Read Akha 1 Laˬsaˬbaˬ 15 Bible Online

1 Laˬsaˬbaˬ 15 - Akha bible

1 Laˬsaˬbaˬ 15

¹Daˬbiˇ-aˬ, aˬ yawꞈ jawˇ-eu gʼaˇ duˬ Daˬbiˇ-euˬ meuˬ lehˇ kuˇ-eu jawˇ duˬ-ahˇ, nymˇ gʼawˬ mya nymˇ tsoˆ-euˬ meh. Miˬyehˇ-euˬ Dawˬ ma saˇ jaˇ Bahˬ keuˆ bi jaˆ-eu gʼaˇ duˬ kʼawꞈ, jawˇ duˬ tiˬ tsahˇ aˬ yawꞈ laˆ saˆ-awˇ, sehˬ gʼawˆ tiˬ gʼawˆ gʼawˆ-euˬ meh.

²Kʼoeˇ naˇ, aˬ yawꞈ heu loꞈ-ehˇ ehˇ-eu meh. “Leˬbiˇ tsawˇ haˬ deuˬ tehꞈ-ehˇ Dawˬ ma saˇ jaˇ Bahˬ keuˆ ya baꞈ meh. Aˬ jeˬ miˇ neh ehˇ naˇ, Dawˬ ma saˇ jaˇ Bahˬ keuˆ baꞈ-awˇ mˬ maˬ maˬ byaˆ zaˇ ziˇ Sahˬpaˬ Miˬyehˇ-euˬ gaˇ bi mˇ-eu gʼaˇ duˬ, Leˬbiˇ tsawˇ haˬ deuˬ-ahˇ Sahˬpaˬ Miˬyehˇ neh tseˇ doˆ taˬ-euˬ meh.”

³Kʼoeˇ naˇ, Daˬbiˇ-aˬ, aˬ yawꞈ neh lehˬ hmˬ taˬ-euˬ jawˇ duˬ-ahˇ Dawˬ ma saˇ jaˇ Bahˬ keuˆ baꞈ taˬ-euˬ gʼaˇ duˬ, Iˇsaˬleˬlaˆ tsawˇ haˬ dawˬ tawˆ luꞈ-ahˇ, Yeˬluˇsaˬlehˬ meuˬ-ahˇ kuˇ uiˬ-euˬ meh.

⁴Aˬloˬ-euˬ zaˬ deuˬ uˆ deuˬ hawˇ-eu Leˬbiˇ tsawˇ haˬ deuˬ-ahˇ kʼawꞈ, bi kuˇ laˬ-iˇ-euˬ meh.

⁵Leˬbiˇ tsawˇ jeuˬ Kawˇhaˆ aˇ jeuˬ laꞈ kʼoeˇ, yawˬ ha-euˬ aˇ jeuˬ aˇ ca tiˬ yaˇ nyiˬ tseˇ gʼaˬ kʼoeˇ taˆ aˬ yuiꞈ geuꞈ-awˇ uˆ lahˇ-eu Uˇleˬlaˇ maˬ ehˇ,

⁶Meˬlaˬliˇ aˇ jeuˬ laꞈ kʼoeˇ nyiˬ yaˇ nyiˬ tseˇ gʼaˬ kʼoeˇ taˆ aˬ yuiꞈ geuꞈ-awˇ uˆ lahˇ luꞈ-eu Aˬsaˬyaˇ gʼaˬ maˬ ehˇ,

⁷Geˬlaˬshoˬ aˇ jeuˬ laꞈ kʼoeˇ tiˬ yaˇ smˬ tseˇ gʼaˬ kʼoeˇ taˆ aˬ yuiꞈ geuꞈ-awˇ uˆ lahˇ luꞈ-eu Yawˇlaˆ gʼaˬ maˬ ehˇ,

⁸Eˇliˇzaˬpaˬ aˇ jeuˬ laꞈ kʼoeˇ nyiˬ yaˇ gʼaˬ kʼoeˇ taˆ aˬ yuiꞈ geuꞈ-awˇ uˆ lahˇ luꞈ-eu Sheˬmaˇyaˬ gʼaˬ maˬ ehˇ,

⁹Heˬbyoˬ aˇ jeuˬ laꞈ kʼoeˇ yehꞈ tseˇ gʼaˬ kʼoeˇ taˆ aˬ yuiꞈ geuꞈ-awˇ uˆ lahˇ luꞈ-eu Eˇliˇlaˆ gʼaˬ maˬ ehˇ,

¹⁰Awˇzeˬlaˇ aˇ jeuˬ laꞈ kʼoeˇ tiˬ yaˇ tseˇ nyiꞈ gʼaˬ kʼoeˇ taˆ aˬ yuiꞈ geuꞈ-awˇ uˆ lahˇ luꞈ-eu Aˬmiˇnaˬdehˇ gʼaˬ maˬ ehˇ, uiˬ laˇ jiˇ-euˬ meh.

¹¹Piˇ ma Zaˬdoˆ hawˇ-eu Aˬbyaˬdaˬ aˬ nyaꞈ-ahˇ maˬ ehˇ, Leˬbiˇ tsawˇ haˬ deuˬ pyeuꞈ-eu, Uˇleˬlaˇ, Aˬsaˬyaˇ, Yawˇlaˆ, Sheˬmaˇyaˬ, Eˇliˇlaˆ, Aˬmiˇnaˬdehˇ aˬ ha maꞈ-ahˇ kʼawꞈ, Daˬbiˇ kuˇ-euˬ meh.

¹²Leˬbiˇ tsawˇ haˬ kʼoeˇ deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Naw maꞈ-aˬ, Leˬbiˇ aˇ jeuˬ deuˬ-euˬ aˬ yuiꞈ aˬ tsu deuˬ pyeuꞈ-eu meh. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-ahˇ, ngaˬ neh lehˬ hmˬ taˬ-euˬ jawˇ duˬ-ahˇ naw maꞈ baꞈ keuˆ taˬ-eu gʼaˇ duˬ, naw maꞈ hawˇ-eu naw maꞈ-euˬ tsawˇ haˬ deuˬ gʼawˇ mawˇ shawˇ-eu zahˇ jahˇ-awˬ.

¹³Aˬ jeˬ miˇ neh ehˇ naˇ, yaw beh poˆ nga maꞈ baꞈ-iˇ-awˇ, aˬ yawꞈ-ahˇ uˬ duˬ tahˬ paˬ-ehˇ gʼeh-eu kʼawꞈ, uˬ duˬ maˬ tahˬ-euˬ miˇ neh, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh nga maꞈ-ahˇ kʼehˬ nehˬ laꞈ ngeh poˆ, naw maꞈ maˬ ahˇ-a.”

¹⁴Kʼoeˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ jiˆ-eu gʼaˇ duˬ, piˇ ma deuˬ hawˇ-eu Leˬbiˇ tsawˇ haˬ deuˬ gʼawˇ mawˇ shawˇ-eu zahˇ jahˇ-euˬ meh.

¹⁵Moˇseˬ-ahˇ gʼoe-awˇ Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Leˬbiˇ tsawˇ haˬ deuˬ Bahˬ keuˆ kʼoeˇ-ahˇ baꞈ kawˬ cawˬ ahˇ-awˇ, baꞈ pu-ahˇ baꞈ-euˬ meh.

¹⁶“Leˬbiˇ tsawˇ haˬ gʼawˬ mya ni, deuˇ-mˬ diˬ, cehˇ lehˇ ciˆ-awˇ, laˬ kʼaˬ tiˬ cehˇ caˇ dawˬ bi caˇ-awˬ” lehˇ, aˬ yuiꞈ aˬ tsu kʼoeˇ deuˬ-ahˇ Daˬbiˇ dawˬ biꞈ-euˬ meh.

¹⁷Caˇ dawˬ nya-eu aˇ jeuˬ deuˬ laꞈ kʼoeˇ, cehˇ lehˇ bi ciˆ-eu gʼaˇ duˬ, tsawˇ haˬ heu deuˬ-ahˇ aˬ yawꞈ maꞈ tseˇ doˆ-euˬ meh. Yawˇlaˆ-euˬ aˬ li Heˬmaˬ, aˬ yawꞈ-euˬ aˬ yuiꞈ aˬ nyiˇ pyeuꞈ-eu Beˬleˬkiˇ-euˬ aˬ li Aˬsaˆ, Kuˇshaˬyaˆ-euˬ aˬ li Eˇdaˬ aˬ ha maꞈ meh. Aˬ yawꞈ maꞈ-ahˇ bi caw ba-eu gʼaˇ duˬ, deuˇ-mˬ teˇ saˇ yaw gʼahˇ jeˬ diˬ-eu Leˬbiˇ tsawˇ haˬ deuˬ-ahˇ tseˇ doˆ-euˬ meh. Zaˬkaˬliˇ, Yaˬzeˬlaˇ, Sheˬmiˇlaˬmoˇ, Yeˬheˬlaˆ, Uˇniˬ, Eˇliˇbaˆ, Mawˇseˬyaˇ, Baˬnaˇyaˬ aˬ ha maꞈ-ahˇ tseˇ doˆ-euˬ meh. Deuˇ-mˬ teˇ saˇ yaw nahˬ jeˬ diˬ-eu gʼaˇ duˬ, aˬ yawꞈ maꞈ neh tseˇ doˆ-euˬ Leˬbiˇ tsawˇ haˬ deuˬ-aˬ, Maˬtiˇdiˇ, Eˇliˇpeˬleˬhuˇ, Miˇkaˬneˬyaˆ, Aˬzaˬziˇ aˬ ha maꞈ hawˇ-eu, Uˬ duˬ tahˬ nymˇ nymˇ ma-ahˇ loꞈ piˇ-eu deuˬ meh.

²²Sheˬnaˬniˇyaˆ-aˬ, caˇ dawˬ caˇ-eu paw nya dui dui-eu miˇ neh, caˇ dawˬ caˇ-eu Leˬbiˇ tsawˇ haˬ deuˬ kʼoeˇ taˆ, aˬ yawꞈ-ahˇ aˬ yuiꞈ bi geuꞈ-euˬ meh.

²³Beˬleˬkiˇ hawˇ-eu Eˇlaˬkaˬnaˬ aˬ nyaꞈ-ahˇ, AwˇbehˆEˬdoˬ hawˇ-eu Yeˬhiˇyaˬ nehˬ-ehˇ tiˬ kawˆ loꞈ-ehˇ, Dawˬ ma saˇ jaˇ Bahˬ keuˆ-ahˇ bi loꞈ-eu gʼaˇ duˬ tseˇ doˆ-euˬ meh. Piˇ ma deuˬ pyeuꞈ-eu Sheˬbaˬniˇ, Yoˇshaˬpaˇ, Naˬdaˬneˬlaˇ, Aˬmaˬsehˇ, Zaˬkaˬliˇ, Baˬnaˇyaˬ, Eˇliˇzaˬ aˬ ha maꞈ-ahˇ, Dawˬ ma saˇ jaˇ Bahˬ keuˆ mehˬ shi daˇ heh bi baw-eu gʼaˇ duˬ tseˇ doˆ-euˬ meh.

²⁵Kʼoeˇ naˇ, sahˬ paˬ Daˬbiˇ hawˇ-eu, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ, guiˇ deuˆ-eu paw aˬ yuiꞈ geuꞈ-eu deuˬ gʼeh-awˇ, Dawˬ ma saˇ jaˇ Bahˬ keuˆ baꞈ kʼoꞈ laˬ-iˇ-eu gʼaˇ duˬ Awˇbehˆeˬdoˬ-euˬ nymˇ-ahˇ iˇ-awˇ, bawˬ-iˬ gʼeh-euˬ meh.

²⁶Dawˬ ma saˇ jaˇ Bahˬ keuˆ baꞈ-eu Leˬbiˇ tsawˇ haˬ deuˬ-ahˇ Miˬyehˇ ngehˬ gʼeh nehˬ laꞈ ni , mawˇ neˇ mawˇ gaw shiꞈ mawˇ hawˇ-eu yawˇ shiꞈ mawˇ aˬ yawꞈ maꞈ lawˇ-euˬ meh.

²⁷Daˬbiˇ-aˬ, shawˇ jehˆ ni gʼeh-eu saˬ paˇ paˇ pyuˇ neh guꞈ taˬ-euˬ muiˬ dui dui-eu pehˇ kʼahˬ pehˇ mahˇ dm-awˇ, caˇ dawˬ caˇ-eu deuˬ maˬ ehˇ, aˬ yawꞈ maꞈ kʼoeˇ taˆ aˬ yuiꞈ geuꞈ-eu Sheˬnaˬniˇyaˆ maˬ ehˇ, Dawˬ ma saˇ jaˇ Bahˬ keuˆ baꞈ-eu Leˬbiˇ tsawˇ haˬ deuˬ maˬ ehˇ, kʼoeˇ loꞈ-ehˇ dm luꞈ-eu meh. Daˬbiˇ-aˬ, pehˇ kʼahˬ pehˇ nymˇ tiˬ kahˇ kʼawꞈ dm luꞈ-eu meh.

²⁸Iˇsaˬleˬlaˆ tsawˇ haˬ dawˬ tawˆ luꞈ, daˇ heh baw, coiˇ doi baw, cehˇ lehˇ ciˆ-awˇ deuˇ-mˬ diˬ-euˬ laꞈ kʼoeˇ, laˬ kʼaˬ cehˇ-awˇ guˇ guˇ-ehˇ, Dawˬ ma saˇ jaˇ Bahˬ keuˆ mehˬ nah caw teh-euˬ meh.

²⁹Dawˬ ma saˇ jaˇ Bahˬ keuˆ-ahˇ Yeˬluˇsaˬlehˬ meuˬ laꞈ kʼoeˇ baꞈ ahˇ laꞈ ngeh, Sawˇluˆ-euˬ aˬ buˇ Miˇkaˬlaˇ gʼaˬ, laˇ gʼoˆ gʼoˆ zaˬ-ahˇ neh haw ka gʼeh-awˇ, sahˬ paˬ Daˬbiˇ gaˇ nyeh nyeh-ehˇ tsawˬ luꞈ gaˇ ya mawˇ-awˇ, haw bye dui dui-euˬ meh.