Read Akha 2 Laˬsaˬbaˬ 16 Bible Online

2 Laˬsaˬbaˬ 16 - Akha bible

2 Laˬsaˬbaˬ 16

¹Sahˬ paˬ Aˬsaˬ Yuˇdaˆ miˇ kʼahˬ-ahˇ uˆ lahˇ-euˬ smˬ tseˇ koꞈ kʼoꞈ tiˬ kʼoꞈ-ahˇ, Iˇsaˬleˬlaˆ sahˬ paˬ Bawˬshaˬ gʼaˬ Yuˇdaˆ miˇ kʼahˬ-ahˇ uˇ le-awˇ, Yuˇdaˆ miˇ kʼahˬ hawˇ-eu aˬ cawˬ miˇ kʼahˬ yaw kaˬ yaˇ gaˇ gaˇ tawꞈ-eu gaˇ ma-ahˇ laˆ tsoeˬ-eu gʼaˇ duˬ, Laˬmahˇ meuˬ-ahˇ taˆ ziꞈ dah ni tsoˆ-euˬ meh.

²Kʼoeˇ ngeh jawˇ, Uˬ duˬ tahˬ nymˇ nymˇ ma hawˇ-eu sahˬ paˬ-euˬ nymˇ-ahˇ kʼaˇ jaˆ-eu pyuˇ hawˇ-eu shuiˇ deuˬ-ahˇ Aˬsaˬ yuˇ jiˇ-awˇ, Daˬmaˬsehˇ meuˬ-ahˇ jawˇ-eu Suˇliˆ miˇ kʼahˬ-euˬ sahˬ paˬ Beˬhaˬdaˇ jawˇ gaˇ bi biꞈ leˇ-awˇ, heu loꞈ-ehˇ bi tsaꞈ gaˬ leˇ-euˬ meh.

³“Aˇ nyaꞈ-euˬ aˬ da tiˬ gʼaˬ tiˇ gʼaˬ nui ma taꞈ-euˬ loꞈ-ehˇ, aˇ nyaꞈ kʼawꞈ nui ma taꞈ kaˇ-euˇ. Pyuˇ hawˇ-eu shuiˇ heu deuˬ-aˬ, nawˬ-euˬ gʼaˇ duˬ laꞈ sawˬ pyeuꞈ-eu ma. Bawˬshaˬ-euˬ guiˇ maꞈ deuˬ ngaˬ-euˬ miˇ kʼahˬ laꞈ kʼoeˇ neh ya doˆ-iˇ ni, Bawˬshaˬ-ahˇ nawˇ nui ma maˬ taꞈ ni byehˇ-awˬ.”

⁴Aˬsaˬ neh ehˇ-euˬ dawˬ-ahˇ Beˬhaˬdaˇ nui ma tsaˬ-awˇ, aˬ yawꞈ-euˬ guiˇ maꞈ deuˬ-ahˇ uˆ lahˇ-eu yaw huiˬ yaw mahˇ deuˬ hawˇ-eu aˬ yawꞈ maꞈ-euˬ guiˇ maꞈ deuˬ-ahˇ pyehˬ gʼeh-awˇ, Iˇsaˬleˬlaˆ miˇ kʼahˬ-ahˇ jaˆ-eu meuˬ deuˬ-ahˇ guiˇ bi deuˆ-iˇ-euˬ meh. Aˬ yawꞈ maꞈ-aˬ, Iˇyoˬ meuˬ, Daˬ meuˬ, Aˬbeˬlaˇbehˬmawˇkah meuˬ hawˇ-eu, dzaˬ dzaˬ dawˇ dawˇ tawˬ uiˬ taˬ-euˬ meuˬ deuˬ pyeuꞈ-eu Naˬtaˬliˇ miˇ kʼahˬ laꞈ kʼoeˇ kʼaˇ jaˆ-euˬ meuˬ dawˬ tawˆ luꞈ-ahˇ deuˆ za-euˬ meh.

⁵Gaˇ kawˆ kʼoeˇ Bawˬshaˬ ya gaˬ ngeh, Laˬmahˇ meuˬ tsoˆ ziꞈ luꞈ-eu byehˇ dzeh-awˇ doˆ-iˇ-euˬ meh.

⁶Kʼoeˇ naˇ, Yuˇdaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ sahˬ paˬ Aˬsaˬ kuˇ uiˬ-awˇ, Bawˬshaˬ neh Laˬmahˇ meuˬ tsoˆ muiˬ gaˇ geuꞈ-euˬ kʼaˬ lo hawˇ-eu daˇ kawˬ deuˬ baꞈ doˆ-eu gʼaˇ duˬ dawˬ biꞈ-euˬ meh. Kʼaˬ lo hawˇ-eu daˇ kawˬ kʼoeˇ deuˬ-ahˇ, Geˬbaˬ meuˬ hawˇ-eu Miˇzaˬpaˬ meuˬ tsoˆ muiˬ gaˇ aˬ yawꞈ maꞈ geuꞈ-euˬ meh.

⁷Aˇ yamˬ kʼoeˇ yamˬ-ahˇ, Miˬyehˇ gʼaˇ duˬ ngehˬ dah-eu Haˬnaˬniˇ gʼaˬ sahˬ paˬ Aˬsaˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ maˬ gʼoe-ehˇ, Suˇliˆ sahˬ paˬ-ahˇ nawˇ laꞈ jeuˬ shaˇ-euˬ miˇ neh, Iˇsaˬleˬlaˆ[6] sahˬpaˬ-euˬ guiˇ maꞈ deuˬ nawˬ-euˬ laꞈ-ahˇ neh cehˆ dzeuˇ-euˬ meh.

⁸Suˬdaˬ tsawˇ haˬ hawˇ-eu Liˆbyaˇ tsawˇ haˬ deuˬ mahˬ laˆ lawˬ hawˇ-eu mahˬ dziˬ-eu yehˇ gʼawˬ mya ni ahˇ-eu guiˇ maꞈ maꞈ ma deuˬ jawˇ-eu maˬ ngeuˇ-a loˇ. Ehˇ kʼawꞈ, Sahˬpaˬ Miˬyehˇ-ahˇ nawˇ gʼoe-euˬ miˇ neh, aˬ yawꞈ maꞈ-ahˇ nawˇ gʼaˬ leˇ-euˬ maˬ ngeuˇ loˇ.

⁹Miˇ tsaˬ dawˬ tawˆ luꞈ-ahˇ Sahˬpaˬ Miˬyehˇ yaw muiˬ paˬ-ehˇ haw luꞈ-awˇ, aˬ yawꞈ-ahˇ saˇ jaˇ ziꞈ-eu deuˬ-ahˇ gʼaˬ biꞈ luꞈ-eu meh. Nawˇ yaw muiˬ paˬ-ehˇ maˬ shaˇ noeˬ ni kʼoeˇ loꞈ-ehˇ mˇ lehˬ-euˬ miˇ neh, iˬ nah neh aˇ dahˬ beh-awˇ mehˬ hu paw dehꞈ daˆ leꞈ ngeh, nawˇ aˬ myah luꞈ guiˇ ya deuˆ tehꞈ-a.”

¹⁰Dawˬ kʼoeˇ dawˬ baˬ da neh Aˬsaˬ nui ma pehˇ dui dui laˇ-awˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ-ahˇ, tawˬ-ahˇ dawˆ-euˬ meh. Kʼoeˇ ngeh neh aˇ dahˬ beh-awˇ, tsawˇ haˬ tiˬ paˆ na deuˬ-ahˇ Aˬsaˬ yaw kʼaˆ-ehˇ kʼehˬ nehˬ kʼaˆ nehˬ-euˬ meh.

¹¹Aˬsaˬ uˆ lahˇ-euˬ aˇ yamˬ laꞈ kʼoeˇ kʼaˇ pyeuꞈ laˇ-euˬ gaˇ kawˆ deuˬ aˇ dahˬ beh gaˇ neh aˇ saˬ saˬ gaˇ keuˆ ni, Yuˇdaˆ sahˬ paˬ deuˬ hawˇ-eu Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ-ahˇ taˬ-euˬ meh.

¹²Aˬsaˬ sahˬ paˬ geuꞈ-eu smˬ tseˇ gʼoeˬ kʼoꞈ tiˬ kʼoꞈ-ahˇ aˬ kuiˇ naˇ-eu naˇ gawˇ baˬ da neh aˬ yawꞈ kuiˇ kuˆ kuˆ-iˇ-euˬ meh. Ehˇ kʼawꞈ, kʼoeˇ ngeh keuˆ ni Sahˬpaˬ Miˬyehˇ-ahˇ aˬ yawꞈ laꞈ jeuˬ maˬ shaˇ-ehˇ, naˇ gawˇ laˆ saˆ-eu saˬ laˬ gʼoˬ deuˬ-ahˇ tehꞈ-ehˇ gʼoe-euˬ meh.

¹³Kʼoeˇ naˇ, aˬ yawꞈ sahˬ paˬ geuꞈ-eu oeˬ tseˇ tiꞈ kʼoꞈ keuˆ laˇ ngeh, aˬ yawꞈ ziˇ dehꞈ jiˇ-euˬ meh.

¹⁴Kʼoeˇ ngeh, Daˬbiˇ-euˬ meuˬ laꞈ kʼoeˇ aˬ yawꞈ-ahˇ bi baꞈ pahˬ-eu gʼaˇ duˬ aˬ yawˇ yawꞈ taꞈ taˬ-euˬ lmˬ bymˇ laꞈ kʼoeˇ, aˬ yawꞈ-ahˇ baꞈ pahˬ-euˬ meh. Aˬ yawꞈ-euˬ gʼawˇ mawˇ-ahˇ laˆ saˆ-eu gʼaˇ duˬ saw dui dui-eu tsiˇ gʼawˬ nya jeˬ aˬ yawꞈ maꞈ zmˬ-awˇ, miˬ dzaˬ jeˆ bymˇ bymˇ ma bymˇ-awˇ, aˬ yawꞈ gʼaˇ duˬ tsawˇ ngoeˇ ngoeˇ-euˬ meh.