Read Akha 2 Sahˬpaˬ 18 Bible Online

2 Sahˬpaˬ 18 - Akha bible

2 Sahˬpaˬ 18

¹Eˇlahˬ-euˬ aˬ li sahˬ paˬ Awˇsheˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ smˇ kʼoꞈ tiˬ kʼoꞈ-ahˇ, Aˬkaˆ-euˬ aˬ li Heˬsaˬgiˇ Yuˇdaˆ sahˬ paˬ pyeuꞈ laˇ-euˬ meh.

²Aˬ yawꞈ nyiˬ tseˇ ngaˬ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ tseˇ gʼoeˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Zaˬkaˬliˇ-euˬ aˬ buˇ Aˬbiˇyaˬ meh.

³Aˬ yawꞈ-euˬ aˬ poeˬ sahˬ paˬ Daˬbiˇ-ahˇ aˬ yawꞈ dzaw geuꞈ-awˇ, Sahˬpaˬ Miˬyehˇ nui ma tsaˬ-eu jeˬ mˇ-euˬ meh.

⁴Lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ aˬ yawꞈ laˆ cawˆ-awˇ, kʼaˬ lo kʼawˇ zeuˇ deuˬ deh coˬ-awˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ tuˇ dzeh-euˬ meh. Neˬhuˇshaˬtaˬ lehˇ kuˇ-eu Moˇseˬ neh jahˇ-euˬ aˇ lawˇ mawˇ kawˇ kʼoeˇ hmˬ kʼawꞈ, aˬ yawꞈ deh meuˇ deh loeˇ-euˬ meh. Aˇ yamˬ kʼoeˇ yamˬ-ahˇ keuˆ ni, Iˇsaˬleˬlaˆ tsawˇ haˬ deuˬ mawˇ kawˇ kʼoeˇ hmˬ-ahˇ taˬ huiˬ taˬ mahˇ dui dui-awˇ, yaw saw jeˬ doꞈ damˬ-euˬ meh.

⁵Heˬsaˬgiˇ-aˬ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ jah ziꞈ dui dui-eu tsawˇ haˬ tiˬ gʼaˬ pyeuꞈ-eu meh. Aˬ yawꞈ-euˬ mehˬ hu mehˬ nah Yuˇdaˆ miˇ kʼahˬ-ahˇ kʼaˇ uˆ lahˇ-euˬ sahˬ paˬ deuˬ laꞈ kʼoeˇ, aˬ yawꞈ-ahˇ duˇ-eu tiˬ gʼaˬ-iˬ maˬ jawˇ-a.

⁶Aˬ yawꞈ-aˬ, Sahˬpaˬ Miˬyehˇ-ahˇ saˇ jaˇ ziꞈ-awˇ, Sahˬpaˬ Miˬyehˇ-euˬ ehˇ dawˬ-ahˇ maˬ naˇ haˬ-ehˇ maˬ byehˇ-eu uˬ taꞈ, Sahˬpaˬ Miˬyehˇ neh Moˇseˬ-ahˇ kʼaˇ biꞈ taˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ, yaw muiˬ paˬ-ehˇ caw teh-eu meh.

⁷Kʼoeˇ miˇ neh, aˬ yawꞈ nehˬ-ehˇ Sahˬpaˬ Miˬyehˇ jawˇ-awˇ, aˬ yawꞈ neh kʼaˇ mˇ kʼaˇ shaˇ-euˬ yawˬ jeˬ na luꞈ guiˬ lahˬ baw-eu meh. Aˬshuˇliˆ sahˬ paˬ-ahˇ aˬ yawꞈ puiˬ-awˇ, laꞈ oꞈ maˬ awꞈ ni dehꞈ-euˬ meh.

⁸Piˇliˇtiˆ tsawˇ haˬ deuˬ-ahˇ aˬ yawꞈ guiˇ deuˆ gʼaˬ-awˇ, Gaˬzaˬ meuˬ hawˇ-eu kʼoeˇ-euˬ tahˬ gʼoꞈ tahˬ jawˇ jaˆ-eu pu pu zaˬ tiˬ pu-ahˇ neh meuˬ meuˬ ma tiˬ meuˬ-ahˇ keuˆ ni, aˬ yawꞈ maꞈ kʼaˇ jawˇ gaˇ guiˇ deuˆ-euˬ meh.

⁹Heˬsaˬgiˇ sahˬ paˬ geuꞈ-euˬ oeˬ kʼoꞈ tiˬ kʼoꞈ pyeuꞈ-eu, sahˬ paˬ Awˇsheˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ shiꞈ kʼoꞈ tiˬ kʼoꞈ kʼoꞈ-ahˇ, Aˬshuˇliˆ sahˬ paˬ Shaˬmaˬneˬzaˬ gʼaˬ Iˇsaˬleˬlaˆ miˇ kʼahˬ-ahˇ guiˇ deuˆ le-awˇ, Saˬmaˬliˆ meuˬ-ahˇ loꞈ jawˬ taˬ-euˬ meh.

¹⁰Kʼoeˇ loꞈ-ehˇ loꞈ jawˬ taˬ-euˬ smˇ kʼoꞈ byah laˇ ngeh, Saˬmaˬliˆ meuˬ sahˬ paˬ Shaˬmaˬneˬzaˬ-euˬ laꞈ-ahˇ ahˇ leˇ-euˬ meh. Saˬmaˬliˆ meuˬ aˬ cawˬ neh bi deuˆ gʼaˬ-euˬ aˇ kʼoꞈ kʼoeˇ kʼoꞈ-aˬ, Heˬsaˬgiˇ Yuˇdaˆ sahˬ paˬ geuꞈ luꞈ-eu koꞈ kʼoꞈ tiˬ kʼoꞈ pyeuꞈ-awˇ, Awˇsheˬ gʼaˬ Iˇsaˬleˬlaˆ sahˬ paˬ geuꞈ luꞈ-eu gʼoeˬ kʼoꞈ aˬ yawꞈ kʼoꞈ meh.

¹¹Aˬshuˇliˆ sahˬ paˬ neh Iˇsaˬleˬlaˆ tsawˇ haˬ deuˬ-ahˇ, Aˬshuˇliˆ miˇ kʼahˬ-ahˇ nyehꞈ daˆ gʼeh-awˇ, tiˬ paˆ na deuˬ-ahˇ Haˬlahˬ meuˬ-ahˇ bi jawˇ-awˇ, tiˬ paˆ na deuˬ-ahˇ Haˬbawˬ lawˇ baˬ dawˬ peh Goˇzaˬ gahˬ kaˬ-ahˇ bi jawˇ-euˬ meh. Tiˬ paˆ na deuˬ-ahˇ-aˬ, Meˬdiˇ miˇ kʼahˬ laꞈ kʼoeˇ jaˆ-eu meuˬ deuˬ-ahˇ bi jawˇ-euˬ meh.

¹²Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ maˬ naˇ haˬ geuꞈ-ehˇ, aˬ yawꞈ nehˬ-ehˇ dzaˬ taˬ-euˬ dawˬ ma saˇ jaˇ-ahˇ puiˬ-euˬ uˬ taꞈ, Sahˬpaˬ Miˬyehˇ-euˬ zaˬ kʼaˆ Moˇseˬ-ahˇ gʼoe-awˇ Sahˬpaˬ Miˬyehˇ neh biꞈ taˬ-euˬ zahˇ dawˬ kʼoꞈ dawˬ kʼoeˇ deuˬ dawˬ tawˆ luꞈ-euˬ mehˬ nah maˬ caw teh-a. Kʼoeˇ miˇ neh, Saˬmaˬliˆ meuˬ aˬ cawˬ tsawˇ jeuˬ-euˬ laꞈ-ahˇ ahˇ leˇ-euˬ meh.

¹³Sahˬ paˬ Heˬsaˬgiˇ Yuˇdaˆ miˇ kʼahˬ-ahˇ uˆ lahˇ-euˬ tseˇ oeˬ kʼoꞈ tiˬ kʼoꞈ-ahˇ, Aˬshuˇliˆ sahˬ paˬ Saˬneˬkaˬliˇ-aˬ, Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni gʼeh-eu meuˬ deuˬ-ahˇ guiˇ deuˆ le-awˇ, deuˆ gʼaˬ-euˬ meh.

¹⁴Heˬsaˬgiˇ-aˬ, Laˬkiˇshaˆ meuˬ-ahˇ jawˇ luꞈ-eu Saˬneˬkaˬliˇ jawˇ gaˇ tsawˇ haˬ pyehˬ gʼeh-awˇ, “Ngaˬ neh mˇ-euˬ lehˬ law hawˇ nga. Ngaˬ-euˬ miˇ kʼahˬ-ahˇ guiˇ taˬ paˇ deuˆ nehˬ laꞈ. Nawˇ kʼaˇ shaˇ-eu jeˬ ngaˇ biꞈ ma” lehˇ bi tsaꞈ gaˬ leˇ-euˬ meh. “Pyuˇ koꞈ heˇ jawꞈ-i hawˇ-eu shuiˇ koꞈ yaˇ jawꞈ-i sha ha laˇ-awˬ” lehˇ, sahˬ paˬ Heˬsaˬgiˇ-ahˇ Aˬshuˇliˆ sahˬ paˬ Saˬneˬkaˬliˇ tsaꞈ kʼoꞈ gʼeh-euˬ meh.

¹⁵Uˬ duˬ tahˬ nymˇ nymˇ ma hawˇ-eu sahˬ paˬ-euˬ pyuˇ cehˇ jiˇ laꞈ kʼoeˇ kʼaˇ jaˆ-eu pyuˇ dawˬ tawˆ luꞈ Heˬsaˬgiˇ yuˇ doˆ-awˇ, Aˬshuˇliˆ sahˬ paˬ jawˇ gaˇ bi sha ha leˇ-euˬ meh.

¹⁶Uˬ duˬ tahˬ nymˇ nymˇ ma-euˬ laˇ gʼoˆ-ahˇ yaw taˬ-euˬ shuiˇ hawˇ-eu, laˇ gʼoˆ bahˬ-ahˇ aˬ yawꞈ neh kʼaˇ yaw taˬ-euˬ shuiˇ deuˬ yawˆ doˆ-awˇ, dawˬ tawˆ luꞈ Saˬneˬkaˬliˇ jawˇ gaˇ sha ha leˇ-euˬ meh.

¹⁷Aˬshuˇliˆ sahˬ paˬ kʼoeˇ gʼaˬ-aˬ, Yeˬluˇsaˬlehˬ meuˬ-ahˇ jawˇ-eu Heˬsaˬgiˇ-ahˇ guiˇ bi deuˆ-iˇ-eu gʼaˇ duˬ, myaˬ dui dui-eu guiˇ maꞈ tiˬ maꞈ Laˬkiˇshaˆ meuˬ-ahˇ neh pyehˬ gʼeh-euˬ meh. Aˬ yawꞈ-euˬ guiˇ maꞈ-ahˇ uˆ lahˇ-eu aˬ cawˬ naˆ maˬ tseˇ huiˬ dzehˬ-eu yaw huiˬ yaw mahˇ smˇ gʼaˬ-ahˇ aˬ yuiꞈ bi geuꞈ-awˇ, guiˇ maꞈ kʼoeˇ maꞈ-ahˇ bi sheuˬ gʼeh-euˬ meh. Yeˬluˇsaˬlehˬ meuˬ-ahˇ aˬ yawꞈ maꞈ le keuˆ ngeh, laꞈ taˆ paw jaˆ-eu lah-ahˇ neh meuˬ laꞈ kʼoeˇ iˇ pahˬ pahˬ ahˇ taˬ-euˬ dawˬ peh, saˬ nmˇ saˬ paˇ mˇ duˬ-ahˇ jaˆ-eu gaˇ ma-ahˇ guiˇ daˬ daˬ-euˬ meh.

¹⁸Kʼoeˇ naˇ, aˬ yawꞈ maꞈ tsawˇ haˬ pyehˬ gʼeh-awˇ, sahˬ paˬ Heˬsaˬgiˇ-ahˇ bi kuˇ laˬ leˇ ngeh, sahˬ paˬ Heˬsaˬgiˇ-euˬ gaˇ mˇ-eu yaw huiˬ yaw mahˇ smˇ gʼaˬ oe-euˬ meh. Yaw huiˬ yaw mahˇ kʼoeˇ smˇ gʼaˬ-aˬ, Hiˇlaˬkiˇ-euˬ aˬ li pyeuꞈ-eu sahˬ paˬ-euˬ nymˇ-ahˇ haw-eu pyaˆ-eu Eˇliˇkmˬ, saˇ naˇ gaˇ mˇ-eu paw aˬ yuiꞈ geuꞈ-eu Sheˬbaˬnaˬ, Jaˇlaˇ yuˇ-eu paw aˬ yuiꞈ geuꞈ-eu Aˬsaˆ-euˬ aˬ li Yoˇaˬ, heu deuˬ meh.

¹⁹Aˬshuˇliˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ tiˬ gʼaˬ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “ ‘Aˬ suˇ gʼaˬ-ahˇ noeˬ tmˬ-awˇ nawˇ teu naˆ naˆ-ehˇ nui ma huiˬ luꞈ te lehˇ, huiˬ-eu mahˇ-eu Aˬshuˇliˆ sahˬ paˬ ehˇ-eu meh’ lehˇ, sahˬ paˬ Heˬsaˬgiˇ-ahˇ ehˇ nehˬ-awˬ.

²⁰Baoˬ hawˇ-eu tsawˇ gahˇ-ahˇ gʼoe-awˇ guiˇ deuˆ-eu maˬ ngeuˇ-ehˇ, kʼaˬ meh mehˬ boeˬ-ahˇ gʼoe-awˇ guiˇ deuˆ nya meh lehˇ naw maꞈ noeˬ te loˇ. Aˬshuˇliˆ miˇ kʼahˬ-ahˇ naw maꞈ puiˬ peuˬ paˬ-ehˇ, naw maꞈ-ahˇ aˬ suˇ gʼaˬ caw ba nehˬ laꞈ tehꞈ-a lehˇ noeˬ luꞈ te.

²¹Iˇjiˇtuˆ miˇ kʼahˬ caw ba laˇ tehꞈ-a lehˇ naw maꞈ noeˬ tmˬ luꞈ te loˇ. Naw maꞈ kʼoeˇ loꞈ-ehˇ noeˬ-eu-aˬ, aˇ toꞈ aˇ kahˬ neh gawˬ yoeˬ toˆ gaˇ duˇ-awˇ, aˇ toꞈ aˇ kahˬ kʼoeˇ kʼehꞈ-iˇ ngeh jawˇ, naw maꞈ-euˬ aˬ laꞈ-ahˇ dehˬ tsawˆ tehꞈ-a. Iˇjiˇtuˆ sahˬ paˬ-ahˇ laꞈ jeuˬ kʼaˇ shaˇ-eu tsawˇ haˬ kʼoeˇ loꞈ-ehˇ ya daˬ tehꞈ-a.

²²“Kʼoeˇ loꞈ-ehˇ maˬ ngeuˇ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gʼoe luꞈ-eu ma lehˇ, naw maꞈ ngaˬ-ahˇ ehˇ-eu gʼeh te loˇ. Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ deuˬ-ahˇ, Yeˬluˇsaˬlehˬ meuˬ laꞈ kʼoeˇ jaˆ-eu lawˇ duˬ kʼoeˇ tsahˇ-ahˇ tehꞈ-ehˇ uˬ duˬ ya tahˬ laˇ meh lehˇ Heˬsaˬgiˇ ehˇ-awˇ, Sahˬpaˬ Miˬyehˇ-ahˇ uˬ duˬ tahˬ-eu nymˇ deuˬ hawˇ-eu, lawˇ duˬ deuˬ-ahˇ aˬ yawꞈ laˆ cawˆ jiˇ-euˬ maˬ ngeuˇ-a loˇ.

²³Nga maꞈ-euˬ Aˬshuˇliˆ sahˬ paˬ-ahˇ naw maꞈ ciˬ cehˆ haw laˇ sheˇ. Ngaˇ naw maꞈ-ahˇ mahˬ nyiˬ heˇ mawˇ biꞈ nyaˇ. Mahˬ dziˬ-eu tsawˇ haˬ naw maꞈ poˆ doˆ nya ma loˇ.

²⁴Teˬ dui nyiˇ dui dui-eu Aˬshuˇliˆ tsawˇ haˬ yaw huiˬ yaw mahˇ tiˬ gʼaˬ-ahˇ kʼawꞈ naw maꞈ ciˬ daˬ mahˇ maˬ tsahˇ-eu-aˬ, Iˇjiˇtuˆ tsawˇ haˬ deuˬ mahˬ laˆ lawˬ hawˇ-eu mahˬ dziˬ-eu yehˇ deuˬ bi laˇ gaˇ naw maꞈ paˇ noeˬ tmˬ te loˇ.

²⁵Sahˬpaˬ Miˬyehˇ ngaˬ-ahˇ maˬ caw ba gaˇ, naw maꞈ-euˬ miˇ kʼahˬ-ahˇ ngaˇ guiˇ deuˆ le-awˇ laˆ cawˆ le-euˬ nga lehˇ naw maꞈ noeˬ te loˇ. Miˇ kʼahˬ heu kʼahˬ-ahˇ guiˇ deuˆ le-awˇ, laˆ cawˆ nehˬ-awˬ lehˇ, Sahˬpaˬ Miˬyehˇ ngaˬ-ahˇ kʼehˇ-eu meh.”

²⁶Kʼoeˇ naˇ, Eˇliˇkmˬ, Sheˬbaˬnaˬ hawˇ-eu Yoˇaˬ aˬ ha smˇ gʼaˬ yaw huiˬ yaw mahˇ kʼoeˇ gʼaˬ-ahˇ ehˇ nehˬ-eu, “Yaw huiˬ yaw mahˇ gʼaˬ-oˇ, nga maꞈ-ahˇ Aˬlaˬmiˇ dawˬ ngehˬ cawˬ nehˬ laꞈ. Nga maꞈ gʼoˆ shaw nya ma. Heˬbyehˇ dawˬ taˬ ngehˬ nehˬ laꞈ. Meuˬ meuˬ lahˇ kʼoeˇ taˆ daˆ luꞈ-eu tsawˇ haˬ dawˬ tawˆ luꞈ naˇ haˬ luꞈ-eu miˇ neh, aˬ yawꞈ maꞈ-ahˇ siˬ leˇ gaˇ guˆ nya.”

²⁷Ehˇ kʼawꞈ, yaw huiˬ yaw mahˇ kʼoeˇ gʼaˬ heu loꞈ-ehˇ ehˇ-eu meh. “Naw maꞈ smˇ gʼaˬ hawˇ-eu naw maꞈ-euˬ sahˬ paˬ-ahˇ tehꞈ-ehˇ gaˇ kawˆ heu bi ehˇ nehˬ-eu lehˇ, ngaˬ-euˬ sahˬ paˬ ngaˬ-ahˇ pyehˬ gʼeh leꞈ-euˬ nga lehˇ noeˬ te loˇ. Kʼoeˇ loꞈ-ehˇ maˬ ngeuˇ-a, Naw maꞈ-ahˇ duˇ ni, yawˬ ha-euˬ keˬ yawˬ ha ya dzaˬ-awˇ, yawˬ ha-euˬ iˇ shoi yawˬ ha ya dawˇ gaˇ keuˆ-eu, meuˬ meuˬ lahˇ kʼoeˇ taˆ daˆ luꞈ-eu tsawˇ haˬ kʼoeˇ deuˬ-ahˇ kʼawꞈ, ngaˇ ehˇ luꞈ-eu ma.”

²⁸Kʼoeˇ naˇ, yaw huiˬ yaw mahˇ kʼoeˇ gʼaˬ tuˇ laˇ-awˇ, Heˬbyehˇ dawˬ ngehˬ-awˇ, yaw kʼaˆ-ehˇ guˇ guˇ-ehˇ, heu loꞈ-ehˇ ehˇ-eu meh. “Aˬshuˇliˆ sahˬ paˬ neh naw maꞈ-ahˇ ehˇ nehˬ laꞈ-euˬ dawˬ-ahˇ naˇ haˬ sheˇ.

²⁹Heˬsaˬgiˇ mehˇ shuiˇ shuiˇ gaˇ taˬ naˇ haˬ lehˇ, naw maꞈ-ahˇ aˬ yawꞈ ehˇ-eu meh. Heˬsaˬgiˇ naw maꞈ-ahˇ maˬ ka kʼoꞈ nehˬ nya-a.

³⁰Sahˬpaˬ Miˬyehˇ-ahˇ gʼoe-awˬ lehˇ, aˬ yawꞈ naw maꞈ-ahˇ ehˇ gaˇ taˬ naˇ haˬ, Sahˬpaˬ Miˬyehˇ naw maꞈ-ahˇ ka kʼoꞈ-awˇ, Aˬshuˇliˆ guiˇ maꞈ deuˬ neh naw maꞈ-euˬ meuˬ heu meuˬ-ahˇ maˬ bi deuˆ gʼaˬ-aˇ lehˇ taˬ noeˬ,

³¹Heˬsaˬgiˇ-euˬ dawˬ-ahˇ naw maꞈ naˬ bawˇ taˬ ciˬ kʼmˇ. Meuˬ laꞈ kʼoeˇ neh doˆ le-awˇ, Aˬshuˇliˆ sahˬ paˬ-euˬ zaˬ lahˇ geuꞈ le-awˬ lehˇ, aˬ yawꞈ naw maꞈ-ahˇ ehˇ luꞈ meh. Naw maꞈ yawˬ ha-euˬ aˬ gaꞈ yaˇ kmˇ-ahˇ yawˬ ha ya pyaˆ dzaˬ-awˇ, yawˬ ha-euˬ siˬ guˬ aˇ bawˇ-ahˇ yawˬ ha ya pyaˆ dzaˬ-eu uˬ taꞈ, yawˬ ha-euˬ lah duˬ-ahˇ yaw ha ya kʼawꞈ dawˇ tehꞈ-a.

³²Naw maꞈ-euˬ miˇ kʼahˬ-ahˇ duˇ dui dui-eu miˇ kʼahˬ tiˬ kʼahˬ laꞈ kʼoeˇ, Aˬshuˇliˆ sahˬ paˬ naw maꞈ-ahˇ bi jawˇ nehˬ laꞈ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ, aˬ gaꞈ dzaˇ uiˇ jahˇ-eu gʼaˇ duˬ aˬ gaꞈ baw duˆ dehꞈ-awˇ, kaˬ muˇ jahˇ-eu gʼaˇ duˬ cehˇ jaˆ meh. Saˬ loˬ aˇ bawˇ, saˬ loˬ tsiˇ hawˇ-eu byaˬ byaˬ uiˇ jaˆ-eu miˇ kʼahˬ kʼawꞈ pyeuꞈ-eu meh. Aˬ yawꞈ neh kʼaˇ ehˇ-euˬ loꞈ-ehˇ naw maꞈ geuꞈ naˇ, naw maꞈ maˬ shiˇ ni ya dehꞈ tehꞈ-a. Sahˬpaˬ Miˬyehˇ naw maꞈ-ahˇ ka kʼoꞈ le tehꞈ-a lehˇ, Heˬsaˬgiˇ mehˇ shuiˇ shuiˇ gaˇ naw maꞈ taˬ naˇ haˬ.

³³Miˇ kʼahˬ nui deuˬ-euˬ miˬ yehˇ deuˬ kʼawꞈ, aˬ yawꞈ maꞈ-euˬ miˇ kʼahˬ zaˬ deuˬ-ahˇ Aˬshuˇliˆ sahˬ paˬ-euˬ laꞈ-ahˇ neh ka kʼoꞈ nehˬ taˬ-euˬ aˇ myaˆ poˆ jaˆ ta.

³⁴Miˬ yehˇ kʼoeˇ deuˬ aˬ geu paw iˇ byoˆ jiˇ taˬ. Haˬmaˆ meuˬ-euˬ miˬ yehˇ hawˇ-eu Aˬpaˆ meuˬ-euˬ miˬ yehˇ deuˬ aˬ gaˇ iˇ taˬ. Seˬpaˬbeˬ meuˬ, Heˬnaˬ meuˬ hawˇ-eu Iˇbaˬ meuˬ kʼoeˇ deuˬ-euˬ miˬ yehˇ deuˬ aˬ geu paw iˇ byoˆ jiˇ taˬ. Saˬmaˬliˆ meuˬ-ahˇ kʼawꞈ, tiˬ gʼaˬ na neh ka kʼoꞈ nehˬ haw-euˬ jaˆ ta loˇ.

³⁵Miˬ yehˇ kʼoeˇ deuˬ aˬ yawꞈ maꞈ-euˬ miˇ kʼahˬ deuˬ-ahˇ nga maꞈ-euˬ sahˬ paˬ-euˬ laꞈ-ahˇ neh aˬ geu ngeh ka kʼoꞈ nehˬ haw-euˬ jaˆ ta. Toˆ-ehˇ ngeuˇ naˇ, Yeˬluˇsaˬlehˬ meuˬ-ahˇ Sahˬpaˬ Miˬyehˇ ka kʼoꞈ nehˬ laꞈ tehꞈ-a lehˇ, naw maꞈ aˬ joˆ-ehˇ noeˬ kʼmˬ-eu nya.”

³⁶Tsawˇ haˬ kʼoeˇ deuˬ-aˬ, sahˬ paˬ Heˬsaˬgiˇ neh aˬ yawꞈ maꞈ-ahˇ mehˬ nehˬ taˬ-eu loꞈ-ehˇ, dawˬ tiˬ dawˬ-iˬ maˬ tmˇ ni ciˬ cuˇ ni jawˇ-eu meh.

³⁷Kʼoeˇ naˇ, Eˇliˇkmˬ, Sheˬbaˬnaˬ, Yoˇaˬ, aˬ ha smˇ gʼaˬ noeˬ shaˬ dui dui-eu laꞈ kʼoeˇ, aˬ yawꞈ maꞈ dm luꞈ-eu mehˬ tsoeˬ cehˬ pyaˬ-awˇ Aˬshuˇliˆ tsawˇ haˬ yaw huiˬ yaw mahˇ kʼoeˇ gʼaˬ neh ehˇ-euˬ dawˬ deuˬ, sahˬ paˬ Heˬsaˬgiˇ-ahˇ tsaꞈ gaˬ leˇ-euˬ meh.