Read Akha 2 Saˬmeuˬlaˆ 22 Bible Online

2 Saˬmeuˬlaˆ 22 - Akha bible

2 Saˬmeuˬlaˆ 22

¹Sawˇluˆ-euˬ aˬ laꞈ laꞈ kʼoeˇ hawˇ-eu, muiˇ-eu tsawˇ haˬ nui deuˬ-euˬ aˬ laꞈ laꞈ kʼoeˇ Daˬbiˇ-ahˇ Sahˬpaˬ Miˬyehˇ ka kʼoꞈ nehˬ ngeh, Sahˬpaˬ Miˬyehˇ-ahˇ caˇ dawˬ heu bymˇ Daˬbiˇ caˇ nehˬ-euˬ meh.

²Sahˬpaˬ Miˬyehˇ ngaˬ-euˬ lo guˇ, ziꞈ dah ni gʼeh-eu taˆ pyeuꞈ-awˇ, ngaˬ-ahˇ ka kʼoꞈ nehˬ-eu gʼaˬ meh.

³Ngaˬ-euˬ Miˬyehˇ ngaˬ-euˬ lo guˇ, shaˬ zahˬ oe ngeh dzuˇ zaꞈ duˬ ma. Ngaˬ-ahˇ loꞈ piˇ-eu dehˬ daˬ duˬ, ngaˬ-ahˇ ka kʼoꞈ-eu uˬ coeˇ meh. Ngaˬ-euˬ ziꞈ duˬ hawˇ-eu gʼoe duˬ, ngaˬ-ahˇ ka kʼoꞈ-eu yaw sahˇ meh. Yaw haiˬ yaw doeˇ mˇ daˆ laˇ gaˇ, nawˇ ngaˬ-ahˇ ka kʼoꞈ laꞈ-euˬ meh.

⁴Ja ceuˬ dui dui paˬ-ehˇ gʼeh-eu, Sahˬpaˬ Miˬyehˬ-ahˇ ngaˇ kuˇ-awˇ, muiˇ-eu deuˬ-euˬ aˬ laꞈ laꞈkʼoeˇ, ngaˇ buˬ-iˇ law-iˇ nya-euˬ ma.

⁵Shiˇ-eu iˇ luˆ tiˬ jawˬ oe-awˇ, laˆ luˬ laˆ seˇ le-eu iˇ kʼawˇ, ngaˬ-ahˇ ciˬ tahˬ ciˬ tuˆ-eu meh.

⁶Guˆ-eu gaˆ-eu tiˬ jawˬ oe-awˇ, Lmˬ bymˇ lahˇ ju kmˇ taˬ-euˬ meh.

⁷Nui ma shaˬ zahˬ naꞈ-eu laꞈ kʼoeˇ, Sahˬpaˬ Miˬyehˇ-ahˇ kuˇ-euˬ ma. Ngaˬ-euˬ Miˬyehˇ-ahˇ kuˇ-euˬ ma. Aˬ yawꞈ-euˬ uˬ duˬ tahˬ nymˇ-ahˇ, ngaˬ-euˬ teˇ saˇ aˬ yawꞈ gaˬ-awˇ, ngaˬ-euˬ ngoeˇ teˇ gaˬ leˇ-euˬ meh.

⁸Aˬ yawꞈ nui ma pehˇ-eu miˇ neh, miˇ tsaˬ tahˬ kʼawˇ nyeh jiˇ laˇ-awˇ, mˬ-euˬ dawˬ pehˬ yaˇ laˇ-euˬ meh.

⁹Naˇ mehˇ-ahˇ uˬ kʼoeˬ doˆ le-awˇ, kʼaˬ meh-ahˇ miˬ lmˇ doˆ le-awˇ, miˬ jiˆ neˇ hoˬ ni jaˆ-eu meh.

¹⁰Mˬ ngawˬ gʼm-awˇ zaꞈ ka le ngeh, aˬ yawꞈ aˬ kuiˇ pehˬ zaˬ uˬ moˆ, mˬ dmˇ zahˇ tsui ni jaˆ-eu meh.

¹¹Jeˬluˇbeˬ-ahˇ[5] aˬ yawꞈ dziˬ ngeh, jaˬ lehˇ aˬ dahˇ kʼoeˇ taˆ zaw-awˇ, aˬ yawꞈ iˇ gʼeh-eu mawˇ laˇ meh.

¹²Aˬ yawꞈ yaw zahˇ tsahˇ lahˇ taˬ-awˇ, yaw zahˇ mˬ dmˇ kʼoeˇ-euˬ laꞈ kʼoeˇ, iˇ cuꞈ uiˬ leˇ-awˇ jaˆ-eu meh.

¹³Aˬ yawꞈ jawˇ-eu mehˬ shi bya-eu, aˬ yawꞈ-euˬ yaw shehꞈ kʼahˬ sehˇ kʼoeˇ, miˬ jiˆ nyehˆ oˬ ni jaˆ-eu meh.

¹⁴Mˬ taˆ jawˇ-eu Sahˬpaˬ Miˬyehˇ, Dawˬ tawˆ kʼoeˇ taˆ Huiˬ-eu kʼoeˇ gʼaˬ, mˬ jeˬ jeˬ-awˇ dawˬ ngehˬ-eu meh.

¹⁵Aˬ yawꞈ-ahˇ muiˇ-eu tsawˇ haˬ-ahˇ, kaˆ myaˬ pyehˬ-awˇ teh byaˆ nehˬ-awˇ. mˬ myawꞈ myawꞈ-awˇ bi cehˆ-eu meh.

¹⁶Aˬ yawꞈ-ahˇ muiˇ-eu tsawˇ haˬ-ahˇ, Sahˬpaˬ Miˬyehˇ lmˬ doˆ laˇ-awˇ, naˇ mehˇ naˇ saꞈ baw dzeh leꞈ ngeh, laˆ shaˆ duˬ kʼawꞈ mawˇ jiˇ laˇ-awˇ, miˇ tsaˬ dawˬ peh duˬ puˇ dawˬ tawˆ, neˇ myawˆ ni mawˇ jiˇ laˇ tehꞈ-a.

¹⁷Sahˬpaˬ Miˬyehˇ yaw goˇ-ahˇ neh, ngaˬ-ahˇ mˇ jeh-awˇ ciˬ le-awˇ, iˇ cuꞈ naꞈ gaˇ ciˬ doˆ tehꞈ-a.

¹⁸Ngaˇ naˆ maˬ tseˇ gʼaˬ kʼaˆ dzehˬ-eu, muiˇ-eu deuˬ-euˬ aˬ laꞈ laꞈ kʼoeˇ, aˬ yawꞈ ngaˬ-ahˇ ka kʼoꞈ-euˬ meh.

¹⁹Ngaˇ shaˬ zahˬ naꞈ dui dui luꞈ ngeh, aˬ yawꞈ maꞈ ngaˬ-ahˇ ceh le kʼawꞈ, Sahˬpaˬ Miˬyehˇ ngehˬ gʼeh laꞈ meh.

²⁰Ngaˬ-ahˇ nui ma tsaˬ-eu miˇ neh, aˬ yawꞈ ngaˬ-ahˇ ka kʼoꞈ le-awˇ, yaw deˬ-ahˇ ciˬ doˆ laꞈ-euˬ meh.

²¹Ngaˬ-euˬ yaw tsaˬ yaw dawˇ baˬ da, Sahˬpaˬ Miˬyehˇ guiˬ lahˬ biꞈ-awˇ, ngaˬ-euˬ aˬ laꞈ yaw shawˇ miˇ neh, yaw muiˬ jeˬ biꞈ nehˬ laꞈ-euˬ meh.

²²Sahˬpaˬ Miˬyehˇ-euˬ gaˇ ma-ahˇ, maˬ byehˇ dzeh ni ngaˇ cah laꞈ-awˇ, yaw haiˬ jeˬ-ahˇ mˇ-eu laꞈ kʼoeˇ, Miˬyehˇ-ahˇ maˬ gʼawˬ-iˇ haw-aˬ.

²³Aˬ yawꞈ-euˬ zahˇ sahˇ kʼoꞈ dawˬ tawˆ, ngaˬ-euˬ mehˬ shi ngaˇ haw geuꞈ-awˇ, aˬ yawꞈ neh mehˬ-euˬ tsoˆ-euˬ dawˬ, maˬ byehˇ dzeh ni ngaˇ mˇ luꞈ ma.

²⁴Aˬ yawꞈ mehˬ shi ngaˇ dehꞈ-eu jeˬ, iˬ baˇ taˬ kʼaˇ maˬ bi za-ehˇ, yaw lehˬ jeˬ-ahˇ ma ya mˇ ni, ngaˬ-euˬ gʼawˇ mawˇ yahˇ luꞈ-eu ma.

²⁵Ngaˇ yaw tsaˬ yaw dawˇ baˬ da neh, aˬ yawꞈ ngaˬ-ahˇ guiˬ lahˬ biꞈ-awˇ, ngaˇ iˬ baˇ maˬ mˇ-eu gaˇ kʼawˆ, aˬ yawꞈ siˬ luꞈ mawˇ luꞈ-eu meh.

²⁶Saˇ jaˇ ziꞈ-eu tsawˇ haˬ deuˬ-ahˇ, nawˬ-euˬ gʼawˇ mawˇ saˇ jaˇ ziꞈ-awˇ, nawˬ-ahˇ muiˇ-eu tsawˇ haˬ deuˬ-ahˇ, nawˬ-euˬ yaw muiˬ pah mehˬ-eu meh.

²⁷Nui ma shawˇ-eu tsawˇ haˬ deuˬ-ahˇ, nawˬ-euˬ yaw shawˇ nawˇ bi mawˇ-awˇ, nui ma gʼoꞈ-eu tsawˇ haˬ deuˬ-ahˇ, nawˬ-euˬ nui jaˆ mehˬ nehˬ-eu meh.

²⁸Nui nahˬ nui yu ahˇ-eu deuˬ-ahˇ, gʼawˬ shaˬ gaˬ-awˇ ka kʼoꞈ nehˬ kʼawꞈ, nui ma huiˬ gaˇ zuiˆ awˆ-eu lehˇ, nawˇ myaˆ nuiˆ haw tsoˆ taˬ-euˬ meh.

²⁹Ngaˬ-euˬ Sahˬpaˬ Miˬyehˇ nawˇ-aˬ, ngaˬ-euˬ gʼaˇ duˬ tsiˇ kʼmˬ pyeuꞈ-awˇ, 2 yaw zahˇ laꞈ kʼoeˇ ngaˇ jawˇ luꞈ ngeh, ngaˬ-euˬ Miˬyehˇ yaw shehꞈ bya meh.

³⁰Nawˬ-euˬ gʼaˬ-ahˇ gʼoe-eu laꞈ kʼoeˇ, guiˇ maꞈ-ahˇ ngaˇ gʼaˬ leˇ nya-awˇ, ngaˬ-euˬ Miˬyehˇ-euˬ baoˬ laꞈ kʼoeˇ, lahˇ gawˬ taˬ-euˬ tsawˬ dzeuˇ nya ma.

³¹Miˬyehˇ heu gʼaˬ kuiˇ zaˇ laꞈ zaˇ, byah dui muiˬ dui kuꞈ dui dui meh. Sahˬpaˬ Miˬyehˇ-euˬ saˇ jaˇ-aˬ, maˬ poˆ maˬ paˇ ni ziꞈ-eu meh. Aˬ yawꞈ-ahˇ gʼoe-eu deuˬ gʼaˇ duˬ, dehˬ daˬ duˬ loꞈ-ehˇ ziꞈ-eu meh.

³²Sahˬpaˬ Miˬyehˇ gʼaˬ maˬ ngeuˇ-ehˇ, Miˬyehˇ nui gʼaˬ aˬ gaˇ jawˇ ta. Aˬ dui-euˬ Miˬyehˇ maˬ ngeuˇ-ehˇ, lo guˇ tiˬ tsahˇ aˬ gaˇ jaˆ ta.

³³Miˬyehˇ heu gʼaˬ ngaˬ-euˬ gʼaˇ duˬ, ziꞈ dui dui-eu gʼoe duˬ pyeuꞈ-awˇ, ngaˇ iˇ luꞈ-eu gaˇ ma kahˇ li, guˆ kʼaˇ maˬ za ni haw luꞈ meh.

³⁴Kʼaˬ tsehˆ aˬ kuiˇ loꞈ-ehˇ deuˇ ni, ngaˬ-euˬ aˬ kuiˇ-ahˇ gʼaˬ biꞈ-awˇ, goˇ dui dui-eu gawˬ jawˬ uˬ du, 3 saˇ lehˆ ni bi dehꞈ laꞈ-euˬ meh.

³⁵Guiˬ shuiˇ neh jahˇ taˬ-euˬ kaˆ poˆ, ngaˬ-euˬ laꞈ du ngoꞈ daˆ coeˇ-awˇ, ngaˬ-euˬ aˬ laꞈ guiˇ deuˆ nya ni, aˬ yawꞈ dzaw bym nehˬ laꞈ-euˬ meh.

³⁶Nawˬ-euˬ ka kʼoꞈ-eu dehˬ daˬ duˬ, ngaˬ-ahˇ nawˇ biꞈ nehˬ laꞈ-euˬ meh. Nawˇ ngehˬ gʼeh caw ba-eu miˇ neh, ngaˇ tsawˇmyahˇ doˆ laˇ taˬ-euˬ ma.

³⁷Ngaˬ-euˬ aˬ kuiˇ nawˬ tehˬ duˬ-ahˇ, nawˬ neh laˆ deˬ taˬ-euˬ miˇ neh, kuiˇ myaˆ puˇ ziꞈ dah ni jaˆ-awˇ, aˬ kuiˇ nawˬ pyawˆ-euˬ maˬ baw nya.

³⁸Muiˇ-eu deuˬ-ahˇ ngaˇ caw teh-awˇ, laˆ luˬ laˆ seˇ nehˬ yaꞈ-euˬ ma. Nui kʼahˇ tiˬ shiˇ maˬ jahˇ nehˬ-ehˇ, mehˬ nah paw maˬ gʼoꞈ kʼoꞈ laˇ-aˬ.

³⁹Aˬ yawꞈ maꞈ-ahˇ dawꞈ lah nehˬ-awˇ, yaw kʼaˆ-ehˇ lehˬ naˇ nehˬ-euˬ ma. Aˬ yawꞈ maꞈ maˬ tuˇ laˇ coeˇ-ehˇ, ngaˬ-euˬ aˬ kuiˇ uˬ moˆ ga meh.

⁴⁰Ngaˇ guiˇ deuˆ-eu gʼaˬ leˇ nya ni, Nawˇ ngaˬ-ahˇ gʼaˬ biꞈ lahˬ laꞈ-awˇ, muiˇ-eu deuˬ-ahˇ bi sm-iˇ-awˇ, ngaˬ-euˬ laꞈ oꞈ bi awꞈ-euˬ meh.

⁴¹Muiˇ-eu deuˬ naˇ kʼahˇ ciꞈ pyawˇ-awˇ, cehˆ byaˆ jiˇ ni nawˇ jahˇ-euˬ meh. Ngaˬ-ahˇ bye-eu tsawˇ haˬ kʼoeˇ deuˬ, ngaˇ laˆ luˬ laˆ seˇ nehˬ-euˬ ma.

⁴²Aˬ yawꞈ maꞈ zeuˬ zeuˬ-ehˇ haw kʼawꞈ, caw ba nehˬ-eu gʼaˬ maˬ jawˇ-a. Sahˬpaˬ Miˬyehˇ-ahˇ guˇ nehˬ kʼawꞈ, myaˆ haw cawˬ nehˬ gaˇ maˬ duˇ-a.

⁴³Kʼaˬ lehˇ loꞈ-ehˇ meuˇ-iˇ ngeh keuˆ, yawꞈ maꞈ-ahˇ ngaˇ tahˬ loeˇ-awˇ, gaˇ ma saˬ jehˆ tawˇ-eu loꞈ-ehˇ, tawˇ nyaꞈ ni nawˬ pyeuꞈ nehˬ-euˬ ma.

⁴⁴Puiˬ-eu tsawˇ haˬ deuˬ-euˬ laꞈ-ahˇ, nawˇ ngaˬ-ahˇ ka kʼoꞈ nehˬ laꞈ-awˇ, tsawˇ jeuˬ dawˬ tawˆ luꞈ-euˬ kʼoeˇ taˆ, dzoeˬ dzaˬ ngaˬ-ahˇ biꞈ laꞈ-euˬ meh. Aˇ hu maˬ siˬ-euˬ tsawˇ haˬ deuˬ, iˬ nah ngaˬ-ahˇ mˇ cu luꞈ meh.

⁴⁵Aˬ cawˬ tsawˇ jeuˬ boeˇ miˬ siˬ kʼaˬ, ngaˬ-euˬ gaˇ kawˆ naˬ gaˬ leˇ ngeh, ngaˬ-euˬ mehˬ shi awˆ byaˆ le-awˇ, ngaˬ-euˬ ehˇ dawˬ naˇ haˬ-eu meh.

⁴⁶Aˬ cawˬ tsawˇ jeuˬ boeˇ miˬ siˬ kʼaˬ, guˆ-eu nui ma aˇ dzehˬ dzeuˇ-awˇ, ziꞈ-eu taˆ laꞈ kʼoeˇ uˇ luꞈ-eu, yaw dzuˬ dzuˬ-awˇ doˆ le-eu meh.

⁴⁷Sahˬpaˬ Miˬyehˇ dehꞈ luꞈ-eu meh. ngaˬ-euˬ lo guˇ guiˬ lahˬ huiˬ luˇ. Ka kʼoꞈ laꞈ-euˬ lo guˇ pyeuꞈ-eu, ngaˬ-euˬ Miˬyehˇ-ahˇ ciˬ huiˬ-awˬ.

⁴⁸Aˬ cawˬ-ahˇ laꞈ poˆ poˆ nya ni, Miˬyehˇ ngaˬ-ahˇ ngehˬ gʼeh laꞈ-awˇ, ngaˬ-ahˇ muiˇ-eu tsawˇ haˬ deuˬ-ahˇ, ngaˬ-euˬ laꞈ oꞈ bi awꞈ-euˬ meh.

⁴⁹Muiˇ-eu deuˬ-euˬ aˬ laꞈ laꞈ kʼoeˇ, aˬ yawꞈ ngaˬ-ahˇ gʼeu doˆ-euˬ meh. Ngaˬ-ahˇ muiˇ-eu deuˬ-euˬ kʼoeˇ taˆ, nawˇ ngaˬ-ahˇ ciˬ huiˬ laꞈ-euˬ meh. Yaw haiˬ mˇ-eu deuˬ-euˬ laꞈ-ahˇ, nawˇ ngaˬ-ahˇ ka kʼoꞈ laꞈ-euˬ meh.

⁵⁰Kʼoeˇ miˇ neh Sahˬpaˬ Miˬyehˇ-oˇ, tsawˇ jeuˬ dawˬ tawˆ luꞈ-euˬ mehˬ shi, caˇ-eu dawˬ kawˬ-ahˇ ngaˇ caˇ-awˇ, nawˬ-euˬ tsawˇ myahˇ-ahˇ ja ceuˬ ma.

⁵¹Miˬyehˇ aˬ yawꞈ-euˬ sahˬpaˬ-ahˇ, aˬ cawˬ kʼoeˇ taˆ bi gʼaˬ leˇ-awˇ, aˬ yawꞈ neh tseˇ doˆ-euˬ gʼaˬ-ahˇ, maˬ tsehˆ leˇ ni gaˬ luꞈ-eu meh. Daˬbiˇ-euˬ mawˇ do-ahˇ maˬ ehˇ, Daˬbiˇ-euˬ zaˬ deuˬ-ahˇ maˬ ehˇ, mˬ maˬ maˬ byaˆ zaˇ ziˇ gaˬ meh.