Read Akha 2 Laˬsaˬbaˬ 23 Bible Online

2 Laˬsaˬbaˬ 23 - Akha bible

2 Laˬsaˬbaˬ 23

¹Shiꞈ kʼoꞈ tiˬ kʼoꞈ keuˆ laˇ ngeh jawˇ, Yeˬhawˇyaˬdaˬ-aˬ, aˬ yawꞈ neh lehˬ hmˬ taˬ-euˬ loꞈ-ehˇ mˇ-eu aˇ yamˬ tsaˬ laˇ-euˬ meh lehˇ noeˬ tsehˆ-euˬ meh. Kʼoeˇ naˇ, guiˇ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ ngaˬ gʼaˬ nehˬ-ehˇ aˬ yawꞈ saˇ jaˇ dzaˬ-euˬ meh. Yaw huiˬ yaw mahˇ kʼoeˇ ngaˬ gʼaˬ-aˬ, Yeˬloˇhamˬ-euˬ aˬ li Aˬzaˬliˇ, Yeˬhawˇhaˬnaˬ-euˬ aˬ li Iˇshaˬmeˬlaˇ, Awˇbehˆ-euˬ aˬ li Aˬzaˬyiˇ, Aˬdaˬyaˇ-euˬ aˬ li Mawˇseˬyaˇ hawˇ-eu, Ziˇkaˬliˇ-euˬ aˬ li Eˇliˇshaˬpaˇ meh.

²Yuˇdaˆ miˇ kʼahˬ laꞈ kʼoeˇ kʼaˇ jaˆ-eu meuˬ yawˬ meuˬ na luꞈ-ahˇ aˬ yawꞈ maꞈ cah-iˇ-awˇ, Leˬbiˇ tsawˇ haˬ deuˬ hawˇ-eu, Iˇsaˬleˬlaˆ aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-eu deuˬ-ahˇ, Yeˬluˇsaˬlehˬ meuˬ-ahˇ sheuˬ kʼoꞈ laꞈ-euˬ meh.

³Aˬ yawꞈ maꞈ dawˬ tawˆ luꞈ Uˬ duˬ tahˬ nymˇ nymˇ ma-ahˇ uiˬ leˇ-awˇ, sahˬ paˬ-euˬ aˬ li Yawˇshaˆ nehˬ-ehˇ saˇ jaˇ dzaˬ-euˬ meh. Aˬ yawꞈ maꞈ-ahˇ Yeˬhawˇyaˬdaˬ ehˇ nehˬ-eu, “Shiˇ dzeuˇ-euˬ sahˬ paˬ-euˬ aˬ li heu gaˇ jawˇ luꞈ meh. Sahˬ paˬ Daˬbiˇ-euˬ zaˬ deuˬ uˆ deuˬ-ahˇ dzoeˬ dzaˬ bi oꞈ ma lehˇ Sahˬpaˬ Miˬyehˇ neh saˇ jaˇ dzaˬ taˬ-euˬ jaˆ-eu loꞈ-ehˇ, nymˬ-mˇ aˬ yawꞈ-ahˇ sahˬ paˬ ka nehˬ-eu aˇ yamˬ tsaˬ laˇ taˬ-euˬ meh.

⁴Aˬ dui heu loꞈ-ehˇ jahˇ ma. Jawˇ nah ngeh nah piˇ ma deuˬ hawˇ-eu Leˬbiˇ tsawˇ haˬ deuˬ yawˬ ha-ahˇ daˇ-eu gaˇ mˇ-eu lehˇ laˇ ngeh, aˬ yawꞈ maꞈ laꞈ kʼoeˇ smˬ bymˇ tiˬ bymˇ-aˬ, Uˬ duˬ tahˬ nymˇ lahˇ kʼehˬ deuˬ-ahˇ bi loꞈ ma.

⁵Dzaiˇ smˬ bymˇ tiˬ bymˇ-aˬ, sahˬ paˬ-euˬ nymˇ-ahˇ loꞈ-awˇ, dzeˇ-eu smˬ bymˇ tiˬ bymˇ-aˬ, Dawˬ pehˬ-euˬ lahˇ kʼehˬ-ahˇ bi loꞈ ma. Tsawˇ haˬ dawˬ tawˆ luꞈ Uˬ duˬ tahˬ nymˇ nymˇ ma-euˬ pu kaˬ-ahˇ ya uiˬ laˇ meh.

⁶Gaˇ mˇ-eu daˇ-eu piˇ ma deuˬ hawˇ-eu Leˬbiˇ tsawˇ haˬ deuˬ maˬ ngeuˇ naˇ, tsawˇ haˬ tiˬ gʼaˬ-iˬ Uˬ duˬ tahˬ nymˇ nymˇ ma-ahˇ maˬ ya uˇ leˇ-a. Piˇ ma deuˬ hawˇ-eu Leˬbiˇ tsawˇ haˬ deuˬ-aˬ, uˇ leˇ nya meh. Aˬ jeˬ miˇ neh ehˇ naˇ, aˬ yawꞈ maꞈ-aˬ, gʼawˇ mawˇ a nehˬ taˬ-euˬ tsawˇ haˬ deuˬ pyeuꞈ-eu meh. Ehˇ kʼawꞈ, nui deuˬ-aˬ, Sahˬpaˬ Miˬyehˇ neh mehˬ nehˬ tsoˆ nehˬ-euˬ dawˬ-ahˇ naˇ haˬ geuꞈ-awˇ laꞈ nyiˇ ya jawˇ meh.

⁷Leˬbiˇ tsawˇ haˬ deuˬ-aˬ, sahˬ paˬ-euˬ jawˬ jawˬ-ehˇ mi cehˇ gʼawˇ doˆ-awˇ loꞈ-awˇ, sahˬ paˬ kʼaˇ iˇ gaˇ ya caw teh meh. Uˬ duˬ tahˬ nymˇ nymˇ ma laꞈ kʼoeˇ uˇ leˇ-eu lehˇ kʼaˇ leh jeh-eu tsawˇ haˬ-ahˇ ya sehꞈ meh.”

⁸Leˬbiˇ tsawˇ haˬ deuˬ hawˇ-eu Yuˇdaˆ tsawˇ haˬ deuˬ Yeˬhawˇyaˬdaˬ neh mehˬ nehˬ tsoˆ nehˬ taˬ-euˬ loꞈ-ehˇ mˇ-euˬ meh. Jawˇ nah ngeh nah yawˬ ha-ahˇ daˇ-eu gaˇ mˇ gʼaˬ-awˇ gʼoꞈ-iˇ-eu tsaˬ-eu deuˬ-ahˇ kʼawꞈ maˬ pyehˬ nehˬ-euˬ miˇ neh, gaˇ mˇ laˇ-eu lehˇ laˇ-euˬ deuˬ nehˬ-ehˇ tiˬ kawˆ loꞈ-ehˇ, yaw huiˬ deuˬ uˆ lahˇ-eu uˬ moˆ tiˬ gaˇ uiˬ leˇ jiˇ taˬ-euˬ meh.

⁹Yeˬhawˇyaˬdaˬ-aˬ, Uˬ duˬ tahˬ nymˇ nymˇ ma laꞈ kʼoeˇ jeˬ hmˬ taˬ-euˬ sahˬ paˬ Daˬbiˇ-euˬ gahˬ deuˬ hawˇ-eu dehˬ daˬ duˬ deuˬ yuˇ-awˇ, yaw huiˬ yaw mahˇ kʼoeˇ deuˬ-ahˇ biꞈ-euˬ meh.

¹⁰Sahˬ paˬ-ahˇ bi loꞈ piˇ-eu gʼaˇ duˬ, Uˬ duˬ tahˬ nymˇ nymˇ ma-euˬ mehˬ shi tiˬ jawˬ, tsawˇ haˬ kʼoeˇ deuˬ-ahˇ mi cehˇ gʼawˇ doˆ-awˇ bi loꞈ-euˬ meh.

¹¹Kʼoeˇ naˇ, Yeˬhawˇyaˬdaˬ gʼaˬ Yawˇshaˆ-ahˇ laꞈ nyiˇ sheuˬ doˆ leꞈ-awˇ, sahˬ paˬ-euˬ uˬ kʼoˆ bi kʼoˆ-awˇ, dzoeˬ dzaˬ-eu sahˬ paˬ deuˬ-ahˇ taꞈ leˇ-eu zahˇ sahˇ kʼoꞈ sahˬ boꞈ tiˬ taꞈ biꞈ nehˬ-euˬ meh. Kʼoeˇ loꞈ-ehˇ jahˇ-awˇ, Yawˇshaˆ-ahˇ sahˬ paˬ ka nehˬ-euˬ meh. Piˇ ma Yeˬhawˇyaˬdaˬ hawˇ-eu aˬ yawꞈ-euˬ aˬ li deuˬ Yawˇshaˆ-ahˇ tsiˇ lehꞈ nehˬ-awˇ, tsawˇ haˬ dawˬ tawˆ luꞈ, “Sahˬ paˬ ziˇ baw luꞈ-uˇ” lehˇ guˇ-euˬ meh.

¹²Tsawˇ haˬ kʼoeˇ deuˬ sahˬ paˬ-ahˇ ja ceuˬ luꞈ gaˇ Aˬdaˬliˇ ya gaˬ ngeh, tsawˇ haˬ aˇ maꞈ uiˬ leˇ taˬ-euˬ Uˬ duˬ tahˬ nymˇ nymˇ ma-ahˇ cehˆ gʼeh-euˬ meh.

¹³Kʼoeˇ ngeh, Uˬ duˬ tahˬ nymˇ nymˇ ma-euˬ gʼoˆ kʼehˬ dawˬ peh jaˆ-eu sahˬ paˬ deuˬ-euˬ jawˇ duˬ-ahˇ sahˬ paˬ yaw shuiꞈ kʼoeˇ gʼaˬ yawꞈ luꞈ-awˇ, guiˇ maꞈ deuˬ-ahˇ uˆ lahˇ-eu yaw huiˬ yaw mahˇ deuˬ hawˇ-eu daˇ heh baw-eu tsawˇ haˬ deuˬ, sahˬ paˬ-euˬ tiˬ jawˬ jawˇ luꞈ gaˇ Aˬdaˬliˇ ya mawˇ-euˬ meh. Tsawˇ haˬ dawˬ tawˆ luꞈ laˬ kʼaˬ cehˇ taˆ ni guˇ guˇ-ehˇ, daˇ heh baw luꞈ-eu meh. Uˬ duˬ tahˬ nymˇ nymˇ ma laꞈ kʼoeˇ caˇ dawˬ caˇ-eu paw gaˇ mˇ luꞈ-eu deuˬ-aˬ, deuˇ mˬ diˬ cehˇ lehˇ ciˆ-awˇ, bawˬ law baw-eu laꞈ kʼoeˇ, sahˬ paˬ ka nehˬ-eu bawˬ-iˬ jahˇ gaˇ sheuˬ gʼeh luꞈ-eu meh. Kʼoeˇ ngeh, Aˬdaˬliˇ nui ma cawˆ dui dui-eu laꞈ kʼoeˇ yawˬ ha-euˬ mehˬ tsoeˬ cehˬ pyaˬ-awˇ, “Ngaˬ-ahˇ puiˬ-euˬ ngaˇ. Ngaˬ-ahˇ puiˬ-euˬ ngaˇ” lehˇ guˇ-eu meh.

¹⁴Yeˬhawˇyaˬdaˬ-aˬ, Aˬdaˬliˇ-ahˇ Uˬ duˬ tahˬ nymˇ nymˇ ma-euˬ laꞈ kʼoeˇ maˬ bi sehꞈ mawꞈ-eu miˇ neh, guiˇ maꞈ kʼoeˇ taˆ uˆ lahˇ-eu deuˬ-ahˇ kuˇ doˆ-awˇ, heu loꞈ-ehˇ ehˇ nehˬ-euˬ meh. “Loꞈ luꞈ-eu deuˬ-euˬ yaw kaˬ-ahˇ neh tsawˇ haˬ heu gʼaˬ-ahˇ gʼeu doˆ gʼeh-awˇ, aˬ yawꞈ-ahˇ ka kʼoꞈ-eu lehˇ leh jeh-eu tsawˇ haˬ aˬ geu gʼaˬ-ahˇ maˬ kaˬ sehꞈ-awˬ.”

¹⁵Aˬ yawꞈ maꞈ Aˬdaˬliˇ-ahˇ nyehꞈ-awˇ, sahˬ paˬ-euˬ nymˇ-ahˇ sheuˬ gʼeh-awˇ, Mahˬ-euˬ lahˇ kʼehˬ-ahˇ aˬ yawꞈ-ahˇ sehꞈ-euˬ meh.

¹⁶Piˇ ma Yeˬhawˇyaˬdaˬ-aˬ, sahˬ paˬ Yawˇshaˆ hawˇ-eu tsawˇ haˬ dawˬ tawˆ luꞈ-ahˇ, Sahˬpaˬ Miˬyehˇ-euˬ tsawˇ haˬ geuꞈ ma lehˇ aˬ yawꞈ nehˬ-ehˇ tiˬ kawˆ loꞈ-ehˇ dawˬ ma saˇ jaˇ bi dzaˬ-euˬ meh.

¹⁷Kʼoeˇ naˇ, aˬ yawꞈ maꞈ dawˬ tawˆ luꞈ Baˬlaˇ miˬyehˇ-euˬ uˬ duˬ tahˬ nymˇ-ahˇ iˇ-awˇ deh pyaˆ-euˬ meh. Kʼoeˇ gaˇ jaˆ-eu lawˇ duˬ deuˬ hawˇ-eu tahˬ pahˬ aˬ ma mawˇ kawˇ deuˬ deh pyaˆ deh shaˆ jiˇ-awˇ, Baˬlaˇ miˬyehˇ-euˬ piˇ ma Maˬtaˬ-ahˇ lawˇ duˬ kʼoeˇ deuˬ-euˬ mehˬ shi sehꞈ-euˬ meh.

¹⁸Yeˬhawˇyaˬdaˬ-aˬ, piˇ ma deuˬ hawˇ-eu Leˬbiˇ tsawˇ haˬ deuˬ-ahˇ, Uˬ duˬ tahˬ nymˇ nymˇ ma-ahˇ bi haw bi pyaˆ-euˬ meh. Aˬ yawꞈ maꞈ-aˬ, sahˬ paˬ Daˬbiˇ neh aˬ yawꞈ maꞈ-ahˇ biꞈ taˬ-euˬ gaˇ deuˬ mˇ-awˇ, Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ ahˇ-eu loꞈ-ehˇ, miˬ dzaˬ dzah puiˆ-awˇ lawˇ-eu shehˇ-eu jeˬ Sahˬpaˬ Miˬyehˇ-ahˇ ya lawˇ nehˬ-eu meh. Caˇ dawˬ caˇ gaˇ maˬ ehˇ, bawˬ-iˬ gʼeh gaˇ maˬ ehˇ, aˬ yawꞈ maꞈ ya haw ya pyaˆ-eu meh.

¹⁹Zahˇ sahˇ kʼoꞈ-ahˇ bahˬ-eu maˬ shawˇ-eu tsawˇ haˬ deuˬ Uˬ duˬ tahˬ nymˇ nymˇ ma-ahˇ maˬ ya uˇ leˇ ni, Uˬ duˬ tahˬ nymˇ nymˇ ma-euˬ lahˇ kʼehˬ deuˬ-ahˇ Yeˬhawˇyaˬdaˬ neh kʼehˇ taˬ-awˇ bi loꞈ-euˬ meh.

²⁰Guiˇ maꞈ deuˬ kʼoeˇ taˆ uˆ lahˇ-eu yaw huiˬ yaw mahˇ deuˬ maˬ ehˇ, miˇ kʼahˬ zaˬ deuˬ kʼoeˇ taˆ aˬ yuiꞈ aˬ tsu geuꞈ-eu deuˬ maˬ ehˇ, miˇ kʼahˬ gaˇ mˇ-eu yaw huiˬ yaw mahˇ deuˬ maˬ ehˇ, miˇ kʼahˬ zaˬ dawˬ tawˆ luꞈ maˬ ehˇ, Yeˬhawˇyaˬdaˬ nehˬ-ehˇ tiˬ kawˆ loꞈ-ehˇ, sahˬ paˬ Yawˇshaˆ-ahˇ Uˬ duˬ tahˬ nymˇ nymˇ ma-ahˇ neh sahˬ paˬ-euˬ nymˇ-ahˇ sheuˬ ha nehˬ-euˬ meh. Aˬ yawꞈ maꞈ lahˇ kʼehˬ kʼehˬ ma kʼehˬ-ahˇ neh uˇ leˇ-awˇ, sahˬ paˬ Yawˇshaˆ gʼaˬ dzoeˬ dzaˬ nuiˇ mahˬ-ahˇ nuiˇ leˇ-euˬ meh.

²¹Miˇ kʼahˬ zaˬ dawˬ tawˆ luꞈ laˬ kʼaˬ cehˇ dui dui-eu meh. Aˬdaˬliˇ-ahˇ sehꞈ-euˬ miˇ neh, meuˬ meuˬ lah-ehˇ ciˬ cuˇ ni jaˆ-eu meh.