Read Akha 1 Laˬsaˬbaˬ 27 Bible Online

1 Laˬsaˬbaˬ 27 - Akha bible

1 Laˬsaˬbaˬ 27

¹Heu-aˬ, Iˇsaˬleˬlaˆ tsawˇ jeuˬ tsawˇ ca aˬ yawꞈ ca yawꞈ kʼoeˇ taˆ aˬ yuiꞈ a tsu geuꞈ-eu deuˬ hawˇ-eu, miˇ kʼahˬ gaˇ paw haw-eu pyaˆ-eu aˬ yawꞈ maꞈ-euˬ yaw huiˬ yaw mahˇ deuˬ-euˬ jaˇ laˇ meh. Tiˬ kʼoꞈ laꞈ kʼoeˇ ba la aˬ yawꞈ siˬ yawꞈ, nyiˬ muiˇ oeˬ heˇ gʼaˬ byah-eu aˇ muˇ tiˬ muˇ, ba la kʼoeˇ siˬ laꞈ kʼoeˇ aˬ yuiꞈ geuꞈ-eu doˇ leˇ-euˬ gʼaˬ-euˬ laꞈ oˆ jawˇ-awˇ gaˇ ya mˇ-eu meh.

²Ba la yaw beh siˬ-ahˇ gaˇ ya mˇ-eu yaw beh muˇ kʼoeˇ taˆ uˆ lahˇ-eu gʼaˬ-aˬ, Zaˬbaˬdeˬlaˇ-euˬ aˬ li Yaˬshawˇbamˬ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

³Aˬ yawꞈ-aˬ, Paˬyehˆ aˇ jeuˬ pyeuꞈ-awˇ ba la yaw beh siˬ laꞈ kʼoeˇ, guiˇ maꞈ deuˬ-ahˇ aˬ yuiꞈ geuꞈ-eu deuˬ dawˬ tawˆ luꞈ kʼoeˇ taˆ, aˬ cawˬ naˆ maˬ tseˇ huiˬ dzehˬ-eu gʼaˬ meh.

⁴Ba la nyiˬ siˬ tiˬ siˬ-ahˇ gaˇ ya mˇ-eu deuˬ kʼoeˇ taˆ aˬ yuiꞈ geuꞈ-eu gʼaˬ-aˬ, Aˬhawˇhiˇ aˇ jeuˬ Doˇdaiˇ meh. Aˬ yawꞈ-euˬ laꞈ oˆ teˬ ni gʼeh-eu gʼaˬ-aˬ, Miˇkaˬlawˆ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

⁵Ba la smˇ siˬ tiˬ siˬ-ahˇ gaˇ ya mˇ-eu aˇ muˇ smˬ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, piˇ ma Yeˬhawˇyaˬdaˬ-euˬ aˬ li Baˬnaˇyaˬ meh. Aˬ yawꞈ aˬ yuiꞈ geuꞈ-eu uˬ moˆ, aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

⁶Baˬnaˇyaˬ heu gʼaˬ-aˬ, Tsawˇ myahˇ doˆ-eu “Yehˇ smˬ tseˇ gʼaˬ” laꞈ kʼoeˇ ahˇ-awˇ, kʼoeˇ smˬ tseˇ gʼaˬ kʼoeˇ taˆ aˬ yuiꞈ geuꞈ-euˬ gʼaˬ meh. Aˬ yawꞈ-euˬ aˬ li Aˬmiˇzaˬbaˆ gʼaˬ, aˬ yawꞈ-euˬ dah zaˇ aˬ yuiꞈ geuꞈ daˆ leꞈ-euˬ meh.

⁷Ba la oeˬ siˬ tiˬ siˬ-ahˇ gaˇ ya mˇ-eu aˇ muˇ oeˬ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Yoˇbaˬ-euˬ aˬ nyiˇ Aˬsaˬheˬlaˇ meh. Aˬ yawꞈ-euˬ aˬ li Zeˬbaˬdiˇ gʼaˬ aˬ yawꞈ-euˬ dah zaˇ aˬ yuiꞈ geuꞈ daˆ leꞈ-euˬ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

⁸Ba la ngaˬ siˬ tiˬ siˬ-ahˇ gaˇ ya mˇ-eu aˇ muˇ ngaˬ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Iˇzaˬhaˬ aˇ jeuˬ Shaˬmuˆ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

⁹Ba la koꞈ siˬ tiˬ siˬ-ahˇ gaˇ ya mˇ-eu aˇ muˇ koꞈ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Teˬkawˬ meuˬ-ahˇ jawˇ-eu Iˇkeˇshaˆ-euˬ aˬ li Iˇyaˬ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹⁰Ba la shiꞈ siˬ tiˬ siˬ-ahˇ gaˇ ya mˇ-eu aˇ muˇ shiꞈ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Peˬloˬ meuˬ-ahˇ jawˇ-eu Eˇpaˬleˬ aˇ jeuˬ Hiˇlehˆ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹¹Ba la yehꞈ siˬ tiˬ siˬ-ahˇ gaˇ ya mˇ-eu aˇ muˇ yehꞈ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Huˇshahˬ meuˬ-ahˇ jawˇ-eu Siˇbeˬkehˇ meh. Aˬ yawꞈ-aˬ, Yuˇdaˆ tsawˇ jeuˬ Zeˬlahˬ aˇ jeuˬ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹²Ba la gʼoeˬ siˬ tiˬ siˬ-ahˇ gaˇ ya mˇ-eu aˇ muˇ gʼoeˬ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Beˬyaˬmiˬ miˇ kʼahˬ Aˬnaˬtawˇ meuˬ-ahˇ jawˇ-eu Aˬbyeˇzaˬ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹³Ba la tseˇ siˬ tiˬ siˬ-ahˇ gaˇ ya mˇ-eu aˇ muˇ tseˇ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Neˬtawˇpaˬ meuˬ-ahˇ jawˇ-eu Zeˬlahˬ aˇ jeuˬ Maˬhaˬlai meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹⁴Ba la tseˇ tiꞈ siˬ tiˬ siˬ-ahˇ gaˇ ya mˇ-eu aˇ muˇ tseˇ tiꞈ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Eˇpaˬleˬ miˇ kʼahˬ Piˇlaˬdoˬ meuˬ-ahˇ jawˇ-eu Baˬnaˇyaˬ meh. Aˬ yawˬ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹⁵Ba la tseˇ nyiꞈ siˬ tiˬ siˬ-ahˇ gaˇ ya mˇ-eu aˇ muˇ tseˇ nyiꞈ muˇ tiˬ muˇ kʼoeˇ taˆ aˬ yuiꞈ geuꞈ-eu gʼaˬ-aˬ, Neˬtawˇpaˬ meuˬ-ahˇ jawˇ-eu Awˇdaˬneˬlaˇ aˇ jeuˬ Heˬlaˬdehˇ meh. Aˬ yawꞈ-euˬ aˇ muˇ zaˬ nyiˬ muiˇ oeˬ heˇ gʼaˬ byah-eu meh.

¹⁶Iˇsaˬleˬlaˆ tsawˇ jeuˬ deuˬ kʼoeˇ taˆ uˆ lahˇ-eu deuˬ-aˬ, heu deuˬ meh. Luˇbeˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Ziˇkaˬliˇ-euˬ aˬ li Eˇliˇzaˬ meh. Suˇmoˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Mawˇkah-euˬ aˬ li Sheˬpaˬtiˇ meh.

¹⁷Leˬbiˇ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Geˬmoeˬlaˇ-euˬ aˬ li Haˬshaˬbiˇ meh. Aˬloˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Zaˬdoˆ meh.

¹⁸Yuˇdaˆ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Daˬbiˇ-euˬ aˇ doˆ Eˇliˇhuˆ meh. Iˇsaˬkaˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Miˇkeˬlaˇ-euˬ aˬ li Awˇmaˬliˇ meh.

¹⁹Zeˬbuˬluˬ tsawˇ jeuˬ kʼoeˇ taˆ aˬ yuiꞈ geuˬ-awˇ uˆ lahˇ-euˬ gʼaˬ-aˬ, Awˇbaˬdiˇ-euˬ aˬ li Iˇshaˬmaˇyaˬ meh. Naˬtaˬliˇ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Aˬzaˬleˬlaˇ-euˬ aˬ li Yeˬliˇmoˆ meh.

²⁰Eˇpaˬleˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Aˬzaˬziˇ-euˬ aˬ li Awˇsheˬ meh. Yawˇdaˬ lawˇ baˬ-euˬ nahˇ ma ga kʼehˬ paw dzeˇ jawˇ-eu Maˬnaˇseˬ tsawˇ jeuˬ tiˬ paˆ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Peˬdehˇyaˬ-euˬ aˬ li Yawˇlaˆ meh.

²¹Yawˇdaˬ lawˇ baˬ-euˬ nahˇ ma doˆ kʼehˬ paw dzeˇ jaˆ-eu Giˇlaˆ miˇ kʼahˬ-ahˇ jawˇ-eu Maˬnaˇseˬ tsawˇ jeuˬ tiˬ paˆ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Zaˬkaˬliˇ-euˬ aˬ li Iˇdoˬ meh. Beˬyaˬmiˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Aˬbaˬnaˬ-euˬ aˬ li Yaˬseˬlaˇ meh.

²²Daˬ tsawˇ jeuˬ kʼoeˇ taˆ aˬ yuiꞈ geuꞈ-awˇ uˆ lahˇ-euˬ gʼaˬ-aˬ, Yeˬloˇhamˬ-euˬ aˬ li Aˬzaˬyeˬlaˇ meh. Heu deuˬ-aˬ, Iˇsaˬleˬlaˆ tsawˇ jeuˬ deuˬ kʼoeˇ taˆ aˬ yuiꞈ geuꞈ-awˇ haw-euˬ pyaˆ-euˬ deuˬ meh.

²³Iˇsaˬleˬlaˆ tsawˇ haˬ deuˬ mˬ taˆ tsehˬ-eu aˬ guiˇ loꞈ-ehˇ bi jeuˬ bi o le ma lehˇ, Sahˬpaˬ Miˬyehˇ neh saˇ jaˇ dzaˬ taˬ-eu jaˆ-eu miˇ neh, aˇ kʼoꞈ nyiˬ tseˇ laꞈ taˆ paw-euˬ tsawˇ haˬ deuˬ-ahˇ, sahˬ paˬ Daˬbiˇ tsawˇ seˬ maˬ gʼoˆ ni bi jawˇ-euˬ meh.

²⁴Zeˬluˇyaˆ-euˬ aˬ li tsawˇ myahˇ yuˇ-eu gaˇ-ahˇ dawꞈ leˇ-euˬ kʼawꞈ, aˇ saˬ maˬ saˬ ni byehˇ-euˬ meh. Kʼoeˇ loꞈ-ehˇ tsawˇ seˬ yuˇ-euˬ baˬ da neh, Iˇsaˬleˬlaˆ tsawˇ haˬ deuˬ-ahˇ Miˬyehˇ kʼehˬ nehˬ kʼaˆ nehˬ-awˇ, tsawˇ myahˇ yuˇ saˬ saˬ-euˬ deuˬ sahˬ paˬ Daˬbiˇ-euˬ jaˇ laˇ laꞈ kʼoeˇ maˬ dawˆ ni byehˇ-euˬ meh.

²⁵Aˬdeˬlaˇ-euˬ aˬ li Aˬzaˇmaˬbehˇ-aˬ, sahˬ paˬ-euˬ myawˬ gahˬ taˬ-eu nymˇ deuˬ-ahˇ haw-eu pyaˆ-eu gʼaˬ geuꞈ-euˬ meh. Awˇziˇ-euˬ aˬ li Yawˇnaˆshaˬ-aˬ, meuˬ meuˬ ma deuˬ, meuˬ meuˬ zaˬ deuˬ, pu deuˬ hawˇ-eu, meuˬ deuˬ-ahˇ loꞈ-eu nymˇ goˇ-ahˇ jaˆ-eu myawˬ gahˬ taˬ-eu nymˇ deuˬ-ahˇ, haw-eu pyaˆ-eu gʼaˬ geuꞈ-euˬ meh.

²⁶Sheˬluˆ-euˬ aˬ li Eˇzaˬliˇ-aˬ, deh ma hawˇ-eu yaˇ mˇ dzaˬ-eu deuˬ-ahˇ haw-eu pyaˆ-eu gʼaˬ geuꞈ-euˬ meh.

²⁷Laˬmahˇ meuˬ-ahˇ jawˇ-eu Shiˇmiˇ-aˬ, aˬ gaꞈ yaˇ kmˇ deuˬ-ahˇ haw-eu pyaˆ-eu gʼaˬ geuꞈ-euˬ meh. Sheˬpamˬ meuˬ-ahˇ jawˇ-eu Zaˬbaˬdiˇ-aˬ, aˬ gaꞈ aˇ siˬ hawˇ-eu aˬ gaꞈ dzaˇ uiˇ jahˇ doˆ-eu paw haw-eu pyaˆ-eu gʼaˬ geuꞈ-euˬ meh.

²⁸Geˬdaˬ meuˬ-ahˇ jawˇ-eu Baˬlaˇhaˬnaˬ-aˬ, nahˇ ma ga kʼehˬ paw gawˬ jawˬ dawˬ dahˬ-ahˇ dehꞈ-eu saˬ loˬ yaˇ kmˇ hawˇ-eu siˬ guˬ yaˇ kmˇ deuˬ-ahˇ haw-eu pyaˆ-eu gʼaˬ geuꞈ-euˬ meh. Yawˇshaˆ-aˬ, saˬ loˬ tsiˇ jeˬ hmˬ-eu paw haw-eu pyaˆ-eu gʼaˬ geuꞈ-euˬ meh.

²⁹Shaˬloˬ meuˬ-ahˇ jawˇ-eu Shiˇtaˬyehˇ-aˬ, Shaˬloˬ deh ga-ahˇ cu taˬ-euˬ jeˬ zaˬ deuˬ-ahˇ haw-eu pyaˆ-eu gʼaˬ geuꞈ-euˬ meh. Aˬdaˬlehˇ-euˬ aˬ li Shaˬpaˇ-aˬ, deh kʼawꞈ doe ni cu taˬ-euˬ jeˬ zaˬ deuˬ-ahˇ haw-eu pyaˆ-eu gʼaˬ geuꞈ-euˬ meh.

³⁰Iˇshaˬmeˬlaˇ tsawˇ jeuˬ Awˇbiˇlaˆ-aˬ, law taw deuˬ-ahˇ haw-eu pyaˆ-eu gʼaˬ geuꞈ-euˬ meh. Meˬlawˇnawˆ meuˬ-ahˇ jawˇ-eu Yeˬdehˇyaˬ-aˬ, mahˬ tahˬ laˆ deuˬ-ahˇ haw-eu pyaˆ-eu gʼaˬ geuꞈ-euˬ meh.

³¹Haˬgaˬliˇ tsawˇ jeuˬ Yaˬziˆ-aˬ yawˇ hawˇ-eu ciꞈ myehꞈ deuˬ-ahˇ haw-eu pyaˆ-eu gʼaˬ geuꞈ-euˬ meh.

³²Daˬbiˇ-euˬ aˬ zawˇ Yawˇnaˆshaˬ-aˬ, nya dui dui-eu nui noeˬ nui duˇ biꞈ-eu tsawˇ haˬ tiˬ gʼaˬ pyeuꞈ-awˇ, zaˬ siˬ tsawˇ gahˇ byah dui dui-eu meh. Aˬ yawꞈ hawˇ-eu Haˬkaˬmoˇniˇ-euˬ aˬ li Yeˬheˬlaˇ aˬ nyaꞈ-aˬ, sahˬ paˬ-euˬ aˬ li deuˬ-ahˇ sahˬ boꞈ mehˬ-eu paw haw-eu pyaˆ-eu gʼaˬ geuꞈ-euˬ meh.

³³Aˬhiˇtawˇpeˬlaˇ-aˬ, sahˬ paˬ-ahˇ nui noeˬ nui duˇ biꞈ-eu gʼaˬ geuꞈ-awˇ, Aˬciˇ tsawˇ jeuˬ Huˇshaiˇ-aˬ, sahˬ paˬ-ahˇ mehˬ bawˬ mˇ-eu sahˬ paˬ-euˬ cawˬ geuꞈ-euˬ meh.

³⁴Aˬhiˇtawˇpeˬlaˇ shiˇ ngeh jawˇ, Baˬnaˇyaˬ-euˬ aˬ li Aˬbyaˬdaˬ hawˇ-eu Yeˬhawˇyaˬdaˬ aˬ nyaꞈ nmˇ sahˬ paˬ-ahˇ nui noeˬ nui duˇ biꞈ-eu gʼaˬ geuꞈ-euˬ meh. Yoˇbaˬ-aˬ, sahˬ paˬ-euˬ guiˇ maꞈ kʼoeˇ taˆ uˆ lahˇ-eu gʼaˬ geuꞈ-euˬ meh.