Read Akha 2 Laˬsaˬbaˬ 22 Bible Online

2 Laˬsaˬbaˬ 22 - Akha bible

2 Laˬsaˬbaˬ 22

¹Aˬlaˆ tsawˇ haˬ tiˬ paˆ na deuˬ uˇ laˇ-awˇ, sahˬ paˬ Yeˬhawˇlamˬ-euˬ aˬ li dawˬ tawˆ luꞈ-ahˇ sehꞈ jiˇ-awˇ, aˬ li zaˬ saˬ gʼaˬ pyeuꞈ-eu Aˬhaˬziˇ tehꞈ-ehˇ dzeˇ yaꞈ-euˬ meh. Kʼoeˇ miˇ neh, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ, Aˬhaˬziˇ-ahˇ aˬ yawꞈ aˬ da-euˬ dah zaˇ sahˬ paˬ bi geuꞈ-euˬ meh.

²Aˬhaˬziˇ sahˬ paˬ pyeuꞈ laˇ ngeh, nyiˬ tseˇ nyiꞈ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ tiˬ kʼoꞈ byah ni uˆ lahˇ-euˬ meh. Aˬ yawꞈ-euˬ aˬ ma-aˬ, Awˇmaˬliˇ-euˬ oeˬ ma Aˬdaˬliˇ meh.

³Aˬhaˆ-euˬ nymˇ jiˇ kʼaˇ dehꞈ-euˬ loꞈ-ehˇ aˬ yawꞈ dehꞈ-euˬ meh. Aˬ jeˬ miˇ neh ehˇ naˇ, aˬ yawꞈ yaw lehˬ yaw ca jeˬ mˇ ni aˬ yawꞈ-euˬ aˬ ma aˬ yawꞈ-ahˇ gʼaˬ biꞈ-euˬ meh.

⁴Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh. Aˬ jeˬ miˇ neh ehˇ naˇ, aˬ yawꞈ-euˬ aˬ da shiˇ dzeuˇ ngeh jawˇ, sahˬ paˬ Aˬhaˆ-euˬ aˇ jeuˬ aˇ ca deuˬ aˬ yawꞈ-ahˇ nui noeˬ nui duˇ biꞈ-awˇ, aˬ yawꞈ lehˬ-iˇ ca-iˇ ni sheuˬ gʼeh-euˬ meh.

⁵Aˬ yawꞈ maꞈ-euˬ ehˇ dawˬ-ahˇ naˇ haˬ-eu laꞈ kʼoeˇ, Iˇsaˬleˬlaˆ sahˬ paˬ Yoˇlamˬ nehˬ-ehˇ aˬ yawꞈ gm leˇ-awˇ, Suˇliˆ sahˬ paˬ Haˬzaˬlehˇ-ahˇ guiˇ deuˆ-euˬ meh. Giˇlaˆ miˇ kʼahˬ Laˬmoˆ meuˬ-ahˇ aˬ yawꞈ maꞈ guiˇ deuˆ-awˇ, Yoˇlamˬ gʼaˬ bi deuˆ tahˬ-euˬ meh.

⁶Yoˇlamˬ gʼaˬ Yeˬzaˬleˬlaˇ meuˬ-ahˇ gʼoꞈ le-awˇ, Laˬmoˆ meuˬ-ahˇ bi deuˆ tahˬ-euˬ naˇ gawˇ kʼoeˇ bi laˆ saˆ luꞈ ngeh, aˬ yawꞈ jawˇ gaˇ Aˬhaˬziˇ dawˬ deh gʼa leˇ-euˬ meh.

⁷Yoˇlamˬ jawˇ gaˇ Aˬhaˬziˇ dawˬ deh gʼa leˇ-eu laꞈ kʼoeˇ, Aˬhaˬziˇ kʼoeˇ taˆ luˬ-iˇ seˇ-iˇ-eu jeˬ keuˆ le ni Sahˬpaˬ Miˬyehˇ jahˇ-euˬ meh. Aˬhaˬziˇ kʼoeˇ gaˇ le keuˆ-awˇ jawˇ ngeh, Aˬhaˆ-euˬ nymˇ jiˇ-ahˇ bi laˆ luˬ bi laˆ seˇ-eu gʼaˇ duˬ Sahˬpaˬ Miˬyehˇ neh tseˇ doˆ-euˬ gʼaˬ pyeuꞈ-eu Nmˇshiˇ-euˬ aˬ li Yeˬhuˇ-ahˇ Yoˇlamˬ aˬ yawꞈ nyaꞈ ya tahˬ puˬ-euˬ meh.

⁸Sahˬpaˬ Miˬyehˇ neh yaˇ kʼaˬ daˇ-euˬ jeˬ Aˬhaˆ-euˬ nymˇ jiˇ kʼoeˇ taˆ bi keuˆ le ni mˇ-eu lehˇ Yeˬhuˇ le ngeh, Aˬhaˬziˇ nehˬ-ehˇ laˇ-euˬ Yuˇdaˆ tsawˇ haˬ aˬ yuiꞈ aˬ tsu deuˬ hawˇ-eu Aˬhaˬziˇ-euˬ zaˬ oeˇ deuˬ-ahˇ tahˬ puˬ-awˇ, dawˬ tawˆ luꞈ-ahˇ sehꞈ-euˬ meh.

⁹Aˬhaˬziˇ-ahˇ poˆ ngeh, Saˬmaˬliˆ meuˬ-ahˇ dzuˇ zaꞈ-awˇ jawˇ gaˇ ya mawˇ-euˬ meh. Aˬ yawꞈ maꞈ aˬ yawꞈ-ahˇ Yeˬhuˇ jawˇ gaˇ nyehꞈ gʼeh-awˇ sehꞈ-euˬ meh. Ehˇ kʼawꞈ, aˬ yawꞈ-euˬ aˬ bawˇ pyeuꞈ-eu sahˬ paˬ Yeˬhawˇshaˬpaˇ-euˬ myaˆ pyawˬ-ahˇ haw-awˇ, aˬ yawꞈ-ahˇ yaw muiˬ paˬ-ehˇ baꞈ pahˬ nehˬ-euˬ meh. Aˬ jeˬ miˇ neh ehˇ naˇ, sahˬ paˬ Yeˬhawˇshaˬpaˇ-aˬ, aˬ yawꞈ kʼaˇ gʼeh nya gaˇ keuˆ ni Sahˬpaˬ Miˬyehˇ-euˬ nui kʼahˇ mˇ-euˬ meh. Kʼoeˇ ngeh, Aˬhaˬziˇ-euˬ nymˇ jiˇ laꞈ kʼoeˇ Yuˇdaˆ miˇ kʼahˬ-ahˇ uˆ lahˇ nya paˬ-ehˇ gʼeh-eu tiˬ gʼaˬ-iˬ maˬ dzeˇ ni pyeuꞈ-iˇ-euˬ meh.

¹⁰Sahˬ paˬ Aˬhaˬziˇ-euˬ aˬ ma Aˬdaˬliˇ-aˬ, aˬ yawꞈ-euˬ aˬ li shiˇ-euˬ gaˇ kawˆ ya gaˬ ngeh, Yuˇdaˆ sahˬ paˬ-euˬ miˬ sawˇ zaˬ dawˬ tawˆ luꞈ-ahˇ sehꞈ-awˬ lehˇ dawˬ biꞈ-euˬ meh.

¹¹Yawˇyaˬdaˇ lehˇ myahˇ-eu piˇ ma tiˬ gʼaˬ-ahˇ dahˬ dzaˬ iˇ-euˬ Yawˇsheˬba lehˇ myahˇ-euˬ Aˬhaˬziˇ-euˬ dmˇ ma tiˬ gʼaˬ jawˇ-eu meh. Yawˇsheˬba-aˬ, Yawˇshaˆ lehˇ myahˇ-euˬ Aˬhaˬziˇ-euˬ aˬ li tiˬ li-ahˇ, aˬ cawˬ neh bi sehꞈ jiˇ-eu lehˇ gʼeh-eu sahˬ paˬ-euˬ aˬ li deuˬ-euˬ yaw kaˬ-ahˇ neh ciˬ cuˇ ni sheuˬ kʼoeˬ doˆ laꞈ-awˇ, uˬ duˬ tahˬ nymˇ nymˇ ma laꞈ kʼoeˇ jaˆ-eu yuꞈ lawˆ tiˬ lawˆ laꞈ kʼoeˇ, aˬ yawꞈ-ahˇ bi bo saˆ-euˬ zaˬ miˬ zaˬ tiˬ gʼaˬ nehˬ-ehˇ tiˬ kawˆ loꞈ-ehˇ sheuˬ zaꞈ taˬ-euˬ meh. Aˬ yawꞈ-ahˇ kʼoeˇ loꞈ-ehˇ sheuˬ zaꞈ nehˬ-awˇ, Aˬdaˬliˇ-euˬ aˬ laꞈ laꞈ kʼoeˇ maˬ bi shiˇ ni bi dzeuˇ-iˇ-euˬ meh.

¹²Aˬdaˬliˇ uˆ lahˇ luꞈ-eu koꞈ kʼoꞈ aˇ yamˬ laꞈ kʼoeˇ, aˬ yawꞈ kʼoeˇ gaˇ dzuˇ zaꞈ-awˇ jawˇ-euˬ meh.