Read Akha 1 Laˬsaˬbaˬ 19 Bible Online

1 Laˬsaˬbaˬ 19 - Akha bible

1 Laˬsaˬbaˬ 19

¹Aˇ yamˬ ui cuiˆ myahˇ laˇ ngeh jawˇ, Aˬmoˬ sahˬ paˬ Naˬhaˆ shiˇ-awˇ, aˬ yawꞈ-euˬ aˬ li Haˬnuˬ sahˬ paˬ pyeuꞈ laˇ-euˬ meh.

²Kʼoeˇ ngeh, “Aˬ yawꞈ-euˬ aˬ da Naˬhaˆ ngaˬ-ahˇ saˇ jaˇ ziꞈ-euˬ loꞈ-ehˇ, ngaˇ kʼawꞈ Haˬnuˬ-ahˇ saˇ jaˇ ziꞈ-eu laꞈ kʼoeˇ cawˬ cawˬ taꞈ ma” lehˇ, sahˬ paˬ Daˬbiˇ ehˇ-eu meh. Kʼoeˇ naˇ, sahˬ paˬ Naˬhaˇ shiˇ-euˬ gaˇ kawˆ-ahˇ aˬ yawꞈ kʼawꞈ noeˬ shaˬ-eu gaˇ kawˆ bi tsaꞈ gaˬ-iˇ-eu gʼaˇ duˬ, Daˬbiˇ tsawˇ haˬ pyehˬ gʼeh-euˬ meh. Ehˇ kʼawꞈ, aˬ yawꞈ-euˬ tsawˇ haˬ kʼoeˇ deuˬ Aˬmoˬ miˇ kʼahˬ-ahˇ iˇ keuˆ-awˇ, sahˬ paˬ Haˬnuˬ-ahˇ tahˬ puˬ-iˇ ngeh,

³Aˬmoˬ tsawˇ haˬ aˬ yuiꞈ aˬ tsu deuˬ, aˬ yawꞈ maꞈ-euˬ sahˬ paˬ-ahˇ heu loꞈ-ehˇ ehˇ nehˬ-euˬ meh. “Nawˬ da shiˇ-euˬ miˇ neh nui ma maˬ saˇ-eu gaˇ kawˆ bi tsaꞈ gaˬ le-eu gʼaˇ duˬ, tsawˇ haˬ heu deuˬ-ahˇ Daˬbiˇ pyehˬ gʼeh leꞈ-euˬ nga lehˇ nawˇ noeˬ te loˇ. Kʼoeˇ loꞈ-ehˇ maˬ ngeuˇ-a. Aˬ yawꞈ aˬ dui-ahˇ guiˇ deuˆ gʼaˬ nya ni, miˇ kʼahˬ heu kʼahˬ gaˇ kawˆ bi kʼoeˬ sho haw le-eu gʼaˇ duˬ tsawˇ haˬ pyehˬ gʼeh leꞈ-euˬ meh.”

⁴Daˬbiˇ neh pyehˬ gʼeh-euˬ tsawˇ haˬ kʼoeˇ deuˬ-ahˇ Haˬnuˬ nyehꞈ-awˇ, mehˬ mahˬ jehˆ dzeh nehˬ-euˬ uˬ taꞈ, aˬ yawꞈ maꞈ-euˬ pehˇ kʼahˬ daˇ tsuiꞈ-ahˇ keuˆ ni pyehˆ tsehˆ nehˬ-awˇ, pyehˬ kʼoꞈ gʼeh-euˬ meh.

⁵Tsawˇ haˬ kʼoeˇ deuˬ shaꞈ dawˇ dui dui-eu miˇ neh, iˇ kahˇ-ahˇ maˬ gʼoꞈ keuˆ leˇ saˇ-a. Gaˇ kawˆ kʼoeˇ Daˬbiˇ ya gaˬ ngeh, aˬ yawꞈ maꞈ-euˬ mehˬ mahˬ maˬ mahˇ laˇ kʼoeˇ keuˆ ni, iˇ kahˇ maˬ gʼoꞈ laˇ ni Yeˬliˇkoˇ meuˬ-ahˇ jawˇ tawˬ-eu gʼaˇ duˬ bi tsaꞈ gaˬ-iˇ-euˬ meh.

⁶Sahˬ paˬ Haˬnuˬ hawˇ-eu Aˬmoˬ tsawˇ haˬ deuˬ-aˬ, aˬ yawꞈ maꞈ kʼoeˇ loꞈ-ehˇ mˇ-euˬ miˇ neh, Daˬbiˇ aˬ yawꞈ maꞈ-ahˇ muiˇ tehꞈ-a lehˇ noeˬ siˬ-awˇ, Maˬsoˬpoˬtaˬmiˇ miˇ kʼahˬ laꞈ taˆ dzaˬ hawˇ-eu, Zoˇbaˬ miˇ kʼahˬ, Mawˇkah miˇ kʼahˬ heu deuˬ-euˬ mahˬ laˆ lawˬ deuˬ hawˇ-eu, mahˬ laˆ lawˬ teh-eu yehˇ deuˬ aˬ yawꞈ-ahˇ bi caw ba le-eu gʼaˇ duˬ, pyuˇ nyiˬ muiˇ oeˬ heˇ jawꞈ-i ehˇ gʼaˬ ni biꞈ-euˬ meh.

⁷Aˬ yawꞈ maꞈ neh shaˇ ngaˬ taˬ-euˬ mahˬ laˆ lawˬ smˬ muiˇ nyiˬ heˇ laˇ hawˇ-eu, Mawˇkah sahˬ paˬ-euˬ guiˇ maꞈ oe-awˇ, Meˬdeˬbaˬ meuˬ dawˬ peh taˆ tsoˆ-awˇ jawˇ-euˬ meh. Aˬmoˬ tsawˇ haˬ deuˬ kʼawꞈ, aˬ yawꞈ maꞈ-euˬ meuˬ dawˬ tawˆ luꞈ laꞈ kʼoeˇ neh doˆ le-awˇ, guiˇ deuˆ-eu gʼaˇ duˬ lehˬ hmˬ-awˇ loꞈ luꞈ-eu meh.

⁸Gaˇ kawˆ kʼoeˇ Daˬbiˇ ya gaˬ ngeh, Yoˇbaˬ nehˬ-ehˇ guiˇ maꞈ maꞈ lah ni pyehˬ gʼeh-euˬ meh.

⁹Aˬmoˬ tsawˇ haˬ deuˬ doˆ le-awˇ, aˬ yawꞈ maꞈ-euˬ meuˬ meuˬ ma pyeuꞈ-eu Laˬbah meuˬ-euˬ lahˇ kʼehˬ-ahˇ guiˇ daˬ daˬ-awˇ, aˬ yawꞈ maꞈ-ahˇ caw ba le-euˬ sahˬ paˬ deuˬ deh ga-ahˇ guiˇ daˬ daˬ-euˬ meh.

¹⁰Muiˇ-eu deuˬ aˬ yawꞈ-ahˇ mehˬ shi paw neh maˬ ehˇ, naˇ kʼah paw neh maˬ ehˇ, guiˇ deuˆ-eu lehˇ lehˬ hmˬ taˬ-euˬ gaˇ Yoˇbaˬ ya mawˇ ngeh, nya dui dui-eu Iˇsaˬleˬlaˆ yehˇ deuˬ-ahˇ aˬ yawꞈ tseˇ doˆ-awˇ, Suˇliˆ tsawˇ haˬ deuˬ-ahˇ deuˆ-eu gʼaˇ duˬ bi lehˬ hmˬ-euˬ meh.

¹¹Dzeˇ-eu yehˇ deuˬ-ahˇ aˬ yawꞈ-euˬ aˬ nyiˇ Aˬbiˇshaiˇ gʼaˬ aˬ yuiꞈ bi geuꞈ-awˇ, Aˬmoˬ tsawˇ haˬ deuˬ-ahˇ deuˆ-eu gʼaˇ duˬ bi lehˬ hmˬ-euˬ meh.

¹²Yoˇbaˬ aˬ yawꞈ-euˬ aˬ nyiˇ-ahˇ heu loꞈ-ehˇ ehˇ nehˬ-euˬ meh. “Suˇliˆ tsawˇ haˬ deuˬ ngaˬ-ahˇ deuˆ gʼaˬ-eu ya mawˇ naˇ, nawˇ ngaˬ-ahˇ caw ba le-awˬ. Aˬmoˬ tsawˇ haˬ deuˬ nawˬ-ahˇ deuˆ gʼaˬ-eu ya mawˇ naˇ, ngaˇ nawˬ-ahˇ caw ba le ma.

¹³Gʼaˬ maˬ baˬ ni nui ma ziꞈ dah ni taˬ-awˬ. Aˬ dui tsawˇ jeuˬ hawˇ-eu aˬ dui Miˬyehˇ-euˬ meuˬ deuˬ gʼaˇ duˬ guiˇ deuˆ dui dui kaˇ-euˇ. Sahˬpaˬ Miˬyehˇ nui ma tsaˬ-eu jeˬ keuˆ le luꞈ-uˇ.”

¹⁴Yoˇbaˬ hawˇ-eu aˬ yawꞈ-euˬ tsawˇ haˬ deuˬ guiˆ deuˆ-iˇ-eu lehˇ mehˬ hu paw jiˆ peh-iˇ ngeh, Suˇliˆ tsawˇ haˬ deuˬ cehˆ byaˆ jiˇ-euˬ meh.

¹⁵Suˇliˆ tsawˇ haˬ deuˬ cehˆ byaˆ gaˇ Aˬmoˬ tsawˇ haˬ deuˬ ya mawˇ ngeh, Aˬbiˇshaiˇ-ahˇ aˬ yawꞈ maꞈ guiˇ maˬ deuˆ ni, meuˬ laꞈ kʼoeˇ cehˆ gʼoꞈ uˇ leˇ-euˬ meh. Kʼoeˇ naˇ, Yoˇbaˬ Yeˬluˇsaˬlehˬ meuˬ-ahˇ gʼoꞈ leˇ-euˬ meh.

¹⁶Iˇsaˬleˬlaˆ tsawˇ haˬ deuˬ neh aˬ yawꞈ maꞈ-ahˇ guiˇ deuˆ gʼaˬ-euˬ gaˇ kawˆ, Suˇliˆ tsawˇ haˬ deuˬ-ahˇ siˬ leˇ-euˬ meh. Kʼoeˇ miˇ neh, Uˇpaˬlaˇ lawˇ baˬ nahˇ ma doˆ kʼehˬ paw jaˆ-eu miˇ kʼahˬ deuˬ-ahˇ jawˇ-eu yehˇ deuˬ sheuˬ uiˬ laꞈ-awˇ, Zoˇbaˬ sahˬ paˬ Haˬdaˬdeˬzaˬ-euˬ guiˇ maꞈ kʼoeˇ taˆ aˬ yuiꞈ geuꞈ-awˇ uˆ lahˇ-eu gʼaˬ pyeuꞈ-eu Shoˇbaˆ-ahˇ, yehˇ kʼoeˇ deuˬ kʼoeˇ taˆ aˬ yuiꞈ geuꞈ-awˇ bi uˆ lahˇ-euˬ meh.

¹⁷Gaˇ kawˆ kʼoeˇ Daˬbiˇ ya gaˬ ngeh, Iˇsaˬleˬlaˆ yehˇ deuˬ kuˇ uiˬ-awˇ, Yawˇdaˬ lawˇ baˬ tsehˆ doˆ-awˇ, Suˇliˆ tsawˇ haˬ deuˬ-euˬ mehˬ shi guiˇ daˬ daˬ-awˇ, guiˇ deuˆ dahˬ beh-euˬ meh.

¹⁸Kʼoeˇ naˇ, Iˇsaˬleˬlaˆ tsawˇ haˬ deuˬ neh Suˇliˆ guiˇ maꞈ-ahˇ mehˬ nah paw teh kʼoꞈ gʼeh-euˬ meh. Daˬbiˇ hawˇ-eu aˬ yawꞈ-euˬ tsawˇ haˬ deuˬ neh, mahˬ laˆ lawˬ teh-eu Suˇliˆ yehˇ shiꞈ heˇ gʼaˬ hawˇ-eu, kuiˇ zoˬ cah-eu yehˇ oeˬ muiˇ gʼaˬ sehꞈ-euˬ meh. Suˇliˆ guiˇ maꞈ kʼoeˇ taˆ aˬ yuiꞈ geuꞈ-awˇ uˆ lahˇ-eu gʼaˬ pyeuꞈ-eu Shoˇbaˆ-ahˇ gʼeh, sehꞈ-euˬ meh.

¹⁹Haˬdaˬdeˬzaˬ uˆ lahˇ-eu uˬ moˆ jawˇ-eu sahˬ paˬ kʼoeˇ deuˬ, Iˇsaˬleˬlaˆ tsawˇ haˬ deuˬ aˬ yawꞈ maꞈ-ahˇ guiˇ deuˆ gʼaˬ-euˬ gaˇ ya mawˇ ngeh, Daˬbiˇ nehˬ-ehˇ jahˇ tsaˬ geuꞈ-awˇ, aˬ yawꞈ uˆ lahˇ-eu uˬ moˆ jawˇ-euˬ meh. Kʼoeˇ naˇ, Suˇliˆ tsawˇ haˬ deuˬ Aˬmoˬ tsawˇ haˬ deuˬ-ahˇ tiˬ jawˇ-iˬ maˬ paˇ caw ba nehˬ mawꞈ ni pyeuꞈ-iˇ-euˬ meh.