Read Akha 1 Laˬsaˬbaˬ 26 Bible Online

1 Laˬsaˬbaˬ 26 - Akha bible

1 Laˬsaˬbaˬ 26

¹Heu-aˬ, Uˬ duˬ tahˬ nymˇ nymˇ ma-ahˇ loꞈ piˇ-eu Leˬbiˇ tsawˇ haˬ deuˬ-ahˇ biꞈ taˬ-euˬ gaˇ deuˬ meh. Kawˇlaˆ aˇ jeuˬ laꞈ kʼoeˇ, Aˬsaˆ aˇ ca pyeuꞈ-eu Kawˇleˬ-euˬ aˬ li Meˬsheˬleˬmiˇ meh.

²Aˬ yawꞈ-aˬ, Zaˬkaˬliˇ, Yeˬdeˬlaˇ, Zeˬbaˬdiˇ, Yaˬdaˬneˬlaˇ,

³Eˇlamˬ, Yeˬhawˇhaˬnaˬ, Eˇliˆhawˇneˬ lehˇ myahˇ-euˬ aˬ li shiꞈ li jawˇ-eu meh. Aˬ yuiꞈ yuiꞈ saˬ gʼaˬ Zaˬkaˬliˇ pyeuꞈ-awˇ, zaˬ saˬ gʼaˬ Eˇliˆhawˇneˬ meh.

⁴AwˇbehˆEˬdoˬ-ahˇ kʼawꞈ Miˬyehˇ guiˬ lahˬ biꞈ nehˬ-awˇ, aˬ li yehꞈ li bi jawˇ le-euˬ meh. Aˬ yuiꞈ yuiꞈ saˬ gʼaˬ Sheˬmaˇyaˬ, aˬ gʼahˇ gʼaˬ Yeˬhawˇzaˬbaˆ, smˇ gʼaˬ tiˬ gʼaˬ Yoˇaˬ, oeˬ gʼaˬ tiˬ gʼaˬ Saˬkaˬlaˆ, ngaˬ gʼaˬ tiˬ gʼaˬ Naˬdaˬneˬlaˇ,

⁵koꞈ gʼaˬ tiˬ gʼaˬ Aˬmeˬlaˆ, shiꞈ gʼaˬ tiˬ gʼaˬ Iˇsaˬkaˬ, yehꞈ gʼaˬ tiˬ gʼaˬ pyeuꞈ-eu zaˬ saˬ gʼaˬ Pyuˇlaˬdehˇ meh.

⁶Awˇbehˆeˬdoˬ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Sheˬmaˇyaˬ-aˬ, Awˇdaˬniˇ, Yeˬpeˬlaˇ, Awˇbehˆ, Eˇliˇzaˬbaˆ, Eˇliˇhuˆ, Seˬmaˬkiˇ lehˇ myahˇ-euˬ aˬ li koꞈ li jawˇ-eu meh. Aˬ ha mehˇ nmˇ-aˬ, nya dui dui-eu tsawˇ haˬ deuˬ pyeuꞈ-eu miˇ neh, aˬ yawꞈ maꞈ-euˬ aˇ jeuˬ aˇ ca laꞈ kʼoeˇ gaˇ dahˇ tsoeˬ-eu tsawˇ haˬ deuˬ pyeuꞈ-eu meh. Aˇ saˬ saˬ-eu nyiˬ gʼaˬ-aˬ, aˬ cawˬ naˆ maˬ tseˇ bym-eu meh.

⁷

⁸Awˇbehˆeˬdoˬ-euˬ zaˬ deuˬ uˆ deuˬ laꞈ kʼoeˇ, gaˇ heu jeˬ mˇ-eu nya dui dui-eu tsawˇ haˬ koꞈ tseˇ nyiꞈ gʼaˬ byah-eu meh.

⁹Meˬsheˬleˬmiˇ-euˬ zaˬ deuˬ uˆ deuˬ laꞈ kʼoeˇ, gaˇ heu jeˬ mˇ-eu tsawˇ haˬ tseˇ yehꞈ gʼaˬ jawˇ-eu meh.

¹⁰Meˬlaˬliˇ aˇ jeuˬ Hawˇsaˬ-aˬ, aˬ li oeˬ li jawˇ-eu meh. Aˬ li kʼoeˇ deuˬ-aˬ, (aˬ li aˬ yuiꞈ yuiꞈ saˬ gʼaˬ maˬ ngeuˇ kʼawꞈ aˬ da gʼaˬ neh aˬ yuiꞈ ka nehˬ-euˬ) Shiˇmaˬliˇ,

¹¹Hiˇlaˬkiˇ, Teˬbaˬliˇ, Zaˬkaˬliˇ aˬ ha mehˇ nmˇ meh. Hawˇsaˬ-euˬ zaˬ deuˬ uˆ deuˬ laꞈ kʼoeˇ, Uˬ duˬ tahˬ nymˇ nymˇ ma-ahˇ loꞈ piˇ-eu tsawˇ haˬ tseˇ smˇ gʼaˬ jawˇ-eu meh.

¹²Uˬ duˬ tahˬ nymˇ nymˇ ma-ahˇ loꞈ piˇ-eu tsawˇ haˬ deuˬ-ahˇ, yawˬ ha aˇ jeuˬ yawˬ ha aˇ muˇ muˇ nehˬ-awˇ, Leˬbiˇ tsawˇ haˬ nui deuˬ-ahˇ gaˇ biꞈ nehˬ-euˬ loꞈ-ehˇ, aˬ yawꞈ maꞈ-ahˇ kʼawꞈ, Uˬ duˬ tahˬ nymˇ nymˇ ma-ahˇ taꞈ-eu gaˇ biꞈ-euˬ meh.

¹³Aˇ jeuˬ aˇ ca aˬ yawꞈ ca yawꞈ, tsawˇ haˬ yaw myaˬ yaw cuiˆ maˬ haw ni, gʼoˆ kʼehˬ aˬ geu kʼehˬ-ahˇ ya loꞈ-eu shehˆ tsaˬ tsaˬ-awˇ tseˇ duˬ nehˬ-euˬ meh.

¹⁴Sheˬleˬmiˇ-ahˇ nahˇ ma doˆ kʼehˬ paw kʼehˬ doˇ leˇ-awˇ, muiˬ-eu nui noeˬ nui duˇ biꞈ nya-eu gʼaˬ pyeuꞈ-eu aˬ yawꞈ-euˬ aˬ li Zaˬkaˬliˇ-ahˇ, laꞈ taˆ paw kʼehˬ doˇ leˇ-euˬ meh.

¹⁵AwˇbehˆEˬdoˬ-ahˇ laꞈ oˆ paw kʼehˬ doˇ leˇ-awˇ, aˬ yawꞈ-euˬ aˬ li deuˬ-ahˇ mˇ myawˬ keu ka taˬ-eu aˇ lawˆ deuˬ doˇ leˇ-euˬ meh.

¹⁶Shuˇpiˬ hawˇ-eu Hawˇsaˬ-ahˇ, nahˇ ma ga kʼehˬ paw kʼehˬ hawˇ-eu, Uˬ duˬ tahˬ nymˇ nymˇ ma-ahˇ daˆ leˇ-eu gaˇ ma-ahˇ jaˆ-eu Shaˬlehˇshehˆ gʼoˆ kʼehˬ doˇ leˇ-euˬ meh.

¹⁷Aˬ yawꞈ nah yawꞈ nahˇ ma ga kʼehˬ paw koꞈ gʼaˬ, laꞈ taˆ paw oeˬ gʼaˬ hawˇ-eu, mˇ myawˬ keu ka taˬ-eu aˇ lawˆ nyiˬ lawˆ-ahˇ, tiˬ lawˆ-euˬ nyiˬ gʼaˬ ya loꞈ-eu meh.

¹⁸Nahˇ ma ga kʼehˬ paw jaˆ-eu sehˬ gʼawˆ gʼawˆ ma dawˬ peh, gaˇ ma-ahˇ oeˬ gʼaˬ ya loꞈ-awˇ, sehˬ gʼawˆ aˬ yawꞈ-ahˇ nyiˬ gʼaˬ ya loꞈ-eu meh.

¹⁹Heu-aˬ, Kawˇlaˆ aˇ jeuˬ hawˇ-eu Meˬlaˬliˇ aˇ jeuˬ-ahˇ doˇ-eu loꞈ piˇ-eu gaˇ meh.

²⁰Aˬ yawꞈ maꞈ-euˬ tsawˇ jeuˬ pyeuꞈ-eu Leˬbiˇ tsawˇ haˬ nui deuˬ-aˬ, Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ deuˬ hawˇ-eu, Miˬyehˇ-ahˇ damˬ nehˬ-euˬ jeˬ laˆ saˆ jeˬ hmˬ taˬ-eu aˇ lawˆ deuˬ-ahˇ ya haw piˇ-eu meh.

²¹Geˬlaˬshoˬ-euˬ aˬ li tiˬ gʼaˬ pyeuꞈ-eu Laˬdaˬ-aˬ, aˇ jeuˬ aˇ ca gʼawˬ mya ca-euˬ aˬ da yaw dzahˇ pyeuꞈ-eu meh. Kʼoeˇ-euˬ laꞈ kʼoeˇ, aˬ yawꞈ aˬ li Yeˬheˬlaˇ-euˬ aˇ jeuˬ kʼawꞈ ahˇ-eu meh.

²²Laˬdaˬ-euˬ aˬ li Zeˬdamˬ hawˇ-eu Yawˇlaˆ aˬ nyaꞈ nmˇ-aˬ, uˬ duˬ tahˬ nymˇ laꞈ kʼoeˇ jaˆ-eu pyuˇ shuiˇ myawˬ gahˬ deuˬ hawˇ-eu, mˇ myawˬ keu ka taˬ-euˬ aˇ lawˆ deuˬ-ahˇ ya haw piˇ-eu meh.

²³Aˬmaˬlamˬ, Iˇzaˬhaˬ, Heˬbyoˬ, Awˇzeˬlaˇ aˬ ha oeˬ gʼaˬ-euˬ zaˬ deuˬ uˆ deuˬ-ahˇ kʼawꞈ, gaˇ biꞈ nehˬ-euˬ meh.

²⁴Moˇseˬ-euˬ aˬ li Geˬlaˬshmˬ aˇ jeuˬ Sheˬbeuˬlaˇ-aˬ, Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ deuˬ-ahˇ haw piˇ-eu paw, dawˬ tawˆ luꞈ kʼoeˇ taˆ huiˬ dzehˬ-eu aˬ yuiꞈ geuꞈ-euˬ meh.

²⁵Sheˬbeuˬlaˇ-aˬ, Geˬlaˬshmˬ-ahˇ keuˆ ni Sheˬloˇmiˇ nehˬ-ehˇ tsuiꞈ tiˬ gaˇ taꞈ-eu meh. Geˬlaˬshmˬ-ahˇ neh naˇ, Sheˬloˇmiˇ-euˬ tsuiꞈ-aˬ, Geˬlaˬshmˬ, Eˇliˇzaˬ, Leˬhaˬbiˇ, Yeˬshaˬyaˇ, Yawˇlamˬ, Ziˇkaˬliˇ, Sheˬloˇmiˇ lehˇ meh.

²⁶Sheˬloˇmiˇ hawˇ-eu aˬ yawꞈ-euˬ zaˬ deuˬ uˆ deuˬ-aˬ, sahˬ paˬ Daˬbiˇ neh maˬ ehˇ, aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-eu deuˬ neh maˬ ehˇ, guiˇ maꞈ kʼoeˇ taˆ uˆ lahˇ-awˇ aˬ yuiꞈ geuꞈ-eu deuˬ neh maˬ ehˇ, Miˬyehˇ-ahˇ kʼaˇ damˬ nehˬ-euˬ jeˬ dawˬ tawˆ luꞈ-ahˇ jeˬ hmˬ bo saˆ-eu gaˇ ya mˇ-eu meh.

²⁷Guiˇ deuˆ gaˇ deuˆ za leꞈ-euˬ pyuˇ shuiˇ myawˬ gahˬ tiˬ paˆ na deuˬ-ahˇ, Uˬ duˬ tahˬ nymˇ nymˇ ma laꞈ kʼoeˇ bi zmˬ-eu gʼaˇ duˬ damˬ nehˬ-eu meh.

²⁸Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Saˬmeuˬlaˆ neh hehˇ laꞈ-euˬ maˬ ehˇ, sahˬ paˬ Sawˇluˆ neh hehˇ laꞈ-euˬ maˬ ehˇ, Neˬlaˇ-euˬ aˬ li Aˬbaˬnaˬ neh hehˇ laꞈ-euˬ maˬ ehˇ, Zeˬluˇyaˆ-euˬ aˬ li Yoˇbaˬ neh hehˇ laꞈ-euˬ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ bi zmˬ-eu gʼaˇ duˬ kʼaˇ damˬ nehˬ laˇ-euˬ jeˬ dawˬ tawˆ luꞈ-ahˇ, Sheˬloˇmiˇ hawˇ-eu aˬ yawꞈ-euˬ zaˬ deuˬ uˆ deuˬ ya jeˬ hmˬ-eu meh.

²⁹Iˇzaˬhaˬ-euˬ zaˬ deuˬ uˆ deuˬ laꞈ kʼoeˇ, Sheˬnaˬniˇyaˆ hawˇ-eu aˬ yawꞈ-euˬ aˬ li deuˬ-aˬ, jaˇ laˇ boꞈ-eu paw hawˇ-eu, Iˇsaˬleˬlaˆ tsawˇ haˬ yaw kaˬ dawˬ ja doˆ laˇ ngeh ya laˆ tsaˬ nehˬ-eu gaˇ pyeuꞈ-eu, uˆ lahˇ-eu paw taꞈ leˇ-eu saˇ naˇ gaˇ ya mˇ-eu meh.

³⁰Heˬbyoˬ-euˬ zaˬ deuˬ uˆ deuˬ laꞈ kʼoeˇ, Haˬshaˬbiˇ hawˇ-eu, dawˬ tawˆ luꞈ tsawˇ myahˇ doˆ-eu tsawˇ haˬ deuˬ tehꞈ-ehˇ pyeuꞈ-eu aˬ yawꞈ-euˬ aˬ yuiꞈ aˬ nyiˇ tiˬ heˇ shiꞈ yaˇ gʼaˬ-aˬ, Iˇsaˬleˬlaˆ miˇ kʼahˬ Yawˇdaˬ lawˇ baˬ nahˇ ma ga kʼehˬ paw baˬ-ahˇ, uˬ duˬ tahˬ-eu zahˇ sahˇ kʼoꞈ hawˇ-eu miˇ kʼahˬ-ahˇ taꞈ-eu gaˇ kawˆ deuˬ kʼoeˇ taˆ, haw pyaˆ uˆ lahˇ-eu deuˬ geuꞈ-euˬ meh.

³¹Yeˬliˇyaˆ-aˬ, Heˬbyoˬ-euˬ zaˬ deuˬ uˆ deuˬ kʼoeˇ taˆ aˬ yuiꞈ geuꞈ-eu gʼaˬ meh. Daˬbiˇ sahˬ paˬ geuꞈ-euˬ oeˬ tseˇ kʼoꞈ kʼawˆ laˇ-awˇ, Heˬbyoˬ-euˬ zaˬ deuˬ uˆ deuˬ-ahˇ pyehˆ tseˇ haw ngeh, aˇ jeuˬ kʼoeˇ jeuˬ laꞈ kʼoeˇ tsawˇ myahˇ doˆ-eu yehˇ deuˬ, Giˇlaˆ miˇ kʼahˬ Yaˬzeuˬ meuˬ-ahˇ jawˇ luꞈ gaˇ ya mawˇ-euˬ meh.

³²Yeˬliˇyaˆ-euˬ aˬ yuiꞈ aˬ nyiˇ deuˬ laꞈ kʼoeˇ, aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ luꞈ-eu tsawˇ myahˇ doˆ-eu tsawˇ haˬ nyiˬ heˇ shiꞈ yaˇ gʼaˬ-ahˇ sahˬ paˬ Daˬbiˇ neh tseˇ doˆ-awˇ, Yawˇdaˬ lawˇ baˬ nahˇ ma doˆ kʼehˬ paw baˬ-ahˇ jaˆ-eu Iˇsaˬleˬlaˆ miˇ kʼahˬ pyeuꞈ-eu Luˇbeˬ miˇ kʼahˬ, Gaˆ miˇ kʼahˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ-euˬ miˇ kʼahˬ heu deuˬ laꞈ kʼoeˇ, uˬ duˬ tahˬ-eu zahˇ sahˇ kʼoꞈ-ahˇ taꞈ-eu gaˇ deuˬ hawˇ-eu, miˇ kʼahˬ-ahˇ taꞈ-euˬ gaˇ deuˬ kʼoeˇ taˆ haw pyaˆ uˆ lahˇ-eu deuˬ bi geuꞈ-euˬ meh.