Read Akha 2 Laˬsaˬbaˬ 32 Bible Online

2 Laˬsaˬbaˬ 32 - Akha bible

2 Laˬsaˬbaˬ 32

¹Sahˬ paˬ Heˬsaˬgiˇ-aˬ, Sahˬpaˬ Miˬyehˇ-ahˇ saˇ jaˇ ziꞈ-eu laꞈ kʼoeˇ, aˬ yawꞈ neh mˇ-euˬ gaˇ kʼoeˇ deuˬ mˇ jiˇ shaˇ jiˇ gʼaˬ ngeh, Aˬshuˇliˆ sahˬ paˬ Saˬneˬkaˬliˇ Yuˇdaˆ miˇ kʼahˬ-ahˇ uˇ le-euˬ meh. Ziꞈ dah ni tsoˆ taˬ-euˬ meuˬ deuˬ-ahˇ aˬ yawꞈ loꞈ jawˬ-awˇ, deuˆ gʼaˬ-eu lehˇ lehˬ hmˬ luꞈ-eu meh.

²Saˬneˬkaˬliˇ Yeˬluˇsaˬlehˬ meuˬ-ahˇ guiˇ deuˆ laˇ-eu lehˇ noeˬ taˬ-euˬ gaˇ Heˬsaˬgiˇ ya siˬ ngeh,

³Yeˬluˇsaˬlehˬ meuˬ laꞈ nyiˇ yoeˇ-eu iˇ cuꞈ iˇ byoe deuˬ laˆ tsoeˬ-eu gʼaˇ duˬ, aˬ yawꞈ-euˬ yaw huiˬ yaw mahˇ deuˬ hawˇ-eu guiˇ maꞈ kʼoeˇ taˆ uˆ lahˇ-eu yaw huiˬ deuˬ-ahˇ bawˬ dzaˬ ngeh, aˬ yawꞈ maꞈ aˬ yawꞈ-ahˇ caw ba nehˬ-euˬ meh.

⁴Miˇ kʼahˬ zaˬ gʼawˬ mya ni uiˬ laˇ-awˇ, miˇ kʼahˬ kʼoeˇ kʼahˬ-ahˇ yoeˇ-eu gawˆ zaˬ gawˆ ma dawˬ tawˆ luꞈ-ahˇ laˆ tsoeˬ-euˬ meh. Aˬshuˇliˆ tsawˇ haˬ deuˬ iˇ cuꞈ maˬ ya dawˇ ni aˬ yawꞈ maꞈ kʼoeˇ loꞈ-ehˇ jahˇ-euˬ meh.

⁵Heˬsaˬgiˇ-aˬ, meuˬ meuˬ lahˇ yaw muiˬ paˬ-ehˇ paˇ gawˬ ziꞈ-awˇ, loꞈ-eu nymˇ goˇ deuˬ tsoˆ lahˬ-euˬ uˬ taꞈ, laꞈ nyiˇ paw meuˬ lahˇ tiˬ tiˆ paˇ gawˬ-eu laꞈ kʼoeˇ, Yeˬluˇsaˬlehˬ meuˬ-ahˇ maˬ bi deuˆ gʼaˬ-eu gʼaˇ duˬ yaw muiˬ paˬ-ehˇ laˆ ziꞈ-euˬ meh. Yeˬluˇsaˬlehˬ meuˬ meuˬ oeˇ-euˬ nahˇ ma doˆ kʼehˬ paw miˇ tsaˬ duˬ dzm taˬ-euˬ tsahˇ-ahˇ tsoˆ taˬ-euˬ taˆ kʼoeˇ taˆ kʼawꞈ, aˬ yawꞈ paˇ laˆ muiˬ-euˬ meh. Gahˬ hawˇ-eu dehˬ daˬ duˬ deuˬ kʼawꞈ, gʼawˬ mya ni paˇ jahˇ lahˬ-euˬ meh.

⁶Meuˬ laꞈ kʼoeˇ jawˇ-eu tsawˇ haˬ dawˬ tawˆ luꞈ-ahˇ guiˇ maꞈ kʼoeˇ taˆ uˆ lahˇ-eu yaw huiˬ deuˬ-euˬ laꞈ oˆ bi jawˇ-awˇ, meuˬ-euˬ lahˇ kʼehˬ dawˬ peh jaˆ-eu pu kaˬ-ahˇ bi uiˬ laˇ jiˇ-awˇ, heu loꞈ-ehˇ ehˇ nehˬ-euˬ meh.

⁷“Nui ma kʼaˬ duˬ ni taˬ-eu laꞈ kʼoeˇ gʼaˬ maˬ baˬ-ehˇ, Aˬshuˇliˆ sahˬ paˬ hawˇ-eu aˬ yawꞈ neh sheuˬ laꞈ-euˬ guiˇ maꞈ-ahˇ maˬ guˆ ni jawˇ-awˬ. Aˬ yawꞈ gʼaˬ kʼaˆ-eu naˆ maˬ tseˇ aˬ dui maꞈ gʼaˬ kʼaˆ dzehˬ ma.

⁸Aˬ yawꞈ-aˬ, tsawˇ haˬ zaˬ-euˬ baoˬ tehꞈ-ehˇ jaˆ-eu meh. Ehˇ kʼawꞈ, aˬ dui-aˬ, aˬ dui-ahˇ caw ba-awˇ guiˇ deuˆ-eu gʼaˇ duˬ aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ jawˇ ma.” Yuˇdaˆ sahˬ paˬ Heˬsaˬgiˇ kʼoeˇ loꞈ-ehˇ ehˇ ngeh, aˬ yawꞈ-euˬ tsawˇ haˬ deuˬ gʼaˬ ahˇ laˇ-euˬ meh.

⁹Aˇ nah aˇ yamˬ ui cuiˆ myahˇ laˇ-awˇ, Aˬshuˇliˆ sahˬ paˬ Saˬneˬkaˬliˇ hawˇ-eu aˬ yawꞈ-euˬ guiˇ maꞈ deuˬ Laˬkiˇshaˆ meuˬ-ahˇ jawˬ lahˇ-awˇ jawˇ luꞈ ngeh, Yuˇdaˆ sahˬ paˬ Heˬsaˬgiˇ hawˇ-eu Yeˬluˇsaˬlehˬ meuˬ-ahˇ jawˇ luꞈ-eu Yuˇdaˆ miˇ kʼahˬ zaˬ deuˬ jawˇ gaˇ aˬ yawꞈ-euˬ yaw huiˬ yaw mahˇ deuˬ pyehˬ gʼeh-awˇ, heu loꞈ-ehˇ bi tsaꞈ gaˬ leˇ-euˬ meh.

¹⁰“Aˬshuˇliˆ sahˬ paˬ pyeuꞈ-eu ngaˇ Saˬneˬkaˬliˇ naw maꞈ-ahˇ heu loꞈ-ehˇ ehˇ-eu ma. Jawˬ lahˇ taˬ-euˬ Yeˬluˇsaˬlehˬ meuˬ laꞈ kʼoeˇ, naw maꞈ aˬ jeˬ-ahˇ noeˬ tmˬ-awˇ dzuˇ dzuˇ-ehˇ jawˇ te.

¹¹Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, nga maꞈ-euˬ laꞈ-ahˇ neh naw maꞈ-ahˇ ka kʼoꞈ nehˬ laꞈ tehꞈ-a lehˇ Heˬsaˬgiˇ naw maꞈ-ahˇ ehˇ-eu meh. Ehˇ kʼawꞈ, naw maꞈ dzaˬ-eu dawˇ-eu jeˬ maˬ jaˆ-ehˇ pyeuꞈ laˇ-awˇ ya mehꞈ sehꞈ ni, aˬ yawꞈ naw maꞈ-ahˇ mehˇ shuiˇ shuiˇ-eu meh.

¹²Sahˬpaˬ Miˬyehˇ-ahˇ uˬ duˬ tahˬ-eu jawˇ duˬ deuˬ hawˇ-eu lawˇ duˬ deuˬ-ahˇ Heˬsaˬgiˇ teu gʼaˬ neh laˆ cawˆ jiˇ-awˇ, Lawˇ duˬ tiˬ hmˬ-ahˇ tehꞈ-ehˇ gʼoe-awˇ uˬ duˬ tahˬ-awˇ lawˇ-eu shehˇ-eu jeˬ mˇ-awˬ lehˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ ehˇ-euˬ maˬ ngeuˇ-a loˇ.

¹³Ngaˬ-euˬ aˬ poeˬ aˬ bawˇ deuˬ hawˇ-eu ngaˬ neh aˬ cawˬ-euˬ miˇ kʼahˬ deuˬ-ahˇ aˬ joˆ-ehˇ jahˇ nehˬ-euˬ naw maꞈ maˬ siˬ nya te loˇ. Tsawˇ jeuˬ kʼoeˇ deuˬ-euˬ miˬ yehˇ deuˬ neh, yawˬ ha-euˬ tsawˇ jeuˬ-ahˇ Aˬshuˇliˆ sahˬ paˬ-euˬ laꞈ-ahˇ neh ka kʼoꞈ nehˬ-euˬ aˬ myah jaˆ haw taˬ.

¹⁴Miˇ kʼahˬ kʼoeˇ deuˬ-euˬ miˬ yehˇ deuˬ nga maꞈ-euˬ laꞈ-ahˇ neh aˬ yawꞈ maꞈ-euˬ miˇ kʼahˬ-ahˇ ka kʼoꞈ doˆ nehˬ-euˬ aˬ myah gaˬ haw teˬ. Toˆ-ehˇ ngeuˇ naˇ, naw maꞈ-euˬ miˬ yehˇ naw maꞈ-ahˇ ka kʼoꞈ nehˬ laꞈ tehꞈ-a lehˇ aˬ jeˬ miˇ neh noeˬ te.

¹⁵Heˬsaˬgiˇ naw maꞈ-ahˇ jaˬ myawꞈ myawꞈ-awˇ mehˇ shuiˇ shuiˇ gaˇ taˬ naˇ haˬ. Aˬ yawꞈ ehˇ gaˇ taˬ jah. Miˇ kʼahˬ aˬ geu kʼahˬ-euˬ miˬ yehˇ maˬ kaˬ, yawˬ ha-euˬ tsawˇ jeuˬ-ahˇ Aˬshuˇliˆ sahˬ paˬ-euˬ laꞈ-ahˇ neh maˬ ka kʼoꞈ nehˬ nya-a. Kʼoeˇ miˇ neh naw maꞈ-euˬ miˬyehˇ teu gʼaˬ kʼawꞈ, naw maꞈ-ahˇ maˬ ka kʼoꞈ nehˬ nya-eu yaw duˬ baw meh.”

¹⁶Aˬshuˇliˆ tsawˇ haˬ yaw huiˬ yaw mahˇ kʼoeˇ deuˬ-aˬ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ maˬ ehˇ, Sahˬpaˬ Miˬyehˇ-euˬ zaˬ kʼaˆ Heˬsaˬgiˇ-ahˇ maˬ ehˇ, kʼoeˇ naˆ maˬ tseˇ doeˇ-eu dawˬ ngehˬ daˆ nehˬ yaꞈ-euˬ meh.

¹⁷Aˬshuˇliˆ sahˬ paˬ-aˬ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ sahˬ boꞈ boꞈ-awˇ heu loꞈ-ehˇ yehˬ bawˬ sehˇ lu-ehˇ ehˇ-euˬ meh. “Tsawˇ jeuˬ nui deuˬ-euˬ miˬ yehˇ deuˬ yawˬ ha-euˬ tsawˇ jeuˬ-ahˇ ngaˬ-euˬ aˬ laꞈ laꞈ kʼoeˇ neh maˬ ka kʼoꞈ nehˬ nya-eu loꞈ-ehˇ, Heˬsaˬgiˇ-euˬ miˬ yehˇ kʼawꞈ aˬ yawꞈ-euˬ tsawˇ jeuˬ-ahˇ maˬ ka kʼoꞈ nya-aˇ.”

¹⁸Meuˬ meuˬ lahˇ kʼoeˇ taˆ daˆ luꞈ-eu Yeˬluˇsaˬlehˬ tsawˇ haˬ deuˬ bi guˆ-iˇ-awˇ, Yeˬluˇsaˬlehˬ meuˬ-ahˇ yaw awˇ laꞈ-ehˇ deuˆ gʼaˬ nya ni, Aˬshuˇliˆ tsawˇ haˬ yaw huiˬ yaw mahˇ kʼoeˇ deuˬ Aˬshuˇliˆ sahˬ paˬ neh boꞈ taˬ-euˬ dawˬ kʼoeˇ deuˬ-ahˇ Heˬbyehˇ dawˬ-ahˇ neh yaw kʼaˆ-ehˇ guˇ guˇ-ehˇ dzawˇ gaˬ nehˬ-euˬ meh.

¹⁹Tsawˇ haˬ zaˬ-euˬ aˬ laꞈ neh tehˆ taˬ-euˬ tahˬ pahˬ aˬ ma mawˇ kawˇ pyeuꞈ-eu tsawˇ jeuˬ nui deuˬ-euˬ miˬ yehˇ deuˬ gaˇ kawˆ aˬ yawꞈ maꞈ ja gaˇ duˇ ni, Yeˬluˇsaˬlehˬ-euˬ Miˬyehˇ gaˇ kawˆ aˬ yawꞈ maꞈ ja-eu meh.

²⁰Kʼoeˇ ngeh, sahˬ paˬ Heˬsaˬgiˇ hawˇ-eu Aˬmoˆ-euˬ aˬ li Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Iˇsaˬyaˇ aˬ nyaꞈ, Miˬyehˇ bi caw ba le-eu gʼaˇ duˬ guiˬ lahˬ shaˇ-euˬ meh.

²¹Sahˬpaˬ Miˬyehˇ neh mˬ taˆ gʼaˬ kʼehˇ pyehˬ gʼeh leꞈ-awˇ, Aˬshuˇliˆ guiˇ maꞈ-euˬ yehˇ deuˬ hawˇ-eu yaw huiˬ yaw mahˇ deuˬ-ahˇ bi sehꞈ-euˬ meh. Kʼoeˇ miˇ neh, Aˬshuˇliˆ sahˬpa kʼoeˇ gʼaˬ nui ma cawˆ-eu laꞈ kʼoeˇ, aˬ yawꞈ-euˬ miˇ kʼahˬ-ahˇ gʼoꞈ leˇ-euˬ meh. Kʼoeˇ naˇ, aˬ yawꞈ-euˬ miˬ yehˇ-euˬ uˬ duˬ tahˬ nymˇ laꞈ kʼoeˇ aˬ yawꞈ jawˇ luꞈ-eu aˇ nah tiˬ nah-ahˇ, aˬ yawꞈ-euˬ aˬ li tiˬ deuˬ mi cehˇ yuˇ-awˇ aˬ yawꞈ-ahˇ sehꞈ-euˬ meh.

²²Kʼoeˇ loꞈ-ehˇ jahˇ-awˇ, Aˬshuˇliˆ sahˬ paˬ Saˬneˬkaˬliˇ-euˬ aˬ laꞈ laꞈ kʼoeˇ hawˇ-eu, muiˇ-eu tsawˇ haˬ nui deuˬ-euˬ aˬ laꞈ laꞈ kʼoeˇ, sahˬ paˬ Heˬsaˬgiˇ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ Sahˬpaˬ Miˬyehˇ ka kʼoꞈ nehˬ-awˇ, aˬ yawꞈ-euˬ tsawˇ haˬ deuˬ, dawˬ peh jawˇ-eu tsawˇ jeuˬ deuˬ-ahˇ guˆ kʼaˇ maˬ za ni bi dehꞈ-euˬ meh.

²³Tsawˇ haˬ gʼawˬ mya ni Yeˬluˇsaˬlehˬ meuˬ-ahˇ laˇ-awˇ, Sahˬpaˬ Miˬyehˇ-ahˇ damˬ nehˬ laˇ-euˬ uˬ taꞈ, Heˬsaˬgiˇ gʼaˇ duˬ kʼawꞈ laꞈ sawˬ yuˇ laꞈ-euˬ meh. Kʼoeˇ ngeh neh naˇ, tsawˇ jeuˬ dawˬ tawˆ luꞈ Heˬsaˬgiˇ-ahˇ yaw zeu baw-euˬ meh.

²⁴Aˇ yamˬ kʼoeˇ yamˬ laꞈ kʼoeˇ, sahˬ paˬ Heˬsaˬgiˇ shiˇ taw tehˬ ni naˇ laˇ-euˬ meh. Aˬ yawꞈ guiˬ lahˬ shaˇ-awˇ, aˬ yawꞈ jawˇ saˇ doˆ laˇ-eu lehˇ gʼeh-eu gaˇ kawˆ Sahˬpaˬ Miˬyehˇ aˬ yawꞈ-ahˇ shaˇ kiˇ tiˬ jeˬ bi mawˇ-euˬ meh.

²⁵Ehˇ kʼawꞈ, Heˬsaˬgiˇ-aˬ, nui ma huiˬ-eu mahˇ-eu jeˬ ahˇ-awˇ, Sahˬpaˬ Miˬyehˇ neh aˬ yawꞈ-ahˇ caw ba nehˬ-euˬ guiˬ lahˬ-ahˇ maˬ noeˬ keuˆ-a. Kʼoeˇ miˇ neh, Sahˬpaˬ Miˬyehˇ nui ma pehˇ-eu jeˬ-ahˇ Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ ya daˬ-euˬ meh.

²⁶Ehˇ kʼawꞈ ni, aˇ saˬ saˬ laˇ ngeh, Heˬsaˬgiˇ hawˇ-eu Yeˬluˇsaˬlehˬ tsawˇ haˬ iˬ baˇ noeˬ poˆ-awˇ nui ma nahˬ yu ni taˬ-euˬ miˇ neh, Heˬsaˬgiˇ ziˇ dehꞈ jiˇ ngeh keuˆ ni Sahˬpaˬ Miˬyehˇ aˬ yawꞈ maꞈ-ahˇ maˬ kʼehˬ maˬ kʼaˆ nehˬ ni byehˇ-euˬ meh.

²⁷Sahˬ paˬ Heˬsaˬgiˇ smˇ muiˬ muiˬ dui dui laˇ-awˇ, tsawˇ haˬ yawˬ gʼaˬ na luꞈ aˬ yawꞈ-ahˇ taˬ huiˬ taˬ mahˇ-euˬ meh. Aˬ yawꞈ-euˬ shuiˇ deuˬ pyuˇ deuˬ, aˇ poeˬ kʼaˆ-eu kʼaˬ lo sehˇ deuˬ, yaw saw gʼawˬ mya jeˬ hawˇ-eu aˇ poeˬ kʼaˆ-eu mˇ myawˬ deuˬ bi jaˆ-eu gʼaˇ duˬ, myawˬ gahˬ taˬ-eu nymˇ deuˬ aˬ yawꞈ tsoˆ-euˬ meh.

²⁸Aˬ yawꞈ-euˬ cehˇ deuˬ, aˬ gaꞈ dzaˇ uiˇ deuˬ hawˇ-eu saˬ loˬ tsiˇ deuˬ taˬ-eu cehˇ jiˇ deuˬ tsoˆ-eu uˬ taꞈ, mawˇ neˇ kuˆ deuˬ hawˇ-eu yawˇ yawˇ kuˆ deuˬ kʼawꞈ aˬ yawꞈ tsoˆ-euˬ meh.

²⁹Kʼoeˇ uˬ taꞈ, yawˇ deuˬ, mawˇ neˇ deuˬ hawˇ-eu pyuˇ shuiˇ myawˬ gahˬ gʼawˬ mya ni Miˬyehˇ neh aˬ yawꞈ-ahˇ paˇ biꞈ-euˬ miˇ neh, meuˬ gʼawˬ mya meuˬ aˬ yawꞈ tsoˆ-euˬ meh.

³⁰Sahˬ paˬ Heˬsaˬgiˇ-aˬ, Giˇhoˬ lawˇ gawˆ-ahˇ tuiˆ tsoeˬ-awˇ, Yeˬluˇsaˬlehˬ-euˬ meuˬ lahˇ laꞈ kʼoeˇ iˇ pahˬ pahˬ doˆ-euˬ meh. Aˬ yawꞈ neh kʼaˇ noeˬ taˬ-euˬ yawˬ jeˬ na luꞈ mˇ pyeuꞈ nya-euˬ meh.

³¹Baˬbuˇloˬ sahˬ paˬ neh tsawˇ haˬ pyehˬ gʼeh leꞈ-awˇ, Yuˇdaˆ miˇ kʼahˬ laꞈ kʼoeˇ tiˬ jawˇ-iˬ maˬ pyeuꞈ laˇ haw-euˬ zahˬ leˇ paˬ-ehˇ gʼeh-eu jeˬ pyeuꞈ laˇ taˬ-euˬ gaˇ bi pyehˆ tseˇ haw le ngeh kʼawꞈ, aˬ yawꞈ-euˬ nui noeˬ bi mˇ-awˇ, aˬ yawꞈ-euˬ nui ma-ahˇ Miˬyehˇ lawˬ haw-euˬ meh.

³²Sahˬ paˬ Heˬsaˬgiˇ neh kʼaˇ mˇ kʼaˇ shaˇ-euˬ gaˇ kawˆ yawˬ jeˬ na luꞈ hawˇ-eu, Sahˬpaˬ Miˬyehˇ-ahˇ aˬ yawꞈ saˇ jaˇ ziꞈ-awˇ dehꞈ-euˬ gaˇ kawˆ deuˬ-ahˇ, Aˬmoˆ-euˬ aˬ li Iˇsaˬyaˇ neh Miˬyehˇ gʼaˇ duˬ ngehˬ dah-euˬ sahˬ boꞈ laꞈ kʼoeˇ maˬ ehˇ, Yuˇdaˆ sahˬ paˬ deuˬ hawˇ-eu Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ maˬ ehˇ, boꞈ ahˇ taˬ-euˬ meh.

³³Aˬ yawꞈ shiˇ-awˇ, sahˬ paˬ-euˬ lmˬ bymˇ laꞈ taˆ pyawˬ-ahˇ aˬ yawꞈ-ahˇ baꞈ pahˬ-euˬ meh. Aˬ yawꞈ shiˇ ngeh jawˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ dawˬ tawˆ luꞈ aˬ yawꞈ-ahˇ taˬ huiˬ taˬ mahˇ dui dui-euˬ meh. Kʼoeˇ naˇ, aˬ yawꞈ-euˬ aˬ li Maˬnaˇseˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.