Read Akha 2 Saˬmeuˬlaˆ 23 Bible Online

2 Saˬmeuˬlaˆ 23 - Akha bible

2 Saˬmeuˬlaˆ 23

¹Yeˬshehˇ-euˬ aˬ li Daˬbiˇ-aˬ, Miˬyehˇ neh ciˬ huiˬ ciˬ mahˇ nehˬ-euˬ tsawˇ haˬ pyeuꞈ-awˇ, sahˬ paˬ geuꞈ-eu gʼaˇ duˬ Yaˬkoˆ-euˬ Miˬyehˇ neh tseˇ doˆ-euˬ gʼaˬ kʼawꞈ pyeuꞈ-eu meh. Iˇsaˬleˬlaˆ tsawˇ jeuˬ gʼaˇ duˬ naˇ haˬ muiˬ-eu caˇ dawˬ deuˬ aˬ yawꞈ caˇ yaꞈ-euˬ meh. Aˬ yawꞈ-euˬ aˇ saˬ saˬ-eu dawˬ-aˬ, heu loꞈ-ehˇ meh.

²Sahˬpaˬ Miˬyehˇ-euˬ Yaw sahˇ-aˬ, ngaˬ-ahˇ gʼoe-awˇ dawˬ ngehˬ-eu meh. Ngaˬ-euˬ kʼaˬ meh mehˬ laˇ kʼoeˇ taˆ, aˬ yawꞈ-euˬ dawˬ keuˆ le-euˬ meh.

³Iˇsaˬleˬlaˆ tsawˇ jeuˬ gʼaˇ duˬ, lo guˇ pyeuꞈ-eu Miˬyehˇ ehˇ-eu, “Miˬyehˇ-ahˇ guˆ-eu jeˬ ahˇ-awˇ, dawˇ coe ni uˆ lahˇ-eu tsawˇ haˬ,

⁴kʼahˬ zaˬ deh zaˬ deuˬ-euˬ kʼoeˇ taˆ, uˬ shaw yaw shehꞈ bya gaˇ duˇ meh. Juˬ kʼoeˬ maˬ tmˬ-eu uˬ shawˬ paw, nahˇ ma gʼa doˆ laˇ gaˇ duˇ-awˇ, Yaˇ moꞈ dehꞈ doˆ laˇ ni oe-eu, uˬ yehˇ tiˬ bahˬ-ahˇ duˇ-eu meh.”

⁵Ngaˬ-euˬ zaˬ deuˬ uˆ deuˬ kʼoeˇ taˆ, guiˬ lahˬ kʼoeˇ deuˬ Miˬyehˇ biꞈ meh. Mˬ maˬ maˬ byaˆ ziꞈ-eu saˇ jaˇ, aˬ yawꞈ ngaˬ-ahˇ dzaˬ taˬ-euˬ meh. Ngaˬ-euˬ nui kʼahˇ byah jiˇ laˇ ni, muiˇ-eu deuˬ-ahˇ ngaˇ gʼaˬ leˇ ni, Miˬyehˇ mˇ-eu yaw duˬ baw meh.

⁶Miˬyehˇ-ahˇ maˬ gʼoe-eu deuˬ-aˬ, aˬ laꞈ neh maˬ toeˬ ciˆ nya-ehˇ, yaˇ dzeˇ biˬ dzeh-awˇ bi jaˆ-euˬ, aˬ gah baw duˆ-ahˇ duˇ-eu meh.

⁷Shmˇ jehˆ kaˆ neh sheu doˆ leꞈ-awˇ, gahˬ gahˬ yoeˬ neh pehˆ pyaˆ nehˬ-awˇ, miˬ dzaˬ dzah puiˆ byoˆ nehˬ tehꞈ-a.”

⁸Heu-aˬ, tsawˇ myahˇ doˆ dui dui-eu Daˬbiˇ-euˬ yehˇ deuˬ meh. Yaw beh gʼaˬ-aˬ, Taˬsheˬmoˬ meuˬ-ahˇ jawˇ-eu Yoˇshehˆbaˬsheˬbehˆ meh. Aˬ yawꞈ-aˬ, tsawˇ myahˇ doˆ dui dui-eu yehˇ smˇ gʼaˬ kʼoeˇ taˆ aˬ yuiꞈ geuꞈ-euˬ gʼaˬ meh. Aˬ yawꞈ-euˬ gahˬ neh tsawˇ haˬ yehꞈ yaˇ gʼaˬ-ahˇ aˬ yawꞈ deuˆ ceh ceh-awˇ, tiˬ poˆ laꞈ kʼoeˇ tehꞈ-ehˇ dawˬ tawˆ luꞈ-ahˇ sehꞈ jiˇ-euˬ meh.

⁹Tsawˇ myahˇ doˆ dui dui-eu yehˇ smˇ gʼaˬ laꞈ kʼoeˇ, nyiˬ gʼaˬ tiˬ gʼaˬ-aˬ, Aˬhawˇ aˇ jeuˬ Doˇdoˬ-euˬ aˬ li Eˇlaˬzaˬ meh. Tiˬ nah-aˬ, guiˇ deuˆ-eu lehˇ uiˬ leˇ taˬ-euˬ Piˇliˇtiˆ tsawˇ haˬ deuˬ-ahˇ, Daˬbiˇ aˬ yawꞈ nyaꞈ deuˆ ceh ceh-euˬ meh. Iˇsaˬleˬlaˆ tsawˇ haˬ deuˬ guiˇ deuˆ smˬ-awˇ cehˆ jiˇ-euˬ meh.

¹⁰Ehˇ kʼawꞈ, aˬ yawꞈ maˬ cehˆ-ehˇ, ziꞈ dah ni yawꞈ-eu laꞈ kʼoeˇ, aˬ laꞈ gʼah dui dui laˇ-euˬ miˇ neh mi cehˇ tuˆ tehˬ taˬ-euˬ maˬ pyehˬ dzeh nya-ehˇ pyeuꞈ laˇ ngeh keuˆ ni guiˇ deuˆ-euˬ meh. Kʼoeˇ ngeh nah, huiˬ dui dui-eu guiˇ tiˬ guiˇ Sahˬpaˬ Miˬyehˇ deuˆ gʼaˬ-euˬ meh. Guiˇ deuˆ gʼaˬ ngeh, Iˇsaˬleˬlaˆ tsawˇ haˬ deuˬ Eˇlaˬzaˬ jawˇ gaˇ paˇ gʼoꞈ laˇ-awˇ, shiˇ taˬ-awˇ ga-eu tsawˇ haˬ deuˬ dawꞈ luꞈ-eu guiˇ deuˆ-eu keu ka deuˬ lehˆ doˆ geuꞈ-euˬ meh.

¹¹Tsawˇ myahˇ doˆ dui dui-eu yehˇ smˇ gʼaˬ laꞈ kʼoeˇ aˇ saˬ saˬ-eu gʼaˬ-aˬ, Haˇlaˬ meuˬ-ahˇ jawˇ-eu Aˬgiˇ-euˬ aˬ li Shaˬmahˇ meh. Piˇliˇtiˆ tsawˇ haˬ deuˬ-aˬ, Leˬhiˇ meuˬ dawˬ peh nuiˆ gahˬ gahˬ yaˇ-ahˇ uiˬ leˇ-awˇ jawˇ-eu meh. Iˇsaˬleˬlaˆ tsawˇ haˬ deuˬ Piˇliˇtiˆ tsawˇ haˬ deuˬ-ahˇ guˆ-awˇ cehˆ-euˬ meh.

¹²Ehˇ kʼawꞈ, Shaˬmahˇ gʼaˬ jawˇ duˬ maˬ cehˆ jiˆ ni, yaˇ gʼahˇ ceh yawꞈ-awˇ Piˇliˇtiˆ tsawˇ haˬ deuˬ-ahˇ deuˆ sehꞈ-euˬ meh. Kʼoeˇ ngeh nah kʼawꞈ, huiˬ dui dui-eu guiˇ tiˬ guiˇ Sahˬpaˬ Miˬyehˇ deuˆ gʼaˬ-euˬ meh.

¹³Cehˇ yehˬ yamˬ dawˬ peh peh laˇ-awˇ, Piˇliˇtiˆ tsawˇ haˬ deuˬ Leˬpeˬ deh kʼawꞈ-ahˇ uiˬ leˇ-awˇ jawˇ luꞈ ngeh, tsawˇ myahˇ doˆ-eu yehˇ smˬ tseˇ gʼaˬ laꞈ kʼoeˇ smˇ gʼaˬ, Daˬbiˇ jawˇ luꞈ-eu Aˬduˬlamˬ lo kʼahˬ-ahˇ iˇ-euˬ meh.

¹⁴Aˇ yamˬ kʼoeˇ yamˬ laꞈ kʼoeˇ, ziꞈ dah ni laˆ ziꞈ taˬ-euˬ taˆ jaˆ-eu gawˬ duˇ-ahˇ Daˬbiˇ jawˇ-awˇ, Piˇliˇtiˆ guiˇ maꞈ tiˬ maꞈ Behˬlehˬhehˬ meuˬ-ahˇ jawˇ luꞈ-eu meh.

¹⁵Kʼoeˇ ngeh, Daˬbiˇ iˇ kahˇ-ahˇ noeˬ mawˇ leˇ-awˇ, “Tsawˇ haˬ tiˬ gʼaˬ na Behˬlehˬhehˬ meuˬ-euˬ lahˇ kʼehˬ dawˬ peh jaˆ-eu lah duˬ-ahˇ iˇ-awˇ, iˇ cuꞈ tiˬ kʼmˬ kʼawꞈ laꞈ-awˇ bi dawˇ laꞈ law nmˇ-aˬ gʼaˬ miˇ-a” lehˇ ehˇ-eu meh.

¹⁶Tsawˇ myahˇ doˆ-eu yehˇ kʼoeˇ smˇ gʼaˬ Piˇliˇtiˆ taˆ tahˬ paˆ doˆ gʼeh-awˇ, lah duˬ kʼoeˇ duˬ-ahˇ iˇ cuꞈ kʼawꞈ-awˇ, Daˬbiˇ jawˇ gaˇ yuˇ kʼoꞈ laꞈ nehˬ-euˬ meh. Ehˇ kʼawꞈ, iˇ cuꞈ kʼoeˇ aˬ yawꞈ maˬ dawˇ ni shehˆ kʼaˇ-awˇ, Sahˬpaˬ Miˬyehˇ-ahˇ lawˇ nehˬ-euˬ meh.

¹⁷“Sahˬpaˬ Miˬyehˇ-oˇ, iˇ cuꞈ heu ngaˇ maˬ dawˇ ahˇ coeˇ nya. Iˇ cuꞈ heu ngaˇ dawˇ naˇ, yawˬ ha-euˬ saꞈ laˇ daˬ-awˇ iˇ cuꞈ kʼawꞈ laˬ-iˇ-eu tsawˇ haˬ heu smˇ gʼaˬ-euˬ shiˬ dawˇ gaˇ duˇ-eu miˇ neh, ngaˇ aˬ joˆ-ehˇ dawˇ ahˇ coeˇ nmˇ” lehˇ aˬ yawꞈ ehˇ-eu meh. Kʼoeˇ miˇ neh, iˇ cuꞈ kʼoeˇ aˬ yawꞈ maˬ dawˇ ni byehˇ-euˬ meh. Gaˇ heu deuˬ-aˬ, tsawˇ myahˇ doˆ dui dui-eu yehˇ kʼoeˇ smˇ gʼaˬ neh mˇ-euˬ, ja ceuˬ dui dui paˬ-ehˇ gʼeh-eu gaˇ deuˬ meh.

¹⁸Zeˬluˇyaˆ-euˬ aˬ li Yoˇbaˬ-euˬ aˬ nyiˇ Aˬbiˇshaiˇ-aˬ, tsawˇ myahˇ doˆ-eu yehˇ smˬ tseˇ gʼaˬ laꞈ kʼoeˇ aˬ yuiꞈ geuꞈ-euˬ gʼaˬ meh. Aˬ yawꞈ-aˬ, aˬ yawꞈ-euˬ gahˬ neh tsawˇ haˬ smˬ yaˇ gʼaˬ-ahˇ guiˇ deuˆ ceh ceh-awˇ sehꞈ jiˇ nehˬ-euˬ miˇ neh, smˬ tseˇ gʼaˬ laꞈ kʼoeˇ tsawˇ myahˇ doˆ-eu gʼaˬ pyeuꞈ laˇ-euˬ meh.

¹⁹Kʼoeˇ smˬ tseˇ gʼaˬ laꞈ kʼoeˇ, aˬ cawˬ naˆ maˬ tseˇ aˬ yawꞈ tsawˇ myahˇ doˆ dzehˬ-awˇ, aˬ yawꞈ maꞈ kʼoeˇ taˆ aˬ yuiꞈ geuꞈ-euˬ meh. Ehˇ kʼawꞈ, tsawˇ myahˇ doˆ-eu yehˇ kʼoeˇ smˇ gʼaˬ naˆ ni aˬ yawꞈ tsawˇ myahˇ maˬ huiˬ-a.

²⁰Kaˬzeˬlaˇ meuˬ-ahˇ jawˇ-eu Yeˬhawˇ yaˬdaˬ-euˬ aˬ li Baˬnaˇyaˬ kʼawꞈ, tsawˇ myahˇ doˆ-eu yehˇ tiˬ gʼaˬ pyeuꞈ-eu meh. Tsawˇ myahˇ doˆ-eu Mawˇbaˆ yehˇ nyiˬ gʼaˬ-ahˇ sehꞈ-euˬ poˆ gui ahˇ-ehˇ, aˬ yawꞈ neh mˇ taˬ-euˬ ja ceuˬ paˬ-ehˇ gʼeh-eu gʼawˬ mya jeˬ jaˆ-eu meh. Tiˬ poˆ-aˬ, juˬ kʼoeˬ tmˬ-eu aˇ nah tiˬ nah-ahˇ, duˬ kʼahˬ tiˬ kʼahˬ-ahˇ aˬ yawꞈ uˇ-iˇ-awˇ, aˇ laˬ jaˬ shiˇ tiˬ mawˇ sehꞈ-euˬ meh.

²¹Gahˬ baꞈ luꞈ-eu huiˬ dui dui-eu Iˇjiˇtuˆ tsawˇ haˬ tsawˇ ma tiˬ gʼaˬ-ahˇ kʼawꞈ, aˬ yawꞈ sehꞈ haw-euˬ meh. Kʼoeˇ ngeh poˆ aˬ yawꞈ-euˬ aˬ laꞈ-ahˇ daˇ kawˬ tiˬ kawˬ tehꞈ-ehˇ ahˇ kʼawꞈ, Iˇjiˇtuˆ tsawˇ haˬ kʼoeˇ gʼaˬ-euˬ gahˬ aˬ yawꞈ lu doˆ-awˇ, gahˬ kʼoeˇ neh sehꞈ nehˬ-euˬ meh.

²²Heu-aˬ, tsawˇ myahˇ doˆ-eu yehˇ smˬ tseˇ gʼaˬ laꞈ kʼoeˇ ahˇ-eu Baˬnaˇyaˬ neh mˇ-euˬ, ja ceuˬ paˬ-ehˇ gʼeh-eu gaˇ deuˬ meh.

²³Aˬ yawꞈ-aˬ, smˬ tseˇ gʼaˬ laꞈ kʼoeˇ aˬ cawˬ taꞈ-ehˇ dzehˬ kʼawꞈ, tsawˇ myahˇ doˆ-eu yehˇ kʼoeˇ smˇ gʼaˬ naˆ ni tsawˇ myahˇ maˬ huiˬ-a. Daˬbiˇ neh aˬ yawꞈ-ahˇ, Daˬbiˇ-ahˇ loꞈ piˇ-eu guiˇ maꞈ kʼoeˇ taˆ aˬ yuiꞈ bi geuꞈ-euˬ meh.

²⁴Tsawˇ myahˇ doˆ-eu yehˇ smˬ tseˇ gʼaˬ laꞈ kʼoeˇ ahˇ-eu deuˬ-aˬ, Yoˇbaˬ-euˬ aˬ nyiˇ Aˬsaˬheˬlaˇ Behˬlehˬhehˬ meuˬ-ahˇ jawˇ-eu Doˇdoˬ-euˬ aˬ li Eˇlaˬhaˬnaˬ

²⁵Haˬloˆ meuˬ-ahˇ jawˇ-eu Shaˬmahˇ Haˬloˆ meuˬ-ahˇ jawˇ-eu Eˇliˇkaˆ

²⁶Peˬlehˆ meuˬ-ahˇ jawˇ-eu Hiˇlehˆ Teˬkawˬ meuˬ-ahˇ jawˇ-eu Iˇkeˇshaˆ-euˬ aˬ li Iˇyaˬ,

²⁷Aˬnaˬtawˇ meuˬ-ahˇ jawˇ-eu Aˬbyeˇzaˬ, Huˇshahˬ meuˬ-ahˇ jawˇ-eu Meˬbuˇneˬ,

²⁸Aˬhawˇ meuˬ-ahˇ jawˇ-eu Zaˬlaˬmoˬ, Neˬtawˇpaˬ meuˬ-ahˇ jawˇ-eu Maˬhaˬlai

²⁹Neˬtawˇpaˬ meuˬ-ahˇ jawˇ-eu Baˬnahˬ-euˬ aˬ li Heˬloeˆ, Beˬyaˬmiˬ miˇ kʼahˬ Giˇbyaˬ meuˬ-ahˇ jawˇ-eu Yiˇbaiˇ-euˬ aˬ li Iˇtehˇ,

³⁰Piˇlaˬdoˬ meuˬ-ahˇ jawˇ-eu Baˬnaˇyaˬ, Gaˬshaˆ meuˬ dawˬ peh jaˆ-eu deh kʼawꞈ-ahˇ jawˇ-eu Hiˇdaiˇ,

³¹Aˬlaˬbahˬ meuˬ-ahˇ jawˇ-eu Aˬbyaˬlaˬboˬ, Baˬhuˇleˬ meuˬ-ahˇ jawˇ-eu Aˬzaˇmaˬbehˇ,

³²Shaˬlaˬboˬ meuˬ-ahˇ jawˇ-eu Eˇliˇhaˬbaˬ, Yaˬsheˬ-euˬ aˬ li deuˬ,

³³Yawˇnaˆshaˬ, Haˇlaˬ meuˬ-ahˇ jawˇ-eu Shaˬmahˇ, Haˇlaˬ meuˬ-ahˇ jawˇ-eu Shaˬyaˇ-euˬ aˬ li Aˬhiˇmˬ

³⁴Mawˇkah meuˬ-ahˇ jawˇ-eu Aˬhaˇsaˬbehˇ-euˬ aˬ li Eˇliˇpaˬlehˇ, Giˇloˬ meuˬ-ahˇ jawˇ-eu Aˬhiˇtawˇpeˬlaˇ-euˬ aˬ li Eˇlamˬ,

³⁵Gaˬlaˬmeˬlaˇ meuˬ-ahˇ jawˇ-eu Heˬzaˬloˆ, Aˬlaˆ meuˬ-ahˇ jawˇ-eu Paˬlai,

³⁶Zoˇbaˬ meuˬ-ahˇ jawˇ-eu Naˬdaˬ-euˬ aˬ li Iˇgaˬlaˇ, Gaˆ meuˬ-ahˇ jawˇ-eu Baˬniˬ,

³⁷Aˬmoˬ meuˬ-ahˇ jawˇ-eu Zeˬlehˆ, Yoˇbaˬ-euˬ guiˇ deuˆ-eu keu ka baꞈ-eu gʼaˬ pyeuꞈ-eu Biˇyoˆ meuˬ-ahˇ jawˇ-eu Naˬhaˬlehˇ.

³⁸Yaˬtiˇlaˆ meuˬ-ahˇ jawˇ-eu Iˇyaˬ, Yaˬtiˇlaˆ meuˬ-ahˇ jawˇ-eu Gaˬyehˆ,

³⁹Heˬtaˆ tsawˇ jeuˬ Uˇliˇyaˆ, heu deuˬ meh. Tsawˇ myahˇ doˆ-eu yehˇ dawˬ tawˆ luꞈ smˬ tseˇ shiꞈ gʼaˬ byah-eu meh.