Read Akha 2 Laˬsaˬbaˬ 1 Bible Online

2 Laˬsaˬbaˬ 1 - Akha bible

2 Laˬsaˬbaˬ 1

¹Sahˬ paˬ Daˬbiˇ-euˬ aˬ li Sawˇlaˬmoˬ-aˬ, Iˇsaˬleˬlaˆ miˇ kʼahˬ-ahˇ ziꞈ dah ni uˆ lahˇ-awˇ, Sahˬpaˬ Miˬyehˇ pyeuꞈ-eu Miˬyehˇ aˬ yawꞈ-ahˇ guiˬ lahˬ biꞈ-awˇ, baoˬ huiˬ-eu sahˬ paˬ tiˬ gʼaˬ bi pyeuꞈ laˇ-euˬ meh.

²Tiˬ heˇ gʼaˬ kʼoeˇ taˆ uˆ lahˇ-eu yaw huiˬ yaw mahˇ deuˬ, tiˬ yaˇ gʼaˬ kʼoeˇ taˆ uˆ lahˇ-eu yaw huiˬ yaw mahˇ deuˬ, yaˇ kʼaˬ daˇ-eu deuˬ, aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-eu deuˬ hawˇ-eu, Iˇsaˬleˬlaˆ tsawˇ haˬ dawˬ tawˆ luꞈ-ahˇ, Giˇbyoˬ meuˬ-ahˇ jaˆ-eu uˬ duˬ tahˬ-eu jawˇ duˬ-ahˇ aˬ yawꞈ nehˬ-ehˇ ya le meh lehˇ, sahˬ paˬ Sawˇlaˬmoˬ dawˬ biꞈ-euˬ meh. Sahˬpaˬ Miˬyehˇ-euˬ zaˬ kʼaˆ pyeuꞈ-eu Moˇseˬ neh bawˇ tsahˬ bawˇ dahˇ-ahˇ tsoˆ-euˬ Sahˬpaˬ Miˬyehˇ jawˇ-eu Sehˬ gʼawˆ kʼoeˇ gʼawˆ kʼoeˇ gaˇ jaˆ-eu miˇ neh, aˬ yawꞈ maꞈ kʼoeˇ gaˇ le-euˬ meh.

⁴Ehˇ kʼawꞈ, Dawˬ ma saˇ jaˇ Bahˬ keuˆ hmˬ-aˬ, Yeˬluˇsaˬlehˬ meuˬ laꞈ kʼoeˇ jaˆ-eu meh. Dawˬ ma saˇ jaˇ Bahˬ keuˆ kʼoeˇ sahˬ paˬ Daˬbiˇ neh Giˇliˇyaˆyeˬlmˬ-ahˇ neh baꞈ kʼoꞈ laꞈ-awˇ, sehˬ gʼawˆ gʼawˆ-awˇ baꞈ ahˇ taˬ-euˬ gaˇ jaˆ luꞈ-eu meh.

⁵Huˇyaˆ-euˬ aˬ li Uˇliˆ-euˬ aˬ li Baˬzeˬlaˇ neh guiˬ shuiˇ yuˇ-awˇ tehˆ-euˬ lawˇ duˬ kʼoeˇ hmˬ kʼawꞈ, Giˇbyoˬ meuˬ-ahˇ, Sahˬpaˬ Miˬyehˇ jawˇ-eu Sehˬ gʼawˆ mehˬ shi jaˆ luꞈ-eu meh. Sahˬ paˬ Sawˇlaˬmoˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Sahˬpaˬ Miˬyehˇ-ahˇ kʼoeˇ gaˇ uˬ duˬ tahˬ-euˬ meh.

⁶Sehˬ gʼawˆ-euˬ mehˬ shi, guiˬ shuiˇ neh jahˇ taˬ-euˬ lawˇ duˬ kʼoeˇ hmˬ kʼoeˇ taˆ lawˇ-eu shehˇ-eu laꞈ kʼoeˇ, Sahˬpaˬ Miˬyehˇ-ahˇ sahˬ paˬ Sawˇlaˬmoˬ uˬ duˬ tahˬ-euˬ meh. Jeˬ zaˬ aˇ heˇ mawˇ aˬ yawꞈ sehꞈ-awˇ, lawˇ duˬ kʼoeˇ hmˬ kʼoeˇ taˆ mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ lawˇ-euˬ meh.

⁷Kʼoeˇ ngeh miˇ, Sawˇlaˬmoˬ jawˇ gaˇ Miˬyehˇ doˆ le-awˇ, “Nawˇ ngaˬ-ahˇ aˬ geu jeˬ shaˇ mawꞈ te” lehˇ naˇ haˬ-euˬ meh.

⁸Sawˇlaˬmoˬ ehˇ-eu, “Huiˬ dui dui-eu nawˬ-eu gʼoeˇ-eu gaˬ-euˬ jeˬ ngaˬ da Daˬbiˇ-ahˇ nawˇ aˬ myah luꞈ bi mawˇ-awˇ, nymˬ-mˇ, aˬ yawꞈ-euˬ dah zaˇ nawˇ ngaˬ-ahˇ sahˬ paˬ bi geuꞈ laꞈ-euˬ meh.

⁹Sahˬpaˬ Miˬyehˇ pyeuꞈ-eu Miˬyehˇ-oˇ, nawˬ neh ngaˬ da-ahˇ saˇ jaˇ dzaˬ taˬ-euˬ jeˬ bi byah laˇ-awˬ. Maˬ gui jiˇ coeˇ gaˇ keuˆ ni myaˬ-eu tsawˇ haˬ deuˬ kʼoeˇ taˆ, nawˇ ngaˬ-ahˇ sahˬ paˬ bi geuꞈ laꞈ-euˬ meh.

¹⁰Kʼoeˇ miˇ neh, aˬ yawꞈ maꞈ kʼoeˇ taˆ ngaˇ uˆ lahˇ-eu gʼaˇ duˬ, loˬ-eu zaˬ siˬ tsawˇ gahˇ biꞈ nehˬ laꞈ-awˬ. Kʼoeˇ loꞈ-ehˇ maˬ ngeuˇ naˇ, myaˬ dui dui-eu nawˬ-euˬ tsawˇ haˬ heu deuˬ-ahˇ ngaˇ aˬ joˆ-ehˇ uˆ lahˇ nmˇ.”

¹¹Sawˇlaˬmoˬ-ahˇ Miˬyehˇ ehˇ nehˬ-eu, “Tsaˬ dui dui-eu jeˬ-ahˇ nawˇ tseˇ geuꞈ-euˬ meh. Aˬ jeˬ miˇ neh ehˇ naˇ, smˇ muiˬ smˇ baw pyeuꞈ laˇ ni maˬ ehˇ, pyuˇ shuiˇ myawˬ gahˬ maˬ ehˇ, tsawˇ myahˇ doˆ ni maˬ ehˇ, nawˬ-ahˇ muiˇ-eu deuˬ ya shiˇ ni maˬ ehˇ, nawˇ ziˇ baw ziˇ za ni maˬ ehˇ, nawˇ maˬ shaˇ-eu uˬ taꞈ, ngaˬ neh nawˬ-ahˇ sahˬ paˬ bi geuꞈ-awˇ bi uˆ lahˇ-euˬ ngaˬ-euˬ tsawˇ haˬ deuˬ kʼoeˇ taˆ nawˇ uˆ lahˇ nya ni, zaˬ siˬ tsawˇ gahˇ nawˇ shaˇ-eu meh.

¹²Ngaˇ nawˬ-ahˇ zaˬ siˬ tsawˇ gahˇ biꞈ ma. Kʼoeˇ uˬ taꞈ, aˇ hu ba neh aˬ kaˇ kaˇ ziˇ keuˆ ni sahˬ paˬ kʼaˇ geuꞈ-eu tsawˇ haˬ deuˬ tiˬ jawˇ-iˬ maˬ za haw-euˬ smˇ muiˬ smˇ baw baw-eu jeˬ maˬ ehˇ, pyuˇ shuiˇ myawˬ gahˬ maˬ ehˇ, tsawˇ myahˇ doˆ-eu jeˬ maˬ ehˇ, ngaˇ nawˬ-ahˇ biꞈ lahˬ nehˬ ma.”

¹³Sahˬ paˬ Sawˇlaˬmoˬ-aˬ, Sahˬpaˬ Miˬyehˇ jawˇ-eu Sehˬ gʼawˆ jaˆ-eu jawˇ duˬ pyeuꞈ-eu Giˇbyoˬ meuˬ-ahˇ jaˆ-eu uˬ duˬ tahˬ-eu jawˇ duˬ-ahˇ le-awˇ, Yeˬluˇsaˬlehˬ meuˬ-ahˇ gʼoꞈ le-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ-ahˇ uˆ lahˇ-euˬ meh.

¹⁴Mahˬ laˆ lawˬ tiˬ heˇ oeˬ yaˇ laˇ hawˇ-eu, dziˬ mahˬ tiˬ muiˇ nyiˬ heˇ mawˇ aˬ yawꞈ poˆ uiˬ-euˬ meh. Tiˬ paˆ deuˬ-ahˇ Yeˬluˇsaˬlehˬ meuˬ-ahˇ bi jawˇ-awˇ, tiˬ paˆ deuˬ-ahˇ meuˬ nui deuˬ-ahˇ bi jawˇ-euˬ meh.

¹⁵Aˬ yawꞈ uˆ lahˇ-eu aˇ nah aˇ yamˬ-ahˇ Yeˬluˇsaˬlehˬ meuˬ laꞈ kʼoeˇ pyuˇ hawˇ-eu shuiˇ kʼaˬ lo loꞈ-ehˇ byehˬ-awˇ, aˬ cawˬ miˇ kʼahˬ-ahˇ neh tawˬ ahˇ laꞈ-euˬ aˇ poeˬ kʼaˆ-eu shuˬ liˇ daˇ kawˬ deuˬ kʼawꞈ, Yuˇdaˆ miˇ kʼahˬ gawˬ jawˬ dawˬ dahˬ doe ni jaˆ-eu siˬ guˬ daˇ kawˬ loꞈ-ehˇ jaˆ myaˬ dui dui-eu meh.

¹⁶Muˬsaˬliˬ miˇ kʼahˬ hawˇ-eu Ciˬliˇshaˆ miˇ kʼahˬ-ahˇ neh kʼaˇ ahˬ doˆ-euˬ mahˬ dawˬ tawˆ luꞈ-ahˇ, sahˬ paˬ Sawˇlaˬmoˬ neh pyehˬ taˬ-euˬ tsawˇ haˬ deuˬ neh zeuˇ jiˇ-euˬ meh.

¹⁷Iˇjiˇtuˆ miˇ kʼahˬ-ahˇ neh kʼaˇ ahˬ doˆ-euˬ mahˬ laˆ lawˬ deuˬ kʼawꞈ, aˬ yawꞈ maꞈ neh zeuˇ jiˇ-euˬ meh. Heˬtaˆ sahˬ paˬ deuˬ hawˇ-eu Shuˇliˆ sahˬ paˬ deuˬ-ahˇ, aˬ yawꞈ maꞈ mahˬ hawˇ-eu mahˬ laˆ lawˬ ahˬ ahˇ nehˬ-euˬ meh. Mahˬ laˆ lawˬ tiˬ laˇ-euˬ pyuˇ maˇ byaˆ koꞈ yaˇ byaˆ-ahˇ neh ahˬ-awˇ, mahˬ tiˬ mawˇ-euˬ tiˬ yaˇ ngaˬ tseˇ byaˆ-ahˇ neh ahˬ nehˬ-euˬ meh.