Read Akha 1 Laˬsaˬbaˬ 16 Bible Online

1 Laˬsaˬbaˬ 16 - Akha bible

1 Laˬsaˬbaˬ 16

¹Aˬ yawꞈ maꞈ Dawˬ ma saˇ jaˇ Bahˬ keuˆ kʼoeˇ baꞈ ahˇ laꞈ-awˇ, Daˬbiˇ neh gʼawˆ taˬ-euˬ sehˬ gʼawˆ laꞈ kʼoeˇ baꞈ taˬ-euˬ meh. Kʼoeˇ naˇ, miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ, Sahˬpaˬ Miˬyehˇ -ahˇ lawˇ nehˬ-euˬ meh.

²Daˬbiˇ lawˇ gʼaˬ shehˇ gʼaˬ ngeh, Sahˬpaˬ Miˬyehˇ-euˬ tsawˇ myahˇ uˬ moˆ, tsawˇ haˬ aˇ maꞈ-ahˇ aˬ yawꞈ dawˬ ngehˬ gʼeh nehˬ-euˬ meh.

³Kʼoeˇ naˇ, aˬ yawꞈ maꞈ dawˬ tawˆ luꞈ-ahˇ, aˬ yawꞈ dzaˬ dzaˬ dawˇ dawˇ biˇ nehˬ-euˬ meh. Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu kʼaˬ dzeˇ zaˬ zaˬ miˬ zaˬ yawˬ gʼaˬ na luꞈ-ahˇ, kaˬ muˇ tiˬ siˬ, tehˬ ba jaꞈ-euˬ shaˬ jiˇ tiˬ jehꞈ hawˇ-eu, lawꞈ koˆ taˬ-euˬ aˬ gaꞈ aˇ siˬ ui cuiˆ aˬ yawꞈ biꞈ nehˬ-euˬ meh.

⁴Dawˬ ma saˇ jaˇ Bahˬ keuˆ mehˬ shi caˇ dawˬ caˇ-awˇ ja ceuˬ-eu laꞈ kʼoeˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ gaˇ sheuˬ gʼeh-eu gʼaˇ duˬ, Leˬbiˇ tsawˇ haˬ tiˬ paˆ na deuˬ-ahˇ Daˬbiˇ gaˇ biꞈ nehˬ-euˬ meh.

⁵Aˬsaˆ-ahˇ aˬ yuiꞈ bi geuꞈ-awˇ, Zaˬkaˬliˇ bi caw ba-euˬ meh. Yeˬyeˬlaˇ, Sheˬmiˇlaˬmoˇ, Yeˬheˬlaˇ, Maˬtiˇdiˇ, Eˇliˇbaˆ, Baˬnaˇyaˬ, Awˇbehˆeˬdoˬ, Yeˬyeˬlaˇ aˬ ha maꞈ-ahˇ deuˇ-mˬ bi diˬ-euˬ meh. Aˬsaˆ gʼaˬ-aˬ cehˇ lehˇ ciˆ-euˬ meh.

⁶Piˇma Baˬnaˇyaˬ hawˇ-eu piˇ ma Yaˬhaˬzeˬlaˇ aˬ nyaꞈ-aˬ, Dawˬ ma saˇ jaˇ Bahˬ keuˆ mehˬ shi aˇ yamˬ tsaˬ tsaˬ ni daˇ heh ya baw-eu meh.

⁷Kʼoeˇ ngeh nah, Aˬsaˆ hawˇ-eu aˬ yawꞈ-euˬ tsawˇ jeuˬ Leˬbiˇ tsawˇ haˬ kʼoeˇ deuˬ-ahˇ, Daˬbiˇ neh Sahˬpaˬ Miˬyehˇ-ahˇ ja ceuˬ-eu caˇ dawˬ bi caˇ beh beh-euˬ meh.

⁸Sahˬpaˬ Miˬyehˇ-euˬ guiˬ lahˬ-ahˇ, laˬ kʼaˬ tiˬ cehˇ ja ceuˬ kaˇ-euˇ. Aˬ yawꞈ huiˬ dui mahˇ dui dui gaˇ, aˬ dui ciˬ huiˬ ciˬ mahˇ kaˇ-euˇ. Yawꞈ neh mˇ-euˬ gaˇ deuˬ gaˇ kawˆ , tsawˇ jeuˬ dawˬ tawˆ-ahˇ dzawˇ nehˬ yawˬ.

⁹Aˬ dui-euˬ Sahˬpaˬ Miˬyehˇ-ahˇ, caˇ dawˬ caˇ-awˇ ja ceuˬ nehˬ-awˬ. Yawꞈ neh mˇ-euˬ kʼaˆ-eu gaˇ deuˬ aˬ cawˬ-ahˇ dzawˇ mehˬ nehˬ kaˇ-euˇ.

¹⁰Aˬ dui yawꞈ-euˬ tsawˇ haˬ pyeuꞈ-eu, laˬ kʼaˬ cehˇ-awˇ nui kʼahˇ shiˇ-awˬ. Yawꞈ-ahˇ uˬ duˬ kʼaˇ tahˬ-eu deuˬ, laˬ kʼaˬ cehˇ-awˇ nui kʼahˇ shiˇ-awˬ.

¹¹Sahˬpaˬ Miˬyehˇ-ahˇ tahˬ shaˇ-awˇ, uˬ duˬ tahˬ-eu taˬ bi tsehˆ leˇ.

¹²Miˬyehˇ-euˬ zaˬ kʼaˆ geuꞈ yaꞈ-euˬ, aˬ da Yaˬkoˆ-euˬ zaˬ deuˬ-oˇ, Miˬyehˇ tseˇ doˆ-euˬ gʼaˬ pyeuꞈ-eu, Iˇsaˬleˬlaˆ-euˬ zaˬ deuˬ-oˇ, Miˬyehˇ mˇ-euˬ kʼaˆ-eu gaˇ deuˬ, Miˬyehˇ yaˇ kʼaˬ daˇ dzeuˇ-euˬ deuˬ, maˬ ngehˇ ni noeˬ taˬ juiˇ taˬ yawˬ.

¹³

¹⁴Aˬ dui-euˬ Sahˬpaˬ Miˬyehˇ-aˬ, aˬ dui Miˬyehˇ maˇ maˇ ni ma. Aˬ yawꞈ neh ngehˬ-euˬ dawˬ deuˬ-aˬ, miˇ tsaˬ dawˬ tawˆ luꞈ gʼaˇ duˬ meh.

¹⁵Mˬ maˬ maˬ byaˆ zaˇ ziˇ ziꞈ ni, Miˬyehˇ dzaˬ-euˬ dawˬ ma saˇ jaˇ, aˬ dui tiˬ jawˇ-iˬ taˬ paˇ ngehˇ.

¹⁶Aˬbyaˬhaˬ-ahˇ dzaˬ-euˬ saˇ jaˇ, Iˇtsaˆ-ahˇ biꞈ-euˬ saˇ jaˇ kʼoeˇ, mˬ maˬ maˬ byaˆ zaˇ ziˇ taˬ ngehˇ.

¹⁷Mˬ maˬ maˬ byaˆ ziꞈ-euˬ saˇ jaˇ, Yaˬkoˆ hawˇ-eu Sahˬpaˬ Miˬyehˇ, dzaˬ taꞈ yaꞈ-euˬ jaˆ luꞈ-eu meh.

¹⁸“Kaˬnaˬ miˇ kʼahˬ nawˬ-ahˇ biꞈ-awˇ, nawˬ-euˬ bi pyeuꞈ tsehˆ-euˬ ma” lehˇ, dzaˬ taˬ-euˬ saˇ jaˇ jaˆ-eu meh.

¹⁹Miˬyehˇ tsawˇ jeuˬ tsawˇ haˬ cuiˆ-awˇ, Kaˬnaˬ miˇ kʼahˬ heu kʼahˬ laꞈ kʼoeˇ, boeˇ miˬ siˬ kʼaˬ pyeuꞈ luꞈ-eu meh.

²⁰Yawꞈ maꞈ miˇ kʼahˬ cah doe laꞈ-awˇ, tsawˇ jeuˬ tahˬ puˬ dehˆ laꞈ-euˬ meh.

²¹Aˬ cawˬ yehˬ bawˬ-ehˇ maˬ gʼeh-ehˇ, sahˬ paˬ deuˬ neh maˬ bi kʼehˬ ni, Miˬyehˇ neh laˆ tsoeˬ taˬ-euˬ meh.

²²“Ngaˇ tseˇ doˆ-euˬ zaˬ kʼaˆ deuˬ-ahˇ naw maꞈ tiˬ gʼaˬ-iˬ taˬ laˆ ciˆ. Ngaˬ-euˬ dawˬ ngehˬ dah-eu deuˬ-ahˇ, tiˬ gʼaˬ-iˬ taˬ laˆ ciˆ leˇ” lehˇ, Miˬyehˇ neh ehˇ tsehˆ taˬ-euˬ meh.

²³Miˇ tsaˬ tsawˇ haˬ dawˬ tawˆ caˇ-awˇ, Sahˬpaˬ Miˬyehˇ-ahˇ ja ceuˬ yawˬ. Ka kʼoꞈ nehˬ laꞈ-euˬ guiˬ lahˬ dawˬ, yawˬ nah yawˬ na luꞈ dzawˇ gaˬ yawˬ.

²⁴Yawꞈ-euˬ yaw shehꞈ kʼahˬ sehˇ huiˬ-eu, tsawˇ jeuˬ dawˬ tawˆ-ahˇ dzawˇ nehˬ-awˇ, Yawꞈ neh mˇ-euˬ huiˬ-eu gaˇ deuˬ, tsawˇ haˬ dawˬ tawˆ-ahˇ ja mehˬ yawˬ.

²⁵Sahˬpaˬ Miˬyehˇ huiˬ gaˇ mahˇ gaˇ, ja ceuˬ dui dui paˬ-ehˇ gʼeh meh. Miˬyehˇ dawˬ tawˆ luꞈ naˆ maˬ tseˇ, yawꞈ-ahˇ taˬ huiˬ nehˬ-eu tsaˬ meh.

²⁶Aˬ cawˬ tsawˇ jeuˬ-euˬ miˬ yehˇ deuˬ, tahˬ pahˬ aˬ ma mawˇ kawˇ tehꞈ meh. Ehˇ kʼawꞈ, aˬ dui Sahˬpaˬ Miˬyehˇ, mˬ beh beh-euˬ mˬ sahˇ gʼaˬ meh.

²⁷Huiˬ-eu yaw shehꞈ kʼahˬ sehˇ dawˬ tawˆ, yawꞈ-euˬ dawˬ peh tiˬ jawˬ jaˆ-awˇ, yawꞈ-euˬ Uˬ duˬ tahˬ nymˇ nymˇ ma, baoˬ, laˬ kʼaˬ cehˇ-eu jeˬ byah meh.

²⁸Miˇ tsaˬ tsawˇ haˬ zaˬ dawˬ tawˆ luꞈ, Sahˬpaˬ Miˬyehˇ-ahˇ ja ceuˬ yawˬ. Yawꞈ-euˬ yaw shehꞈ kʼahˬ sehˇ baoˬ-ahˇ, dawˬ tawˆ luꞈ tuˇ-awˇ ja ceuˬ yawˬ.

²⁹Yaw shehꞈ kʼahˬ sehˇ huiˬ dui dui-eu, yawꞈ-euˬ tsawˇ myahˇ-ahˇ ja ceuˬ yawˬ. Uˬ duˬ tahˬ nymˇ nymˇ ma laꞈ kʼoeˇ lawˇ-eu shehˇ-eu jeˬ yuˇ laꞈ yawˬ. Muiˬ-eu shawˇ-eu Sahˬpaˬ Miˬyehˇ zaꞈ le gaˇ awˆ byaˆ-awˇ laˇ yawꞈ.

³⁰Miˇ tsaˬ zaˬ dawˬ tawˆ dawˬ lawˆ luꞈ, aˬ yawꞈ mehˬ shi yaw dzuˬ dzuˬ yawˬ. Miˇ tsaˬ ziꞈ dah ni ciˬ ziꞈ-awˇ, maˬ luˆ laˇ ni yawꞈ jahˇ-euˬ meh.

³¹Mˬ hawˇ-eu miˇ laˬ kʼaˬ cehˇ yawˬ. Sahˬpaˬ Miˬyehˇ sahˬ paˬ meh lehˇ, tsawˇ jeuˬ dawˬ tawˆ-ahˇ dzawˇ nehˬ yawˬ.

³²Laˆ shaˆ hawˇ-eu laˆ shaˆ zaˬ deuˬ dawˬ tawˆ luꞈ yaw kʼaˆ-ehˇ guˇ yawˬ. Miˇ maˬ hawˇ-eu miˇ ma zaˬ deuˬ dawˬ tawˆ luꞈ laˬ kʼaˬ caw cehˇ yawˬ.

³³Miˇ tsaˬ-ahˇ yawꞈ uˆ lahˇ le ngeh, sahˬ lahˬ aˇ bawˇ dawˬ tawˆ luꞈ kʼawꞈ, Sahˬpaˬ Miˬyehˇ jawˇ-eu mehˬ shi, laˬ kʼaˬ cehˇ-awˇ guˇ laˇ tehꞈ-a.

³⁴Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ muiˬ dui dui-eu gʼaˬ meh. Aˬ yawꞈ-euˬ gʼoeˇ-eu gaˬ-eu jeˬ, mˬ maˬ maˬ byaˆ zaˇ ziˇ ziꞈ meh.

³⁵Nga maꞈ-ahˇ ka kʼoꞈ-eu Miˬyehˇ, nga maꞈ-ahˇ ka kʼoꞈ nehˬ laꞈ-awˬ. Nga maꞈ-ahˇ tiˬ gaˇ sheuˬ uiˬ-awˇ, aˬ cawˬ tsawˇ jeuˬ aˬ laꞈ laꞈ kʼoeˇ, nga maꞈ-ahˇ ka kʼoꞈ nehˬ laꞈ-awˬ. “Nga maꞈ nawˬ-ahˇ guiˬ lahˬ huiˬ-awˇ, nawˬ-euˬ muiˬ-eu shawˇ-eu tsawˇ myahˇ, ja ceuˬ ma” lehˇ yawꞈ-ahˇ ehˇ yawˬ.

³⁶Iˇsaˬleˬlaˆ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ yawˬ. Mˬ maˬ maˬ byaˆ zaˇ ziˇ jiˇ ni yawꞈ-ahˇ maˬ byehˇ ni ja ceuˬ yawˬ. Kʼoeˇ naˇ, tsawˇ haˬ dawˬ tawˆ luꞈ “Aˬmiˬ” lehˇ ehˇ-awˇ, Sahˬpaˬ Miˬyehˇ-ahˇ ja ceuˬ-euˬ meh.

³⁷Sahˬ paˬ Daˬbiˇ-aˬ, Aˬsaˆ hawˇ-eu aˬ yawꞈ-euˬ cawˬ Leˬbiˇ tsawˇ haˬ deuˬ-ahˇ, Dawˬ ma saˇ jaˇ Bahˬ keuˆ jaˆ-eu jawˇ duˬ-ahˇ uˬ duˬ tahˬ ngeh, aˬ myah luꞈ aˬ yuiꞈ geuꞈ-awˇ sheuˬ gʼeh-eu gaˇ biꞈ nehˬ-euˬ meh. Aˬ yawꞈ maꞈ yawˬ nah na luꞈ, kʼoeˇ gaˇ yawˬ ha-euˬ gaˇ ya mˇ-eu meh.

³⁸Yeˬduˇdoˬ-euˬ aˬ li AwˇbehˆEˬdoˬ hawˇ-eu aˬ yawꞈ-eu aˇ jeuˬ koꞈ tseˇ yehꞈ gʼaˬ, aˬ yawꞈ maꞈ-ahˇ bi caw ba-euˬ meh. Hawˇsaˬ hawˇ-eu AwˇbehˆEˬdoˬ aˬ nyaꞈ-aˬ, gʼoˆ kʼehˬ-ahˇ loꞈ-eu gaˇ mˇ-euˬ meh.

³⁹Piˇ ma Zaˬdoˆ hawˇ-eu aˬ yawꞈ-euˬ cawˬ piˇ ma deuˬ-aˬ, Giˇbyoˬ meuˬ-ahˇ jaˆ-eu uˬ duˬ tahˬ-eu jawˇ duˬ-ahˇ, Sahˬpaˬ Miˬyehˇ-ahˇ uˬ duˬ tahˬ gaˇ sheuˬ gʼeh-euˬ meh.

⁴⁰Sahˬpaˬ Miˬyehˇ neh Iˇsaˬleˬlaˆ tsawˇ jeuˬ-ahˇ biꞈ taˬ-euˬ zahˇ dawˬ kʼoꞈ dawˬ laꞈ kʼoeˇ kʼaˇ boꞈ taˬ-euˬ loꞈ-ehˇ, yawˬ shawˬ yawˬ miˇ na luꞈ, mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ aˬ yawꞈ maꞈ ya lawˇ-eu meh.

⁴¹Mˬ maˬ maˬ byaˆ zaˇ ziˇ ziꞈ-eu Sahˬpaˬ Miˬyehˇ-euˬ gʼoeˇ-eu gaˬ-eu jeˬ baˬ da neh, aˬ yawꞈ-ahˇ ja ceuˬ-eu caˇ dawˬ caˇ-eu gʼaˇ duˬ tseˇ doˆ taˬ-euˬ deuˬ pyeuꞈ-eu, Heˬmaˬ, Yeˬduˇdoˬ aˬ nyaꞈ hawˇ-eu nui deuˬ kʼawꞈ, aˬ yawꞈ maꞈ nehˬ-ehˇ kʼoeˇ gaˇ jawˇ-eu meh.

⁴²Heˬmaˬ hawˇ-eu Yeˬduˇdoˬ aˬ nyaꞈ-aˬ, ja ceuˬ-eu caˇ dawˬ caˇ gaˇ zmˬ-eu keu ka deuˬ pyeuꞈ-eu, daˇ heh, cehˇ lehˇ hawˇ-eu, keu ka nui deuˬ-ahˇ ya haw ya pyaˆ-eu meh. Yeˬduˇdoˬ-euˬ aˇ jeuˬ aˇ ca deuˬ-aˬ, gʼoˆ kʼehˬ-ahˇ loꞈ-eu gaˇ mˇ-euˬ meh.

⁴³Kʼoeˇ naˇ, tsawˇ haˬ yawˬ gʼaˬ na luꞈ gʼoꞈ-iˇ jiˇ-euˬ meh. Daˬbiˇ gʼeh gʼoꞈ-iˇ-awˇ, aˬ yawꞈ-euˬ nymˇ jiˇ laꞈ kʼoeˇ tiˬ kʼehˬ gʼoꞈ jawˇ-iˇ-euˬ meh.