Read Akha 2 Sahˬpaˬ 23 Bible Online

2 Sahˬpaˬ 23 - Akha bible

2 Sahˬpaˬ 23

¹Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ kʼaˇ jawˇ-eu aˬ yuiꞈ aˬ tsu deuˬ-ahˇ, Yawˇshiˆ neh kuˇ uiˬ jiˇ-euˬ meh.

²Kʼoeˇ naˇ, piˇ ma deuˬ, Miˬyehˇ gʼaˇ duˬ ngehˬ dah-eu deuˬ hawˇ-eu, Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu smˇ muiˬ smˇ baw deuˬ hawˇ-eu iˇ shaˬ zaˬ deuˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, Uˬ duˬ tahˬ nymˇ nymˇ ma-ahˇ aˬ yawꞈ le-euˬ meh. Uˬ duˬ tahˬ nymˇ nymˇ ma laꞈ kʼoeˇ mawˇ-euˬ sahˬ boꞈ paˇ yoˆ kʼoeˇ yoˆ yoˆ lah ni, aˬ yawꞈ maꞈ dawˬ tawˆ luꞈ mehˬ shi sahˬ paˬ gui-euˬ meh.

³Sahˬpaˬ Miˬyehˇ-euˬ ehˇ dawˬ naˇ haˬ geuꞈ-eu gʼaˇ duˬ maˬ ehˇ, aˬ yawꞈ-euˬ zahˇ dawˬ kʼoꞈ daw hawˇ-eu aˬ yawꞈ neh mehˬ nehˬ tsoˆ nehˬ-euˬ dawˬ deuˬ-ahˇ, nui ma gʼawˇ mawˇ dawˬ tawˆ luꞈ caw teh-eu gʼaˇ duˬ maˬ ehˇ, sahˬ boꞈ paˇ dmˬ kʼoeˇ dmˬ laꞈ kʼoeˇ boꞈ taˬ-euˬ loꞈ-ehˇ, dawˬ ma saˇ jaˇ dzaˬ-euˬ dawˬ deuˬ-ahˇ maˬ gʼawˬ-iˇ ni dehꞈ gʼeh-eu gʼaˇ duˬ maˬ ehˇ, kʼawˇ zeuˇ dawˬ peh aˬ yawꞈ yawꞈ-awˇ saˇ jaˇ dzaˬ-euˬ meh. Tsawˇ haˬ dawˬ tawˆ luꞈ kʼawꞈ, dawˬ ma saˇ jaˇ-ahˇ caw teh-awˇ dehꞈ ma lehˇ saˇ jaˇ dzaˬ-euˬ meh.

⁴Kʼoeˇ naˇ, piˇ ma yaw huiˬ gʼaˬ pyeuꞈ-eu Hiˇlaˬkiˇ-ahˇ maˬ ehˇ, aˬ yawꞈ-ahˇ caw ba-eu piˇ ma deuˬ-ahˇ maˬ ehˇ, “Baˬlaˇ miˬ yehˇ, Aˬsheˇlaˬ miˬ yehˇ ma hawˇ-eu, aˬ guiˇ deuˬ-ahˇ uˬ duˬ tahˬ gaˇ geuꞈ-euˬ keu ka dawˬ tawˆ luꞈ baꞈ doˆ laꞈ-awˬ” lehˇ, Yawˇshiˆ dawˬ biꞈ-euˬ meh. Meuˬ-euˬ laꞈ nyiˇ paw, Giˇdaˬloˬ deh kʼawꞈ-ahˇ keu ka kʼoeˇ deuˬ dawˬ tawˆ luꞈ aˬ yawꞈ miˬ dzaˬ keuˬ dzeh-awˇ, puiˆ doˆ-euˬ kʼaˬ lehˇ deuˬ, Beˬdeˬlaˇ meuˬ-ahˇ tawˆ gʼeh-euˬ meh.

⁵Yeˬluˇsaˬlehˬ meuˬ-euˬ gaˇ dahˬ gaˇ dzeˇ jaˆ-eu meuˬ deuˬ hawˇ-eu, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ, lawˇ ciꞈ zaˬ-euˬ lawˇ duˬ kʼoeˇ taˆ bi lawˇ bi shehˇ-eu gʼaˇ duˬ Yuˇdaˆ sahˬ paˬ deuˬ neh tseˇ doˆ taˬ-euˬ piˇ ma deuˬ hawˇ-eu, Baˬlaˇ miˬyehˇ, nahˇ ma, ba la, aˬ guiˇ heu deuˬ-ahˇ kʼaˇ lawˇ kʼaˇ shehˇ-eu piˇ ma deuˬ-ahˇ, aˬ yawꞈ teh ka-euˬ meh.

⁶Uˬ duˬ tahˬ nymˇ nymˇ ma laꞈ kʼoeˇ jaˆ-eu Aˬsheˇlaˬ miˬyehˇ ma-euˬ mawˇ kawˇ-ahˇ, Giˇdaˬloˬ deh kʼawꞈ-ahˇ yuˇ doˆ gʼeh-awˇ, miˬ dzaˬ dzah puiˆ dzeh-euˬ meh. Kʼoeˇ naˇ, puiˆ doˆ-euˬ kʼaˬ lehˇ kʼoeˇ-ahˇ yaw muiˬ paˬ-ehˇ paˇ tahˬ loeˇ-awˇ, miˇ kʼahˬ zaˬ deuˬ-euˬ lmˬ bymˇ-ahˇ byaˆ-euˬ meh.

⁷Uˬ duˬ tahˬ nymˇ nymˇ ma laꞈ kʼoeˇ, zaˬ miˬ zaˬ hawˇ-eu kʼaˬ dzeˇ zaˬ meh maˬ laˇ deuˬ jawˇ-eu jawˇ duˬ aˬ yawꞈ laˆ cawˆ-euˬ meh. Jawˇ duˬ kʼoeˇ tsahˇ-aˬ, Aˬsheˇlaˬ miˬyehˇ ma-ahˇ uˬ duˬ tahˬ ngeh dm-eu pehˇ kʼahˬ pehˇ mahˇ deuˬ-ahˇ, zaˬ miˬ zaˬ deuˬ guꞈ luꞈ-eu jawˇ duˬ kʼawꞈ pyeuꞈ-eu meh.

⁸Yuˇdaˆ miˇ kʼahˬ doe ni jaˆ-eu meuˬ deuˬ-ahˇ jawˇ-eu piˇ ma deuˬ-ahˇ, Yeˬluˇsaˬlehˬ meuˬ-ahˇ aˬ yawꞈ sheuˬ uiˬ-awˇ, aˬ yawꞈ maꞈ neh lawˇ-eu shehˇ-eu jeˬ kʼaˇ mˇ-euˬ lawˇ duˬ dawˬ tawˆ luꞈ laˆ cawˆ jiˇ-euˬ meh. Yeˬluˇsaˬlehˬ meuˬ-ahˇ uˇ leˇ-eu lahˇ kʼehˬ kʼehˬ ma-euˬ aˇ caˇ paw dzeˇ paˆ-ahˇ lahˇ kʼehˬ tiˬ kʼehˬ jaˆ-eu meh. Lahˇ kʼehˬ kʼoeˇ kʼehˬ-aˬ, meuˬ-ahˇ uˆ lahˇ-eu gʼaˬ pyeuꞈ-eu Yawˇshuˆ neh gawˬ taˬ-euˬ meh. Kʼoeˇ-euˬ dawˬ peh jaˆ-eu ciꞈ myehꞈ nehꞈ deuˬ-ahˇ lawˇ-eu lawˇ duˬ kʼoeˇ deuˬ-ahˇ kʼawꞈ, aˬ yawꞈ laˆ cawˆ-euˬ meh. Piˇ ma kʼoeˇ deuˬ-ahˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ gaˇ maˬ bi mˇ-a.

⁹Ehˇ kʼawꞈ, aˬ yawꞈ maꞈ-euˬ cawˬ piˇ ma deuˬ-ahˇ biꞈ nehˬ-euˬ dehˬ tseˬ maˬ ahˇ-eu kaˬ muˇ deuˬ-ahˇ, aˬ yawꞈ maꞈ dzaˬ nya-eu meh.

¹⁰Tsawˇ haˬ tiˬ gʼaˬ-iˬ, Moˇlehˆ miˬyehˇ-ahˇ yawˬ ha-euˬ aˬ buˇ aˬ li maˬ ya lawˇ-eu gʼaˇ duˬ, Hiˬnoˬ deh kʼawꞈ-ahˇ jaˆ-eu Tawˇpehˆ lehˇ kuˇ-eu lawˇ ciꞈ zaˬ deuˬ-euˬ lawˇ duˬ kʼoeˇ tsahˇ kʼawꞈ, sahˬ paˬ Yawˇshiˆ neh laˆ cawˆ-euˬ meh.

¹¹Yuˇdaˆ sahˬ paˬ deuˬ neh nahˇ ma-ahˇ uˬ duˬ tahˬ gaˇ geuꞈ-euˬ mahˬ deuˬ kʼawꞈ, aˬ yawꞈ yuˇ dzeh-awˇ, kʼoeˇ gaˇ geuꞈ-euˬ mahˬ laˆ lawˬ deuˬ-ahˇ aˬ yawꞈ miˬ dzaˬ keuˬ dzeh-euˬ meh. Mˇ myawˬ kʼoeˇ deuˬ-aˬ, Uˬ duˬ tahˬ nymˇ nymˇ ma-euˬ gʼoˆ kʼehˬ dawˬ peh, sahˬ paˬ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Naˬdaˬmehˬlehˆ-euˬ nymˇ-ahˇ maˬ kaˬ maˬ kaˇ-ehˇ jaˆ-eu meh.

¹²Sahˬ paˬ Aˬkaˆ jawˇ-eu aˇ lawˆ kʼoeˇ taˆ nyiˬ paˆ-ehˇ, sahˬ paˬ-euˬ hawˇ nymˇ nymˇ mˬ kʼoeˇ taˆ jaˆ-eu Yuˇdaˆ sahˬ paˬ deuˬ neh tsoˆ taˬ-euˬ lawˇ duˬ hawˇ-eu, Uˬ duˬ tahˬ nymˇ nymˇ ma-euˬ kʼoeˇ paˆ ma paˆ-ehˇ jaˆ-eu sahˬ paˬ Maˬnaˇseˬ neh tsoˆ taˬ-euˬ lawˇ duˬ deuˬ-ahˇ, sahˬ paˬ Yawˇshiˆ neh laˆ cawˆ-euˬ meh. Lawˇ duˬ kʼoeˇ deuˬ-ahˇ aˬ yawꞈ deh meuˇ-awˇ, Giˇdaˬloˬ deh kʼawꞈ-ahˇ baꞈ dzeh-euˬ meh.

¹³Siˇdoˬ miˬ yehˇ ma Aˬshaˇtaˬteˬ, Mawˇbaˆ miˬ yehˇ Sheˬmoˇshaˆ hawˇ-eu, Aˬmoˬ miˬ yehˇ Moˇlehˆ heu deuˬ-ahˇ uˬ duˬ tahˬ-eu gʼaˇ duˬ, Yeˬluˇsaˬlehˬ meuˬ-euˬ nahˇ ma doˆ kʼehˬ paw, Saˬloˬ gawˬ jawˬ-euˬ laꞈ oˆ sahˬ paˬ Sawˇlaˬmoˬ neh tehˆ taˬ yaꞈ-euˬ tahˬ pahˬ aˬ ma mawˇ kawˇ deuˬ-ahˇ kʼawꞈ, Yawˇshiˆ laˆ cawˆ-euˬ meh.

¹⁴Sahˬ paˬ Yawˇshiˆ-aˬ, kʼaˬ lo kʼawˇ zeuˇ deuˬ deh meuˇ-awˇ, Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ deuˬ deuˆ coꞈ dzeh-euˬ uˬ taꞈ, tahˬ pahˬ aˬ ma mawˇ kawˇ kʼoeˇ deuˬ jaˆ-eu tsahˇ-ahˇ, tsawˇ haˬ-euˬ shaˬ yoeˬ neh gahˬ tehˬ-euˬ meh.

¹⁵Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu, Neˬbaˇ-euˬ aˬ li sahˬ paˬ Yeˬyawˇbamˬ neh tsoˆ-euˬ, Beˬdeˬlaˇ meuˬ-ahˇ jaˆ-eu uˬ duˬ tahˬ-eu jawˇ duˬ kʼawꞈ, Yawˇshiˆ laˆ cawˆ-euˬ meh. Lawˇ duˬ-ahˇ aˬ yawꞈ ngawˬ coˬ-awˇ, kʼaˬ lo deuˬ deh paˆ-awˇ, tahˬ meuˇ tahˬ loeˇ-euˬ meh. Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ-ahˇ aˬ yawꞈ miˬ dzaˬ keuˬ dzeh-euˬ meh.

¹⁶Kʼoeˇ naˇ, kʼoeˇ-euˬ jawˬ jawˬ-ehˇ Yawˇshiˆ haw gʼeh ngeh, lmˬ bymˇ jaˆ gaˇ ya mawˇ-awˇ, tsawˇ haˬ-euˬ shaˬ yoeˬ duˬ doˆ-awˇ, lawˇ duˬ kʼoeˇ taˆ dzah puiˆ nehˬ-euˬ meh. Aˇ hu ba, bawˬ-iˬ gʼeh-awˇ lawˇ duˬ kʼoeˇ-euˬ dawˬ peh sahˬ paˬ Yeˬyawˇbamˬ yawꞈ luꞈ ngeh, Miˬyehˇ gʼaˇ duˬ ngehˬ dah-eu deuˬ neh ehˇ taˬ-euˬ dawˬ byah laˇ ni lawˇ duˬ kʼoeˇ hmˬ-ahˇ aˬ yawꞈ kʼoeˇ loꞈ-ehˇ laˆ cawˆ nehˬ-euˬ jeˬ pyeuꞈ-eu meh. Sahˬpaˬ Yawˇshiˆ jawˬ jawˬ-ehˇ paˇ haw gʼeh ngeh, kʼoeˇ loꞈ-ehˇ ehˇ taˬ yaꞈ-euˬ Miˬyehˇ gʼaˇ duˬ ngehˬ dah-eu gʼaˬ-euˬ lmˬ bymˇ-ahˇ paˇ mawˇ-euˬ meh.

¹⁷“Lmˬ bymˇ kʼoeˇ aˬ suˇ gʼaˬ-euˬ lmˬ bymˇ-a” lehˇ aˬ yawꞈ naˇ haˬ ngeh, “Lmˬ bymˇ kʼoeˇ-aˬ, lawˇ duˬ heu hmˬ-ahˇ nymˬ-mˇ nawˬ neh jahˇ nehˬ gʼaˬ-euˬ loꞈ-ehˇ pyeuꞈ laˇ tehꞈ-a lehˇ ngehˬ dah yaꞈ-euˬ, Miˬyehˇ gʼaˇ duˬ ngehˬ dah-eu kʼoeˇ gʼaˬ-eu lmˬ bymˇ meh” lehˇ, Beˬdeˬlaˇ meuˬ-ahˇ jawˇ-eu tsawˇ haˬ deuˬ aˬ yawꞈ-ahˇ ehˇ nehˬ-euˬ meh.

¹⁸“Aˬ yawꞈ-euˬ shaˬ yoeˬ maˬ yuˇ yawˬ ni bi jaˆ yaꞈ-awˬ” lehˇ Yawˇshiˆ ehˇ ngeh, aˬ yawꞈ-euˬ shaˬ yoeˬ-ahˇ maˬ toeˬ ciˆ ni bi jaˆ yaꞈ-euˬ meh. Kʼoeˇ loꞈ-ehˇ duˇ ni, Saˬmaˬliˆ meuˬ-ahˇ neh oe-euˬ Miˬyehˇ gʼaˇ duˬ ngehˬ dah-eu deuˬ-euˬ shaˬ yoeˬ deuˬ-ahˇ kʼawꞈ, maˬ toeˬ ciˆ ni bi jaˆ yaꞈ-euˬ meh.

¹⁹Iˇsaˬleˬlaˆ miˇ kʼahˬ laꞈ kʼoeˇ, meuˬ aˬ yawꞈ meuˬ yawꞈ-ahˇ jaˆ-eu lawˇ ciꞈ zaˬ-euˬ uˬ duˬ tahˬ-eu jawˇ duˬ deuˬ-ahˇ, sahˬ paˬ Yawˇshiˆ laˆ cawˆ jiˇ-euˬ meh. Iˇsaˬleˬlaˆ sahˬ paˬ deuˬ neh uˬ duˬ tahˬ-eu jawˇ duˬ kʼoeˇ deuˬ tsoˆ-awˇ, Sahˬpaˬ Miˬyehˇ nui ma pehˇ ni mˇ taˬ yaꞈ-euˬ meh. Beˬdeˬlaˇ meuˬ-ahˇ jaˆ-eu lawˇ duˬ-ahˇ aˬ yawꞈ neh kʼaˇ jahˇ nehˬ-eu loꞈ-ehˇ, lawˇ duˬ kʼoeˇ deuˬ-ahˇ kʼawꞈ aˬ yawꞈ jahˇ nehˬ-euˬ meh.

²⁰Lawˇ duˬ kʼoeˇ deuˬ-ahˇ gaˇ kʼaˇ mˇ luꞈ-eu lawˇ ciꞈ zaˬ-euˬ piˇ ma deuˬ-ahˇ, lawˇ duˬ kʼoeˇ deuˬ kʼoeˇ taˆ aˬ yawꞈ sehꞈ-awˇ, lawˇ duˬ aˬ yawꞈ hmˬ yawꞈ kʼoeˇ taˆ, tsawˇ haˬ shaˬ yoeˬ dzah puiˆ-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ aˬ yawꞈ gʼoꞈ leˇ-euˬ meh.

²¹Dawˬ ma saˇ jaˇ sahˬ boꞈ laꞈ kʼoeˇ boꞈ taˬ-euˬ loꞈ-ehˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ Baˬsaˬkaˬ bawˬ-iˬ gʼeh-eu gʼaˇ duˬ, aˬ yawꞈ-euˬ miˇ kʼahˬ zaˬ dawˬ tawˆ luꞈ -ahˇ, sahˬ paˬ Yawˇshiˆ dawˬ biꞈ-euˬ meh.

²²Iˇsaˬleˬlaˆ miˇ kʼahˬ-ahˇ yaˇ kʼaˬ daˇ-eu deuˬ neh uˆ lahˇ gʼaˬ naˇ kʼah, Iˇsaˬleˬlaˆ sahˬ paˬ deuˬ maˬ ehˇ, Yuˇdaˆ sahˬ paˬ deuˬ maˬ ehˇ, kʼoeˇ ngeh poˆ loꞈ-ehˇ gʼeh-eu Baˬsaˬkaˬ bawˬ-iˬ tiˬ jawˇ-iˬ maˬ gʼeh haw-aˬ.

²³Sahˬpaˬ Yawˇshiˆ uˆ lahˇ-eu tseˇ yehꞈ kʼoꞈ tiˬ kʼoꞈ-ahˇ, Yeˬluˇsaˬlehˬ meuˬ laꞈ kʼoeˇ Baˬsaˬkaˬ bawˬ-iˬ kʼoeˇ loꞈ-ehˇ gʼeh-euˬ meh.

²⁴Piˇ ma yaw huiˬ gʼaˬ pyeuꞈ-eu Hiˇlaˬkiˇ neh Uˬ duˬ tahˬ nymˇ nymˇ ma laꞈ kʼoeˇ mawˇ-euˬ sahˬ boꞈ paˇ yoˆ kʼoeˇ dmˬ laꞈ kʼoeˇ boꞈ taˬ-euˬ gaˇ kawˆ-ahˇ tsaˬ ni, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ kʼaˇ jawˇ kʼaˇ jaˆ-eu nyiˇ paˬ shaˆ ma deuˬ hawˇ-eu ja maw maw-eu deuˬ maˬ ehˇ, nymˇ kʼahˬ laꞈ kʼoeˇ jaˆ-eu miˬyehˇ deuˬ hawˇ-eu tahˬ pahˬ aˬ ma mawˇ kawˇ deuˬ maˬ ehˇ, lawˇ ciꞈ zaˬ deuˬ uˬ duˬ tahˬ ngeh geuꞈ-euˬ keu ka dawˬ tawˆ luꞈ maˬ ehˇ, sahˬ paˬ Yawˇshiˆ neh biˬ dzeh jiˇ-euˬ meh.

²⁵Nui ma gʼawˇ mawˇ hawˇ-eu gʼaˬ dawˬ tawˆ luꞈ Sahˬpaˬ Miˬyehˇ-ahˇ jah-awˇ, Moˇseˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-eu, sahˬ paˬ Yawˇshiˆ loꞈ-ehˇ gʼeh-eu sahˬ paˬ, aˬ yawꞈ-euˬ mehˬ hu maˬ ehˇ, mehˬ nah maˬ ehˇ, tiˬ gʼaˬ-iˬ maˬ jawˇ haw-aˬ.

²⁶Ehˇ kʼawꞈ, Sahˬpaˬ Miˬyehˇ nui ma pehˇ ni sahˬ paˬ Maˬnaˇseˬ neh mˇ yaꞈ-eu gaˇ deuˬ baˬ da neh, Yuˇdaˆ miˇ kʼahˬ-ahˇ Sahˬpaˬ Miˬyehˇ nui ma pehˇ-eu maˬ taˬ leˇ-a.

²⁷“Iˇsaˬleˬlaˆ miˇ kʼahˬ-ahˇ ngaˬ neh jahˇ nehˬ-euˬ loꞈ-ehˇ, Yuˇdaˆ miˇ kʼahˬ-ahˇ kʼawꞈ jahˇ nehˬ ma. Yuˇdaˆ miˇ kʼahˬ zaˬ deuˬ-ahˇ, ngaˇ maˬ mawˇ gaˇ bi iˇ byoˆ jiˇ-awˇ, ngaˬ neh tseˇ doˆ-euˬ Yeˬluˇsaˬlehˬ meuˬ hawˇ-eu, ngaˬ-ahˇ uˬ duˬ ya tahˬ-eu jawˇ duˬ meh lehˇ ngaˬ neh ehˇ taˬ-euˬ Uˬ duˬ tahˬ nymˇ nymˇ ma-ahˇ kʼawꞈ, ngaˇ byehˇ dzeh nehˬ ma” lehˇ, Sahˬpaˬ Miˬyehˇ ehˇ-eu meh.

²⁸Sahˬ paˬ Yawˇshiˆ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁹Yawˇshiˆ sahˬ paˬ geuꞈ luꞈ ngeh, Iˇjiˇtuˆ sahˬ paˬ Neˬkawˇ gʼaˬ Aˬshuˇliˆ sahˬ paˬ-ahˇ caw ba-eu lehˇ, Iˇjiˇtuˆ guiˇ maꞈ tiˬ maꞈ sheuˬ-awˇ, Uˇpaˬlaˇ lawˇ daˬ-ahˇ laˇ-euˬ meh. Iˇjiˇtuˆ guiˇ maꞈ-ahˇ laˆ tsoeˬ-eu lehˇ, Meˬgiˇdoˬ meuˬ-ahˇ sahˬ paˬ Yawˇshiˆ le ngeh, guiˇ deuˆ gaˇ shiˇ-euˬ meh.

³⁰Aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-ahˇ mahˬ laˆ lawˬ laꞈ kʼoeˇ baꞈ ahˇ-awˇ, Yeˬluˇsaˬlehˬ meuˬ-ahˇ tawˬ kʼoꞈ gʼeh-euˬ meh. Kʼoeˇ naˇ, sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Yuˇdaˆ miˇ kʼahˬ zaˬ deuˬ neh, Yawˇshiˆ-euˬ aˬ li Yoˇaˬhaˆ-ahˇ, aˬ da gʼaˬ-euˬ dah zaˇ sahˬ paˬ bi geuꞈ-euˬ meh.

³¹Yoˇaˬhaˆ Yuˇdaˆ sahˬ paˬ pyeuꞈ laˇ ngeh, nyiˬ tseˇ smˇ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ ba la smˇ siˬ uˆ lahˇ-euˬ meh. Aˬ yawꞈ-euˬ aˬ ma-aˬ, Liˇbaˬnahˬ meuˬ-ahˇ jawˇ-eu Yeˬlaˬmiˇ-euˬ aˬ buˇ Haˬmuˇtaˬlaˇ meh.

³²Aˬ yawꞈ-euˬ aˬ poeˬ aˬ bawˇ deuˬ-ahˇ dzaw geuꞈ-awˇ, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

³³Aˬ yawꞈ-ahˇ Yuˇdaˆ sahˬ paˬ maˬ bi geuꞈ ni, Iˇjiˇtuˆ sahˬ paˬ Neˬkawˇ neh aˬ yawꞈ-ahˇ nyehꞈ-awˇ, Haˬmaˆ miˇ kʼahˬ Yiˇbaˬlahˬ meuˬ laꞈ kʼoeˇ nyehꞈ lahˇ-awˇ, Yuˇdaˆ miˇ kʼahˬ-ahˇ pyuˇ nyiˬ heˇ jawꞈ-i hawˇ-eu, shuiˇ nyiˬ tseˇ jawꞈ-i taꞈ-euˬ meh.

³⁴Sahˬ paˬ Neˬkawˇ neh, Yawˇshiˆ-euˬ dah zaˇ Yawˇshiˆ-euˬ aˬ li Eˇliˇkmˬ gʼaˬ-ahˇ sahˬ paˬ ka nehˬ-awˇ, Yeˬhawˇyaˬkmˬ lehˇ tsawˇ myahˇ myahˇ paˇ nehˬ-euˬ meh. Yoˇaˬhaˆ-aˬ, sahˬ paˬ Neˬkawˇ neh Iˇjiˇtuˆ miˇ kʼahˬ-ahˇ bi sheuˬ ka gʼeh-awˇ, kʼoeˇ gaˇ shiˇ-euˬ meh.

³⁵Sahˬ paˬ Yeˬhawˇyaˬkmˬ-aˬ, Iˇjiˇtuˆ sahˬ paˬ-ahˇ kawˬ doˆ nehˬ-eu gʼaˇ duˬ aˬ yawꞈ-euˬ miˇ kʼahˬ zaˬ deuˬ-ahˇ pyuˇ taꞈ ngeh, smˇ muiˬ muiˬ-eu deuˬ-ahˇ taꞈ myaˬ dzehˬ-awˇ, iˇ shaˬ shaˬ-eu deuˬ-ahˇ taꞈ cuiˆ dzehˬ-euˬ meh.

³⁶Yeˬhawˇyaˬkmˬ Yuˇdaˆ sahˬ paˬ pyeuꞈ laˇ ngeh, nyiˬ tseˇ ngaˬ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ tiꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yuˇmaˬ meuˬ-ahˇ jawˇ-eu Peˬdehˇyaˬ-euˬ aˬ buˇ Zeˬbiˇdaˬ meh.

³⁷Yeˬhawˇyaˬkmˬ-aˬ, aˬ yawꞈ-euˬ aˬ poeˬ aˬ bawˇ deuˬ-ahˇ dzaw geuꞈ-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.