Read Akha 2 Sahˬpaˬ 24 Bible Online

2 Sahˬpaˬ 24 - Akha bible

2 Sahˬpaˬ 24

¹Yeˬhawˇyaˬkmˬ sahˬ paˬ geuꞈ luꞈ ngeh, Baˬbuˇloˬ sahˬ paˬ Neˬbuˬkaˬneˬzaˬ Yuˇdaˆ miˇ kʼahˬ-ahˇ uˇ le-awˇ, aˬ yawꞈ uˆ lahˇ-eu uˬ moˆ Yeˬhawˇyaˬkmˬ smˇ kʼoꞈ jawˇ-euˬ meh. Kʼoeˇ naˇ, Neˬbuˬkaˬneˬzaˬ-ahˇ Yeˬhawˇyaˬkmˬ puiˬ-euˬ meh.

²Sahˬpaˬ Miˬyehˇ neh aˬ yawꞈ-euˬ zaˬ kʼaˆ pyeuꞈ-eu aˬ yawꞈ-euˬ gʼaˇ duˬ ngehˬ dah-eu deuˬ-ahˇ gʼoe-awˇ ehˇ taˬ-euˬ loꞈ-ehˇ, Yuˇdaˆ miˇ kʼahˬ-ahˇ bi laˆ cawˆ-eu gʼaˇ duˬ, Baˬbuˇloˬ guiˇ maꞈ, Suˇliˆ guiˇ maꞈ, Mawˇbaˆ guiˇ maꞈ, Aˬmoˬ guiˇ maꞈ heu deuˬ-ahˇ, Yeˬhawˇyaˬkmˬ jawˇ gaˇ pyehˬ gʼeh leꞈ-euˬ meh.

³Sahˬ paˬ Maˬnaˇseˬ neh mˇ-euˬ iˬ baˇ baˬ da neh, Yuˇdaˆ miˇ kʼahˬ zaˬ deuˬ-ahˇ Sahˬpaˬ Miˬyehˇ maˬ mawˇ gaˇ bi iˇ byoˆ gʼeh-eu gʼaˇ duˬ, Sahˬpaˬ Miˬyehˇ dawˬ biꞈ-awˇ kʼoeˇ loꞈ-ehˇ bi pyeuꞈ laˇ-euˬ meh.

⁴Kʼaˆ tiˬ paˆ ni, iˬ baˇ maˬ ahˇ-eu tsawˇ haˬ deuˬ-ahˇ aˬ yawꞈ sehꞈ-euˬ baˬ da neh, kʼoeˇ loꞈ-ehˇ bi pyeuꞈ laˇ-euˬ meh. Kʼoeˇ loꞈ-ehˇ mˇ-euˬ baˬ da neh, Maˬnaˇseˬ-ahˇ Sahˬpaˬ Miˬyehˇ iˬ baˇ maˬ pyehˬ nehˬ coeˇ-a.

⁵Yeˬhawˇyaˬkmˬ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁶Yeˬhawˇyaˬkmˬ ziˇ jiˇ-awˇ, aˬ yawꞈ-euˬ aˬ li Yeˬhawˇyaˬciˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.

⁷Iˇjiˇtuˆ miˇ kʼahˬ laꞈ-ahˇ jaˆ-eu miˇ kʼahˬ pyeuꞈ-eu, Uˇpaˬlaˇ lawˇ baˬ-ahˇ neh Iˇjiˇtuˆ miˇ kʼahˬ-ahˇ keuˆ ni, Baˬbuˇloˬ sahˬ paˬ laꞈ-ahˇ ahˇ leˇ-euˬ miˇ neh, Iˇjiˇtuˆ sahˬ paˬ hawˇ-eu aˬ yawꞈ-euˬ guiˇ maꞈ deuˬ laꞈ nyiˇ paw maꞈ doˆ le ni jawˇ-euˬ meh.

⁸Yeˬhawˇyaˬciˬ sahˬ paˬ pyeuꞈ laˇ ngeh, tseˇ koꞈ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ ba la smˇ siˬ uˆ lahˇ-euˬ meh. Aˬ yawꞈ-euˬ aˬ ma-aˬ, Yeˬluˇsaˬlehˬ meuˬ-ahˇ jawˇ-eu Eˇlaˬnaˬdaˬ-euˬ aˬ buˇ Neˬhuˇshaˬtaˆ meh.

⁹Yeˬhawˇyaˬciˬ-aˬ, aˬ yawꞈ-euˬ aˬ da-ahˇ dzaw geuꞈ-awˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

¹⁰Aˬ yawꞈ uˆ lahˇ luꞈ-eu aˇ yamˬ laꞈ kʼoeˇ, sahˬ paˬ Neˬbuˬkaˬneˬzaˬ-euˬ yaw huiˬ yaw mahˇ deuˬ aˬ yuiꞈ geuꞈ-awˇ sheuˬ leꞈ-euˬ Baˬbuˇloˬ guiˇ maꞈ Yeˬluˇsaˬlehˬ meuˬ-ahˇ guiˇ deuˆ le-awˇ, loꞈ jawˬ taˬ-euˬ meh.

¹¹Kʼoeˇ loꞈ-ehˇ loꞈ jawˬ taˬ ngeh, sahˬ paˬ Neˬbuˬkaˬneˬzaˬ-euˬ gʼawˇ mawˇ Yeˬluˇsaˬlehˬ meuˬ-ahˇ oe-euˬ meh.

¹²Sahˬ paˬ Yeˬhawˇyaˬciˬ-aˬ, aˬ yawꞈ-euˬ aˬ ma, aˬ yawꞈ-euˬ aˬ li deuˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ hawˇ-eu, sahˬ paˬ-euˬ hawˇ nymˇ laꞈ kʼoeˇ gaˇ mˇ-euˬ yaw huiˬ yaw mahˇ deuˬ nehˬ-ehˇ tiˬ kawˆ loꞈ-ehˇ, Baˬbuˇloˬ tsawˇ haˬ deuˬ-euˬ laꞈ oꞈ awꞈ nehˬ-euˬ meh. Neˬbuˬkaˬneˬzaˬ sahˬ paˬ geuꞈ-euˬ yehꞈ kʼoꞈ tiˬ kʼoꞈ-ahˇ, Yeˬhawˇyaˬciˬ-ahˇ nyehꞈ-euˬ meh.

¹³Uˬ duˬ tahˬ nymˇ nymˇ ma hawˇ-eu sahˬ paˬ-euˬ hawˇ nymˇ laꞈ kʼoeˇ kʼaˇ jaˆ-eu pyuˇ shuiˇ myawˬ gahˬ deuˬ, Baˬbuˇloˬ miˇ kʼahˬ-ahˇ aˬ yawꞈ yuˇ gʼeh-euˬ meh. Sahˬpaˬ Miˬyehˇ neh ehˇ taˬ-euˬ loꞈ-ehˇ, Uˬ duˬ tahˬ nymˇ nymˇ ma laꞈ kʼoeˇ zmˬ-eu gʼaˇ duˬ, sahˬ paˬ Sawˇlaˬmoˬ neh jahˇ taˬ yaꞈ-euˬ shuiˇ keu ka dawˬ tawˆ luꞈ-ahˇ, Neˬbuˬkaˬneˬzaˬ neh laˆ kʼehꞈ laˆ kʼoeˆ jiˇ-euˬ meh.

¹⁴Sahˬ paˬ-euˬ aˬ li dawˬ tawˆ luꞈ hawˇ-eu, aˬ yuiꞈ aˬ tsu dawˬ tawˆ luꞈ ahˇ leˇ-ehˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ tiˬ muiˇ gʼaˬ-ahˇ, Neˬbuˬkaˬneˬzaˬ nyehꞈ gʼeh-euˬ meh. Ba jiˬ hawˇ-eu laꞈ myawˬ laꞈ sawˆ kʼaˇ nya-eu tsawˇ haˬ dawˬ tawˆ luꞈ-ahˇ kʼawꞈ, aˬ yawꞈ neh nyehꞈ gʼeh-awˇ, yaw shaˬ zaˬ deuˬ tehꞈ-ehˇ Yuˇdaˆ miˇ kʼahˬ laꞈ kʼoeˇ bi jawˇ yaꞈ-euˬ meh.

¹⁵Yeˬhawˇyaˬciˬ-ahˇ maˬ ehˇ, aˬ yawꞈ-euˬ aˬ ma-ahˇ maˬ ehˇ, aˬ yawꞈ-euˬ miˬ zaˬ deuˬ-ahˇ maˬ ehˇ, Yuˇdaˆ miˇ kʼahˬ laꞈ kʼoeˇ aˬ yuiꞈ aˬ tsu geuꞈ luꞈ-eu deuˬ-ahˇ maˬ ehˇ, Neˬbuˬkaˬneˬzaˬ neh Baˬbuˇloˬ miˇ kʼahˬ-ahˇ nyehꞈ gʼeh jiˇ-euˬ meh.

¹⁶Tsawˇ myahˇ doˆ-eu tsawˇ haˬ dawˬ tawˆ luꞈ shiꞈ heˇ gʼaˬ hawˇ-eu, ba jiˬ hawˇ-eu laꞈ myawˬ laꞈ sawˆ nya-eu tsawˇ haˬ tiˬ heˇ gʼaˬ-ahˇ, Neˬbuˬkaˬneˬzaˬ neh Baˬbuˇloˬ miˇ kʼahˬ-ahˇ nyehꞈ gʼeh-euˬ meh. Aˬ yawꞈ maꞈ dawˬ tawˆ luꞈ, guiˇ deuˆ nya-eu tsawˇ haˬ deuˬ pyeuꞈ-eu meh.

¹⁷Yeˬhawˇyaˬciˬ-euˬ aˬ zawˇ Maˬtaˬniˇ-ahˇ Neˬbuˬkaˬneˬzaˬ neh sahˬ paˬ ka nehˬ yaꞈ-awˇ, Zeˬdaˬkiˇ lehˇ tsawˇ myahˇ myahˇ paˇ nehˬ-euˬ meh.

¹⁸Zeˬdaˬkiˇ Yuˇdaˆ sahˬ paˬ pyeuꞈ laˇ ngeh, nyiˬ tseˇ tiꞈ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ tiꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Liˇbaˬnahˬ meuˬ-ahˇ jawˇ-eu Yeˬlaˬmiˇ-euˬ aˬ buˇ Haˬmuˇtaˬlaˇ meh.

¹⁹Sahˬpaˬ Zeˬdaˬkiˇ-aˬ, sahˬ paˬ Yeˬhawˇyaˬciˬ loꞈ-ehˇ, Sahˬpaˬ Miˬyehˇ mehˬ shi iˬ baˇ mˇ-euˬ meh.

²⁰Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ hawˇ-eu, Yuˇdaˆ miˇ kʼahˬ zaˬ deuˬ-ahˇ Sahˬpaˬ Miˬyehˇ nui ma pehˇ dui dui laˇ taˬ-euˬ miˇ neh, aˬ yawꞈ maˬ mawˇ gaˇ bi iˇ byoˆ gʼeh-euˬ meh.