Read Akha 2 Sahˬpaˬ 7 Bible Online

2 Sahˬpaˬ 7 - Akha bible

2 Sahˬpaˬ 7

¹Eˇliˇshehˇ ehˇ-eu, “Sahˬpaˬ Miˬyehˇ-euˬ dawˬ-ahˇ naˇ haˬ sheˇ. Ni shawˬ nah heu yamˬ-ahˇ, Saˬmaˬliˆ meuˬ laꞈ kʼoeˇ muiˬ dui dui-eu cehˇ pyuˇ smˇ pehˬ-euˬ pyuˇ maˇ byaˆ tiˬ byaˆ-ahˇ keuˆ ni ga le-awˇ, lawˬ loeˇ koꞈ pehˬ-euˬ tiˬ byaˆ-ahˇ keuˆ ni ga le tehꞈ-a.”

²Sahˬ paˬ-ahˇ loꞈ piˇ-eu gʼaˬ ehˇ-eu, “Kʼoeˇ loꞈ-ehˇ maˬ pyeuꞈ laˇ nya-aˇ. Sahˬpaˬ Miˬyehˇ neh cehˇ pyuˇ bi sha ha le law hawˇ kʼawꞈ, cehˇ pyuˇ aˇ poeˬ kʼoeˇ naˆ naˆ-ehˇ maˬ ga yaˇ le nya-aˇ.” Eˇliˇshehˇ ehˇ-eu, “Kʼoeˇ loꞈ-ehˇ ga yaˇ le-euˬ gaˇ nawˇ ya mawˇ tehꞈ-a. Ehˇ kʼawꞈ, nawˇ maˬ ya dzaˬ-aˇ.”

³Nyawˬ naˇ-eu tsawˇ haˬ oeˬ gʼaˬ, Saˬmaˬliˆ meuˬ-euˬ lahˇ kʼehˬ laꞈ nyiˇ paw jawˇ luꞈ-eu meh. Aˬ yawꞈ maꞈ tiˬ gʼaˬ tiˇ gʼaˬ ehˇ-eu, “Aˬ dui ya mehꞈ sehꞈ jiˇ ngeh keuˆ ni, aˬ jeˬ miˇ neh heu gaˇ dzuˇ dzuˇ-ehˇ jawˇ nmˇ.

⁴Meuˬ laꞈ kʼoeˇ uˇ leˇ naˇ kʼawꞈ, ya mehꞈ sehꞈ gaˇ keuˆ tehꞈ-a. Heu gaˇ dzuˇ dzuˇ-ehˇ paˇ jawˇ naˇ kʼawꞈ, shiˇ gaˇ keuˆ-eu ngaˇ. Teu miˇ neh Suˇliˆ tsawˇ haˬ-euˬ taˆ-ahˇ le kaˇ-euˇ. Aˬ yawꞈ-maꞈ aˬ dui-ahˇ sehꞈ laˇ naˇ kʼawꞈ, ehˬ-ehˇ sehꞈ luꞈ-uˇ. Nymˬ-mˇ aˬ dui maꞈ -ahˇ maˬ sehꞈ ni taˬ nehˬ laꞈ-eu maˬ siˬ.”

⁵Kʼoeˇ naˇ, uˬ ciꞈ zahˇ le jawˬ-ehˇ Suˇliˆ tsawˇ haˬ-euˬ taˆ-ahˇ aˬ yawꞈ maꞈ le-euˬ meh. Kʼoeˇ gaˇ le keuˆ ngeh, tsawˇ haˬ tiˬ gʼaˬ-iˬ maˬ jawˇ gaˇ ya mawˇ-euˬ meh.

⁶Mahˬ hawˇ-eu mahˬ laˆ lawˬ deuˬ ahˇ-eu guiˇ maꞈ maꞈ ma tiˬ maꞈ laˇ luꞈ-eu teˇ saˇ Suˇliˆ tsawˇ haˬ deuˬ-ahˇ Sahˬpaˬ Miˬyehˇ bi gaˬ leˇ-euˬ meh. Kʼoeˇ ngeh, Heˬtaˆ sahˬ paˬ hawˇ-eu Iˇjiˇtuˆ sahˬ paˬ-ahˇ Iˇsaˬleˬlaˆ tsawˇ haˬ deuˬ neh kuˇ laˬ-iˇ-awˇ, aˬ yawꞈ maꞈ-ahˇ guiˇ bi deuˆ laˇ-euˬ nga lehˇ, Suˇliˆ tsawˇ haˬ deuˬ noeˬ-euˬ meh.

⁷Kʼoeˇ miˇ neh, kʼoeˇ ngeh miˇ neh aˬ yawꞈ maꞈ-euˬ sehˬ gʼawˆ maˬ ehˇ, mahˬ maˬ ehˇ, mahˬ tahˬ laˆ maˬ ehˇ, byehˇ dzeh yaꞈ jiˇ-awˇ, aˬ yawꞈ maꞈ-euˬ taˆ-ahˇ kʼoeˇ loꞈ-ehˇ bi jaˆ yaꞈ-awˇ cehˆ jiˆ-euˬ meh.

⁸Nyawˬ naˇ-eu tsawˇ haˬ kʼoeˇ oeˬ gʼaˬ taˆ kʼoeˇ taˆ-euˬ gaˇ dzeˇ le keuˆ ngeh, sehˬ gʼawˆ tiˬ gʼawˆ laꞈ kʼoeˇ uˇ-iˇ-awˇ, kʼoeˇ gaˇ kʼaˇ jaˆ-eu jeˬ dzaˬ-awˇ dawˇ-awˇ, kʼaˇ jaˆ-eu pyuˇ shuiˇ hawˇ-eu dm gʼaˬ dm lmˇ deuˬ jehˆ uiˬ-awˇ, baꞈ zaꞈ-iˇ-euˬ meh. Kʼoeˇ naˇ, aˬ yawꞈ maꞈ paˇ gʼoꞈ laˇ-awˇ, sehˬ gʼawˆ yawˬ gʼawˆ yawꞈ-ahˇ paˇ uˇ-iˇ-awˇ, yaw beh poˆ loꞈ-ehˇ pyuˇ shuiˇ hawˇ-eu dm gʼaˬ dm lmˇ deuˬ paˇ baꞈ zaꞈ-iˇ-euˬ meh.

⁹Kʼoeˇ naˇ, aˬ yawꞈ maꞈ tiˬ gʼaˬ tiˇ gʼaˬ ehˇ-eu, “Aˬ dui heu loꞈ-ehˇ jahˇ jahˇ-ehˇ jawˇ paˬ maˬ ngeuˇ nga. Iˬ nah-aˬ, laˬ kʼaˬ cehˇ dui dui paˬ-ehˇ gʼeh-eu aˇ nah pyeuꞈ-eu miˇ neh, gaˇ kawˆ heu maˬ ja gaˬ-iˇ-ehˇ jawˇ paˬ maˬ ngeuˇ nga. Gaˇ kawˆ heu maˬ tsaꞈ gaˬ leˇ-ehˇ uˬ shawˬ paw keuˆ ni dawˬ keuˆ naˇ, kʼehˬ nehˬ kʼaˆ nehˬ laꞈ gaˇ ya daˬ tehꞈ-a. Aˬ dui maꞈ nymˬ-mˇ mi naˆ-ehˇ le-awˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ-ahˇ tsaꞈ gaˬ leˇ kaˇ-euˇ.”

¹⁰Kʼoeˇ naˇ, Suˇliˆ tsawˇ haˬ-euˬ taˆ-ahˇ neh Saˬmaˬliˆ meuˬ-ahˇ aˬ yawꞈ maꞈ gʼoꞈ leˇ-awˇ, meuˬ lahˇ kʼehˬ-ahˇ loꞈ luꞈ-eu yehˇ deuˬ-ahˇ kuˇ-awˇ, heu loꞈ-ehˇ ehˇ nehˬ-euˬ meh. “Suˇliˆ tsawˇ haˬ-euˬ taˆ-ahˇ nga maꞈ le ngeh, tsawˇ haˬ tiˬ gʼaˬ-iˬ maˬ jawˇ ni ciˬ cuˇ ni jaˆ-eu meh. Mahˬ hawˇ-eu mahˬ tahˬ laˆ deuˬ kʼawꞈ maˬ pyehˬ ni paꞈ tawꞈ taˬ-awˇ, sehˬ gʼawˆ deuˬ kʼawꞈ, Suˇliˆ tsawˇ haˬ neh kʼaˇ bi jaˆ yaꞈ-euˬ loꞈ-ehˇ jaˆ luꞈ meh.”

¹¹Meuˬ lahˇ kʼehˬ-ahˇ loꞈ-eu yehˇ kʼoeˇ deuˬ gaˇ kawˆ kʼoeˇ ja gaˬ-awˇ, sahˬ paˬ-euˬ nymˇ-ahˇ gaˬ keuˆ leˇ-euˬ meh.

¹²Kʼoeˇ ngeh miˇ sahˬ paˬ yuꞈ luꞈ-eu tuˇ laˇ-awˇ, aˬ yawꞈ-euˬ yaw huiˬ yaw mahˇ deuˬ-ahˇ ehˇ nehˬ-eu, “Suˇliˆ tsawˇ haˬ deuˬ tsawˇ gahˇ gahˇ-eu gaˇ kawˆ ngaˇ naw maꞈ-ahˇ ehˇ nehˬ nyaˇ. Aˬ dui maꞈ mehꞈ-eu shuꞈ-eu jeˬ-ahˇ ya daˬ luꞈ-eu aˬ yawꞈ maꞈ siˬ nya meh. Kʼoeˇ miˇ neh, aˬ yawꞈ maꞈ taˆ laꞈ kʼoeˇ neh doˆ-iˇ-awˇ, bawˇ tsahˬ-ahˇ dzuˇ zaꞈ luꞈ tehꞈ-a. Aˬ dui maꞈ meuˬ laꞈ nyiˇ doˆ-iˇ-awˇ, dzaˬ dzaˬ dawˇ dawˇ poˆ dzaˬ le tehꞈ-a lehˇ aˬ yawꞈ maꞈ noeˬ-awˇ, aˬ dui maꞈ-ahˇ yaw dehꞈ-ehˇ nyehꞈ-awˇ meuˬ-ahˇ uˇ laˇ-eu lehˇ lehˬ hmˬ luꞈ-eu tehꞈ-a.”

¹³Aˬ yawꞈ-euˬ yaw huiˬ yaw mahˇ tiˬ gʼaˬ ehˇ-eu, “Nymˬ-mˇ meuˬ laꞈ kʼoeˇ jawˇ luꞈ-eu tsawˇ haˬ deuˬ kʼawꞈ, shiˇ dzeuˇ jiˇ-euˬ deuˬ loꞈ-ehˇ paˇ ya shiˇ-eu keuˆ laˇ-eu ngaˇ. Dzeˇ luꞈ-eu mahˬ ngaˬ mawˇ-ahˇ tsawˇ haˬ heu myaˆ gʼaˬ bi dziˬ-awˇ, gaˇ kawˆ bi pyehˆ tseˇ duˬ haw-iˇ kaˇ-euˇ.”

¹⁴Kʼoeˇ naˇ, aˬ yawꞈ maꞈ tsawˇ haˬ tseˇ doˆ-awˇ, mahˬ laˆ lawˬ nyiˬ laˇ kʼoeˇ taˆ bi dziˬ-euˬ meh. “Suˇliˆ tsawˇ haˬ-euˬ taˆ-ahˇ aˬ jeˬ gʼeh-euˬ nga lehˇ pyehˆ tseˇ duˬ-iˇ-awˬ” lehˇ, sahˬ paˬ neh aˬ yawꞈ maꞈ-ahˇ ehˇ nehˬ-awˇ bi iˇ-euˬ meh.

¹⁵Yawˇdaˬ lawˇ baˬ-ahˇ keuˆ ni aˬ yawꞈ maꞈ iˇ haw ngeh, gaˇ pehˇ kahˇ li-ehˇ Suˇliˆ tsawˇ haˬ deuˬ cehˆ gʼoꞈ ngeh byehˇ dzeh yaꞈ-euˬ mehˬ tsoeˬ deuˬ ga gaˇ ya mawˇ-euˬ meh. Kʼoeˇ naˇ, aˬ yawꞈ maꞈ gʼoꞈ laˇ-awˇ, gaˇ kawˆ kʼoeˇ sahˬ paˬ-ahˇ dzawˇ nehˬ-euˬ meh.

¹⁶Kʼoeˇ naˇ, Saˬmaˬliˆ meuˬ-ahˇ jawˇ-eu tsawˇ haˬ deuˬ coeˬ doˆ gʼeh-awˇ, Suˇliˆ tsawˇ haˬ deuˬ-euˬ taˆ-ahˇ myawˬ poˆ geuꞈ leˇ-euˬ meh. Kʼoeˇ ngeh, Sahˬpaˬ Miˬyehˇ neh ehˇ taˬ-euˬ loꞈ-ehˇ, muiˬ dui dui-eu cehˇ pyuˇ smˇ pehˬ-euˬ pyuˇ maˇ byaˆ tiˬ byaˆ-ahˇ keuˆ ni ga le-awˇ, lawˬ loeˇ koꞈ pehˬ-euˬ pyuˇ maˇ byaˆ tiˬ byaˆ-ahˇ keuˆ ni ga le-euˬ meh.

¹⁷Sahˬ paˬ-ahˇ loꞈ piˇ-eu yaw huiˬ yaw mahˇ kʼoeˇ gʼaˬ-ahˇ sahˬ paˬ neh meuˬ lahˇ kʼehˬ-ahˇ bi haw bi pyaˆ-euˬ meh. Eˇliˇshehˇ jawˇ gaˇ sahˬ paˬ iˇ ngeh, Eˇliˇshehˇ neh kʼaˇ ehˇ taˬ-euˬ loꞈ-ehˇ, yaw huiˬ yaw mahˇ kʼoeˇ gʼaˬ tsawˇ haˬ aˇ maꞈ neh bi nawˬ tehˬ sehꞈ-euˬ meh.

¹⁸“Ni shawˬ nah heu yamˬ-ahˇ, muiˬ dui dui-eu cehˇ pyuˇ smˇ pehˬ-euˬ pyuˇ maˇ byaˆ tiˬ byaˆ-ahˇ keuˆ ni ga le-awˇ, lawˬ loeˇ koꞈ pehˬ-euˬ pyuˇ maˇ byaˆ tiˬ byaˆ-ahˇ keuˆ ni ga le tehꞈ-a” lehˇ, sahˬ paˬ-ahˇ Eˇliˇshehˇ ehˇ nehˬ taˬ-euˬ jaˆ-eu meh.

¹⁹Eˇliˇshehˇ kʼoeˇ loꞈ-ehˇ ehˇ ngeh, “Kʼoeˇ loꞈ-ehˇ maˬ pyeuꞈ laˇ nya-aˇ, Sahˬpaˬ Miˬyehˇ neh cehˇ pyuˇ bi sha ha le law hawˇ kʼawꞈ, cehˇ pyuˇ aˇ poeˬ kʼoeˇ naˆ naˆ-ehˇ maˬ ga yaˇ le nya-aˇ” lehˇ, yaw huiˬ yaw mahˇ kʼoeˇ gʼaˬ ehˇ-euˬ meh. Kʼoeˇ ngeh, “Kʼoeˇ loꞈ-ehˇ ga yaˇ le-euˬ gaˇ nawˇ ya mawˇ tehꞈ-a. Ehˇ kʼawꞈ, nawˇ maˬ ya dzaˬ-aˇ” lehˇ, Aˬ yawꞈ-ahˇ Eˇliˇshehˇ ehˇ kʼoꞈ nehˬ-euˬ meh.

²⁰Eˇliˇshehˇ neh ehˇ taˬ-euˬ loꞈ-ehˇ aˬ yawꞈ kʼoeˇ taˆ keuˆ le-awˇ, meuˬ lahˇ kʼehˬ-ahˇ aˬ cawˬ neh bi nawˬ tehˬ sehꞈ-euˬ meh.