Read Akha 2 Laˬsaˬbaˬ 21 Bible Online

2 Laˬsaˬbaˬ 21 - Akha bible

2 Laˬsaˬbaˬ 21

¹Yeˬhawˇshaˬpaˇ ziˇ jiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ deuˬ-euˬ lmˬ bymˇ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Yeˬhawˇlamˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

²Sahˬ paˬ Yeˬhawˇshaˬpaˇ-euˬ aˬ li Yeˬhawˇlamˬ-aˬ, Aˬzaˬyiˇ, Yeˬheˬlaˇ, Zaˬkaˬliˇ, Aˬzaˬyiˇhu, Miˇkeˬlaˇ hawˇ-eu Sheˬpaˬtiˇ lehˇ myahˇ-euˬ mehˇ nmˇ koꞈ gʼaˬ jawˇ-eu meh.

³Aˬ yawꞈ maꞈ-euˬ aˬ da aˬ yawꞈ maꞈ-ahˇ myaˬ dui dui-eu shuiˇ, pyuˇ hawˇ-eu aˇ poeˬ kʼaˆ-eu myawˬ gahˬ deuˬ biˇ nehˬ-awˇ, aˬ yawꞈ gʼaˬ yawꞈ-ahˇ Yuˇdaˆ miˇ kʼahˬ laꞈ kʼoeˇ jaˆ-eu ziꞈ dah ni tsoˆ taˬ-eu meuˬ tiˬ meuˬ bi dzaˬ-euˬ meh. Ehˇ kʼawꞈ, Yeˬhawˇlamˬ gʼaˬ aˬ yuiꞈ yuiꞈ saˬ pyeuꞈ-eu miˇ neh, Yeˬhawˇshaˬpaˇ neh aˬ yawꞈ-ahˇ sahˬ paˬ ka nehˬ-euˬ meh.

⁴Yeˬhawˇlamˬ-aˬ, miˇ kʼahˬ-ahˇ ziꞈ dah ni uˆ lahˇ gʼaˬ ngeh jawˇ, aˬ yawꞈ-euˬ mehˇ nmˇ deuˬ-ahˇ sehꞈ jiˇ-awˇ, aˬ yuiꞈ aˬ tsu geuꞈ luꞈ-eu Iˇsaˬleˬlaˆ tsawˇ haˬ tiˬ paˆ na deuˬ-ahˇ kʼawꞈ, sehꞈ-euˬ meh.

⁵Yeˬhawˇlamˬ-aˬ, nyiˬ tseˇ nyiꞈ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ yehꞈ kʼoꞈ uˆ lahˇ-euˬ meh.

⁶Sahˬ paˬ Aˬhaˆ hawˇ-eu Iˇsaˬleˬlaˆ sahˬ paˬ nui deuˬ loꞈ-ehˇ, maˬ muiˬ maˬ jaˬ-eu gaˇ ma-ahˇ aˬ yawꞈ cah-euˬ meh. Aˬ jeˬ miˇ neh ehˇ naˇ, Aˬhaˆ-euˬ aˬ buˇ-ahˇ aˬ yawꞈ sheuˬ-euˬ meh. Sahˬpaˬ Miˬyehˇ-euˬ mehˬ shi yaw haiˬ jeˬ aˬ yawꞈ mˇ-euˬ meh.

⁷Ehˇ kʼawꞈ, Daˬbiˇ-euˬ nymˇ jiˇ-ahˇ Sahˬpaˬ Miˬyehˇ maˬ laˆ cawˆ mawꞈ-a. Aˬ jeˬ miˇ neh ehˇ naˇ, Daˬbiˇ-euˬ zaˬ deuˬ uˆ deuˬ-ahˇ aˬ myah luꞈ sahˬ paˬ geuꞈ-eu dzoeˬ dzaˬ bi oꞈ ma lehˇ Daˬbiˇ nehˬ-ehˇ dawˬ ma saˇ jaˇ dzaˬ taˬ-eu jaˆ-eu meh.

⁸Yeˬhawˇlamˬ uˆ lahˇ-eu aˇ nah aˇ yamˬ laꞈ kʼoeˇ, Eˬdoˬ miˇ kʼahˬ-aˬ, Yuˇdaˆ miˇ kʼahˬ-ahˇ puiˬ-awˇ, Yuˇdaˆ miˇ kʼahˬ uˆ lahˇ-eu uˬ moˆ maˬ paˇ jawˇ ni yawˬ haˇ yawˬ ha uˆ lahˇ-eu miˇ kʼahˬ tiˬ kʼahˬ pyeuꞈ-iˇ-euˬ meh.

⁹Kʼoeˇ ngeh, Yeˬhawˇlamˬ hawˇ-eu aˬ yawꞈ-euˬ yaw huiˬ yaw mahˇ deuˬ mahˬ laˆ lawˬ dziˬ-awˇ, Eˬdoˬ miˇ kʼahˬ-ahˇ guiˇ deuˆ-iˇ-awˇ, Eˬdoˬ guiˇ maꞈ deuˬ neh aˬ yawꞈ maꞈ-ahˇ bi loꞈ jawˬ-euˬ meh. Ehˇ kʼawꞈ, aˬ yawꞈ maꞈ uˬ ciꞈ paw tahˬ paˆ doˆ gʼeh-awˇ cehˆ dzeuˇ nya-euˬ meh.

¹⁰Kʼoeˇ ngeh poˆ neh naˇ, Eˬdoˬ miˇ kʼahˬ-aˬ, Yuˇdaˆ miˇ kʼahˬ uˆ lahˇ-eu uˬ moˆ maˬ paˇ jawˇ ni, yawˬ haˇ yawˬ ha uˆ lahˇ-awˇ jawˇ-euˬ meh. Aˇ yamˬ kʼoeˇ yamˬ laꞈ kʼoeˇ, Liˇbaˬnahˬ meuˬ kʼawꞈ, Yeˬhawˇlamˬ-ahˇ puiˬ-euˬ meh. Aˬ jeˬ miˇ neh ehˇ naˇ, aˬ yawꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ byehˇ dzeh-euˬ meh.

¹¹Yuˇdaˆ miˇ kʼahˬ laꞈ kʼoeˇ jaˆ-eu gawˬ jawˬ yaw goˇ deuˬ-ahˇ, lawˇ ciꞈ zaˬ deuˬ uˬ duˬ tahˬ-eu jawˇ duˬ tsoˆ-awˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ deuˬ Sahˬpaˬ Miˬyehˇ-ahˇ mˇ bahˬ ni aˬ yawꞈ sheuˬ gʼeh-euˬ meh.

¹²Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Eˇliˇyaˆ neh, Yeˬhawˇlamˬ-ahˇ sahˬ boꞈ tiˬ taꞈ boꞈ-awˇ heu loꞈ-ehˇ ehˇ nehˬ-euˬ meh. “Nawˬ bawˇ sahˬ paˬ Aˬsaˬ hawˇ-eu nawˬ da sahˬ paˬ Yeˬhawˇshaˬpaˇ-ahˇ nawˇ dzaw geuꞈ-awˇ maˬ dehꞈ-eu miˇ neh, nawˬ poeˬ Daˬbiˇ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ nui ma maˬ saˇ-a.

¹³Aˬhaˆ hawˇ-eu aˬ yawꞈ-euˬ jeˬ nah sahˬ paˬ geuꞈ-euˬ deuˬ neh, Iˇsaˬleˬlaˆ miˇ kʼahˬ Miˬyehˇ-ahˇ saˇ jaˇ maˬ ziꞈ ni sheuˬ bahˬ nehˬ-euˬ loꞈ-ehˇ, nawˇ kʼawꞈ, Iˇsaˬleˬlaˆ sahˬ paˬ kʼoeˇ deuˬ-ahˇ dzaw geuꞈ-awˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ Miˬyehˇ-ahˇ saˇ jaˇ maˬ ziꞈ ni sheuˬ bahˬ nehˬ-euˬ meh. Nawˇ naˆ maˬ tseˇ muiˬ-eu jaˬ-eu nawˬ-euˬ mehˇ nmˇ deuˬ-ahˇ nawˇ sehꞈ-euˬ meh.

¹⁴Haw taˬ yawˬ, nawˬ-euˬ tsawˇ haˬ deuˬ, nawˬ-euˬ aˬ buˇ aˬ li deuˬ hawˇ-eu, nawˬ-euˬ miˬ zaˬ deuˬ-ahˇ Sahˬpaˬ Miˬyehˇ yaw kʼaˆ kʼaˆ-ehˇ kʼehˬ nehˬ-awˇ, nawˬ-euˬ pyuˇ shuiˇ myawˬ gahˬ deuˬ-ahˇ laˆ luˬ laˆ seˇ nehˬ laꞈ tehꞈ-a.

¹⁵Nawˬ-euˬ gʼawˇ mawˇ kʼawꞈ, doeˇ dui dui-eu baw uˇ naˇ-eu naˇ gawˇ ya daˬ-awˇ, baw uˇ kʼoeˆ laꞈ nyiˇ doˆ le ngeh keuˆ ni, tiˬ nah saˇ-i tiˬ nah naˇ kʼaˆ laˇ tehꞈ-a.”

¹⁶Iˬ ma laˆ shaˆ lawˇ deh caw caw-ehˇ jawˇ luꞈ-eu Suˬdaˬ tsawˇ haˬ deuˬ dawˬ peh, Piˇliˇtiˆ tsawˇ haˬ hawˇ-eu Aˬlaˆ tsawˇ haˬ tiˬ paˆ na deuˬ jawˇ luꞈ-eu meh. Aˬ yawꞈ maꞈ Yeˬhawˇlamˬ-ahˇ guiˇ deuˆ leˇ ni Sahˬpaˬ Miˬyehˇ gaˇ kawˆ laˆ doˆ nehˬ-euˬ meh.

¹⁷Aˬ yawꞈ maꞈ Yuˇdaˆ miˇ kʼahˬ-ahˇ uˇ laˇ-awˇ, sahˬ paˬ-euˬ nymˇ-ahˇ goˬ-awˇ, sahˬ paˬ-euˬ miˬ zaˬ deuˬ hawˇ-eu aˬ li deuˬ dawˬ tawˆ luꞈ-ahˇ nyehꞈ gʼeh jiˇ-awˇ, aˬ li zaˬ saˬ gʼaˬ pyeuꞈ-eu Aˬhaˬziˇ tiˬ gʼaˬ tehꞈ-ehˇ dzeˇ yaꞈ-euˬ meh.

¹⁸Kʼoeˇ loꞈ-ehˇ pyeuꞈ laˇ gʼaˬ ngeh, Sahˬpaˬ Miˬyehˇ neh Yeˬhawˇlamˬ kʼoeˇ taˆ doeˇ dui dui-eu baw uˇ naˇ-eu naˇ gawˇ bi keuˆ le-euˬ meh.

¹⁹Nyiˬ kʼoꞈ keuˆ ni tiˬ jawˇ saˇ-iˬ tiˬ jawˇ naˇ kʼaˆ laˇ-awˇ, aˇ saˬ saˬ laˇ ngeh baw uˇ doˆ le-awˇ, naˇ sehꞈ leꞈ-euˬ meh. Aˬ yawꞈ shiˇ ngeh jawˇ, aˬ yawꞈ-euˬ aˬ poeˬ aˬ bawˇ deuˬ shiˇ ngeh loꞈ-ehˇ, miˇ kʼahˬ zaˬ deuˬ aˬ yawꞈ-ahˇ miˬ dzaˬ jehˆ bymˇ maˬ bymˇ nehˬ-a.

²⁰Yeˬhawˇlamˬ-aˬ, smˬ tseˇ nyiꞈ kʼoꞈ byah ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ yehꞈ kʼoꞈ uˆ lahˇ-euˬ meh. Aˬ yawꞈ shiˇ ngeh, tsawˇ haˬ tiˬ gʼaˬ-iˬ maˬ noeˬ shaˬ-a. Daˬbiˇ-euˬ meuˬ laꞈ kʼoeˇ aˬ yawꞈ-ahˇ baꞈ pahˬ nehˬ-euˬ meh. Ehˇ kʼawꞈ, sahˬ paˬ deuˬ-euˬ lmˬ bymˇ-ahˇ maˬ baꞈ pahˬ nehˬ-a.