Read Akha 1 Sahˬpaˬ 8 Bible Online

1 Sahˬpaˬ 8 - Akha bible

1 Sahˬpaˬ 8

¹Kʼoeˇ naˇ, Ziˇoˬ lehˇ kuˇ-eu Daˬbiˇ-euˬ meuˬ-ahˇ jaˆ-eu Dawˬ ma saˇ jaˇ Bahˬ keuˆ-ahˇ, Uˬ duˬ tahˬ nymˇ nymˇ ma laꞈ kʼoeˇ baꞈ ahˇ-eu gʼaˇ duˬ, Iˇsaˬleˬlaˆ tsawˇ jeuˬ tsawˇ ca deuˬ-euˬ aˬ yuiꞈ aˬ tsu dawˬ tawˆ luꞈ-ahˇ, sahˬ paˬ Sawˇlaˬmoˬ neh aˬ yawꞈ jawˇ-eu Yeˬluˇsaˬlehˬ meuˬ-ahˇ kuˇ uiˬ-euˬ meh.

²Ba la shiꞈ siˬ tiˬ siˬ pyeuꞈ-eu Eˇdaˬneˬ ba la Sehˬ gʼawˆ-euˬ Bawˬ-iˬ gʼeh ngeh yamˬ-ahˇ, Iˇsaˬleˬlaˆ tsawˇ jeuˬ tsawˇ ca-euˬ aˬ yuiꞈ aˬ tsu dawˬ tawˆ luꞈ, sahˬ paˬ Sawˇlaˬmoˬ jawˇ gaˇ uiˬ leˇ-euˬ meh.

³Aˬ yuiꞈ aˬ tsu dawˬ tawˆ luꞈ uiˬ laˇ gʼaˬ ngeh jawˇ, piˇ ma deuˬ Dawˬ ma saˇ jaˇ Bahˬ keuˆ baꞈ diˇ-euˬ meh.

⁴Kʼoeˇ naˇ, Leˬbiˇ tsawˇ haˬ deuˬ hawˇ-eu piˇ ma deuˬ neh, Dawˬ ma saˇ jaˇ Bahˬ keuˆ maˬ ehˇ, Sahˬpaˬ Miˬyehˇ jawˇ-eu Sehˬ gʼawˆ maˬ ehˇ, kʼoeˇ gaˇ kʼaˇ jaˆ-eu keu ka dawˬ tawˆ luꞈ maˬ ehˇ, Uˬ duˬ tahˬ nymˇ nymˇ ma-ahˇ baꞈ ahˇ gʼeh-euˬ meh.

⁵Sahˬ paˬ Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ Dawˬ ma saˇ jaˇ Bahˬ keuˆ mehˬ shi uiˬ leˇ-awˇ, maˬ gui jiˇ coeˇ gaˇ keuˆ ni myaˬ-eu yawˇ hawˇ-eu mawˇ neˇ deuˬ lawˇ-euˬ meh.

⁶Kʼoeˇ naˇ, piˇ ma deuˬ Dawˬ ma saˇ jaˇ Bahˬ keuˆ-ahˇ Uˬ duˬ tahˬ nymˇ nymˇ ma-ahˇ baꞈ ahˇ gʼeh-awˇ, muiˬ dui shawˇ dui dui-eu jawˇ duˬ-ahˇ, Jeˬ luˇ beˬ[9] mawˇ kawˇ-euˬ uˬ moˆ baꞈ taˬ-euˬ meh.

⁷Cawˬ ja taˬ-euˬ Jeˬ luˇ beˬ-euˬ aˬ dahˇ kʼoeˇ, bahˬ keuˆ kʼoeˇ hawˇ-eu bahˬ keuˆ-euˬ baꞈ kawˬ-ahˇ joe shmˇ taˬ-euˬ meh.

⁸Muiˬ dui shawˇ dui dui-eu Jawˇ duˬ-euˬ mehˬ shi nyiˬ paˆ-ehˇ yawꞈ-awˇ haw ngeh tehꞈ-ehˇ, baꞈ kawˬ-euˬ mehˬ dzaˬ-ahˇ haw mawˇ nya-eu meh. (Baꞈ kawˬ kʼoeˇ iˬ nah keuˆ ni kʼoeˇ gaˇ jaˆ luꞈ-eu meh.)

⁹Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, Sahˬpaˬ Miˬyehˇ neh aˬ yawꞈ maꞈ-ahˇ saˇ jaˇ dzaˬ-euˬ jawˇ duˬ pyeuꞈ-eu Siˇnaˆ gawˬ jawˬ-ahˇ, Moˇseˬ neh dawˆ ahˇ-euˬ kʼaˬ lo teˇ byaꞈ kʼoeˇ nyiˬ byaꞈ maˬ ngeuˇ naˇ, nui jeˬ tiˬ jeˬ-iˬ Dawˬ ma saˇ jaˇ Bahˬ keuˆ laꞈ kʼoeˇ maˬ ahˇ-a.

¹⁰Piˇ ma deuˬ Muiˬ dui shawˇ dui dui-eu jawˇ duˬ laꞈ kʼoeˇ neh doˆ le-eu nehˬ-ehˇ, Uˬ duˬ tahˬ nymˇ nymˇ ma-ahˇ mˬ dmˇ tmˬ gʼoeˬ jiˇ-euˬ meh.

¹¹Kʼoeˇ ngeh, mˇ paˬ-ehˇ jaˆ-eu jeˬ paˇ gʼoꞈ mˇ leˇ-eu gʼaˇ duˬ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ maˬ gʼoꞈ uˇ leˇ nya-a. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ baoˬ mˬ dmˇ laꞈ kʼoeˇ yaw shehꞈ bya luꞈ-eu meh.

¹²Kʼoeˇ naˇ, Sawˇlaˬmoˬ heu loꞈ-ehˇ guiˬ lahˬ shaˇ-euˬ meh. “Sahˬpaˬ Miˬyehˇ-oˇ, nawˇ-aˬ mˬ kʼoeˇ taˆ nahˇ ma beh taˬ-euˬ gʼaˬ pyeuꞈ kʼawꞈ, mˬ dmˇ hawˇ-eu yaw zahˇ laꞈ kʼoeˇ jawˇ ma lehˇ nawˇ noeˬ tsehˆ-euˬ meh.

¹³Mˬ maˬ maˬ byaˆ zaˇ ziˇ nawˇ bi jawˇ-eu gʼaˇ duˬ, muiˬ dui dui-eu Uˬ duˬ tahˬ nymˇ nymˇ ma tiˬ nymˇ, nymˬ-mˇ ngaˇ tsoˆ gʼaˬ-euˬ ma.”

¹⁴Kʼoeˇ gaˇ yawꞈ luꞈ-eu Iˇsaˬleˬlaˆ tsawˇ haˬ deuˬ jawˇ paw sahˬ paˬ Sawˇlaˬmoˬ ciˬ pyawˇ-awˇ, Miˬyehˇ guiˬ lahˬ aˬ yawꞈ maꞈ kʼoeˇ taˆ bi keuˆ le-eu gʼaˇ duˬ, aˬ yawꞈ maꞈ-ahˇ dawˬ ngehˬ gʼeh nehˬ-euˬ meh.

¹⁵Aˬ yawꞈ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Ngaˬ da Daˬbiˇ nehˬ-ehˇ saˇ jaˇ dzaˬ taˬ-euˬ dawˬ-ahˇ aˬ yawꞈ ziꞈ-eu meh. Daˬbiˇ-ahˇ aˬ yawꞈ neh heu loꞈ-ehˇ ehˇ taˬ-euˬ jaˆ-eu meh.

¹⁶‘Ngaˬ-euˬ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ sheuˬ doˆ laꞈ-euˬ tiˬ nah neh, iˬ nah keuˆ ni, ngaˬ-ahˇ uˬ duˬ tahˬ-eu uˬ duˬ tahˬ nymˇ bi tsoˆ-eu gʼaˇ duˬ, Iˇsaˬleˬlaˆ miˇ kʼahˬ laꞈ kʼoeˇ jaˆ-eu meuˬ tiˬ meuˬ-iˬ ngaˇ maˬ tseˇ doˆ-aˬ siˬ. Ehˇ kʼawꞈ Daˬbiˇ-oˇ, ngaˬ-euˬ tsawˇ jeuˬ-ahˇ bi uˆ lahˇ-eu gʼaˇ duˬ, nawˬ-ahˇ ngaˇ tseˇ doˆ-eu ma.’

¹⁷“Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, uˬ duˬ tahˬ nymˇ tiˬ nymˇ tsoˆ ma lehˇ ngaˬ da Daˬbiˇ lehˬ hmˬ-euˬ meh.

¹⁸Ehˇ kʼawꞈ, Sahˬpaˬ Miˬyehˇ aˬ yawꞈ-ahˇ ehˇ nehˬ-euˬ, ‘Ngaˬ-euˬ gʼaˇ duˬ nawˇ uˬ duˬ tahˬ nymˇ tiˬ nymˇ tsoˆ mawꞈ-eu-aˬ muiˬ meh.

¹⁹Ehˇ kʼawꞈ, uˬ duˬ tahˬ nymˇ kʼoeˇ nawˇ maˬ ya tsoˆ-a. Nawˬ-euˬ aˬ li maˇ maˇ ni gʼeh-eu gʼaˬ, nawˬ-euˬ gʼaˇ duˬ uˬ duˬ tahˬ nymˇ kʼoeˇ nymˇ ya tsoˆ tehꞈ-a.’ lehˇ ehˇ nehˬ-euˬ meh.

²⁰“Nymˬ-mˇ poˆ jawˇ, saˇ jaˇ dzaˬ taˬ-euˬ jaˆ-eu loꞈ-ehˇ Sahˬpaˬ Miˬyehˇ mˇ byah-euˬ meh. Ngaˬ da-euˬ dah zaˇ ngaˇ Iˇsaˬleˬlaˆ miˇ kʼahˬ-euˬ sahˬ paˬ pyeuꞈ laˇ-awˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ, Uˬ duˬ tahˬ nymˇ nymˇ ma heu ngaˇ tsoˆ gʼaˬ-euˬ ma.

²¹Aˬ dui-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh, aˬ yawꞈ maꞈ nehˬ-ehˇ Sahˬpaˬ Miˬyehˇ saˇ jaˇ dzaˬ-euˬ kʼaˬ lo teˇ byaꞈ nyiˬ byaꞈ ahˇ-eu Dawˬ ma saˇ jaˇ Bahˬ keuˆ kʼoeˇ keuˆ taˬ duˬ tiˬ tsahˇ kʼawꞈ, Uˬ duˬ tahˬ nymˇ nymˇ ma laꞈ kʼoeˇ ngaˇ laˆ saˆ taˬ-euˬ ma.”

²²Kʼoeˇ naˇ, Iˇsaˬleˬlaˆ tsawˇ haˬ deuˬ-euˬ mehˬ shi, lawˇ duˬ dawˬ peh Sawˇlaˬmoˬ yawꞈ leˇ-awˇ, aˬ laꞈ baꞈ diˇ-awˇ,

²³heu loꞈ-ehˇ guiˬ lahˬ shaˇ-euˬ meh. “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, mˬ hawˇ-eu miˇ kʼoeˇ taˆ nawˇ loꞈ-ehˇ gʼeh-eu miˬ yehˇ maˬ jawˇ-a. Nawˬ-euˬ tsawˇ haˬ deuˬ nui ma gʼawˇ mawˇ dawˬ tawˆ luꞈ nawˬ-euˬ ehˇ dawˬ naˇ haˬ-awˇ dehꞈ ngeh, aˬ yawꞈ maꞈ nehˬ-ehˇ dzaˬ taˬ-euˬ dawˬ ma saˇ jaˇ-ahˇ nawˇ ziꞈ-awˇ, nawˬ-euˬ gʼoeˇ-eu gaˬ-eu jeˬ aˬ yawꞈ maꞈ-ahˇ bi mawˇ-euˬ meh.

²⁴Ngaˬ da Daˬbiˇ-ahˇ nawˬ neh saˇ jaˇ dzaˬ taˬ-euˬ dawˬ-ahˇ nawˇ ziꞈ-awˇ, yawˬ dawˬ na luꞈ iˬ nah byah laˇ gʼaˬ-euˬ meh.

²⁵Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ neh saˇ jaˇ dzaˬ taˬ-euˬ dawˬ kʼoeˇ dawˬ-ahˇ taˬ ngehˇ nehˬ laꞈ. Ngaˬ da nawˬ-euˬ ehˇ dawˬ naˇ haˬ-awˇ dehꞈ-euˬ loꞈ-ehˇ, aˬ yawꞈ-euˬ aˬ li deuˬ kʼawꞈ kʼoeˇ loꞈ-ehˇ dehꞈ naˇ, aˬ yawꞈ-euˬ zaˬ deuˬ uˆ deuˬ laꞈ kʼoeˇ Iˇsaˬleˬlaˆ miˇ kʼahˬ-ahˇ sahˬ paˬ geuꞈ-awˇ uˆ lahˇ-eu tiˬ gʼaˬ aˬ myah luꞈ doˆ laˇ tehꞈ-a lehˇ, ngaˬ da-ahˇ nawˬ neh ehˇ-euˬ dawˬ-ahˇ taˬ ngehˇ nehˬ laꞈ lehˇ, nymˬ-mˇ ngaˇ nawˬ-ahˇ shaˇ-eu ma.

²⁶Kʼoeˇ miˇ neh, Iˇsaˬleˬlaˆ tsawˇ jeuˬ-euˬ Miˬyehˇ-oˇ, nawˬ-euˬ zaˬ kʼaˆ pyeuꞈ-eu ngaˬ da Daˬbiˇ-ahˇ nawˬ neh saˇ jaˇ kʼaˇ dzaˬ taˬ-euˬ yawˬ jeˬ na luꞈ, nymˬ-mˇ bi byah laˇ-awˬ.

²⁷“Ehˇ kʼawꞈ, Miˬyehˇ-oˇ, miˇ tsaˬ kʼoeˇ taˆ nawˇ aˬ diˇ jawˇ nya ma loˇ. Mˬ siˬ lah-ehˇ nawˇ jawˇ kʼaˇ maˬ deˇ-eu-aˬ, ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ laꞈ kʼoeˇ aˬ joˆ-ehˇ jawˇ kʼaˇ deˇ nmˇ.

²⁸Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ-aˬ, nawˬ-euˬ zaˬ kʼaˆ pyeuꞈ-eu ma. Ngaˬ-euˬ shaˇ dawˬ-ahˇ naˇ haˬ-awˇ iˬ nah ngaˬ neh kʼaˇ shaˇ-euˬ loꞈ-ehˇ caw ba nehˬ laꞈ-awˬ.

²⁹Nawˬ-ahˇ uˬ duˬ bi tahˬ-eu gʼaˇ duˬ nawˬ neh tseˇ doˆ taˬ-euˬ jawˇ duˬ pyeuꞈ-eu Uˬ duˬ tahˬ nymˇ nymˇ ma heu nymˇ-ahˇ, uˬ ciꞈ nah gʼahˇ maˬ ehˇ haw piˇ nehˬ laꞈ-awˬ. Uˬ duˬ tahˬ nymˇ nymˇ ma jaˆ-eu paw ngaˇ mehˬ shiˬ pyawˇ-awˇ guiˬ lahˬ shaˇ ngeh, ngaˬ-euˬ shaˇ dawˬ naˇ haˬ nehˬ laꞈ-awˬ.

³⁰Ngaˇ maˬ ehˇ, nawˬ-euˬ tsawˇ haˬ deuˬ maˬ ehˇ, jawˇ duˬ heu tsahˇ-ahˇ mehˬ shiˬ pyawˇ-awˇ guiˬ lahˬ shaˇ ngeh, nawˇ naˇ haˬ nehˬ laꞈ-awˬ. Mˬ kʼoeˇ taˆ jaˆ-eu nawˬ-euˬ nymˇ-ahˇ jawˇ-awˇ, nga maꞈ-euˬ shaˇ dawˬ naˇ haˬ nehˬ laꞈ-eu laꞈ kʼoeˇ, nga maꞈ-ahˇ iˬ baˇ pyehˬ nehˬ laꞈ-awˬ.

³¹“Tsawˇ haˬ tiˬ gʼaˬ aˬ cawˬ-ahˇ mˇ lehˬ-euˬ meh lehˇ dehˬ lehꞈ gaˇ ya daˬ-awˇ, aˬ yawꞈ iˬ baˇ maˬ ahˇ-eu gaˇ kawˆ bi kamˬ-eu gʼaˇ duˬ, Uˬ duˬ tahˬ nymˇ nymˇ ma-ahˇ jaˆ-eu nawˬ-euˬ lawˇ duˬ-ahˇ sheuˬ keuˆ laꞈ ngeh,

³²Sahˬpaˬ Miˬyehˇ nawˇ mˬ kʼoeˇ taˆ jawˇ-awˇ naˇ haˬ-eu laꞈ kʼoeˇ, nawˬ-euˬ zaˬ kʼaˆ deuˬ-ahˇ yaˇ kʼaˬ daˇ nehˬ-awˬ. Lehˬ-eu gʼaˬ lehˬ-eu bymˇ bi tawˆ-awˇ, tsaˬ-eu gʼaˬ tsaˬ-eu bymˇ bi tawˆ-awˬ.

³³“Nawˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ nawˬ-ahˇ mˇ lehˬ-euˬ miˇ neh, muiˇ-eu deuˬ neh guiˇ bi deuˆ gʼaˬ-awˇ, Uˬ duˬ tahˬ nymˇ nymˇ ma heu nymˇ-ahˇ nawˇ jawˇ gaˇ aˬ yawꞈ maꞈ gʼoꞈ laˇ-eu laꞈ kʼoeˇ, iˬ baˇ pyehˬ nehˬ laꞈ lehˇ nui ma nahˬ yu ni taˬ-awˇ nawˬ-ahˇ shaˇ ngeh,

³⁴mˬ kʼoeˇ taˆ jawˇ-awˇ, aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Aˬ yawꞈ maꞈ-ahˇ nawˇ iˬ baˇ pyehˬ nehˬ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ nawˬ neh biꞈ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ nawˇ sheuˬ kʼoꞈ gʼeh nehˬ-awˬ.

³⁵“Nawˬ-euˬ tsawˇ haˬ deuˬ nawˬ-ahˇ mˇ lehˬ-euˬ miˇ neh, nawˇ uˬ yehˇ maˬ bi yehˇ le-ehˇ byehˇ ngeh, aˬ yawꞈ maꞈ nui ma paˇ laˇ-awˇ, Uˬ duˬ tahˬ nymˇ nymˇ ma jaˆ-eu paw ciˬ pyawˇ-awˇ, nui ma nahˬ yu ni taˬ-eu laꞈ kʼoeˇ iˬ baˇ pyehˬ nehˬ laꞈ lehˇ shaˇ ngeh,

³⁶mˬ kʼoeˇ taˆ jawˇ-awˇ aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Sahˬ paˬ-ahˇ maˬ ehˇ, Iˇsaˬleˬlaˆ tsawˇ haˬ deuˬ-ahˇ maˬ ehˇ, nawˇ iˬ baˇ pyehˬ nehˬ-awˇ, yaw tsaˬ yaw dawˇ jeˬ mˇ ni mehˬ nehˬ tsoˆ nehˬ-awˬ. Sahˬpaˬ Miˬyehˇ-oˇ, kʼoeˇ naˇ, nawˬ-euˬ tsawˇ jeuˬ-ahˇ nawˬ neh biꞈ tsehˆ tsehˆ nehˬ-euˬ miˇ kʼahˬ heu kʼahˬ kʼoeˇ taˆ, uˬ yehˇ bi yehˇ le-awˬ.

³⁷“Miˇ kʼahˬ heu kʼahˬ kʼoeˇ taˆ, mehꞈ-eu shuꞈ-eu jeˬ hawˇ-eu yaw jaw naˇ-eu naˇ gawˇ gawˇ ma keuˆ le ngeh maˬ ehˇ, lahˇ dui dui-eu jaˬ lehˇ hawˇ-eu nyoiˬ oiˬ nyehˇ bahˇ gʼawˬ mya jeˬ baˬ da neh dzaˬ la gʼo cehˇ deuˬ ya cawˆ-iˇ ngeh maˬ ehˇ, muiˇ-eu deuˬ nawˬ-euˬ tsawˇ haˬ deuˬ-ahˇ guiˇ deuˆ le ngeh maˬ ehˇ, shaˬ zahˬ naˇ gawˇ keuˆ le ngeh maˬ ehˇ,

³⁸aˬ yawꞈ maꞈ-euˬ guiˬ lahˬ shaˇ dawˬ-ahˇ naˇ haˬ nehˬ-awˇ, nawˬ-euˬ tsawˇ jeuˬ Iˇsaˬleˬlaˆ tsawˇ haˬ tiˬ gʼaˬ na noeˬ shaˬ noeˬ zahˬ dui dui-eu laꞈ kʼoeˇ, Uˬ duˬ tahˬ nymˇ nymˇ ma heu nymˇ jaˆ-eu paw aˬ laꞈ cawˬ ja-awˇ guiˬ lahˬ shaˇ ngeh,

³⁹aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Mˬ kʼoeˇ taˆ jaˆ-eu nawˬ-euˬ nymˇ-ahˇ jawˇ-awˇ aˬ yawꞈ maꞈ-euˬ shaˇ dawˬ-ahˇ naˇ haˬ-eu laꞈ kʼoeˇ, aˬ yawꞈ maꞈ-ahˇ iˬ baˇ pyehˬ nehˬ-awˬ. Nawˇ tiˬ gʼaˬ tehꞈ-ehˇ tsawˇ haˬ zaˬ-euˬ nui noeˬ nui duˇ-ahˇ siˬ nya-eu meh. Nga maꞈ-euˬ aˬ poeˬ aˬ bawˇ deuˬ-ahˇ nawˬ neh biꞈ nehˬ-euˬ miˇ kʼahˬ laꞈ kʼoeˇ, nawˬ-euˬ tsawˇ haˬ deuˬ kʼaˇ jawˇ kʼoeˇ keuˆ ni, tsawˇ haˬ yawˬ gʼaˬ na luꞈ-ahˇ, yawˬ ha neh kʼaˇ mˇ-euˬ loꞈ-ehˇ yaˇ kʼaˬ daˇ nehˬ-awˬ.

⁴⁰

⁴¹“Gaˇ mahˇ kaˬ gaˇ jawˇ-eu boeˇ miˬ siˬ kʼaˬ tiˬ gʼaˬ na, nawˇ tsawˇ myahˇ doˆ-eu gaˇ kawˆ hawˇ-eu nawˬ-euˬ tsawˇ haˬ deuˬ gʼaˇ duˬ nawˬ neh mˇ-euˬ huiˬ-eu gaˇ deuˬ-ahˇ ya gaˬ-awˇ, nawˬ-ahˇ uˬ duˬ tahˬ-awˇ guiˬ lahˬ shaˇ-eu gʼaˇ duˬ Uˬ duˬ tahˬ nymˇ nymˇ ma heu nymˇ-ahˇ laˇ ngeh,

⁴²

⁴³aˬ yawꞈ-euˬ shaˇ dawˬ-ahˇ naˇ haˬ nehˬ-awˬ. Nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ nawˬ-ahˇ siˬ nya-awˇ, nawˬ-euˬ ehˇ dawˬ naˇ haˬ geuꞈ-eu loꞈ-ehˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ kʼawꞈ, nawˬ-ahˇ siˬ nya-awˇ nawˬ-euˬ ehˇ dawˬ naˇ haˬ geuꞈ ni, mˬ kʼoeˇ taˆ jawˇ-awˇ aˬ yawꞈ-euˬ shaˇ dawˬ-ahˇ naˇ haˬ-eu laꞈ kʼoeˇ, aˬ yawꞈ kʼaˇ shaˇ-eu jeˬ ngehˬ gʼeh nehˬ-awˬ. Kʼoeˇ ngeh, ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ-aˬ, nawˬ-ahˇ uˬ duˬ tahˬ-eu jawˇ duˬ pyeuꞈ-eu gaˇ kawˆ aˬ yawꞈ maꞈ siˬ nya laˇ tehꞈ-a.

⁴⁴“Muiˇ-eu deuˬ-ahˇ guiˇ deuˆ-iˇ-eu gʼaˇ duˬ nawˬ-euˬ tsawˇ haˬ deuˬ-ahˇ nawˇ dawˬ biꞈ-awˇ bi iˇ ngeh, aˬ yawꞈ maꞈ aˬ geu gaˇ iˇ keuˆ-eu maˬ kaˬ, nawˬ neh tseˇ doˆ-euˬ meuˬ heu meuˬ hawˇ-eu ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ jaˆ-eu paw aˬ yawꞈ maꞈ aˬ laꞈ cawˬ ja-awˇ guiˬ lahˬ shaˇ ngeh,

⁴⁵aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ. Mˬ kʼoeˇ taˆ jawˇ-awˇ aˬ yawꞈ maꞈ-euˬ shaˇ dawˬ-ahˇ naˇ haˬ-eu laꞈ kʼoeˇ, aˬ yawꞈ maꞈ guiˇ deuˆ-eu bi gʼaˬ leˇ-awˬ.

⁴⁶“Nawˬ-euˬ tsawˇ haˬ deuˬ nawˬ-ahˇ mˇ lehˬ-awˇ, iˬ baˇ maˬ ahˇ-eu tsawˇ haˬ tiˬ gʼaˬ-iˬ maˬ jawˇ-ehˇ pyeuꞈ-iˇ ngeh, nawˇ nui ma pehˇ laˇ-awˇ muiˇ-eu deuˬ neh aˬ yawꞈ maꞈ-ahˇ guiˇ bi deuˆ gʼaˬ-eu laꞈ kʼoeˇ, aˬ cawˬ-euˬ miˇ kʼahˬ-ahˇ aˬ yawꞈ maꞈ-ahˇ bi nyehꞈ gʼeh ngeh, kaˬ dui dui-eu miˇ kʼahˬ-ahˇ aˬ yawꞈ maꞈ ya iˇ keuˆ kʼawꞈ,

⁴⁷nawˬ-euˬ tsawˇ haˬ kʼoeˇ deuˬ-euˬ guiˬ lahˬ shaˇ dawˬ-ahˇ nawˇ naˇ haˬ nehˬ-awˬ. Miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ iˬ baˇ noeˬ poˆ-awˇ, aˬ yawꞈ maꞈ maˬ tsaˬ maˬ dawˇ-eu laꞈ kʼoeˇ dehꞈ-euˬ miˇ neh, yawˬ ha iˬ baˇ huiˬ dui dui-eu gaˇ kawˆ ja doˆ-awˇ nawˬ-ahˇ guiˬ lahˬ shaˇ naˇ, Sahˬpaˬ Miˬyehˇ-oˇ, aˬ yawꞈ maꞈ-euˬ shaˇ dawˬ-ahˇ naˇ haˬ nehˬ-awˬ.

⁴⁸Miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ maꞈ aˬ diˇ aˬ maˇ iˬ baˇ noeˬ poˆ-awˇ, nga maꞈ-euˬ aˬ poeˬ aˬ bawˇ deuˬ-ahˇ nawˬ neh biꞈ taˬ-euˬ miˇ kʼahˬ heu kʼahˬ-ahˇ, nawˬ neh tseˇ doˆ taˬ-euˬ meuˬ heu meuˬ hawˇ-eu, nawˬ-euˬ gʼaˇ duˬ ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ jaˆ-eu paw aˬ yawꞈ maꞈ ciˬ pyawˇ-awˇ nawˬ-ahˇ guiˬ lahˬ shaˇ ngeh,

⁴⁹aˬ yawꞈ maꞈ-euˬ shaˇ dawˬ-ahˇ nawˇ naˇ haˬ nehˬ-awˬ.

⁵⁰Aˬ yawꞈ maꞈ neh mˇ lehˬ-euˬ iˬ baˇ hawˇ-eu nawˬ-ahˇ puiˬ-euˬ iˬ baˇ dawˬ tawˆ luꞈ-ahˇ nawˇ pyehˬ nehˬ-awˇ, muiˇ-eu deuˬ aˬ yawꞈ maꞈ-ahˇ gʼawˬ shaˬ gaˬ nehˬ nya ni caw ba nehˬ-awˬ.

⁵¹Aˬ yawꞈ maꞈ-aˬ, shmˇ baw guiˇ-eu baw-ahˇ duˇ-eu Iˇjiˇtuˆ miˇ kʼahˬ laꞈ kʼoeˇ nawˬ neh sheuˬ doˆ nehˬ laꞈ-euˬ nawˬ-euˬ tsawˇ jeuˬ pyeuꞈ-eu meh.

⁵²“Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ hawˇ-eu aˬ yawꞈ maꞈ-euˬ sahˬ paˬ-ahˇ nawˇ aˬ myah luꞈ nui ma tsaˬ-awˇ, caw ba nehˬ laꞈ-awˬ lehˇ aˬ yawꞈ maꞈ nawˬ-ahˇ kʼaˇ shaˇ ngeh, aˬ yawꞈ maꞈ-euˬ shaˇ dawˬ-ahˇ nawˇ naˇ haˬ nehˬ luꞈ-uˇ.

⁵³Nga maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh nawˇ sheuˬ doˆ laꞈ nehˬ ngeh, nawˬ-euˬ zaˬ kʼaˆ Moˇseˬ-ahˇ gʼoe-awˇ aˬ yawꞈ maꞈ-ahˇ nawˇ ehˇ nehˬ-euˬ loꞈ-ehˇ, aˬ yawꞈ maꞈ nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ, tsawˇ jeuˬ dawˬ tawˆ luꞈ laꞈ kʼoeˇ aˬ yawꞈ maꞈ-ahˇ nawˇ tseˇ doˆ-euˬ meh.”

⁵⁴Sawˇlaˬmoˬ Sahˬpaˬ Miˬyehˇ-ahˇ guiˬ lahˬ shaˇ gʼaˬ ngeh, lawˇ duˬ mehˬ shi aˬ yawꞈ aˬ laꞈ baꞈ diˇ-awˇ pawˬ tsuiꞈ pawˬ dmˬ dmˬ-awˇ jawˇ-eu tuˇ laˇ-euˬ meh.

⁵⁵Aˬ yawꞈ yaw kʼaˆ-ehˇ guˇ-awˇ, kʼoeˇ gaˇ kʼaˇ uiˬ laˇ-euˬ tsawˇ haˬ deuˬ-ahˇ Miˬyehˇ guiˬ lahˬ biꞈ-eu gʼaˇ duˬ, dawˬ ngehˬ gʼeh nehˬ gʼaˬ-awˇ heu loꞈ-ehˇ ehˇ-eu meh.

⁵⁶“Saˇ jaˇ dzaˬ taˬ-euˬ jaˆ-eu loꞈ-ehˇ aˬ yawꞈ-euˬ tsawˇ haˬ deuˬ-ahˇ nui saˇ oꞈ-eu jeˬ biꞈ-eu Sahˬpaˬ Miˬyehˇ-ahˇ ja ceuˬ-awˬ. Moˇseˬ-ahˇ gʼoe-awˇ aˬ yawꞈ neh biꞈ taˬ-euˬ saˇ jaˇ dawˬ tawˆ luꞈ-ahˇ aˬ yawꞈ ziꞈ luꞈ meh.

⁵⁷Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ dui-euˬ aˬ poeˬ aˬ bawˇ deuˬ nehˬ-ehˇ jawˇ-euˬ loꞈ-ehˇ, aˬ dui nehˬ-ehˇ kʼawꞈ jawˇ luꞈ-uˇ. Aˬ dui-ahˇ maˬ gʼawˬ-iˇ-eu uˬ taꞈ, aˬ dui-ahˇ maˬ byehˇ dzeh ni jawˇ luꞈ-uˇ.

⁵⁸Aˬ yawꞈ bi dehꞈ mawꞈ-eu loꞈ-ehˇ tehꞈ-ehˇ aˬ dui aˬ myah luꞈ yaw dehꞈ dehꞈ-awˇ, aˬ dui-euˬ aˬ poeˬ aˬ bawˇ deuˬ-ahˇ aˬ yawꞈ neh biꞈ taˬ-euˬ zahˇ dawˬ kʼoꞈ dawˬ deuˬ hawˇ-eu, mehˬ nehˬ tsoˆ nehˬ laꞈ-euˬ dawˬ deuˬ-ahˇ aˬ dui caw teh-eu gʼaˇ duˬ, aˬ yawꞈ-euˬ ehˇ dawˬ-ahˇ aˬ dui naˇ haˬ geuꞈ nya ni aˬ yawꞈ caw ba nehˬ laꞈ luꞈ-uˇ.

⁵⁹Gʼawˬ shaˬ gaˬ nehˬ laꞈ lehˇ shaˇ-eu ngaˬ-euˬ shaˇ dawˬ heu-ahˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ maˬ ngehˇ ni, aˬ myah luꞈ noeˬ keuˆ nehˬ laꞈ luꞈ-uˇ. Iˇsaˬleˬlaˆ tsawˇ jeuˬ hawˇ-eu aˬ yawꞈ maꞈ-euˬ sahˬ paˬ-ahˇ aˬ yawꞈ aˬ myah luꞈ gʼawˬ shaˬ gaˬ-eu laꞈ kʼoeˇ, aˬ yawꞈ nah yawꞈ kʼaˇ loˬ-eu jeˬ dawˬ tawˆ luꞈ ngehˬ gʼeh nehˬ luꞈ-uˇ.

⁶⁰Kʼoeˇ miˇ neh, Sahˬpaˬ Miˬyehˇ tiˬ gʼaˬ tehꞈ-ehˇ Miˬyehˇ pyeuꞈ-eu gaˇ kawˆ hawˇ-eu, miˬ yehˇ nui gʼaˬ maˬ jawˇ-eu gaˇ kawˆ, miˇ tsaˬ heu kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ ya siˬ duˬ luꞈ-uˇ.

⁶¹Aˬ yawꞈ-euˬ tsawˇ jeuˬ pyeuꞈ-eu naw maꞈ deuˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ-eu laꞈ kʼoeˇ, iˬ nah aˬ yawꞈ-ahˇ saˇ jaˇ ziꞈ-eu loꞈ-ehˇ, tiˬ jawˇ-iˬ maˬ poˆ maˬ paˇ ni saˇ jaˇ ziꞈ luꞈ-uˇ.”

⁶²Kʼoeˇ naˇ, sahˬ paˬ Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Sahˬpaˬ Miˬyehˇ-ahˇ kʼoeˇ gaˇ lawˇ nehˬ shehˇ nehˬ-euˬ meh.

⁶³Mawˇ neˇ nyiˬ muiˇ nyiˬ heˇ mawˇ hawˇ-eu yawˇ tiˬ seh nyiˬ muiˇ mawˇ aˬ yawꞈ sehꞈ-awˇ, cawˬ cawˬ taꞈ-eu lawˇ-eu jeˬ lawˇ nehˬ-euˬ meh. Kʼoeˇ loꞈ-ehˇ jahˇ-awˇ, sahˬ paˬ Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ gʼeh-awˇ, Uˬ duˬ tahˬ nymˇ nymˇ ma kʼoeˇ Sahˬpaˬ Miˬyehˇ-ahˇ a nehˬ-euˬ meh.

⁶⁴Kʼoeˇ ngeh nah laꞈ kʼoeˇ, Uˬ duˬ tahˬ nymˇ nymˇ ma jawˬ jawˬ-ehˇ tsoˆ myahˬ taˬ-euˬ nymˇ maˬ ehˇ, Uˬ duˬ tahˬ nymˇ nymˇ ma mehˬ shi jaˆ-eu poˆ ka maˬ ehˇ, aˬ yawꞈ a nehˬ-awˇ, mawˇ lah-ehˇ dzah puiˆ-awˇ lawˇ-eu jeˬ maˬ ehˇ, dzaˬ la gʼo cehˇ lawˇ-eu jeˬ maˬ ehˇ, jeˬ zaˬ-euˬ tsiˇ neh lawˇ-eu cawˬ cawˬ taꞈ-eu lawˇ-eu jeˬ maˬ ehˇ, kʼoeˇ gaˇ aˬ yawꞈ lawˇ-euˬ meh. Guiˬ shuiˇ neh jahˇ taˬ-euˬ lawˇ duˬ kʼoeˇ yaw nyiˇ miˇ neh, lawˇ-eu shehˇ-eu kʼoeˇ deuˬ dawˬ tawˆ luꞈ lawˇ kʼaˇ maˬ deˇ-ehˇ, aˬ yawꞈ kʼoeˇ loꞈ-ehˇ jahˇ-euˬ meh.

⁶⁵Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Uˬ duˬ tahˬ nymˇ nymˇ ma-ahˇ shiꞈ nah keuˆ ni Sehˬ gʼawˆ-euˬ Bawˬ-iˬ gʼeh-euˬ meh. Laꞈ taˆ paw pyawˬ-ahˇ jaˆ-eu Haˬmaˆ gʼaˬ lahˇ-ahˇ keuˆ ni jawˇ-eu tsawˇ haˬ deuˬ hawˇ-eu, laꞈ oˆ paw Iˇjiˇtuˆ miˇ kʼahˬ-euˬ miˇ kaˬ-ahˇ keuˆ ni jawˇ-eu tsawˇ haˬ deuˬ uiˬ leˇ-awˇ, tsawˇ haˬ aˇ maꞈ myaˬ dui dui-euˬ meh.

⁶⁶Yehꞈ nah tiˬ nah keuˆ laˇ ngeh, tsawˇ haˬ kʼoeˇ deuˬ-ahˇ Sawˇlaˬmoˬ bi gʼoꞈ-iˇ-euˬ meh. Sahˬpaˬ Miˬyehˇ-euˬ zaˬ kʼaˆ Daˬbiˇ hawˇ-eu aˬ yawꞈ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ neh biꞈ-euˬ guiˬ lahˬ yaw dzahˇ deuˬ baˬ da neh, sahˬ paˬ Sawˇlaˬmoˬ-ahˇ aˬ yawꞈ maꞈ ja ceuˬ-euˬ meh.