Read Akha 1 Sahˬpaˬ 3 Bible Online

1 Sahˬpaˬ 3 - Akha bible

1 Sahˬpaˬ 3

¹Sawˇlaˬmoˬ-aˬ, Iˇjiˇtuˆ sahˬ paˬ zaˬ miˬ sheuˬ-awˇ, Iˇjiˇtuˆ sahˬ paˬ nehˬ-ehˇ cawˬ cawˬ taꞈ-euˬ meh. Sahˬ paˬ hawˇ nymˇ hawˇ-eu Uˬ duˬ tahˬ nymˇ nymˇ ma maˬ tsoˆ dah-ehˇ, Yeˬluˇsaˬlehˬ meuˬ-euˬ meuˬ meuˬ lahˇ maˬ gawˬ gʼaˬ nmˇ kaˬ, sahˬ paˬ zaˬ miˬ kʼoeˇ gʼaˬ-ahˇ, Daˬbiˇ-euˬ meuˬ laꞈ kʼoeˇ sheuˬ taˬ-awˇ bi jawˇ-euˬ meh.

²Sahˬpaˬ Miˬyehˇ gʼaˇ duˬ Uˬ duˬ tahˬ nymˇ nymˇ ma maˬ tsoˆ dah-euˬ miˇ neh, Iˇsaˬleˬlaˆ tsawˇ haˬ deuˬ lawˇ duˬ gʼawˬ mya tsahˇ-ahˇ lawˇ luꞈ shehˇ luꞈ-eu meh.

³Sawˇlaˬmoˬ-aˬ, Sahˬpaˬ Miˬyehˇ-ahˇ gaˬ-eu laꞈ kʼoeˇ, aˬ yawꞈ aˬ da Daˬbiˇ neh mehˬ nehˬ tsoˆ nehˬ yaꞈ-euˬ loꞈ-ehˇ dehꞈ-euˬ meh. Ehˇ kʼawꞈ, aˬ yawꞈ-euˬ gʼawˇ mawˇ kʼawꞈ, jeˬ zaˬ gʼawˬ mya mawˇ sehꞈ-awˇ, jawˇ duˬ gʼawˬ mya tsahˇ laꞈ kʼoeˇ lawˇ-eu shehˇ-eu jeˬ mˇ-euˬ meh.

⁴Tiˬ poˆ-aˬ, Giˇbyoˬ meuˬ-ahˇ aˬ yawꞈ le-awˇ, lawˇ-eu shehˇ-eu jeˬ mˇ leˇ-euˬ meh. Aˬ jeˬ miˇ neh ehˇ naˇ, aˬ cawˬ naˆ maˬ tseˇ tsawˇ myahˇ doˆ dzehˬ-eu lawˇ duˬ-aˬ, kʼoeˇ gaˇ jaˆ-eu meh. Aˬ yawꞈ jeˬ zaˬ aˇ yaˇ mawˇ sehꞈ-awˇ, miˬ dzaˬ dzah puiˆ-awˇ lawˇ-eu jeˬ lawˇ nehˬ-euˬ meh.

⁵Kʼoeˇ ngeh miˇ aˬ yawꞈ yuꞈ maˆ maˆ-eu laꞈ kʼoeˇ, Sahˬpaˬ Miˬyehˇ aˬ yawꞈ jawˇ gaˇ doˆ le-awˇ, “Nawˇ ngaˬ-ahˇ aˬ geu jeˬ shaˇ mawꞈ te” lehˇ ehˇ le-euˬ meh.

⁶Kʼoeˇ ngeh, Sawˇlaˬmoˬ heu loꞈ-ehˇ shaˇ-euˬ meh, “Nawˇ-aˬ, nawˬ-euˬ zaˬ kʼaˆ pyeuꞈ-eu ngaˬ da Daˬbiˇ-ahˇ, huiˬ dui dui-eu nawˬ-euˬ gʼoeˇ-eu gaˬ-euˬ jeˬ aˬ myah luꞈ bi mawˇ-awˇ, aˬ yawꞈ kʼawꞈ, yaw tsaˬ yaw dawˇ jeˬ hawˇ-eu saˇ jaˇ ziꞈ-eu jeˬ laꞈ kʼoeˇ, nawˬ nehˬ-ehˇ cawˬ cawˬ taꞈ-euˬ meh. Nawˬ-euˬ huiˬ dui dui-eu gʼoeˇ-eu gaˬ-euˬ jeˬ aˬ yawꞈ-ahˇ maˬ tsehˆ leˇ ni bi mawˇ-eu laꞈ kʼoeˇ, iˬ nah aˬ yawꞈ-euˬ dah zaˇ miˇ kʼahˬ-ahˇ bi uˆ lahˇ-eu aˬ li tiˬ li, aˬ yawꞈ-ahˇ nawˇ biꞈ nehˬ-euˬ meh.

⁷Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ zaˬ guˬ pyeuꞈ-eu miˇ neh, miˇ kʼahˬ-ahˇ aˬ joˆ-ehˇ ya uˆ lahˇ-eu gaˇ kawˆ maˬ siˬ nya kʼawꞈ, ngaˬ da-euˬ dah zaˇ nawˇ ngaˬ-ahˇ sahˬ paˬ ka nehˬ laꞈ-euˬ meh.

⁸Nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ nawˬ neh tseˇ doˆ-euˬ tsawˇ jeuˬ pyeuꞈ-eu, myaˬ dui dui-eu tsawˇ haˬ heu deuˬ-euˬ gʼahˇ ceh ngaˇ jawˇ luꞈ-eu ma.

⁹Kʼoeˇ miˇ neh, nawˬ-euˬ tsawˇ jeuˬ kʼoeˇ taˆ yaw tsaˬ yaw dawˇ dawˇ-ehˇ uˆ lahˇ nya ni maˬ ehˇ, yaw muiˬ yaw doeˇ tseˇ paˆ geuꞈ nya ni maˬ ehˇ, loˬ-eu zaˬ siˬ tsawˇ gahˇ ngaˬ-ahˇ biꞈ nehˬ laꞈ-awˬ. Kʼoeˇ loꞈ-ehˇ maˬ ngeuˇ naˇ, myaˬ dui dui-eu nawˬ-euˬ tsawˇ jeuˬ heu jeuˬ-ahˇ aˬ suˇ gʼaˬ uˆ lahˇ nya nmˇ.”

¹⁰Sawˇlaˬmoˬ neh shaˇ-euˬ jeˬ-ahˇ Sahˬpaˬ Miˬyehˇ nui kʼahˇ shiˇ-eu meh.

¹¹Kʼoeˇ miˇ neh, Sawˇlaˬmoˬ-ahˇ aˬ yawꞈ ehˇ nehˬ-eu, “Nawˇ ziˇ baw ziˇ za ni maˬ ehˇ, smˇ muiˬ muiˬ laˇ ni maˬ ehˇ, nawˬ-ahˇ muiˇ-eu deuˬ ya shiˇ ni maˬ ehˇ, nawˇ maˬ shaˇ-ehˇ, yaw tsaˬ yaw dawˇ dawˇ-ehˇ uˆ lahˇ nya-eu zaˬ siˬ tsawˇ gahˇ tehꞈ-ehˇ shaˇ-euˬ meh.

¹²Nawˬ neh kʼaˇ shaˇ-euˬ jeˬ ngaˇ mˇ nehˬ ma. Aˇ hu ba neh tiˬ gʼaˬ-iˬ maˬ za haw-ehˇ, aˬ kaˇ kaˇ ziˇ keuˆ ni tiˬ gʼaˬ-iˬ maˬ paˇ za nya-eu zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu nui gahˇ deuˬ, nawˬ-ahˇ ngaˇ biꞈ ma.

¹³Kʼoeˇ uˬ taꞈ, nawˬ neh maˬ shaˇ-euˬ jeˬ kʼawꞈ, nawˬ-ahˇ ngaˇ biꞈ ma. Nawˬ-euˬ tiˬ ziˇ, sahˬ paˬ nui deuˬ naˆ maˬ tseˇ smˇ muiˬ muiˬ dui dui-awˇ, aˬ cawˬ nawˬ-ahˇ taˬ huiˬ taˬ mahˇ dzehˬ tehꞈ-a.

¹⁴Nawˬ da Daˬbiˇ loꞈ-ehˇ ngaˬ-euˬ zahˇ dawˬ kʼoꞈ dawˬ-ahˇ nawˇ caw teh-awˇ, ngaˬ-euˬ dawˬ-ahˇ nawˇ naˇ haˬ geuꞈ naˇ, ziˇ baw ziˇ za-euˬ guiˬ lahˬ nawˬ-ahˇ ngaˇ biꞈ ma.”

¹⁵Sawˇlaˬmoˬ uˬ noeˬ noeˬ laˇ ngeh, yuꞈ maˆ maˆ-eu laꞈ kʼoeˇ Miˬyehˇ aˬ yawꞈ-ahˇ dawˬ ngehˬ cawˬ le-euˬ gaˇ kawˆ siˬ duˬ-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ aˬ yawꞈ iˇ-awˇ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ mehˬ shi yawꞈ-awˇ, miˬ dzaˬ dzah puiˆ-awˇ lawˇ-eu jeˬ hawˇ-eu cawˬ cawˬ taꞈ-euˬ lawˇ-eu jeˬ, Sahˬpaˬ Miˬyehˇ-ahˇ lawˇ nehˬ-euˬ meh. Kʼoeˇ naˇ, aˬ yawꞈ-euˬ gaˇ mˇ-eu yaw huiˬ yaw mahˇ dawˬ tawˆ luꞈ gʼaˇ duˬ, aˬ yawꞈ bawˬ-iˬ gʼeh nehˬ-euˬ meh.

¹⁶Tiˬ nah keuˆ laˇ ngeh, meh maˬ laˇ nyiˬ gʼaˬ sahˬ paˬ jawˇ gaˇ laˇ-awˇ, aˬ yawꞈ-euˬ mehˬ shi yawꞈ luꞈ-eu meh.

¹⁷Aˬ yawꞈ nyaꞈ laꞈ kʼoeˇ tiˬ gʼaˬ ehˇ-eu, “Sahˬ paˬ-oˇ, zaˬ miˬ zaˬ heu gʼaˬ hawˇ-eu ngaˇ nymˇ tiˬ nymˇ laꞈ kʼoeˇ tiˬ kawˆ loꞈ-ehˇ jawˇ-awˇ, ngaˇ aˬ li tiˬ li ciˬ ngeh, aˬ yawꞈ kʼawꞈ ngaˬ nehˬ-ehˇ jawˇ luꞈ-eu meh.

¹⁸Ngaˇ aˬ nyiˇ ciˬ gʼaˬ-awˇ nyiˬ nah byah laˇ ngeh, aˬ yawꞈ gʼeh aˬ li tiˬ li paˇ ciˬ-euˬ meh. Nymˇ kʼoeˇ nymˇ laꞈ kʼoeˇ aˬ cawˬ tiˬ gʼaˬ-iˬ maˬ jawˇ ni, nga nyaꞈ tehꞈ-ehˇ jawˇ-eu ma.

¹⁹Tiˬ miˇ-aˬ, aˬ yawꞈ yuꞈ zaˇ poˆ laˆ paˇ ngeh, aˬ yawꞈ-euˬ aˬ li-ahˇ kʼawˬ tehˬ sehꞈ-euˬ meh.

²⁰Uˬ ciꞈ sehˇ gʼahˇ ngaˇ yuꞈ kʼaˆ luꞈ ngeh aˬ yawꞈ tuˇ-awˇ, ngaˬ nehˬ-ehˇ bi yuꞈ-euˬ ngaˬ li-ahˇ aˬ yawꞈ-euˬ yuꞈ zaˇ-ahˇ ciˬ ahˇ-euˬ meh. Kʼoeˇ naˇ, aˬ yawꞈ-euˬ aˬ li yaw shiˇ kʼoeˇ gʼaˬ-ahˇ, ngaˬ-euˬ yuꞈ zaˇ-ahˇ ciˬ ahˇ le-euˬ meh.

²¹Uˬ shawˬ paw ngaˇ uˬ noeˬ noeˬ laˇ-awˇ, ngaˬ li-ahˇ aˬ coeˇ bi dawˇ-eu lehˇ gʼeh ngeh, shiˇ taˬ-euˬ gaˇ ya mawˇ-euˬ ma. Yaw muiˬ paˬ-ehˇ haw duˬ ngeh jawˇ, ngaˬ li maˬ ngeuˇ nga lehˇ siˬ duˬ-euˬ ma.”

²²Ehˇ kʼawꞈ, zaˬ miˬ zaˬ yawˬ gʼaˬ yawˬ ehˇ-eu, “Maˬ ngeuˇ-a. Dehꞈ luꞈ-eu gʼaˬ ngaˬ-euˬ zaˬ pyeuꞈ-awˇ, shiˇ-euˬ gʼaˬ nawˬ-euˬ zaˬ meh” . Zaˬ miˬ zaˬ yaw beh gʼaˬ gʼeh, “Maˬ ngeuˇ-a. Dehꞈ luꞈ-eu gʼaˬ ngaˬ-euˬ zaˬ ma. Shiˇ-euˬ gʼaˬ nawˬ-euˬ zaˬ meh” lehˇ ehˇ-awˇ, sahˬ paˬ-euˬ mehˬ shi aˬ yawꞈ nyaꞈ yaw kaˬ tsawˇ pyehˇ pyehˇ-euˬ meh.

²³Kʼoeˇ ngeh, “Naw nyaꞈ nyiˬ gʼaˬ luꞈ, dehꞈ luꞈ-eu gʼaˬ yawˬ ha-euˬ zaˬ ma lehˇ ehˇ-awˇ, shiˇ-euˬ gʼaˬ aˬ cawˬ-euˬ zaˬ meh lehˇ pyehˇ-eu nga tawˇ” lehˇ, sahˬ paˬ Sawˇlaˬmoˬ ehˇ-eu meh.

²⁴Kʼoeˇ naˇ, “Mi cehˇ tiˬ kahˇ yuˇ laꞈ sheˇ” lehˇ aˬ yawꞈ ehˇ ngeh, aˬ yawꞈ jawˇ gaˇ mi cehˇ tiˬ kahˇ yuˇ keuˆ laꞈ-euˬ meh.

²⁵“Aˬ li zaˬ nahˬ heu gʼaˬ-ahˇ nyiˬ kʼoeˆ deuˆ kʼoeˆ-awˇ, tiˬ gʼaˬ-ahˇ tiˬ kʼoeˆ biˇ nehˬ-awˬ” lehˇ aˬ yawꞈ ehˇ-eu meh.

²⁶Kʼoeˇ ngeh, aˬ ma ma maˇ pyeuꞈ-awˇ zaˬ-ahˇ gaˬ-eu nui ma ahˇ-eu gʼaˬ ehˇ-eu, “Sahˬ paˬ-oˇ ngaˬ-ahˇ gʼawˬ shaˬ gaˬ-eu laꞈ kʼoeˇ zaˬ-ahˇ taˬ sehꞈ nehˬ laꞈ. Aˬ yawꞈ-ahˇ biꞈ nehˬ-awˬ.” Ehˇ kʼawꞈ, yaw gʼaˬ yawˬ ehˇ-eu, “Aˬ yawꞈ maˬ ehˇ, ngaˇ maˬ ehˇ, maˬ ya geuꞈ ni, zaˬ teu gʼaˬ-ahˇ nyiˬ kʼoeˆ deuˆ kʼoeˆ-awˬ.”

²⁷Sawˇlaˬmoˬ ehˇ-eu, “Zaˬ teu gʼaˬ-ahˇ maˬ sehꞈ ni, zaˬ miˬ zaˬ yaw beh gʼaˬ-ahˇ biꞈ kʼoꞈ nehˬ-awˬ. Aˬ yawꞈ-aˬ, aˬ ma ma maˇ meh.”

²⁸Sawˇlaˬmoˬ neh yaˇ kʼaˬ daˇ nehˬ-euˬ gaˇ kawˆ kʼoeˇ Iˇsaˬleˬlaˆ tsawˇ haˬ deuˬ ya gaˬ ngeh, aˬ yawꞈ-ahˇ yaw zeu baw dui dui-euˬ meh. Aˬ jeˬ miˇ neh ehˇ naˇ, yaw tsaˬ yaw dawˇ dawˇ-ehˇ yaˇ kʼaˬ daˇ nya-eu zaˬ siˬ tsawˇ gahˇ aˬ yawꞈ-ahˇ Miˬyehˇ biꞈ nehˬ-euˬ gaˇ kawˆ, kʼoeˇ ngeh jawˇ aˬ yawꞈ maꞈ siˬ duˬ-euˬ meh.