Read Akha 2 Sahˬpaˬ 17 Bible Online

2 Sahˬpaˬ 17 - Akha bible

2 Sahˬpaˬ 17

¹Sahˬ paˬ Aˬkaˆ Yuˇdaˆ miˇ kʼahˬ-ahˇ uˆ lahˇ-euˬ tseˇ kʼoꞈ tiˬ kʼoꞈ-ahˇ, Eˇlahˬ-euˬ aˬ li Awˇsheˬ gʼaˬ, Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ gʼoeˬ kʼoꞈ uˆ lahˇ-euˬ meh.

²Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ kʼawꞈ, aˬ yawꞈ-euˬ mehˬ hu Iˇsaˬleˬlaˆ miˇ kʼahˬ-ahˇ uˆ lahˇ dzeuˇ yaꞈ-euˬ deuˬ naˆ ni maˬ mˇ keuˆ-a.

³Aˬshuˇliˆ sahˬ paˬ Shaˬmaˬneˬzaˬ gʼaˬ aˬ yawꞈ-ahˇ guiˇ deuˆ laˇ-euˬ meh. Awˇsheˬ laꞈ oꞈ awꞈ-awˇ, aˬ yawꞈ kʼoꞈ yawꞈ kawˬ doˆ nehˬ-euˬ meh.

⁴Ehˇ kʼawꞈ, tiˬ kʼoꞈ-aˬ, Soˇ lehˇ myahˇ-euˬ Iˇjiˇtuˆ sahˬ paˬ jawˇ gaˇ Awˇsheˬ tsawˇ haˬ pyehˬ gʼeh-awˇ, laꞈ jeuˬ shaˇ-eu laꞈ kʼoeˇ, Aˬshuˇliˆ miˇ kʼahˬ-ahˇ kawˬ maˬ doˆ nehˬ ni jawˇ-euˬ meh. Gaˇ kawˆ kʼoeˇ Shaˬmaˬneˬzaˬ ya siˬ ngeh, Awˇsheˬ-ahˇ nyehꞈ-awˇ, tawˬ-ahˇ dawˆ-euˬ meh.

⁵Kʼoeˇ naˇ, Aˬshuˇliˆ sahˬ paˬ Shaˬmaˬneˬzaˬ-aˬ, Iˇsaˬleˬlaˆ miˇ kʼahˬ-ahˇ uˇ le-awˇ, Saˬmaˬliˆ meuˬ-ahˇ smˇ kʼoꞈ byah ni loꞈ jawˬ taˬ-euˬ meh.

⁶Awˇsheˬ sahˬ paˬ geuꞈ-euˬ gʼoeˬ kʼoꞈ tiˬ kʼoꞈ-ahˇ, Aˬshuˇliˆ sahˬ paˬ neh Saˬmaˬliˆ meuˬ-ahˇ deuˆ gʼaˬ-awˇ, Iˇsaˬleˬlaˆ tsawˇ haˬ deuˬ-ahˇ Aˬshuˇliˆ miˇ kʼahˬ-ahˇ nyehꞈ daˆ gʼeh-euˬ meh. Tiˬ paˆ na deuˬ-ahˇ Haˬlahˬ meuˬ-ahˇ bi jawˇ-awˇ, tiˬ paˆ na deuˬ-ahˇ Haˬbawˬ lawˇ baˬ dawˬ peh Goˇzaˬ gahˬ kaˬ-ahˇ bi jawˇ-euˬ meh. Tiˬ paˆ na deuˬ-ahˇ-aˬ, Meˬdiˇ miˇ kʼahˬ laꞈ kʼoeˇ jaˆ-eu meuˬ deuˬ-ahˇ bi jawˇ-euˬ meh.

⁷Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-ahˇ Iˇjiˇtuˆ sahˬ paˬ-euˬ aˬ laꞈ laꞈ kʼoeˇ neh ka kʼoꞈ-awˇ sheuˬ doˆ nehˬ-euˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi iˬ baˇ mˇ-euˬ miˇ neh, Saˬmaˬliˆ meuˬ-ahˇ aˬ cawˬ neh bi deuˆ gʼaˬ-euˬ meh. Miˬyehˇ nui deuˬ-ahˇ aˬ yawꞈ maꞈ uˬ duˬ tahˬ-euˬ meh.

⁸Sahˬpaˬ Miˬyehˇ-euˬ tsawˇ jeuˬ pyeuꞈ-eu aˬ yawꞈ maꞈ jawˇ uˇ leˇ ngeh, Sahˬpaˬ Miˬyehˇ neh teh doˆ nehˬ-euˬ tsawˇ haˬ kʼoeˇ deuˬ-euˬ zahˇ sahˇ kʼoꞈ-ahˇ aˬ yawꞈ maꞈ caw teh-awˇ, Iˇsaˬleˬlaˆ sahˬ paˬ deuˬ neh beh taˬ yaꞈ-euˬ zahˇ sahˇ kʼoꞈ deuˬ-ahˇ ha geuꞈ-euˬ meh.

⁹Sahˬpaˬ Miˬyehˇ nui ma maˬ tsaˬ-eu jeˬ aˬ yawꞈ maꞈ mˇ-awˇ, pu pu zaˬ tiˬ pu-ahˇ neh meuˬ meuˬ ma tiˬ meuˬ-ahˇ keuˆ ni, yawˬ gaˇ na luꞈ lawˇ ciꞈ zaˬ uˬ duˬ tahˬ-eu jawˇ duˬ bi jaˆ-euˬ meh.

¹⁰Gawˬ duˇ aˬ yawꞈ duˇ yawꞈ kʼoeˇ taˆ hawˇ-eu, aˇ bawˇ naˇ shmˇ kʼaˇ muiˬ gaˇ, kʼaˬ lo kʼawˇ zeuˇ hawˇ-eu Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ aˬ yawꞈ maꞈ ka tuˇ taˬ-euˬ meh.

¹¹Miˇ kʼahˬ kʼoeˇ kʼahˬ laꞈ kʼoeˇ Sahˬpaˬ Miˬyehˇ neh teh doˆ nehˬ-euˬ tsawˇ haˬ kʼoeˇ deuˬ-ahˇ aˬ yawꞈ maꞈ dzaw geuꞈ-awˇ, lawˇ ciꞈ zaˬ deuˬ-euˬ lawˇ duˬ kʼoeˇ deuˬ kʼoeˇ taˆ, aˬ yawꞈ maꞈ yaw saw jeˬ doꞈ damˬ-euˬ meh. Aˬ yawꞈ maꞈ neh mˇ-euˬ yaw haiˬ jeˬ dawˬ tawˆ luꞈ baˬ da neh, Sahˬpaˬ miˬyehˇ nui ma bi pehˇ-euˬ meh.

¹²Tahˬ pahˬ aˬ ma mawˇ kawˇ deuˬ-ahˇ uˬ duˬ taˬ tahˬ lehˇ ehˇ taˬ-euˬ Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ, aˬ yawꞈ maꞈ maˬ naˇ haˬ geuꞈ-a.

¹³Sahˬpaˬ Miˬyehˇ-aˬ, aˬ yawꞈ-euˬ gʼaˬ kʼehˇ deuˬ hawˇ-eu aˬ yawꞈ-euˬ gʼaˇ duˬ ngehˬ dah-eu tsawˇ haˬ deuˬ pyehˬ gʼeh leꞈ-awˇ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ-ahˇ heu loꞈ-ehˇ bi ehˇ le-euˬ meh. “Naw maꞈ mˇ luꞈ-eu yaw haiˬ jeˬ-ahˇ byehˇ dzeh-awˇ, naw maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ zahˇ dawˬ kʼoꞈ dawˬ laꞈ kʼoeˇ ahˇ-eu dawˬ deuˬ hawˇ-eu, ngaˬ-euˬ zaˬ kʼaˆ deuˬ hawˇ-eu ngaˬ-euˬ gʼaˇ duˬ ngehˬ dah-eu deuˬ-ahˇ gʼoe-eu laꞈ kʼoeˇ, ngaˇ naw maꞈ-ahˇ biꞈ taˬ-euˬ dawˬ deuˬ-ahˇ naˇ haˬ geuꞈ-awˬ.”

¹⁴Ehˇ kʼawꞈ, aˬ yawꞈ maꞈ maˬ naˇ haˇ geuꞈ-ehˇ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ maˬ jah-eu deuˬ pyeuꞈ-eu aˬ yawꞈ maꞈ-euˬ aˬ poeˬ aˬ bawˇ deuˬ loꞈ-ehˇ, nui ma gʼahˇ dui dui-eu meh.

¹⁵Aˬ yawꞈ neh mehˬ nehˬ tsoˆ nehˬ-euˬ jeˬ-ahˇ aˬ yawˬ maꞈ maˬ naˇ haˬ geuꞈ-ehˇ, aˬ yawꞈ neh aˬ yawꞈ maꞈ-euˬ aˬ poeˬ aˬ bawˇ deuˬ nehˬ-ehˇ dzaˬ taˬ-euˬ dawˬ ma saˇ jaˇ-ahˇ aˬ yawꞈ maꞈ maˬ caw teh-eu uˬ taꞈ, aˬ yawꞈ neh bi ehˇ nehˬ-euˬ dawˬ deuˬ aˬ yawꞈ maꞈ-euˬ naˬ bawˇ-ahˇ maˬ gaˬ leˇ-a. Gaˇ dahˇ maˬ tsoeˬ-eu tahˬ pahˬ aˬ ma mawˇ kawˇ deuˬ-ahˇ aˬ yawꞈ maꞈ uˬ duˬ tahˬ-awˇ, gaˇ dahˇ maˬ tsoeˬ-eu tsawˇ haˬ pyeuꞈ laˇ-euˬ meh. Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ maꞈ maˬ naˇ haˬ-ehˇ, aˬ yawꞈ maꞈ-euˬ tiˬ jawˬ jawˇ-eu tsawˇ jeuˬ deuˬ-euˬ zahˇ sahˇ kʼoꞈ mehˬ nah aˬ yawꞈ maꞈ caw teh-euˬ meh.

¹⁶Aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ deuˬ-ahˇ aˬ yawꞈ maꞈ byehˇ dzeh jiˇ-awˇ, aˬ yawꞈ maꞈ uˬ duˬ tahˬ-eu gʼaˇ duˬ, mawˇ neˇ mawˇ kawˇ nyiˬ kawˇ kʼaˇ-euˬ meh. Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ tiˬ kawˇ aˬ yawꞈ maꞈ tehˆ-awˇ, ba la hawˇ-eu aˬ guiˇ deuˬ-ahˇ uˬ duˬ tahˬ-eu uˬ taꞈ, Baˬlaˇ miˬyehˇ-ahˇ kʼawꞈ, uˬ duˬ tahˬ-euˬ meh.

¹⁷Aˬ yawꞈ maꞈ-euˬ aˬ buˇ aˬ li deuˬ-ahˇ miˬ dzaˬ dzah puiˆ-awˇ, lawˇ ciꞈ zaˬ-euˬ miˬyehˇ deuˬ-ahˇ lawˇ nehˬ-euˬ meh. Nyiˇ paˬ, shaˆ ma, boeˇ mawˬ deuˬ hawˇ-eu, ja maw nya-eu deuˬ-ahˇ aˬ yawꞈ maꞈ gʼoe-eu uˬ taꞈ, Sahˬpaˬ Miˬyehˇ mehˬ shi yaw lehˬ yaw ca jeˬ nui kʼahˇ tiˬ shiˇ mˇ-eu laꞈ kʼoeˇ, Sahˬpaˬ Miˬyehˇ-ahˇ nui ma laˆ pehˇ-euˬ meh.

¹⁸Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ laˇ-euˬ miˇ neh, maˬ mawˇ laˇ gaˇ teh dzeh nehˬ-awˇ, Yuˇdaˆ miˇ kʼahˬ tehꞈ-ehˇ bi dzeˇ yaꞈ-euˬ meh.

¹⁹Yuˇdaˆ tsawˇ haˬ deuˬ kʼawꞈ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ-ehˇ, Iˇsaˬleˬlaˆ tsawˇ haˬ deuˬ mˇ luꞈ-eu zahˇ sahˇ kʼoꞈ deuˬ-euˬ mehˬ nah caw teh-euˬ meh.

²⁰Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ nui ma naˇ dui dui-awˇ, doeˇ dui dui-eu muiˇ-eu tsawˇ haˬ deuˬ neh bi kʼehˬ-eu laꞈ kʼoeˇ, maˬ mawˇ laˇ gaˇ bi iˇ byoˆ jiˇ-euˬ meh.

²¹Yuˇdaˆ miˇ kʼahˬ laꞈ kʼoeˇ, Sahˬpaˬ Miˬyehˇ neh Iˇsaˬleˬlaˆ miˇ kʼahˬ biˇ doˆ nehˬ ngeh, Iˇsaˬleˬlaˆ tsawˇ haˬ deuˬ neh Neˬbaˇ-euˬ aˬ li Yeˬyawˇbamˬ-ahˇ sahˬ paˬ ka nehˬ-euˬ meh. Aˬ yawꞈ maꞈ Sahˬpaˬ Miˬyehˇ-ahˇ byehˇ dzeh ni Yeˬyawˇbamˬ mˇ-awˇ, huiˬ dui dui-eu iˬ baˇ mˇ-eu gʼaˇ duˬ, aˬ yawꞈ maꞈ-ahˇ aˬ yawꞈ sheuˬ gʼeh-euˬ meh.

²²Yeˬyawˇbamˬ-euˬ mehˬ nah aˬ yawꞈ maꞈ caw teh-awˇ, aˬ yawꞈ iˬ baˇ kʼaˇ mˇ-euˬ loꞈ-ehˇ aˬ yawꞈ maꞈ mˇ-euˬ meh.

²³Sahˬpaˬ Miˬyehˇ-euˬ zaˬ kʼaˆ deuˬ hawˇ-eu aˬ yawꞈ-euˬ gʼaˇ duˬ ngehˬ dah-eu deuˬ-ahˇ gʼoe-eu laꞈ kʼoeˇ, Sahˬpaˬ Miˬyehˇ neh kʼaˇ ehˇ taˬ-euˬ loꞈ-ehˇ, Sahˬpaˬ Miˬyehˇ maˬ mawˇ gaˇ maˬ bi teh dzeh jiˇ kʼoeˇ keuˆ ni, aˬ yawꞈ maꞈ kʼoeˇ loꞈ-ehˇ iˬ baˇ mˇ-euˬ meh. Kʼoeˇ miˇ neh Iˇsaˬleˬlaˆ tsawˇ haˬ kʼoeˇ deuˬ Aˬshuˇliˆ miˇ kʼahˬ-ahˇ bi nyehꞈ byoˆ gʼeh-awˇ, kʼoeˇ gaˇ ya jawˇ byoˆ-euˬ meh.

²⁴Aˬshuˇliˆ sahˬ paˬ-aˬ, Baˬbuˇloˬ meuˬ, Guˇdaˆ meuˬ, Iˇbaˬ meuˬ, Haˬmaˆ meuˬ, Seˬpaˬbeˬ meuˬ heu deuˬ-ahˇ jawˇ-eu tsawˇ haˬ deuˬ sheuˬ-awˇ, aˬ yawꞈ neh nyehꞈ daˆ gʼeh-euˬ Iˇsaˬleˬlaˆ tsawˇ haˬ kʼoeˇ deuˬ-euˬ jawˇ duˬ pyeuꞈ-eu Saˬmaˬliˆ meuˬ-ahˇ bi jawˇ-euˬ meh. Tsawˇ haˬ kʼoeˇ deuˬ meuˬ kʼoeˇ deuˬ laꞈ kʼoeˇ jawˇ geuꞈ le-euˬ meh.

²⁵Aˬ yawꞈ maꞈ kʼoeˇ gaˇ jawˇ beh beh le ngeh Sahˬpaˬ Miˬyehˇ-ahˇ uˬ duˬ maˬ tahˬ-eu miˇ neh, Sahˬpaˬ Miˬyehˇ neh aˇ laˬ jaˬ shiˇ pyehˬ gʼeh leꞈ-awˇ, aˬ yawꞈ maꞈ tiˬ paˆ na deuˬ-ahˇ bi kawꞈ sehꞈ-euˬ meh.

²⁶Aˬshuˇliˆ sahˬ paˬ neh Saˬmaˬliˆ meuˬ-ahˇ bi jawˇ le-euˬ tsawˇ haˬ kʼoeˇ deuˬ, miˇ kʼahˬ kʼoeˇ kʼahˬ-ahˇ jawˇ-eu miˬ yehˇ-euˬ zahˇ sahˇ kʼoꞈ maˬ siˬ nya-eu miˇ neh, miˬ yehˇ kʼoeˇ gʼaˬ neh aˇ laˬ jaˬ shiˇ pyehˬ leꞈ-awˇ aˬ yawꞈ maꞈ-ahˇ bi kawꞈ sehꞈ-euˬ gaˇ kawˆ, Aˬshuˇliˆ sahˬ paˬ-ahˇ aˬ cawˬ tsaꞈ gaˬ leˇ-euˬ meh.

²⁷Kʼoeˇ ngeh, “Tsawˇ haˬ kʼoeˇ deuˬ-ahˇ miˇ kʼahˬ kʼoeˇ kʼahˬ-ahˇ jawˇ-eu miˬ yehˇ-euˬ zahˇ sahˇ kʼoꞈ bi mehˬ-eu gʼaˇ duˬ, aˬ dui maꞈ neh nyehꞈ laꞈ-euˬ piˇ ma tiˬ gʼaˬ pyehˬ kʼoꞈ gʼeh-awˬ” lehˇ, Aˬshuˇliˆ sahˬ paˬ dawˬ biꞈ-euˬ meh.

²⁸Saˬmaˬliˆ meuˬ-ahˇ neh bi nyehꞈ daˆ gʼeh-euˬ piˇ ma tiˬ gʼaˬ, Beˬdeˬlaˇ meuˬ-ahˇ gʼoꞈ jawˇ le-awˇ, Sahˬpaˬ Miˬyehˇ-ahˇ aˬ joˆ-ehˇ uˬ duˬ ya tahˬ-eu gaˇ kawˆ mehˬ nehˬ-euˬ meh.

²⁹Ehˇ kʼawꞈ, Saˬmaˬliˆ meuˬ-ahˇ jawˇ-eu tsawˇ haˬ deuˬ-aˬ, aˬ yawꞈ maꞈ uˬ duˬ tahˬ-eu gʼaˇ duˬ tahˬ pahˬ aˬ ma mawˇ kawˇ tehˆ-awˇ, Iˇsaˬleˬlaˆ tsawˇ haˬ deuˬ neh tsoˆ taˬ-euˬ uˬ duˬ tahˬ nymˇ deuˬ laꞈ kʼoeˇ bi jaˆ-euˬ meh. Tsawˇ jeuˬ aˬ yawꞈ jeuˬ yawꞈ, yawˬ ha kʼaˇ jawˇ-eu meuˬ laꞈ kʼoeˇ tahˬ pahˬ aˬ ma mawˇ kawˇ tehˆ-euˬ meh.

³⁰Baˬbuˇloˬ meuˬ-ahˇ neh jawˇ le-euˬ deuˬ-aˬ, Suˇkoˆbeˬnoˆ miˬyehˇ-euˬ tahˬ pahˬ aˬ ma mawˇ kawˇ tehˆ-euˬ meh. Guˇdaˆ meuˬ-ahˇ neh jawˇ le-euˬ deuˬ-aˬ, Neˬlaˬgaˬlaˆ miˬyehˇ-euˬ tahˬ pahˬ aˬ ma mawˇ kawˇ tehˆ-euˬ meh. Haˬmaˆ meuˬ-ahˇ neh jawˇ le-euˬ deuˬ-aˬ, Aˬshiˇmaˬ miˬyehˇ-euˬ tahˬ pahˬ aˬ ma mawˇ kawˇ tehˆ-euˬ meh.

³¹Iˇbaˬ meuˬ-ahˇ neh jawˇ le-euˬ deuˬ-aˬ, Niˇbaˬhaˇ miˬ yehˇ hawˇ-eu Taˬtehˇ miˬ yehˇ-euˬ tahˬ pahˬ aˬ ma mawˇ kawˇ tehˆ-euˬ meh. Seˬpaˬbeˬ meuˬ-ahˇ neh jawˇ le-euˬ deuˬ-aˬ, aˬ yawꞈ maꞈ-euˬ aˬ buˇ aˬ li deuˬ miˬ dzaˬ-ahˇ dzah puiˆ-awˇ, aˬ yawꞈ maꞈ-euˬ Aˬdaˬlaˬmeˬlehˆ miˬ yehˇ hawˇ-eu Aˬnaˬmeˬlehˆ miˬ yehˇ-ahˇ lawˇ nehˬ-euˬ meh.

³²Tsawˇ haˬ kʼoeˇ deuˬ-aˬ, Sahˬpaˬ Miˬyehˇ-ahˇ kʼawꞈ, uˬ duˬ tahˬ-euˬ meh. Lawˇ ciꞈ zaˬ deuˬ uˬ duˬ tahˬ-euˬ jawˇ duˬ deuˬ-ahˇ piˇ ma bi geuꞈ-awˇ, aˬ yawꞈ maꞈ gʼaˇ duˬ kʼoeˇ gaˇ bi lawˇ bi shehˇ-eu gʼaˇ duˬ kʼawꞈ, smˇ muiˬ iˇ shaˬ maˬ haw-ehˇ, aˬ yawꞈ tiˆ yawꞈ laꞈ kʼoeˇ kʼaˇ dehꞈ luꞈ-eu tsawˇ haˬ dawˬ tawˆ luꞈ kuꞈ ni tseˇ doˆ taˬ-euˬ meh.

³³Aˬ yawꞈ maꞈ Sahˬpaˬ Miˬyehˇ-ahˇ uˬ duˬ tahˬ kʼawꞈ, aˬ yawꞈ maꞈ-euˬ miˇ kʼahˬ laꞈ kʼoeˇ aˬ yawꞈ maꞈ mˇ yaꞈ shaˇ yaꞈ-euˬ zahˇ sahˇ kʼoꞈ-ahˇ maˬ byehˇ dzeh ni, aˬ yawꞈ maꞈ-euˬ miˬ yehˇ deuˬ-ahˇ kʼawꞈ uˬ duˬ tahˬ-euˬ meh.

³⁴Iˬ nah keuˆ ni, zahˇ oeˇ maˬ byehˇ ni aˬ yawꞈ maꞈ tawˬ luꞈ-eu meh. Sahˬpaˬ Miˬyehˇ-ahˇ aˬ yawꞈ maꞈ uˬ duˬ maˬ tahˬ-ehˇ, Sahˬpaˬ Miˬyehˇ neh Iˇsaˬleˬlaˆ lehˇ myahˇ taˬ-euˬ Yaˬkoˆ-euˬ zaˬ deuˬ uˆ deuˬ-ahˇ Sahˬpaˬ Miˬyehˇ neh biꞈ taˬ-euˬ zahˇ dawˬ kʼoꞈ dawˬ deuˬ-ahˇ kʼawꞈ, aˬ yawꞈ maꞈ maˬ caw teh-a.

³⁵Yaˬkoˆ-euˬ zaˬ deuˬ uˆ deuˬ-ahˇ Sahˬpaˬ Miˬyehˇ saˇ jaˇ dzaˬ-awˇ, heu loꞈ-ehˇ ehˇ nehˬ taˬ-euˬ meh. “Miˬyehˇ nui deuˬ-ahˇ uˬ duˬ taˬ tahˬ. Miˬyehˇ kʼoeˇ deuˬ-euˬ mehˬ shi taˬ awˆ byaˆ. Aˬ yawꞈ maꞈ-euˬ zahˇ sahˇ kʼoꞈ mehˬ nah taˬ caw teh. Aˬ yawꞈ maꞈ-ahˇ taˬ lawˇ taˬ shehˇ.

³⁶Huiˬ dui dui-eu baoˬ hawˇ-eu gʼaˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ sheuˬ doˆ nehˬ laꞈ-euˬ gʼaˬ pyeuꞈ-eu ngaˇ ehˇ gaˇ naw maꞈ naˇ haˬ-awˬ. Ngaˬ-euˬ mehˬ shi awˆ byaˆ-awˇ, ngaˬ-ahˇ lawˇ-awˬ shehˇ-awˬ.

³⁷Ngaˬ neh naw maꞈ gʼaˇ duˬ boꞈ taˬ-euˬ zahˇ dawˬ kʼoꞈ dawˬ deuˬ hawˇ-eu, ngaˬ-euˬ ehˇ dawˬ-ahˇ naw maꞈ aˬ myah luꞈ naˇ haˬ geuꞈ-awˬ. Miˬyehˇ nui deuˬ-euˬ dawˬ naw maꞈ taˬ naˇ haˬ geuꞈ.

³⁸Ngaˬ neh naw maꞈ nehˬ-ehˇ dzaˬ taˬ-euˬ dawˬ ma saˇ jaˇ-ahˇ taˬ ngehˇ.

³⁹Miˬyehˇ nui deuˬ-ahˇ uˬ duˬ taˬ tahˬ. Naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˬ-euˬ ehˇ dawˬ naw maꞈ ya naˇ haˬ meh. Muiˇ-eu deuˬ-euˬ aˬ laꞈ laꞈ kʼoeˇ, naw maꞈ-ahˇ ngaˇ ka kʼoꞈ nehˬ ma.”

⁴⁰Ehˇ kʼawꞈ, aˬ yawꞈ-euˬ ehˇ dawˬ-ahˇ aˬ yawꞈ maꞈ maˬ naˇ haˬ geuꞈ ni, zahˇ oeˇ maˬ byehˇ dzeh ni tawˬ-euˬ meh.

⁴¹Tsawˇ haˬ kʼoeˇ deuˬ Sahˬpaˬ Miˬyehˇ-ahˇ uˬ duˬ tahˬ-euˬ kʼawꞈ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-ahˇ kʼawꞈ, uˬ duˬ tahˬ-euˬ meh. aˬ yawꞈ maꞈ-euˬ zaˬ deuˬ uˆ deuˬ iˬ nah keuˆ ni, kʼoeˇ loꞈ-ehˇ mˇ luꞈ shaˇ luꞈ-eu meh.