Read Akha 2 Laˬsaˬbaˬ 31 Bible Online

2 Laˬsaˬbaˬ 31 - Akha bible

2 Laˬsaˬbaˬ 31

¹Bawˬ-iˬ gʼeh gʼaˬ ngeh, Iˇsaˬleˬlaˆ tsawˇ haˬ dawˬ tawˆ luꞈ Yuˇdaˆ miˇ kʼahˬ laꞈ kʼoeˇ jaˆ-eu meuˬ yawˬ meuˬ na luꞈ-ahˇ iˇ doe-awˇ, kʼaˬ lo kʼawˇ zeuˇ tahˬ pahˬ aˬ ma mawˇ kawˇ deuˬ deh paˆ dzeh-awˇ, Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ deuˬ tuˇ coˬ-awˇ, lawˇ duˬ deuˬ hawˇ-eu lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ laˆ cawˆ jiˇ-euˬ meh. Yuˇdaˆ miˇ kʼahˬ doe ni kʼoeˇ loꞈ-ehˇ jahˇ gʼaˬ ngeh, Beˬyaˬmiˬ miˇ kʼahˬ, Eˇpaˬleˬ miˇ kʼahˬ hawˇ-eu, Maˬnaˇseˬ miˇ kʼahˬ doe ni aˬ yawꞈ maꞈ kʼoeˇ loꞈ-ehˇ jahˇ-iˇ-awˇ, yawˬ ha-euˬ meuˬ-ahˇ gʼoꞈ-iˇ jiˇ-euˬ meh.

²Sahˬ paˬ Heˬsaˬgiˇ-aˬ, piˇ ma hawˇ-eu Leˬbiˇ tsawˇ haˬ deuˬ-ahˇ aˇ muˇ muˇ baw nehˬ-awˇ, yawˬ gʼaˬ na luꞈ aˇ muˇ laꞈ kʼoeˇ yawˬ ha-ahˇ daˇ-eu gaˇ bi mˇ-euˬ meh. Gaˇ kʼoeˇ deuˬ-aˬ, miˬ dzaˬ dzah puiˆ-awˇ lawˇ-eu jeˬ lawˇ nehˬ-eu gaˇ, cawˬ cawˬ taꞈ-eu lawˇ-eu jeˬ lawˇ-eu gaˇ, Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ ngeh ya mˇ-eu gaˇ hawˇ-eu, Uˬ duˬ tahˬ nymˇ nymˇ ma laꞈ kʼoeˇ gʼawˬ mya tsahˇ laꞈ kʼoeˇ Miˬyehˇ-euˬ guiˬ lahˬ-ahˇ noeˬ keuˆ-awˇ ja ceuˬ-eu gaˇ heu deuˬ pyeuꞈ-eu meh.

³Yawˬ shawˬ yawˬ miˇ na luꞈ ya lawˇ-eu miˬ dzaˬ-ahˇ dzah puiˆ-awˇ lawˇ-eu jeˬ gʼaˇ duˬ maˬ ehˇ, jawˇ nah ngeh nah lawˇ-eu jeˬ gʼaˇ duˬ maˬ ehˇ, La shuiꞈ lah-eu Bawˬ-iˬ jahˇ ngeh lawˇ-eu gʼaˇ duˬ maˬ ehˇ, Sahˬpaˬ Miˬyehˇ-euˬ zahˇ dawˬ kʼoꞈ dawˬ laꞈ kʼoeˇ ahˇ-eu bawˬ-iˬ nui deuˬ gʼeh-eu gʼaˇ duˬ maˬ ehˇ, kʼaˇ loˬ-eu jeˬ zaˬ deuˬ gʼaˇ duˬ, sahˬ paˬ Heˬsaˬgiˇ aˬ yawꞈ neh cu taˬ-euˬ jeˬ zaˬ biꞈ-awˇ bi lawˇ-euˬ meh.

⁴“Sahˬpaˬ Miˬyehˇ-euˬ zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, piˇ ma deuˬ hawˇ-eu Leˬbiˇ tsawˇ haˬ deuˬ aˇ yamˬ tiˬ byah ni yuˇ-awˇ mˇ byah shaˇ byah nya ni, aˬ yawꞈ maꞈ-ahˇ oꞈ-eu shaˬ bymˇ deuˬ damˬ nehˬ laˇ-awˬ” lehˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ sahˬ paˬ Heˬsaˬgiˇ dawˬ biꞈ-euˬ meh.

⁵Dawˬ kʼoeˇ dawˬ gaˬ doe-iˇ ngeh jawˇ, Iˇsaˬleˬlaˆ tsawˇ haˬ deuˬ-aˬ, muiˬ dui dui-eu cehˇ deuˬ, aˬ gaꞈ dzaˇ uiˇ deuˬ, saˬ loˬ tsiˇ deuˬ, byaˬ byaˬ uiˇ deuˬ hawˇ-eu, dzaˬ la gʼo cehˇ aˇ siˬ aˇ lu deuˬ damˬ laˇ-euˬ meh. Aˬ yawꞈ maꞈ kʼaˇ jaˆ-eu jeˬ laꞈ kʼoeˇ, tseˇ bymˇ tiˬ bymˇ kʼawꞈ aˬ yawꞈ maꞈ yuˇ laꞈ-awˇ damˬ-euˬ meh.

⁶Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ-ahˇ kʼaˇ jawˇ-eu tsawˇ haˬ dawˬ tawˆ luꞈ, aˬ yawꞈ maꞈ-euˬ jeˬ zaˬ tseˇ bymˇ tiˬ bymˇ yuˇ laꞈ-euˬ uˬ taꞈ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ maꞈ neh damˬ nehˬ-euˬ laꞈ sawˬ deuˬ kʼawꞈ gʼawˬ mya ni yuˇ laꞈ-euˬ meh.

⁷Ba la smˇ siˬ tiˬ siˬ-ahˇ neh aˇ dahˬ beh-awˇ, aˬ yawꞈ maꞈ kʼoeˇ loꞈ-ehˇ damˬ nehˬ laˇ-awˇ, ba la shiꞈ siˬ tiˬ siˬ-ahˇ keuˆ ni maˬ tsehˆ leˇ ni damˬ nehˬ laˇ-euˬ meh.

⁸Aˬ yawꞈ maꞈ neh yuˇ laꞈ-awˇ baꞈ gahˬ taˬ-euˬ laꞈ sawˬ kʼoeˇ deuˬ-ahˇ sahˬ paˬ Heˬsaˬgiˇ hawˇ-eu aˬ yawꞈ-euˬ yaw huiˬ yaw mahˇ deuˬ ya mawˇ ngeh, Sahˬpaˬ Miˬyehˇ hawˇ-eu Iˇsaˬleˬlaˆ tsawˇ haˬ deuˬ-ahˇ ja ceuˬ-euˬ meh.

⁹Laꞈ sawˬ kʼoeˇ deuˬ gaˇ kawˆ, piˇ ma deuˬ hawˇ-eu Leˬbiˇ tsawˇ haˬ deuˬ-ahˇ Heˬsaˬgiˇ naˇ haˬ-euˬ meh.

¹⁰Kʼoeˇ ngeh, “Uˬ duˬ tahˬ nymˇ nymˇ ma laꞈ kʼoeˇ laꞈ sawˬ heu deuˬ yuˇ keuˆ laꞈ ngeh tiˬ nah neh, dzaˬ loꞈ dawˇ loꞈ-eu uˬ taꞈ, gʼawˬ mya ni dzehˬ laˇ taˬ-euˬ meh. Sahˬpaˬ Miˬyehˇ neh aˬ yawꞈ-euˬ tsawˇ haˬ deuˬ-ahˇ guiˬ lahˬ biꞈ nehˬ-euˬ miˇ neh heu myaˆ myaˆ-ehˇ dzehˬ laˇ taˬ-euˬ meh” lehˇ, Zaˬdoˆ-euˬ aˬ li Piˇ ma Yaw huiˬ gʼaˬ pyeuꞈ-eu Zaˬkaˬliˇ neh sahˬ paˬ Heˬsaˬgiˇ-ahˇ ehˇ kʼoꞈ nehˬ-euˬ meh.

¹¹Sahˬ paˬ Heˬsaˬgiˇ neh dawˬ biꞈ-awˇ, Uˬ duˬ tahˬ nymˇ nymˇ ma-ahˇ myawˬ taˬ-eu aˇ lawˆ deuˬ bi tsoˆ baw-euˬ meh.

¹²Kʼoeˇ naˇ, kʼaˇ damˬ nehˬ laˇ-euˬ laꞈ sawˬ deuˬ hawˇ-eu tseˇ bymˇ tiˬ bymˇ-ahˇ, kʼoeˇ gaˇ dawˆ ahˇ-awˇ jeˬ hmˬ-euˬ meh. Leˬbiˇ tsawˇ haˬ Kawˇnaˬniˇ lehˇ myahˇ-euˬ gʼaˬ-ahˇ myawˬ kʼoeˇ deuˬ-ahˇ haw-eu paw aˬ yuiꞈ bi geuꞈ-awˇ, aˬ yawꞈ-euˬ aˬ nyiˇ Shiˇmiˇ gʼaˬ-ahˇ, aˬ yawꞈ-ahˇ caw ba-eu gʼaˬ bi geuꞈ-euˬ meh.

¹³Aˬ nyaꞈ nmˇ-euˬ laꞈ oˆ gaˇ bi mˇ-euˬ Leˬbiˇ tsawˇ haˬ deuˬ-aˬ, Yeˬheˬlaˇ, Aˬzaˬziˇ, Naˬhaˇ, Aˬsaˬheˬlaˇ, Yeˬliˇmoˆ, Yawˇzaˬbaˆ, Eˇliˇlaˆ, Iˇsaˬmaˬkiˇ, Maˬhaˇ hawˇ-eu Baˬnaˇyaˬ meh. Tsawˇ haˬ heu deuˬ-ahˇ sahˬ paˬ Heˬsaˬgiˇ hawˇ-eu Piˇ ma Yaw huiˬ gʼaˬ pyeuꞈ-eu Aˬzaˬliˇ aˬ nyaꞈ neh tseˇ doˆ-awˇ gaˇ biꞈ-euˬ meh.

¹⁴Leˬbiˇ tsawˇ haˬ Iˇmaˬnahˬ-euˬ aˬ li pyeuꞈ-eu, Uˬ duˬ tahˬ nymˇ nymˇ ma-euˬ nahˇ ma doˆ kʼehˬ paw pyawˬ-ahˇ loꞈ-eu deuˬ kʼoeˇ taˆ aˬ yuiꞈ geuꞈ luꞈ-eu Kawˇleˬ-aˬ, Sahˬpaˬ Miˬyehˇ-ahˇ damˬ nehˬ laˇ-euˬ laꞈ sawˬ kʼoeˇ deuˬ-ahˇ ha geuꞈ-awˇ biˇ nehˬ-eu paw aˬ yuiꞈ geuꞈ-awˇ haw-euˬ meh.

¹⁵Piˇ ma deuˬ jawˇ-eu meuˬ nui deuˬ laꞈ kʼoeˇ, Leˬbiˇ tsawˇ haˬ deuˬ pyeuꞈ-eu Eˬdeˬ, Miˇnaˬmeˬ, Yeˬshah, Sheˬmaˇyaˬ, Aˬmaˬliˇ hawˇ-eu Sheˬkaˬniˇ heu deuˬ, aˬ yawꞈ-ahˇ saˇ jaˇ ziꞈ-eu laꞈ kʼoeˇ yaw muiˬ paˬ-ehˇ caw ba nehˬ-euˬ meh. Aˬ yawꞈ maꞈ-aˬ, aˬ yawꞈ maꞈ-euˬ aˇ jeuˬ aˇ ca pyeuꞈ-eu Leˬbiˇ tsawˇ haˬ huiˬ zaˬ nyiˇ zaˬ dawˬ tawˆ luꞈ-ahˇ, dzaˬ dzaˬ dawˇ dawˇ tiˬ kawˆ loꞈ-ehˇ biˇ nehˬ-euˬ meh.

¹⁶Aˬ yawꞈ maꞈ kʼoeˇ loꞈ-ehˇ biˇ nehˬ ngeh, aˇ jeuˬ maˬ biˇ paˆ ni biˇ nehˬ-euˬ meh. Uˬ duˬ tahˬ nymˇ nymˇ ma laꞈ kʼoeˇ gaˇ kʼaˇ mˇ luꞈ-eu smˬ tseˇ kʼoꞈ-ahˇ neh laꞈ taˆ paw-euˬ kʼaˬ dzeˇ zaˬ deuˬ-ahˇ, aˬ yawꞈ maꞈ-euˬ gaˇ mˇ-eu aˇ tiˆ-ahˇ haw-awˇ biˇ nehˬ-euˬ meh.

¹⁷Piˇ ma deuˬ-ahˇ, yawˬ ha aˇ jeuˬ yawˬ ha baw baw-ehˇ gaˇ bi mˇ-euˬ meh. Nyiˬ tseˇ kʼoꞈ-ahˇ neh laꞈ taˆ paw-euˬ Leˬbiˇ tsawˇ haˬ deuˬ-ahˇ-aˬ, aˇ muˇ biˇ baw nehˬ-awˇ gaˇ bi mˇ-euˬ meh.

¹⁸Aˬ yawꞈ maꞈ-euˬ miˬ zaˬ deuˬ, aˬ yawꞈ maꞈ-euˬ zaˬ deuˬ hawˇ-eu, aˬ yawꞈ maꞈ nehˬ-ehˇ kʼaˇ jawˇ-eu tsawˇ haˬ dawˬ tawˆ luꞈ, aˬ yawꞈ maꞈ nehˬ-ehˇ tiˬ kawˆ loꞈ-ehˇ tsawˇ myahˇ dawˆ taˬ-awˇ, aˬ yawꞈ nah yawꞈ dzaˬ dzaˬ dawˇ dawˇ ya biˇ loꞈ nehˬ-eu meh. Aˬ jeˬ miˇ neh ehˇ naˇ, aˬ yawꞈ maꞈ-ahˇ daˇ-eu gaˇ-ahˇ mˇ nya ni, aˬ yawꞈ maꞈ aˇ yamˬ maˬ tseˇ ni ya lehˬ hmˬ dah taˬ-eu meh.

¹⁹Aˬloˬ-euˬ zaˬ deuˬ uˆ deuˬ-ahˇ biˇ oꞈ nehˬ-euˬ meuˬ deuˬ hawˇ-eu, meuˬ kʼoeˇ deuˬ-euˬ jeˬ zaˬ gaˆ kʼahˬ deuˬ-ahˇ jawˇ-eu piˇ ma deuˬ-ahˇ taꞈ leˇ-awˇ, piˇ ma-euˬ nymˇ kʼahˬ laꞈ kʼoeˇ kʼaˇ jawˇ-eu kʼaˬ dzeˇ zaˬ deuˬ hawˇ-eu, Leˬbiˇ aˇ jeuˬ laꞈ kʼoeˇ tsawˇ myahˇ kʼaˇ ahˇ-eu yawˬ gʼaˬ na luꞈ-ahˇ dzaˬ dzaˬ dawˇ dawˇ bi biˇ nehˬ-eu gʼaˇ duˬ tseˇ doˆ taˬ-euˬ deuˬ jawˇ-eu meh.

²⁰Sahˬ paˬ Heˬsaˬgiˇ-aˬ, yaw tsaˬ yaw dawˇ jeˬ hawˇ-eu, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ nui ma tsaˬ-eu jeˬ-ahˇ, Yuˇdaˆ miˇ kʼahˬ doe ni mˇ-euˬ meh.

²¹Uˬ duˬ tahˬ nymˇ nymˇ ma gʼaˇ duˬ mˇ-eu paw maˬ ehˇ, zahˇ dawˬ kʼoꞈ dawˬ mehˬ nah caw teh-eu paw maˬ ehˇ, aˬ yawꞈ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ Miˬyehˇ-ahˇ saˇ jaˇ ziꞈ-awˇ aˬ yawꞈ nui ma tsaˬ-eu loꞈ-ehˇ tehꞈ-ehˇ mˇ-euˬ miˇ neh, aˬ yawꞈ neh mˇ-euˬ gaˇ deuˬ huiˬ laˇ mahˇ laˇ-euˬ meh.