Read Akha 2 Sahˬpaˬ 1 Bible Online

2 Sahˬpaˬ 1 - Akha bible

2 Sahˬpaˬ 1

¹Iˇsaˬleˬlaˆ sahˬ paˬ Aˬhaˆ shiˇ ngeh jawˇ, Mawˇbaˆ miˇ kʼahˬ Iˇsaˬleˬlaˆ miˇ kʼahˬ-ahˇ puiˬ-euˬ meh.

²Sahˬpaˬ Aˬhaˬziˇ-aˬ, Yeˬluˇsaˬlehˬ meuˬ-ahˇ jaˆ-eu aˬ yawꞈ-euˬ nymˇ kʼoeˇ taˆ tiˆ guiˇ ga-ahˇ neh ga ka-awˇ, yaw kʼaˆ-ehˇ gaˬ naˇ-euˬ meh. Kʼoeˇ miˇ neh, Eˇkaˬloˬ meuˬ-ahˇ Piˇliˇtiˆ miˬ yehˇ Baˬlaˇzeˬbuˇ jawˇ gaˇ aˬ yawꞈ tsawˇ haˬ kʼehˇ gʼeh-awˇ, aˬ yawꞈ naˇ-eu taˬ leˇ nya paˬ-ehˇ gʼeh ngaˇ loˇ lehˇ bi naˇ haˬ-iˇ-euˬ meh.

³Ehˇ kʼawꞈ, Tiˇshaˬbeˬ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Eˇliˇyaˆ-ahˇ, Sahˬpaˬ Miˬyehˇ-euˬ mˬ taˆ gʼaˬ kʼehˇ heu loꞈ-ehˇ ehˇ nehˬ le-euˬ meh. “Sahˬ paˬ Aˬhaˆ neh kʼehˇ gʼeh-euˬ tsawˇ haˬ kʼoeˇ deuˬ jawˇ gaˇ le-awˇ, heu loꞈ-ehˇ, ehˇ nehˬ-awˬ. Iˇsaˬleˬlaˆ miˇ kʼahˬ laꞈ kʼoeˇ Miˬyehˇ maˬ jawˇ-eu miˇ neh, Eˇkaˬloˬ miˬ yehˇ Baˬlaˇzeˬbuˇ-ahˇ naw maꞈ gʼoe-iˇ-eu lehˇ gʼeh te loˇ.

⁴Nawˇ naˇ-eu maˬ taˬ leˇ nya-ehˇ ya shiˇ tehꞈ-a lehˇ Sahˬpaˬ Miˬyehˇ ehˇ-eu meh lehˇ, naw maꞈ-euˬ sahˬ paˬ-ahˇ ehˇ nehˬ leˇ-awˬ lehˇ, tsawˇ haˬ kʼoeˇ deuˬ-ahˇ ehˇ nehˬ-awˬ.” Kʼoeˇ ngeh, Sahˬpaˬ Miˬyehˇ neh kʼaˇ bi ehˇ-euˬ loꞈ-ehˇ, tsawˇ haˬ kʼoeˇ deuˬ-ahˇ Eˇliˇyaˆ ehˇ nehˬ-iˇ-euˬ meh.

⁵Tsawˇ haˬ kʼoeˇ deuˬ sahˬ paˬ jawˇ gaˇ gʼoꞈ leˇ ngeh, “Naw maꞈ aˬ jeˬ miˇ neh gʼoꞈ laˇ teˬ” lehˇ, aˬ yawꞈ maꞈ-ahˇ sahˬ paˬ naˇ haˬ-euˬ meh.

⁶Aˬ yawꞈ maꞈ ehˇ-eu, “Tsawˇ haˬ tiˬ gʼaˬ nga maꞈ-ahˇ tahˬ puˬ le-awˇ, heu loꞈ-ehˇ ehˇ-eu meh. ‘Naw maꞈ-ahˇ pyehˬ gʼeh leꞈ-euˬ sahˬ paˬ jawˇ gaˇ gʼoꞈ leˇ-awˇ, Sahˬpaˬ Miˬyehˇ heu loꞈ-ehˇ ehˇ-eu gaˇ kawˆ ehˇ nehˬ leˇ-awˬ. Eˇkaˬloˬ miˬ yehˇ Baˬlaˇzeˬbuˇ-ahˇ mehˬ bawˬ bi mˇ-iˇ-eu lehˇ, aˬ jeˬ miˇ neh nawˇ tsawˇ haˬ kʼehˇ gʼeh teˬ. Iˇsaˬleˬlaˆ miˇ kʼahˬ laꞈ kʼoeˇ Miˬyehˇ maˬ jawˇ-a lehˇ nawˇ noeˬ-eu miˇ neh teu loꞈ-ehˇ jahˇ te loˇ. Nawˇ naˇ luꞈ-eu maˬ taˬ leˇ nya-ehˇ ya shiˇ tehꞈ-a lehˇ Sahˬpaˬ Miˬyehˇ ehˇ-eu meh lehˇ, ehˇ nehˬ leˇ-awˬ’ lehˇ, tsawˇ haˬ kʼoeˇ gʼaˬ nga maꞈ-ahˇ ehˇ-eu meh.”

⁷Aˬ yawꞈ maꞈ-ahˇ sahˬ paˬ naˇ haˬ-eu, “Tsawˇ haˬ kʼoeˇ gʼaˬ aˬ joˆ-ehˇ gʼeh-eu tsawˇ haˬ-a.”

⁸Aˬ yawꞈ maꞈ ehˇ-eu, “Tsawˇ haˬ kʼoeˇ gʼaˬ jeˬ zaˬ baˆ kʼoˆ dm luꞈ-awˇ, shaˬ kʼoˆ joꞈ paꞈ paꞈ luꞈ-eu meh.” Sahˬ paˬ ehˇ-eu, “Tsawˇ haˬ kʼoeˇ gʼaˬ Eˇliˇyaˆ miˇ-a.”

⁹Kʼoeˇ naˇ, Eˇliˇyaˆ-ahˇ bi nyehꞈ-iˇ-eu gʼaˇ duˬ, yaw huiˬ yaw mahˇ tiˬ gʼaˬ-ahˇ tsawˇ haˬ ngaˬ tseˇ gʼaˬ sheuˬ-awˇ bi iˇ-euˬ meh. Gawˬ duˇ-ahˇ Eˇliˇyaˆ nuiˇ luꞈ gaˇ tsawˇ haˬ kʼoeˇ gʼaˬ mawˇ-awˇ, “Miˬyehˇ-euˬ tsawˇ haˬ-oˇ, nawˇ zaꞈ ka le-awˬ lehˇ sahˬ paˬ dawˬ biꞈ laꞈ-euˬ meh” lehˇ ehˇ nehˬ-euˬ meh.

¹⁰Eˇliˇyaˆ ehˇ-eu, “Ngaˇ Miˬyehˇ-euˬ tsawˇ haˬ ngeuˇ lawˬ naˇ, mˬ kʼoeˇ taˆ neh miˬ dzaˬ ga le-awˇ, nawˇ hawˇ-eu nawˬ-euˬ tsawˇ haˬ deuˬ-ahˇ puiˆ sehꞈ luꞈ-uˇ” lehˇ, Eˇliˇyaˆ ehˇ kʼoꞈ nehˬ-euˬ meh. Kʼoeˇ ngeh, ja pyuˬ ni mˬ kʼoeˇ taˆ neh miˬ dzaˬ ga le-awˇ, yaw huiˬ yaw mahˇ kʼoeˇ gʼaˬ hawˇ-eu aˬ yawꞈ-euˬ tsawˇ haˬ deuˬ-ahˇ puiˆ sehꞈ-euˬ meh.

¹¹Yaw huiˬ yaw mahˇ yawˬ gʼaˬ yawˬ-ahˇ sahˬ paˬ paˇ kʼehˇ-awˇ, tsawˇ haˬ ngaˬ tseˇ gʼaˬ sheuˬ-awˇ paˇ bi iˇ-euˬ meh. Yaw huiˬ yaw mahˇ kʼoeˇ gʼaˬ Eˇliˇyaˆ jawˇ gaˇ iˇ-awˇ, “Miˬyehˇ-euˬ tsawˇ haˬ-oˇ, nawˇ yaw kawˇ ma-ehˇ zaꞈ ka le-awˬ lehˇ sahˬ paˬ dawˬ biꞈ leꞈ-euˬ meh” lehˇ ehˇ nehˬ-euˬ meh.

¹²Eˇliˇyaˆ ehˇ-eu, “Ngaˇ Miˬyehˇ-euˬ tsawˇ haˬ ngeuˇ lawˬ naˇ, mˬ kʼoeˇ taˆ neh miˬ dza ga le-awˇ, nawˇ hawˇ-eu nawˬ-euˬ tsawˇ haˬ deuˬ-ahˇ puiˆ sehꞈ luꞈ-uˇ.” Kʼoeˇ loꞈ-ehˇ ehˇ gʼaˬ ngeh, ja pyuˬ ni mˬ kʼoeˇ taˆ neh miˬ dzaˬ ga le -awˇ, yaw huiˬ yaw mahˇ kʼoeˇ gʼaˬ hawˇ-eu aˬ yawꞈ-euˬ tsawˇ ha deuˬ-ahˇ puiˆ sehꞈ-euˬ meh.

¹³Yaw huiˬ yaw mahˇ yawˬ gʼaˬ yawˬ-ahˇ sahˬ paˬ tiˬ poˆ paˇ kʼehˇ-awˇ, tsawˇ haˬ ngaˬ tseˇ gʼaˬ sheuˬ-awˇ paˇ bi iˇ-euˬ meh. Yaw huiˬ yaw mahˇ kʼoeˇ gʼaˬ gawˬ duˇ-ahˇ daˆ leˇ-awˇ, Eˇliˇyaˆ-euˬ mehˬ shi pawˬ tsuiꞈ pawˬ dmˬ dmˬ-eu laꞈ kʼoeˇ ehˇ-eu, “Miˬyehˇ-euˬ tsawˇ haˬ-oˇ, ngaˇ hawˇ-eu ngaˬ-euˬ tsawˇ haˬ deuˬ-ahˇ gʼawˬ shaˬ gaˬ-eu laꞈ kʼoeˇ taˬ bi shiˇ nehˬ laꞈ.

¹⁴Yaw huiˬ yaw mahˇ kʼoeˇ nyiˬ gʼaˬ hawˇ-eu aˬ yawꞈ nyaꞈ-euˬ tsawˇ haˬ deuˬ-ahˇ, mˬ kʼoeˇ taˆ neh miˬ dzaˬ ga le-awˇ puiˆ sehꞈ-euˬ meh. Ehˇ kʼawꞈ, ngaˬ-ahˇ gʼawˬ shaˬ gaˬ neh laꞈ-awˬ.”

¹⁵Sahˬpaˬ Miˬyehˇ-euˬ mˬ taˆ gʼaˬ kʼehˇ Eˇliˇyaˆ-ahˇ ehˇ nehˬ-eu,“Maˬ guˆ ni tsawˇ haˬ heu gʼaˬ nehˬ-ehˇ iˇ gʼeh-awˬ” lehˇ, Kʼoeˇ ngeh poˆ jawˇ, yaw huiˬ yaw mahˇ kʼoeˇ gʼaˬ nehˬ-ehˇ tiˬ kawˆ loꞈ-ehˇ, sahˬ paˬ jawˇ gaˇ Eˇliˇyaˆ iˇ-euˬ meh.

¹⁶Sahˬ paˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ heu loꞈ-ehˇ ehˇ-eu meh. ‘Eˇkaˬloˬ miˬ yehˇ Baˬlaˇzeˬbuˇ jawˇ gaˇ nawˇ tsawˇ haˬ kʼehˇ gʼeh-awˇ mehˬ bawˬ bi mˇ-iˇ paˬ-ehˇ, Iˇsaˬleˬlaˆ miˇ kʼahˬ laꞈ kʼoeˇ nawˇ mehˬ bawˬ mˇ nya-eu Miˬyehˇ maˬ jawˇ-ehˇ pyeuꞈ-iˇ taˬ loˇ. Kʼoeˇ loꞈ-ehˇ mˇ-euˬ baˬ da neh, nawˬ-euˬ naˇ gawˇ maˬ paˇ taˬ leˇ nya-ehˇ ya shiˇ tehꞈ-a’ lehˇ ehˇ-eu meh.”

¹⁷Sahˬpaˬ Miˬyehˇ neh Eˇliˇyaˆ-ahˇ kʼehˇ-awˇ bi ehˇ-euˬ loꞈ-ehˇ, Aˬhaˬziˇ shiˇ-euˬ meh. Aˬhaˬziˇ aˬ li maˬ jawˇ-eu miˇ neh, Yeˬhawˇshaˬpaˇ-euˬ aˬ li Yeˬhawˇlamˬ gʼaˬ Yuˇdaˆ miˇ kʼahˬ-ahˇ uˆ lahˇ-euˬ nyiˬ kʼoꞈ tiˬ kʼoꞈ-ahˇ, Aˬhaˬziˇ-euˬ aˬ nyiˇ Yoˇlamˬ Iˇsaˬleˬlaˆ sahˬ paˬ pyeuꞈ laˇ-euˬ meh.

¹⁸Sahˬ paˬ Aˬhaˬziˇ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.