Read Akha 2 Sahˬpaˬ 2 Bible Online

2 Sahˬpaˬ 2 - Akha bible

2 Sahˬpaˬ 2

¹Jaˬ lehˇ lehˇ zeuˆ laꞈ kʼoeˇ Eˇliˇyaˆ-ahˇ Sahˬpaˬ Miˬyehˇ mˬ kʼoeˇ taˆ sheuˬ kʼoꞈ daˆ leꞈ-eu aˇ yamˬ keuˆ laˇ-euˬ meh. Eˇliˇyaˆ hawˇ-eu Eˇliˇshehˇ aˬ nyaꞈ Giˇlaˇgaˬlaˇ meuˬ-ahˇ neh doˆ-iˇ-euˬ meh.

²Gaˇ pehˇ iˇ luꞈ ngeh, “Nawˇ heu gaˇ jawˇ yaꞈ-awˬ. Sahˬpaˬ Miˬyehˇ ngaˬ-ahˇ Beˬdeˬlaˇ meuˬ-ahˇ iˇ-awˬ lehˇ dawˬ biꞈ laꞈ-euˬ meh” lehˇ Eˇliˇyaˆ Eˇliˇshehˇ-ahˇ ehˇ nehˬ-euˬ meh. Ehˇ kʼawꞈ, Eˇliˇshehˇ gʼaˬ, “Sahˬpaˬ Miˬyehˇ hawˇ-eu nawˇ kʼaˇ dehꞈ kʼoeˇ keuˆ ni, nawˬ-ahˇ ngaˇ maˬ gʼawˬ-iˇ lehˇ ngaˇ kamˬ-eu ma” lehˇ ehˇ-eu meh. Kʼoeˇ naˇ, aˬ yawꞈ nyaꞈ Beˬdeˬlaˇ meuˬ-ahˇ iˇ gʼeh-euˬ meh.

³Kʼoeˇ gaˇ jawˇ-eu Miˬyehˇ gʼaˇ duˬ ngehˬ dah-eu deuˬ, Eˇliˇshehˇ jawˇ gaˇ iˇ-awˇ, “Sahˬpaˬ Miˬyehˇ Eˇliˇyaˆ-ahˇ sheuˬ kʼoꞈ gʼeh-eu lehˇ gʼeh-eu nawˇ siˬ nya ma loˇ” lehˇ ehˇ nehˬ ngeh, “Ngaˇ siˬ nya ma. Ehˇ kʼawꞈ, gaˇ kawˆ heu aˬ dui maˬ ja-ehˇ, ciˬ cuˇ ni jawˇ kaˇ-euˇ” lehˇ, Eˇliˇshehˇ ehˇ kʼoꞈ nehˬ-euˬ meh.

⁴Kʼoeˇ naˇ, Eˇliˇyaˆ neh Eˇliˇshehˇ-ahˇ, “Nawˇ heu gʼaˇ jawˇ yaꞈ-awˬ. Sahˬpaˬ Miˬyehˇ ngaˬ-ahˇ Yeˬliˇkoˇ meuˬ-ahˇ iˇ-awˬ lehˇ dawˬ biꞈ taˬ-euˬ meh” lehˇ ehˇ nehˬ-euˬ meh. Ehˇ kʼawꞈ, “Sahˬpaˬ Miˬyehˇ hawˇ-eu nawˇ kʼaˇ dehꞈ kʼoeˇ keuˆ ni, nawˬ-ahˇ ngaˇ maˬ gʼawˬ-iˇ lehˇ kamˬ-eu ma” lehˇ, Eˇliˇshehˇ paˇ ehˇ kʼoꞈ nehˬ-euˬ meh. Kʼoeˇ naˇ, aˬ yawꞈ nyaꞈ Yeˬliˇkoˇ meuˬ-ahˇ iˇ-euˬ meh.

⁵Kʼoeˇ gaˇ jawˇ-eu Miˬyehˇ gʼaˇ duˬ ngehˬ dah-eu deuˬ Eˇliˇshehˇ jawˇ gaˇ iˇ-awˇ, “Sahˬpaˬ Miˬyehˇ Eˇliˇyaˆ-ahˇ sheuˬ kʼoꞈ gʼeh-eu lehˇ gʼeh-eu nawˇ siˬ nya ma loˇ” lehˇ ehˇ nehˬ ngeh, “Ngaˇ siˬ nya ma. Ehˇ kʼawꞈ, gaˇ kawˆ heu aˬ dui maˬ ja-ehˇ ciˬ cuˇ ni jawˇ kaˇ-euˇ” lehˇ, Eˇliˇshehˇ ehˇ kʼoꞈ nehˬ-euˬ meh.

⁶Kʼoeˇ naˇ, Eˇliˇshehˇ-ahˇ Eˇliˇyaˆ ehˇ nehˬ-eu, “Nawˇ heu gaˇ jawˇ yaꞈ-awˬ. Sahˬpaˬ Miˬyehˇ ngaˬ-ahˇ Yawˇdaˬ lawˇ baˬ-ahˇ iˇ-awˬ lehˇ dawˬ biꞈ laꞈ-euˬ meh.” Eˇliˇshehˇ ehˇ-eu,“Sahˬpaˬ Miˬyehˇ hawˇ-eu nawˇ kʼaˇ dehꞈ kʼoeˇ keuˆ ni, nawˬ-ahˇ ngaˇ maˬ gʼawˬ-iˇ lehˇ kamˬ-eu ma.” Kʼoeˇnaˇ, aˬ yawꞈ nyaꞈ Yawˇdaˬ lawˇ baˬ-ahˇ iˇ-euˬ meh.

⁷Miˬyehˇ gʼaˇ duˬ ngehˬ dah-eu tsawˇ haˬ ngaˬ tseˇ gʼaˬ kʼawꞈ, aˬ yawꞈ nyaꞈ mehˬ nah Yawˇdaˬ lawˇ baˬ-ahˇ caw teh gʼeh-euˬ meh. Eˇliˇyaˆ hawˇ-eu Eˇliˇshehˇ aˬ nyaꞈ Yawˇdaˬ lawˇ baˬ lawˇ deh-ahˇ yawꞈ luꞈ ngeh, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ ngaˬ tseˇ gʼaˬ, aˬ yawꞈ nyaꞈ-euˬ naˇ kʼah ui cuiˆ gaˇ mahˇ kaˬ gaˇ yawꞈ luꞈ-eu meh.

⁸Eˇliˇyaˆ gʼaˬ aˬ yawꞈ-euˬ pehˇ kʼahˬ pehˇ mahˇ lehˆ-awˇ lehˬ yoˆ-awˇ, iˇ cuꞈ-ahˇ sheu juiꞈ-euˬ meh. Kʼoeˇ ngeh, iˇ cuꞈ nyiˬ paˆ paˆ-iˇ-awˇ, Eˇliˇshehˇ aˬ yawꞈ nyaꞈ gui coˇ ni gʼeh-eu miˇ tsaˬ-ahˇ nawˬ-awˇ, lawˇ baˬ tsehˆ doˆ-euˬ meh.

⁹Kʼoeˇ gaˇ, Eˇliˇshehˇ-ahˇ Eˇliˇyaˆ ehˇ nehˬ-eu, “Aˇ nyaꞈ maˬ ya gʼawˬ-iˇ mi naˆ-ehˇ, nawˬ-ahˇ ngaˇ aˬ jeˬ ya jahˇ nehˬ yaꞈ nmˇ.” Eˇliˇshehˇ ehˇ-eu, “Nawˬ-euˬ dah zaˇ ngaˇ gaˇ mˇ yaꞈ nya ni, nawˬ-euˬ baoˬ ngaˬ-euˬ kʼoeˇ taˆ bi keuˆ le-awˬ.”

¹⁰Eˇliˇyaˆ ehˇ-eu, “Nawˇ ehˇ-eu teu yaw awˬ maˬ ngeuˇ-a. Ehˇ kʼawꞈ, ngaˇ nawˬ-ahˇ gʼawˬ-iˇ luꞈ ngeh ngaˬ-ahˇ nawˇ ya mawˇ naˇ, ngaˬ-euˬ baoˬ nawˬ-euˬ kʼoeˇ taˆ keuˆ le tehꞈ-a.”

¹¹Aˬ yawꞈ nyaꞈ dawˬ ja ja caw ja cawˬ-ehˇ le luꞈ ngeh, miˬ dzaˬ mahˬ neh bi gʼeu-euˬ miˬ dzaˬ mahˬ laˆ lawˬ aˬ yawꞈ nyaꞈ yaw kaˬ-ahˇ oe keuˆ-awˇ, jaˬ lehˇ lehˇ zeuˆ laꞈ kʼoeˇ Eˇliˇyaˆ-ahˇ mˬ kʼoeˇ taˆ sheuˬ kʼoꞈ daˆ gʼeh-euˬ meh.

¹²Kʼoeˇ loꞈ-ehˇ sheuˬ kʼoꞈ daˆ gʼeh luꞈ gaˇ Eˇliˇshehˇ ya mawˇ-awˇ, Eˇliˇyaˆ-ahˇ, “Ngaˬ da-oˇ, Iˇsaˬleˬlaˆ miˇ kʼahˬ-ahˇ haw piˇ-eu gʼaˬ pyeuꞈ-eu baoˬ huiˬ-eu ngaˬ da-oˇ, nawˇ ngaˬ-ahˇ taꞈ yaꞈ-euˬ ma loˇ” lehˇ, guˇ guˇ-ehˇ ehˇ-eu meh. Kʼoeˇ ngeh neh naˇ, Eˇliˇyaˆ-ahˇ aˬ yawꞈ tiˬ jawˇ-iˬ maˬ paˇ ya mawˇ ni byoˆ tsehˆ-euˬ meh. Eˇliˇshehˇ noeˬ shaˬ-eu laꞈ kʼoeˇ, aˬ yawꞈ-euˬ pehˇ kʼahˬ pehˇ mahˇ lehˆ-awˇ, nyiˬ paˆ cehˬ paˆ doˆ gʼeh-euˬ meh.

¹³Kʼoeˇ naˇ, ga ka yaꞈ-euˬ Eˇliˇyaˆ-euˬ pehˇ kʼahˬ pehˇ mahˇ aˬ yawꞈ yuˇ-awˇ, Yawˇdaˬ lawˇ baˬ-ahˇ gʼoꞈ ka-iˇ-awˇ, lawˇ baˬ lawˇ deh yawꞈ-euˬ meh.

¹⁴Eˇliˇyaˆ-euˬ pehˇ kʼahˬ pehˇ mahˇ kʼoeˇ neh iˇ cuꞈ-ahˇ aˬ yawꞈ sheu juiꞈ-awˇ, “Eˇliˇyaˆ-euˬ Miˬyehˇ pyeuꞈ-eu Sahˬpaˬ Miˬyehˇ aˬ gaˇ jawˇ ta” lehˇ ehˇ-eu meh. Kʼoeˇ naˇ, iˇ cuꞈ-ahˇ aˬ yawꞈ tiˬ poˆ paˇ sheu juiꞈ ngeh, iˇ cuꞈ nyiˬ paˆ paˆ-iˇ-awˇ, lawˇ baˬ tsehˆ doˆ-euˬ meh.

¹⁵Yeˬliˇkoˇ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ ngaˬ tseˇ gʼaˬ aˬ yawꞈ-ahˇ mawˇ-awˇ, “Eˇliˇyaˆ-euˬ baoˬ Eˇliˇshehˇ kʼoeˇ taˆ keuˆ le-euˬ nga” lehˇ ehˇ-awˇ, aˬ yawꞈ-euˬ mehˬ shi le-awˇ miˇ tsa awˆ byaˆ-euˬ meh.

¹⁶Aˬ yawꞈ maꞈ ehˇ-eu, “Nga maꞈ ngaˬ tseˇ gʼaˬ byah-awˇ, dawˬ tawˆ luꞈ gʼaˬ kʼaˆ-eu tsawˇ haˬ tehꞈ ma. Nga maꞈ-ahˇ Eˇliˇyaˆ-ahˇ bi poˆ-iˇ laꞈ-awˬ. Sahˬpaˬ Miˬyehˇ-euˬ yaw sahˇ aˬ yawꞈ-ahˇ sheuˬ gʼeh-awˇ, gawˬ jawˬ-ahˇ maˬ ngeuˇ naˇ gʼaˬ lawˬ-ahˇ tiˬ gaˇ paw pyehˬ taˬ yaꞈ-euˬ baw le.” Eˇliˇshehˇ ehˇ-eu, “Naw maꞈ aˬ yawꞈ-ahˇ taˬ poˆ-iˇ.”

¹⁷Ehˇ kʼawꞈ, maˬ bi poˆ-iˇ kʼoeˇ maˬ juˬ ni aˬ yawꞈ maꞈ shaˇ-eu meh. Aˬ yawꞈ maꞈ ngaˬ tseˇ gʼaˬ smˬ nah byah ni gawˬ jawˬ gʼaˬ lawˬ poˆ doe kʼawꞈ, Eˇliˇyaˆ-ahˇ maˬ poˆ mawˇ nya-a.

¹⁸Kʼoeˇ naˇ, Yeˬliˇkoˇ meuˬ-ahˇ aˬ yawꞈ maꞈ-ahˇ dawˬ luꞈ-eu Eˇliˇshehˇ jawˇ gaˇ aˬ yawꞈ maꞈ gʼoꞈ leˇ-euˬ meh. Kʼoeˇ ngeh, “Taˬ poˆ-iˇ lehˇ naw maꞈ-ahˇ ngaˇ ehˇ-euˬ maˬ ngeuˇ-a loˇ” lehˇ, aˬ yawꞈ maꞈ-ahˇ Eˇliˇshehˇ ehˇ nehˬ-euˬ meh.

¹⁹Yeˬliˇkoˇ meuˬ-ahˇ jawˇ-eu tsawˇ haˬ tiˬ paˆ na deuˬ, Eˇliˇshehˇ jawˇ gaˇ le-awˇ, “Nawˇ siˬ nya luꞈ-eu loꞈ-ehˇ, meuˬ heu meuˬ jawˇ duˬ muiˬ kʼawꞈ, iˇ cuꞈ maˬ muiˬ-eu miˇ neh, tiˬ kʼehˬ maˬ taˬ ni zaˬ yoeˇ dzeh-eu meh” lehˇ ehˇ leˇ-euˬ meh.

²⁰“Kʼmˬ maˬ yaw shuiꞈ tiˬ kʼmˬ laꞈ kʼoeˇ saˬ deuꞈ dawˆ ahˇ-awˇ ciˬ laꞈ-awˬ” lehˇ, aˬ yawꞈ maꞈ-ahˇ aˬ yawꞈ ehˇ nehˬ ngeh, aˬ yawꞈ maꞈ yuˇ laꞈ nehˬ-euˬ meh.

²¹Iˇ cuꞈ lawˇ kʼawꞈ-ahˇ Eˇliˇshehˇ iˇ-awˇ, iˇ cuꞈ-ahˇ saˬ deuꞈ byaˆ-awˇ, “Shiˇ-eu jeˬ hawˇ-eu zaˬ yoeˇ dzeh-eu jeˬ maˬ paˇ bi keuˆ le ni, iˇ cuꞈ heu-ahˇ ngaˇ bi shawˇ laˇ ma lehˇ Sahˬpaˬ Miˬyehˇ ehˇ-eu meh” lehˇ ehˇ-eu meh.

²²Eˇliˇshehˇ neh kʼaˇ ehˇ-eu loꞈ-ehˇ, kʼoeˇ ngeh neh naˇ iˇ cuꞈ kʼoeˇ shawˇ laˇ-euˬ meh.

²³Yeˬliˇkoˇ meuˬ-ahˇ neh Beˬdeˬlaˇ meuˬ-ahˇ Eˇliˇshehˇ iˇ luꞈ ngeh, gaˇ pehˇ-ahˇ meuˬ tiˬ meuˬ laꞈ kʼoeˇ neh zaˬ tiˬ deuˬ doˆ le-awˇ, “Uˬdeˬ-oˇ, heu gaˇ neh doˆ-iˇ-awˬ” lehˇ guˇ guˇ-ehˇ naˬ gʼa-eu meh.

²⁴Eˇliˇshehˇ naˇ kʼah ciˬ pyawˇ-awˇ, aˬ yawꞈ maꞈ-ahˇ lmˬ-awˇ, Sahˬpaˬ Miˬyehˇ-euˬ tsawˇ myahˇ uˬ moˆ yaˬ kʼehˇ yaˬ nehˬ-euˬ meh. Kʼoeˇ ngeh, kʼaˬ hmˇ aˬ ma nyiˬ mawˇ aˇ bawˇ sahˬ kʼaˆ-ahˇ neh doˆ le-awˇ, aˬ li zaˬ guˬ oeˬ tseˇ nyiꞈ gʼaˬ-ahˇ kawꞈ sehꞈ-euˬ meh.

²⁵Eˇliˇshehˇ-aˬ, Gaˬlaˬmeˬlaˇ gawˬ jawˬ-ahˇ daˆ leˇ-awˇ, Saˬmaˬliˆ meuˬ-ahˇ paˇ gʼoꞈ ka le-euˬ meh.