Read Akha 1 Laˬsaˬbaˬ 10 Bible Online

1 Laˬsaˬbaˬ 10 - Akha bible

1 Laˬsaˬbaˬ 10

¹Piˇliˇtiˆ tsawˇ haˬ deuˬ hawˇ-eu Iˇsaˬleˬlaˆ tsawˇ haˬ deuˬ, Giˇlaˬbaoˬ gawˬ jawˬ kʼoeˇ taˆ guiˇ deuˆ-euˬ meh. Iˇsaˬleˬlaˆ tsawˇ haˬ gʼawˬ mya ni kʼoeˇ gaˇ bi sehꞈ-awˇ, maˬ bi sehꞈ-ehˇ dzeuˇ-iˇ-euˬ deuˬ-aˬ, Sawˇluˆ hawˇ-eu aˬ yawꞈ-euˬ aˬ li deuˬ nehˬ-ehˇ tiˬ kawˆ loꞈ-ehˇ cehˆ-euˬ meh.

²Ehˇ kʼawꞈ, Piˇliˇtiˆ tsawˇ haˬ deuˬ aˬ yawꞈ maꞈ-ahˇ teh miˇ-awˇ, Sawˇluˆ-euˬ aˬ li deuˬ pyeuꞈ-eu Yawˇnaˆshaˬ, Aˬbiˇnaˬdehˇ, Maˬlaˬkiˇshuˬ aˬ ha smˬ mehˇ nmˇ-ahˇ sehꞈ-euˬ meh.

³Sawˇluˆ-ahˇ yaw kʼaˆ-ehˇ ga jawˬ-awˇ deuˆ-eu miˇ neh, aˬ yawꞈ-ahˇ kaˆ myaˬ zaw leˇ-awˇ, shiˇ taw tehˬ ni bi deuˆ naˇ-euˬ meh.

⁴Kʼoeˇ ngeh, aˬ yawꞈ-euˬ guiˇ deuˆ-eu keu ka baꞈ luꞈ-eu zaˬ guˬ-ahˇ, “Miˬyehˇ maˬ baw-eu Piˇliˇtiˆ tsawˇ haˬ heu deuˬ neh ngaˬ-ahˇ kʼaˇ gʼeh mawꞈ-eu gʼeh-awˇ maˬ bi sehꞈ mawꞈ nya. Nawˬ-euˬ mi cehˇ gʼeu doˆ-awˇ ngaˬ-ahˇ sehꞈ-awˬ” lehˇ ehˇ nehˬ-euˬ meh. Ehˇ kʼawꞈ, zaˬ guˬ kʼoeˇ gʼaˬ aˬ yawꞈ-ahˇ maˬ sehꞈ peuˬ-a. Kʼoeˇ miˇ neh, Sawˇluˆ-aˬ, yawˬ haˇ yawˬ ha mi cehˇ gʼawˇ daˬ-awˇ, coˬ daˆ sehꞈ-euˬ meh.

⁵Sawˇluˆ shiˇ-euˬ gaˇ zaˬ guˬ kʼoeˇ gʼaˬ ya mawˇ ngeh, aˬ yawꞈ kʼawꞈ yawˬ ha-euˬ mi cehˇ kʼoeˇ taˆ coˬ daˆ-awˇ, Sawˇluˆ nehˬ-ehˇ shiˇ caw-euˬ meh.

⁶Sawˇluˆ hawˇ-eu aˬ yawꞈ-euˬ aˬ li smˬ li luꞈ kʼoeˇ loꞈ-ehˇ shiˇ jiˇ-awˇ, aˬ yawꞈ-euˬ zaˬ deuˬ uˆ deuˬ laꞈ kʼoeˇ, sahˬ paˬ geuꞈ-awˇ uˆ lahˇ-eu tiˬ gʼaˬ-iˬ maˬ jawˇ-ehˇ pyeuꞈ-iˇ-euˬ meh.

⁷Iˇsaˬleˬlaˆ guiˇ maꞈ cehˆ byaˆ jiˇ-awˇ, Sawˇluˆ hawˇ-eu aˬ yawꞈ-euˬ aˬ li deuˬ bi sehꞈ jiˇ-euˬ gaˇ kawˆ, Yeˬzaˬleˬlaˇ deh kʼawꞈ-ahˇ jawˇ-eu Iˇsaˬleˬlaˆ tsawˇ haˬ deuˬ ya gaˬ ngeh, aˬ yawꞈ maꞈ-euˬ meuˬ deuˬ-ahˇ byehˇ -awˇ cehˆ-euˬ meh. Kʼoeˇ naˇ Piˇliˇtiˆ tsawˇ haˬ deuˬ oe-awˇ, meuˬ kʼoeˇ deuˬ-ahˇ jawˇ-euˬ meh.

⁸Guiˇ deuˆ gʼaˬ-awˇ yawˬ nah yawˬ-ahˇ, shiˇ taˬ-euˬ tsawˇ haˬ deuˬ geuꞈ luꞈ dm luꞈ-eu mˇ myawˬ deuˬ poˆ geuꞈ laˇ-eu lehˇ Piˇliˇtiˆ tsawˇ haˬ deuˬ laˇ ngeh, Giˇlaˬbaoˬ gawˬ jawˬ kʼoeˇ taˆ Sawˇluˆ hawˇ-eu aˬ yawꞈ-euˬ aˬ li smˬ li shiˇ taˬ-awˇ ga gaˇ ya mawˇ-euˬ meh.

⁹Sawˇluˆ-euˬ uˬ duˬ aˬ yawꞈ maꞈ deuˆ tsehˆ-awˇ, aˬ yawꞈ-euˬ guiˇ deuˆ-eu mehˬ tsoeˬ hawˇ-eu keu ka deuˬ lehˆ doˆ-euˬ meh. Kʼoeˇ naˇ, tsawˇ haˬ pyehˬ gʼeh-awˇ, uˬ duˬ hawˇ-eu keu ka kʼoeˇ deuˬ Piˇliˇtiˆ miˇ kʼahˬ doe ni bi baꞈ doe gʼeh-awˇ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ hawˇ-eu aˬ yawꞈ maꞈ-euˬ tsawˇ haˬ deuˬ gʼaˇ duˬ, laˬ kʼaˬ cehˇ-eu dawˬ bi tsaꞈ gaˬ doe-iˇ-euˬ meh.

¹⁰Aˬ yawꞈ-euˬ guiˇ deuˆ-eu keu ka deuˬ-ahˇ aˬ yawꞈ maꞈ-euˬ uˬ duˬ tahˬ nymˇ tiˬ nymˇ laꞈ kʼoeˇ bi jaˆ-awˇ, aˬ yawꞈ-euˬ uˬ duˬ-ahˇ, aˬ yawꞈ maꞈ-euˬ Daˬgoˬ miˬ yehˇ-euˬ uˬ duˬ tahˬ nymˇ laꞈ kʼoeˇ bi ceuˬ-euˬ meh.

¹¹Piˇliˇtiˆ tsawˇ haˬ deuˬ Sawˇluˆ-ahˇ kʼoeˇ loꞈ-ehˇ jahˇ nehˬ-euˬ gaˇ kawˆ, Giˇlaˆ miˇ kʼahˬ Jaˬbehˆ meuˬ-ahˇ jawˇ-eu tsawˇ haˬ deuˬ ya gaˬ ngeh,

¹²nui ma kʼaˬ dui dui-eu tsawˇ haˬ deuˬ iˇ-awˇ, Sawˇluˆ hawˇ-eu aˬ yawꞈ-euˬ aˬ li deuˬ-euˬ gʼawˇ mawˇ deuˬ, Jaˬbehˆ meuˬ-ahˇ baꞈ kʼoꞈ laꞈ-euˬ meh. Kʼoeˇ naˇ, tsuiꞈ kaˆ aˇ bawˇ tiˬ bawˇ dawˬ pehˬ-ahˇ duˬ pahˬ nehˬ-awˇ, shiꞈ nah keuˆ ni maˬ dzaˬ maˬ dawˇ-ehˇ lah-euˬ meh.

¹³Sawˇluˆ-aˬ, Sahˬpaˬ Miˬyehˇ-ahˇ saˇ jaˇ maˬ ziꞈ-eu miˇ neh ya shiˇ-euˬ meh. Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ maˬ naˇ haˬ-ehˇ, shiˇ dzeuˇ-euˬ tsawˇ haˬ deuˬ-euˬ yaw sahˇ-ahˇ gʼoe-awˇ yaw dehꞈ dehꞈ-euˬ meh.

¹⁴Sahˬpaˬ Miˬyehˇ-ahˇ aˬ yawꞈ mehˬ bawˬ maˬ mˇ taꞈ-a. Kʼoeˇ miˇ neh, Sahˬpaˬ Miˬyehˇ neh aˬ yawꞈ-ahˇ bi shiˇ-awˇ, Yeˬshehˇ-euˬ aˬ li Daˬbiˇ-ahˇ miˇ kʼahˬ kʼoeˇ kʼahˬ a nehˬ-euˬ meh.