Read Akha 1 Sahˬpaˬ 9 Bible Online

1 Sahˬpaˬ 9 - Akha bible

1 Sahˬpaˬ 9

¹Uˬ duˬ tahˬ nymˇ nymˇ ma maˬ ehˇ, sahˬ paˬ jawˇ-eu nymˇ maˬ ehˇ, aˬ yawꞈ kʼaˇ tsoˆ mawꞈ-eu yawˬ jeˬ na luꞈ maˬ ehˇ, Sawˇlaˬmoˬ tsoˆ gʼaˬ jiˇ ngeh,

²Giˇbyoˬ meuˬ-ahˇ oe ngeh poˆ loꞈ-ehˇ, aˬ yawꞈ jawˇ gaˇ Sahˬpaˬ Miˬyehˇ tiˬ poˆ paˇ oe-euˬ meh.

³Aˬ yawꞈ-ahˇ Sahˬpaˬ Miˬyehˇ ehˇ nehˬ-eu, “Nawˬ neh guiˬ lahˬ shaˇ-euˬ dawˬ-ahˇ ngaˇ ya gaˬ-euˬ ma. Mˬ maˬ maˬ byaˆ zaˇ ziˇ ngaˬ-ahˇ uˬ duˬ tahˬ-eu jawˇ duˬ pyeuꞈ ni, nawˬ neh tsoˆ-euˬ Uˬ duˬ tahˬ nymˇ nymˇ ma heu nymˇ-ahˇ ngaˇ bi muiˬ bi shawˇ-awˇ, aˬ myah luꞈ bo saˆ haw piˇ nehˬ ma.

⁴Nawˬ da Daˬbiˇ loꞈ-ehˇ nawˇ ngaˬ-euˬ mehˬ shi nui ma ziꞈ dah ni gʼeh-awˇ yaw tsaˬ yaw dawˇ dawˇ-ehˇ dehꞈ-eu laꞈ kʼoeˇ, ngaˬ-euˬ zahˇ dawˬ kʼoꞈ dawˬ deuˬ hawˇ-eu ngaˬ neh nawˬ-ahˇ kʼaˇ ehˇ nehˬ-euˬ yawˬ jeˬ na luꞈ-ahˇ yaw muiˬ paˬ-ehˇ naˇ haˬ geuꞈ naˇ,

⁵nawˬ-euˬ zaˬ nawˬ-euˬ uˆ deuˬ Iˇsaˬleˬlaˆ miˇ kʼahˬ-ahˇ aˬ myah luꞈ ya uˆ lahˇ tehꞈ-a lehˇ, nawˬ da Daˬbiˇ-ahˇ ngaˬ neh saˇ jaˇ dzaˬ taˬ-euˬ dawˬ kʼoeˇ dawˬ ngaˇ mˇ byah ma.

⁶Ehˇ kʼawꞈ, nawˇ maˬ ehˇ, nawˬ-euˬ zaˬ deuˬ uˆ deuˬ maˬ ehˇ, ngaˬ-euˬ mehˬ nah maˬ caw teh ni byehˇ-awˇ, ngaˬ-euˬ zahˇ dawˬ kʼoꞈ dawˬ deuˬ hawˇ-eu ngaˬ neh ehˇ-euˬ dawˬ-ahˇ naw maꞈ maˬ naˇ haˬ-ehˇ, miˬyehˇ nui deuˬ-ahˇ uˬ duˬ tahˬ naˇ,

⁷ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ, ngaˬ neh biꞈ taˬ-euˬ miˇ kʼahˬ laꞈ kʼoeˇ maˬ paˇ bi jawˇ ma. Ngaˬ-ahˇ uˬ duˬ tahˬ-eu jawˇ duˬ bi pyeuꞈ-eu gʼaˇ duˬ, ngaˬ neh bi muiˬ bi shawˇ laˇ-euˬ Uˬ duˬ tahˬ nymˇ nymˇ ma heu nymˇ-ahˇ kʼawꞈ, ngaˇ byehˇ dzeh yaꞈ ma. Yawˬ gaˇ na luꞈ jawˇ-eu tsawˇ haˬ deuˬ Iˇsaˬleˬlaˆ tsawˇ haˬ-ahˇ yehˬ bawˬ-ehˇ ehˇ niˇ gʼa-awˇ, yaw zeu maˬ baw ni ja bu ja doeˇ tehꞈ-a.

⁸Uˬ duˬ tahˬ nymˇ nymˇ ma heu coˬ pyaˆ coˬ shaˆ-awˇ, duˬ gahˬ duˬ cu cu leˇ taˬ-euˬ gaˇ ya mawˇ ngeh, kʼaˇ iˇ kʼaˇ laˇ tsehˆ-eu tsawˇ haˬ deuˬ tsawˬ guˆ-iˇ-awˇ, zahˬ leˇ tsoˆ leˇ tehꞈ-a. ‘Miˇ kʼahˬ heu kʼahˬ hawˇ-eu Uˬ duˬ tahˬ nymˇ nymˇ ma heu nymˇ-ahˇ, aˬ jeˬ miˇ neh Sahˬpaˬ Miˬyehˇ heu loꞈ-ehˇ jahˇ nehˬ-euˬ nga’ lehˇ aˬ yawꞈ maꞈ ya naˇ haˬ gaˇ keuˆ tehꞈ-a.

⁹Kʼoeˇ ngeh, aˬ yawꞈ maꞈ-ahˇ aˬ cawˬ heu loꞈ-ehˇ ehˇ kʼoꞈ nehˬ tehꞈ-a. ‘Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ maꞈ byehˇ dzeh-euˬ miˇ neh, kʼoeˇ loꞈ-ehˇ jahˇ nehˬ-euˬ gaˇ ya daˬ-euˬ meh. Aˬ yawꞈ maꞈ miˬyehˇ nui deuˬ-ahˇ gʼoe-awˇ uˬ duˬ tahˬ-euˬ meh. Kʼoeˇ miˇ neh, heu loꞈ-ehˇ gʼeh-eu luˬ-iˇ seˇ-iˇ-eu jeˬ aˬ yawꞈ maꞈ kʼoeˇ taˆ Sahˬpaˬ Miˬyehˇ bi keuˆ le-euˬ meh’ lehˇ ehˇ kʼoꞈ nehˬ tehꞈ-a.”

¹⁰Sawˇlaˬmoˬ-aˬ, Uˬ duˬ tahˬ nymˇ nymˇ ma hawˇ-eu aˬ yawꞈ jawˇ-eu nymˇ-ahˇ, nyiˬ tseˇ kʼoꞈ tsoˆ-awˇ tsoˆ gʼaˬ-euˬ meh.

¹¹Kʼoeˇ loꞈ-ehˇ tsoˆ gaˇ kʼaˇ loˬ-eu shuˬ liˇ daˇ kawˬ, miˬ shuˬ hawˇ-eu shuiˇ deuˬ, Duˇlu sahˬ paˬ Hiˇlamˬ neh aˬ yawꞈ-ahˇ biꞈ-euˬ meh. Nymˇ kʼoeˇ nyiˬ nymˇ tsoˆ gʼaˬ ngeh, Gaˬliˬlehˇ gahˬ kaˬ-ahˇ jaˆ-eu meuˬ nyiˬ tseˇ meuˬ, sahˬ paˬ Sawˇlaˬmoˬ neh Hiˇlamˬ-ahˇ biꞈ-euˬ meh.

¹²Ehˇ kʼawꞈ, Duˇlu meuˬ-ahˇ neh Hiˇlamˬ laˇ-awˇ, sahˬ paˬ Sawˇlaˬmoˬ neh aˬ yawꞈ-ahˇ biꞈ-euˬ meuˬ kʼoeˇ deuˬ-ahˇ haw laˇ ngeh, meuˬ kʼoeˇ deuˬ-ahˇ aˬ yawꞈ maˬ geuꞈ mawꞈ-a.

¹³Kʼoeˇ miˇ neh, “Nawˇ ngaˬ-ahˇ heu loꞈ-ehˇ gʼeh-eu meuˬ deuˬ biꞈ laꞈ law hawˇ ngaˬ tawˇ” lehˇ, sahˬ paˬ Sawˇlaˬmoˬ-ahˇ aˬ yawꞈ ehˇ nehˬ-euˬ meh. Kʼoeˇ miˇ neh, miˇ kʼahˬ kʼoeˇ deuˆ-ahˇ, iˬ nah keuˆ ni Kaˬbuˇlaˆ[10] lehˇ kuˇ-eu meh.

¹⁴Hiˇlamˬ neh Sawˇlaˬmoˬ-ahˇ shuiˇ nyiˬ heˇ oeˬ yaˇ jawꞈ-i dzehˬ ni biꞈ gʼeh taˬ-euˬ meh.

¹⁵Sahˬ paˬ Sawˇlaˬmoˬ-aˬ, Uˬ duˬ tahˬ nymˇ nymˇ ma tsoˆ gaˇ maˬ ehˇ, sahˬ paˬ jawˇ-eu hawˇ nymˇ tsoˆ gaˇ maˬ ehˇ, meuˬ-euˬ nahˇ ma doˆ kʼehˬ paw coeˇ-ahˇ miˇ tsaˬ pi dzm gaˇ maˬ ehˇ, Haˬzawˇ meuˬ, Meˬgiˇdoˬ meuˬ hawˇ-eu Geˬzeuˬ meuˬ heu deuˬ tsoˆ muiˬ gaˇ maˬ ehˇ, tsawˇ haˬ paˆ nehˬ-awˇ myawˬ kʼaˆ bi mˇ-euˬ meh.

¹⁶(Iˇjiˇtuˆ sahˬ paˬ neh Geˬzeuˬ meuˬ-ahˇ guiˇ tiˬ poˆ deuˆ laˇ-awˇ, kʼoeˇ gaˇ jawˇ-eu tsawˇ haˬ deuˬ-ahˇ sehꞈ-awˇ, meuˬ meuˬ lah-ehˇ miˬ dzaˬ dzah puiˆ dzeh yaꞈ-euˬ meh. Kʼoeˇ naˇ, aˬ yawꞈ-euˬ aˬ buˇ Sawˇlaˬmoˬ-ahˇ mˇ dzaˬ-iˇ-awˇ oeˇ mˇ baˇ ngeh, aˬ yawꞈ-euˬ aˬ buˇ-ahˇ meuˬ kʼoeˇ meuˬ laꞈ sawˬ biꞈ nehˬ-euˬ meh.

¹⁷Kʼoeˇ ngeh jawˇ, meuˬ kʼoeˇ meuˬ-ahˇ Sawˇlaˬmoˬ neh paˇ tsoˆ muiˬ-euˬ meh.) Kʼoeˇ naˇ, tsawˇ haˬ paˆ-awˇ myawˬ kʼaˆ bi mˇ-eu laꞈ kʼoeˇ, Sawˇlaˬmoˬ neh tsoˆ muiˬ-euˬ meuˬ deuˬ-a, Behˬhawˇleuˬ laꞈ oˆ meuˬ,

¹⁸Baˬlaˆ meuˬ, Yuˇdaˆ miˇ kʼahˬ bawˇ tsahˬ bawˇ dahˇ-ahˇ jaˆ-eu Taˬmaˬ meuˬ,

¹⁹Aˬ yawꞈ-euˬ myawˬ gahˬ deuˬ bi jaˆ-euˬ meuˬ deuˬ, aˬ yawꞈ-euˬ mahˬ deuˬ hawˇ-eu mahˬ laˆ lawˬ deuˬ taˬ-euˬ meuˬ deuˬ, Yeˬluˇsaˬlehˬ meuˬ laꞈ kʼoeˇ maˬ ehˇ, Leˬbaˬnoˬ miˇ kʼahˬ laꞈ kʼoeˇ maˬ ehˇ, aˬ yawꞈ neh kʼaˇ uˆ lahˇ-euˬ miˇ kʼahˬ yawˬ gaˇ na luꞈ maˬ ehˇ, aˬ yawꞈ neh kʼaˇ tsoˆ-euˬ jeˬ hawˇ-eu kʼaˇ mˇ kʼaˇ shaˇ-euˬ jeˬ laꞈ kʼoeˇ, tsawˇ haˬ paˆ-awˇ myawˬ kʼaˆ bi mˇ-euˬ meh.

²⁰Iˇsaˬleˬlaˆ tsawˇ haˬ deuˬ Kaˬnaˬ miˇ kʼahˬ-ahˇ jawˇ uˇ laˇ ngeh, Iˇsaˬleˬlaˆ tsawˇ haˬ deuˬ neh maˬ sehꞈ ni taˬ nehˬ-euˬ Kaˬnaˬ miˇ kʼahˬ laꞈ kʼoeˇ jawˇ-eu tsawˇ jeuˬ deuˬ-euˬ zaˬ deuˬ uˆ deuˬ-ahˇ, myawˬ kʼaˆ mˇ-eu gaˇ laꞈ kʼoeˇ sahˬ paˬ Sawˇlaˬmoˬ zmˬ-euˬ meh. Tsawˇ jeuˬ kʼoeˇ deuˬ-aˬ, Aˬmoˬ tsawˇ jeuˬ, Heˬtaˆ tsawˇ jeuˬ, Paˬyehˆ tsawˇ jeuˬ, Hiˇbiˇ tsawˇ jeuˬ, Yeˬbuˇ tsawˇ jeuˬ heu deuˬ pyeuꞈ-awˇ, aˬ yawꞈ maꞈ-euˬ zaˬ deuˬ uˆ deuˬ tiˬ ziˇ saˇ-iˬ tiˬ ziˇ zaˬ kʼaˆ geuꞈ ka leꞈ-euˬ meh.

²¹

²²Sawˇlaˬmoˬ-aˬ, Iˇsaˬleˬlaˆ tsawˇ haˬ deuˬ-ahˇ zaˬ kʼaˆ maˬ bi geuꞈ ni, aˬ yawꞈ-euˬ yehˇ deuˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ, aˬ yawꞈ-euˬ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ, mahˬ laˆ lawˬ teh-eu yehˇ deuˬ hawˇ-eu, mahˬ bo saˆ-eu yehˇ deuˬ bi geuꞈ-euˬ meh.

²³Meuˬ teˬ pu tsoˆ-eu gaˇ laꞈ kʼoeˇ, Sawˇlaˬmoˬ neh myawˬ kʼaˆ bi mˇ-euˬ tsawˇ haˬ deuˬ-ahˇ haw-eu pyaˆ-eu aˬ yuiꞈ aˬ tsu ngaˬ yaˇ ngaˬ tseˇ gʼaˬ jawˇ-eu meh.

²⁴Sawˇlaˬmoˬ-euˬ miˬ zaˬ Iˇjiˇtuˆ sahˬ paˬ zaˬ miˬ gʼaˬ-aˬ, Daˬbiˇ-euˬ meuˬ lehˇ kuˇ-eu tsahˇ-ahˇ neh, Sawˇlaˬmoˬ neh aˬ yawꞈ gʼaˇ duˬ tsoˆ nehˬ-euˬ hawˇ nymˇ-ahˇ jawˇ uˇ leˇ gʼaˬ ngeh, meuˬ-euˬ nahˇ ma doˆ kʼehˬ paw coeˇ-ahˇ Sawˇlaˬmoˬ miˇ tsaˬ bi pi dzm-euˬ meh.

²⁵Sawˇlaˬmoˬ-aˬ, aˬ yawꞈ neh Sahˬpaˬ Miˬyehˇ gʼaˇ duˬ tsoˆ taˬ-euˬ lawˇ duˬ kʼoeˇ taˆ, miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ, tiˬ kʼoꞈ smˬ poˆ lawˇ-euˬ meh. Tsiˇ yaw saw jeˬ kʼawꞈ aˬ yawꞈ doꞈ-awˇ, Sahˬpaˬ Miˬyehˇ-ahˇ damˬ nehˬ-euˬ meh. Kʼoeˇ naˇ, Uˬ duˬ tahˬ nymˇ nymˇ ma tsoˆ-eu gaˇ kʼoeˇ hmˬ aˬ yawꞈ mˇ gʼaˬ-euˬ meh.

²⁶Eˬdoˬ miˇ kʼahˬ laꞈ kʼoeˇ, Aˬgaˬbaˬ lehˇ kuˇ-eu iˬ ma laˆ shaˆ lahˇ gʼoꞈ-euˬ lawˇ deh-ahˇ jaˆ-eu Eˇlaˆ meuˬ dawˬ peh, Eˬzoˇgeˇbaˬ meuˬ-ahˇ, saˇ baoˬ taˆ tiˬ taˆ Sawˇlaˬmoˬ tsoˆ taˬ-euˬ meh.

²⁷Sahˬ paˬ Hiˇlamˬ-aˬ, iˬ ma laˆ shaˆ laꞈ kʼoeˇ cah haw-euˬ aˬ yawꞈ-euˬ tsawˇ haˬ deuˬ pyehˬ gʼeh-awˇ, Sawˇlaˬmoˬ-euˬ tsawˇ haˬ deuˬ nehˬ-ehˇ gaˇ bi mˇ-euˬ meh.

²⁸Awˇpiˇlaˆ miˇ kʼahˬ paw aˬ yawꞈ maꞈ saˇ baoˬ dziˬ gʼeh-awˇ, Sawˇlaˬmoˬ-ahˇ shuiˇ gʼoeˬ heˇ koꞈ yaˇ jawꞈ-i ehˇ gʼaˬ ni tawˬ kʼoꞈ nehˬ laꞈ-euˬ meh.