Read Akha 2 Laˬsaˬbaˬ 34 Bible Online

2 Laˬsaˬbaˬ 34 - Akha bible

2 Laˬsaˬbaˬ 34

¹Yawˇshiˆ-aˬ, yehꞈ kʼoꞈ kʼawˆ ngeh Yuˇdaˆ miˇ kʼahˬ-ahˇ uˆ lahˇ-eu sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ smˬ tseˇ tiꞈ kʼoꞈ uˆ lahˇ-euˬ meh.

²Sahˬpaˬ Miˬyehˇ nui ma tsaˬ-eu jeˬ-ahˇ aˬ yawꞈ mˇ-euˬ meh. Aˬ yawꞈ-euˬ aˬ poeˬ sahˬ paˬ Daˬbiˇ-ahˇ aˬ yawꞈ dzaw geuꞈ-awˇ, Miˬyehˇ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ yaw muiˬ paˬ-ehˇ caw teh-euˬ meh.

³Yawˇshiˆ sahˬ paˬ geuꞈ-euˬ yehꞈ kʼoꞈ tiˬ kʼoꞈ keuˆ laˇ-awˇ, aˬ yawꞈ zaˬ guˬ guˬ zaˬ pyeuꞈ luꞈ ngeh, aˬ yawꞈ-euˬ aˬ poeˬ sahˬ paˬ Daˬbiˇ-euˬ Miˬyehˇ-ahˇ uˬ duˬ tahˬ-euˬ meh. Kʼoeˇ naˇ kʼah, oeˬ kʼoꞈ keuˆ laˇ ngeh, lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ maˬ ehˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ-ahˇ maˬ ehˇ, tahˬ pahˬ aˬ ma mawˇ kawˇ nui deuˬ dawˬ tawˆ luꞈ-ahˇ maˬ ehˇ, aˬ yawꞈ laˆ cawˆ nehˬ jiˇ-euˬ meh.

⁴Aˬ yawꞈ-euˬ tsawˇ haˬ deuˬ-ahˇ aˬ yawꞈ kʼehˇ gʼeh-awˇ, Baˬlaˇ miˬ yehˇ-ahˇ uˬ duˬ tahˬ-eu jawˇ duˬ deuˬ hawˇ-eu, kʼoeˇ-euˬ dawˬ peh jaˆ-eu yaw saw jeˬ doꞈ damˬ-eu lawˇ duˬ deuˬ-ahˇ bi deh pyaˆ jiˇ-euˬ meh. Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ hawˇ-eu tahˬ pahˬ aˬ ma mawˇ kawˇ nui deuˬ dawˬ tawˆ luꞈ-ahˇ aˬ yawꞈ maꞈ laˆ meuˇ laˆ loeˇ jiˇ-awˇ, tahˬ pahˬ aˬ ma mawˇ kawˇ kʼoeˇ deuˬ-ahˇ lawˇ nehˬ shehˇ nehˬ-euˬ tsawˇ haˬ deuˬ-euˬ lmˬ bymˇ kʼoeˇ taˆ byaˆ-euˬ meh.

⁵Lawˇ ciꞈ zaˬ deuˬ-euˬ piˇ ma deuˬ-euˬ shaˬ yoeˬ-ahˇ, aˬ yawꞈ maꞈ uˬ duˬ tahˬ gaˇ jaˆ-eu lawˇ duˬ kʼoeˇ taˆ aˬ yawꞈ dzah puiˆ-euˬ meh. Kʼoeˇ loꞈ-ehˇ jahˇ-eu laꞈ kʼoeˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ aˬ yawꞈ mˇ shawˇ-euˬ meh.

⁶Maˬnaˇseˬ miˇ kʼahˬ, Eˇpaˬleˬ miˇ kʼahˬ, Suˇmoˬ miˇ kʼahˬ hawˇ-eu, laꞈ taˆ paw Naˬtaˬliˇ miˇ kʼahˬ-ahˇ keuˆ ni jaˆ-eu meuˬ deuˬ hawˇ-eu meuˬ kʼoeˇ deuˬ jawˬ jawˬ-ehˇ jaˆ-eu meuˬ tsoeˬ pu tsoeˬ dawˬ tawˆ luꞈ-ahˇ kʼawꞈ, aˬ yawꞈ kʼoeˇ loꞈ-ehˇ jahˇ nehˬ-euˬ meh.

⁷Laꞈ taˆ paw jaˆ-eu Iˇsaˬleˬlaˆ miˇ kʼahˬ doe ni Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ hawˇ-eu lawˇ duˬ deuˬ-ahˇ aˬ yawꞈ deh pyaˆ-awˇ, tahˬ pahˬ aˬ ma mawˇ kawˇ nui deuˬ-ahˇ laˆ meuˇ laˆ loeˇ jiˇ nehˬ-euˬ uˬ taꞈ, yaw saw jeˬ doꞈ damˬ-eu lawˇ duˬ dawˬ tawˆ luꞈ-ahˇ laˆ kʼehꞈ laˆ kʼoeˆ jiˇ nehˬ-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ aˬ yawꞈ gʼoꞈ-iˇ-euˬ meh.

⁸Sahˬ paˬ Yawˇshiˆ sahˬ paˬ geuꞈ-euˬ tseˇ yehꞈ kʼoꞈ keuˆ laˇ-awˇ, lawˇ ciꞈ zaˬ-euˬ uˬ duˬ tahˬ-eu jeˬ-ahˇ aˬ yawꞈ laˆ piˬ laˆ byoˆ-eu laꞈ kʼoeˇ Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ mˇ shawˇ gʼaˬ ngeh, Miˬyehˇ pyeuꞈ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ bi laˆ saˆ-eu gʼaˇ duˬ, Aˬzaˬliˇ-euˬ aˬ li Shaˇpaˬ, Yeˬluˇsaˬlehˬ meuˬ-ahˇ uˆ lahˇ-eu gʼaˬ pyeuꞈ-eu Mawˇseˬyaˇ hawˇ-eu Yoˇaˬhaˆ-euˬ aˬ li yaw huiˬ yaw mahˇ tiˬ gʼaˬ pyeuꞈ-eu Yawˇaˬ, heu smˇ gʼaˬ-ahˇ aˬ yawꞈ pyehˬ gʼeh-euˬ meh.

⁹Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ loꞈ-eu Leˬbiˇ tsawˇ haˬ deuˬ neh taꞈ uiˬ taˬ-euˬ pyuˇ kʼoeˇ, Piˇ ma Yaw huiˬ gʼaˬ pyeuꞈ-eu Hiˇlaˬkiˇ-ahˇ aˬ yawꞈ maꞈ a nehˬ-euˬ meh. (Pyuˇ kʼoeˇ deuˬ-ahˇ, Eˇpaˬleˬ tsawˇ jeuˬ, Maˬnaˇseˬ tsawˇ jeuˬ hawˇ-eu laꞈ taˆ kʼahˬ pyeuꞈ-eu Iˇsaˬleˬlaˆ miˇ kʼahˬ-ahˇ jawˇ-eu Iˇsaˬleˬlaˆ tsawˇ jeuˬ nui deuˬ-ahˇ maˬ ehˇ, Yuˇdaˆ miˇ kʼahˬ, Beˬyaˬmiˬ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ maˬ ehˇ, taꞈ uiˬ taˬ-euˬ pyuˇ pyeuꞈ-eu meh.)

¹⁰Kʼoeˇ naˇ, pyuˇ kʼoeˇ deuˬ-ahˇ Uˬ duˬ tahˬ nymˇ nymˇ ma laˆ saˆ gaˇ haw-eu pyaˆ-eu kʼoeˇ smˇ gʼaˬ-euˬ laꞈ-ahˇ a nehˬ-awˇ, laˆ saˆ-eu gaˇ mˇ-eu tsawˇ haˬ deuˬ-ahˇ gʼaˬ gaˇ poeˬ bi biꞈ-euˬ meh.

¹¹Yuˇdaˆ sahˬ paˬ deuˬ-euˬ laꞈ-ahˇ bi cawˆ-iˇ-euˬ deuˬ paˇ laˆ saˆ muiˬ-eu gʼaˇ duˬ loˬ-eu kʼaˬ lo hawˇ-eu daˇ kawˬ bi zeuˇ-eu lehˇ, laꞈ myawˬ laꞈ sawˆ nya-eu deuˬ hawˇ-eu kʼaˬ lo tsaˬ byaˆ gawˬ nya-eu deuˬ-ahˇ pyuˇ kʼoeˇ aˬ yawꞈ maꞈ biꞈ-euˬ meh.

¹²Kʼoeˇ gaˇ gaˇ mˇ-euˬ tsawˇ haˬ deuˬ nui ma dawˇ dui dui-eu meh. Aˬ yawꞈ maꞈ-ahˇ haw-eu pyaˆ-eu Leˬbiˇ tsawˇ haˬ oeˬ gʼaˬ jawˇ-eu meh. Kʼoeˇ deuˬ-aˬ, Meˬlaˬliˇ aˇ jeuˬ laꞈ kʼoeˇ Jaˬhaˆ hawˇ-eu Awˇbaˬdiˇ, Kawˇhaˆ aˇ jeuˬ laꞈ kʼoeˇ Zaˬkaˬliˇ hawˇ-eu Meˬshuˇlamˬ heu deuˬ meh.

¹³Leˬbiˇ tsawˇ haˬ tiˬ paˆ na deuˬ-aˬ, daˇ kawˬ daˇ laꞈ baꞈ ha gaˇ maˬ ehˇ, gaˇ gʼawˬ mya jeˬ mˇ luꞈ-eu tsawˇ haˬ deuˬ-ahˇ maˬ ehˇ, aˬ yuiꞈ geuꞈ-awˇ haw-euˬ pyaˆ-euˬ meh. Tiˬ paˆ na deuˬ-aˬ, jaˇ laˇ yuˇ-eu gaˇ mˇ-awˇ, tiˬ paˆ na deuˬ-aˬ, loꞈ piˇ-eu deuˬ geuꞈ-euˬ meh.

¹⁴Uˬ duˬ tahˬ nymˇ nymˇ ma laꞈ kʼoeˇ jeˬ hmˬ taˬ-euˬ pyuˇ kʼoeˇ deuˬ baꞈ doˆ luꞈ ngeh, Miˬyehˇ neh Moˇseˬ-ahˇ biꞈ-euˬ zahˇ dawˬ kʼoꞈ dawˬ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ sahˬ boꞈ-ahˇ Hiˇlaˬkiˇ mawˇ-euˬ meh.

¹⁵Kʼoeˇ ngeh, “Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ zahˇ dawˬ kʼoꞈ dawˬ sahˬ boꞈ ngaˇ mawˇ-euˬ ma” lehˇ Shaˇpaˬ-ahˇ aˬ yawꞈ ehˇ nehˬ-awˇ, sahˬ boꞈ kʼoeˇ Shaˇpaˬ-ahˇ biꞈ-euˬ meh.

¹⁶Shaˇpaˬ gʼaˬ sahˬ boꞈ kʼoeˇ-ahˇ sahˬ paˬ jawˇ gaˇ yuˇ gʼeh-awˇ, “Nawˬ neh dawˬ kʼaˇ biꞈ taˬ-euˬ yawˬ jeˬ na luꞈ-ahˇ nga maꞈ mˇ luꞈ-eu ma.

¹⁷Uˬ duˬ tahˬ nymˇ nymˇ ma laꞈ kʼoeˇ jeˬ hmˬ taˬ-euˬ pyuˇ deuˬ nga maꞈ baꞈ doˆ-awˇ, gaˇ mˇ luꞈ-eu tsawˇ haˬ deuˬ hawˇ-eu aˬ yawꞈ maꞈ-ahˇ haw luꞈ pyaˆ luꞈ-eu deuˬ-ahˇ biꞈ nehˬ-euˬ ma” lehˇ ehˇ nehˬ-euˬ meh.

¹⁸Kʼoeˇ naˇ, “Hiˇlaˬkiˇ neh ngaˬ-ahˇ sahˬ boꞈ tiˬ dmˬ biꞈ laꞈ-euˬ meh” lehˇ ehˇ-awˇ, sahˬ paˬ-euˬ mehˬ shi gui mehˬ nehˬ-euˬ meh.

¹⁹Zahˇ dawˬ kʼoꞈ dawˬ sahˬ boꞈ kʼoeˇ gui gaˇ sahˬ paˬ ya gaˬ ngeh, yawˬ ha dm luꞈ-eu mehˬ tsoeˬ cehˬ pyaˬ-euˬ meh.

²⁰Kʼoeˇ naˇ, Hiˇlaˬkiˇ, Shaˇpaˬ-euˬ aˬ li Aˬhiˇkamˬ, Miˇkaˬyaˇ-euˬ aˬ li Aˬbaˬdoˬ, saˇ naˇ gaˇ paw aˬ yuiꞈ geuꞈ-eu Shaˇpaˬ hawˇ-eu, sahˬ paˬ-euˬ kuiˇ laꞈ geuꞈ-eu Aˬsaˬyaˇ aˬ ha maꞈ-ahˇ aˬ yawꞈ heu loꞈ-ehˇ dawˬ biꞈ-euˬ meh.

²¹“Sahˬpaˬ Miˬyehˇ jawˇ gaˇ le-awˇ, ngaˬ-euˬ gaˇ kawˆ maˬ ehˇ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ deuˬ-euˬ gaˇ kawˆ maˬ ehˇ, naˇ haˬ-iˇ-awˬ. Sahˬ boꞈ heu dmˬ laꞈ kʼoeˇ aˬ joˆ-ehˇ mehˬ taˬ tsoˆ taˬ-euˬ nga lehˇ pyehˆ tseˇ duˬ-awˬ. Aˬ dui-euˬ aˬ poeˬ aˬ bawˇ deuˬ Sahˬpaˬ Miˬyehˇ-euˬ dawˬ-ahˇ maˬ naˇ haˬ-ehˇ, sahˬ boꞈ heu dmˬ laꞈ kʼoeˇ ehˇ taˬ-euˬ loꞈ-ehˇ maˬ mˇ-euˬ miˇ neh, aˬ dui-ahˇ Sahˬpaˬ Miˬyehˇ nui ma pehˇ luꞈ meh.”

²²Sahˬ paˬ neh dawˬ biꞈ-euˬ loꞈ-ehˇ, Hiˇlaˬkiˇ aˬ ha maꞈ-aˬ, Yeˬluˇsaˬlehˬ meuˬ yaw shuiꞈ tsoˆ taˬ-euˬ paw dzeˇ jawˇ-eu Huˇlaˬdaˬ lehˇ myahˇ-euˬ Miˬyehˇ gʼaˇ duˬ ngehˬ dah-eu zaˬ miˬ zaˬ tiˬ gʼaˬ jawˇ gaˇ iˇ-awˇ naˇ haˬ-euˬ meh. (Zaˬ miˬ zaˬ kʼoeˇ gʼaˬ-euˬ kʼaˬ dzeˇ zaˬ gʼaˬ-aˬ, Haˬlaˬhaˇ-euˬ aˬ li Tiˇkaˬbaˬ-euˬ aˬ li pyeuꞈ-eu Uˬ duˬ tahˬ nymˇ nymˇ ma laꞈ kʼoeˇ pehˇ kʼahˬ pehˇ mahˇ jeˬ hmˬ-eu gaˇ mˇ luꞈ-eu Shaˬlmˬ lehˇ kuˇ-eu gʼaˬ meh.) Kʼaˇ pyeuꞈ laˇ-euˬ gaˇ kawˆ deuˬ Hiˇlaˬkiˇ aˬ ha maꞈ zaˬ miˬ zaˬ kʼoeˇ gʼaˬ-ahˇ dzawˇ nehˬ-euˬ meh.

²³Kʼoeˇ ngeh, zaˬ miˬ zaˬ kʼoeˇ gʼaˬ ehˇ-eu, “Naw maꞈ gʼoꞈ-iˇ-awˇ sahˬ paˬ-ahˇ heu loꞈ-ehˇ ehˇ nehˬ-iˇ-awˬ.

²⁴Sahˬpaˬ Miˬyehˇ heu loꞈ-ehˇ ehˇ-eu meh. ‘Sahˬ paˬ-ahˇ gui mehˬ nehˬ-euˬ sahˬ boꞈ paˇ dmˬ kʼoeˇ dmˬ laꞈ kʼoeˇ boꞈ ahˇ taˬ-euˬ kʼehˬ-eu kʼaˆ-eu jeˬ Yeˬluˇsaˬlehˬ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ kʼoeˇ taˆ ngaˇ bi keuˆ le ma.

²⁵Aˬ yawꞈ maꞈ ngaˬ-ahˇ byehˇ dzeh-awˇ, miˬ yehˇ nui deuˬ-ahˇ lawˇ-eu shehˇ-eu laꞈ kʼoeˇ, aˬ yawꞈ maꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ baˬ da neh ngaˬ-ahˇ nui ma bi pehˇ laꞈ-euˬ meh. Yeˬluˇsaˬlehˬ meuˬ-ahˇ ngaˇ nui ma pehˇ laˇ-awˇ, ngaˇ nui ma pehˇ-eu heu tiˬ jawˇ-iˬ maˬ paˇ taˬ leˇ nya meh.

²⁶Iˇsaˬleˬlaˆ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ, Yuˇdaˆ sahˬ paˬ-ahˇ heu loꞈ-ehˇ ehˇ-eu ma. Sahˬ boꞈ paˇ dmˬ teu dmˬ laꞈ kʼoeˇ boꞈ taˬ-euˬ jeˬ-ahˇ nawˇ naˇ haˬ geuꞈ-euˬ meh.

²⁷Yeˬluˇsaˬlehˬ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ-ahˇ ngaˇ kʼehˬ nehˬ ma lehˇ ehˇ taˬ-euˬ gaˇ nawˇ ya gaˬ ngeh, nawˬ-euˬ nui ma noeˬ paˇ-awˇ, mehˬ tsoeˬ cehˬ pyaˬ-awˇ ngoeˇ-eu laꞈ kʼoeˇ, ngaˬ-euˬ mehˬ shi nawˇ nui ma nahˬ yu ni taˬ-euˬ meh. Nawˬ-euˬ shaˇ dawˬ-ahˇ ngaˇ ya gaˬ gʼaˬ-euˬ ma.

²⁸Yeˬluˇsaˬlehˬ meuˬ kʼoeˇ taˆ ngaˇ bi keuˆ le-eu lehˇ gʼeh-eu kʼehˬ-eu kʼaˆ-eu jeˬ, nawˇ kʼaˇ dehꞈ kʼoeˇ keuˆ ni maˬ bi keuˆ le-ehˇ ngaˇ nyi naˬ ma. Nawˬ-ahˇ nui ma saˇ lehˆ ni ziˇ bi dehꞈ jiˇ ma’ lehˇ sahˬ paˬ-ahˇ tsaꞈ nehˬ-iˇ-awˬ.” Aˬ yawꞈ maꞈ gʼeh dawˬ kʼoeˇ dawˬ yuˇ-awˇ sahˬ paˬ Yawˇshiˆ jawˇ gaˇ gʼoꞈ-iˇ-euˬ meh.

²⁹Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ kʼaˇ jawˇ-eu aˬ yuiꞈ aˬ tsu deuˬ-ahˇ Yawˇshiˆ kuˇ uiˬ-euˬ meh.

³⁰Kʼoeˇ naˇ, piˇ ma deuˬ, Leˬbiˇ tsawˇ haˬ deuˬ hawˇ-eu, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu smˇ muiˬ aˬ da deuˬ hawˇ-eu iˇ shaˬ zaˬ deuˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, Uˬ duˬ tahˬ nymˇ nymˇ ma-ahˇ aˬ yawꞈ le-euˬ meh. Aˬ yawꞈ maꞈ dawˬ tawˆ luꞈ mehˬ shi, Uˬ duˬ tahˬ nymˇ nymˇ ma laꞈ kʼoeˇ mawˇ-euˬ sahˬ boꞈ paˇ dmˬ kʼoeˇ dmˬ dmˬ lah ni sahˬ paˬ gui-euˬ meh.

³¹Sahˬpaˬ Miˬyehˇ-euˬ ehˇ dawˬ-ahˇ naˇ haˬ geuꞈ-eu gʼaˇ duˬ maˬ ehˇ, aˬ yawꞈ-euˬ zahˇ dawˬ kʼoꞈ dawˬ hawˇ-eu aˬ yawꞈ neh mehˬ nehˬ tsoˆ nehˬ-euˬ dawˬ deuˬ-ahˇ nui ma gʼawˇ mawˇ dawˬ tawˆ luꞈ caw teh-eu gʼaˇ duˬ maˬ ehˇ, sahˬ boꞈ paˇ dmˬ kʼoeˇ dmˬ boꞈ taˬ-euˬ loꞈ-ehˇ, dawˬ ma saˇ jaˇ dzaˬ taˬ-euˬ dawˬ deuˬ-ahˇ maˬ gʼawˬ-iˇ ni dehꞈ-eu jawˇ-eu gʼaˇ duˬ maˬ ehˇ, sahˬ paˬ-euˬ kʼawˇ zeuˇ dawˬ peh aˬ yawꞈ yawꞈ-awˇ saˇ jaˇ dzaˬ-euˬ meh.

³²Beˬyaˬmiˬ tsawˇ haˬ deuˬ hawˇ-eu Yeˬluˇsaˬlehˬ meuˬ-ahˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ, dawˬ ma saˇ jaˇ-ahˇ caw teh-eu gʼaˇ duˬ saˇ jaˇ bi dzaˬ-euˬ meh. Kʼoeˇ miˇ neh, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ-ahˇ aˬ yawꞈ maꞈ neh dawˬ ma saˇ jaˇ dzaˬ taˬ-euˬ gaˇ caw teh-awˇ dehꞈ-euˬ meh.

³³Iˇsaˬleˬlaˆ tsawˇ jeuˬ deuˬ-euˬ miˇ kʼahˬ doe ni jaˆ-eu nui daˆ daˆ laˇ paˬ-ehˇ gʼeh-eu tahˬ pahˬ aˬ ma mawˇ kawˇ dawˬ tawˆ luꞈ-ahˇ Yawˇshiˆ laˆ cawˆ-awˇ, aˬ yawꞈ kʼaˇ dehꞈ kʼoeˇ keuˆ ni, miˇ kʼahˬ zaˬ deuˬ aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ maˬ byehˇ dzeh ni uˬ duˬ tahˬ-euˬ meh.