Read Akha 1 Laˬsaˬbaˬ 21 Bible Online

1 Laˬsaˬbaˬ 21 - Akha bible

1 Laˬsaˬbaˬ 21

¹Saˬdaˬ-aˬ, Iˇsaˬleˬlaˆ tsawˇ haˬ deuˬ-ahˇ laˆ bahˬ mawꞈ-eu miˇ neh, miˇ kʼahˬ zaˬ-euˬ tsawˇ seˬ gʼoˆ-eu gʼaˇ duˬ Daˬbiˇ noeˬ tsehˆ laˇ ni jahˇ-euˬ meh.

²Daˬbiˇ-aˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ hawˇ-eu Yoˇbaˬ-ahˇ “Iˇsaˬleˬlaˆ miˇ kʼahˬ heu dzeˇ kʼoeˇ dzeˇ doˆ ni iˇ-awˇ, miˇ kʼahˬ zaˬ-euˬ tsawˇ seˬ gʼoˆ-iˇ-awˬ. Tsawˇ haˬ aˇ myaˆ gʼaˬ jawˇ-eu ngaˇ siˬ mawꞈ nya” lehˇ dawˬ biꞈ-euˬ meh.

³Yoˇbaˬ heu loꞈ-ehˇ ehˇ-eu meh. “Iˇsaˬleˬlaˆ tsawˇ haˬ deuˬ nymˬ-mˇ naˆ maˬ tseˇ tiˬ yaˇ bymˇ paˇ myaˬ dzehˬ laˇ ni, Sahˬpaˬ Miˬyehˇ jahˇ luꞈ-uˇ. Sahˬ paˬ-oˇ, aˬ yawꞈ maꞈ dawˬ tawˆ luꞈ nawˬ-euˬ zaˬ kʼaˆ tehꞈ meh. Tsawˇ jeuˬ tiˬ jeuˬ jeuˬ lah ni kʼoeˇ taˆ iˬ baˇ jaˆ laˇ ni, aˬ jeˬ miˇ neh nawˇ teu loꞈ-ehˇ jahˇ mawꞈ-eu nya.”

⁴Ehˇ kʼawꞈ, sahˬ paˬ-aˬ, Yoˇbaˬ-ahˇ aˬ yawꞈ-euˬ ehˇ dawˬ maˬ naˇ haˬ-ehˇ maˬ juˬ ni jahˇ nehˬ-euˬ meh. Yoˇbaˬ doˆ-iˇ-awˇ, Iˇsaˬleˬlaˆ miˇ kʼahˬ tiˬ kʼahˬ kʼahˬ lah ni cah doe-awˇ, Yeˬluˇsaˬlehˬ meuˬ-ahˇ gʼoꞈ laˇ-euˬ meh.

⁵Iˇsaˬleˬlaˆ miˇ kʼahˬ laꞈ kʼoeˇ, guiˇ deuˆ nya-eu tsawˇ haˬ tseˇ tiꞈ seh jawˇ-awˇ, Yuˇdaˆ miˇ kʼahˬ laꞈ kʼoeˇ kʼawꞈ, guiˇ deuˆ nya-eu tsawˇ haˬ oeˬ seh shiꞈ muiˇ gʼaˬ jawˇ-eu gaˇ kawˆ, sahˬ paˬ Daˬbiˇ-ahˇ aˬ yawꞈ dzawˇ nehˬ leˇ-euˬ meh.

⁶Sahˬ paˬ neh bi mˇ-euˬ gaˇ kʼoeˇ hmˬ-ahˇ Yoˇbaˬ nui ma maˬ tsaˬ-eu baˬ da neh, Leˬbiˇ tsawˇ jeuˬ hawˇ-eu Beˬyaˬmiˬ tsawˇ jeuˬ-ahˇ aˬ yawꞈ tsawˇ seˬ maˬ gʼoˆ ni byehˇ yaꞈ-euˬ meh.

⁷Kʼoeˇ loꞈ-ehˇ miˇ kʼahˬ zaˬ-euˬ tsawˇ seˬ gʼoˆ-euˬ gaˇ, Miˬyehˇ nui ma maˬ tsaˬ-eu miˇ neh, Iˇsaˬleˬlaˆ miˇ kʼahˬ-ahˇ kʼehˬ nehˬ-euˬ meh.

⁸“Ngaˇ kʼoeˇ loꞈ-ehˇ mˇ-euˬ miˇ neh, iˬ baˇ huiˬ dui dui miˇ-a. Ngaˬ-ahˇ iˬ baˇ pyehˬ nehˬ laꞈ-awˬ. Ngaˇ maˬ shaˇ noeˬ ni mˇ dzeuˇ gʼaˬ law hawˇ miˇ-a” lehˇ, Miˬyehˇ-ahˇ Daˬbiˇ ehˇ nehˬ-euˬ meh.

⁹Daˬbiˇ-ahˇ Miˬyehˇ gʼaˇ duˬ ngehˬ dah nehˬ-eu gʼaˬ pyeuꞈ-eu Gaˆ-ahˇ, Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁰“Daˬbiˇ-ahˇ heu loꞈ-ehˇ, ehˇ nehˬ-iˇ-awˬ. Aˬ yawꞈ-ahˇ smˇ jeˬ bi tseˇ geuꞈ ma. Aˬ yawꞈ neh kʼaˇ tseˇ geuꞈ-euˬ jeˬ ngaˇ bi keuˆ ma lehˇ ehˇ nehˬ-iˇ-awˬ.”

¹¹Daˬbiˇ jawˇ gaˇ Gaˆ iˇ-awˇ, Sahˬpaˬ Miˬyehˇ neh kʼaˇ bi ehˇ-euˬ jeˬ dzawˇ nehˬ-awˇ, “Aˬ geu jeˬ tseˇ geuꞈ nmˇ” lehˇ naˇ haˬ-euˬ meh.

¹²“Smˇ kʼoꞈ byah ni mehꞈ-eu shuꞈ-eu jeˬ geuꞈ nmˇ loˇ. Ba la smˇ siˬ byah ni nawˬ-ahˇ muiˇ-eu guiˇ maꞈ deuˬ-euˬ mehˬ shi ya cehˆ byaˆ-eu jeˬ geuꞈ nmˇ loˇ. Maˬ ngeuˇ naˇ, smˬ nah byah ni Sahˬpaˬ Miˬyehˇ-euˬ gʼawˇ mawˇ aˬ yawꞈ-euˬ mi cehˇ yuˇ-awˇ naw maꞈ-ahˇ laˆ luˬ laˆ seˇ nehˬ-eu laꞈ kʼoeˇ, nawˬ-euˬ miˇ kʼahˬ kʼoeˇ taˆ yaw jaw naˇ-eu jeˬ bi keuˆ le-awˇ, aˬ yawꞈ-euˬ mˬ taˆ gʼaˬ kʼehˇ-ahˇ gʼoe-eu laꞈ kʼoeˇ, Iˇsaˬleˬlaˆ miˇ kʼahˬ doe ni tsawˇ shiˇ bi keuˆ le-eu jeˬ geuꞈ nmˇ loˇ. Sahˬpaˬ Miˬyehˇ-ahˇ ngaˇ aˬ joˆ-ehˇ ya ehˇ gaˬ-iˇ nmˇ lehˇ ehˇ nehˬ laꞈ-awˬ.”

¹³Gaˆ-ahˇ Daˬbiˇ ehˇ kʼoꞈ nehˬ-eu, “Ngaˬ-ahˇ zahˬ dui dui miˇ-a. Ehˇ kʼawꞈ, tsawˇ haˬ zaˬ neh bi kʼehˬ-euˬ jeˬ-ahˇ ngaˇ maˬ geuꞈ mawꞈ nya. Kʼehˬ-eu lehˇ ya bi kʼehˬ naˇ, Sahˬpaˬ Miˬyehˇ-aˬ gʼawˬ shaˬ gaˬ nya-eu miˇ neh, aˬ yawꞈ-euˬ mawˇ do ngaˬ-ahˇ kʼehˬ nehˬ laꞈ luꞈ-uˇ.”

¹⁴Kʼoeˇ naˇ, Sahˬpaˬ Miˬyehˇ neh Iˇsaˬleˬlaˆ tsawˇ jeuˬ kʼoeˇ taˆ yaw jaw naˇ-eu naˇ gawˇ bi keuˆ le-awˇ, shiꞈ muiˇ gʼaˬ shiˇ-euˬ meh.

¹⁵Yeˬluˇsaˬlehˬ meuˬ-ahˇ bi laˆ cawˆ-eu gʼaˇ duˬ kʼawꞈ, aˬ yawꞈ-euˬ mˬ taˆ gʼaˬ kʼehˇ tiˬ gʼaˬ pyehˬ gʼeh leꞈ-euˬ meh. Ehˇ kʼawꞈ, aˬ yawꞈ nui ma paˇ laˇ-awˇ, mˬ taˆ gʼaˬ kʼehˇ kʼoeˇ gʼaˬ-ahˇ, “Gʼaˬ-aˇ. Teu naˆ ni naˇ gʼaˬ-aˇ” lehˇ ehˇ nehˬ-euˬ meh. Kʼoeˇ loꞈ-ehˇ ehˇ nehˬ ngeh, mˬ taˆ gʼaˬ kʼehˇ kʼoeˇ gʼaˬ, Yeˬluˇsaˬlehˬ meuˬ dawˬ peh Yeˬbuˇ tsawˇ haˬ Aˬyawˇnaˆ-euˬ cehˇ bymˇ saˬ kʼawꞈ-ahˇ oe keuˆ-awˇ yawꞈ luꞈ-eu meh.

¹⁶Mˬ taˆ gʼaˬ kʼehˇ kʼoeˇ gʼaˬ mi cehˇ tuˆ tehˬ taˬ-awˇ, Yeˬluˇsaˬlehˬ meuˬ-ahˇ laˆ cawˆ nehˬ-eu gʼaˇ duˬ lehˬ hmˬ dah-awˇ, jaˬ lehˇ kʼoeˇ taˆ yawꞈ luꞈ gaˇ Daˬbiˇ ya mawˇ-euˬ meh. Kʼoeˇ ngeh, Daˬbiˇ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ, baˬ ba miˇ tsa tuˆ ni awˆ byaˆ-euˬ meh. Aˬ yawꞈ maꞈ dawˬ tawˆ luꞈ, guˬ daˇ pehˇ zeuˇ mehˬ tsoeˬ dm luꞈ-eu meh.

¹⁷Daˬbiˇ yaw kʼaˆ-ehˇ guˇ-awˇ, heu loꞈ-ehˇ guiˬ lahˬ shaˇ-euˬ meh. “Miˬyehˇ-oˇ, yaw lehˬ jeˬ mˇ-euˬ gʼaˬ ngaˇ ma. Miˇ kʼahˬ zaˬ-euˬ tsawˇ seˬ yuˇ-awˬ lehˇ dawˬ biꞈ-euˬ gʼaˬ ngaˇ ma. Tsawˇ haˬ heu deuˬ mˇ lehˬ taˬ-euˬ tiˬ jeˬ-iˬ maˬjaˆ-a. Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ hawˇ-eu ngaˬ-euˬ nymˇ jiˇ-ahˇ tehꞈ-ehˇ kʼehˬ-awˇ, tsawˇ haˬ heu deuˬ-ahˇ bi dzeuˇ-iˇ-awˬ.”

¹⁸Sahˬpaˬ Miˬyehˇ-euˬ mˬ taˆ gʼaˬ kʼehˇ kʼoeˇ gʼaˬ, Gaˆ-ahˇ ehˇ nehˬ-eu, “Aˬyawˇnaˆ-euˬ cehˇ bymˇ saˬ kʼawꞈ-ahˇ iˇ-awˇ, Sahˬpaˬ Miˬyehˇ-ahˇ lawˇ duˬ tiˬ tsahˇ gawˬ nehˬ-eu gʼaˇ duˬ, Daˬbiˇ-ahˇ dawˬ biꞈ nehˬ-awˬ.”

¹⁹Sahˬpaˬ Miˬyehˇ-euˬ dawˬ-ahˇ Daˬbiˇ naˇ haˬ geuꞈ-awˇ, Gaˆ neh kʼaˇ ehˇ nehˬ-euˬ loꞈ-ehˇ mˇ-euˬ meh.

²⁰Cehˇ bymˇ saˬ kʼawꞈ kʼoeˇ kʼawꞈ-ahˇ, Aˬyawˇnaˆ hawˇ-eu aˬ yawꞈ-euˬ aˬ li oeˬ li cehˇ baw baw luꞈ-awˇ, mˬ taˆ gʼaˬ kʼehˇ kʼoeˇ gʼaˬ-ahˇ aˬ yawꞈ maꞈ ya mawˇ ngeh, aˬ li kʼoeˇ oeˬ li cehˆ zaꞈ-euˬ meh.

²¹Sahˬ paˬ Daˬbiˇ oe luꞈ gaˇ Aˬyawˇnaˆ ya mawˇ-eu nehˬ-ehˇ, cehˇ bymˇ saˬ kʼawꞈ-ahˇ neh doˆ le-awˇ, baˬ ba miˇ tsa tuˆ ni awˆ byaˆ-euˬ meh.

²²Daˬbiˇ ehˇ-eu, “Iˇsaˬleˬlaˆ tsawˇ jeuˬ kʼoeˇ taˆ keuˆ le-euˬ yaw jaw naˇ-eu naˇ gawˇ taˬ leˇ ni, Sahˬpaˬ Miˬyehˇ-ahˇ lawˇ duˬ tiˬ tsahˇ gawˬ nehˬ-eu gʼaˇ duˬ, nawˬ-euˬ cehˇ bymˇ saˬ kʼawꞈ heu tsahˇ ngaˬ-ahˇ ahˬ nehˬ laꞈ-awˬ. Kʼaˇ poeˬ kʼaˇ lawˬ-eu loꞈ-ehˇ tiˬ byah ni biꞈ ma.”

²³Aˬyawˇnaˆ ehˇ-eu, “Sahˬ paˬ-oˇ, cehˇ bymˇ saˬ kʼawꞈ heu nawˇ yuˇ-awˇ, kʼaˇ jahˇ mawꞈ-eu jeˬ jahˇ-awˬ. Lawˇ gaˇ shehˇ gaˇ geuꞈ-eu gʼaˇ duˬ mawˇ neˇ mawˇ gaw deuˬ kʼawꞈ heu gaˇ jawˇ ma. Miˬ dzaˬ dzah puiˆ gaˇ geuꞈ-eu gʼaˇ duˬ cehˇ diˬ gaˇ zmˬ-euˬ daˇ kawˬ deuˬ kʼawꞈ jaˆ ma. Lawˇ-eu gʼaˇ duˬ loˬ-eu cehˇ kʼawꞈ heu gaˇ jaˆ ma. Heu deuˬ dawˬ tawˆ luꞈ, nawˬ-ahˇ ngaˇ biꞈ-eu ma.”

²⁴Ehˇ kʼawꞈ, sahˬ paˬ ehˇ-eu, “Yawꞈ ngehꞈ-ehˇ ngaˇ maˬ yuˇ. Aˇ poeˬ tiˬ byah ni biꞈ ma. Aˇ poeˬ ti pehˆ-iˬ maˬ ya biꞈ-eu nawˬ-euˬ mˇ myawˬ tiˬ jeˬ-iˬ Sahˬpaˬ Miˬyehˇ-ahˇ ngaˇ maˬ lawˇ nehˬ.”

²⁵Kʼoeˇ naˇ, cehˇ bymˇ saˬ kʼawꞈ kʼoeˇ kʼawꞈ gʼaˇ duˬ, shuiˇ maˇ byaˆ koꞈ yaˇ byaˆ Aˬyawˇnaˆ-ahˇ biꞈ-euˬ meh.

²⁶Kʼoeˇ gaˇ, Sahˬpaˬ Miˬyehˇ gʼaˇ duˬ lawˇ duˬ tiˬ tsahˇ aˬ yawꞈ gawˬ-awˇ, miˬ dzaˬ dzah puiˆ-awˇ lawˇ-eu jeˬ hawˇ-eu, cawˬ cawˬ taꞈ-eu lawˇ-eu jeˬ aˬ yawꞈ lawˇ-euˬ meh. Aˬ yawꞈ guiˬ lahˬ shaˇ-awˇ, aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-eu laꞈ kʼoeˇ, mˬ kʼoeˇ taˆ neh miˬ dzaˬ pyehˬ gʼeh leꞈ-awˇ, lawˇ duˬ kʼoeˇ taˆ jaˆ-eu lawˇ-eu jeˬ-ahˇ, miˬ dzaˬ bi doꞈ leˇ-euˬ meh.

²⁷Mˬ taˆ gʼaˬ kʼehˇ kʼoeˇ gʼaˬ-ahˇ, “Mi cehˇ pyehˬ dzeh-awˬ” lehˇ Sahˬpaˬ Miˬyehˇ ehˇ nehˬ ngeh, mˬ taˆ gʼaˬ kʼehˇ kʼoeˇ gʼaˬ mi cehˇ pyehˬ dzeh-euˬ meh.

²⁸Daˬbiˇ kʼoeˇ gaˇ ya mawˇ ngeh, aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ geuꞈ-euˬ gaˇ kawˆ siˬ duˬ-awˇ, Aˬyawˇnaˆ-euˬ cehˇ bymˇ saˬ kʼawꞈ-ahˇ tsoˆ-euˬ lawˇ duˬ kʼoeˇ taˆ, lawˇ-eu shehˇ-eu jeˬ mˇ-euˬ meh.

²⁹Aˇ yamˬ kʼoeˇ yamˬ laꞈ kʼoeˇ, Moˇseˬ neh bawˇ tsahˬ bawˇ dahˇ-ahˇ tsoˆ-euˬ Sahˬpaˬ Miˬyehˇ jawˇ-eu Sehˬ gʼawˆ kʼoeˇ gʼawˆ hawˇ-eu, lawˇ-eu shehˇ-eu jeˬ dzah puiˆ-awˇ lawˇ-eu lawˇ duˬ kʼoeˇ hmˬ, Giˇbyoˬ meuˬ-ahˇ jaˆ-eu uˬ duˬ tahˬ-eu jawˇ duˬ kʼoeˇ tsahˇ-ahˇ jaˆ luꞈ-eu meh.

³⁰Ehˇ kʼawꞈ, Daˬbiˇ kʼoeˇ gaˇ le-awˇ, Miˬyehˇ-ahˇ uˬ duˬ maˬ tahˬ leˇ peuˬ-a. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ mˬ taˆ gʼaˬ kʼehˇ kʼoeˇ gʼaˬ-euˬ mi cehˇ-ahˇ aˬ yawꞈ guˆ-eu meh.