Read Akha 2 Laˬsaˬbaˬ 2 Bible Online

2 Laˬsaˬbaˬ 2 - Akha bible

2 Laˬsaˬbaˬ 2

¹Sahˬpaˬ Miˬyehˇ-ahˇ uˬ duˬ tahˬ-eu nymˇ tiˬ nymˇ hawˇ-eu, aˬ yawꞈ jawˇ-eu sahˬ paˬ-euˬ hawˇ nymˇ tiˬ nymˇ tsoˆ-eu gʼaˇ duˬ, sahˬ paˬ Sawˇlaˬmoˬ noeˬ tsehˆ-euˬ meh.

²Nymˇ tsoˆ-eu mˇ myawˬ keu ka baꞈ uiˬ-eu gʼaˇ duˬ tsawˇ haˬ shiꞈ muiˇ gʼaˬ bi mˇ-awˇ, kʼaˬ lo deh-eu gʼaˇ duˬ tsawˇ haˬ yehꞈ muiˇ gʼaˬ-ahˇ kʼehˇ-euˬ meh. Gaˇ mˇ gaˇ haw-eu pyaˆ-eu gʼaˇ duˬ, tsawˇ haˬ smˬ heˇ koꞈ yaˇ gʼaˬ tseˇ doˆ-euˬ meh.

³Duˇlu sahˬ paˬ Hiˇlamˬ-ahˇ, Sawˇlaˬmoˬ heu loꞈ-ehˇ dawˬ tsaꞈ tsaꞈ ahˇ nehˬ-euˬ meh. “Ngaˬ da Daˬbiˇ nehˬ-ehˇ nawˇ jeˬ gaꞈ taꞈ-awˇ, aˬ yawꞈ jawˇ-eu sahˬ paˬ-euˬ hawˇ nymˇ tsoˆ ngeh nawˇ shuˬ liˇ daˇ kawˬ ahˬ nehˬ-euˬ loꞈ-ehˇ, ngaˬ-ahˇ kʼawꞈ ahˬ nehˬ laꞈ-awˬ.

⁴Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ, uˬ duˬ tahˬ nymˇ tiˬ nymˇ ngaˇ tsoˆ luꞈ-eu ma. Kʼoeˇ-aˬ, ngaˇ hawˇ-eu ngaˬ-euˬ tsawˇ haˬ deuˬ yaw saw jeˬ doꞈ damˬ-eu laꞈ kʼoeˇ, aˬ yawꞈ-ahˇ uˬ duˬ tahˬ-eu muiˬ-eu shawˇ-eu jawˇ duˬ pyeuꞈ tehꞈ-a. Kʼoeˇ gaˇ, muiˬ-eu shawˇ-eu kaˬ muˇ deuˬ maˬ tsehˆ leˇ ni aˬ yawꞈ-ahˇ nga maꞈ lawˇ nehˬ-awˇ, yawˬ shawˬ yawˬ miˇ na luꞈ maˬ ehˇ, Jawˇ nah-ahˇ maˬ ehˇ, La loˆ lah-eu bawˬ-iˬ jahˇ ngeh maˬ ehˇ, muiˬ-eu shawˇ-eu aˇ nah deuˬ-ahˇ maˬ ehˇ, nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ taˬ mahˇ-eu laꞈ kʼoeˇ, miˬ dzaˬ dzah puiˆ-awˇ lawˇ-eu jeˬ nga maꞈ lawˇ ma. Mˬ maˬ maˬ byaˆ zaˇ ziˇ Iˇsaˬleˬlaˆ tsawˇ jeuˬ kʼoeˇ loꞈ-ehˇ mˇ ni aˬ yawꞈ dawˬ biꞈ taˬ-eu jaˆ-eu meh.

⁵Huiˬ dui dui-eu uˬ duˬ tahˬ nymˇ nymˇ ma tiˬ nymˇ tsoˆ ma lehˇ ngaˇ lehˬ hmˬ taˬ-euˬ ma. Aˬ jeˬ miˇ neh ehˇ naˇ, nga maꞈ-euˬ Miˬyehˇ-aˬ, miˬyehˇ dawˬ tawˆ luꞈ naˆ maˬ tseˇ huiˬ-eu mahˇ-eu meh.

⁶Ehˇ kʼawꞈ, tsawˇ haˬ tiˬ gʼaˬ-iˬ Miˬyehˇ gʼaˇ duˬ uˬ duˬ tahˬ nymˇ maˬ tsoˆ nehˬ nya-a. Aˬ jeˬ miˇ neh ehˇ naˇ, huiˬ dui jeˇ dui dui-eu mˬ-ahˇ kʼawꞈ, aˬ yawꞈ jawˇ kʼaˇ maˬ deˇ-a. Kʼoeˇ miˇ neh, aˬ yawꞈ-euˬ mehˬ shi yaw saw jeˬ doꞈ damˬ-eu jawˇ duˬ tsoˆ-eu uˬ taꞈ-ehˇ, aˬ yawꞈ gʼaˇ duˬ uˬ duˬ tahˬ nymˇ ngaˇ aˬ joˆ-ehˇ tsoˆ nya nmˇ.

⁷Shuiˇ, pyuˇ, guiˬ shuiˇ hawˇ-eu shmˇ heu deuˬ tehˆ-eu kʼaˇ-eu gaˇ maˬ ehˇ, saˬ paˇ paˇ puiˇ, neˇ naˆ naˆ-eu saˬ paˇ hawˇ-eu, saˬ paˇ paˇ neˇ zaꞈ-eu mˇ-eu gaˇ maˬ ehˇ, mˇ nya-eu nawˬ-euˬ tsawˇ haˬ tiˬ gʼaˬ ngaˇ jawˇ gaˇ pyehˬ gʼeh leꞈ-awˬ. Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu ngaˬ da Daˬbiˇ neh tseˇ doˆ taˬ-euˬ ba jiˬ deuˬ nehˬ-ehˇ aˬ yawꞈ-ahˇ gaˇ bi mˇ ma.

⁸Daˇ kawˬ deuˆ-eu nawˬ-euˬ tsawˇ haˬ deuˬ nya dui dui-eu gaˇ kawˆ ngaˇ siˬ nya ma. Kʼoeˇ miˇ neh, Leˬbaˬnoˬ gawˬ jawˬ-ahˇ jaˆ-eu, shuˬ liˇ, miˬ shuˬ hawˇ-eu, aˬ laˬ gmˬ miˬ shuˬ diˬ tm deuˬ ngaˇ jawˇ gaˇ bi sha laꞈ-awˬ. Nawˬ-euˬ tsawˇ haˬ kʼoeˇ deuˬ-ahˇ bi caw ba-eu gʼaˇ duˬ, ngaˬ-euˬ tsawˇ haˬ deuˬ pyehˬ gʼeh laꞈ-eu lehˇ ngaˇ lehˬ hmˬ taˬ-euˬ ma.

⁹Aˬ jeˬ miˇ neh ehˇ naˇ, huiˬ dui muiˬ dui dui-eu uˬ duˬ tahˬ nymˇ nymˇ ma tsoˆ-eu lehˇ lehˬ hmˬ taˬ-euˬ miˇ neh, daˇ kawˬ aˇ dzehˬ dzeuˇ ni loˬ-eu meh.

¹⁰Daˇ kawˬ deuˆ-eu nawˬ-euˬ tsawˇ haˬ deuˬ gʼaˇ duˬ, cehˇ tiˬ seh joꞈ, lawˬ loeˇ tiˬ seh joꞈ, aˬ gaꞈ dzaˇ uiˇ koꞈ seh koꞈ muiˇ tsaꞈ hawˇ-eu saˬ loˬ tsiˇ koꞈ seh koꞈ muiˇ tsaꞈ nawˬ-ahˇ bi sha ha laˇ ma.”

¹¹Sahˬ paˬ Hiˇlamˬ gʼaˬ Sawˇlaˬmoˬ-ahˇ heu loꞈ-ehˇ sahˬ boꞈ boꞈ kʼoꞈ nehˬ-euˬ meh. “Sahˬpaˬ Miˬyehˇ aˬ yawꞈ-euˬ tsawˇ jeuˬ-ahˇ gaˬ-eu miˇ neh, nawˬ-ahˇ aˬ yawꞈ maꞈ-euˬ sahˬ paˬ ka nehˬ laꞈ-euˬ meh.

¹²Mˬ hawˇ-eu miˇ-ahˇ beh-euˬ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Noeˬ siˬ noeˬ mawˇ nya-eu jeˬ hawˇ-eu mˇ nya shaˇ nya-eu jeˬ tiˬ byah ni ahˇ-eu gʼaˬ pyeuꞈ-awˇ, Sahˬpaˬ Miˬyehˇ-euˬ uˬ duˬ tahˬ nymˇ hawˇ-eu, yawˬ ha jawˇ-eu gʼaˇ duˬ sahˬ paˬ-euˬ hawˇ nymˇ tsoˆ-eu lehˇ lehˬ hmˬ luꞈ-eu tsawˇ gahˇ ahˇ dui dui-eu aˬ li tiˬ li, Daˬbiˇ-ahˇ Miˬyehˇ biꞈ nehˬ-euˬ meh.

¹³Huˇlamˬ lehˇ myahˇ-euˬ nya dui dui-eu ba jiˬ tiˬ gʼaˬ nawˇ jawˇ gaˇ ngaˇ pyehˬ gʼeh leꞈ ma.

¹⁴Aˬ yawꞈ-euˬ aˬ ma-aˬ, Daˬ tsawˇ jeuˬ pyeuꞈ-awˇ, aˬ yawꞈ-euˬ aˬ da-aˬ, Duˇlu tsawˇ haˬ meh. Aˬ yawꞈ-aˬ, shuiˇ, pyuˇ, guiˬ shuiˇ, shmˇ, kʼaˬ lo hawˇ-eu daˇ kawˬ heu deuˬ-ahˇ taꞈ leˇ-awˇ, yawˬ jeˬ na luꞈ tehˆ nya mˇ nya-eu tsawˇ haˬ meh. Saˬ paˇ paˇ puiˇ, neˇ naˆ naˆ-eu saˬ paˇ, saˬ paˇ paˇ neˇ hawˇ-eu, shawˇ jehˆ ni gʼeh-eu saˬ paˇ heu deuˬ-ahˇ taꞈ leˇ-eu gaˇ yawˬ jeˬ na luꞈ kʼawꞈ, aˬ yawꞈ mˇ nya meh. Aˇ boꞈ toeˬ boꞈ taꞈ boꞈ-eu paw dzeˇ kʼawꞈ nya dui dui-awˇ, aˬ yawꞈ-ahˇ kʼaˇ ehˇ nehˬ-euˬ loꞈ-ehˇ boꞈ doˆ nya meh. Nawˬ-euˬ ba jiˬ deuˬ hawˇ-eu, nawˬ da sahˬ paˬ Daˬbiˇ-euˬ gaˇ mˇ-eu ba jiˬ deuˬ nehˬ-ehˇ aˬ yawꞈ-ahˇ bi mˇ-awˬ.

¹⁵Nymˬ-mˇ, nawˬ neh ehˇ taˬ-euˬ cehˇ, lawˬ loeˇ, aˬ gaꞈ dzaˇ uiˇ hawˇ-eu saˬ loˬ tsiˇ deuˬ bi sha ha laˇ-awˬ.

¹⁶Leˬbaˬnoˬ gawˬ jawˬ deuˬ-ahˇ miˬ shuˬ aˇ bawˇ deuˬ nga maꞈ tuˇ uiˬ-awˇ, poeˇ kaꞈ-awˇ Yuˇbeˬ meuˬ-ahˇ keuˆ ni nawˬ ha keuˆ nehˬ ma. Kʼoeˇ gaˇ neh naˇ, Yeˬluˇsaˬlehˬ meuˬ-ahˇ nawˇ yuˇ keuˆ geuꞈ-awˬ.”

¹⁷Sahˬ paˬ Sawˇlaˬmoˬ-aˬ, aˬ yawꞈ aˬ da Daˬbiˇ neh jahˇ-euˬ loꞈ-ehˇ, Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu aˬ cawˬ tsawˇ jeuˬ dawˬ tawˆ luꞈ-ahˇ tsawˇ seˬ yuˇ-euˬ meh. Aˬ cawˬ tsawˇ jeuˬ dawˬ tawˆ luꞈ tiˬ seh ngaˬ muiˇ smˬ heˇ koꞈ yaˇ gʼaˬ jawˇ luꞈ-eu meh.

¹⁸Shiꞈ muiˇ gʼaˬ-ahˇ, nymˇ tsoˆ gaˇ loˬ-eu mˇ myawˬ keu ka deuˬ bi baꞈ-awˇ, yehꞈ muiˇ gʼaˬ-ahˇ, gawˬ jawˬ doe ni kʼaˬ lo bi deh-euˬ meh. Gaˇ yaw muiˬ paˬ-ehˇ bi mˇ pyeuꞈ nya ni, dzeˇ luꞈ-eu smˬ heˇ koꞈ yaˇ gʼaˬ-ahˇ gaˇ mˇ gaˇ haw-eu pyaˆ-eu deuˬ bi geuꞈ-euˬ meh.