Read Akha 2 Saˬmeuˬlaˆ 6 Bible Online

2 Saˬmeuˬlaˆ 6 - Akha bible

2 Saˬmeuˬlaˆ 6

¹Iˇsaˬleˬlaˆ miˇ kʼahˬ laꞈ kʼoeˇ nya dui dui-eu yehˇ deuˬ-ahˇ Daˬbiˇ tiˬ poˆ paˇ kuˇ uiˬ-awˇ, dawˬ tawˆ luꞈ smˬ muiˇ gʼaˬ byah ni uiˬ laˇ taˬ-euˬ meh.

²Daˬbiˇ tsawˇ haˬ kʼoeˇ deuˬ sheuˬ-awˇ, Dawˬ ma saˇ jaˇ Bahˬ keuˆ baꞈ laˬ-iˇ-eu lehˇ, Yuˇdaˆ miˇ kʼahˬ Baˬlahˬ meuˬ-ahˇ iˇ-euˬ meh. Dawˬ ma saˇ jaˇ Bahˬ keuˆ kʼoeˇ, Baoˬ huiˬ-eu Sahˬpaˬ Miˬyehˇ-euˬ tsawˇ myahˇ pi luꞈ-awˇ, bahˬ keuˆ kʼoeˇ taˆ jaˆ-eu jeˬluˇbeˬ[2] mawˇ kawˇ kʼoeˇ taˆ, aˬ yawꞈ-euˬ nuiˇ mahˬ jaˆ-eu meh.

³Gawˬ duˇ kʼoeˇ taˆ tsoˆ taˬ-euˬ Aˬbiˇnaˬdehˇ-euˬ nymˇ-ahˇ jaˆ-eu bahˬ keuˆ kʼoeˇ aˬ yawꞈ maꞈ baꞈ ka leꞈ-awˇ, laˆ lawˬ yaw shuiꞈ kʼoeˇ taˆ baꞈ daˆ taˬ-euˬ meh. Aˬbiˇnaˬdehˇ-euˬ aˬ li Awˇzah hawˇ-eu Aˬhiˇoˬ aˬ nyaꞈ nmˇ-ahˇ laˆ lawˬ bi teh-euˬ meh.

⁴Aˬhiˇoˬ gʼaˬ Dawˬ ma saˇ jaˇ Bahˬ keuˆ tawˬ luꞈ-eu laˆ lawˬ mehˬ hu cah-euˬ meh.

⁵Daˬbiˇ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, gʼaˬ kʼaˇ jaˆ-eu shaˇ-awˇ gaˇ nyeh nyeh nyeh-ehˇ caˇ-eu laꞈ kʼoeˇ, Sahˬpaˬ Miˬyehˇ-ahˇ ciˬ huiˬ ciˬ mahˇ nehˬ-euˬ meh. Aˬ yawꞈ maꞈ tahˬ diˬ, boe loe diˬ, cehˇ lehˇ ciˆ-awˇ, deuˇ-mˬ yaw huiˬ yaw nyiˇ gʼawˬ mya jeˬ diˬ-euˬ meh.

⁶Naˬkoˬ-euˬ cehˇ diˬ duˬ-ahˇ aˬ yawꞈ maꞈ oe keuˆ ngeh jawˇ, mawˇ neˇ sahˬ tiꞈ tiꞈ-euˬ miˇ neh, Awˇzah aˬ laꞈ cawˬ ja-awˇ, Dawˬ ma saˇ jaˇ Bahˬ keuˆ-ahˇ ya nyehꞈ tehˬ-euˬ meh.

⁷Sahˬpaˬ Miˬyehˇ pyeuꞈ-eu Miˬyehˇ tiˬ poˆ tehꞈ-ehˇ nui ma pehˇ laˇ-awˇ, Awˇzah-ahˇ bi shiˇ-euˬ meh. Aˬ jeˬ miˇ neh ehˇ naˇ, maˬ toeˬ ciˆ kʼmˬ-eu jeˬ-ahˇ aˬ yawꞈ toeˬ ciˆ-euˬ meh. Awˇzah-aˬ, Dawˬ ma saˇ jaˇ Bahˬ keuˆ dawˬ peh shiˇ taˬ-awˇ ga-eu meh.

⁸Kʼoeˇ ngeh neh naˇ, jawˇ duˬ kʼoeˇ tsahˇ-ahˇ, PaˬyehˆAwˇzah[3], lehˇ kuˇ-euˬ meh. Sahˬpaˬ Miˬyehˇ neh Awˇzah-ahˇ kʼoeˇ loꞈ-ehˇ kʼehˬ nehˬ-euˬ miˇ neh, Daˬbiˇ nui ma maˬ saˇ-a.

⁹Kʼoeˇ naˇ, Sahˬpaˬ Miˬyehˇ-ahˇ Daˬbiˇ guˆ-awˇ, “Nymˬ-mˇ poˆ jawˇ-aˬ, aˬ joˆ-ehˇ jahˇ-awˇ Dawˬ ma saˇ jaˇ Bahˬ keuˆ heu hmˬ ngaˇ baꞈ gʼeh paˬ nga” lehˇ ehˇ-eu meh.

¹⁰Kʼoeˇ miˇ neh, Dawˬ ma saˇ jaˇ Bahˬ keuˆ-ahˇ Yeˬluˇsaˬlehˬ meuˬ-ahˇ maˬ paˇ baꞈ kʼoꞈ gʼeh ma lehˇ aˬ yawꞈ noeˬ tsehˆ-awˇ, Gaˬdaˇ meuˬ-ahˇ jawˇ-eu AwˇbehˆEˬdoˬ-euˬ nymˇ-ahˇ baꞈ taˬ-iˇ-euˬ meh.

¹¹Dawˬ ma saˇ jaˇ Bahˬ keuˆ kʼoeˇ, kʼoeˇ gaˇ ba la smˇ siˬ byah ni jaˆ-awˇ, AwˇbehˆEˬdoˬ hawˇ-eu aˬ yawꞈ-euˬ nymˇ jiˇ-ahˇ Sahˬpaˬ Miˬyehˇ guiˬ lahˬ biꞈ nehˬ-euˬ meh.

¹²Dawˬ ma saˇ jaˇ Bahˬ keuˆ baˬ da neh, AwˇbehˆEˬdoˬ-euˬ nymˇ jiˇ hawˇ-eu aˬ yawꞈ kʼaˇjaˆ-eu yawˬ jeˬ na luꞈ kʼoeˇ taˆ Sahˬpaˬ Miˬyehˇ guiˬ lahˬ biꞈ nehˬ-euˬ gaˇ kawˆ-ahˇ, sahˬ paˬ Daˬbiˇ ya gaˬ ngeh, AwˇbehˆEˬdoˬ-euˬ nymˇ-ahˇ jaˆ-eu Dawˬ ma saˇ jaˇ Bahˬ keuˆ baꞈ laˬ-iˇ-awˇ, bawˬ-iˬ gʼeh-eu laꞈ kʼoeˇ, Yeˬluˇsaˬlehˬ meuˬ-ahˇ baꞈ kʼoꞈ gʼeh-euˬ meh.

¹³Dawˬ ma saˇ jaˇ Bahˬ keuˆ baꞈ luꞈ-eu deuˬ kuiˇ toꞈ koꞈ toꞈ kʼaˇ ciˬ ngeh, aˬ yawꞈ maꞈ-ahˇ Daˬbiˇ bi naˬ tawˬ-awˇ, mawˇ neˇ mawˇ gaw tiˬ mawˇ hawˇ-eu tsuˇ dui dui-eu mawˇ neˇ mawˇ kʼaˇ tiˬ mawˇ, Sahˬpaˬ Miˬyehˇ-ahˇ aˬ yawꞈ lawˇ nehˬ-euˬ meh.

¹⁴Daˬbiˇ-aˬ, joꞈ-ahˇ keuˆ ni tehꞈ-ehˇ guꞈ taˬ-euˬ shawˇ jehˆ ni gʼeh-eu saˬ paˇ mehˬ tsoeˬ dm-awˇ, gʼaˬ kʼaˇ jaˆ-eu shaˇ-awˇ gaˇ nyeh nyeh-eu laꞈ kʼoeˇ, Sahˬpaˬ Miˬyehˇ-ahˇ ciˬ huiˬ ciˬ mahˇ-euˬ meh.

¹⁵Kʼoeˇ loꞈ-ehˇ, Daˬbiˇ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ laˬ kʼaˬ cehˇ-eu laꞈ kʼoeˇ, daˇ heh baw-awˇ guˇ guˇ-ehˇ, Dawˬ ma saˇ jaˇBahˬ keuˆ kʼoeˇ Yeˬluˇsaˬlehˬ meuˬ-ahˇ baꞈ gʼeh-euˬ meh.

¹⁶Dawˬ ma saˇ jaˇ Bahˬ keuˆ meuˬ laꞈ kʼoeˇ baꞈ uˇ keuˆ laꞈ gaˇ, Sawˇluˆ-euˬ aˬ buˇ Miˇkaˬlaˇ gʼaˬ laˇ gʼoˆ gʼoˆ zaˬ-ahˇ neh haw ka gʼeh ngeh, Sahˬpaˬ Miˬyehˇ-euˬ mehˬ shi Daˬbiˇ gaˇ nyeh nyeh nyeh-ehˇ tsawˬ luꞈ gaˇ ya mawˇ-awˇ, Daˬbiˇ-ahˇ nui daˆ daˆ-euˬ meh.

¹⁷Dawˬ ma saˇ jaˇ Bahˬ keuˆ kʼoeˇ aˬ yawꞈ maꞈ baꞈ ahˇ laꞈ-awˇ, Bahˬ keuˆ kʼoeˇ bi baꞈ taˬ-eu lehˇ Daˬbiˇ neh tsoˆ taˬ-euˬ sehˬ gʼawˆ-ahˇ baꞈ taˬ-euˬ meh. Kʼoeˇ naˇ, miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ Sahˬpaˬ Miˬyehˇ-ahˇ Daˬbiˇ lawˇ nehˬ-euˬ meh.

¹⁸Aˬ yawꞈ lawˇ gʼaˬ shehˇ gʼaˬ ngeh, Sahˬpaˬ Miˬyehˇ-euˬ tsawˇ myahˇ uˬ moˆ, tsawˇ haˬ aˇ maꞈ-ahˇ dawˬ ngehˬ gʼeh nehˬ-euˬ meh.

¹⁹Kʼoeˇ naˇ, tsawˇ haˬ dawˬ tawˆ luꞈ-ahˇ aˬ yawꞈ dzaˬ dzaˬ dawˇ dawˇ biˇ nehˬ-euˬ meh. Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu kʼaˬ dzeˇ zaˬ hawˇ-eu zaˬ miˬ zaˬ yawˬ gʼaˬ na luꞈ-ahˇ, tiˬ gʼaˬ-ahˇ kaˬ muˇ tiˬ siˬ, tehˬ ba jaꞈ-euˬ shaˬ jiˇ tiˬ jehꞈ hawˇ-eu, lawꞈ koˆ taˬ-euˬ aˬ gaꞈ aˇ siˬ ui cuiˆ biꞈ nehˬ-euˬ meh. Kʼoeˇ naˇ, yawˬ gʼaˬ na luꞈ gʼoꞈ-iˇ jiˇ-euˬ meh.

²⁰Daˬbiˇ aˬ yawꞈ-euˬ miˬ sawˇ zaˬ deuˬ-ahˇ dawˬ ngehˬ gʼeh nehˬ-eu lehˇ iˇ kahˇ gʼoꞈ leˇ ngeh, Miˇkaˬlaˇ doˆ le-awˇ ehˇ-eu, “Iˇsaˬleˬlaˆ sahˬ paˬ iˬ nah kʼahˬ sehˇ jaˆ dui dui ngaˇ. Aˬ yawꞈ-euˬ gaˇ mˇ-eu yaw huiˬ yaw mahˇ deuˬ-euˬ zaˬ miˬ zaˬ zaˬ kʼaˆ deuˬ mehˬ shi tsawˇ uˬ tiˬ gʼaˬ loꞈ-ehˇ teuˆ teuˆ-ehˇ, maˬ gaˇ dui dui ngaˇ.”

²¹Daˬbiˇ ehˇ-eu, “Sahˬpaˬ Miˬyehˇ-euˬ Iˇsaˬleˬlaˆ tsawˇ jeuˬ-ahˇ bi sheuˬ gʼeh-eu gʼaˇ duˬ, nawˬ da hawˇ-eu nawˬ da-euˬ nymˇ jiˇ-ahˇ maˬ tseˇ doˆ ni, ngaˬ-ahˇ tseˇ doˆ-euˬ gʼaˬ pyeuꞈ-eu Sahˬpaˬ Miˬyehˇ-ahˇ, ngaˇ gaˇ nyeh nyeh-awˇ ciˬ huiˬ ciˬ mahˇ nehˬ-euˬ ma. Mehˬ hu paw dehꞈ daˆ leꞈ ngeh kʼawꞈ, ngaˇ gaˇ nyeh nyeh nyeh-ehˇ Sahˬpaˬ Miˬyehˇ-ahˇ ciˬ huiˬ ciˬ mahˇ ma.

²²Kʼoeˇ loꞈ-ehˇ mˇ-eu miˇ neh, heu naˆ maˬ tseˇ daˬ ya ga kʼawꞈ ehˬ-ehˇ ngeuˇ-iˬ. Nawˇ ngaˬ-ahˇ noeˬ teˬ dui dui kʼawꞈ, zaˬ miˬ aˬ buˇ zaˬ guˬ kʼoeˇ deuˬ ngaˬ-ahˇ noeˬ huiˬ meh.”

²³Sawˇluˆ-euˬ aˬ buˇ Miˇkaˬlaˇ-aˬ, ziˇ jiˇ ngeh keuˆ ni zaˬ tiˬ gʼaˬ-iˬ maˬ jawˇ le-a.