Read Akha 1 Sahˬpaˬ 18 Bible Online

1 Sahˬpaˬ 18 - Akha bible

1 Sahˬpaˬ 18

¹Aˇ kʼoꞈ aˇ la ui cuiˆ myahˇ laˇ-awˇ, uˬ yehˇ maˬ yehˇ le-eu aˇ kʼoꞈ smˇ kʼoꞈ tiˬ kʼoꞈ-ahˇ, “Sahˬ paˬ Aˬhaˆ jawˇ gaˇ nawˇ iˇ-awˇ, nawˬ-euˬ gʼawˇ mawˇ aˬ yawꞈ-ahˇ bi mawˇ-awˬ. Ngaˇ uˬ yehˇ bi yehˇ le ma” lehˇ, Eˇliˇyaˆ-ahˇ Sahˬpaˬ Miˬyehˇ ehˇ nehˬ-euˬ meh.

²Kʼoeˇ ngeh, sahˬ paˬ Aˬhaˆ jawˇ gaˇ iˇ-eu lehˇ Eˇliˇyaˆ doˆ-iˇ-euˬ meh. Aˇ yamˬ kʼoeˇ yamˬ-ahˇ, Saˬmaˬliˆ meuˬ laꞈ kʼoeˇ mehꞈ dui shuꞈ dui dui luꞈ-eu meh.

³Kʼoeˇ miˇ neh, sahˬ paˬ-euˬ nymˇ-ahˇ haw-eu pyaˆ-eu gʼaˬ geuꞈ luꞈ-eu Awˇbaˬdiˇ-ahˇ Aˬhaˆ kuˇ-euˬ meh. (Awˇbaˬdiˇ-aˬ, Sahˬpaˬ Miˬyehˇ-ahˇ yaw zeu baw dui dui-awˇ uˬ duˬ tahˬ luꞈ-eu tsawˇ haˬ tiˬ gʼaˬ pyeuꞈ-eu meh.

⁴Sahˬpaˬ Miˬyehˇ gʼaˇ duˬ ngehˬ dah-eu tsawˇ haˬ deuˬ-ahˇ Yeˬsaˬbeˬlaˇ sehꞈ luꞈ ngeh, aˬ yawꞈ maꞈ-euˬ tsawˇ haˬ tiˬ yaˇ gʼaˬ-ahˇ Awˇbaˬdiˇ sheuˬ-awˇ, ngaˬ tseˇ gʼaˬ byah-eu aˇ muˇ nyiˬ muˇ biˇ-awˇ, lo kʼahˬ-ahˇ sheuˬ zaꞈ taˬ-awˇ, dzaˬ dzaˬ dawˇ dawˇ hawˇ-eu iˇ cuꞈ sha nehˬ-euˬ meh.)

⁵Awˇbaˬdiˇ-ahˇ Aˬhaˆ ehˇ nehˬ-eu, “Miˇ kʼahˬ heu kʼahˬ laꞈ kʼoeˇ kʼaˇ jaˆ-eu lawˇ baˬ lawˇ gawˆ dawˬ tawˆ luꞈ-ahˇ aˬ dui iˇ doe-awˇ, mahˬ hawˇ-eu mahˬ shaˆ lawˬ deuˬ maˬ bi shiˇ ni bi dzaˬ-eu gʼaˇ duˬ, yaˇ moꞈ poˆ haw-iˇ kaˇ-euˇ. Aˬ dui-euˬ jeˬ zaˬ heu deuˬ shiˇ gaˇ maˬ keuˆ ni ya dehꞈ dzeuˇ-eu duˇ.”

⁶Aˬ geu gʼaˬ aˬ geu paw cah haw-iˇ-eu gaˇ kawˆ aˬ yawꞈ maꞈ ja tsaˬ-awˇ, tiˬ gʼaˬ tiˬ paw doˆ-iˇ-euˬ meh.

⁷Awˇbaˬdiˇ gaˇ pehˇ iˇ luꞈ ngeh, Eˇliˇyaˆ-ahˇ ja pyuˬ ni ya tahˬ puˬ-euˬ meh. Eˇliˇyaˆ-ahˇ aˬ yawꞈ haw siˬ-awˇ, aˬ yawꞈ-euˬ mehˬ shi awˆ byaˆ-eu laꞈ kʼoeˇ, “Nawˇ aˬ diˇ aˬ maˇ Eˇliˇyaˆ ma loˇ” lehˇ naˇ haˬ-euˬ meh.

⁸Eˇliˇyaˆ ehˇ-eu, “Ngeuˇ ma. Ngaˇ Eˇliˇyaˆ ma. Nawˬ-euˬ sahˬ paˬ jawˇ gaˇ iˇ-awˇ, ngaˇ heu gaˇ jawˇ meh lehˇ ehˇ nehˬ-iˇ-awˬ.”

⁹Awˇbaˬdiˇ ehˇ-eu, “Sahˬ paˬ Aˬhaˆ neh ngaˬ-ahˇ bi sehꞈ-eu jeˬ mˇ paˬ-ehˇ, nawˬ-ahˇ ngaˇ laˆ ca taˬ-euˬ aˬ jeˬ jaˆ ta.

¹⁰Miˇ tsaˬ kʼoeˇ taˆ ngaˬ-euˬ sahˬ paˬ neh nawˬ-ahˇ maˬ poˆ doe-euˬ miˇ kʼahˬ maˬ paˇ jaˆ meh lehˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ mehˬ shi ngaˇ saˇ kiˇ kamˬ-eu ma. Miˇ kʼahˬ tiˬ kʼahˬ na-ahˇ uˆ lahˇ-eu sahˬ paˬ sahˬ ma tiˬ gʼaˬ na, aˬ yawꞈ maꞈ-euˬ miˇ kʼahˬ laꞈ kʼoeˇ nawˇ maˬ jawˇ-a lehˇ kʼaˇ ehˇ gaˬ laˇ ngeh, nawˬ-ahˇ aˬ diˇ aˬ maˇ poˆ mawˇ-euˬ gaˇ kawˆ tsawˇ haˬ kʼoeˇ gʼaˬ-ahˇ Aˬhaˆ bi kamˬ-euˬ meh.

¹¹Nymˬ-mˇ nawˇ ngaˬ-ahˇ kʼehˇ gʼeh-awˇ, nawˇ heu gaˇ jawˇ-eu gaˇ kawˆ aˬ yawꞈ-ahˇ bi ehˇ gaˬ-iˇ mawꞈ-eu nya loˇ.

¹²Ngaˇ iˇ-eu nehˬ-ehˇ, Sahˬpaˬ Miˬyehˇ-euˬ yaw sahˇ nawˬ-ahˇ tiˬ gaˇ paw sheuˬ byoˆ gʼeh naˇ aˬ joˆ-ehˇ jahˇ nmˇ. Nawˇ heu gaˇ jawˇ meh lehˇ Aˬhaˆ-ahˇ ngaˇ ehˇ nehˬ-awˇ, nawˬ-ahˇ aˬ yawꞈ maˬ poˆ mawˇ nya naˇ, aˬ yawꞈ ngaˬ-ahˇ sehꞈ tehꞈ-a. Ngaˇ-aˬ, yaw nyiˇ gʼeh ngeh neh Sahˬpaˬ Miˬyehˇ-ahˇ yaw zeu baw dui dui-eu laꞈ kʼoeˇ, uˬ duˬ tahˬ-euˬ tsawˇ haˬ tiˬ gʼaˬ pyeuꞈ gaˇ noeˬ keuˆ nehˬ laꞈ-awˬ.

¹³Sahˬpaˬ Miˬyehˇ gʼaˇ duˬ ngehˬ dah-eu deuˬ-ahˇ Yeˬsaˬbeˬlaˇ sehꞈ luꞈ ngeh, aˬ yawꞈ maꞈ tiˬ yaˇ gʼaˬ-ahˇ ngaˇ sheuˬ doˆ-awˇ, ngaˬ tseˇ gʼaˬ byah-eu aˇ muˇ nyiˬ muˇ muˇ nehˬ-awˇ, lo kʼahˬ-ahˇ sheuˬ zaꞈ taˬ-euˬ laꞈ kʼoeˇ, dzaˬ dzaˬ dawˇ dawˇ hawˇ-eu iˇ cuꞈ sha nehˬ-euˬ gaˇ kawˆ nawˇ maˬ ya gaˬ-aˬ loˇ.

¹⁴Sahˬ paˬ jawˇ gaˇ iˇ-awˇ, nawˇ heu gaˇ jawˇ-eu gaˇ kawˆ ehˇ nehˬ-iˇ-awˬ lehˇ, nawˇ ngaˬ-ahˇ aˬ joˆ-ehˇ kʼehˇ te. Aˬ yawꞈ ngaˬ-ahˇ sehꞈ tehꞈ-a.”

¹⁵Eˇliˇyaˆ ehˇ-eu, “Iˬ nah ngaˬ-euˬ gʼawˇ mawˇ sahˬ paˬ-euˬ mehˬ shi le mawˇ ma lehˇ, dehꞈ luꞈ-eu Baoˬ huiˬ-eu Sahˬpaˬ Miˬyehˇ mehˬ shi ngaˇ saˇ jaˇ dzaˬ-eu ma.”

¹⁶Kʼoeˇ naˇ, Awˇbaˬdiˇ le-awˇ, sahˬ paˬ Aˬhaˆ-ahˇ tsaꞈ gaˬ leˇ ngeh, Eˇliˇyaˆ jawˇ gaˇ Aˬhaˆ iˇ-euˬ meh.

¹⁷Eˇliˇyaˆ-ahˇ aˬ yawꞈ tahˬ puˬ ngeh, “Iˇsaˬleˬlaˆ miˇ kʼahˬ-ahˇ laˆ suˬ saˬ-eu nawˇ heu gaˇ jawˇ law hawˇ ngaˬ tawˇ laˬ” lehˇ ehˇ nehˬ-euˬ meh.

¹⁸Eˇliˇyaˆ ehˇ-eu, “Ngaˇ-aˬ, laˆ suˬ saˬ-eu tsawˇ haˬ maˬ ngeuˇ. Laˆ suˬ saˬ-eu tsawˇ haˬ-aˬ, nawˇ hawˇ-eu nawˬ da-euˬ nymˇ jiˇ meh. Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ naw maꞈ maˬ naˇ haˬ ni, Baˬlaˇ miˬ yehˇ-euˬ tahˬ pahˬ aˬ ma mawˇ kawˇ-ahˇ naw maꞈ uˬ duˬ tahˬ-euˬ meh.

¹⁹Iˇsaˬleˬlaˆ tsawˇ haˬ dawˬ tawˆ luꞈ-ahˇ, Gaˬlaˬmeˬlaˇ gawˬ jawˬ-ahˇ ngaˇ jawˇ gaˇ laˇ-awˬ lehˇ, nymˬ-mˇ dawˬ biꞈ nehˬ-awˬ. Baˬlaˇ miˬ yehˇ gʼaˇ duˬ ngehˬ dah-eu tsawˇ haˬ oeˬ yaˇ ngaˬ tseˇ gʼaˬ hawˇ-eu, Yeˬsaˬbeˬlaˇ neh bi dzaˬ bi dawˇ-euˬ Aˬsheˇlaˬ miˬ yehˇ ma gʼaˇ duˬ ngehˬ dah-eu tsawˇ haˬ oeˬ yaˇ gʼaˬ kʼawꞈ sheuˬ-awˇ laˇ-awˬ.”

²⁰Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ hawˇ-eu, Baˬlaˇ miˬ yehˇ gʼaˇ duˬ ngehˬ dah-eu deuˬ-ahˇ, “Gaˬlaˬmeˬlaˇ gawˬ jawˬ-ahˇ le uiˬ-awˬ” lehˇ Aˬhaˆ dawˬ biꞈ-euˬ meh.

²¹Tsawˇ haˬ kʼoeˇ deuˬ jawˇ gaˇ Eˇliˇyaˆ le-awˇ, “Naw maꞈ-euˬ nui ma laꞈ kʼoeˇ nyiˬ jeˬ noeˬ noeˬ-ehˇ aˇ myah keuˆ ni jawˇ-eu gʼeh te. Sahˬpaˬ Miˬyehˇ-aˬ, Miˬyehˇ pyeuꞈ-eu meh lehˇ ngeuˇ naˇ, aˬ yawꞈ-ahˇ uˬ duˬ tahˬ-awˬ. Ehˇ kʼawꞈ, Baˬlaˇ miˬ yehˇ-aˬ, Miˬyehˇ pyeuꞈ-eu meh lehˇ ngeuˇ naˇ kʼawꞈ, aˬ yawꞈ-ahˇ uˬ duˬ tahˬ-awˬ” lehˇ ehˇ kʼawꞈ, tsawˇ haˬ kʼoeˇ deuˬ dawˬ tiˬ dawˬ-iˬ maˬ ngehˬ-a.

²²Kʼoeˇ naˇ, Eˇliˇyaˆ ehˇ-eu, “Sahˬpaˬ Miˬyehˇ gʼaˇ duˬ ngehˬ dah-eu deuˬ laꞈ kʼoeˇ, ngaˇ tiˬ gʼaˬ dzeˇ-eu tehꞈ ma. Ehˇ kʼawꞈ, Baˬlaˇ miˬ yehˇ gʼaˇ duˬ ngehˬ dah-eu oeˬ yaˇ ngaˬ tseˇ gʼaˬ jawˇ luꞈ meh.

²³Mawˇ neˇ mawˇ gaw nyiˬ mawˇ tsahˇ laꞈ-awˬ. Baˬlaˇ miˬ yehˇ gʼaˇ duˬ ngehˬ dah-eu deuˬ tiˬ mawˇ bi sehꞈ-awˇ, deuˆ tm-awˇ, miˬ dzaˬ miˬ kawˬ baꞈ bymˇ taˬ-euˬ kʼoeˇ taˆ bi jaˆ-awˬ. Ehˇ kʼawꞈ, miˬ dzaˬ taˬ bi ciˆ doꞈ. Ngaˇ kʼawꞈ, mawˇ neˇ mawˇ gaw yawˬ mawˇ yawˬ sehꞈ-awˇ kʼoeˇ loꞈ-ehˇ jahˇ ma.

²⁴Kʼoeˇ naˇ, Baˬlaˇ miˬ yehˇ gʼaˇ duˬ ngehˬ dah-eu deuˬ, aˬ yawꞈ maꞈ-euˬ miˬ yehˇ-ahˇ guiˬ lahˬ bi shaˇ-awˬ. Ngaˇ-aˬ, Sahˬpaˬ Miˬyehˇ-ahˇ guiˬ lahˬ shaˇ ma. Shaˇ dawˬ-ahˇ naˇ haˬ-awˇ miˬ dzaˬ bi doꞈ laˇ-eu miˬ yehˇ-aˬ, Miˬyehˇ aˬ diˇ aˬ maˇ pyeuꞈ tehꞈ-a.” Kʼoeˇ loꞈ-ehˇ ehˇ ngeh, aˬ yawꞈ neh ehˇ-euˬ tsaˬ meh lehˇ, tsawˇ haˬ dawˬ tawˆ luꞈ guˇ-eu meh.

²⁵Kʼoeˇ naˇ, Baˬlaˇ miˬ yehˇ gʼaˇ duˬ ngehˬ dah-eu deuˬ-ahˇ Eˇliˇyaˆ ehˇ nehˬ-eu, “Naw maꞈ tsawˇ haˬ yaw myaˬ miˇ neh, mawˇ neˇ mawˇ gaw tiˬ mawˇ tsahˇ-awˇ, naw maꞈ jeˬ huˬ lehˬ hmˬ dah-awˇ, naw maꞈ-euˬ miˬ yehˇ-ahˇ guiˬ lahˬ shaˇ-awˬ. Ehˇ kʼawꞈ, miˬ dzaˬ taˬ ciˆ doꞈ.”

²⁶Aˬ yawꞈ maꞈ-ahˇ tsahˇ nehˬ-euˬ mawˇ neˇ mawˇ gaw aˬ yawꞈ maꞈ sehꞈ-awˇ, lehˬ hmˬ dah gʼaˬ ngeh jawˇ, nah loˆ ceh laˇ ngeh keuˆ ni Baˬlaˇ miˬ yehˇ-ahˇ aˬ yawꞈ maꞈ guiˬ lahˬ shaˇ-euˬ meh. “Baˬlaˇ miˬ yehˇ-oˇ, nga maꞈ-euˬ shaˇ dawˬ-ahˇ naˇ haˬ nehˬ laꞈ-awˬ” lehˇ guˇ guˇ-ehˇ, aˬ yawꞈ maꞈ neh gawˬ taˬ-euˬ lawˇ duˬ jawˬ jawˬ-ehˇ aˬ yawꞈ maꞈ gaˇ nyeh nyeh-eu meh. Ehˇ kʼawꞈ, aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-eu gʼaˬ maˬ jawˇ-a.

²⁷Nah loˆ ceh laˇ ngeh jawˇ, aˬ yawꞈ maꞈ-ahˇ Eˇliˇyaˆ naˬ-awˇ ehˇ-eu, “Ui cuiˆ yaw kʼaˆ kʼaˆ-ehˇ guˇ guˇ-ehˇ shaˇ-awˬ tawˇ. Aˬ yawꞈ miˬ yehˇ meh-eˬ. Aˬ yawꞈ tiˬ jeˬ paˬ gaˇ kawˆ shaˇ noeˬ shaˇ noeˬ-ehˇ jawˇ-eu paˬ. Maˬ ngeuˇ naˇ, gʼaˬ naˬ naˬ luꞈ-eu maˬ siˬ. Maˬ ngeuˇ naˇ tiˬ gaˇ paw cah byoˆ gʼeh law hawˇ maˬ siˬ. Maˬ ngeuˇ naˇ, yuꞈ kʼaˆ byoˆ-euˬ miˇ neh, naw maꞈ aˬ yawꞈ-ahˇ yaw kʼaˆ kʼaˆ-ehˇ guˇ noeˬ-eu loˬ-eu paˬ.”

²⁸Kʼoeˇ ngeh, aˬ yawꞈ maꞈ yaw kʼaˆ-ehˇ guˇ guˇ-ehˇ guiˬ lahˬ shaˇ-eu laꞈ kʼoeˇ, aˬ yawꞈ maꞈ-euˬ zahˇ sahˇ kʼoꞈ jaˆ-eu loꞈ-ehˇ, mi cehˇ jiˇ baˆ hawˇ-eu mi cehˇ tawˆ zaˬ yuˇ-awˇ, shiˬ yoeˇ le ngeh keuˆ ni yawˬ ha-euˬ gʼawˇ mawˇ-ahˇ kahˬ-euˬ meh.

²⁹Nah loˆ ceh laˇ ngeh keuˆ ni aˬ yawꞈ maꞈ toˇ toˇ-ehˇ jawˇ-eu kʼawꞈ, aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-eu gʼaˬ maˬ jawˇ-a.

³⁰“Ngaˬ-euˬ dawˬ peh jiˆ laˇ-awˬ” lehˇ, tsawˇ haˬ kʼoeˇ deuˬ-ahˇ Eˇliˇyaˆ ehˇ nehˬ ngeh, tsawˇ haˬ kʼoeˇ deuˬ aˬ yawꞈ jawˇ gaˇ uiˬ leˇ-euˬ meh. Cawˆ-iˇ taˬ-euˬ Sahˬpaˬ Miˬyehˇ-euˬ lawˇ duˬ-ahˇ aˬ yawꞈ laˆ muiˬ-euˬ meh.

³¹Sahˬpaˬ Miˬyehˇ neh Iˇsaˬleˬlaˆ lehˇ myahˇ nehˬ-euˬ Yaˬkoˆ-euˬ aˬ li tseˇ nyiꞈ li-euˬ tsawˇ myahˇ pi luꞈ-eu tsawˇ jeuˬ tseˇ nyiꞈ jeuˬ gʼaˇ duˬ, kʼaˬ lo tseˇ nyiˬ siˬ aˬ yawꞈ yuˇ-euˬ meh.

³²Kʼaˬ lo kʼoeˇ deuˬ yuˇ-awˇ, Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ lawˇ duˬ tiˬ tsahˇ aˬ yawꞈ gawˬ-euˬ meh. Lawˇ duˬ-euˬ jawˬ jawˬ-ehˇ, iˇ cuꞈ iˇ puˬ oeˬ siˬ-ahˇ dahˬ-eu iˇ cuꞈ shehˆ ahˇ kʼaˇ deˇ-eu kʼawˇ lawˬ tiˬ lawˬ, aˬ yawꞈ duˬ caˬ caˬ-euˬ meh.

³³Kʼoeˇ naˇ, lawˇ duˬ kʼoeˇ taˆ aˬ yawꞈ miˬ dzaˬ baꞈ daˆ-awˇ, mawˇ neˇ mawˇ gaw kʼoeˇ mawˇ deuˆ tm deuˆ tm-ehˇ, miˬ dzaˬ kʼoeˇ taˆ baꞈ daˆ taˬ-euˬ meh. “Ciˬ cuˇ oeˬ siˬ-ahˇ iˇ cuꞈ tiˬ byah ni kʼawꞈ ahˇ-awˇ, lawˇ-eu jeˬ hawˇ-eu miˬ dzaˬ kʼoeˇ taˆ shehˆ shehˬ-awˬ” lehˇ aˬ yawꞈ ehˇ ngeh, aˬ yawꞈ maꞈ kʼoeˇ loꞈ-ehˇ jahˇ-euˬ meh.

³⁴“Tiˬ poˆ paˇ shehˆ shehˬ siˬ” lehˇ aˬ yawꞈ ehˇ ngeh, aˬ yawꞈ maꞈ tiˬ poˆ paˇ shehˆ shehˬ-euˬ meh.

³⁵Tiˬ poˆ paˇ shehˆ shehˬ siˬ” lehˇ aˬ yawꞈ paˇ ehˇ ngeh, aˬ yawꞈ maꞈ tiˬ poˆ paˇ shehˆ shehˬ-euˬ meh. Lawˇ duˬ caw caw-ehˇ iˇ cuꞈ yoeˇ ka gʼeh-awˇ, kuˬ kaˬ yoeˇ byah-euˬ meh.

³⁶Nahˇ ma nahˇ dahˬ yawˬ-iˇ-awˇ, lawˇ-eu shehˇ-eu jeˬ mˇ-eu aˇ yamˬ tsaˬ laˇ ngeh, Miˬyehˇ gʼaˇ duˬ ngehˬ dah-eu Eˇliˇyaˆ gʼaˬ lawˇ duˬ dawˬ peh le-awˇ, heu loꞈ-ehˇ guiˬ lahˬ shaˇ-euˬ meh. “Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ-aˬ, Iˇsaˬleˬlaˆ-euˬ Miˬyehˇ pyeuꞈ-awˇ, ngaˇ nawˬ-ahˇ uˬ duˬ tahˬ-awˇ, nawˬ neh kʼaˇ bi mˇ-euˬ loꞈ-ehˇ nymˬ-mˇ ngaˇ mˇ luꞈ-eu gaˇ kawˆ bi siˬ bi mawˇ-awˬ.

³⁷Sahˬpaˬ Miˬyehˇ-oˇ, nawˇ Miˬyehˇ pyeuꞈ-eu gaˇ kawˆ hawˇ-euˬ, aˬ yawꞈ maꞈ nawˇ jawˇ paw gʼoꞈ laˇ ni nawˇ kuˇ kʼoꞈ luꞈ-eu gaˇ kawˆ aˬ yawꞈ maꞈ ya siˬ ni, ngaˬ-euˬ shaˇ dawˬ-ahˇ naˇ haˬ nehˬ laꞈ-awˬ.”

³⁸Kʼoeˇ ngeh, Sahˬpaˬ Miˬyehˇ miˬ dzaˬ pyehˬ ka leꞈ-awˇ, lawˇ-euˬ jeˬ-ahˇ maˬ ehˇ, miˬ dzaˬ miˬ kawˬ-ahˇ maˬ ehˇ, kʼaˬ lo-ahˇ maˬ ehˇ, miˇ tsaˬ-ahˇ maˬ ehˇ, doꞈ leˇ-awˇ, kʼawˇ lawˬ duˬ caˬ taˬ-euˬ gaˇ dahˬ-eu iˇ cuꞈ gui-iˇ-euˬ meh.

³⁹Kʼoeˇ loꞈ-ehˇ pyeuꞈ laˇ-euˬ gaˇ tsawˇ haˬ kʼoeˇ deuˬ ya mawˇ ngeh, aˬ yawꞈ maꞈ miˇ tsa coˬ lah coˬ lah-ehˇ, “Sahˬpaˬ Miˬyehˇ-aˬ, Miˬyehˇ pyeuꞈ-eu meh. Sahˬpaˬ Miˬyehˇ tiˬ gʼaˬ tehꞈ-ehˇ Miˬyehˇ pyeuꞈ-eu meh” lehˇ guˇ-eu meh.

⁴⁰Tsawˇ haˬ kʼoeˇ deuˬ-ahˇ Eˇliˇyaˆ dawˬ biꞈ-awˇ, “Baˬlaˇ miˬ yehˇ gʼaˇ duˬ ngehˬ dah-eu deuˬ tiˬ gʼaˬ-iˬ maˬ bi dzeuˇ-iˇ ni nyehꞈ jiˇ-awˬ” lehˇ ehˇ nehˬ-euˬ meh. Aˬ yawꞈ maꞈ dawˬ tawˆ luꞈ tsawˇ haˬ kʼoeˇ deuˬ neh bi nyehꞈ jiˇ-awˇ, Eˇliˇyaˆ neh aˬ yawꞈ maꞈ-ahˇ Giˇshoˬ lawˇ gawˆ paw sheuˬ ka gʼeh-awˇ sehꞈ-euˬ meh.

⁴¹Kʼoeˇ naˇ, “Nymˬ-mˇ nawˇ iˇ-awˇ dzaˬ-iˇ dawˇ-iˇ-awˬ. Uˬ yehˇ yehˇ le-eu lehˇ uˬ jeˬ jeˬ-eu teˇ saˇ ngaˬ-ahˇ gaˬ laˇ miˇ-a” lehˇ, sahˬ paˬ Aˬhaˆ-ahˇ Eˇliˇyaˆ ehˇ nehˬ-euˬ meh.

⁴²Aˬhaˆ dzaˬ-eu dawˇ-eu lehˇ doˆ-iˇ ngeh, Gaˬlaˬmeˬlaˇ gawˬ jawˬ uˬ du Eˇliˇyaˆ daˆ leˇ-awˇ, aˬ yawꞈ-euˬ aˬ kuiˇ pawˬ tsuiꞈ yaw kaˬ-ahˇ uˬ duˬ ahˇ leˇ ngeh keuˆ ni miˇ tsa awˆ byaˆ-euˬ meh.

⁴³Kʼoeˇ naˇ, “Iˇ-awˇ iˬ ma laˆ shaˆ paw haw gʼeh-iˬ sheˇ” lehˇ, aˬ yawꞈ-euˬ zaˬ kʼaˆ-ahˇ aˬ yawꞈ ehˇ nehˬ-euˬ meh. Zaˬ kʼaˆ kʼoeˇ gʼaˬ haw-iˇ-awˇ, “Tiˬ jeˬ-iˬ maˬ ya mawˇ-aˬ” lehˇ ehˇ gaˬ laˇ-euˬ meh. Shiꞈ poˆ keuˆ ni, zaˬ kʼaˆ kʼoeˇ gʼaˬ-ahˇ Eˇliˇyaˆ kʼehˇ gʼeh-awˇ bi haw-iˇ-euˬ meh.

⁴⁴Shiꞈ poˆ aˬ yawꞈ poˆ-ahˇ, zaˬ kʼaˆ kʼoeˇ gʼaˬ gʼoꞈ laˇ-awˇ, “Tsawˇ haˬ-euˬ aˬ laꞈ hui ni tehꞈ-ehˇ ahˇ-eu mˬ dmˇ tiˬ hmˬ iˬ ma laˆ shaˆ paw neh laˇ daˆ luꞈ gaˇ ya mawˇ-euˬ ma” lehˇ ehˇ gaˬ laˇ-euˬ meh. Aˬ yawꞈ-euˬ zaˬ kʼaˆ kʼoeˇ gʼaˬ-ahˇ, “Sahˬ paˬ Aˬhaˆ jawˇ gaˇ iˇ-awˇ, uˬ yehˇ maˬ yehˇ le mi naˆ-ehˇ mahˬ laˆ lawˬ dziˬ-awˇ yaw kawˇ-ehˇ gʼoꞈ-iˇ-awˬ lehˇ ehˇ nehˬ-iˇ-awˬ” lehˇ ehˇ nehˬ-euˬ meh.

⁴⁵Aˇ yamˬ tiˬ kʼehˇ laˇ kʼehˬ laꞈ kʼoeˇ, zahˇ tsui ni gʼeh-eu mˬ dmˇ mˬ kʼoeˇ taˆ byah jiˇ-awˇ, jaˬ lehˇ baw-eu laꞈ kʼoeˇ, uˬ yehˇ yehˇ ma yehˇ le-euˬ meh. Sahˬ paˬ Aˬhaˆ-aˬ, aˬ yawꞈ-euˬ mahˬ laˆ lawˬ dziˬ-awˇ, Yeˬsaˬleˬlaˇ meuˬ-ahˇ gʼoꞈ-iˇ-euˬ meh.

⁴⁶Kʼoeˇ ngeh, Sahˬpaˬ Miˬyehˇ-euˬ baoˬ Eˇliˇyaˆ kʼoeˇ taˆ keuˆ le-euˬ meh. Aˬ yawꞈ-euˬ mehˬ tsoeˬ joꞈ-ahˇ yaw muiˬ paˬ-ehˇ dzahˬ ziꞈ-awˇ, Yeˬsaˬleˬlaˇ meuˬ-ahˇ le-eu gaˇ ma kahˇ li, Aˬhaˆ-euˬ mehˬ hu aˬ yawꞈ cehˆ-euˬ meh.