Iˇshaˬbawˇshehˆ-ahˇ, Giˇlaˆ miˇ kʼahˬ, Aˬshaˬ miˇ kʼahˬ, Yeˬzaˬleˬlaˇ miˇ kʼahˬ, Eˇpaˬleˬ miˇ kʼahˬ, Beˬyaˬmiˬ miˇ kʼahˬ hawˇ-eu, Iˇsaˬleˬlaˆ miˇ kʼahˬ dawˬ tawˆ luꞈ kʼoeˇ taˆ bi uˆ lahˇ-eu gʼaˇ duˬ, sahˬ paˬ ka nehˬ-euˬ meh.

¹⁰Sawˇluˆ-euˬ aˬ li Iˇshaˬbawˇshehˆ-ahˇ Iˇsaˬleˬlaˆ miˇ kʼahˬ-ahˇ uˆ lahˇ-eu sahˬ paˬ ka nehˬ ngeh, aˬ yawꞈ-euˬ aˇ kʼoꞈ oeˬ tseˇ byah-awˇ, nyiˬ kʼoꞈ byah ni uˆ lahˇ-euˬ meh. Ehˇ kʼawꞈ, Yuˇdaˆ tsawˇ jeuˬ-aˬ, Daˬbiˇ-ahˇ nui ma gm-euˬ meh.

¹¹Daˬbiˇ Heˬbyoˬ meuˬ-ahˇ jawˇ-awˇ, Yuˇdaˆ miˇ kʼahˬ-ahˇ shiꞈ kʼoꞈ uˬ taꞈ ba la koꞈ siˬ uˆ lahˇ-euˬ meh.

¹²Aˬbaˬnaˬ hawˇ-eu Iˇshaˬbawˇshehˆ-euˬ gaˇ mˇ-eu yaw huiˬ yaw mahˇ deuˬ, Maˬhaˬneˬ meuˬ-ahˇ neh Giˇbyoˬ meuˬ-ahˇ iˇ-euˬ meh.

¹³Zeˬluˇyaˆ-euˬ aˬ li Yoˇbaˬ hawˇ-eu Daˬbiˇ-euˬ gaˇ mˇ-eu yaw huiˬ yaw mahˇ deuˬ aˬ yawꞈ maꞈ-ahˇ Giˇbyoˬ lah dawˬ peh tahˬ puˬ-awˇ, lah-euˬ kʼoeˇ baˬ heu baˬ-ehˇ, aˇ muˇ muˇ-awˇ nuiˇ luꞈ-eu meh.

¹⁴Kʼoeˇ ngeh, “Aˬ dui maꞈ nyiˬ paw luꞈ zaˬ guˬ tseˇ doˆ-awˇ, guiˇ deuˆ-eu keu ka biꞈ-awˇ bi deuˆ ceh ceh haw kaˇ-euˇ” lehˇ, Yoˇbaˬ-ahˇ Aˬbaˬnaˬ ehˇ nehˬ ngeh, “Bi deuˆ ceh ceh haw-awˬ tawˇ” lehˇ, Yoˇbaˬ ehˇ kʼoꞈ nehˬ-euˬ meh.

¹⁵Iˇshaˬbawˇshehˆ-euˬ tsawˇ haˬ pyeuꞈ-eu Beˬyaˬmiˬ tsawˇ jeuˬ tseˇ nyiꞈ gʼaˬ hawˇ-eu, Daˬbiˇ-euˬ tsawˇ haˬ tseˇ nyiꞈ gʼaˬ deuˆ ceh ceh-euˬ meh.

¹⁶Yawˬ gʼaˬ na luꞈ yawˬ ha nehˬ-ehˇ kʼaˇ deuˆ ceh ceh luꞈ-eu gʼaˬ-euˬ uˬ duˬ-ahˇ tsuˆ tehˬ-awˇ, byaˇ gʼaˇ -ahˇ mi cehˇ tsawˆ tsoˆ nehˬ-awˇ, nyiˬ tseˇ oeˬ gʼaˬ luꞈ tiˬ kawˆ loꞈ-ehˇ coˬ lah-awˇ shiˇ-euˬ meh. Kʼoeˇ miˇ neh, Giˇbyoˬ meuˬ-ahˇ jaˆ-eu jawˇ duˬ kʼoeˇ tsahˇ-ahˇ, ‘Mi cehˇ Deh gaʼ lehˇ myahˇ nehˬ-euˬ meh.

¹⁷Kʼoeˇ naˇ, guˆ dui dui laˇ paˬ-ehˇ guiˇ deuˆ ceh ceh-awˇ, Aˬbaˬnaˬ hawˇ-eu Iˇsaˬleˬlaˆ tsawˇ haˬ deuˬ-ahˇ, Daˬbiˇ-euˬ tsawˇ haˬ deuˬ neh deuˆ gʼaˬ-euˬ meh.

¹⁸Zeˬluˇyaˆ-euˬ aˬ li deuˬ pyeuꞈ-eu, Yoˇbaˬ, Aˬbiˇshaiˇ hawˇ-eu Aˬsaˬheˬlaˇ aˬ ha smˬ mehˇ nmˇ luꞈ kʼoeˇ gaˇ ahˇ-eu meh. Aˬsaˬheˬlaˇ-aˬ, kʼaˬ tsehˆ naˆ ni cehˆ kawˇnya-eu meh.

¹⁹Aˬsaˬheˬlaˇ gʼaˬ Aˬbaˬnaˬ jawˇ gaˇ cehˆ gʼeh-awˇ, Aˬbaˬnaˬ-ahˇ teh-euˬ meh.

²⁰Aˬbaˬnaˬ naˇ kʼah nahˇ gʼoꞈ gʼoꞈ haw-awˇ, “Aˬsaˬheˬlaˇ nawˇ ngaˬ-ahˇ teh luꞈ te loˇ” lehˇ naˇ haˬ ngeh, “Ngeuˇ ma” lehˇ ehˇ kʼoꞈ nehˬ-euˬ meh.

²¹“Ngaˬ-ahˇ maˬ teh ni yehˇ tiˬ gʼaˬ na-euˬ mehˬ nah teh-awˇ, kʼaˇ ahˇ-eu jeˬ yuˇ geuꞈ-awˬ” lehˇ Aˬbaˬnaˬ ehˇ kʼawꞈ, Aˬsaˬheˬlaˇ maˬ naˇ haˬ ni, Aˬbaˬnaˬ-ahˇ tehꞈ-ehˇ teh-euˬ meh.

²²Aˬbaˬnaˬ tiˬ poˆ paˇ ehˇ-eu, “Ngaˬ-ahˇ taˬ paˇ teh hawˇ-awˬ nawˬ. Ngaˬ neh maˬ bi sehꞈ kʼoeˇ maˬ juˬ ni aˬ jeˬ gʼeh teu naˆ naˆ-ehˇ teh sehꞈ te. Nawˬ-ahˇ ngaˇ sehꞈ shaw naˇ, nawˬ-euˬ aˇ doˆ Yoˇbaˬ-ahˇ ngaˇ aˬ joˆ-ehˇ tahˬ puˬ nmˇ.”

²³Ehˇ kʼawꞈ, Aˬsaˬheˬlaˇ maˬ naˇ haˬ-a. Kʼoeˇ ngeh, Aˬbaˬnaˬ neh aˬ yawꞈ-euˬ gahˬ-ahˇ naˇ kʼah paw jeˬ-ahˇ Aˬsaˬheˬlaˇ-euˬ uˬ maˆ-ahˇ tsawˆ tsoˆ-awˇ, dahˇ teˇ tsawˆ byoe doˆ-euˬ meh. Aˬsaˬheˬlaˇ gʼaˬ miˇ tsa coˬ dzeh-awˇ shiˇ-euˬ meh. Aˬ yawꞈ shiˇ taˬ-euˬ gaˇ kʼaˇ laˇ keuˆ-euˬ tsawˇ haˬ yawˬ gʼaˬ na luꞈ, kʼoeˇ gaˇ naˬ leˇ-awˇ yawꞈ-euˬ meh.

²⁴Ehˇ kʼawˬ, Yoˇbaˬ hawˇ-eu Aˬbiˇshaiˇ aˬ nyaꞈ nmˇ Aˬbaˬnaˬ-euˬ mehˬ nah paˇ teh-awˇ, nahˇ ma ga ahˇ ngeh yamˬ-ahˇ, Aˬmaˬ gawˬ duˇ-ahˇ le keuˆ-euˬ meh. Aˬmaˬ gawˬ duˇ-aˬ, Giˇbyoˬ bawˇ tsahˬ bawˇ dahˇ paw iˇ-eu gaˇ ma -ahˇ jaˆ-eu Giˇhaˬ meuˬ-euˬ nahˇ ma doˆ kʼehˬ paw-ehˇ jaˆ-eu meh.

²⁵Beˬyaˬmiˬ tsawˇ haˬ deuˬ Aˬbaˬnaˬ dawˬ peh uiˬ leˇ-awˇ, gawˬ duˇ uˬ du yawꞈ luꞈ-eu meh.

²⁶Yoˇbaˬ-ahˇ Aˬbaˬnaˬ guˇ-awˇ ehˇ nehˬ-eu, “Aˬ dui maꞈ aˬ myah luꞈ heu loꞈ-ehˇ tehꞈ-ehˇ deuˆ ceh ceh ma loˇ. Aˇ saˬ saˬ laˇ ngeh, nui ma naˇ-eu jeˬ maˬ ngeuˇ naˇ, nui jeˬ tiˬ jeˬ-iˬ maˬ dzeˇ-ehˇ pyeuˬ-iˇ tehꞈ-a lehˇ, nawˬ-ahˇ maˬ noeˬ mawˇ laˇ nya loˇ. Nga maꞈ kʼawꞈ naw maꞈ-ahˇ aˬ yuiꞈ aˬ nyiˇ taꞈ-eu miˇ kʼahˬ zaˬ deuˬ tehꞈ ma. Nawˬ-euˬ tsawˇ haˬ deuˬ-ahˇ nga maꞈ-euˬ mehˬ nah taˬ paˇ teh lehˇ aˬ myah ehˇ nehˬ-eu gʼeh te.”

²⁷Yoˇbaˬ ehˇ-eu, “Nawˇ teu loꞈ-ehˇ maˬ ehˇ law nmˇ-aˬ, ni shawˬ uˬ shawˬ paw keuˆ ni ngaˬ-euˬ tsawˇ haˬ deuˬ naw maꞈ-euˬ mehˬ nah teh teh-ehˇ jawˇ tehꞈ-a lehˇ, dehꞈ luꞈ-eu Miˬyehˇ mehˬ shi ngaˇ kamˬ peuˬ ma.”

²⁸Kʼoeˇ naˇ, Yoˇbaˬ daˇ heh baw-awˇ, aˬ yawꞈ-euˬ tsawˇ haˬ deuˬ Iˇsaˬleˬlaˆ tsawˇ haˬ deuˬ-euˬ mehˬ nah maˬ paˇ teh ni bi naˬ leˇ-awˇ, guiˇ maˬ deuˆ ni byehˇ-euˬ meh.

²⁹Aˬbaˬnaˬ hawˇ-eu aˬ yawꞈ-euˬ tsawˇ haˬ deuˬ uˬ ciꞈ miˇ lah-ehˇ Yawˇdaˬ deh kʼahˬ nyiˬ tsehˆ-ehˇ iˇ-awˇ, Yawˇdaˬ lawˇ baˬ tsehˆ doˇ-awˇ, yawˬ shawˬ yawˬ uˬ shawˬ shawˬ lah-ehˇ cah-awˇ, Maˬhaˬneˬ meuˬ-ahˇ gʼoꞈ keuˆ leˇ-euˬ meh.

³⁰Aˬbaˬnaˬ-euˬ mehˬ nah Yoˇbaˬ teh-eu naˬ leˇ-awˇ, aˬ yawꞈ-euˬ tsawˇ haˬ dawˬ tawˆ luꞈ-ahˇ kuˇ uiˬ haw ngeh, Aˬsaˬheˬlaˇ maˬ gui ahˇ ni tseˇ gʼoeˬ gʼaˬ maˬ jiˇ gaˇ ya mawˇ-euˬ meh.

³¹Daˬbiˇ-euˬ tsawˇ haˬ deuˬ-aˬ, Aˬbaˬnaˬ-euˬ tsawˇ haˬ deuˬ pyeuꞈ-eu Beˬyaˬmiˬ tsawˇ jeuˬ smˬ yaˇ koꞈ tseˇ gʼaˬ-ahˇ sehꞈ-eu meh.

³²Yoˇbaˬ hawˇ-eu aˬ yawꞈ-euˬ tsawˇ haˬ deuˬ Aˬsaˬheˬlaˇ-euˬ gʼawˇ mawˇ baꞈ-awˇ, Behˬlehˬhehˬ meuˬ-ahˇ jaˆ-eu aˬ yawꞈ pehˬ aˇ jeuˬ-euˬ lmˬ bymˇ-ahˇ baꞈ pahˬ yaꞈ-euˬ meh. Aˬ yawꞈ maꞈ uˬ ciꞈ miˇ lah-ehˇ gʼoꞈ leˇ-awˇ, uˬ bya bya laˇ ngeh Heˬbyoˬ meuˬ-ahˇ gʼoꞈ keuˆ leˇ-euˬ meh.