Read Akha 2 Sahˬpaˬ 4 Bible Online

2 Sahˬpaˬ 4 - Akha bible

2 Sahˬpaˬ 4

¹Miˬyehˇ gʼaˇ duˬ ngehˬ dah-eu aˇ muˇ tiˬ muˇ-ahˇ taꞈ-eu, Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ-euˬ miˬ coeˬ miˬ ma tiˬ gʼaˬ, Eˇliˇshehˇ jawˇ gaˇ le-awˇ ehˇ-eu, “Ngaˬ-euˬ kʼaˬ dzeˇ zaˬ shiˇ-euˬ meh. Nawˇ siˬ nya-eu loꞈ-ehˇ, aˬ yawꞈ Miˬyehˇ ehˇ dawˬ naˇ haˬ-euˬ tsawˇ haˬ tiˬ gʼaˬ meh. Ehˇ kʼawꞈ, ngaˬ-euˬ kʼaˬ dzeˇ zaˬ-ahˇ pyuˇ paˇ nehˬ taˬ-euˬ tsawˇ haˬ tiˬ gʼaˬ oe-awˇ, dziˇ dzoˆ kʼoeˇ aˇ poeˬ ngaˬ-euˬ aˬ li nyiˬ li-ahˇ sheuˬ kʼoꞈ gʼeh-awˇ, zaˬ kʼaˆ bi geuꞈ-eu lehˇ gʼeh-eu meh.”

²Eˇliˇshehˇ ehˇ-eu, “Ngaˇ nawˬ-ahˇ aˬ jeˬ ya caw ba nehˬ nmˇ. Nawˬ-euˬ nymˇ laꞈ kʼoeˇ aˬ jeˬ jaˆ te lehˇ ngaˬ-ahˇ ehˇ sheˇ.” Miˬ coeˬ miˬ ma kʼoeˇ gʼaˬ ehˇ-eu, “Saˬ loˬ tsiˇ dawˆ ahˇ taˬ-euˬ ciˬ cuˇ cuˇ zaˬ tiˬ siˬ maˬ ngeuˇ naˇ, nui jeˬ tiˬ jeˬ-iˬ maˬ jaˆ.”

³Aˬ yawꞈ-ahˇ Eˇliˇshehˇ heu loꞈ-ehˇ ehˇ nehˬ-euˬ meh. “Nawˬ-euˬ dawˬ peh jawˇ-eu deuˬ jawˇ gaˇ iˇ-awˇ, ciˬ cuˇ yawꞈ ngehꞈ kʼaˇ shaˇ ngaˬ nya-eu myaˆ ni shaˇ ngaˬ taˬ-awˬ.

⁴Kʼoeˇ naˇ, nawˇ hawˇ-eu nawˬ li deuˬ iˇ kahˇ uˇ leˇ-awˇ, laˇ gʼoˆ piˬ tehˬ-awˇ, ciˬ cuˇ kʼoeˇ deuˬ-ahˇ tsiˇ shehˆ ahˇ-awˬ. Ciˬ cuˇ aˬ yawꞈ siˬ yawꞈ tsiˇ shehˆ byah gʼaˬ-eu nehˬ-ehˇ tiˬ poˆ tehꞈ-ehˇ, yaw cehˆ cehˆ-ehˇ ciˬ taˬ-awˇ bi jaˆ-awˬ.”

⁵Kʼoeˇ naˇ, zaˬ miˬ zaˬ kʼoeˇ gʼaˬ aˬ yawꞈ-euˬ aˬ li deuˬ nehˬ-ehˇ iˇ kahˇ-ahˇ uˇ leˇ-awˇ, laˇ gʼoˆ piˬ tehˬ-awˇ, saˬ loˬ tsiˇ dahˬ-eu ciˬ cuˇ cuˇ zaˬ kʼoeˇ siˬ ciˬ-awˇ, aˬ yawꞈ-euˬ aˬ li neh hehˇ miˇ nehˬ-euˬ ciˬ cuˇ kʼoeˇ deuˬ-ahˇ tsiˇ shehˆ ahˇ-euˬ meh.

⁶Ciˬ cuˇ kʼoeˇ deuˬ dawˬ tawˆ luꞈ aˬ ha ma zaˬ neh tsiˇ shehˆ byah gʼaˬ jiˇ-awˇ, “Ciˬ cuˇ yawꞈ ngehꞈ jaˆ-a siˬ loˇ” lehˇ aˬ ma gʼaˬ naˇ haˬ ngeh, “Teu siˬ aˇ saˬ saˬ-eu siˬ meh” lehˇ, aˬ yawꞈ-euˬ aˬ li tiˬ li ehˇ-eu meh. Kʼoeˇ ngeh, saˬ loˬ tsiˇ yoeˇ doˆ-eu tsiˇ leˇ-euˬ meh.

⁷Miˬyehˇ gʼaˇ duˬ ngehˬ dah-eu Eˇliˇshehˇ jawˇ gaˇ aˬ yawꞈ le-awˇ, gaˇ kawˆ kʼoeˇ dzawˇ nehˬ-euˬ meh. Eˇliˇshehˇ ehˇ-eu, “Saˬ loˬ tsiˇ ahˬ-awˇ dziˇ dzoˆ tsoeˬ-awˬ. Dziˇ dzoˆ tsoeˬ jiˇ-eu uˬ taꞈ, nawˬ ha ma zaˬ dehꞈ daˆ leꞈ-eu gʼaˇ duˬ pyuˇ dzehˬ laˇ tehꞈ-a.”

⁸Tiˬ nah keuˆ laˇ ngeh, Shuˇneˬ meuˬ-ahˇ Eˇliˇshehˇ iˇ-euˬ meh. Kʼoeˇ gaˇ jawˇ-eu smˇ muiˬ muiˬ-eu zaˬ miˬ zaˬ tiˬ gʼaˬ aˬ yawꞈ-ahˇ dzaˬ byawˇ lawˇ nehˬ-euˬ meh. Kʼoeˇ ngeh poˆ neh naˇ, Shuˇneˬ meuˬ-ahˇ aˬ yawꞈ kʼaˇ iˇ ngeh, zaˬ miˬ zaˬ kʼoeˇ gʼaˬ-euˬ nymˇ-ahˇ dzaˬ-euˬ dawˇ-euˬ meh.

⁹Zaˬ miˬ zaˬ kʼoeˇ gʼaˬ aˬ yawꞈ-euˬ kʼaˬ dzeˇ zaˬ-ahˇ ehˇ nehˬ-eu, “Aˬ dui pehˬ-euˬ nymˇ-ahˇ tiˬ kʼehˬ maˬ taˬ ni laˇ-eu tsawˇ haˬ heu gʼaˬ, muiˬ-eu shawˇ-eu tsawˇ haˬ tiˬ gʼaˬ pyeuꞈ-eu ngaˇ lehˇ, ngaˇ siˬ duˬ ma.

¹⁰Aˬ yawꞈ kʼaˇ laˇ ngeh bi jawˇ naˬ-eu gʼaˇ duˬ, nymˇ mˬ kʼoeˇ taˆ aˇ lawˆ lawˆ zaˬ tiˬ lawˆ tsoˆ-awˇ, ja ciˬ tiˬ ciˬ, hawˬ jeh tiˬ jeh, nuiˇ mahˬ tiˬ mahˬ hawˇ-eu, tsiˇ kʼmˬ tiˬ kʼmˬ bi jaˆ kaˇ-euˇ.”

¹¹Tiˬ nah keuˆ laˇ ngeh, Shuˇneˬ meuˬ-ahˇ Eˇliˇshehˇ oe-awˇ, aˬ yawꞈ jawˇ-eu kuˆ lawˆ kʼoeˇ lawˆ-ahˇ daˆ leˇ-awˇ gʼaˬ naˬ naˬ-euˬ meh.

¹²Aˬ yawꞈ-euˬ zaˬ kʼaˆ Geˬhaˬziˇ-ahˇ, “Zaˬ miˬ zaˬ kʼoeˇ gʼaˬ kuˇ laˬ-iˇ-awˬ” lehˇ aˬ yawꞈ ehˇ nehˬ-euˬ meh. Zaˬ kʼaˆ kʼoeˇ gʼaˬ zaˬ miˬ zaˬ kʼoeˇ gʼaˬ kuˇ keuˆ laꞈ-awˇ, aˬ yawꞈ-euˬ mehˬ shi yawꞈ luꞈ-eu meh.

¹³Kʼoeˇ ngeh, Geˬhaˬziˇ-ahˇ aˬ yawꞈ ehˇ nehˬ-eu, “Zaˬ miˬ zaˬ teu gʼaˬ aˬ dui loˬ-eu jeˬ caw ba nehˬ laꞈ-euˬ aˇ poeˬ, aˬ yawꞈ-ahˇ ngaˇ aˬ jeˬ ya jahˇ kʼoꞈ nehˬ nmˇ lehˇ naˇ haˬ-iˬ sheˇ. Sahˬpaˬ-ahˇ maˬ ehˇ, guiˇ maꞈ kʼoeˇ taˆ uˆ lahˇ-eu gʼaˬ-ahˇ maˬ ehˇ, aˬ yawꞈ gʼaˇ duˬ ngaˬ-ahˇ tiˬ jeˬ paˬ bi ehˇ leˇ mawꞈ-eu jaˆ-eu maˬ siˬ.” Zaˬ miˬ zaˬ kʼoeˇ gʼaˬ ehˇ-eu, “Ngaˇ kʼaˇ loˬ-eu jeˬ dawˬ tawˆ luꞈ, ngaˬ nehˬ-ehˇ jawˇ-eu tsawˇ haˬ heu deuˬ jawˇ gaˇ jaˆ jiˇ ma.”

¹⁴Geˬhaˬziˇ-ahˇ Eˇliˇshehˇ paˇ naˇ haˬ-eu, “Toˆ-ehˇ ngeuˇ naˇ, aˬ yawꞈ gʼaˇ duˬ ngaˇ aˬ jeˬ ya mˇ nehˬ nmˇ.” Geˬhaˬziˇ ehˇ-eu, “Zaˬ miˬ zaˬ heu gʼaˬ aˬ li tiˬ li-iˬ maˬ jawˇ-ehˇ, aˬ yawꞈ-euˬ kʼaˬ dzeˇ zaˬ gʼaˬ kʼawꞈ tsawˇ mawˬ mawˬ laˇ-euˬ meh.”

¹⁵Eˇliˇshehˇ ehˇ-eu, “Aˬ yawꞈ-ahˇ heu gaˇ bi laˇ sheˇ.” Kʼoeˇ ngeh, zaˬ miˬ zaˬ kʼoeˇ gʼaˬ gʼoˆ kʼehˬ-ahˇ yawꞈ laˇ-euˬ meh.

¹⁶Eˇliˇshehˇ aˬ yawꞈ-ahˇ ehˇ nehˬ-eu, “Naꞈ yaꞈ kʼoꞈ heu yamˬ keuˆ laˇ ngeh, nawˬ-euˬ bawˇ kʼahˇ-ahˇ aˬ li tiˬ li ciˬ luꞈ tehꞈ-a.” Zaˬ miˬ zaˬ kʼoeˇ gʼaˬ ehˇ-eu, “Ngaˬ-ahˇ toˆ-ehˇ jaˬ myawꞈ taˬ myawꞈ nehˬ laꞈ. Nawˇ-aˬ, Miˬyehˇ-euˬ tsawˇ haˬ meh.”

¹⁷Ehˇ kʼawꞈ, Eˇliˇshehˇ neh kʼaˇ ehˇ-euˬ loꞈ-ehˇ, yawˬ kʼoꞈ yawˬ aˇ yamˬ kʼoeˇ yamˬ keuˆ laˇ ngeh, zaˬ miˬ zaˬ kʼoeˇ gʼaˬ aˬ li tiˬ li ciˬ-euˬ meh.

¹⁸Aˇ kʼoꞈ aˇ la ui cuiˆ myahˇ laˇ ngeh, aˬ li kʼoeˇ li-aˬ, cehˇ yehˬ cehˇ diˬ yamˬ-ahˇ, cehˇ yehˬ luꞈ-eu tsawˇ haˬ deuˬ nehˬ-ehˇ deh yaˇ-ahˇ jawˇ luꞈ-eu aˬ yawꞈ aˬ da jawˇ gaˇ iˇ-eu lehˇ, uˬ shawˬ paw doˆ-iˇ-euˬ meh.

¹⁹Ja pyuˬ ni, “Ngaˬ-ahˇ uˬ duˬ naˇ nya. Ngaˬ-ahˇ uˬ duˬ naˇ nya” lehˇ, aˬ li kʼoeˇ li aˬ yawꞈ-euˬ aˬ da-ahˇ guˇ-eu meh. “Aˬ li-ahˇ aˬ yawꞈ aˬ ma jawˇ gaˇ euˬ kʼoꞈ gʼeh nehˬ-awˬ” lehˇ, aˬ da gʼaˬ aˬ yawꞈ-euˬ zaˬ kʼaˆ tiˬ gʼaˬ-ahˇ ehˇ nehˬ-euˬ meh.

²⁰Zaˬ kʼaˆ kʼoeˇ gʼaˬ aˬ li kʼoeˇ li-ahˇ, aˬ yawꞈ-euˬ aˬ ma jawˇ gaˇ euˬ kʼoꞈ ha nehˬ leˇ-euˬ meh. Aˬ ma gʼaˬ nah gʼahˇ paw keuˆ ni aˬ yawꞈ-euˬ aˬ li-ahˇ ciˬ ciˬ-ehˇ jawˇ-awˇ bi shiˇ tsehˆ-euˬ meh.

²¹Kʼoeˇ ngeh, aˬ yawꞈ-euˬ aˬ li-ahˇ Eˇliˇshehˇ jawˇ-eu kuˆ lawˆ-ahˇ ciˬ taˬ leꞈ-awˇ, ja ciˬ kʼoeˇ taˆ ciꞈ daˆ yaꞈ-awˇ, laˇ gʼoˆ piˬ tehˬ yaꞈ-euˬ meh.

²²Kʼoeˇ naˇ, aˬ yawꞈ-euˬ kʼaˬ dzeˇ zaˬ-ahˇ aˬ yawꞈ kuˇ-awˇ ehˇ-eu, “Zaˬ kʼaˆ tiˬ gʼaˬ-ahˇ mahˬ tahˬ laˆ tiˬ mawˇ tsahˇ-awˇ heu gaˇ bi laˇ sheˇ. Miˬyehˇ gʼaˇ duˬ ngehˬ dah-eu Eˇliˇshehˇ jawˇ gaˇ le-eu tehˬ dui dui nya. Ngaˇ yaw kawˇ-ehˇ paˇ gʼoꞈ keuˆ le ma.”

²³Kʼaˬ dzeˇ zaˬ gʼaˬ ehˇ-eu, “Jawˇ nah kʼawꞈ maˬ ngeuˇ, La shuiꞈ lah-eu Bawˬ-iˬ gʼeh yamˬ kʼawꞈ maˬ ngeuˇ gaˇ, aˬ jeˬ miˇ neh nawˇ iˬ nah ya le ta.” Miˬ zaˬ gʼaˬ ehˇ-eu, “Tiˬ jeˬ-iˬ maˬ ngeuˇ-aˇ.”

²⁴Kʼoeˇ naˇ, miˬ zaˬ gʼaˬ mahˬ tahˬ laˆ dziˬ gʼa laˆ dawˆ-awˇ, “Gʼeu naˬ-awˬ lehˇ ngaˇ maˬ ehˇ kʼoeˇ keuˆ ni teh kawˇ dui dui-awˬ” lehˇ, aˬ yawꞈ-euˬ zaˬ kʼaˆ-ahˇ ehˇ nehˬ-euˬ meh.

²⁵Kʼoeˇ naˇ, Eˇliˇshehˇ jawˇ-eu Gaˬlaˬmeˬlaˇ gawˬ jawˬ-ahˇ aˬ yawꞈ le gʼeh leꞈ-euˬ meh. Zaˬ miˬ zaˬ kʼoeˇ gʼaˬ ui cuiˆ gaˇ mahˇ kaˬ gaˇ laˇ luꞈ ngeh neh Eˇliˇshehˇ mawˇ-awˇ, aˬ yawꞈ-euˬ zaˬ kʼaˆ Geˬhaˬziˇ-ahˇ ehˇ nehˬ-eu, “Haw sheˇ, Shuˇneˬ meuˬ-ahˇ jawˇ-eu zaˬ miˬ zaˬ kʼoeˇ gʼaˬ laˇ luꞈ ngaˇ.

²⁶Aˬ yawꞈ jawˇ gaˇ yaw kawˇ-ehˇ iˇ-awˇ, aˬ nyaꞈ dzeˇ zaˬ hawˇ-eu aˬ li jawˇ saˇ doˆ meh loˇ lehˇ naˇ haˬ-iˬ sheˇ.” Yawˬ gʼaˬ na luꞈ jawˇ saˇ doˆ meh lehˇ, Geˬhaˬziˇ-ahˇ zaˬ miˬ zaˬ kʼoeˇ gʼaˬ ehˇ nehˬ-euˬ meh.

²⁷Ehˇ kʼawꞈ, Eˇliˇshehˇ jawˇ gaˇ aˬ yawꞈ laˇ keuˆ ngeh, Eˇliˇshehˇ-euˬ aˬ kuiˇ-ahˇ aˬ yawꞈ byaˇ cuꞈ taˬ-euˬ meh. Kʼoeˇ ngeh, zaˬ miˬ zaˬ kʼoeˇ gʼaˬ-ahˇ Geˬhaˬziˇ gʼeu dzeh-eu lehˇ gʼeh-eu meh. Ehˇ kʼawꞈ, Eˇliˇshehˇ ehˇ-eu, “Aˬ yawꞈ-ahˇ taˬ gʼeu dzeh. Aˬ yawꞈ nui ma cawˆ dui dui luꞈ-eu nawˇ maˬ mawˇ te loˇ. Gaˇ kawˆ heu gaˇ taꞈ leˇ-awˇ, Sahˬpaˬ Miˬyehˇ ngaˬ-ahˇ tiˬ jeˬ-iˬ maˬ ehˇ nehˬ laꞈ-aˬ siˬ.”

²⁸Zaˬ miˬ zaˬ kʼoeˇ gʼaˬ Eˇliˇshehˇ-ahˇ ehˇ-eu, “Aˬ li tiˬ li bi jawˇ le nehˬ laꞈ lehˇ, nawˬ-ahˇ ngaˇ shaˇ-euˬ maˬ ngeuˇ. Ngaˬ-ahˇ tiˬ jeˬ-iˬ taˬ bi noeˬ tmˬ laꞈ lehˇ, nawˬ-ahˇ ngaˇ ehˇ-euˬ ma.”

²⁹Geˬhaˬziˇ-ahˇ Eˇliˇshehˇ ehˇ nehˬ-eu, “Yaw kawˇ-ehˇ lehˬ hmˬ-awˇ, ngaˬ-euˬ gawˬ yoeˬ yuˇ-awˇ iˇ-awˬ. Kʼaˇ tahˬ puˬ le-eu tsawˇ haˬ tiˬ gʼaˬ-ahˇ-iˬ dawˬ maˬ ngehˬ cawˬ ni iˇ-awˬ. Aˬ cawˬ nawˬ-ahˇ dawˬ ngehˬ cawˬ laˇ kʼawꞈ, nawˇ dawˬ maˬ ngehˬ cawˬ ni nymˇ kʼoeˇ nymˇ-ahˇ dawˇ coe ni iˇ-awˇ, ngaˬ-euˬ gawˬ yoeˬ heu aˬ li kʼoeˇ li kʼoeˇ taˆ cawˬ ja-awˬ.”

³⁰Zaˬ miˬ zaˬ kʼoeˇ gʼaˬ Eˇliˇshehˇ-ahˇ ehˇ nehˬ-eu, “Sahˬpaˬ Miˬyehˇ hawˇ-eu nawˇ yaw dehꞈ kʼaˇ dehꞈ kʼoeˇ keuˆ ni, nawˬ-ahˇ ngaˇ maˬ gʼawˬ-iˇ lehˇ ngaˇ kamˬ tsehˆ-eu ma.” Kʼoeˇ naˇ, Geˬhaˬziˇ aˬ yawꞈ nyaꞈ tiˬ kawˆ loꞈ-ehˇ gʼoꞈ-iˇ-euˬ meh.

³¹Geˬhaˬziˇ gʼaˬ jeˬ huˬ iˇ huˬ-awˇ, aˬ li kʼoeˇ li kʼoeˇ taˆ gawˬ yoeˬ cawˬ ja-euˬ meh. Ehˇ kʼawꞈ, teˇ saˇ tiˬ jeˬ-iˬ maˬ gaˬ laˇ-ehˇ, aˬ li kʼoeˇ li maˬ dehꞈ laˇ-a. Kʼoeˇ naˇ, Eˇliˇshehˇ jawˇ gaˇ aˬ yawꞈ paˇ gʼoꞈ leˇ-awˇ, “Aˬ li kʼoeˇ li maˬ noeˬ laˇ nga” lehˇ ehˇ nehˬ-euˬ meh.

³²Eˇliˇshehˇ oe keuˆ-awˇ, aˬ yawꞈ tiˬ gʼaˬ tehꞈ-ehˇ kuˆ lawˆ kʼoeˇ lawˆ-ahˇ uˇ leˇ haw ngeh, ja ciˬ kʼoeˇ taˆ aˬ li kʼoeˇ li yaw shiˇ-ehˇ ga gaˇ ya mawˇ-euˬ meh.

³³Kʼoeˇ ngeh, aˬ yawꞈ laˇ gʼoˆ piˬ tehˬ-awˇ, Sahˬpaˬ Miˬyehˇ-ahˇ guiˬ lahˬ shaˇ-euˬ meh.

³⁴Kʼoeˇ naˇ, aˬ li kʼoeˇ li kʼoeˇ taˆ aˬ yawꞈ yuꞈ ja-awˇ, aˬ yawꞈ-euˬ kʼaˬ meh, myaˆ nuiˆ hawˇ-eu aˬ laꞈ, aˬ li kʼoeˇ li-euˬ kʼaˬ meh, myaˆ nuiˆ hawˇ-eu aˬ laꞈ kʼoeˇ taˆ bi jaˆ-euˬ meh. Aˬ li kʼoeˇ li kʼoeˇ taˆ aˬ yawꞈ yuꞈ ja taˬ ngeh, aˬ li kʼoeˇ li-euˬ gʼawˇ mawˇ lmˇ laˇ-euˬ meh.

³⁵Eˇliˇshehˇ tuˇ laˇ-awˇ, kuˆ lawˆ kʼoeˇ lawˆ-euˬ jawˬ jawˬ-ehˇ tiˬ kʼehˬ cah-awˇ, aˬ li kʼoeˇ li kʼoeˇ taˆ tiˬ kʼehˬ paˇ yuꞈ ja-euˬ ma. Kʼoeˇ ngeh poˆ jawˇ, aˬ li kʼoeˇ li haˇ ceuˬ shiꞈ poˆ ceuˬ doˆ laˇ-awˇ, myaˆ nuiˆ bye laˇ-euˬ meh.

³⁶Geˬhaˬziˇ-ahˇ Eˇliˇshehˇ kuˇ-awˇ, “Aˬ li heu li-euˬ aˬ ma-ahˇ heu gaˇ kuˇ laꞈ sheˇ” lehˇ ehˇ nehˬ-euˬ meh. Zaˬ miˬ zaˬ kʼoeˇ gʼaˬ uˇ laˇ ngeh, “Nawˬ li-ahˇ ciˬ-awˬ” lehˇ ehˇ nehˬ-euˬ meh.

³⁷Zaˬ miˬ zaˬ kʼoeˇ gʼaˬ Eˇliˇshehˇ-euˬ mehˬ shi baˬ ba miˇ tsa tuˆ ni awˆ byaˆ-euˬ meh. Kʼoeˇ naˇ, aˬ li ciˬ-awˇ doˆ-iˇ-euˬ meh.

³⁸Miˇ kʼahˬ kʼoeˇ kʼahˬ laꞈ kʼoeˇ mehꞈ-eu shuꞈ-eu jeˬ keuˆ le ngeh, Giˇlaˇgaˬlaˇ meuˬ-ahˇ Eˇliˇshehˇ gʼoꞈ leˇ-euˬ meh. Miˬyehˇ gʼaˇ duˬ ngehˬ dah-eu aˇ muˇ tiˬ muˇ-ahˇ aˬ yawꞈ mehˬ nehˬ tsoˆ nehˬ luꞈ ngeh, “Aˬ yawꞈ maꞈ bi dzaˬ-eu dzaˇ jahˇ-eu gʼaˇ duˬ, oeˬ lahˬ lahˬ ma ciˬ dahˇ-awˬ” lehˇ aˬ yawꞈ-euˬ zaˬ kʼaˆ-ahˇ aˬ yawꞈ ehˇ nehˬ-euˬ meh.

³⁹Aˬ yawꞈ maꞈ laꞈ kʼoeˇ tiˬ gʼaˬ, bawˇ tsahˬ-ahˇ gʼawˬ nyoeˇ shaˇ-iˇ-awˇ, bawˇ tsahˬ iˇ puˬ ciˇ ni mawˇ-awˇ, iˇ puˬ aˇ siˬ kʼaˇ pi coeˇ-eu pi kʼoꞈ laꞈ-euˬ meh. Iˇ puˬ kʼoeˇ aˬ geu jeˬ iˇ puˬ pyeuꞈ-eu aˬ yawꞈ maˬ siˬ nya-ehˇ, dzaˇ jahˇ gaˇ dawˆ ahˇ-awˇ jahˇ keuˬ taˬ-euˬ meh.

⁴⁰Ehˇ kʼawꞈ, dzaˇ kʼoeˇ aˬ yawꞈ maꞈ myeuꞈ haw ngeh, “Doꞈ ahˇ nya” lehˇ Eˇliˇshehˇ-ahˇ ehˇ nehˬ-awˇ, maˬ dzaˬ ni jawˇ-eu meh.

⁴¹Kʼoeˇ ngeh, “Cehˇ meu ui cuiˆ yuˇ laꞈ-awˬ” lehˇ Eˇliˇshehˇ ehˇ-awˇ, cehˇ meu dawˆ-euˬ meh. Kʼoeˇ naˇ, “Dzaˇ kuˬ doˆ lahˬ-awˇ aˬ yawꞈ maꞈ-ahˇ bi dzaˬ-awˬ” lehˇ Eˇliˇshehˇ ehˇ-eu meh. Dzaˇ kʼoeˇ doꞈ maˬ ahˇ-ehˇ pyeuꞈ-iˇ-euˬ meh.

⁴²Yawˬ poˆ yawˬ-aˬ, tsawˇ haˬ tiˬ gʼaˬ Baˬlaˇshaˬliˇshahˬ meuˬ-ahˇ neh Eˇliˇshehˇ jawˇ gaˇ laˇ-awˇ, yehˬ beh beh-euˬ cehˇ neh jahˇ-euˬ kaˬ muˇ nyiˬ tseˇ siˬ hawˇ-eu, keuˆ beh beh le-euˬ cehˇ ui cuiˆ yuˇ laꞈ nehˬ-euˬ meh. “Dzaˇ kʼoeˇ deuˬ yuˇ-awˇ, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ-ahˇ bi dzaˬ-awˬ” lehˇ, aˬ yawꞈ-euˬ zaˬ kʼaˆ-ahˇ Eˇliˇshehˇ ehˇ nehˬ-euˬ meh.

⁴³Ehˇ kʼawꞈ, “Dzaˇ heu tsawˇ haˬ tiˬ yaˇ gʼaˬ dzaˬ loꞈ tehꞈ-a lehˇ nawˇ noeˬ te loˇ” lehˇ, zaˬ kʼaˆ kʼoeˇ gʼaˬ ehˇ-eu meh. Eˇliˇshehˇ ehˇ-eu, “Aˬ yawꞈ maꞈ-ahˇ dzaˇ kʼoeˇ bi dzaˬ-awˬ. Aˬ jeˬ miˇ neh ehˇ naˇ, aˬ yawꞈ maꞈ dzaˬ dehˆ-eu uˬ taꞈ, dzehˬ laˇ tehꞈ-a lehˇ Sahˬpaˬ Miˬyehˇ ehˇ-eu meh.”

⁴⁴Kʼoeˇ naˇ, zaˬ kʼaˆ kʼoeˇ gʼaˬ tsawˇ haˬ kʼoeˇ deuˬ-ahˇ dzaˇ kʼoeˇ bi dzaˬ ngeh, Sahˬpaˬ Miˬyehˇ ehˇ-eu loꞈ-ehˇ, aˬ yawꞈ maꞈ dzaˬ dehˆ dawˇ dehˆ-euˬ uˬ taꞈ, dzehˬ laˇ-euˬ meh.