Read Akha 1 Laˬsaˬbaˬ 28 Bible Online

1 Laˬsaˬbaˬ 28 - Akha bible

1 Laˬsaˬbaˬ 28

¹Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu yaw huiˬ yaw mahˇ deuˬ dawˬ tawˆ luꞈ, Yeˬluˇsaˬlehˬ meuˬ-ahˇ uiˬ laˇ-eu gʼaˇ duˬ sahˬ paˬ Daˬbiˇ dawˬ biꞈ-euˬ meh. Kʼoeˇ ngeh, Iˇsaˬleˬlaˆ tsawˇ jeuˬ deuˬ kʼoeˇ taˆ aˬ yuiꞈ geuꞈ luꞈ-eu yaw huiˬ yaw mahˇ deuˬ dawˬ tawˆ luꞈ maˬ ehˇ, Iˇsaˬleˬlaˆ miˇ kʼahˬ-ahˇ taꞈ-eu gaˇ deuˬ-ahˇ aˬ yuiꞈ geuꞈ-awˇ mˇ luꞈ-eu yaw huiˬ yaw mahˇ deuˬ maˬ ehˇ, aˇ jeuˬ aˇ ca deuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ maˬ ehˇ, sahˬ paˬ hawˇ-eu sahˬ paˬ zaˬ yo deuˬ-euˬ mawˇ nyoˬ jeˬ kaˇ deuˬ-ahˇ haw-eu pyaˆ-eu deuˬ maˬ ehˇ, sahˬ paˬ-euˬ nymˇ-ahˇ gaˇ mˇ luꞈ-eu yaw huiˬ yaw mahˇ deuˬ maˬ ehˇ, yehˇ yaw huiˬ deuˬ maˬ ehˇ, aˇ yaˬ huiˬ-eu tsawˇ haˬ deuˬ maˬ ehˇ, dawˬ tawˆ luꞈ Yeˬluˇsaˬlehˬ meuˬ-ahˇ uiˬ laˇ jiˇ-euˬ meh.

²Daˬbiˇ aˬ yawꞈ maꞈ-euˬ mehˬ shi yawꞈ-awˇ heu loꞈ-ehˇ ehˇ-eu meh. “Ngaˬ-euˬ miˇ kʼahˬ zaˬ deuˬ-oˇ, ngaˇ ehˇ gaˇ tiˬ poˆ naˇ haˬ sheˇ. Dawˬ ma saˇ jaˇ Bahˬ keuˆ-ahˇ tiˬ jawˇ-iˬ maˬ paˇ baꞈ jiˆ ni bi jaˆ-eu gʼaˇ duˬ hawˇ-eu, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ kuiˇ bi cawˬ taˬ-eu gʼaˇ duˬ, nymˇ tiˬ nymˇ ngaˇ tsoˆ mawꞈ-eu ma. Aˬ yawꞈ-ahˇ taˬ huiˬ taˬ mahˇ-eu laꞈ kʼoeˇ, uˬ duˬ tahˬ nymˇ tiˬ nymˇ tsoˆ-eu lehˇ ngaˇ lehˬ hmˬ taˬ-euˬ ma.

³Ehˇ kʼawꞈ kʼoeˇ loꞈ-ehˇ tsoˆ-eu gʼaˇ duˬ, aˬ yawꞈ ngaˬ-ahˇ a kawˬ-aˬ maˬ biꞈ laꞈ-aˬ. Aˬ jeˬ miˇ neh ehˇ naˇ, ngaˇ-aˬ, yehˇ tiˬ gʼaˬ pyeuꞈ-awˇ, tsawˇ haˬ zaˬ-euˬ shiˬ gʼawˬ mya ni laˆ yoeˇ-euˬ tsawˇ haˬ tiˬ gʼaˬ pyeuꞈ-eu ma.

⁴Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, Iˇsaˬleˬlaˆ miˇ kʼahˬ-ahˇ aˬ myah luꞈ bi uˆ lahˇ-eu gʼaˇ duˬ, ngaˇ hawˇ-eu ngaˬ-euˬ zaˬ deuˬ uˆ deuˬ-ahˇ tseˇ doˆ-euˬ meh. Aˬ yuiꞈ geuꞈ-awˇ bi sheuˬ gʼeh-eu gʼaˇ duˬ, Yuˇdaˆ tsawˇ jeuˬ-ahˇ aˬ yawꞈ tseˇ doˆ-awˇ, Yuˇdaˆ tsawˇ jeuˬ laꞈ kʼoeˇ ngaˬ da-euˬ aˇ jeuˬ-ahˇ aˬ yawꞈ paˇ tseˇ doˆ-euˬ meh. Ngaˬ da-euˬ aˇ jeuˬ jeuˬ lah ni laꞈ kʼoeˇ ngaˬ-ahˇ tseˇ doˆ-awˇ, Iˇsaˬleˬlaˆ miˇ kʼahˬ tiˬ kʼahˬ kʼahˬ lah ni kʼoeˇ taˆ sahˬ paˬ bi geuꞈ-eu gʼaˇ duˬ, aˬ yawꞈ nui ma tsaˬ-eu meh.

⁵Ngaˬ-ahˇ aˬ li gʼawˬ mya li bi jawˇ le-awˇ, aˬ li kʼoeˇ deuˬ dawˬ tawˆ luꞈ laꞈ kʼoeˇ, Sahˬpaˬ Miˬyehˇ-euˬ miˇ kʼahˬ heu kʼahˬ-ahˇ bi uˆ lahˇ-eu gʼaˇ duˬ, Sawˇlaˬmoˬ-ahˇ aˬ yawꞈ tseˇ doˆ-euˬ meh.

⁶“Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. ‘Nawˬ li Sawˇlaˬmoˬ-aˬ, ngaˬ-euˬ Uˬ duˬ tahˬ nymˇ nymˇ ma tsoˆ-eu gʼaˬ pyeuꞈ tehꞈ-a. Ngaˬ-euˬ aˬ li bi pyeuꞈ-eu lehˇ aˬ yawꞈ-ahˇ ngaˇ tseˇ doˆ-awˇ, ngaˇ aˬ yawꞈ-euˬ aˬ da-ahˇ duˇ-eu ma.

⁷Ngaˬ-euˬ zahˇ dawˬ kʼoꞈ dawˬ deuˬ hawˇ-eu ngaˬ neh mehˬ nehˬ tsoˆ nehˬ-euˬ dawˬ deuˬ-ahˇ, nymˬ-mˇ aˬ yawꞈ naˇ haˬ geuꞈ luꞈ-eu loꞈ-ehˇ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ kʼawꞈ, maˬ tsehˆ leˇ ni naˇ haˬ geuꞈ naˇ, aˬ yawꞈ-euˬ miˇ kʼahˬ aˬ myah luꞈ bi ziꞈ ma’ lehˇ ehˇ-eu meh.

⁸“Kʼoeˇ miˇ neh ngaˬ-euˬ tsawˇ haˬ deuˬ-oˇ, muiˬ-eu miˇ kʼahˬ heu kʼahˬ-ahˇ naw maꞈ ya jawˇ daˆ leꞈ-awˇ, aˬ kaˇ naw maꞈ-euˬ zaˬ deuˬ uˆ deuˬ-ahˇ kʼawꞈ, miˇ kʼahˬ heu kʼahˬ biꞈ taˬ yaꞈ nya ni, aˬ dui-euˬ Miˬyehˇ hawˇ-eu kʼaˇ uiˬ laˇ taˬ-euˬ Iˇsaˬleˬlaˆ tsawˇ haˬ dawˬ tawˆ luꞈ mehˬ shi, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh kʼaˇ mehˬ kʼaˇ tsoˆ nehˬ laꞈ-euˬ yawˬ jeˬ na luꞈ-ahˇ, yaw muiˬ paˬ-ehˇ naˇ haˬ-awˇ caw teh geuꞈ-awˬ lehˇ, naw maꞈ-ahˇ ngaˇ ehˇ-eu ma.”

⁹Kʼoeˇ naˇ, Sawˇlaˬmoˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Ngaˬ li-oˇ, nawˬ da-euˬ Miˬyehˇ-ahˇ nawˇ siˬ nya-awˇ, nawˬ-euˬ nui ma gʼawˇ mawˇ dawˬ tawˆ luꞈ aˬ yawꞈ-euˬ nui kʼahˇ mˇ-awˬ lehˇ, ngaˇ nawˬ-ahˇ dawˬ biꞈ-eu ma. Aˬ dui-euˬ nui noeˬ nui duˇ dawˬ tawˆ luꞈ aˬ yawꞈ siˬ nya meh. Aˬ yawꞈ jawˇ gaˇ nawˇ jiˆ uˇ leˇ naˇ, aˬ yawꞈ nawˬ-ahˇ ha geuꞈ tehꞈ-a. Ehˇ kʼawꞈ, nawˇ aˬ yawꞈ-ahˇ byehˇ dzeh naˇ, aˬ yawꞈ nawˬ-ahˇ tiˬ ziˇ byehˇ dzeh nehˬ laꞈ tehꞈ-a.

¹⁰Aˬ yawꞈ-euˬ Uˬ duˬ tahˬ nymˇ nymˇ ma bi tsoˆ-eu gʼaˇ duˬ, Sahˬpaˬ Miˬyehˇ neh nawˬ-ahˇ tseˇ doˆ taˬ-euˬ gaˇ kawˆ, nawˇ yaw muiˬ paˬ-ehˇ siˬ duˬ-eu tsaˬ meh. Nymˬ-mˇ tsoˆ-awˬ. Yaw muiˬ paˬ-ehˇ noeˬ tsehˆ-awˇ tsoˆ-awˬ.”

¹¹Uˬ duˬ tahˬ nymˇ nymˇ ma tsoˆ-eu gʼaˇ duˬ aˇ kawˆ kawˆ taˬ-euˬ jeˬ dawˬ tawˆ luꞈ, Sawˇlaˬmoˬ-ahˇ Daˬbiˇ biꞈ nehˬ-euˬ meh. Myawˬ gahˬ taˬ-eu aˇ lawˆ deuˬ tsoˆ-eu gʼaˇ duˬ maˬ ehˇ, aˇ lawˆ nui deuˬ tsoˆ-eu gʼaˇ duˬ maˬ ehˇ, iˬ baˇ pyehˬ nehˬ-eu jawˇ duˬ pyeuꞈ-eu Muiˬ dui shawˇ dui dui-eu aˇ lawˆ tsoˆ-eu gʼaˇ duˬ maˬ ehˇ, aˇ kawˆ kʼaˇ kawˆ taˬ-euˬ yawˬ jeˬ na luꞈ aˬ yawꞈ-ahˇ biꞈ nehˬ-euˬ meh.

¹²Poˆ kaˬ deuˬ hawˇ-eu, poˆ kaˬ jawˬ jawˬ-ehˇ bi jaˆ-eu aˇ lawˆ deuˬ tsoˆ-eu gʼaˇ duˬ maˬ ehˇ, Uˬ duˬ tahˬ nymˇ nymˇ ma-ahˇ zmˬ-eu mˇ myawˬ keu ka deuˬ hawˇ-eu, Sahˬpaˬ Miˬyehˇ-ahˇ kʼaˇ damˬ nehˬ laˇ-euˬ jeˬ-ahˇ bi jeˬ hmˬ taˬ-eu aˇ lawˆ deuˬ tsoˆ-eu gʼaˇ duˬ maˬ ehˇ, aˬ yawꞈ neh kʼaˇ noeˬ doˆ-euˬ loꞈ-ehˇ aˇ kawˆ kawˆ taˬ-euˬ jeˬ kʼawꞈ, biꞈ nehˬ-euˬ meh.

¹³Piˇ ma deuˬ hawˇ-eu Leˬbiˇ tsawˇ haˬ deuˬ-ahˇ aˇ maꞈ aˇ muˇ biˇ baw nehˬ-awˇ, yawˬ ha-ahˇ doˇ-eu gaˇ yawˬ ha bi mˇ-eu gʼaˇ duˬ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ gaˇ bi mˇ-eu gʼaˇ duˬ maˬ ehˇ, aˬ yawꞈ neh gaˇ kawˆ kawˆ taˬ-eu deuˬ kʼawꞈ, biꞈ nehˬ-euˬ meh.

¹⁴Uˬ duˬ tahˬ nymˇ nymˇ ma-ahˇ zmˬ-eu mˇ myawˬ keu ka deuˬ jahˇ ngeh, pyuˇ aˇ myaˆ ni hawˇ-eu shuiˇ aˇ myaˆ ni ya zmˬ-eu gaˇ kawˆ, aˬ yawꞈ mehˬ nehˬ tsoˆ nehˬ-euˬ meh.

¹⁵Tsiˇ kʼmˬ hawˇ-eu tsiˇ kʼmˬ doꞈ taˬ duˬ aˬ yawꞈ hmˬ yawꞈ jahˇ gaˇ maˬ ehˇ,

¹⁶pyuˇ hawˬ jeh deuˬ hawˇ-eu, kaˬ muˇ ciˬ daˆ-awˇ Miˬyehˇ-ahˇ damˬ nehˬ-eu pyuˇ hawˬ jeh aˬ yawꞈ hmˬ yawꞈ jahˇ gaˇ maˬ ehˇ, pyuˇ hawˇ-eu shuiˇ deuˬ aˇ myaˆ ni ya zmˬ-eu aˬ yawꞈ mehˬ duˬ nehˬ-euˬ meh.

¹⁷Kʼmˬ maˬ oeˬ tsaꞈ deuˬ hawˇ-eu ciˬ cuˇ deuˬ jahˇ gaˇ, pyuˇ hawˇ-eu shuiˇ aˇ myaˆ ni ya zmˬ-eu maˬ ehˇ, naˬ bo deuˬ jahˇ gaˇ aˇ myaˆ ni ya zmˬ-eu maˬ ehˇ,

¹⁸yaw saw jeˬ doꞈ damˬ-eu lawˇ duˬ jahˇ gaˇ hawˇ-eu, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ kʼoeˇ taˆ aˬ dahˇ cawˬ ja taˬ-euˬ jeˬluˇbeˬ[12] mawˇ kawˇ gʼaˇ duˬ laˆ lawˬ jahˇ gaˇ, maˇ jawˆ ni gʼeh-eu shuiˇ aˇ myaˆ ni ya zmˬ-eu maˬ ehˇ, aˬ yawꞈ mehˬ duˬ nehˬ-euˬ meh.

¹⁹“Heu deuˬ dawˬ tawˆ luꞈ aˬ joˆ-ehˇ ya mˇ-eu gaˇ kawˆ, Sahˬpaˬ Miˬyehˇ neh ngaˬ-ahˇ mehˬ nehˬ laꞈ-euˬ loꞈ-ehˇ aˇ kawˆ kawˆ-awˇ boꞈ doˆ taˬ-euˬ laꞈ kʼoeˇ ahˇ jiˇ meh” lehˇ, sahˬ paˬ Daˬbiˇ ehˇ-eu meh.

²⁰Aˬ yawꞈ-euˬ aˬ li Sawˇlaˬmoˬ-ahˇ sahˬ paˬ Daˬbiˇ heu loꞈ-ehˇ ehˇ nehˬ-euˬ meh. “Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ gʼeh-awˬ. Gaˇ mˇ-eu dawꞈ leˇ-awˇ, aˬ jeˬ pyeuꞈ kʼawꞈ maˬ byehˇ dzeh ni mˇ daˆ leꞈ-awˬ. Ngaˇ gʼoe luꞈ-eu Miˬyehˇ pyeuꞈ-eu Sahˬpaˬ Miˬyehˇ nawˬ nehˬ-ehˇ jawˇ tehꞈ-a. Aˬ yawꞈ nawˬ-ahˇ maˬ byehˇ dzeh-ehˇ, aˬ yawꞈ-euˬ Uˬ duˬ tahˬ nymˇ nymˇ ma tsoˆ gaˇ taꞈ leˇ-eu yawˬ jeˬ na luꞈ-ahˇ nawˇ mˇ jiˇ ngeh keuˆ ni, nawˬ nehˬ-ehˇ aˬ yawꞈ jawˇ tehꞈ-a.

²¹Uˬ duˬ tahˬ nymˇ nymˇ ma laꞈ kʼoeˇ yawˬ ha-ahˇ doˇ-eu gaˇ yawˬ ha mˇ-eu gʼaˇ duˬ piˇ ma deuˬ hawˇ-eu Leˬbiˇ tsawˇ haˬ deuˬ-ahˇ gaˇ biꞈ gʼaˬ taˬ-euˬ meh. Nymˇ tsoˆ gaˇ taꞈ leˇ-awˇ, aˬ yawꞈ jeˬ yawꞈ paw nya-eu tsawˇ haˬ deuˬ nawˬ-ahˇ caw ba-eu nui ma keuˆ-awˇ, miˇ kʼahˬ zaˬ dawˬ tawˆ luꞈ hawˇ-eu aˬ yuiꞈ aˬ tsu dawˬ tawˆ luꞈ, nawˬ-euˬ dawˬ naˇ haˬ tehꞈ-a.”