Read Akha 2 Sahˬpaˬ 14 Bible Online

2 Sahˬpaˬ 14 - Akha bible

2 Sahˬpaˬ 14

¹Yeˬhawˇhaˆ-euˬ aˬ li Yeˬhawˇshaˆ gʼaˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ nyiˬ kʼoꞈ tiˬ kʼoꞈ-ahˇ, Yawˇshaˆ-euˬ aˬ li Aˬmaˬziˇ gʼaˬ Yuˇdaˆ sahˬ paˬ pyeuꞈ laˇ-euˬ meh.

²Aˬ yawꞈ sahˬ paˬ pyeuꞈ laˇ ngeh, aˇ kʼoꞈ nyiˬ tseˇ ngaˬ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ tseˇ gʼoeˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yeˬluˇsaˬlehˬ meuˬ-ahˇ jawˇ-eu Yeˬhawˇdeˬ meh.

³Aˬmaˬziˇ-aˬ, Sahˬpaˬ Miˬyehˇ nui ma tsaˬ-eu jeˬ mˇ-euˬ meh. Ehˇ kʼawꞈ, aˬ yawꞈ-euˬ aˬ poeˬ Daˬbiˇ-ahˇ maˬ dzaw geuꞈ ni, aˬ yawꞈ-euˬ aˬ da Yawˇshaˆ-ahˇ dzaw geuꞈ-awˇ dehꞈ-euˬ meh.

⁴Lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ aˬ yawꞈ maˬ laˆ cawˆ ni, miˇ kʼahˬ zaˬ deuˬ kʼoeˇ gaˇ lawˇ-eu shehˇ-eu jeˬ mˇ-awˇ, yaw saw jeˬ doꞈ damˬ-euˬ meh.

⁵Aˬmaˬziˇ-aˬ, miˇ kʼahˬ-ahˇ uˆ lahˇ-eu baoˬ aˬ yawꞈ-euˬ aˬ laꞈ laꞈ kʼoeˇ ziꞈ dah ni jaˆ laˇ ngeh, aˬ yawꞈ-euˬ aˬ da sahˬ paˬ Yawˇshaˆ-ahˇ sehꞈ-euˬ tsawˇ haˬ kʼoeˇ deuˬ-ahˇ sehꞈ-euˬ meh.

⁶Ehˇ kʼawꞈ, aˬ yawꞈ maꞈ-euˬ zaˬ deuˬ-ahˇ maˬ sehꞈ ni taˬ nehˬ-euˬ meh. Aˬ jeˬ miˇ neh ehˇ naˇ, Moˇseˬ-euˬ zahˇ dawˬ kʼoꞈ dawˬ laꞈ kʼoeˇ, Sahˬpaˬ Miˬyehˇ neh ehˇ taˬ-euˬ dawˬ-ahˇ aˬ yawꞈ caw teh-euˬ meh. Zahˇ dawˬ kʼoꞈ dawˬ laꞈ kʼoeˇ heu loꞈ-ehˇ ehˇ taˬ-euˬ meh. “Zaˬ deuˬ neh mˇ-euˬ iˬ baˇ baˬ da neh, aˬ ma aˬ da-ahˇ maˬ ya sehꞈ-a. Aˬ ma aˬ da deuˬ neh mˇ-euˬ iˬ baˇ baˬ da neh zaˬ deuˬ-ahˇ maˬ ya sehꞈ-a. Tsawˇ haˬ aˬ geu gʼaˬ-ahˇ maˬ kaˬ, yawˬ ha neh mˇ-euˬ iˬ baˇ baˬ da neh maˬ ngeuˇ naˇ, nui gʼaˬ neh mˇ-euˬ iˬ baˇ baˬ da neh maˬ ya sehꞈ-a.”

⁷Saˬdeuꞈ deh kʼawꞈ lehˇ kuˇ-eu tsahˇ-ahˇ, Eˬdoˬ tsawˇ haˬ tiˬ muiˇ gʼaˬ-ahˇ Aˬmaˬziˇ neh sehꞈ-euˬ meh. Seˇlaˇ meuˬ-ahˇ aˬ yawꞈ deuˆ za-awˇ, Yawˇkaˬdeˬlaˇ meuˬ lehˇ myahˇ paˇ nehˬ-euˬ loꞈ-ehˇ, iˬ nah keuˆ ni kʼoeˇ loꞈ-ehˇ kuˇ luꞈ-eu meh.

⁸Kʼoeˇ naˇ, sahˬ paˬ Yeˬhawˇshaˆ jawˇ gaˇ Aˬmaˬziˇ neh tsawˇ haˬ pyehˬ gʼeh-awˇ, “Guiˇ deuˆ ceh ceh kaˇ-euˇ” lehˇ bi ehˇ gaˬ leˇ-euˬ meh.

⁹Ehˇ kʼawꞈ, sahˬ paˬ Yeˬhawˇshaˆ neh heu loꞈ-ehˇ ehˇ kʼoꞈ nehˬ-euˬ meh. “Aˇ hu ba, Leˬbaˬnoˬ gawˬ jawˬ-ahˇ dehꞈ-eu aˬ gah baw duˆ tiˬ duˆ neh, shuˬ liˇ aˇ bawˇ-ahˇ, ‘Nawˬ buˇ ngaˬ li-ahˇ bi mˇ dzaˬ le-awˬ’ lehˇ bi ehˇ gaˬ leˇ-euˬ meh jeˇ. Kʼoeˇ ngeh, Leˬbaˬnoˬ gawˬ jawˬ-ahˇ jawˇ-eu bawˇ tsahˬ jeˬ zaˬ tiˬ mawˇ oe tsehˆ-awˇ, aˬ gah baw duˆ kʼoeˇ duˆ-ahˇ nawˬ lawˇ-euˬ meh jeˇ.

¹⁰Aˬmaˬziˇ-oˇ, Eˬdoˬ tsawˇ haˬ-ahˇ nawˇ guiˇ deuˆ gʼaˬ-euˬ miˇ neh, maˬ gaˇ ma lehˇ noeˬ-awˇ nui ma huiˬ luꞈ-eu nga laˬ. Nawˇ teu naˆ ni tsawˇ myahˇ doˆ-eu-aˬ, nui kʼahˇ shiˇ-awˇ iˇ kahˇ-ahˇ ciˬ cuˇ ni jawˇ-awˬ. Nawˇ hawˇ-eu nawˬ-euˬ miˇ kʼahˬ zaˬ deuˬ kʼoeˇ taˆ yaw cawˆ jeˬ keuˆ le ni, aˬ jeˬ gʼeh-eu leh jeh te.”

¹¹Ehˇ kʼawꞈ, Aˬmaˬziˇ maˬ naˇ haˬ-euˬ miˇ neh, sahˬ paˬ Yeˬhawˇshaˆ gʼaˬ aˬ yawꞈ-euˬ tsawˇ haˬ deuˬ sheuˬ-awˇ oe-awˇ, Yuˇdaˆ miˇ kʼahˬ Behˬsheˬmehˇ meuˬ-ahˇ, Yuˇdaˆ sahˬ paˬ Aˬmaˬziˇ-ahˇ guiˇ deuˆ-euˬ meh.

¹²Aˬmaˬziˇ-euˬ guiˇ maꞈ deuˬ guiˇ deuˆ smˬ-awˇ, aˬ yawꞈ-euˬ yehˇ dawˬ tawˆ luꞈ cehˆ gʼoꞈ jiˇ-euˬ meh.

¹³Yeˬhawˇshaˆ neh Aˬmaˬziˇ-ahˇ nyehꞈ-awˇ, Yeˬluˇsaˬlehˬ meuˬ-ahˇ le-awˇ, Eˇpaˬleˬ lahˇ kʼehˬ-ahˇ neh Laꞈcoeˇ lahˇ kʼehˬ-ahˇ keuˆ ni jaˆ-eu, tiˬ yaˇ lmˇ mahˇ-eu meuˬ meuˬ lahˇ kʼoeˇ pyawˬ laˆ byaˆ yaꞈ-euˬ meh.

¹⁴Kʼaˇ mawˇ le-euˬ pyuˇ hawˇ-eu shuiˇ deuˬ maˬ ehˇ, Uˬ duˬ tahˬ nymˇ nymˇ ma-ahˇ jaˆ-eu keu ka deuˬ maˬ ehˇ, sahˬ paˬ-euˬ nymˇ-ahˇ kʼaˇ jaˆ-eu pyuˇ shuiˇ myawˬ gahˬ dawˬ tawˆ luꞈ maˬ ehˇ, aˬ yawꞈ neh yuˇ jiˇ-awˇ, Saˬmaˬliˆ meuˬ-ahˇ yuˇ kʼoꞈ gʼeh-euˬ meh. Tsawˇ haˬ tiˬ paˆ na deuˬ-ahˇ kʼawꞈ, aˬ yawꞈ nyehꞈ daˆ leꞈ-euˬ meh.

¹⁵Yuˇdaˆ sahˬ paˬ Aˬmaˬziˇ-ahˇ kʼaˬ duˬ ni guiˇ deuˆ-euˬ gaˇ kawˆ ahˇ leˇ-ehˇ, Yeˬhawˇshaˆ neh kʼaˇ mˇ kʼaˇ shaˇ-euˬ yawˬ jeˬ na luꞈ, Iˇsaˬleˬlaˆ sahˬ paˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹⁶Yeˬhawˇshaˆ ziˇ jiˇ-awˇ, Saˬmaˬliˆ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Yeˬyawˇbamˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.

¹⁷Yuˇdaˆ sahˬ paˬ Aˬmaˬziˇ-aˬ, Iˇsaˬleˬlaˆ sahˬ paˬ Yeˬhawˇshaˆ shiˇ gʼaˬ miˇ tsa, tseˇ ngaˬ kʼoꞈ paˇ dehꞈ-euˬ meh.

¹⁸Aˬmaˬziˇ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

¹⁹Yeˬluˇsaˬlehˬ meuˬ laꞈ kʼoeˇ, Aˬmaˬziˇ-ahˇ aˬ cawˬ sehꞈ kʼoeˬ-eu lehˇ lehˬ hmˬ luꞈ-eu miˇ neh, Laˬkiˇshaˆ meuˬ-ahˇ cehˆ-euˬ meh. Ehˇ kʼawꞈ, aˬ yawꞈ-ahˇ muiˇ-eu deuˬ kʼoeˇ gaˇ keuˆ ni caw teh-iˇ-awˇ, aˬ yawꞈ-ahˇ sehꞈ-euˬ meh.

²⁰Aˬ yawꞈ-euˬ gʼawˇ mawˇ-ahˇ mahˬ neh tawˬ-awˇ, Yeˬluˇsaˬlehˬ meuˬ-ahˇ tawˬ kʼoꞈ gʼeh-awˇ, Daˬbiˇ-euˬ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh.

²¹Kʼoeˇ naˇ, tseˇ koꞈ kʼoꞈ byah laˇ-euˬ aˬ yawꞈ-euˬ aˬ li Awˇziˇ-ahˇ Yuˇdaˆ miˇ kʼahˬ zaˬ deuˬ neh sahˬ paˬ ka nehˬ-euˬ meh.

²²Aˬ yawꞈ-euˬ aˬ da shiˇ dzeuˇ gʼaˬ naˇ kah, Eˇlaˆ meuˬ-ahˇ Awˇziˇ neh paˇ deuˆ za kʼoꞈ-awˇ tsoˆ muiˬ geuꞈ-euˬ meh.

²³Yawˇshaˆ-euˬ aˬ li Aˬmaˬziˇ gʼaˬ Yuˇdaˆ miˇ kʼahˬ-ahˇ uˆ lahˇ-eu tseˇ ngaˬ kʼoꞈ tiˬ kʼoꞈ-ahˇ, Yeˬhawˇshaˆ-euˬ aˬ li Yeˬyawˇbamˬ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ oeˬ tseˇ tiꞈ kʼoꞈ uˆ lahˇ-euˬ meh.

²⁴Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu Neˬbaˇ-euˬ aˬ li sahˬ paˬ Yeˬyawˇbamˬ neh mˇ-euˬ yaw haiˬ jeˬ mehˬ nah aˬ yawꞈ caw teh-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

²⁵Laꞈ taˆ paw pyawˬ-ahˇ jaˆ-eu Haˬmaˆ gʼaˬ lahˇ-ahˇ neh, laꞈ oˆ paw pyawˬ-ahˇ jaˆ-eu Shiˇ-eu iˬ ma laˆ shaˆ-ahˇ keuˆ ni, Iˇsaˬleˬlaˆ miˇ kʼahˬ dawˬ tawˆ luꞈ-ahˇ aˬ yawꞈ paˇ deuˆ za kʼoꞈ geuꞈ-euˬ meh. Kʼoeˇ loꞈ-ehˇ pyeuꞈ laˇ tehꞈ-a lehˇ, Miˬyehˇ gʼaˇ duˬ ngehˬ dah-eu Yawˇnaˆ-ahˇ gʼoe-awˇ Sahˬpaˬ Miˬyehˇ neh ehˇ taˬ-euˬ dawˬ jaˆ-eu meh. Yawˇnaˆ-aˬ, Gaˬdaˇheˬpaˬ meuˬ-ahˇ jawˇ-eu Aˬmiˇtehˇ-euˬ aˬ li meh.

²⁶Iˇsaˬleˬlaˆ tsawˇ haˬ deuˬ kʼehˬ-eu kʼaˆ-eu jeˬ-ahˇ yaw kʼaˆ-ehˇ ya daˬ luꞈ gaˇ, Sahˬpaˬ Miˬyehˇ mawˇ-euˬ meh. Aˬ yawꞈ maꞈ-ahˇ ngehˬ gʼeh-eu tiˬ gʼaˬ-iˬ maˬ jawˇ-a.

²⁷Ehˇ kʼawꞈ, Iˇsaˬleˬlaˆ tsawˇ haˬ deuˬ mˬ maˬ maˬ byaˆ zaˇ ziˇ cawˆ-iˇ gaˇ Sahˬpaˬ Miˬyehˇ maˬ geuꞈ mawꞈ-a. Kʼoeˇ miˇ neh, sahˬ paˬ Yeˬyawˇbamˬ-ahˇ gʼoe-awˇ, aˬ yawꞈ maꞈ-ahˇ ka kʼoꞈ nehˬ-euˬ meh.

²⁸Yeˬyawˇbamˬ neh kʼaˬ duˬ ni guiˇ deuˆ-euˬ gaˇ kawˆ maˬ ehˇ, Daˬmaˬsehˇ meuˬ hawˇ-eu Haˬmaˆ meuˬ-ahˇ Iˇsaˬleˬlaˆ miˇ kʼahˬ laꞈ kʼoeˇ deuˆ ahˇ geuꞈ-euˬ gaˇ kawˆ maˬ ehˇ, aˬ yawꞈ neh kʼaˇ mˇ kʼaˇ shaˇ-euˬ yawˬ jeˬ na luꞈ maˬ ehˇ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁹Yeˬyawˇbamˬ ziˇ jiˇ-awˇ, sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Zaˬkaˬliˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.