Read Akha 2 Laˬsaˬbaˬ 12 Bible Online

2 Laˬsaˬbaˬ 12 - Akha bible

2 Laˬsaˬbaˬ 12

¹Leˬhawˇbamˬ sahˬ paˬ pyeuꞈ laˇ-awˇ, miˇ kʼahˬ-ahˇ ziꞈ dah ni uˆ lahˇ gʼaˬ ngeh jawˇ, aˬ yawꞈ hawˇ-eu aˬ yawꞈ-eu tsawˇ haˬ dawˬ tawˆ luꞈ Sahˬpaˬ Miˬyehˇ-euˬ Zahˇ dawˬ kʼoꞈ dawˬ-ahˇ byehˇ dzeh-euˬ meh.

²Sahˬpaˬ Miˬyehˇ-ahˇ aˬ yawꞈ maꞈ saˇ jaˇ maˬ ziꞈ-eu miˇ neh, Leˬhawˇbamˬ sahˬ paˬ geuꞈ laꞈ-euˬ ngaˬ kʼoꞈ byah laˇ ngeh kʼoꞈ, aˬ yawꞈ maꞈ kʼoeˇ taˆ kʼehˬ-eu kʼaˆ-eu jeˬ keuˆ le-euˬ meh. Iˇjiˇtuˆ sahˬ paˬ Shiˇshehˆ gʼaˬ Yeˬluˇsaˬlehˬ meuˬ-ahˇ guiˇ deuˆ laˇ-euˬ meh.

³Mahˬ laˆ lawˬ tiˬ heˇ nyiˬ yaˇ laˇ, mahˬ dziˬ-eu yehˇ koꞈ heˇ gʼaˬ hawˇ-eu, Liˆbyaˇ tsawˇ jeuˬ, Suˇkiˇ tsawˇ jeuˬ hawˇ-eu Suˬdaˬ tsawˇ jeuˬ deuˬ ahˇ leˇ-ehˇ, maˬ gui jiˇ coeˇ gaˇ keuˆ ni myaˬ-eu guiˇ maꞈ-ahˇ, Iˇjiˇtuˆ miˇ kʼahˬ-ahˇ neh aˬ yawꞈ sheuˬ daˆ laꞈ-euˬ meh.

⁴Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni tsoˆ taˬ-euˬ meuˬ deuˬ-ahˇ aˬ yawꞈ deuˆ gʼaˬ-awˇ Yeˬluˇsaˬlehˬ meuˬ-ahˇ keuˆ ni laˇ keuˆ-euˬ meh.

⁵Sahˬ paˬ Leˬhawˇbamˬ hawˇ-eu Shiˇshehˆ-euˬ laꞈ-ahˇ neh cehˆ buˬ-euˬ gʼaˇ duˬ Yeˬluˇsaˬlehˬ meuˬ-ahˇ uiˬ laˇ taˬ-euˬ Yuˇdaˆ miˇ kʼahˬ-euˬ aˬ yuiꞈ aˬ tsu deuˬ jawˇ gaˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Sheˬmaˇyaˬ iˇ-euˬ meh. Aˬ yawꞈ maꞈ-ahˇ aˬ yawꞈ ehˇ nehˬ-eu, “Sahˬpaˬ Miˬyehˇ naw maꞈ-ahˇ heu loꞈ-ehˇ ehˇ-eu meh. Naw maꞈ ngaˬ-ahˇ byehˇ dzeh-euˬ meh. Kʼoeˇ miˇ neh, nymˬ-mˇ Shiˇshehˆ-euˬ laꞈ-ahˇ, naw maꞈ-ahˇ ngaˇ byehˇ dzeh nehˬ-eu ma lehˇ ehˇ-eu meh.”

⁶Sahˬ paˬ hawˇ-eu aˬ yuiꞈ aˬ tsu kʼoeˇ deuˬ, yawˬ ha neh mˇ-euˬ iˬ baˇ-ahˇ yawˬ ha noeˬ siˬ-awˇ, Sahˬpaˬ Miˬyehˇ mˇ-eu tsaˬ meh lehˇ ehˇ-eu meh.

⁷Tsawˇ haˬ kʼoeˇ deuˬ yawˬ ha-euˬ iˬ baˇ-ahˇ yawˬ ha noeˬ siˬ-euˬ gaˇ Sahˬpaˬ Miˬyehˇ ya mawˇ ngeh, Sheˬmaˇyaˬ-ahˇ heu loꞈ-ehˇ paˇ ehˇ nehˬ-euˬ meh. “Aˬ yawꞈ maꞈ-euˬ iˬ baˇ-ahˇ aˬ yawꞈ maꞈ noeˬ siˬ gʼaˬ-euˬ miˇ neh, aˬ yawꞈ maꞈ-ahˇ ngaˇ maˬ paˇ laˆ cawˆ nehˬ ma. Ehˇ kʼawꞈ, Shiˇshehˆ aˬ yawꞈ maꞈ-ahˇ deuˆ laˇ ngeh, aˬ yawꞈ maꞈ shaˬ maˬ ciꞈ-ehˇ ya buˬ-iˇ tehꞈ-a. Yeˬluˇsaˬlehˬ meuˬ-aˬ, ngaˇ nui ma pehˇ-eu jeˬ-ahˇ tiˬ byah tiˬ loꞈ maˬ ya daˬ-aˇ.

⁸Ehˇ kʼawꞈ, Shiˇshehˆ aˬ yawꞈ maꞈ-ahˇ deuˆ gʼaˬ-awˇ, miˇ kʼahˬ-ahˇ uˆ lahˇ-eu deuˬ-euˬ uˬ moˆ jawˇ-eu hawˇ-eu, ngaˇ uˆ lahˇ-eu uˬ moˆ jawˇ-eu heu nyiˬ jeˬ aˇ naˆ ni beu gaˇ-eu gaˇ kawˆ aˬ yawꞈ maꞈ ya siˬ duˬ tehꞈ-a.”

⁹Sahˬ paˬ Shiˇshehˆ Yeˬluˇsaˬlehˬ meuˬ-ahˇ laˇ-awˇ, Uˬ duˬ tahˬ nymˇ nymˇ ma hawˇ-eu sahˬ paˬ jawˇ-eu nymˇ-ahˇ jaˆ-eu pyuˇ shuiˇ myawˬ gahˬ dawˬ tawˆ luꞈ yuˇ geuꞈ jiˇ-euˬ meh. Sahˬ paˬ Sawˇlaˬmoˬ neh shuiˇ neh jahˇ taˬ-euˬ dehˬ daˬ duˬ kʼoeˇ deuˬ ahˇ leˇ-ehˇ, yawˬ jeˬ na luꞈ aˬ yawꞈ yuˇ jiˇ-euˬ meh.

¹⁰Shuiˇ neh jahˇ taˬ-euˬ dehˬ daˬ duˬ kʼoeˇ deuˬ dah zaˇ, Leˬhawˇbamˬ gʼaˬ, guiˬ shuiˇ neh dehˬ daˬ duˬ paˇ jahˇ-awˇ, sahˬ paˬ jawˇ-eu nymˇ-euˬ lahˇ kʼehˬ deuˬ-ahˇ loꞈ-eu paw aˬ yuiꞈ geuꞈ-eu yaw huiˬ yaw mahˇ deuˬ-ahˇ a nehˬ-euˬ meh.

¹¹Uˬ duˬ tahˬ nymˇ nymˇ ma-ahˇ sahˬ paˬ kʼaˇ le ngeh, sahˬ paˬ-ahˇ loꞈ piˇ-eu yehˇ deuˬ dehˬ daˬ duˬ kʼoeˇ yuˇ-awˇ aˬ yawꞈ nehˬ-ehˇ le-eu meh. Gʼoꞈ le gʼaˬ ngeh, dehˬ daˬ duˬ kʼoeˇ deuˬ-ahˇ, loꞈ piˇ-eu deuˬ-euˬ lawˆ-ahˇ paˇ yuˇ kʼoꞈ taˬ-iˇ-eu meh.

¹²Sahˬpaˬ Miˬyehˇ mehˬ shi aˬ yawꞈ nui ma nahˬ yu ni taˬ-euˬ miˇ neh, aˬ yawꞈ-euˬ gʼawˇ mawˇ maˬ ya luˬ maˬ ya seˇ-iˇ-ehˇ, Yuˇdaˆ miˇ kʼahˬ kʼawꞈ maˬ piˬ maˬ byoˆ-iˇ ni jaˆ-euˬ meh.

¹³Sahˬ paˬ Leˬhawˇbamˬ-aˬ, Yeˬluˇsaˬlehˬ meuˬ-ahˇ jawˇ-awˇ uˆ lahˇ-eu laꞈ kʼoeˇ, aˬ yawꞈ-euˬ baoˬ huiˬ laˇ ziꞈ laˇ-euˬ meh. Aˬ yawꞈ sahˬ paˬ pyeuꞈ laˇ ngeh, aˬ yawꞈ-euˬ aˇ kʼoꞈ oeˬ tseˇ tiꞈ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ shiꞈ kʼoꞈ uˆ lahˇ-euˬ meh. Yeˬluˇsaˬlehˬ meuˬ-aˬ, Iˇsaˬleˬlaˆ miˇ kʼahˬ kʼahˬ lah ni laꞈ kʼoeˇ, Sahˬpaˬ Miˬyehˇ-ahˇ uˬ duˬ tahˬ-eu jawˇ duˬ bi pyeuꞈ-eu lehˇ, Sahˬpaˬ Miˬyehˇ neh tseˇ doˆ-euˬ meuˬ pyeuꞈ-eu meh. Leˬhawˇbamˬ-euˬ aˬ ma-aˬ, Aˬmoˬ tsawˇ jeuˬ Naˬmaˬ lehˇ myahˇ-euˬ meh.

¹⁴Leˬhawˇbamˬ-aˬ, yaw haiˬ jeˬ tehꞈ-ehˇ mˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ nui kʼahˇ aˬ yawꞈ maˬ poˆ-a.

¹⁵Leˬhawˇbamˬ neh mˇ-euˬ gaˇ deuˬ aˇ dahˬ beh gaˇ neh aˇ saˬ saˬ gaˇ keuˆ ni maˬ ehˇ, aˬ yawꞈ-euˬ miˬ sawˇ zaˬ deuˬ gaˇ kawˆ maˬ ehˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Sheˬmaˇyaˬ-euˬ Laˬsaˬbaˬ sahˬ boꞈ hawˇ-eu, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Iˇdoˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh. Leˬhawˇbamˬ hawˇ-eu Yeˬyawˇbamˬ aˬ nyaꞈ-aˬ, aˬ myah luꞈ tiˬ gʼaˬ tiˇ gʼaˬ guiˇ deuˆ deuˆ-ehˇ jawˇ-euˬ meh.

¹⁶Leˬhawˇbamˬ shiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ deuˬ-euˬ lmˬ bymˇ-ahˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Aˬbiˇyaˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.