Read Akha 1 Sahˬpaˬ 16 Bible Online

1 Sahˬpaˬ 16 - Akha bible

1 Sahˬpaˬ 16

¹Haˬnaˬniˇ-euˬ aˬ li Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Yeˬhuˇ-ahˇ Sahˬpaˬ Miˬyehˇ dawˬ ngehˬ cawˬ-awˇ, Bawˬshaˬ-ahˇ heu loꞈ-ehˇ bi ehˇ nehˬ-euˬ meh.

²“Nawˇ-aˬ, teˬ dui dui-eu tsawˇ haˬ tiˬ gʼaˬ pyeuꞈ kʼawꞈ, nawˬ-ahˇ ngaˇ tseˇ doˆ-awˇ, ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ kʼoeˇ taˆ aˬ yuiꞈ bi geuꞈ-euˬ ma. Ehˇ kʼawꞈ, Yeˬyawˇbamˬ loꞈ-ehˇ nawˇ nymˬ-mˇ iˬ baˇ mˇ-awˇ, ngaˬ-euˬ tsawˇ jeuˬ iˬ baˇ mˇ ni sheuˬ gʼeh-euˬ meh. Aˬ yawꞈ maꞈ-euˬ iˬ baˇ baˬ da neh ngaˇ nui ma pehˇ laˇ taˬ-euˬ ma.

³Kʼoeˇ miˇ neh, Yeˬyawˇbamˬ-ahˇ ngaˬ neh jahˇ nehˬ-euˬ loꞈ-ehˇ, nawˇ hawˇ-eu nawˬ-euˬ miˬ sawˇ zaˬ deuˬ-ahˇ ngaˇ laˆ luˬ laˆ seˇ nehˬ ma.

⁴Meuˬ laꞈ kʼoeˇ kʼaˇ shiˇ-euˬ nawˬ-euˬ nymˇ kʼahˬ zaˬ deuˬ-ahˇ aˬ kuiˬ dzaˬ-awˇ, bawˇ tsahˬ-ahˇ kʼaˇ shiˇ-euˬ nawˬ-euˬ nymˇ kʼahˬ zaˬ deuˬ-ahˇ jeˬ shiˇ kʼaˬ dzeˇ dzaˬ tehꞈ-a.”

⁵Bawˬshaˬ neh nui ma kʼaˬ duˬ ni taˬ-awˇ mˇ-euˬ gaˇ deuˬ hawˇ-eu, aˬ yawꞈ neh kʼaˇ mˇ-euˬ gaˇ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁶Bawˬshaˬ ziˇ jiˇ-awˇ, Teuˇzaˬ meuˬ-ahˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Eˇlahˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

⁷Bawˬshaˬ neh Sahˬpaˬ Miˬyehˇ-ahˇ mˇ lehˬ-euˬ iˬ baˇ baˬ da neh, Bawˬshaˬ hawˇ-eu aˬ yawꞈ-euˬ nymˇ jiˇ-ahˇ Sahˬpaˬ Miˬyehˇ neh ehˇ nehˬ-euˬ dawˬ deuˬ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Yeˬhuˇ neh aˬ yawꞈ-ahˇ tsaꞈ gaˬ nehˬ leˇ-euˬ meh. Aˬ yawꞈ-euˬ mehˬ hu sahˬ paˬ Yeˬyawˇbamˬ neh mˇ dzeuˇ yaꞈ-euˬ loꞈ-ehˇ, yawˬ ha neh mˇ lehˬ shaˇ lehˬ-euˬ iˬ baˇ baˬ da neh tehꞈ-ehˇ Sahˬpaˬ Miˬyehˇ nui ma bi pehˇ-eu maˬ ngeuˇ-ehˇ, Yeˬyawˇbamˬ-euˬ miˬ sawˇ zaˬ dawˬ tawˆ luꞈ-ahˇ aˬ yawꞈ sehꞈ-euˬ baˬ da neh kʼawꞈ, Sahˬpaˬ Miˬyehˇ nui ma pehˇ ni jahˇ-euˬ meh.

⁸Yuˇdaˆ sahˬ paˬ Aˬsaˬ uˆ lahˇ-euˬ nyiˬ tseˇ kʼoꞈ tiˬ kʼoꞈ-ahˇ Bawˬshaˬ-euˬ aˬ li Eˇlahˬ gʼaˬ, Iˇsaˬleˬlaˆ sahˬ paˬ pyeuꞈ laˇ-awˇ, Teuˇzaˬ meuˬ-ahˇ jawˇ-awˇ nyiˬ kʼoꞈ uˆ lahˇ-euˬ meh.

⁹Sahˬ paˬ-euˬ mahˬ laˆ lawˬ tiˬ paˆ paˆ ni-ahˇ haw-eu pyaˆ-eu gʼaˬ bi geuꞈ-euˬ aˬ yawꞈ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Zmˇliˬ-aˬ, ciˬ cuˇ ni aˬ yawꞈ-ahˇ puiˬ-euˬ meh. Tiˬ nah-aˬ, Teuˇzaˬ meuˬ laꞈ kʼoeˇ sahˬ paˬ-euˬ hawˇ nymˇ-ahˇ haw-eu pyaˆ-eu gʼaˬ pyeuꞈ-eu Aˬzaˇ-euˬ nymˇ-ahˇ, Eˇlahˬ dzaˬ yehꞈ dawˇ yehꞈ-awˇ jawˇ-eu meh.

¹⁰Kʼoeˇ ngeh, nymˇ kʼoeˇ nymˇ-ahˇ Zmˇliˬ uˇ leˇ-awˇ, Eˇlahˬ-ahˇ sehꞈ-awˇ, aˬ yawꞈ-euˬ dah zaˇ sahˬ paˬ geuꞈ-euˬ meh. Yuˇdaˆ sahˬ paˬ Aˬsaˬ uˆ lahˇ-eu nyiˬ tseˇ kʼoꞈ tiˬ kʼoꞈ-ahˇ kʼoeˇ loꞈ-ehˇ pyeuꞈ laˇ-euˬ meh.

¹¹Zmˇliˬ sahˬ paˬ pyeuꞈ laˇ-euˬ nehˬ-ehˇ tiˬ poˆ tehꞈ-ehˇ, Bawˬshaˬ-euˬ miˬ sawˇ zaˬ deuˬ dawˬ tawˆ luꞈ-ahˇ aˬ yawꞈ sehꞈ-euˬ meh. Bawˬshaˬ-ahˇ aˬ yuiꞈ aˬ nyiˇ kʼaˇ jawꞈ-eu kʼaˬ dzeˇ zaˬ dawˬ tawˆ luꞈ sehꞈ jiˇ-euˬ meh.

¹²Miˬyehˇ gʼaˇ duˬ ngehˬ dah-eu Yeˬhuˇ-ahˇ gʼoe-awˇ Bawˬshaˬ-ahˇ Sahˬpaˬ Miˬyehˇ neh ehˇ nehˬ taˬ-euˬ loꞈ-ehˇ, Bawˬshaˬ-euˬ miˬ sawˇ zaˬ dawˬ tawˆ luꞈ-ahˇ Zmˇliˬ neh sehꞈ jiˇ-euˬ meh,

¹³Bawˬshaˬ hawˇ-eu Eˇlahˬ aˬ nyaꞈ da zaˬ neh mˇ-euˬ iˬ baˇ baˬ da neh maˬ ehˇ, Iˇsaˬleˬlaˆ miˇ kʼahˬ iˬ baˇ mˇ ni aˬ nyaꞈ da zaˬ neh sheuˬ gʼeh-euˬ baˬ da neh maˬ ehˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ nyaꞈ da zaˬ nui ma laˆ pehˇ-euˬ meh.

¹⁴Eˇlahˬ neh kʼaˇ mˇ kʼaˇ shaˇ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹⁵Yuˇdaˆ sahˬ paˬ Aˬsaˬ uˆ lahˇ-euˬ nyiˬ tseˇ shiꞈ kʼoꞈ tiˬ kʼoꞈ-ahˇ, Zmˇliˬ gʼaˬ Teuˇzaˬ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ-ahˇ shiꞈ nah uˆ lahˇ-euˬ meh. Iˇsaˬleˬlaˆ guiˇ maꞈ deuˬ Piˇliˇtiˆ miˇ kʼahˬ Giˇbeˬdoˬ meuˬ-ahˇ guiˇ deuˆ-iˇ-awˇ, jawˬ lahˇ taˬ-euˬ meh.

¹⁶Zmˇliˬ gʼaˬ sahˬ paˬ-ahˇ puiˬ-awˇ, ciˬ cuˇ ni sehꞈ kʼoeˬ-euˬ gaˇ kawˆ aˬ yawꞈ maꞈ ya gaˬ ngeh, aˬ yawꞈ maꞈ jawˇ luꞈ-eu taˆ laꞈ kʼoeˇ, aˬ yawꞈ maꞈ-euˬ guiˇ maꞈ kʼoeˇ taˆ uˆ lahˇ luꞈ-eu Awˇmaˬliˇ-ahˇ sahˬ paˬ ka nehˬ-euˬ meh.

¹⁷Awˇmaˬliˇ hawˇ-eu aˬ yawꞈ-euˬ guiˇ maꞈ deuˬ Giˇbeˬdoˬ meuˬ-ahˇ byehˇ dzeh yaꞈ-awˇ, Teuˇzaˬ meuˬ-ahˇ jawˬ lahˇ-euˬ meh.

¹⁸Teuˇzaˬ meuˬ aˬ yawꞈ maꞈ-euˬ laꞈ-ahˇ ahˇ leˇ-euˬ gaˇ Zmˇliˬ ya mawˇ ngeh, sahˬ paˬ-euˬ hawˇ nymˇ laꞈ kʼoeˇ lawˆ-ahˇ le uˇ-awˇ, sahˬ paˬ-euˬ hawˇ nymˇ-ahˇ miˬ dzaˬ keuˬ-awˇ, yawˬ haˇ yawˬ ha miˬ dzaˬ dzah puiˆ sehꞈ-euˬ meh.

¹⁹Sahˬpaˬ Miˬyehˇ-ahˇ aˬ yawꞈ mˇ lehˬ-euˬ miˇ neh, kʼoeˇ loꞈ-ehˇ pyeuꞈ laˇ-euˬ meh. Aˬ yawꞈ-euˬ mehˬ hu sahˬ paˬ geuꞈ-awˇ uˆ lahˇ-euˬ gʼaˬ pyeuꞈ-eu Yeˬyawˇbamˬ loꞈ-ehˇ, yawˬ ha iˬ baˇ mˇ-eu laꞈ kʼoeˇ maˬ ehˇ, Iˇsaˬleˬlaˆ miˇ kʼahˬ iˬ baˇ mˇ ni sheuˬ gʼeh-eu laꞈ kʼoeˇ maˬ ehˇ, Sahˬpaˬ Miˬyehˇ nui ma maˬ saˇ-eu jeˬ aˬ yawꞈ mˇ-euˬ meh.

²⁰Zmˇliˬ neh sahˬ paˬ-ahˇ puiˬ-euˬ gaˇ kawˆ ahˇ leˇ-ehˇ, aˬ yawꞈ neh kʼaˇ mˇ kʼaˇ shaˇ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²¹Iˇsaˬleˬlaˆ miˇ kʼahˬ zaˬ deuˬ nyiˬ paˆ paˆ-iˇ-euˬ meh. Tiˬ paˆ-aˬ, Giˇnaˆ-euˬ aˬ li Tiˇbaˬniˇ-ahˇ sahˬ paˬ bi geuꞈ mawꞈ-awˇ, tiˬ paˆ-aˬ, Awˇmaˬliˇ-ahˇ nui ma tsaˬ-euˬ meh.

²²Aˇ saˬ saˬ laˇ ngeh, Awˇmaˬliˇ-ahˇ nui ma tsaˬ-euˬ deuˬ neh gʼaˬ leˇ-euˬ meh. Tiˇbaˬniˇ shiˇ-awˇ, Awˇmaˬliˇ sahˬ paˬ pyeuꞈ laˇ-euˬ meh.

²³Yuˇdaˆ sahˬ paˬ Aˬsaˬ uˆ lahˇ-eu smˬ tseˇ tiꞈ kʼoꞈ tiˬ kʼoꞈ-ahˇ, Awˇmaˬliˇ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, tseˇ nyiꞈ kʼoꞈ uˆ lahˇ-euˬ meh. Yaw beh koꞈ kʼoꞈ laꞈ kʼoeˇ, Teuˇzaˬ meuˬ-ahˇ jawˇ-awˇ uˆ lahˇ-euˬ meh.

²⁴Kʼoeˇ naˇ, Sheˬmeuˬ lehˇ myahˇ-euˬ gʼaˬ-ahˇ pyuˇ maˇ byaˆ koꞈ heˇ byaˆ aˬ yawꞈ biꞈ-awˇ, Saˬmaˬliˆ gawˬ duˇ zeuˇ tsehˆ-euˬ meh. Gawˬ duˇ kʼoeˇ duˇ-ahˇ aˬ yawꞈ laˆ muiˬ-awˇ, meuˬ tiˬ meuˬ teˬ-euˬ meh. Gawˬ duˇ-euˬ yaw sahˇ gʼaˬ pyeuꞈ-eu Sheˬmeuˬ-euˬ tsawˇ myahˇ yuˇ-awˇ, meuˬ kʼoeˇ meuˬ-ahˇ Saˬmaˬliˆ meuˬ lehˇ aˬ yawꞈ myahˇ nehˬ-euˬ meh.

²⁵Awˇmaˬliˇ-aˬ, aˬ yawꞈ-euˬ mehˬ hu uˆ lahˇ yaꞈ-euˬ deuˬ naˆ maˬ tseˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

²⁶Aˬ yawꞈ-euˬ mehˬ hu uˆ lahˇ dzeuˇ yaꞈ-euˬ gʼaˬ pyeuꞈ-eu Yeˬyawˇbamˬ loꞈ-ehˇ, yawˬ ha iˬ baˇ mˇ-euˬ laꞈ kʼoeˇ maˬ ehˇ, Iˇsaˬleˬlaˆ miˇ kʼahˬ iˬ baˇ mˇ ni sheuˬ gʼeh-euˬ laꞈ kʼoeˇ maˬ ehˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ nui ma pehˇ ni aˬ yawꞈ mˇ-euˬ meh.

²⁷Awˇmaˬliˇ neh mˇ pyeuꞈ yaꞈ-euˬ gaˇ deuˬ hawˇ-eu, kʼaˇ mˇ kʼaˇ shaˇ yaꞈ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁸Awˇmaˬliˇ ziˇ jiˇ-awˇ, Saˬmaˬliˆ meuˬ laꞈ kʼoeˇ baꞈ pahˬ nehˬ-euˬ meh. Aˬ yawꞈ-euˬ dah zaˇ, aˬ yawꞈ-euˬ aˬ li Aˬhaˆ sahˬ paˬ geuꞈ-euˬ meh.

²⁹Yuˇdaˆ sahˬ paˬ Aˬsaˬ uˆ lahˇ-euˬ smˬ tseˇ yehꞈ kʼoꞈ tiˬ kʼoꞈ-ahˇ, Awˇmaˬliˇ-euˬ aˬ li Aˬhaˆ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ nyiˬ tseˇ nyiꞈ kʼoꞈ uˆ lahˇ-euˬ meh.

³⁰Aˬ yawˬ-euˬ mehˬ hu uˆ lahˇ yaꞈ-euˬ deuˬ naˆ maˬ tseˇ, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

³¹Sahˬ paˬ Yeˬyawˇbamˬ neh mˇ-euˬ iˬ baˇ naˆ ni tehꞈ-ehˇ aˬ yawꞈ nui kʼahˇ maˬ shiˇ-ehˇ, kʼoeˇ naˆ maˬ tseˇ mˇ dzehˬ-eu laꞈ kʼoeˇ, Siˇdoˬ sahˬ paˬ Eˇdaˬbaˬlaˇ-euˬ aˬ buˇ Yeˬsaˬbeˬlaˇ-ahˇ sheuˬ-awˇ, Baˬlaˇ miˬ yehˇ-ahˇ uˬ duˬ tahˬ-euˬ meh.

³²Saˬmaˬliˆ meuˬ laꞈ kʼoeˇ, Baˬlaˇ miˬ yehˇ gʼaˇ duˬ uˬ duˬ tahˬ nymˇ tiˬ nymˇ aˬ yawꞈ tsoˆ-awˇ, aˬ yawꞈ-ahˇ lawˇ-eu shehˇ-eu gʼaˇ duˬ lawˇ duˬ tiˬ hmˬ gawˬ-awˇ, uˬ duˬ tahˬ nymˇ kʼoeˇ nymˇ laꞈ kʼoeˇ bi jaˆ-euˬ meh.

³³Kʼoeˇ uˬ taꞈ, Aˬsheˇlaˬ miˬ yehˇ ma-euˬ mawˇ kawˇ tiˬ kawˇ aˬ yawꞈ ka tuˇ-euˬ meh. Aˬ yawꞈ-euˬ mehˬ hu uˆ lahˇ dzeuˇ yaꞈ-euˬ Iˇsaˬleˬlaˆ sahˬ paˬ deuˬ naˆ maˬ tseˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ nui ma pehˇ-eu jeˬ aˬ yawꞈ mˇ-euˬ meh.

³⁴Aˬ yawꞈ uˆ lahˇ-euˬ aˇ yamˬ laꞈ kʼoeˇ, Hiˇlaˆ gʼaˬ Yeˬliˇkoˇ meuˬ paˇ tsoˆ muiˬ-euˬ meh. Nuˬ-euˬ aˬ li Yawˇshuˆ-ahˇ gʼoe-awˇ Sahˬpaˬ Miˬyehˇ neh ehˇ taˬ-euˬ loꞈ-ehˇ, Yeˬliˇkoˇ meuˬ-ahˇ Hiˇlaˆ gawˬ dahˬ beh ngeh, aˬ yawꞈ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Aˬbiˇlamˬ shiˇ-awˇ, meuˬ-euˬ lahˇ kʼehˬ laˇ gʼoˆ jahˇ ahˇ ngeh, aˬ yawꞈ-euˬ aˬ li aˬ nyiˇ nyiˇ saˬ gʼaˬ pyeuꞈ-eu Seˬguˇ shiˇ-euˬ meh.