Read Akha 1 Sahˬpaˬ 13 Bible Online

1 Sahˬpaˬ 13 - Akha bible

1 Sahˬpaˬ 13

¹Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ-ahˇ, Yuˇdaˆ miˇ kʼahˬ-ahˇ neh Sahˬpaˬ Miˬyehˇ neh pyehˬ gʼeh laꞈ-awˇ, lawˇ-eu shehˇ-eu jeˬ mˇ-eu lehˇ lawˇ duˬ dawˬ peh Yeˬyawˇbamˬ yawꞈ luꞈ gaˇ laˇ keuˆ-euˬ meh.

²Miˬyehˇ gʼaˇ duˬ ngehˬ dah-eu kʼoeˇ gʼaˬ, Sahˬpaˬ Miˬyehˇ neh kʼaˇ kʼehˇ-euˬ loꞈ-ehˇ lawˇ duˬ-ahˇ yaˬ kʼehˇ yaˬ-awˇ ehˇ-eu, “Lawˇ duˬ-oˇ, Lawˇ duˬ-oˇ, Sahˬpaˬ Miˬyehˇ heu loꞈ-ehˇ ehˇ-eu meh. Yawˇshiˆ lehˇ myahˇ-euˬ aˬ li tiˬ li Daˬbiˇ-euˬ nymˇ jiˇ laꞈ kʼoeˇ dehꞈ le tehꞈ-a. Aˬ cawˬ tsawˇ jeuˬ-euˬ lawˇ duˬ-ahˇ gaˇ mˇ-eu piˇ ma geuꞈ-awˇ nawˬ-euˬ kʼoeˇ taˆ lawˇ-eu shehˇ-eu jeˬ mˇ luꞈ-eu tsawˇ haˬ kʼoeˇ deuˬ-ahˇ, nawˬ-euˬ kʼoeˇ taˆ aˬ yawꞈ sehꞈ daˆ-awˇ, tsawˇ haˬ-euˬ shaˬ yoeˬ kʼawꞈ nawˬ-euˬ kʼoeˇ taˆ aˬ yawꞈ dzah puiˆ tehꞈ-a.”

³Miˬyehˇ gʼaˇ duˬ ngehˬ dah-eu kʼoeˇ gʼaˬ paˇ ehˇ-eu, “Lawˇ duˬ heu coˬ pyaˆ-awˇ, lawˇ duˬ kʼoeˇ taˆ jaˆ-eu kʼaˬ lehˇ deuˬ ga kʼaˇ jiˇ tehꞈ-a. Kʼoeˇ ngeh, ngaˬ-ahˇ gʼoe-awˇ Sahˬpaˬ Miˬyehˇ dawˬ ngehˬ-eu gaˇ kawˆ naw maꞈ yaw muiˬ paˬ-ehˇ ya siˬ duˬ tehꞈ-a.”

⁴Dawˬ kʼoeˇ deuˬ-ahˇ sahˬ paˬ Yeˬyawˇbamˬ ya gaˬ ngeh, Miˬyehˇ gʼaˇ duˬ ngehˬ dah-eu kʼoeˇ gʼaˬ-ahˇ laꞈ noeˇ toeˬ-awˇ, “Tsawˇ haˬ heu gʼaˬ-ahˇ nyehꞈ-awˬ” lehˇ dawˬ biꞈ-euˬ meh. Kʼoeˇ ngeh, ja pyuˬ ni sahˬ paˬ-euˬ aˬ laꞈ laꞈ shiˇ shiˇ-iˇ-awˇ, maˬ cawˬ kʼoꞈ nya ni pyeuꞈ-iˇ-euˬ meh.

⁵Miˬyehˇ gʼaˇ duˬ ngehˬ dah-eu kʼoeˇ gʼaˬ neh Sahˬpaˬ Miˬyehˇ-euˬ tsawˇ myahˇ uˬ moˆ ehˇ taˬ-euˬ loꞈ-ehˇ, lawˇ duˬ kʼoeˇ hmˬ coˬ pyaˆ-awˇ, kʼaˬ lehˇ kʼoeˇ deuˬ miˇ tsa ga kʼaˇ jiˇ-euˬ meh.

⁶Kʼoeˇ ngeh, “Ngaˬ-euˬ aˬ laꞈ taˬ leˇ ni, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ guiˬ lahˬ shaˇ nehˬ laꞈ-awˬ” lehˇ, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ gʼaˬ-ahˇ sahˬ paˬ Yeˬyawˇbamˬ ehˇ nehˬ-euˬ meh. Miˬyehˇ gʼaˇ duˬ ngehˬ dah-eu kʼoeˇ gʼaˬ Sahˬpaˬ Miˬyehˇ-ahˇ guiˬ lahˬ shaˇ ngeh, sahˬ paˬ-euˬ aˬ laꞈ taˬ leˇ-euˬ meh.

⁷Kʼoeˇ naˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ-ahˇ, “Ngaˬ nehˬ-ehˇ ngaˬ-euˬ nymˇ-ahˇ laˇ-awˇ, tiˬ jeˬ paˬ dzaˬ laˇ dawˇ laˇ-awˬ. Nawˬ neh mˇ-euˬ jeˬ gʼaˇ duˬ, ngaˇ nawˬ-ahˇ laꞈ sawˬ biꞈ nehˬ ma” lehˇ, sahˬ paˬ ehˇ nehˬ-euˬ meh.

⁸Miˬyehˇ gʼaˇ duˬ ngehˬ dah-eu kʼoeˇ gʼaˬ sahˬ paˬ-ahˇ ehˇ-eu, “Nawˬ-euˬ pyuˇ shuiˇ myawˬ gahˬ ngaˬ-ahˇ tiˬ paˆ paˆ nehˬ laꞈ kʼawꞈ, ngaˇ nawˬ nehˬ-ehˇ le-awˇ tiˬ jeˬ-iˬ maˬ dzaˬ maˬ dawˇ leˇ.

⁹Nawˬ nehˬ-ehˇ le-awˇ tiˬ jeˬ-iˬ maˬ dzaˬ maˬ dawˇ leˇ ni maˬ ehˇ, ngaˬ neh laˇ-euˬ gaˇ ma caw caw-ehˇ maˬ ya gʼoꞈ-iˇ ni maˬ ehˇ, Sahˬpaˬ Miˬyehˇ neh ngaˬ-ahˇ dawˬ biꞈ taˬ-euˬ meh.”

¹⁰Kʼoeˇ naˇ, aˬ yawꞈ neh laˇ-euˬ gaˇ ma kʼoeˇ kahˇ-ahˇ aˬ yawꞈ maˬ gʼoꞈ-iˇ ni, gaˇ ma yawˬ kahˇ yawˬ-ahˇ gʼoꞈ-iˇ-euˬ meh.

¹¹Aˇ yamˬ kʼoeˇ yamˬ laꞈ kʼoeˇ, Beˬdeˬlaˇ meuˬ-ahˇ Miˬyehˇ gʼaˇ duˬ ngehˬ dah-eu tsawˇ mawˬ tiˬ gʼaˬ jawˇ-eu meh. Yuˇdaˆ miˇ kʼahˬ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ laˇ-awˇ aˬ joˆ-ehˇ mˇ yaꞈ shaˇ yaꞈ-eu gaˇ kawˆ maˬ ehˇ, sahˬ paˬYeˬyawˇbamˬ-ahˇ aˬ joˆ-ehˇ ehˇ nehˬ yaꞈ-euˬ gaˇ kawˆ deuˬ maˬ ehˇ, aˬ yawꞈ-euˬ aˬ li deuˬ aˬ yawꞈ-ahˇ dzawˇ nehˬ leˇ-euˬ meh.

¹²Tsawˇ haˬ kʼoeˇ gʼaˬ gaˇ ma aˬ geu kahˇ-ahˇ gʼoꞈ-iˇ-euˬ gaˇ kawˆ aˬ yawꞈ naˇ haˬ ngeh, aˬ yawꞈ-euˬ aˬ li deuˬ tsawˇ haˬ kʼoeˇ gʼaˬ gʼoꞈ-iˇ-euˬ gaˇ ma toeˬ mehˬ nehˬ-euˬ meh.

¹³“Ngaˬ-euˬ gʼaˇ duˬ mahˬ tahˬ laˆ dziˬ gʼa laˆ dawˆ-awˬ” lehˇ aˬ yawꞈ-euˬ aˬ li deuˬ-ahˇ aˬ yawꞈ ehˇ nehˬ-awˇ, mahˬ dziˬ gʼa bi baꞈ daˆ-awˇ dziˬ leˇ-euˬ meh.

¹⁴Kʼoeˇ naˇ, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ gʼaˬ mehˬ nah aˬ yawꞈ caw teh gʼeh-awˇ, tsuiꞈ kaˆ aˇ bawˇ dawˬ pehˬ-ahˇ nuiˇ luꞈ gaˇ ya mawˇ-euˬ meh. “Yuˇdaˆ miˇ kʼahˬ-ahˇ neh laˇ-euˬ Miˬyehˇ gʼaˇ duˬ ngehˬ dah-eu kʼoeˇ gʼaˬ nawˇ ma loˇ” lehˇ naˇ haˬ ngeh, “Ngeuˇ ma” lehˇ ehˇ-eu meh.

¹⁵“Ngaˬ-euˬ nymˇ-ahˇ hawˬ tiˬ byawˇ dzaˬ taꞈ laˇ-awˬ” lehˇ aˬ yawꞈ ehˇ nehˬ-euˬ meh.

¹⁶Ehˇ kʼawꞈ, Yuˇdaˆ miˇ kʼahˬ-ahˇ jawˇ-eu Miˬyehˇ gʼaˇ duˬ ngehˬ dah-eu kʼoeˇ gʼaˬ ehˇ-eu, “Nawˬ nehˬ-ehˇ nawˬ-euˬ nymˇ-ahˇ ngaˇ maˬ le nya-a. Nawˬ nehˬ-ehˇ ngaˇ heu gaˇ tiˬ jeˬ-iˬ maˬ dzaˬ maˬ dawˇ taꞈ nya-a.

¹⁷Aˬ jeˬ miˇ neh ehˇ naˇ, tiˬ jeˬ-iˬ maˬ dzaˬ maˬ dawˇ-eu gʼaˇ duˬ maˬ ehˇ, ngaˬ neh laˇ-euˬ gaˇ ma kʼoeˇ kahˇ caw caw-ehˇ maˬ ya gʼoꞈ-iˇ-euˬ gʼaˇ duˬ maˬ ehˇ, Sahˬpaˬ Miˬyehˇ neh ngaˬ-ahˇ dawˬ biꞈ taˬ-euˬ jaˆ-eu meh.”

¹⁸Beˬdeˬlaˇ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ gʼaˬ ehˇ-eu, , “Ngaˇ kʼawꞈ, nawˇ loꞈ-ehˇ Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ ma. Mˬ taˆ gʼaˬ kʼehˇ tiˬ gʼaˬ-ahˇ Sahˬpaˬ Miˬyehˇ kʼehˇ gʼeh leꞈ-awˇ, nawˬ-ahˇ sheuˬ kʼoꞈ laˬ-iˇ-awˇ bi dzaˬ bi dawˇ-awˬ lehˇ ehˇ le-euˬ meh.” Maˇ maˇ ni ehˇ naˇ, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ gʼaˬ jaˬ myawꞈ myawꞈ luꞈ-eu meh.

¹⁹Yuˇdaˆ miˇ kʼahˬ-ahˇ jawˇ-eu Miˬyehˇ gʼaˇ duˬ ngehˬ dah-eu kʼoeˇ gʼaˬ, Miˬyehˇ gʼaˇ duˬ ngehˬ dah-eu tsawˇ mawˬ kʼoeˇ gʼaˬ mehˬ nah caw teh leˇ-awˇ, hawˬ tiˬ byawˇ dzaˬ taꞈ leˇ-euˬ meh.

²⁰Aˬ yawꞈ maꞈ hawˬ jeh-ahˇ jawˬ leˇ ngeh, Miˬyehˇ gʼaˇ duˬ ngehˬ dah-eu tsawˇ mawˬ kʼoeˇ gʼaˬ jawˇ gaˇ Sahˬpaˬ Miˬyehˇ-euˬ dawˬ keuˆ le-euˬ meh.

²¹Yuˇdaˆ miˇ kʼahˬ-ahˇ neh laˇ-euˬ Miˬyehˇ gʼaˇ duˬ ngehˬ dah-eu gʼaˬ-ahˇ aˬ yawꞈ guˇ-awˇ ehˇ-eu, “Sahˬpaˬ Miˬyehˇ-euˬ ehˇ dawˬ-ahˇ nawˇ maˬ naˇ haˬ-ehˇ, aˬ yawꞈ neh bi mˇ-euˬ loꞈ-ehˇ maˬ mˇ-a lehˇ Sahˬpaˬ Miˬyehˇ ehˇ luꞈ meh.

²²Aˬ yawꞈ neh taˬ dzaˬ taˬ dawˇ lehˇ ehˇ taˬ-euˬ jawˇ duˬ-ahˇ nawˇ paˇ gʼoꞈ poˆ laˇ-awˇ, hawˬ tiˬ byawˇ dzaˬ laˇ-euˬ meh. Kʼoeˇ baˬ da neh nawˇ ya shiˇ tehꞈ-a. Ehˇ kʼawꞈ, nawˬ-euˬ aˬ poeˬ aˬ bawˇ deuˬ-euˬ lmˬ bymˇ-ahˇ nawˬ-ahˇ maˬ baꞈ pahˬ nehˬ-aˇ.”

²³Aˬ yawꞈ maꞈ dzaˬ gʼaˬ dawˇ gʼaˬ ngeh, Miˬyehˇ gʼaˇ duˬ ngehˬ dah-eu tsawˇ mawˬ kʼoeˇ gʼaˬ neh, Yuˇdaˆ miˇ kʼahˬ-ahˇ neh laˇ-euˬ Miˬyehˇ gʼaˇ duˬ ngehˬ dah-eu gʼaˬ gʼaˇ duˬ, mahˬ tahˬ laˆ dziˬ gʼa laˆ dawˆ nehˬ-euˬ meh.

²⁴Aˬ yawꞈ mahˬ tahˬ laˆ dziˬ-awˇ gʼoꞈ-iˇ luꞈ ngeh, aˇ laˬ jaˬ shiˇ tiˬ mawˇ tahˬ puˬ-awˇ bi kawꞈ sehꞈ-euˬ meh. Gaˇ ma-ahˇ aˬ yawꞈ yaw shiˇ-ehˇ ga-awˇ, mahˬ tahˬ laˆ hawˇ-eu aˇ laˬ jaˬ shiˇ kʼoeˇ mawˇ aˬ yawꞈ dawˬ peh yawꞈ luꞈ-eu meh.

²⁵Aˬ yawꞈ gʼaˬ yaw shiˇ-ehˇ ga-awˇ, aˬ yawꞈ dawˬ peh aˇ laˬ jaˬ shiˇ yawꞈ luꞈ gaˇ iˇ tsehˆ laˇ tsehˆ-eu tsawˇ haˬ deuˬ ya mawˇ-awˇ, Beˬdeˬlaˇ meuˬ-ahˇ le-awˇ, aˬ yawꞈ maꞈ neh kʼaˇ ya mawˇ-euˬ loꞈ-ehˇ dzawˇ nehˬ leˇ-euˬ meh.

²⁶Miˬyehˇ gʼaˇ duˬ ngehˬ dah-eu tsawˇ mawˬ kʼoeˇ gʼaˬ gaˇ kawˆ kʼoeˇ ya gaˬ ngeh, heu loꞈ-ehˇ ehˇ nehˬ-euˬ meh. “Tsawˇ haˬ kʼoeˇ gʼaˬ-aˬ, Sahˬpaˬ Miˬyehˇ-euˬ ehˇ dawˬ maˬ naˇ haˬ-eu Miˬyehˇ gʼaˇ duˬ ngehˬ dah-eu gʼaˬ meh. Kʼoeˇ miˇ neh, Sahˬpaˬ Miˬyehˇ neh ehˇ taˬ-euˬ loꞈ-ehˇ, aˇ laˬ jaˬ shiˇ pyehˬ gʼeh leꞈ-awˇ aˬ yawꞈ-ahˇ bi kawꞈ sehꞈ-euˬ meh.”

²⁷Kʼoeˇ naˇ, “Ngaˬ-euˬ gʼaˇ duˬ mahˬ tahˬ laˆ dziˬ gʼa laˆ dawˆ sheˇ” lehˇ aˬ yawꞈ-euˬ aˬ li deuˬ-ahˇ aˬ yawꞈ ehˇ nehˬ ngeh, mahˬ tahˬ laˆ dziˬ gʼa laˆ dawˆ nehˬ-euˬ meh.

²⁸Aˬ yawꞈ iˇ haw ngeh, Miˬyehˇ gʼaˇ duˬ ngehˬ dah-eu kʼoeˇ gʼaˬ gaˇ ma-ahˇ ga-awˇ, mahˬ tahˬ laˆ hawˇ-eu aˇ laˬ jaˬ shiˇ kʼoeˇ mawˇ aˬ yawꞈ dawˬ peh yawꞈ luꞈ gaˇ ya mawˇ-euˬ meh. Aˇ laˬ jaˬ shiˇ kʼoeˇ mawˇ tsawˇ haˬ kʼoeˇ gʼaˬ-euˬ shaˬ jiˇ maˬ dzaˬ-ehˇ, mahˬ tahˬ laˆ kʼoeˇ mawˇ-ahˇ kʼawꞈ maˬ kawꞈ ni jawˇ-eu meh.

²⁹Miˬyehˇ gʼaˇ duˬ ngehˬ dah-eu tsawˇ mawˬ kʼoeˇ gʼaˬ, shiˇ taˬ-euˬ tsawˇ haˬ kʼoeˇ gʼaˬ-ahˇ mahˬ tahˬ laˆ kʼoeˇ taˆ baꞈ daˆ-awˇ, tawˬ kʼoꞈ gʼeh-euˬ meh.

³⁰Tsawˇ haˬ kʼoeˇ gʼaˬ-ahˇ aˬ yawꞈ pehˬ-euˬ lmˬ bymˇ-ahˇ baꞈ pahˬ nehˬ-awˇ, aˬ yawꞈ hawˇ-eu aˬ yawꞈ-euˬ aˬ li deuˬ “Mehˇ nmˇ-oˇ” lehˇ kuˇ kuˇ-ehˇ tsawˇ ngoeˇ ngoeˇ nehˬ-euˬ meh.

³¹Tsawˇ haˬ kʼoeˇ gʼaˬ-ahˇ baꞈ pahˬ gʼaˬ ngeh, aˬ yawꞈ-euˬ aˬ li deuˬ-ahˇ ehˇ nehˬ-eu, “Ngaˇ shiˇ naˇ, lmˬ bymˇ heu tsahˇ-ahˇ aˬ yawꞈ-euˬ gaˇ dzeˇ baꞈ pahˬ nehˬ laꞈ-awˬ.

³²Sahˬpaˬ Miˬyehˇ neh aˬ yawꞈ-ahˇ kʼehˇ-awˇ bi ehˇ-euˬ loꞈ-ehˇ, Beˬdeˬlaˇ meuˬ-ahˇ jaˆ-eu lawˇ duˬ hawˇ-eu, Saˬmaˬliˆ miˇ kʼahˬ doe ni jaˆ-eu uˬ duˬ tahˬ-eu jawˇ duˬ deuˬ-ahˇ taꞈ leˇ-awˇ, aˬ yawꞈ neh kʼaˇ ehˇ taˬ yaꞈ-euˬ loꞈ-ehˇ aˬ diˇ aˬ maˇ pyeuꞈ laˇ tehꞈ-a.”

³³Sahˬ paˬ Yeˬyawˇbamˬ-aˬ, yawˬ ha-euˬ iˬ baˇ-ahˇ maˬ noeˬ poˆ ni, aˬ yawꞈ neh tsoˆ taˬ-euˬ lawˇ duˬ-ahˇ piˇ ma bi geuꞈ-eu gʼaˇ duˬ, tseˇ doˆ paˬ-ehˇ gʼeh-eu tsawˇ haˬ deuˬ-ahˇ maˬ tseˇ doˆ ni, aˬ yawꞈ neh kʼaˇ bi geuꞈ mawꞈ-eu deuˬ-ahˇ tehꞈ-ehˇ tseˇ-awˇ, aˬ yawꞈ kʼaˇ ka nehˬ mawꞈ-eu gʼaˬ-ahˇ piˇ ma ka nehˬ-euˬ meh.

³⁴Aˬ yawꞈ neh mˇ-euˬ iˬ baˇ kʼoeˇ-aˬ, aˬ yawꞈ-euˬ nymˇ jiˇ tsuiꞈ dahˬ ya dahˬ-iˇ-eu gaˇ kawˆ pyeuꞈ-awˇ, miˇ tsaˬ kʼoeˇ taˆ aˬ yawꞈ-euˬ aˇ jeuˬ tiˬ gʼaˬ-iˬ maˬ jawˇ-ehˇ ya shiˇ cuˆ jiˇ gaˇ keuˆ ni bi guˬ dzaˬ leˇ-euˬ iˬ baˇ meh.