Read Akha 2 Sahˬpaˬ 21 Bible Online

2 Sahˬpaˬ 21 - Akha bible

2 Sahˬpaˬ 21

¹Maˬnaˇseˬ-aˬ, tseˇ nyiꞈ kʼoꞈ kʼawˆ ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ ngaˬ tseˇ ngaˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Heˬpaˬziˇbaˬ meh.

²Sahˬpaˬ Miˬyehˇ neh aˬ yawꞈ-euˬ tsawˇ haˬ deuˬ-ahˇ miˇ kʼahˬ kʼoeˇ kʼahˬ laꞈ kʼoeˇ sheuˬ uˇ gʼeh ngeh, miˇ kʼahˬ kʼoeˇ kʼahˬ laꞈ kʼoeˇ Sahˬpaˬ Miˬyehˇ neh bi teh doˆ-euˬ tsawˇ jeuˬ kʼoeˇ deuˬ mˇ-eu shaˇ-eu jawꞈ dui dui-eu gaˇ deuˬ-ahˇ, Maˬnaˇseˬ caw teh-eu laꞈ kʼoeˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

³Aˬ yawꞈ-euˬ aˬ da Heˬsaˬgiˇ neh laˆ cawˆ yaꞈ-euˬ lawˇ ciꞈ zaˬ deuˬ uˬ duˬ tahˬ-eu jawˇ duˬ kʼoeˇ deuˬ-ahˇ, aˬ yawꞈ neh paˇ tsoˆ muiˬ-euˬ meh. Iˇsaˬleˬlaˆ sahˬ paˬ Aˬhaˆ neh mˇ-euˬ loꞈ-ehˇ, Baˬlaˇ miˬyehˇ-ahˇ uˬ duˬ tahˬ-eu gʼaˇ duˬ, aˬ yawꞈ lawˇ duˬ tsoˆ-awˇ, Aˬsheˇlaˬ miˬyehˇ ma-euˬ mawˇ kawˇ aˬ yawꞈ tehˆ-euˬ meh. Aˬ guiˇ deuˬ-ahˇ kʼawꞈ aˬ yawꞈ uˬ duˬ tahˬ-euˬ meh.

⁴“Ngaˬ-ahˇ uˬ duˬ ya tahˬ-eu jawˇ duˬ meh” lehˇ, Sahˬpaˬ Miˬyehˇ neh ehˇ taˬ-euˬ Uˬ duˬ tahˬ nymˇ nymˇ ma laꞈ kʼoeˇ, lawˇ ciꞈ zaˬ deuˬ-euˬ lawˇ duˬ aˬ yawꞈ jahˇ ahˇ-euˬ meh.

⁵Uˬ duˬ tahˬ nymˇ-euˬ kʼoeˇ paˆ ma paˆ jaˆ-eu pu kaˬ-ahˇ, aˬ guiˇ deuˬ-ahˇ uˬ duˬ tahˬ-eu lawˇ duˬ aˬ yawꞈ gawˬ-euˬ meh.

⁶Aˬ yawꞈ-euˬ aˬ li miˬ dzaˬ-ahˇ dzah puiˆ-awˇ lawˇ-euˬ shehˇ-euˬ meh. Maw loˬ ja maw hawˇ-eu, nyiˇ paˬ shaˆ ma deuˬ-ahˇ aˬ yawꞈ gʼoe-euˬ meh. Sahˬpaˬ miˬyehˇ nui ma pehˇ laˇ ngeh keuˆ ni, Sahˬpaˬ Miˬyehˇ mehˬ shi aˬ yawꞈ iˬ baˇ mˇ dui dui-euˬ meh.

⁷“Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ miˇ kʼahˬ dawˬ tawˆ luꞈ laꞈ kʼoeˇ, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma heu nymˇ-aˬ, ngaˬ-ahˇ uˬ duˬ bi tahˬ-eu gʼaˇ duˬ ngaˬ neh tsoˆ taˬ-euˬ jawˇ duˬ pyeuꞈ-eu ma” lehˇ, Daˬbiˇ hawˇ-eu Sawˇlaˬmoˬ aˬ nyaꞈ da zaˬ-ahˇ Sahˬpaˬ Miˬyehˇ neh ehˇ tsaˬ tsoˆ nehˬ taˬ-euˬ Uˬ duˬ tahˬ nymˇ nymˇ ma kʼoeˇ nymˇ laꞈ kʼoeˇ, Maˬnaˇseˬ neh Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ bi jaˆ-euˬ meh.

⁸Kʼoeˇ uˬ taꞈ, “ Iˇsaˬleˬlaˆ tsawˇ haˬ deuˬ ngaˬ-euˬ ehˇ dawˬ naˇ haˬ geuꞈ jiˇ-awˇ, ngaˬ-euˬ zaˬ kʼaˆ Moˇseˬ neh aˬ yawꞈ maꞈ-ahˇ biꞈ taˬ yaꞈ-eu zahˇ dawˬ kʼoꞈ dawˬ dawˬ tawˆ luꞈ-ahˇ caw teh naˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ taˬ-euˬ miˇ kʼahˬ heu kʼahˬ laꞈ kʼoeˇ, aˬ yawꞈ maꞈ-ahˇ tiˬ jawˇ-iˬ maˬ bi teh doˆ” lehˇ, Sahˬpaˬ Miˬyehˇ neh ehˇ taˬ-euˬ jaˆ-eu meh.

⁹Ehˇ kʼawꞈ, Yuˇdaˆ tsawˇ haˬ deuˬ Sahˬpaˬ Miˬyehˇ-euˬ ehˇ dawˬ maˬ naˇ haˬ geuꞈ-ehˇ, Sahˬpaˬ Miˬyehˇ neh aˬ yawꞈ-euˬ tsawˇ haˬ deuˬ-ahˇ miˇ kʼahˬ kʼoeˇ kʼahˬ laꞈ kʼoeˇ sheuˬ ahˇ nehˬ ngeh, miˇ kʼahˬ kʼoeˇ kʼahˬ laꞈ kʼoeˇ aˬ yawꞈ neh teh doˆ-euˬ tsawˇ jeuˬ kʼoeˇ deuˬ neh mˇ-euˬ iˬ baˇ naˆ maˬ tseˇ huiˬ dzehˬ-eu iˬ baˇ mˇ ni, Yuˇdaˆ tsawˇ haˬ deuˬ-ahˇ Maˬnaˇseˬ gaˇ ma sheuˬ bahˬ-euˬ meh.

¹⁰Sahˬpaˬ Miˬyehˇ-euˬ zaˬ kʼaˆ pyeuꞈ-eu aˬ yawꞈ gʼaˇ duˬ ngehˬ dah-eu deuˬ-ahˇ gʼoe-awˇ, Sahˬpaˬ Miˬyehˇ heu loꞈ-ehˇ ehˇ-eu meh.

¹¹“Kaˬnaˬ tsawˇ jeuˬ neh mˇ-euˬ naˆ maˬ tseˇ doeˇ-eu, jawꞈ dui dui-eu gaˇ deuˬ-ahˇ Maˬnaˇseˬ mˇ-awˇ, aˬ yawꞈ-euˬ tahˬ pahˬ aˬ ma mawˇ kawˇ kʼoeˇ deuˬ baˬ da neh, Yuˇdaˆ tsawˇ haˬ iˬ baˇ mˇ ni aˬ yawꞈ gaˇ ma sheuˬ bahˬ-euˬ meh.

¹²Kʼoeˇ miˇ neh, kʼaˇ ya gaˬ-eu tsawˇ haˬ deuˬ myaꞈ leˇ tsoˆ leˇ jiˇ gaˇ keuˆ ni, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ kʼoeˇ taˆ, guˆ dui dui laˇ paˬ-ehˇ gʼeh-eu luˬ-iˇ seˇ-iˇ-eu jeˬ ngaˇ bi keuˆ le ma.

¹³Saˬmaˬliˆ meuˬ hawˇ-eu sahˬ paˬ Aˬhaˆ aˬ ha da zaˬ-ahˇ ngaˬ neh kʼehˬ nehˬ kʼaˆ nehˬ-euˬ loꞈ-ehˇ, Yeˬluˇsaˬlehˬ meuˬ-ahˇ ngaˇ kʼehˬ nehˬ ma. Shiˆ shawˇ-awˇ moꞈ tsahˬ taˬ-euˬ hawˬ gʼawˆ tiˬ gʼawˆ loꞈ-ehˇ, tsawˇ haˬ maˬ jawˇ-ehˇ pyeuꞈ-iˇ ngeh keuˆ ni Yeˬluˇsaˬlehˬ meuˬ-ahˇ, juˇ tsui ni jahˇ nehˬ ma.

¹⁴Maˬ cawˆ-iˇ ni dzeˇ-eu tsawˇ haˬ deuˬ-ahˇ kʼawꞈ, ngaˇ byehˇ dzeh nehˬ-awˇ, muiˇ-eu deuˬ-euˬ aˬ laꞈ laꞈ kʼoeˇ a ahˇ nehˬ ma. Muiˇ-eu deuˬ aˬ yawꞈ maꞈ-ahˇ kʼehˬ-awˇ, aˬ yawꞈ maꞈ-euˬ miˇ kʼahˬ laꞈ kʼoeˇ kʼaˇ jaˆ-eu jeˬ yuˇ geuꞈ jiˇ tehꞈ-a.

¹⁵Aˬ yawꞈ maꞈ-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ ngeh tiˬ nah neh, iˬ nah keuˆ ni, ngaˬ-euˬ mehˬ shi aˬ yawꞈ maꞈ iˬ baˇ mˇ-awˇ, ngaˇ nui ma pehˇ ni jahˇ nehˬ laꞈ-euˬ miˇ neh, ngaˬ-euˬ tsawˇ haˬ deuˬ-ahˇ ngaˇ kʼoeˇ loꞈ-ehˇ jahˇ nehˬ ma.”

¹⁶Iˬ baˇ maˬ ahˇ-eu tsawˇ haˬ gʼawˬ mya ni Maˬnaˇseˬ neh sehꞈ-euˬ miˇ neh, Yeˬluˇsaˬlehˬ meuˬ-ahˇ dehꞈ-eu aˇ bawˇ deuˬ shiˬ yoeˇ doˆ le luꞈ-eu meh. Yuˇdaˆ tsawˇ haˬ deuˬ miˬyehˇ nui deuˬ-ahˇ uˬ duˬ tahˬ-awˇ, Sahˬpaˬ Miˬyehˇ mehˬ shi iˬ baˇ mˇ ni aˬ yawꞈ gaˇ ma sheuˬ bahˬ-euˬ uˬ taꞈ-ehˇ, aˬ yawꞈ kʼoeˇ loꞈ-ehˇ paˇ mˇ-euˬ jeˬ pyeuꞈ-eu meh.

¹⁷Maˬnaˇseˬ neh mˇ-euˬ iˬ baˇ deuˬ hawˇ-eu, aˬ yawꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ deuˬ laꞈ kʼoeˇ boꞈ ahˇ taˬ-euˬ meh.

¹⁸Maˬnaˇseˬ ziˇ jiˇ-awˇ, Awˇza yaˇ kmˇ lehˇ kuˇ-eu sahˬ paˬ-euˬ yaˇ kmˇ laꞈ kʼoeˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Aˬmo gʼaˬ aˬ yawꞈ-euˬ dah zaˇ sahˬ paˬ geuꞈ-eu meh.

¹⁹Aˬmo-aˬ, nyiˬ tseˇ kʼoꞈ kʼawˆ ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yoˇtaˬbaˬ meuˬ-ahˇ jawˇ-eu Haˬluˆ-euˬ aˬ buˇ Meˬshuˇlaˬmehˇ meh.

²⁰Aˬ yawꞈ-euˬ aˬ da Maˬnaˇseˬ loꞈ-ehˇ, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

²¹Aˬ yawꞈ-euˬ aˬ da neh mˇ-euˬ gaˇ deuˬ-ahˇ aˬ yawꞈ dzaw geuꞈ-awˇ, aˬ yawꞈ-euˬ aˬ da uˬ duˬ tahˬ-euˬ tahˬ pahˬ aˬ ma mawˇ kawˇ deuˬ-ahˇ aˬ yawꞈ uˬ duˬ tahˬ-euˬ meh.

²²Aˬ yawꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ byehˇ dzeh-awˇ, Sahˬpaˬ Miˬyehˇ-euˬ ehˇ dawˬ maˬ naˇ haˬ geuꞈ-a.

²³Aˬmo-euˬ gaˇ mˇ-eu yaw huiˬ yaw mahˇ deuˬ Aˬmo-ahˇ ciˬ cuˇ ni puiˬ-awˇ, sahˬ paˬ-euˬ hawˇ nymˇ laꞈ kʼoeˇ aˬ yawꞈ-ahˇ sehꞈ-euˬ meh.

²⁴Aˬmo-ahˇ sehꞈ-euˬ tsawˇ haˬ deuˬ-ahˇ Yuˇdaˆ miˇ kʼahˬ zaˬ deuˬ neh paˇ sehꞈ poˆ-awˇ, aˬ yawꞈ-euˬ aˬ li Yawˇshiˆ-ahˇ sahˬ paˬ bi geuꞈ-euˬ meh.

²⁵Aˬmo neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁶Awˇza yaˇ kmˇ laꞈ kʼoeˇ jaˆ-eu lmˬ bymˇ-ahˇ Aˬmo-ahˇ baꞈ pahˬ-awˇ, aˬ yawꞈ-euˬ aˬ li Yawˇshiˆ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.