Read Akha 1 Laˬsaˬbaˬ 14 Bible Online

1 Laˬsaˬbaˬ 14 - Akha bible

1 Laˬsaˬbaˬ 14

¹Duˇlu sahˬ paˬ Hiˇlamˬ-aˬ, Daˬbiˇ jawˇ gaˇ jeˬ gaꞈ taꞈ-eu gʼaˇ duˬ tsawˇ haˬ pyehˬ gʼeh-awˇ, sahˬ paˬ-euˬ nymˇ tsoˆ-eu gʼaˇ duˬ siˬ daˬ miˬ shuˬ daˇ kawˬ deuˬ maˬ ehˇ, laꞈ myawˬ laꞈ sawˆ nya-eu tsawˇ haˬ deuˬ maˬ ehˇ, kʼaˬ lo tsaˬ byaˆ mˇ nya-eu tsawˇ haˬ deuˬ maˬ ehˇ, bi sheuˬ gʼeh-euˬ meh.

²Kʼoeˇ ngeh, Daˬbiˇ heu loꞈ-ehˇ noeˬ siˬ-euˬ meh. Sahˬpaˬ Miˬyehˇ neh aˬ yawꞈ-ahˇ sahˬ paˬ ka nehˬ-awˇ, aˬ yawꞈ-euˬ tsawˇ jeuˬ gʼaˇ duˬ aˬ yawꞈ-euˬ miˇ kʼahˬ baw le za le ni, Sahˬpaˬ Miˬyehˇ gaˇ mˇ luꞈ-eu gaˇ kawˆ-ahˇ noeˬ siˬ-euˬ meh.

³Yeˬluˇsaˬlehˬ meuˬ laꞈ kʼoeˇ, Daˬbiˇ miˬ zaˬ gʼawˬ mya gʼaˬ paˇ sheuˬ-awˇ, aˬ buˇ aˬ li gʼawˬ mya ni jawˇ le-euˬ meh.

⁴Yeˬluˇsaˬlehˬ meuˬ-ahˇ dehꞈ le-euˬ aˬ yawꞈ-euˬ zaˬ deuˬ-aˬ, Shaˬmeuˬ, Shawˇbaˆ, Naˬdaˬ, Sawˇlaˬmoˬ,

⁵Iˇbaˬhaˬ, Eˇliˇshuˆ, Eˇpaˬlehˆ,

⁶Noˇgaˬ, Neˬpehˆ, Jaˬpiˇyaˬ,

⁷Eˇliˇshaˬmaˇ, Beˬliˇdaˬ,[8] Eˇliˇpaˬlehˇ aˬ ha mehˇ nmˇ meh.

⁸Iˇsaˬleˬlaˆ miˇ kʼahˬ tiˬ kʼahˬ kʼahˬ lah ni kʼoeˇ taˆ Daˬbiˇ sahˬ paˬ pyeuꞈ laˇ-euˬ gaˇ kawˆ, Piˇliˇtiˆ tsawˇ haˬ deuˬ ya gaˬ ngeh, aˬ yawꞈ maꞈ Daˬbiˇ-ahˇ nyehꞈ-eu lehˇ doˆ-iˇ-euˬ meh. Daˬbiˇ gʼeh aˬ yawꞈ maꞈ-ahˇ ciˬ daˬ-iˇ-eu gʼaˇ duˬ guiˇ maꞈ sheuˬ-awˇ doˆ-iˇ-euˬ meh.

⁹Piˇliˇtiˆ tsawˇ haˬ deuˬ Leˬpeˬ deh kʼawꞈ-ahˇ oe keuˆ-awˇ, miˇ kʼahˬ zaˬ-euˬ myawˬ gahˬ deuˬ ceh geuꞈ luꞈ-eu meh.

¹⁰“Piˇliˇtiˆ tsawˇ haˬ deuˬ-ahˇ ngaˇ guiˇ deuˆ-iˇ-eu tsaˬ meh loˇ. Nawˇ ngaˬ-ahˇ bi gʼaˬ leˇ nehˬ laꞈ ma loˇ” lehˇ, Miˬyehˇ-ahˇ Daˬbiˇ naˇ haˬ haw ngeh, “Deuˆ-iˇ-awˬ. Nawˬ-ahˇ ngaˇ bi gʼaˬ leˇ ma” lehˇ Sahˬpaˬ Miˬyehˇ ehˇ-eu meh.

¹¹Kʼoeˇ naˇ, Baˬlaˇpeˬlaˬzmˬ lehˇ kuˇ-eu jawˇ duˬ-ahˇ, Piˇliˇtiˆ tsawˇ haˬ deuˬ-ahˇ Daˬbiˇ guiˇ deuˆ-iˇ-awˇ, deuˆ gʼaˬ-euˬ meh. Kʼoeˇ ngeh jawˇ, “Miˬyehˇ ngaˬ-ahˇ zmˬ-awˇ, muiˇ-eu tsawˇ haˬ kʼoeˇ deuˬ-ahˇ iˇ jeuˬ jeuˬ-euˬ loꞈ-ehˇ dehˬ paˆ doˆ gʼeh-euˬ meh” lehˇ Daˬbiˇ ehˇ-eu meh. Kʼoeˇ miˇ neh, jawˇ duˬ kʼoeˇ tsahˇ-ahˇ Baˬlaˇpeˬlaˬzmˬ[9] lehˇ kuˇ-euˬ meh.

¹²Piˇliˇtiˆ tsawˇ haˬ deuˬ cehˆ byaˆ ngeh, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ byehˇ dzeh yaꞈ-awˇ, tahˬ pahˬ aˬ ma mawˇ kawˇ kʼoeˇ deuˬ-ahˇ keuˬ dzeh-eu gʼaˇ duˬ, Daˬbiˇ dawˬ biꞈ-euˬ meh.

¹³Gʼawˬ myahˇ maˬ gʼeh-ehˇ, Piˇliˇtiˆ tsawˇ haˬ deuˬ deh kʼawꞈ kʼoeˇ kʼawꞈ-ahˇ paˇ oe-awˇ, mˇ myawˬ paˇ ceh geuꞈ le-euˬ meh.

¹⁴Miˬyehˇ-ahˇ Daˬbiˇ mehˬ bawˬ tiˬ poˆ paˇ mˇ haw ngeh, Miˬyehˇ heu loꞈ-ehˇ ehˇ-eu meh. “Heu paw dzeˇ coeˇ-ahˇ neh aˬ yawꞈ maꞈ-ahˇ guiˇ taˬ paˇ deuˆ-iˇ. Ehˇ kʼawꞈ, boeˬ dzaˇ dzaˇ yaˇ paw neh iˇ-awˇ, aˬ yawꞈ maꞈ-ahˇ guiˇ deuˆ-eu gʼaˇ duˬ lehˬ hmˬ-awˇ jawˇ tawˬ.

¹⁵Kʼoeˇ naˇ, boeˬ dzaˇ aˇ bawˇ kʼoeˇ deuˬ-euˬ uˬ du, guiˇ deuˆ gaˇ iˇ luꞈ-eu teˇ saˇ-ahˇ nawˇ ya gaˬ ngeh, iˇ-awˇ guiˇ deuˆ-iˇ-awˬ. Aˬ jeˬ miˇ neh ehˇ naˇ, Piˇliˇtiˆ tsawˇ haˬ deuˬ-ahˇ deuˆ gʼaˬ-eu gʼaˇ duˬ, nawˬ-euˬ mehˬ hu ngaˇ iˇ luꞈ-eu ma.”

¹⁶Miˬyehˇ neh dawˬ kʼaˇ biꞈ nehˬ-euˬ loꞈ-ehˇ Daˬbiˇ mˇ-awˇ, Piˇliˇtiˆ tsawˇ haˬ deuˬ-ahˇ Giˇbyoˬ meuˬ-ahˇ neh Geˬzeuˬ meuˬ-ahˇ doˆ ni teh kʼoꞈ gʼeh-euˬ meh.

¹⁷Daˬbiˇ-euˬ tsawˇ myahˇ yawˬ gaˇ na luꞈ huiˬ keuˆ-iˇ-awˇ, miˇ kʼahˬ yawˬ kʼahˬ na luꞈ Daˬbiˇ-ahˇ guˆ ni Sahˬpaˬ Miˬyehˇ jahˇ-euˬ meh.