Read Akha 1 Laˬsaˬbaˬ 11 Bible Online

1 Laˬsaˬbaˬ 11 - Akha bible

1 Laˬsaˬbaˬ 11

¹Iˇsaˬleˬlaˆ tsawˇ haˬ dawˬ tawˆ luꞈ, Heˬbyoˬ meuˬ-ahˇ Daˬbiˇ jawˇ gaˇ laˇ-awˇ ehˇ-eu, “Nga maꞈ-aˬ, nawˬ-euˬ shiˬ shaˬ pyeuꞈ-eu ma.

²Dzeuˇ laˇ ngeh, Sawˇluˆ nga maꞈ-euˬ sahˬ paˬ geuꞈ luꞈ ngeh kʼawꞈ, Iˇsaˬleˬlaˆ tsawˇ haˬ deuˬ-ahˇ guiˇ deuˆ-eu laꞈ kʼoeˇ nawˇ sheuˬ gʼeh-awˇ, Sahˬpaˬ Miˬyehˇ-euˬ tsawˇ jeuˬ-ahˇ nawˬ neh bi sheuˬ gʼeh-awˇ bi uˆ lahˇ-eu gʼaˇ duˬ, Sahˬpaˬ Miˬyehˇ nawˬ-ahˇ saˇ jaˇ dzaˬ taˬ-euˬ meh.”

³Kʼoeˇ loꞈ-ehˇ, Iˇsaˬleˬlaˆ miˇ kʼahˬ-euˬ aˬ yuiꞈ aˬ tsu dawˬ tawˆ luꞈ, Heˬbyoˬ meuˬ-ahˇ sahˬ paˬ Daˬbiˇ jawˇ gaˇ laˇ-awˇ, aˬ yawꞈ hawˇ-eu aˬ yawꞈ maꞈ yaw kaˬ saˇ jaˇ dzaˬ taꞈ-euˬ meh. Kʼoeˇ naˇ, aˬ yawꞈ maꞈ aˬ yawꞈ-ahˇ tsiˇ shehˆ daˆ nehˬ-awˇ, Saˬmeuˬlaˆ-ahˇ gʼoe-awˇ Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, aˬ yawꞈ Iˇsaˬleˬlaˆ miˇ kʼahˬ-euˬ sahˬ paˬ pyeuꞈ laˇ-euˬ meh.

⁴Sahˬ paˬ Daˬbiˇ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Yeˬluˇsaˬlehˬ meuˬ-ahˇ guiˇ deuˆ-iˇ-euˬ meh. Aˇ yamˬ kʼoeˇ yamˬ-ahˇ, Yeˬluˇsaˬlehˬ meuˬ-ahˇ Yeˬbuˇ meuˬ lehˇ kuˇ-awˇ, kʼoeˇ gaˇ jawˇ beh beh-euˬ tsawˇ jeuˬ pyeuꞈ-eu Yeˬbuˇ tsawˇ jeuˬ jawˇ luꞈ-eu meh.

⁵“Meuˬ heu meuˬ-ahˇ nawˇ guiˇ maˬ deuˆ uˇ laꞈ nya-aˇ” lehˇ, Yeˬbuˇ tsawˇ haˬ deuˬ Daˬbiˇ-ahˇ ehˇ nehˬ-euˬ meh. Ehˇ kʼawꞈ, ziꞈ dah ni tsoˆ taˬ-euˬ Ziˇoˬ taˆ nymˇ nymˇ ma-ahˇ Daˬbiˇ deuˆ gʼaˬ-awˇ, jawˇ duˬ kʼoeˇ tsahˇ “Daˬbiˇ-euˬ meuˬ” lehˇ tsawˇ myahˇ doˆ-euˬ meh.

⁶“Yeˬbuˇ tsawˇ haˬ-ahˇ sehꞈ beh beh-euˬ gʼaˬ, guiˇ maꞈ kʼoeˇ taˆ uˆ lahˇ-eu gʼaˬ bi geuꞈ ma” lehˇ, Daˬbiˇ ehˇ-euˬ meh. Zeˬluˇyaˆ-euˬ aˬ li Yoˇbaˬ-aˬ, aˬ cawˬ mehˬ hu guiˇ daˬ daˬ-awˇ, guiˇ maꞈ kʼoeˇ taˆ uˆ lahˇ-eu gʼaˬ pyeuꞈ laˇ-euˬ meh.

⁷Taˆ nymˇ nymˇ ma kʼoeˇ nymˇ-ahˇ Daˬbiˇ jawˇ leˇ-euˬ miˇ neh, Daˬbiˇ-euˬ meuˬ lehˇ tsawˇ myahˇ doˆ-euˬ jeˬ pyeuꞈ-eu meh.

⁸Gawˬ duˇ-euˬ nahˇ ma doˆ kʼehˬ paw dzeˇ jaˆ-eu tsaˬ duˬ duˬ dzm taˬ-euˬ jawˇ duˬ-ahˇ neh aˇ dahˬ beh -awˇ, aˬ yawꞈ meuˬ tsoˆ-euˬ meh. Dzeˇ-eu meuˬ pehˇ tsahˇ deuˬ-ahˇ, Yoˇbaˬ gʼaˬ neh laˆ saˆ muiˬ-euˬ meh.

⁹Daˬbiˇ-aˬ, tiˬ jawˇ saˇ-iˬ tiˬ jawˇ gʼaˬ kʼaˆ laˇ luꞈ-eu meh. Aˬ jeˬ miˇ neh ehˇ naˇ, Baoˬ huiˬ-eu Sahˬpaˬ Miˬyehˇ aˬ yawꞈ nehˬ-ehˇ jawˇ-eu meh.

¹⁰Heu-aˬ, tsawˇ myahˇ doˆ dui dui-eu Daˬbiˇ-euˬ yehˇ deuˬ-euˬ tsawˇ myahˇ meh. Sahˬpaˬ Miˬyehˇ neh saˇ jaˇ dzaˬ taˬ-euˬ jaˆ-eu loꞈ-ehˇ, Daˬbiˇ sahˬ paˬ pyeuꞈ laˇ ni Iˇsaˬleˬlaˆ tsawˇ haˬ deuˬ nehˬ-ehˇ tiˬ kawˆ loꞈ-ehˇ aˬ yawꞈ maꞈ caw ba-awˇ, aˬ yawꞈ maꞈ baˬ da neh Daˬbiˇ-euˬ miˇ kʼahˬ baoˬ huiˬ-euˬ meh.

¹¹Yaw beh gʼaˬ-aˬ, Haˬkaˬmoˬ aˇ jeuˬ Yaˬshawˇbamˬ meh. Aˬ yawꞈ-aˬ, tsawˇ myahˇ doˆ dui dui-eu “Yehˇ smˇ gʼaˬ” kʼoeˇ taˆ aˬ yuiꞈ geuꞈ-euˬ gʼaˬ meh. Aˬ yawꞈ-euˬ gahˬ neh tsawˇ haˬ smˬ yaˇ gʼaˬ-ahˇ deuˆ-awˇ, guiˇ tiˬ poˆ deuˆ-euˬ aˇ yamˬ laꞈ kʼoeˇ tehꞈ-ehˇ, aˬ yawꞈ maꞈ dawˬ tawˆ luꞈ-ahˇ aˬ yawꞈ sehꞈ jiˇ-euˬ meh.

¹²Tsawˇ myahˇ doˆ dui dui-eu “Yehˇ smˇ gʼaˬ” laꞈ kʼoeˇ nyiˬ gʼaˬ tiˬ gʼaˬ-aˬ, Aˬhawˇ aˇ jeuˬ Doˇdoˬ-euˬ aˬ li Eˇlaˬzaˬ meh.

¹³Paˬsaˬdaˬmiˬ lehˇ kuˇ-eu jawˇ duˬ-ahˇ guiˇ deuˆ ngeh, Daˬbiˇ jawˇ paw pyawˬ-awˇ, Piˇliˇtiˆ tsawˇ haˬ deuˬ-ahˇ deuˆ-euˬ meh. Iˇsaˬleˬlaˆ tsawˇ haˬ deuˬ cehˆ byaˆ jiˇ ngeh, lawˬ loeˇ loeˇ yaˇ-ahˇ aˬ yawꞈ jawˇ luꞈ-eu meh.

¹⁴Aˬ yawꞈ hawˇ-eu aˬ yawꞈ-euˬ tsawˇ haˬ deuˬ yaˇ kʼoeˇ kawˬ gʼahˇ ceh ziꞈ dah ni jawˇ-awˇ, Piˇliˇtiˆ tsawˇ haˬ deuˬ-ahˇ deuˆ-euˬ meh. Huiˬ dui dui-eu gʼaˬ leˇ-eu jeˬ, aˬ yawꞈ-ahˇ Sahˬpaˬ Miˬyehˇ biꞈ-euˬ meh.

¹⁵Tiˬ nah-aˬ, nya dui dui-eu yehˇ smˬ tseˇ gʼaˬ laꞈ kʼoeˇ smˇ gʼaˬ, Aˬduˬlamˬ lo kʼahˬ dawˬ peh jaˆ-eu lo guˇ-ahˇ Daˬbiˇ jawˇ gaˇ iˇ-euˬ meh. Kʼoeˇ ngeh, Piˇliˇtiˆ guiˇ maꞈ tiˬ maꞈ Leˬpeˬ deh kʼawꞈ-ahˇ taˆ tsoˆ luꞈ-eu meh.

¹⁶Aˇ yamˬ kʼoeˇ yamˬ laꞈ kʼoeˇ, ziꞈ dah ni tsoˆ taˬ-euˬ taˆ jaˆ-eu gawˬ duˇ tiˬ duˇ-ahˇ Daˬbiˇ jawˇ luꞈ-awˇ, Piˇliˇtiˆ tsawˇ haˬ deuˬ Yeˬluˇsaˬlehˬ meuˬ-ahˇ uˇ laˇ-awˇ jawˇ luꞈ-eu meh.

¹⁷Kʼoeˇ ngeh, Daˬbiˇ iˇ kahˇ-ahˇ noeˬ mawˇ laˇ-awˇ, “Tsawˇ haˬ tiˬ gʼaˬ na Behˬlehˬhehˬ meuˬ-euˬ lahˇ kʼehˬ dawˬ peh jaˆ-eu lah duˬ-ahˇ iˇ-awˇ, iˇ cuꞈ tiˬ kʼmˬ kʼawꞈ laꞈ-awˇ bi dawˇ laꞈ law nmˇ-aˬ lehˇ noeˬ nya” lehˇ ehˇ-eu meh.

¹⁸Tsawˇ myahˇ doˆ dui dui-eu yehˇ kʼoeˇ smˇ gʼaˬ Piˇliˇtiˆ tsawˇ haˬ deuˬ-euˬ taˆ nyiꞈ tsehˆ-ehˇ tahˬ doˆ gʼeh-awˇ, lah duˬ-ahˇ iˇ cuꞈ kʼawꞈ-awˇ, Daˬbiˇ jawˇ gaˇ yuˇ laꞈ nehˬ-euˬ meh. Ehˇ kʼawꞈ, iˇ cuꞈ kʼoeˇ aˬ yawꞈ maˬ dawˇ-ehˇ, shehˆ kʼaˇ-awˇ Sahˬpaˬ Miˬyehˇ-ahˇ lawˇ nehˬ-euˬ meh.

¹⁹“Sahˬpaˬ Miˬyehˇ-oˇ, Iˇ cuꞈ heu ngaˇ maˬ dawˇ ahˇ coeˇ nya. Iˇ cuꞈ heu ngaˇ dawˇ naˇ, yawˬ ha-euˬ saꞈ laˇ damˬ-awˇ iˇ cuꞈ kʼawꞈ doˆ laˬ-iˇ-euˬ tsawˇ haˬ heu smˇ gʼaˬ-euˬ shiˬ dawˇ gaˇ duˇ miˇ-a” lehˇ aˬ yawꞈ ehˇ-eu meh. Kʼoeˇ miˇ neh, iˇ cuꞈ kʼoeˇ aˬ yawꞈ maˬ dawˇ ni byehˇ-euˬ meh. Gaˇ heu deuˬ-aˬ, tsawˇ myahˇ doˆ dui dui-eu yehˇ kʼoeˇ smˇ gʼaˬ neh mˇ-euˬ ja ceuˬ dui dui paˬ-ehˇ gʼeh-eu gaˇ deuˬ meh.

²⁰Zeˬluˇyaˆ-euˬ aˬ li Yoˇbaˬ-euˬ aˬ nyiˇ Aˬbiˇshaiˇ-aˬ, “Tsawˇ myahˇ doˆ-eu yehˇ smˬ tseˇ gʼaˬ” laꞈ kʼoeˇ, aˬ yuiꞈ geuꞈ-euˬ gʼaˬ meh. Aˬ yawꞈ-aˬ, aˬ yawꞈ-euˬ gahˬ neh tsawˇ haˬ smˬ yaˇ gʼaˬ-ahˇ deuˆ ceh ceh-awˇ sehꞈ jiˇ-euˬ miˇ neh, “Smˬ tseˇ gʼaˬ” laꞈ kʼoeˇ tsawˇ myahˇ doˆ-eu gʼaˬ pyeuꞈ laˇ-eu meh.

²¹Kʼoeˇ “Smˬ tseˇ gʼaˬ” laꞈ kʼoeˇ aˬ cawˬ naˆ maˬ tseˇ aˬ yawꞈ tsawˇ myahˇ doˆ-awˇ, aˬ yawꞈ maꞈ kʼoeˇ taˆ aˬ yuiꞈ geuꞈ-euˬ meh. Ehˇ kʼawꞈ, tsawˇ myahˇ doˆ dui dui-eu “Yehˇ smˇ gʼaˬ” naˆ ni aˬ yawꞈ tsawˇ myahˇ maˬ huiˬ-a.

²²Kaˬzeˬlaˇ meuˬ-ahˇ jawˇ-eu Yeˬhawˇyaˬdaˬ-euˬ aˬ li Baˬnaˇyaˬ kʼawꞈ, tsawˇ myahˇ doˆ-euˬ yehˇ tiˬ gʼaˬ pyeuꞈ-eu meh. Tsawˇ myahˇ doˆ-eu Mawˇbaˆ yehˇ nyiˬ gʼaˬ-ahˇ sehꞈ-euˬ poˆ gui ahˇ-ehˇ, aˬ yawꞈ neh mˇ taˬ-euˬ ja ceuˬ paˬ-ehˇ gʼeh-eu gʼawˬ mya jeˬ jaˆ-eu meh. Tiˬ poˆ-aˬ, juˬ kʼoeˬ tmˬ-eu aˇ nah tiˬ nah-ahˇ, lo kʼahˬ tiˬ kʼahˬ-ahˇ aˬ yawꞈ uˇ-iˇ-awˇ, aˇ laˬ jaˬ shiˇ tiˬ mawˇ sehꞈ-euˬ meh.

²³Caˇ gawˬ ngaˬ caˆ byah ni goˇ-awˇ, gahˬ gahˬ ma baꞈ luꞈ-eu Iˇjiˇtuˆ tsawˇ haˬ tiˬ gʼaˬ-ahˇ kʼawꞈ, aˬ yawꞈ sehꞈ-euˬ meh. Baˬnaˇyaˬ-aˬ, daˇ kawˬ tiˬ kawˬ tehꞈ-ehˇ yuˇ-awˇ deuˆ ceh ceh-euˬ kʼawꞈ, Iˇjiˇtuˆ tsawˇ haˬ kʼoeˇ gʼaˬ-euˬ gahˬ lu doˆ-awˇ, aˬ yawꞈ-ahˇ paˇ tsawˆ sehꞈ nehˬ-euˬ meh.

²⁴Heu-aˬ, tsawˇ myahˇ doˆ-eu “Yehˇ smˬ tseˇ gʼaˬ” laꞈ kʼoeˇ tiˬ gʼaˬ pyeuꞈ-eu, Baˬnaˇyaˬ neh mˇ-euˬ ja ceuˬ paˬ-ehˇ gʼeh-eu gaˇ deuˬ meh.

²⁵Aˬ yawꞈ-aˬ, “Smˬ tseˇ gʼaˬ” laꞈ kʼoeˇ aˬ cawˬ taꞈ-ehˇ dzehˬ kʼawꞈ, tsawˇ myahˇ doˆ dui dui-eu “Yehˇ smˇ gʼaˬ” naˆ ni tsawˇ myahˇ maˬ huiˬ-a. Daˬbiˇ neh aˬ yawꞈ-ahˇ, Daˬbiˇ-ahˇ loꞈ piˇ-eu guiˇ maꞈ kʼoeˇ taˆ aˬ yuiꞈ bi geuꞈ-euˬ meh.

²⁶Tsawˇ myahˇ doˆ-eu yehˇ nui deuˬ-aˬ, Yoˇbaˬ-euˬ aˬ nyiˇ Aˬsaˬheˬlaˇ, Behˬlehˬhehˬ meuˬ-ahˇ jawˇ-eu Doˇdoˬ-euˬ aˬ li Eˇlaˬhaˬnaˬ,

²⁷Haˬloˆ meuˬ-ahˇ jawˇ-eu Shaˬmoˇ, Peˬlehˆ meuˬ-ahˇ jawˇ-eu Hiˇlehˆ,

²⁸Teˬkawˬ meuˬ-ahˇ jawˇ-eu Iˇkeˇshaˆ-euˬ aˬ li Iˇyaˬ, Aˬnaˬtawˇ meuˬ-ahˇ jawˇ-eu Aˬbyeˇzaˬ,

²⁹Huˇshahˬ meuˬ-ahˇ jawˇ-eu Siˇbeˬkehˇ, Aˬhawˇ meuˬ-ahˇ jawˇ-eu Iˇlaiˬ,

³⁰Neˬtawˇpaˬ meuˬ-ahˇ jawˇ-eu Maˬhaˬlai, Neˬtawˇpaˬ meuˬ-ahˇ jawˇ-eu Baˬnahˬ-euˬ aˬ li Heˬlehˆ,

³¹Beˬyaˬmiˬ miˇ kʼahˬ Giˇbyaˬ meuˬ-ahˇ jawˇ-eu Yiˇbaiˇ-euˬ aˬ li Iˇdaiˇ, Piˇlaˬdoˬ meuˬ-ahˇ jawˇ-eu Baˬnaˇyaˬ,

³²Gaˬshaˆ meuˬ dawˬ peh deh kʼawꞈ-ahˇ jawˇ-eu Huˇyaiˇ, Aˬlaˬbahˬ meuˬ-ahˇ jawˇ-eu Aˬbyeˬlaˆ,

³³Baˬhuˇlmˬ meuˬ-ahˇ jawˇ-eu Aˬzaˇmaˬbehˇ, Shaˬlaˬboˬ meuˬ-ahˇ jawˇ-eu Eˇliˇhaˬbaˬ,

³⁴Giˇzoˬ meuˬ-ahˇ jawˇ-eu Haˬshmˬ, Haˇlaˬ meuˬ-ahˇ jawˇ-eu Shaˬgiˇ-euˬ aˬ li Yawˇnaˆshaˬ,

³⁵Haˇlaˬ meuˬ-ahˇ jawˇ-eu Saˬkaˬlaˆ-euˬ aˬ li Aˬhiˇmˬ, Uˇlaˆ-euˬ aˬ li Eˇliˇpaˬlaˇ,

³⁶Meˬsheˬlahˬ meuˬ-ahˇ jawˇ-eu Heˬpaˬ, Peˬloˬ meuˬ-ahˇ jawˇ-eu Aˬhiˇyaˬ,

³⁷Gaˬlaˬmeˬlaˇ meuˬ-ahˇ jawˇ-eu Heˬzaˬloˆ, Eˇzaˬbaiˬ-euˬ aˬ li Naˬlai,

³⁸Naˬdaˬ-euˬ aˬ li Yawˇlaˆ, Haˬgaˬliˇ-euˬ aˬ li Miˇbaˬhaˬ,

³⁹Aˬmoˬ meuˬ-ahˇ jawˇ-eu Zeˬlehˆ, Yoˇbaˬ-euˬ guiˇ deuˆ-eu keu ka baꞈ-eu gʼaˬ pyeuꞈ-eu Biˇyoˆ meuˬ-ahˇ jawˇ-eu Naˬhaˬlehˇ,

⁴⁰Yaˬtiˇlaˆ meuˬ-ahˇ jawˇ-eu Gaˬyehˆ hawˇ-eu Iˇyaˬ,

⁴¹Heˬtaˆ tsawˇ jeuˬ Uˇliˇyaˆ, Aˬlai-euˬ aˬ li Zaˬbaˆ,

⁴²(Yehˇ smˬ tseˇ gʼaˬ jawˇ-awˇ, Luˇbeˬ tsawˇ jeuˬ kʼoeˇ taˆ aˬ yuiꞈ geuꞈ luꞈ-eu tiˬ gʼaˬ pyeuꞈ-eu) Shiˇza-euˬ aˬ li Aˬdiˇnaˬ,

⁴³Mawˇkah-euˬ aˬ li Haˬnaˬ, Miˇdaˬ meuˬ-ahˇ jawˇ-eu Yoˇshaˬpaˇ,

⁴⁴Aˬshaˇteˬlahˬ meuˬ-ahˇ jawˇ-eu Awˇziˆ, Aˬyawˬ meuˬ-ahˇ jawˇ-eu Hawˇdamˬ-euˬ aˬ li Shaˬmaˬ hawˇ-eu Yeˬyeˬlaˇ,

⁴⁵Tiˇzaˬ meuˬ-ahˇ jawˇ-eu Shiˇmaˬliˇ-euˬ aˬ li Yeˬdeˬlaˇ hawˇ-eu Joˇhaˬ,

⁴⁶Maˬhaˬbah meuˬ-ahˇ jawˇ-eu Eˇliˇlaˆ, Eˇlaˬnamˬ-euˬ aˬ li Yeˬliˇbaiˬ hawˇ-eu Yawˇshaˬbiˇ,

⁴⁷Mawˇbaˆ meuˬ-ahˇ jawˇ-eu Iˇdaˬmahˇ, Zoˇbaˬ meuˬ-ahˇ jawˇ-eu Eˇliˇlaˆ, Awˇbehˆ, Yaˬseˬlaˇ, heu deuˬ meh.