Read Akha 2 Laˬsaˬbaˬ 3 Bible Online

2 Laˬsaˬbaˬ 3 - Akha bible

2 Laˬsaˬbaˬ 3

¹Sawˇlaˬmoˬ-euˬ aˬ da sahˬ paˬ Daˬbiˇ-aˬ, Uˬ duˬ tahˬ nymˇ nymˇ ma tsoˆ-eu pehˇ tsahˇ lehˬ hmˬ taˬ yaꞈ-euˬ meh. Pehˇ tsahˇ kʼoeˇ-aˬ, Yeˬluˇsaˬlehˬ meuˬ Mawˇliˇyaˆ gawˬ jawˬ kʼoeˇ taˆ jaˆ-eu Yeˬbuˇ tsawˇ haˬ Aˬyawˇnahˬ-euˬ cehˇ baw shawˇ duˬ pyeuꞈ-eu meh. Pehˇ tsahˇ kʼoeˇ tsahˇ-ahˇ, sahˬ paˬ Sawˇlaˬmoˬ Uˬ duˬ tahˬ nymˇ nymˇ ma tsoˆ-eu dawꞈ leˇ-euˬ meh.

²Aˬ yawꞈ sahˬ paˬ geuꞈ-eu oeˬ kʼoꞈ tiꞈ kʼoꞈ ba la nyiˬ siˬ tiˬ siˬ-ahˇ aˇ dahˬ beh-awˇ tsoˆ-euˬ meh.

³Sahˬ paˬ Sawˇlaˬmoˬ neh tsoˆ-euˬ Uˬ duˬ tahˬ nymˇ nymˇ ma kʼoeˇ nymˇ-aˬ, yaw mahˇ paw tseˇ ngaˬ lmˇ byah-awˇ, yaw jeˇ paw ngaˬ lmˇ byah-eu meh.

⁴Gʼoˆ kʼehˬ-ahˇ uˇ leˇ-eu nehˬ-ehˇ keuˆ beh beh le-eu lawˆ-aˬ, yaw jeˇ paw Uˬ duˬ tahˬ nymˇ nymˇ ma aˬ yawꞈ jeˇ-eu naˆ ni ngaˬ lmˇ jeˇ-awˇ, yaw goˇ paw smˬ tseˇ lmˇ byah-eu meh. Aˇ lawˆ kʼoeˇ lawˆ-euˬ kaˇ pyawˇ laꞈ kʼoeˇ pyawˬ-ahˇ, maˇ jawˆ ni gʼeh-eu shuiˇ yaw taˬ-euˬ meh.

⁵Aˇ lawˆ lawˆ ma lawˆ aˬ yawꞈ-ahˇ-aˬ, kaˇ pyawˇ-ahˇ shuˬ liˇ teˇ byaꞈ neh tiˬ tiˆ paˇ tawˆ kaˬ-awˇ, maˇ jawˆ ni gʼeh-eu shuiˇ yaw-awˇ, daoˇ aˇ bawˬ aˇ baˇ hawˇ-eu aˇ caˆ caˆ pyehꞈ aˇ baˇ toeˬ boꞈ taˬ-euˬ meh.

⁶Uˬ duˬ tahˬ nymˇ nymˇ ma-ahˇ haw muiˬ dui dui-eu aˇ poeˬ kʼaˆ-eu kʼaˬ lo sehˇ deuˬ myahˬ-awˇ, Paˬlaˬbeˬ miˇ kʼahˬ-ahˇ neh yuˇ laꞈ-euˬ shuiˇ yaw-awˇ laˆ muiˬ-euˬ meh.

⁷Uˬ duˬ tahˬ nymˇ nymˇ ma-euˬ kaˇ pyawˇ deuˬ, pyaꞈ dmˬ deuˬ, laˇ gʼoˆ bahˬ deuˬ, laˇ gʼoˆ paꞈ deuˬ-ahˇ, shuiˇ yaw-awˇ, kaˇ pyawˇ-ahˇ jeˬluˇbeˬ[1] aˇ baˇ toeˬ boꞈ taˬ-euˬ meh.

⁸Laꞈ kʼoeˇ lawˆ pyeuꞈ-eu, muiˬ dui shawˇ dui dui-eu lawˆ lehˇ kuˇ-eu kʼoeˇ lawˆ-aˬ, yaw jeˇ paw Uˬ duˬ tahˬ nymˇ nymˇ ma aˬ yawꞈ jeˇ-eu naˆ ni ngaˬ lmˇ jeˇ-awˇ, yaw mahˇ paw ngaˬ lmˇ byah-eu meh. Muiˬ dui shawˇ dui dui-eu aˇ lawˆ kʼoeˇ lawˆ-euˬ laꞈ kʼoeˇ paw kaˇ pyawˇ deuˬ-ahˇ, shuiˇ tiˬ muiˇ ngaˬ heˇ jawꞈ-i yaw-euˬ meh.

⁹Shuiˇ shmˇ sehˬ deuˬ jahˇ gaˇ, shuiˇ oeˬ kaˇ ehˇ gʼaˬ ni jiˇ leˇ-awˇ, kʼoeˇ taˆ tiˆ-ahˇ jaˆ-eu aˇ lawˆ deuˬ-euˬ laꞈ kʼoeˇ paw kaˇ pyawˇ deuˬ-ahˇ kʼawꞈ, shuiˇ yaw-euˬ meh.

¹⁰Jeˬluˇbeˬ mawˇ kawˇ bi tehˆ-awˇ, shuiˇ yaw-awˇ, muiˬ dui shawˇ dui dui-eu lawˆ-ahˇ bi jaˆ-euˬ meh.

¹¹Jeˬluˇbeˬ mawˇ kawˇ nyiˬ kawˇ-euˬ aˬ dahˇ heu dzaˬ kʼoeˇ dzaˬ doˆ ni ngaˬ lmˇ byah-eu meh. Jeˬluˇbeˬ mawˇ kawˇ yaw beh kawˇ-euˬ aˬ dahˇ tiˬ pyawˬ ngaˬ caˆ byah-awˇ Uˬ duˬ tahˬ nymˇ nymˇ ma-euˬ kaˇ pyawˇ-ahˇ tuˆ-eu meh. Ngaˬ caˆ byah-eu aˬ dahˇ yawˬ pyawˬ yawˬ-aˬ, jeˬluˇbeˬ mawˇ kawˇ yawˬ kawˇ yawˬ-euˬ aˬ dahˇ mehˬ dzaˬ-ahˇ tuˆ-eu meh.

¹²Kʼoeˇ loꞈ-ehˇ duˇ ni, jeˬluˇbeˬ mawˇ kawˇ yawˬ kawˇ yawˬ-euˬ ngaˬ caˆ byah-eu aˬ dahˇ tiˬ pyawˬ-aˬ, Uˬ duˬ tahˬ nymˇ nymˇ ma-euˬ kaˇ pyawˇ yawˬ pyawˬ yawˬ-ahˇ tuˆ-awˇ, aˬ dahˇ yawˬ pyawˬ yawˬ kʼawꞈ, ngaˬ caˆ byah-awˇ, jeˬluˇbeˬ mawˇ kawˇ yaw beh kawˇ-euˬ aˬ dahˇ mehˬ dzaˬ-ahˇ tuˆ-eu meh.

¹³Jeˬluˇbeˬ mawˇ kawˇ kʼoeˇ nyiˬ kawˇ-euˬ aˬ dahˇ heu dzaˬ kʼoeˇ dzaˬ doˆ ni ngaˬ lmˇ byah-eu meh. Mawˇ kawˇ kʼoeˇ nyiˬ kawˇ, aˇ lawˆ lawˆ ma lawˆ-ahˇ mehˬ shiˬ pyawˇ-awˇ yawꞈ luꞈ-eu meh.

¹⁴Muiˬ dui shawˇ dui dui-eu lawˆ-ahˇ taw taˬ-eu saˬ paˇ lawˆ kaˬ-ahˇ, shawˇ jehˆ ni gʼeh-eu saˬ paˇ, saˬ paˇ paˇ puiˇ, neˇ naˆ naˆ-eu saˬ paˇ hawˇ-eu, saˬ paˇ paˇ neˇ neh guꞈ-awˇ, jeˬluˇbeˬ aˇ baˇ aˇ boꞈ boꞈ taˬ-euˬ meh.

¹⁵Sahˬ paˬ Sawˇlaˬmoˬ-aˬ, yehꞈ lmˇ nui paˆ byah-eu kʼawˇ zeuˇ nyiˬ zeuˇ jahˇ-awˇ, Uˬ duˬ tahˬ nymˇ nymˇ ma mehˬ shi ka tuˇ taˬ-euˬ meh. Kʼawˇ zeuˇ aˬ yawꞈ zeuˇ yawꞈ-euˬ uˬ duˬ-ahˇ, ngaˬ caˆ byah-eu uˬ dzo jahˇ tsoꞈ taˬ-euˬ meh.

¹⁶Kʼawˇ zeuˇ-euˬ uˬ dzo-ahˇ, aˇ caˆ caˆ pyehꞈ aˇ baˇ hawˇ-eu, aˇ ka uˆ aˇ siˬ aˇ baˇ tiˬ yaˇ baˇ, guiˬ shuiˇ neh jahˇ tsoꞈ taˬ-euˬ meh.

¹⁷Kʼawˇ zeuˇ kʼoeˇ nyiˬ zeuˇ-ahˇ, Uˬ duˬ tahˬ nymˇ nymˇ ma-ahˇ uˇ leˇ duˬ-euˬ kʼoeˇ paˆ ma paˆ-ehˇ ka tuˇ taˬ-euˬ meh. Laꞈ oˆ paw pyawˬ-ahˇ ka tuˇ taˬ-euˬ zeuˇ-ahˇ Yaˬciˬ[2] lehˇ myahˇ nehˬ-awˇ, laꞈ taˆ paw pyawˬ-ahˇ ka tuˇ taˬ-euˬ zeuˇ-ahˇ Bawˇza[3] lehˇ myahˇ nehˬ-euˬ meh.