Read Akha 2 Laˬsaˬbaˬ 11 Bible Online

2 Laˬsaˬbaˬ 11 - Akha bible

2 Laˬsaˬbaˬ 11

¹Sahˬ paˬ Leˬhawˇbamˬ Yeˬluˇsaˬlehˬ meuˬ-ahˇ gʼoꞈ keuˆ-iˇ ngeh, Beˬyaˬmiˬ tsawˇ jeuˬ hawˇ-eu Yuˇdaˆ tsawˇ jeuˬ laꞈ kʼoeˇ nya dui dui-eu yehˇ tiˬ seh yehꞈ muiˇ gʼaˬ kuˇ uiˬ-euˬ meh. Laˬ taˆ paw pyawˬ-ahˇ jawˇ-eu Iˇsaˬleˬlaˆ tsawˇ jeuˬ deuˬ-ahˇ deuˆ gʼaˬ-awˇ uˆ lahˇ ma lehˇ aˬ yawꞈ noeˬ-euˬ meh.

²Ehˇ kʼawꞈ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Sheˬmaˇyaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

³“Sawˇlaˬmoˬ-euˬ aˬ li sahˬ paˬ Leˬhawˇbamˬ hawˇ-eu, Yuˇdaˆ tsawˇ jeuˬ, Beˬyaˬmiˬ tsawˇ jeuˬ, heu dawˬ tawˆ luꞈ-ahˇ heu loꞈ-ehˇ ehˇ nehˬ-awˬ.

⁴‘Naw maꞈ-euˬ aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-ahˇ guiˇ taˬ deuˆ. Naw maꞈ dawˬ tawˆ luꞈ yawˬ ha-euˬ nymˇ-ahˇ gʼoꞈ-iˇ-awˬ. Kʼaˇ pyeuꞈ laˇ-euˬ jeˬ dawˬ tawˆ luꞈ ngaˇ nui ma tsaˬ-eu miˇ neh bi pyeuꞈ laˇ-euˬ ma lehˇ Sahˬpaˬ Miˬyehˇ ehˇ-eu meh’ lehˇ ehˇ nehˬ-awˬ.” Aˬ yawꞈ maꞈ dawˬ tawˆ luꞈ Sahˬpaˬ Miˬyehˇ-euˬ dawˬ-ahˇ naˇ haˬ-awˇ, Yeˬyawˇbamˬ-ahˇ guiˇ maˬ deuˆ leˇ ni byehˇ-euˬ meh.

⁵Leˬhawˇbamˬ-aˬ, Yeˬluˇsaˬlehˬ meuˬ-ahˇ jawˇ-awˇ, Yuˇdaˆ miˇ kʼahˬ hawˇ-eu Beˬyaˬmiˬ miˇ kʼahˬ laꞈ kʼoeˇ jaˆ-eu meuˬ heu deuˬ-ahˇ aˬ cawˬ maˬ bi deuˆ gʼaˬ-eu gʼaˇ duˬ ziꞈ dah ni laˆ ziꞈ-euˬ meh.

⁶Behˬlehˬhehˬ meuˬ, Eˇtamˬ meuˬ,

⁷Behˬzuˇlaˆ meuˬ, Sawˇkawˇ meuˬ, Aˬduˬlamˬ meuˬ,

⁸Gaˬdaˇ meuˬ, Maˬleˇshaˬ meuˬ, Ziˇpaˬ meuˬ,

⁹Aˬdawˇleˬ meuˬ, Laˬkiˇshaˆ meuˬ, Aˬzeˬkaˬ meuˬ,

¹⁰Zoˇlahˬ meuˬ, Aiˬjaˬloˬ meuˬ hawˇ-eu Heˬbyoˬ meuˬ heu deuˬ meh.

¹¹Meuˬ kʼoeˇ deuˬ-ahˇ aˬ cawˬ maˬ bi deuˆ gʼaˬ-eu gʼaˇ duˬ, ziꞈ dah ni aˬ yawꞈ laˆ ziꞈ-awˇ, aˬ yawꞈ meuˬ yawꞈ-ahˇ guiˇ guiˇ maꞈ kʼoeˇ taˆ bi uˆ lahˇ-eu yaw huiˬ tiˬ gʼaˬ bi jawˇ-awˇ, dzaˬ dzaˬ dawˇ dawˇ, saˬ loˬ tsiˇ hawˇ-eu, aˬ gaꞈ dzaˇ uiˇ bi sha uiˬ taˬ-euˬ meh.

¹²Dehˬ daˬ duˬ hawˇ-eu gahˬ deuˬ kʼawꞈ bi yuˇ uiˬ taˬ-euˬ meh. Kʼoeˇ loꞈ-ehˇ jahˇ-awˇ, Yuˇdaˆ miˇ kʼahˬ hawˇ-eu Beˬyaˬmiˬ miˇ kʼahˬ-ahˇ aˬ yawꞈ uˆ lahˇ-eu uˬ moˆ bi jawˇ-euˬ meh.

¹³Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu piˇ ma deuˬ hawˇ-eu Leˬbiˇ tsawˇ haˬ dawˬ tawˆ luꞈ, Yuˇdaˆ miˇ kʼahˬ-ahˇ zaꞈ uˇ le jiˇ-euˬ meh.

¹⁴Leˬbiˇ tsawˇ haˬ deuˬ-aˬ, yawˬ ha-euˬ jeˬ zaˬ gaˆ kʼahˬ hawˇ-eu miˇ tsaˬ deuˬ byehˇ dzeh yaꞈ jiˇ-awˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ pawˇ le jiˇ-euˬ meh. Aˬ jeˬ miˇ neh ehˇ naˇ, sahˬ paˬ Yeˬyawˇbamˬ hawˇ-eu aˬ yawꞈ-euˬ mehˬ nah daˆ laˇ-euˬ sahˬ paˬ deuˬ, aˬ yawꞈ maꞈ-ahˇ Sahˬpaˬ Miˬyehˇ-euˬ piˇ ma maˬ bi geuꞈ-a.

¹⁵Sahˬ paˬ Yeˬyawˇbamˬ-aˬ, lawˇ ciꞈ zaˬ deuˬ uˬ duˬ tahˬ-eu jawˇ duˬ-ahˇ gaˇ bi mˇ-eu gʼaˇ duˬ maˬ ehˇ, nehꞈ yaw jawꞈ deuˬ hawˇ-eu aˬ yawꞈ neh kʼaˇ-euˬ mawˇ neˇ mawˇ kawˇ tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu gʼaˇ duˬ maˬ ehˇ, aˬ yawꞈ-euˬ piˇ ma deuˬ aˬ yawˇ yawꞈ tseˇ doˆ -euˬ meh.

¹⁶Iˇsaˬleˬlaˆ tsawˇ jeuˬ dawˬ tawˆ luꞈ laꞈ kʼoeˇ, maˇ maˇ ni Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ mawꞈ-eu tsawˇ haˬ deuˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ya lawˇ ya shehˇ ni, Leˬbiˇ tsawˇ haˬ deuˬ-euˬ mehˬ nah Yeˬluˇsaˬlehˬ meuˬ-ahˇ caw teh gʼeh-euˬ meh.

¹⁷Aˬ yawꞈ maꞈ jawˇ uˇ le-euˬ miˇ neh Yuˇdaˆ miˇ kʼahˬ-ahˇ gʼaˬ bi kʼaˆ dzehˬ laˇ-awˇ, sahˬ paˬ Daˬbiˇ hawˇ-eu sahˬ paˬ Sawˇlaˬmoˬ uˆ lahˇ-eu uˬ moˆ aˬ yawꞈ maꞈ jawˇ haw-euˬ loꞈ-ehˇ, smˇ kʼoꞈ byah ni Sawˇlaˬmoˬ-euˬ aˬ li Leˬhawˇbamˬ uˆ lahˇ-eu uˬ moˆ aˬ yawꞈ maꞈ yaw muiˬ paˬ-ehˇ jawˇ-euˬ meh.

¹⁸Leˬhawˇbamˬ-aˬ, Maˬhaˬlaˇ-ahˇ sheuˬ-euˬ meh. Maˬhaˬlaˇ-euˬ aˬ da-aˬ, Daˬbiˇ-euˬ aˬ li Yeˬliˇmoˆ pyeuꞈ-awˇ, aˬ ma gʼaˬ-aˬ, Yeˬshehˇ-euˬ aˬ li Eˇliˇbaˆ-euˬ aˬ buˇ Aˬbiˇheˬlaˇ meh.

¹⁹Aˬbiˇheˬlaˇ o neh, Yuˇshaˆ, Sheˬmaˬliˇ hawˇ-eu Zaˬhamˬ lehˇ myahˇ-euˬ aˬ li smˬ li jawˇ le-euˬ meh.

²⁰Aˇ nah, Aˬbaˇsaˬloˬ-euˬ aˬ buˇ Mawˇkah-ahˇ aˬ yawꞈ paˇ sheuˬ-awˇ, Aˬbiˇyaˬ, Aˬtehˇ, Ziˬzaˬ hawˇ-eu Sheˬloˇmiˇ lehˇ myahˇ-euˬ aˬ li oeˬ li paˇ jawˇ le-euˬ meh.

²¹Leˬhawˇbamˬ-euˬ miˬ zaˬ dawˬ tawˆ luꞈ tseˇ yehꞈ gʼaˬ jawˇ-awˇ, ma nyiˇ koꞈ tseˇ gʼaˬ jawˇ-eu meh. Aˬ yawꞈ-euˬ aˬ li nyiˬ tseˇ yehꞈ li jawˇ-awˇ, aˬ buˇ koꞈ tseˇ buˇ jawˇ-eu meh. Aˬ yawꞈ-euˬ miˬ zaˬ dawˬ tawˆ luꞈ hawˇ-eu ma nyiˇ dawˬ tawˆ luꞈ kʼoeˇ taˆ, Mawˇkah-ahˇ aˬ yawꞈ gaˬ dzehˬ-eu meh.

²²Aˬ yawꞈ-euˬ zaˬ dawˬ tawˆ luꞈ kʼoeˇ taˆ, Mawˇkah-euˬ aˬ li Aˬbiˇyaˬ-ahˇ aˬ yawꞈ gaˬ dzehˬ-awˇ, aˬ yawꞈ-euˬ dah zaˇ sahˬ paˬ bi geuꞈ-eu gʼaˇ duˬ tseˇ doˆ-euˬ meh.

²³Leˬhawˇbamˬ-aˬ, nui noeˬ doˆ-awˇ tsawˇ gahˇ ahˇ-eu laꞈ kʼoeˇ, aˬ yawꞈ-euˬ aˬ li deuˬ-ahˇ, Yuˇdaˆ miˇ kʼahˬ hawˇ-eu Beˬyaˬmiˬ miˇ kʼahˬ laꞈ kʼoeˇ ziꞈ dah ni tsoˆ taˬ-euˬ meuˬ deuˬ-ahˇ gaˇ biꞈ-awˇ bi jawˇ-euˬ meh. Aˬ yawꞈ maꞈ-ahˇ aˬ yawꞈ tiˬ byah tiˬ loꞈ caw ba nehˬ-euˬ uˬ taꞈ, miˬ zaˬ gʼawˬ mya ni poˆ nehˬ-euˬ meh.