Read Akha 2 Laˬsaˬbaˬ 25 Bible Online

2 Laˬsaˬbaˬ 25 - Akha bible

2 Laˬsaˬbaˬ 25

¹Aˬmaˬziˇ-aˬ, nyiˬ tseˇ ngaˬ kʼoꞈ kʼawˆ ngeh sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ tseˇ gʼoeˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Yeˬluˇsaˬlehˬ meuˬ-ahˇ jawˇ-eu Yeˬhawˇdeˬ meh.

²Sahˬpaˬ Miˬyehˇ nui ma tsaˬ-euˬ jeˬ-ahˇ aˬ yawꞈ mˇ-euˬ meh. Ehˇ kʼawꞈ, nui ma keuˆ-awˇ mˇ-euˬ maˬ ngeuˇ-a.

³Aˬ yawꞈ-euˬ miˇ kʼahˬ-ahˇ uˆ lahˇ ziꞈ gʼaˬ ngeh jawˇ, aˬ yawꞈ-euˬ aˬ da-ahˇ sehꞈ-euˬ yaw huiˬ yaw mahˇ deuˬ-ahˇ aˬ yawꞈ sehꞈ-euˬ meh.

⁴Ehˇ kʼawꞈ, Moˇseˬ-euˬ zahˇ dawˬ kʼoꞈ dawˬ laꞈ kʼoeˇ Sahˬpaˬ Miˬyehˇ neh ehˇ taˬ-euˬ dawˬ-ahˇ naˇ haˬ geuꞈ-eu laꞈ kʼoeˇ, aˬ yawꞈ maꞈ-euˬ zaˬ deuˬ-ahˇ aˬ yawꞈ maˬ sehꞈ ni taˬ nehˬ-euˬ meh. Moˇseˬ-euˬ zahˇ dawˬ kʼoꞈ dawˬ laꞈ kʼoeˇ heu loꞈ-ehˇ ehˇ taˬ-euˬ meh. “Zaˬ neh mˇ lehˬ-euˬ iˬ baˇ baˬ da neh aˬ ma aˬ da-ahˇ maˬ ya sehꞈ-a. Aˬ ma aˬ da neh mˇ lehˬ-euˬ iˬ baˇ baˬ da neh kʼawꞈ, zaˬ-ahˇ maˬ ya sehꞈ-a. Tsawˇ haˬ aˬ geu gʼaˬ maˬ kaˬ, yawˬ ha neh mˇ lehˬ-euˬ iˬ baˇ baˬ da neh maˬ ngeuˇ naˇ, nui gʼaˬ neh mˇ lehˬ-euˬ iˬ baˇ baˬ da neh maˬ ya bi sehꞈ-a.”

⁵Yuˇdaˆ aˇ jeuˬ aˇ ca hawˇ-eu Beˬyaˬmiˬ aˇ jeuˬ aˇ ca dawˬ tawˆ luꞈ-ahˇ sahˬ paˬ Aˬmaˬziˇ kuˇ uiˬ-awˇ, yawˬ ha aˇ jeuˬ yawˬ ha guiˇ maꞈ biˇ baw nehˬ-awˇ, tiˬ heˇ gʼaˬ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu tiˬ yaˇ gʼaˬ kʼoeˇ taˆ uˆ lahˇ-eu yaw huiˬ yaw mahˇ deuˬ tseˇ doˆ-awˇ bi uˆ lahˇ-euˬ meh. Nyiˬ tseˇ kʼoꞈ-ahˇ neh laꞈ taˆ paw-euˬ tsawˇ haˬ yawˬ gʼaˬ na luꞈ-ahˇ aˬ yawꞈ kuˇ uiˬ-awˇ, dawˬ tawˆ luꞈ smˬ seh gʼaˬ byah-eu meh. Aˬ yawꞈ maꞈ-aˬ, tseˇ doˆ taˬ-euˬ yehˇ deuˬ pyeuꞈ-awˇ, gahˬ hawˇ-eu dehˬ daˬ duˬ baꞈ-awˇ guiˇ deuˆ nya-eu deuˬ meh.

⁶Kʼoeˇ uˬ taꞈ, pyuˇ nyiˬ heˇ oeˬ tseˇ jawꞈ-i ehˇ gʼaˬ ni biꞈ-awˇ, Iˇsaˬleˬlaˆ yehˇ tiˬ seh gʼaˬ aˬ yawꞈ ngaˬ taˬ-euˬ meh.

⁷Ehˇ kʼawꞈ, Miˬyehˇ gʼaˇ duˬ ngehˬ dah-eu tiˬ gʼaˬ aˬ yawꞈ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Iˇsaˬleˬlaˆ yehˇ heu deuˬ-ahˇ nawˇ taˬ sheuˬ gʼeh. Laꞈ taˆ kʼahˬ-ahˇ jawˇ-eu tsawˇ haˬ heu deuˬ nehˬ-ehˇ Sahˬpaˬ Miˬyehˇ maˬ jawˇ-a.

⁸Aˬ yawꞈ maꞈ-ahˇ sheuˬ gʼeh naˇ, nawˬ-euˬ guiˇ maꞈ gʼaˬ kʼaˆ dzehˬ tehꞈ-a lehˇ nawˇ noeˬ tehꞈ-a. Guiˇ deuˆ-eu gʼaˬ leˇ ni hawˇ-eu sm ni jahˇ-eu baoˬ Miˬyehˇ-euˬ aˬ laꞈ laꞈ kʼoeˇ jaˆ-eu meh. Nawˇ ya sm-iˇ ni Miˬyehˇ jahˇ tehꞈ-a.”

⁹Miˬyehˇ gʼaˇ duˬ ngehˬ dah-eu kʼoeˇ gʼaˬ-ahˇ Aˬmaˬziˇ ehˇ nehˬ-eu, “Toˆ-ehˇ ngeuˇ naˇ ngaˬ neh aˬ yawꞈ maꞈ gʼaˇ duˬ biꞈ taˬ-euˬ pyuˇ kʼoeˇ deuˬ aˬ joˆ-ehˇ jahˇ nmˇ.” Miˬyehˇ gʼaˇ duˬ ngehˬ dah-eu kʼoeˇ gʼaˬ ehˇ-eu, “Kʼoeˇ myaˆ maˬ tseˇ Sahˬpaˬ Miˬyehˇ nawˬ-ahˇ biꞈ kʼoꞈ nehˬ laꞈ nya tehꞈ-a.”

¹⁰Kʼoeˇ naˇ, Aˬmaˬziˇ-aˬ, aˬ yawꞈ neh ngaˬ taˬ-euˬ yehˇ kʼoeˇ deuˬ-ahˇ maˬ paˇ kuˇ ni bi gʼoꞈ leˇ-euˬ meh. Aˬ yawꞈ maꞈ Yuˇdaˆ tsawˇ haˬ deuˬ-ahˇ nui ma pehˇ dui dui-eu laꞈ kʼoeˇ gʼoꞈ leˇ-euˬ meh.

¹¹Aˬmaˬziˇ nui ma kʼaˬ duˬ ni taˬ-awˇ, aˬ yawꞈ-euˬ guiˇ maꞈ-ahˇ, Saˬdeuꞈ deh kʼawꞈ-ahˇ sheuˬ gʼeh-euˬ meh. Kʼoeˇ gaˇ aˬ yawꞈ maꞈ guiˇ deuˆ-awˇ, Eˬdoˬ yehˇ tiˬ muiˇ gʼaˬ-ahˇ deuˆ sehꞈ-euˬ meh.

¹²Tiˬ muiˇ gʼaˬ-ahˇ yaw dehꞈ-ehˇ nyehꞈ mi-awˇ, Seˇlaˇ meuˬ dawˬ peh jaˆ-eu lo guˇ-ahˇ nyehꞈ daˆ leꞈ-euˬ meh. Yehˇ kʼoeˇ deuˬ-ahˇ lo guˇ mehˬ dzaˬ-ahˇ neh biˬ ka-awˇ, kʼaˬ lo lo gahˬ kʼoeˇ taˆ bi ga deh sehꞈ jiˇ-euˬ meh.

¹³Kʼoeˇ ngeh, Aˬmaˬziˇ neh guiˇ deuˆ gaˇ maˬ sheuˬ gʼeh-ehˇ bi gʼoꞈ leˇ-euˬ Iˇsaˬleˬlaˆ yehˇ kʼoeˇ deuˬ, Saˬmaˬliˆ meuˬ hawˇ-eu Behˬhawˇleuˬ meuˬ yaw kaˬ-ahˇ jaˆ-eu Yuˇdaˆ meuˬ deuˬ-ahˇ guiˇ deuˆ-awˇ, tsawˇ haˬ smˬ heˇ gʼaˬ sehꞈ-awˇ, pyuˇ shuiˇ myawˬ gahˬ gʼawˬ mya ni yuˇ geuꞈ gʼeh-euˬ meh.

¹⁴Eˬdoˬ tsawˇ haˬ-ahˇ Aˬmaˬziˇ deuˆ gʼaˬ-awˇ gʼoꞈ laˇ ngeh, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ aˬ yawꞈ yuˇ kʼoꞈ laꞈ-euˬ meh. Tahˬ pahˬ aˬ ma mawˇ kawˇ kʼoeˇ deuˬ-ahˇ aˬ yawꞈ ka tuˇ-awˇ, uˬ duˬ tahˬ-eu laꞈ kʼoeˇ, yaw saw jeˬ doꞈ-awˇ damˬ nehˬ-euˬ meh.

¹⁵Kʼoeˇ loꞈ-ehˇ mˇ gaˇ Sahˬpaˬ Miˬyehˇ nui ma pehˇ-awˇ, Aˬmaˬziˇ jawˇ gaˇ aˬ yawꞈ gʼaˇ duˬ ngehˬ dah-eu tiˬ gʼaˬ pyehˬ gʼeh-euˬ meh. Miˬyehˇ gʼaˇ duˬ ngehˬ dah-eu kʼoeˇ gʼaˬ Aˬmaˬziˇ-ahˇ ehˇ nehˬ-eu, “Nawˬ-euˬ laꞈ-ahˇ neh yawˬ ha-euˬ tsawˇ jeuˬ-ahˇ kʼawꞈ maˬ ka kʼoꞈ nehˬ nya-eu boeˇ miˬ siˬ kʼaˬ-euˬ miˬ yehˇ teu deuˬ-ahˇ aˬ jeˬ miˇ neh nawˇ uˬ duˬ tahˬ te.”

¹⁶Aˬmaˬziˇ ehˇ-eu, “Sahˬ paˬ-ahˇ bi ja noeˬ bi ja duˇ-eu gʼaˬ bi geuꞈ-eu lehˇ nga maꞈ nawˬ-ahˇ aˬ myah tseˇ doˆ taˬ ta. Dawˬ maˬ ngehˬ ni ciˬ cuˇ ni jawˇ-awˬ. Nymˬ-mˇ ngaˬ neh bi sehꞈ nmˬ-mˇ.” Kʼoeˇ ngeh, Miˬyehˇ gʼaˇ duˬ ngehˬ dah-eu kʼoeˇ gʼaˬ dawˬ maˬ paˇ ngeh ni byehˇ-euˬ meh. Ehˇ kʼawꞈ, heu loꞈ-ehˇ tiˬ dawˬ ehˇ nehˬ yaꞈ-euˬ meh. “Nawˇ heu loꞈ-ehˇ mˇ-awˇ ngaˬ neh ja noeˬ ja duˇ nehˬ-euˬ gaˇ maˬ naˇ haˬ geuꞈ-eu miˇ neh, Miˬyehˇ nawˬ-ahˇ laˆ luˬ laˆ seˇ ma lehˇ noeˬ tsehˆ gʼaˬ-euˬ nymˬ-mˇ ngaˇ siˬ nya ma.”

¹⁷Yuˇdaˆ sahˬ paˬ Aˬmaˬziˇ-aˬ, aˬ yawꞈ-ahˇ nui noeˬ nui duˇ biꞈ-eu deuˬ nehˬ-ehˇ bawˬ dzaˬ-awˇ, Yeˬhuˇ-euˬ oeˬ paˬ pyeuꞈ-awˇ Yeˬhawˇhaˆ-euˬ aˬ li pyeuꞈ-eu Iˇsaˬleˬlaˆ sahˬ paˬ Yeˬhawˇshaˆ jawˇ gaˇ tsawˇ haˬ pyehˬ gʼeh-awˇ, “Guiˇ deuˆ ceh ceh ma” lehˇ bi tsaꞈ gaˬ leˇ-euˬ meh.

¹⁸Yeˬhawˇshaˆ gʼaˬ Aˬmaˬziˇ-ahˇ heu loꞈ-ehˇ paˇ tsaꞈ kʼoꞈ nehˬ-euˬ meh. “Aˇ hu ba, Leˬbaˬnoˬ gawˬ jawˬ-ahˇ dehꞈ-eu aˬ gah baw duˆ tiˬ duˆ neh, shuˬ liˇ aˇ bawˇ tiˬ bawˇ-ahˇ, ‘Nawˬ buˇ ngaˬ li-ahˇ bi mˇ dzaˬ le-awˬ’ lehˇ bi ehˇ gaˬ-iˇ-euˬ meh jeˇ. Kʼoeˇ ngeh, Leˬbaˬnoˬ gawˬ jawˬ-ahˇ jawˇ-eu bawˇ tsahˬ jeˬ zaˬ tiˬ mawˇ oe tsehˆ-awˇ, aˬ gah baw duˆ kʼoeˇ duˆ-ahˇ nawˬ lawˇ-euˬ meh jeˇ.

¹⁹Aˬmaˬziˇ-oˇ, nymˬ-mˇ nawˇ Eˬdoˬ tsawˇ haˬ deuˬ-ahˇ deuˆ gʼaˬ-euˬ miˇ neh, nui ma yaw kʼaˆ-ehˇ huiˬ luꞈ-eu nga laˬ. Ehˇ kʼawꞈ, ciˬ cuˇ ni iˇ kahˇ-ahˇ jawˇ-awˬ lehˇ ngaˇ nawˬ-ahˇ ehˇ mawꞈ miˇ-a. Nawˇ hawˇ-eu nawˬ-euˬ tsawˇ haˬ deuˬ kʼoeˇ taˆ luˬ-iˇ seˇ-iˇ-eu jeˬ keuˆ le ni nawˇ aˬ jeˬ gʼeh leh jeh mawꞈ-eu nya.”

²⁰Ehˇ kʼawꞈ, Yeˬhawˇshaˆ-euˬ dawˬ-ahˇ Aˬmaˬziˇ maˬ naˇ haˬ-a. Aˬ jeˬ miˇ neh ehˇ naˇ, Eˬdoˬ tsawˇ jeuˬ-euˬ tahˬ pahˬ aˬ ma mawˇ kawˇ deuˬ-ahˇ aˬ yawꞈ uˬ duˬ tahˬ-euˬ miˇ neh, Yeˬhawˇshaˆ neh aˬ yawꞈ-ahˇ bi deuˆ gʼaˬ-eu gʼaˇ duˬ Miˬyehˇ nui ma tsaˬ-eu meh.

²¹Kʼoeˇ miˇ neh, Iˇsaˬleˬlaˆ sahˬ paˬ Yeˬhawˇshaˆ gʼaˬ Yuˇdaˆ sahˬ paˬ Aˬmaˬziˇ-ahˇ guiˇ deuˆ-iˇ-awˇ, Yuˇdaˆ miˇ kʼahˬ Behˬsheˬmehˇ meuˬ-ahˇ tahˬ puˬ-awˇ deuˆ ceh ceh-euˬ meh.

²²Iˇsaˬleˬlaˆ guiˇ maꞈ neh Yuˇdaˆ guiˇ maꞈ-ahˇ deuˆ gʼaˬ-awˇ, Yuˇdaˆ yehˇ deuˬ cehˆ gʼoꞈ jiˇ-euˬ meh.

²³Yeˬhawˇshaˆ neh Aˬmaˬziˇ-ahˇ nyehꞈ mi-awˇ, Yeˬluˇsaˬlehˬ meuˬ-ahˇ sheuˬ kʼoꞈ gʼeh-awˇ, Yeˬluˇsaˬlehˬ meuˬ meuˬ lahˇ-ahˇ, Eˇpaˬleˬ lahˇ kʼehˬ-ahˇ neh Laꞈcoeˇ-euˬ lahˇ kʼehˬ-ahˇ keuˆ ni, tiˬ yaˇ lmˇ ehˇ gʼaˬ ni laˆ byaˆ nehˬ-euˬ meh.

²⁴Uˬ duˬ tahˬ nymˇ nymˇ ma laꞈ kʼoeˇ kʼaˇ jaˆ-eu shuiˇ hawˇ-eu pyuˇ deuˬ maˬ ehˇ, AwˇbehˆEˬdoˬ-euˬ zaˬ deuˬ uˆ deuˬ neh bi loꞈ piˇ taˬ-euˬ Uˬ duˬ tahˬ nymˇ nymˇ ma-ahˇ zmˬ-eu mˇ myawˬ keu ka deuˬ maˬ ehˇ, sahˬ paˬ-euˬ nymˇ-ahˇ jaˆ-eu pyuˇ shuiˇ myawˬ gahˬ deuˬ maˬ ehˇ, Yeˬhawˇshaˆ neh Saˬmaˬliˆ meuˬ-ahˇ yuˇ kʼoꞈ gʼeh jiˇ-euˬ meh. Tsawˇ haˬ tiˬ paˆ na deuˬ-ahˇ kʼawꞈ, nyehꞈ daˬ-awˇ gʼoꞈ leˇ-euˬ meh.

²⁵Yuˇdaˆ sahˬ paˬ Aˬmaˬziˇ-aˬ, Iˇsaˬleˬlaˆ sahˬ paˬ Yeˬhawˇshaˆ shiˇ gʼaˬ-awˇ neh, tseˇ ngaˬ kʼoꞈ paˇ dehꞈ yaꞈ-euˬ meh.

²⁶Aˬmaˬziˇ sahˬ paˬ geuꞈ-euˬ aˇ yamˬ laꞈ kʼoeˇ, aˬ yawꞈ neh kʼaˇ mˇ yaꞈ-euˬ gaˇ nui deuˬ aˇ dahˬ beh gaˇ neh aˇ saˬ saˬ gaˇ keuˆ ni, Yuˇdaˆ sahˬ paˬ hawˇ-eu Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁷Sahˬpaˬ Miˬyehˇ-ahˇ aˬ yawꞈ byehˇ dzeh ngeh neh naˇ, Yeˬluˇsaˬlehˬ meuˬ laꞈ kʼoeˇ aˬ yawꞈ-ahˇ muiˇ-eu aˇ muˇ muˇ doˆ laˇ-euˬ meh. Aˇ saˬ saˬ laˇ ngeh jawˇ, Laˬkiˇshaˆ meuˬ-ahˇ aˬ yawꞈ cehˆ-euˬ kʼawꞈ, aˬ yawꞈ-ahˇ muiˇ-eu deuˬ kʼoeˇ gaˇ teh keuˆ leˇ-awˇ, aˬ yawꞈ-ahˇ sehꞈ-euˬ meh.

²⁸Kʼoeˇ naˇ, aˬ yawꞈ-euˬ gʼawˇ mawˇ-ahˇ mahˬ neh Yeˬluˇsaˬlehˬ meuˬ-ahˇ tawˬ kʼoꞈ gʼeh-awˇ, Daˬbiˇ-euˬ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh.