Read Akha 2 Saˬmeuˬlaˆ 24 Bible Online

2 Saˬmeuˬlaˆ 24 - Akha bible

2 Saˬmeuˬlaˆ 24

¹Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ laˇ-awˇ, Daˬbiˇ-ahˇ gʼoe-eu laꞈ kʼoeˇ, Iˇsaˬleˬlaˆ tsawˇ haˬ deuˬ kʼoeˇ taˆ shaˬ-eu zahˬ-eu jeˬ bi keuˆ le-euˬ meh.

²Guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Yoˇbaˬ-ahˇ, Daˬbiˇ heu loꞈ-ehˇ ehˇ nehˬ-euˬ meh. “Ngaˬ-euˬ gaˇ mˇ-eu yaw huiˬ yaw mahˇ deuˬ nehˬ-ehˇ, aˬ dui-euˬ miˇ kʼahˬ kʼoeˇ dzeˇ heu dzeˇ jaˆ-eu Daˬ meuˬ-ahˇ neh Beˬlaˇsheˬba meuˬ-ahˇ keuˆ ni iˇ-awˇ, Iˇsaˬleˬlaˆ tsawˇ jeuˬ-euˬ tsawˇ seˬ gʼoˆ-iˇ-awˬ. Miˇ kʼahˬ zaˬ aˇ myaˆ gʼaˬ jawˇ-eu gaˇ kawˆ ngaˇ siˬ nya mawꞈ-eu ma.”

³Sahˬ paˬ-ahˇ Yoˇbaˬ ehˇ nehˬ-eu, “Sahˬ paˬ-oˇ, nawˬ-euˬ tsawˇ haˬ deuˬ iˬ nah myaˆ maˬ tseˇ tiˬ yaˇ bymˇ myaˬ laˇ ni, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ mˇ luꞈ-uˇ. Ehˇ law hawˇ kʼawꞈ, aˬ jeˬ miˇ neh nawˇ heu loꞈ-ehˇ tsawˇ seˬ gʼoˆ haw mawꞈ-eu nya.”

⁴Ehˇ kʼawꞈ, Yoˇbaˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-euˬ ehˇ dawˬ maˬ naˇ haˬ kʼoeˇ keuˆ ni, sahˬ paˬ Daˬbiˇ maˬ juˬ-a. Kʼoeˇ miˇ neh, aˬ yawꞈ maꞈ aˬ yawꞈ jawˇ gaˇ neh doˆ-iˇ-awˇ, Iˇsaˬleˬlaˆ tsawˇ jeuˬ-euˬ tsawˇ seˬ gʼoˆ-iˇ-euˬ meh.

⁵Aˬ yawꞈ maꞈ Yawˇdaˬ lawˇ baˬ tsehˆ doˆ-awˇ, Gaˆ miˇ kʼahˬ laꞈ kʼoeˇ, Aˬyawˬ meuˬ-euˬ laꞈ oˆ paw naˬ-euˬ meh. Kʼoeˇ gaˇ neh naˇ, laꞈ taˆ paw pyawˬ-ahˇ jaˆ-eu Yaˬzeuˬ meuˬ-ahˇ le-euˬ meh.

⁶Kʼoeˇ naˇ, Heˬtaˆ miˇ kʼahˬ-ahˇ jaˆ-eu Giˇlaˆ meuˬ hawˇ-eu Kaˬdeˬshaˇ meuˬ-ahˇ le-euˬ meh. Kʼoeˇ gaˇ neh naˇ, Daˬ meuˬ-ahˇ iˇ-awˇ, Daˬ meuˬ-ahˇ neh Siˇdoˬ meuˬ-ahˇ iˇ gʼeh-euˬ meh.

⁷Kʼoeˇ naˇ, laꞈ oˆ paw pyawˬ-ahˇ jaˆ-eu ziꞈ dah ni tsoˆ taˬ-euˬ Duˇlu meuˬ hawˇ-eu, Hiˇbiˇ tsawˇ jeuˬ hawˇ-eu Kaˬnaˬ tsawˇ jeuˬ-euˬ meuˬ dawˬ tawˆ luꞈ-ahˇ iˇ doe jiˇ-awˇ, aˇ saˬ saˬ laˇ jawˬ-ehˇ, Yuˇdaˆ miˇ kʼahˬ laꞈ oˆ paw dzaˬ-ahˇ jaˆ-eu Beˬlaˇsheˬba meuˬ-ahˇ iˇ-euˬ meh.

⁸Ba la gʼoeˬ siˬ uˬ taꞈ nyiˬ tseˇ nah byah laˇ ngeh, miˇ kʼahˬ kʼoeˇ kʼahˬ kʼahˬ lah ni aˬ yawꞈ maꞈ cah doe jiˇ-awˇ, Yeˬluˇsaˬlehˬ meuˬ-ahˇ gʼoꞈ leˇ-euˬ meh.

⁹Kʼoeˇ naˇ, Yoˇbaˬ gʼaˬ, aˬ yawꞈ maꞈ neh yuˇ laꞈ-euˬ tsawˇ seˬ jaˇ laˇ kʼoeˇ sahˬ paˬ-ahˇ biꞈ nehˬ leˇ-euˬ meh. Iˇsaˬleˬlaˆ miˇ kʼahˬ laꞈ kʼoeˇ guiˇ deuˆ nya-eu tsawˇ haˬ yehꞈ seh gʼaˬ jawˇ-awˇ, Yuˇdaˆ miˇ kʼahˬ laꞈ kʼoeˇ guiˇ deuˆ nya-eu tsawˇ haˬ ngaˬ seh gʼaˬ jawˇ-eu meh.

¹⁰Ehˇ kʼawꞈ, Daˬbiˇ tsawˇ seˬ yuˇ gʼaˬ ngeh, aˬ yawꞈ-euˬ nui ma laꞈ kʼoeˇ kʼahˬ lahˇ laˇ-awˇ, “Ngaˇ heu loꞈ-ehˇ jahˇ-eu laꞈ kʼoeˇ, huiˬ dui dui-eu iˬ baˇ mˇ-euˬ law hawˇ miˇ-a. Ngaˬ-ahˇ iˬ baˇ pyehˬ nehˬ laꞈ-awˬ. Aˬ dzawˬ aˇ gah loꞈ-ehˇ ngaˇ mˇ dzeuˇ gʼaˬ nga” lehˇ, Sahˬpaˬ Miˬyehˇ-ahˇ aˬ yawꞈ ehˇ nehˬ-euˬ meh.

¹¹Uˬ shawˬ paw Daˬbiˇ uˬ suˇ tuˇ ngeh yamˬ-ahˇ, Daˬbiˇ-ahˇ Miˬyehˇ gʼaˇ duˬ ngehˬ dah nehˬ-eu gʼaˬ pyeuꞈ-eu Gaˆ-ahˇ, Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Daˬbiˇ jawˇ gaˇ iˇ-awˇ, gaˇ kawˆ smˇ jeˬ laꞈ kʼoeˇ aˬ yawꞈ-ahˇ tiˬ jeˬ bi tseˇ geuꞈ-awˇ, aˬ yawꞈ neh kʼaˇ tseˇ geuꞈ-euˬ jeˬ ngaˇ bi keuˆ ma lehˇ ehˇ nehˬ-iˇ-awˬ.”

¹²

¹³Daˬbiˇ jawˇ gaˇ Gaˆ iˇ-awˇ, Sahˬpaˬ Miˬyehˇ neh kʼaˇ bi ehˇ-euˬ loꞈ-ehˇ ehˇ nehˬ-awˇ, heu loꞈ-ehˇ naˇ haˬ nehˬ-euˬ meh. “Nawˇ aˬ geu jeˬ tseˇ geuꞈ nmˇ. Nawˬ-euˬ miˇ kʼahˬ laꞈ kʼoeˇ smˇ kʼoꞈ keuˆ ni ya mehꞈ ya shuꞈ-eu jeˬ-ahˇ tseˇ geuꞈ nmˇ loˇ. Maˬ ngeuˇ naˇ, nawˬ-ahˇ muiˇ-eu deuˬ-euˬ mehˬ shi ba la smˇ shiˬ byah ni nawˇ ya cehˆ byoˆ-eu jeˬ-ahˇ tseˇ geuꞈ nmˇ loˇ. Maˬ ngeuˇ naˇ, nawˬ-euˬ miˇ kʼahˬ laꞈ kʼoeˇ smˬ nah keuˆ ni yaw jaw naˇ-eu naˇ gawˇ gawˇ ma keuˆ le-eu jeˬ-ahˇ tseˇ geuꞈ nmˇ loˇ lehˇ shaˇ noeˬ-awˇ, ngaˬ-ahˇ ehˇ nehˬ laꞈ-awˬ. Ngaˇ Sahˬpaˬ Miˬyehˇ-ahˇ ehˇ kʼoꞈ nehˬ leˇ ma.”

¹⁴Daˬbiˇ ehˇ-eu, “Ngaˬ-ahˇ zahˬ dui dui miˇ-a. Ehˇ kʼawꞈ, tsawˇ haˬ neh bi kʼehˬ-eu jeˬ-ahˇ ngaˇ maˬ daˬ mawꞈ nya. Kʼehˬ-eu lehˇ ya bi kʼehˬ naˇ, Sahˬpaˬ Miˬyehˇ-aˬ, gʼawˬ shaˬ gaˬ nya-eu miˇ neh, aˬ yawꞈ neh bi kʼehˬ ma.”

¹⁵Kʼoeˇ miˇ neh, kʼoeˇ ngeh shawˬ neh aˇ dahˬ beh-awˇ, nah tsaˬ tsoˆ taˬ-euˬ aˇ yamˬ byah laˇ ngeh keuˆ ni, Iˇsaˬleˬlaˆ tsawˇ jeuˬ kʼoeˇ taˆ yaw jaw naˇ-eu naˇ gawˇ gawˇ ma Sahˬpaˬ Miˬyehˇ bi keuˆ le-euˬ meh. Aˬ yawꞈ maꞈ-euˬ miˇ kʼahˬ kʼoeˇ dzeˇ heu dzeˇ jaˆ-eu Daˬ meuˬ-ahˇ neh Beˬlaˇsheˬba meuˬ-ahˇ keuˆ ni, Iˇsaˬleˬlaˆ tsawˇ haˬ shiꞈ muiˇ gʼaˬ shiˇ-euˬ meh.

¹⁶Sahˬpaˬ Miˬyehˇ-euˬ mˬ taˆ gʼaˬ kʼehˇ Yeˬluˇsaˬlehˬ meuˬ-ahˇ laˆ cawˆ-eu lehˇ gʼeh ngeh, Sahˬpaˬ Miˬyehˇ nui ma paˇ laˇ-awˇ, Iˇsaˬleˬlaˆ tsawˇ haˬ deuˬ-ahˇ laˆ luˬ laˆ seˇ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ, “Teu naˆ ni naˇ gʼaˬ-aˇ. Taˬpaˇ jahˇ hawˇ-awˬ” lehˇ ehˇ nehˬ-euˬ meh. Kʼoeˇ loꞈ-ehˇ ehˇ nehˬ ngeh, mˬ taˆ gʼaˬ kʼehˇ kʼoeˇ gʼaˬ Yeˬbuˇ tsawˇ jeuˬ Aˬyawˇnahˬ-euˬ cehˇ bymˇ saˬ kʼawꞈ-ahˇ oe keuˆ taˬ-euˬ meh.

¹⁷Iˇsaˬleˬlaˆ tsawˇ haˬ deuˬ-ahˇ laˆ luˬ laˆ seˇ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ Daˬbiˇ mawˇ-awˇ, Sahˬpaˬ Miˬyehˇ-ahˇ heu loꞈ-ehˇ ehˇ nehˬ-euˬ meh. “Ngaˇ iˬ baˇ ahˇ-eu ngeuˇ ma. Yaw lehˬ jeˬ mˇ-euˬ gʼaˬ-aˬ, ngaˇ ma. Tsawˇ haˬ heu deuˬ aˬ jeˬ mˇ lehˬ taˬ-eu jaˆ ta. Ngaˇ hawˇ-eu ngaˬ-euˬ nymˇ jiˇ-ahˇ tehꞈ-ehˇ nawˇ kʼehˬ nehˬ laꞈ-eu tsaˬ meh.”

¹⁸Kʼoeˇ ngeh nah, Daˬbiˇ jawˇ gaˇ Gaˆ iˇ-awˇ, “Aˬyawˇnahˬ-euˬ cehˇ bymˇ saˬ kʼawꞈ-ahˇ le-awˇ, Sahˬpaˬ Miˬyehˇ gʼaˇ duˬ lawˇ duˬ tiˬ tsahˇ gawˬ nehˬ leˇ-awˬ” lehˇ ehˇ nehˬ-euˬ meh.

¹⁹Sahˬpaˬ Miˬyehˇ-euˬ dawˬ-ahˇ Daˬbiˇ naˇ haˬ geuꞈ-eu laꞈ kʼoeˇ, Gaˆ neh mehˬ nehˬ-euˬ jawˇ duˬ-ahˇ le-euˬ meh.

²⁰Aˬyawˇnahˬ haw ka gʼeh ngeh, sahˬ paˬ hawˇ-eu sahˬ paˬ-euˬ gaˇ mˇ-euˬ yaw huiˬ yaw mahˇ deuˬ laˇ luꞈ gaˇ ya mawˇ-euˬ meh. Kʼoeˇ ngeh, aˬ yawꞈ doˆ-iˇ-awˇ, sahˬ paˬ-euˬ mehˬ shi miˇ tsa awˆ byaˆ-awˇ yaw zeu baw nehˬ-euˬ meh.

²¹“Sahˬ paˬ-oˇ, aˬ jeˬ miˇ neh heu gaˇ laˇ teˬ” lehˇ aˬ yawꞈ naˇ haˬ ngeh, “Yaw jaw naˇ-eu naˇ gawˇ gawˇ ma heu byoˆ-iˇ ni, nawˬ-euˬ cehˇ bymˇ saˬ kʼawꞈ heu zeuˇ-awˇ, Sahˬpaˬ Miˬyehˇ gʼaˇ duˬ lawˇ duˬ tiˬ tsahˇ tsoˆ-eu lehˇ laˇ-euˬ ma” lehˇ, Daˬbiˇ ehˇ kʼoꞈ nehˬ-euˬ meh.

²²Aˬyawˇnahˬ ehˇ-eu, “Sahˬ paˬ-oˇ, cehˇ bymˇ saˬ kʼawꞈ heu nawˇ yuˇ-awˇ, Sahˬpaˬ Miˬyehˇ-ahˇ kʼaˇ lawˇ nehˬ mawꞈ-eu jeˬ lawˇ nehˬ-awˬ. Lawˇ duˬ kʼoeˇ taˆ dzah puiˆ-awˇ lawˇ-eu gʼaˇ duˬ, mawˇ neˇ mawˇ gaw heu deuˬ geuꞈ-awˬ. Mawˇ neˇ laˆ lawˬ kahˬ hawˇ-eu cehˇ baw gaˇ zmˬ-euˬ daˇ kawˬ heu deuˬ kʼawꞈ yuˇ-awˇ, lawˇ gaˇ doꞈ-eu miˬ dzaˬ geuꞈ-awˬ.”

²³Kʼoeˇ deuˬ dawˬ tawˆ luꞈ sahˬ paˬ-ahˇ Aˬyawˇnahˬ biꞈ-awˇ, “Nawˬ neh lawˇ-euˬ jeˬ-ahˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ha geuꞈ luꞈ-uˇ” lehˇ ehˇ nehˬ-euˬ meh.

²⁴Ehˇ kʼawꞈ, sahˬ paˬ ehˇ-eu, “Tiˬ jeˬ-iˬ yawꞈ ngehꞈ-ehˇ ngaˇ maˬ yuˇ. Kʼoeˇ-euˬ gʼaˇ duˬ ngaˇ nawˬ-ahˇ aˇ poeˬ biꞈ ma. Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, aˇ poeˬ maˬ biꞈ ni yawꞈ ngehꞈ-ehˇ za-euˬ jeˬ ngaˇ maˬ lawˇ nehˬ.” Kʼoeˇ naˇ, pyuˇ maˇ byaˆ ngaˬ tseˇ byaˆ biꞈ-awˇ, cehˇ bymˇ saˬ kʼawꞈ hawˇ-eu mawˇ neˇ mawˇ gaw kʼoeˇ deuˬ aˬ yawꞈ zeuˇ tsehˆ-euˬ meh.

²⁵Sahˬpaˬ Miˬyehˇ gʼaˇ duˬ lawˇ duˬ tiˬ tsahˇ aˬ yawꞈ gawˬ-awˇ, miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu je lawˇ nehˬ-euˬ meh. Kʼoeˇ ngeh, aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ geuꞈ nehˬ-awˇ, Iˇsaˬleˬlaˆ tsawˇ haˬ deuˬ-euˬ kʼoeˇ taˆ bi keuˆ le-euˬ yaw jaw naˇ-eu naˇ gawˇ kʼoeˇ byoˆ-iˇ-euˬ meh.